Neʼe ʼAu Kumi Te Palatiso

KO TE FAKAMATALA ʼA PASCAL STISI

Neʼe kua fakapōʼuli gaogao, pea neʼe lāvaki te ʼu ala ʼo te kolo ʼo Béziers, ʼi te potu toga ʼo Falani. ʼI tamā sio ki te pena foʼou ʼo te ʼu kaupā ʼo te koloā ʼaē ʼe fakatau ai te ʼu tohi faka lotu, ko ʼau pea mo toku kaumeʼa neʼe ma tohi mata lalahi kiai te ʼu palalau ʼaenī neʼe fai e te tagata fai filosofia Siamani ko Nietzsche: ‘Kua mate te ʼu ʼatua. ʼOfa ke maʼuli loa te Tagata!’ Kae neʼe koteā te tupuʼaga ʼo taku fai te ʼu meʼa ʼaia?

NEʼE ʼau tupu ʼi Falani ʼi te taʼu 1951 ʼi te famili Katolika neʼe haʼu mai Italia. ʼI taku kei veliveli, neʼe mātou ʼolo ʼo mālōlō tuʼumaʼu ʼi te potu toga ʼo Italia. ʼI te potu ʼaia, neʼe tahi nofo te kiʼi kolo mo tana fakatātā ʼo Malia. ʼI taku haʼele fakatahi mo taku kui, neʼe ʼau mulimuli ki te ʼu fakatātā lalahi ʼaia ʼi te ʼu polosesio loaloaga ʼaē neʼe fai ʼi te ʼu moʼuga​—kae neʼe mole ʼau faʼa leleiʼia te faʼahi ʼaia. Neʼe ʼau fakaʼosi taku ako ʼi te faleako neʼe takitaki e te kau Jésuites. Kae neʼe mole ʼau ako ai he meʼa neʼe tupu ai taku fia tui ki te ʼAtua.

Neʼe ʼau kamata ako ʼi te univelesitē ʼi Montpellier ke ʼau liliu ko he tōketā, pea neʼe ʼau kamata fakakaukauʼi ai leva pe koteā te ʼuhiga ʼo te maʼuli. Neʼe lavea kovi taku tāmai ʼi te tau, pea neʼe ʼaoga tuʼumaʼu ke ʼi ai he ʼu tōketā ʼe tokaga kia ia. ʼE mole lelei age koa la mo kapau ʼe pulihi te ʼu tau, ʼi he puli ʼo he temi pea mo he ʼu faiga lahi moʼo faitoʼo te hahaʼi ʼaē neʼe lāvevea ai? Kae ʼi te temi ʼaia, neʼe lolotoga fai te tau ʼi Vitename. Ohage la kia ʼau, ko te puleʼaki pe e tahi ki te kosea ʼo te ʼatefēfē, neʼe ko te pulihi ʼo te meʼa ʼaē ʼe tupu ai te kosea​—ko te suluka. Pea e feafeaʼi ʼo ʼuhiga mo te ʼu mahaki ʼaē ʼe tupu ʼi te ʼu fenua masiva ʼuhi ko te ʼu hoge, pea mo te ʼu mahaki ʼaē ʼe tupu mai te kai lahi ʼa te hahaʼi ʼi te ʼu fenua maʼu koloā? Neʼe mole lelei age koa la mo kapau neʼe tou pulihi te tupuʼaga ʼo te ʼu fihifihia ʼaia, ka mole tou faiga pe ke tou faitoʼo tona ʼu fua kovi? He koʼe kua lahi feiā te ʼu mamahi ʼi te kele? ʼI taku manatu, kua haʼele kovi ʼaupito te sosiete ʼaē ʼe ina lolotoga maumauʼi ia ia totonu, pea neʼe ʼau ʼui neʼe ko te hala ʼaia ʼa te ʼu puleʼaga.

Ko te tohi neʼe ʼau leleiʼia tāfito neʼe tohi e te tagata fakatupu maveuveu, pea neʼe ʼau tau tohi tana ʼu palalau ki te ʼu kaupā. ʼAki te temi, neʼe ʼau liliu mo ʼau ko he tagata fakatupu maveuveu, pea neʼe mole ʼau tui ki he meʼa pea mo fakalogo ki he lao ʼo ʼuhiga mo te aga ʼaē ʼe tonu ke kita fai, pea neʼe mole ʼau fia fakalogo ki he ʼAtua peʼe ki he pule. ʼI taku manatu, ko te ʼAtua pea mo te lotu neʼe ko he ʼu meʼa neʼe fakatuʼutuʼu e te hahaʼi maʼu koloā pea mo te kau takitaki ke feala hanatou puleʼi pea mo fakaʼaogaʼi te hahaʼi. Neʼe hage kia ʼau ʼe nātou ʼui, ‘Koutou gāue kinakina maʼa mātou ʼi te kele, pea ʼe lahi anai tokotou fakapale ʼi selo.’ Kae kia ʼau, neʼe kua ʼosi te temi ʼo te ʼu ʼatua, pea neʼe tonu ke ʼiloʼi e te hahaʼi te faʼahi ʼaia. ʼI taku tohi te ʼu kaupā, neʼe ʼau fakahā age kia nātou te faʼahi ʼaia.

Neʼe mole kei maʼuhiga kia ʼau te faleako ʼuhi ko te faʼahi ʼaia. ʼI te temi ʼaia, neʼe ʼau kamata ako te seokalafia pea mo te ekolosi ʼi te univelesitē ʼi Montpellier ʼaē neʼe agatuʼu ai te kau tūpulaga. ʼI taku ako te ekolosi, neʼe ʼau lotomamahi ʼaupito ʼi taku sio ʼaē ki te kua maumau ʼo te kele.

ʼI te taʼu fuli, lolotoga te temi mālōlō ʼo te temi māfana, neʼe ʼau tāʼofi te ʼu motokā ʼaē ʼe feʼoloʼaki ʼi te ala, pea neʼe ʼau folau ai ia kilometa ʼe lauʼi afe ʼi Eulopa. ʼI taku fagona pea mo taku fai palalau mo te hahaʼi ʼi tanatou ʼu motokā, neʼe ʼau sio mata ai ki te tahi ʼalu ʼo te maʼuli ʼa te hahaʼi ʼo te sosiete ʼaē ʼe tou maʼuʼuli ai. ʼI te tahi lakaga, ʼi taku kumi te palatiso, neʼe ʼau sio ki te matatai matalelei ʼaupito ʼo te kiʼi motu ʼo Kelete, kae neʼe kua ʼaofi te matatai ʼaia e te lolo. Neʼe ʼau lotomamahi ʼaupito ai. Neʼe kei maʼu koa ʼi te kele he koga meʼa ʼe hage ko he palatiso?

ʼE ʼAu Toe Liliu Ki Toku Fenua

ʼI Falani, ko te hahaʼi écologistes neʼe nātou ʼui, ʼe tonu ke toe liliu te hahaʼi ʼo gāue ʼi te ʼu gāueʼaga moʼo fakatokatoka ʼo te ʼu fihifihia ʼo te sosiete. Neʼe ʼau fia gāue kele. Koia, neʼe ʼau totogi ai te ʼapi ʼāfea neʼe faʼu maka ʼi te kiʼi kolo ʼe tuʼu ʼi te vaʼe moʼuga ʼo Cévennes, ʼi te potu toga ʼo Falani. Neʼe ʼau tohi ki toku matapā, “ ʼE mātou loto ki te palatiso ʼi te temi nei,” ko te lea ʼaia ʼa te kau Hippies, te hahaʼi agatuʼu ʼi Amelika. Ko te finemui mai Siamani neʼe haʼu ki tomatou kolo pea neʼe ma nonofo feiā pe ka mole ma ʼohoana. Neʼe mole ma fia ʼohoana ʼi te lameli, he ko te pule ʼo te lameli neʼe ko he tagata fakafofoga ʼo te puleʼaga. Pea neʼe mole ma fia ʼohoana ʼi te ʼēkelesia!

ʼI te ʼaho fuli, neʼe ʼau haʼele kiliʼi vaʼe, pea neʼe loloa toku lauʼulu pea mo toku kava. Neʼe ʼau leleiʼia ʼaupito te to ʼakau pea mo te to magisi. ʼI te temi māfana, neʼe lāulelei te lagi pea neʼe ʼau logo ki te tagi ʼo te ʼu ʼelekihi. Neʼe magoni te ʼu fisiʼi teu, pea neʼe kano lelei ʼosi te ʼu fuaʼi vite pea mo te ʼu fuaʼi fiku ʼaē neʼe ma to! Neʼe hage kia māua, kua ma nonofo ʼi he palatiso.

ʼE ʼAu Kamata Tui Ki Te ʼAtua

ʼI te univelesitē, neʼe ʼau ako ai te faʼufaʼu ʼo te ʼu eveeve ʼo te sino, mo te tuputupu ʼa he kiʼi toe ʼi te fatu ʼo tana faʼe, pea mo te faʼufaʼu ʼo te sino ʼo te tagata, pea neʼe ʼau ōfo ʼi te faigataʼa pea mo te fakaʼaluʼalu lelei ʼo te ʼu meʼa ʼaia. ʼI te temi ʼaia, neʼe kua feala haku sio mata ʼi te ʼaho fuli ki te ʼu meʼa ʼaia neʼe fakatupu, pea neʼe ʼau ʼofolele ʼi te matalelei ʼo te ʼu meʼa ʼaia. ʼI te ʼaho fuli, neʼe ʼāsili taku mālama ki te natula. ʼI te tahi ʼaho, neʼe ʼau ʼalu ʼo haʼele ʼi te ʼu kiʼi moʼuga, pea ʼi taku ʼosi fakakaukauʼi te ʼuhiga ʼo te maʼuli, neʼe mahino ai kia ʼau, ʼe ʼi ai he Tupuʼaga ʼo te ʼu meʼa fuli ʼaia. Neʼe ʼau fakatotonu ai ʼi toku loto, ʼe ʼau tui anai ki te ʼAtua. Ki muʼa atu, neʼe mole ʼau logoʼi he meʼa ʼi toku loto, pea neʼe hage kia ʼau, neʼe ʼau nofo tokotahi. Kae ko te ʼaho ʼaē neʼe ʼau kamata tui ai ki te ʼAtua, neʼe ʼau ʼui ai ʼi toku loto, ‘Pascal, ʼe mole ke toe tokotahi anai.’ Neʼe ko he meʼa fakafiafia ʼaupito kia ʼau.

Mole faʼa fualoa, pea ko ʼau pea mo te fafine ʼaē neʼe ma nonofo, neʼe ma maʼu tamā kiʼi toe fafine​—ko Amandine. Neʼe ʼau ʼofa mamahi kia ia. ʼI taku kua tui ki te ʼAtua, neʼe ʼau kamata mulimuli ki te ʼu pelesepeto ʼaē neʼe ʼau ʼiloʼi ʼo ʼuhiga mo te aga ʼaē ʼe tonu ke kita fai. Neʼe mole ʼau toe kaihaʼa pea mo loi ki te hahaʼi, pea neʼe tokoni ai kia ʼau ke mole ʼau fihifihia mo toku ʼu vāhaʼa fale. ʼE moʼoni, neʼe ʼi ai tamatou ʼu kiʼi fihifihia, pea neʼe mole ʼau nofo moʼoni ʼi te palatiso ʼaē neʼe ʼau fakaʼamu kiai. Ko te hahaʼi gāue fuʼu vite ʼo te kolo, neʼe nātou fakaʼaogaʼi te ʼu meʼa moʼo pulihi te ʼu kiʼi manu pea mo te vao talatala, pea neʼe fakatupu kovi ki taku ʼu magisi. Neʼe mole heʼeki ʼau mahino pe koteā te tupuʼaga ʼo te agakovi ʼa te hahaʼi. Tahi ʼaē meʼa, logope la neʼe lahi te ʼu meʼa ʼaē neʼe ʼau ako ʼo ʼuhiga mo te maʼuli faka famili, kae neʼe ʼau tau fihi mo toku ʼohoana. Neʼe mole lahi homā ʼu kaumeʼa, pea ko nātou ʼaē neʼe ma kaumeʼa mo nātou, neʼe mole nātou aga fakahagatonu, he neʼe nātou uga toku ʼohoana ke mole nofo lelei kia ʼau. Koia, ko te palatiso, neʼe tonu ke lelei age ʼi te ʼaluʼaga ʼaē neʼe ʼau tau mo ia.

Te Tali Ki Taku ʼu Faikole

Neʼe ʼau tau faikole ki te ʼAtua ke ina takitaki ʼau ʼi toku maʼuli. ʼI te tahi ʼAhotapu uhu, neʼe ʼau sio ki te fafine agalelei ʼe higoa ko Irène Lopez, neʼe haʼu mo tana kiʼi tama ki toku matapā. Neʼe ko te Fakamoʼoni ʼa Sehova. Neʼe ʼau fakalogo ki tana fai palalau pea neʼe ʼau tali ke ina toe ʼaʼahi ʼau. Neʼe ʼōmai te ʼu tagata e toko lua ʼo ʼaʼahi mai ʼau. ʼI tamatou fai palalau, neʼe ʼau tāʼofi ia meʼa e lua​—te Palatiso pea mo te Puleʼaga ʼa te ʼAtua. Neʼe ʼau taupau lelei te ʼu manatu ʼaia ʼi toku loto, pea hili kiai ni ʼu māhina, neʼe mahino ai kia ʼau, ʼe tonu anai ke ʼau fakatokatoka toku maʼuli ke ʼalutahi mo te finegalo ʼo te ʼAtua, ke feala ai haku maʼu he leʼo ʼo loto ʼe maʼa pea mo maʼu te fiafia moʼoni.

ʼI te kamata, moʼo faka ʼalutahi tomā maʼuli pea mo te Folafola ʼa te ʼAtua, neʼe lotolelei e toku hoa ke ma ʼohoana. Kae neʼe toe fakakaugā mo te hahaʼi ʼaē neʼe mole nātou fakaʼapaʼapa ki te ʼAtua pea mo tana ʼu lao. ʼI taku liliu mai ki fale ʼi te tahi afiafi, neʼe hoko te meʼa fakapunamaʼuli ʼaupito kia ʼau. Neʼe lāvaki te ʼapi. Neʼe kua mavae toku ʼohoana, ʼo ina ʼave mo ia tamā kiʼi taʼahine ʼaē neʼe taʼu tolu. Lolotoga ni ʼu ʼaho, neʼe ʼau talitali noa ki tanā toe liliu mai. Neʼe mole ʼau tukugakoviʼi te ʼAtua, kae neʼe ʼau faikole ki ai ke tokoni mai.

Mole tuai, pea neʼe ʼau toʼo taku Tohi-Tapu, pea mo heka ʼi toku lalo fuʼu fiku, pea neʼe ʼau kamata lau. Neʼe ʼau leleiʼia ʼaupito taku lautohi ʼaia. Logope la neʼe kua lahi te ʼu tohi ʼa te hahaʼi sivi ʼatamai neʼe ʼau lau, kae neʼe ko te ʼuluaki tohi ʼaia neʼe ʼau maʼu ai te poto moʼoni. Neʼe mahino papau ia kia ʼau, ko te tohi ʼaia ʼe haʼu mai te ʼAtua. Neʼe ʼau ōfo ʼaupito ʼi te faiakonaki ʼa Sesu pea mo tana mahino ki te ʼuhiga moʼoni ʼo te tagata. Neʼe ʼau loto fīmālie ʼi taku lau te ʼu Pesalemo, pea neʼe ʼau punamaʼuli ʼi te fakapotopoto ʼo te ʼu Tāʼaga Lea. Neʼe ʼau mahino ai, logope la ʼe feala ke kita fakaōvi ki te ʼAtua ʼaki takita ako te ʼu meʼa ʼaē neʼe fakatupu, ʼe ko “te ʼu tafatafa pe ia ʼo tana ʼu ala.”​—Sopo 26:⁠14.

Neʼe toe foaki mai e te kau Fakamoʼoni ʼa Sehova te tohi La vérité qui conduit à la vie éternelle pea mo te tohi Comment sʼassurer une vie de famille heureuse.a ʼI taku lau te ʼu tohi ʼaia, neʼe mālama ai taku fakakaukau. Ko te tohi Vérité neʼe tokoni mai ke ʼau mahino pe koʼe neʼe tau te tagata mo te ʼulihi ʼo te kele, te ʼu tau, te ʼāsili kovi ʼo te agamālohi, pea mo te mataku ʼaē ki te tau faka nukeleʼea. Pea ohage ko te fakamelomelo e te kula ʼo te afiafi ʼe laʼā anai te ʼapogipogi, koia ko te ʼu meʼa ʼaia neʼe hoko neʼe ko he ʼu fakamelomelo ʼo te kua ōvi mai ʼo te Puleʼaga ʼa te ʼAtua. Neʼe ʼau fakaʼamu ke ʼau fakahā te tohi Vie de famille ki toku ʼohoana pea mo fakamahino age kia ia, ʼe feala ke ma maʼuli fiafia mo kapau ʼe ma maʼuliʼi te ʼu tokoni faka Tohi-Tapu. Kae neʼe mole kei feala te faʼahi ʼaia.

ʼE ʼAu Tuputupu ʼi Te Faʼahi Fakalaumālie

Neʼe ʼau fia ʼiloʼi te tahi ʼu meʼa ʼo ʼuhiga mo te ʼAtua, koia neʼe ʼau kole ai ki te Fakamoʼoni ʼa Sehova ʼe higoa ko Robert ke ina ʼaʼahi ʼau. Neʼe punamaʼuli ʼaupito ʼi taku fakahā age ki ai, ʼe ʼau fia papitema, pea neʼe kamata atu aipe taku ako Tohi-Tapu. Neʼe ʼau kamata tala atu aipe ki te hahaʼi te ʼu meʼa ʼaē neʼe ʼau ako, pea neʼe ʼau kamata tufa te ʼu tohi ʼaē neʼe ʼau toʼo ʼi te Fale ʼo te Puleʼaga.

Ke feala haku maʼu haku kiʼi falā, neʼe ʼau hū ki te faleako tufuga fale. ʼI taku ʼiloʼi te ʼaoga ʼo te Folafola ʼa te ʼAtua ki te maʼuli ʼo te hahaʼi, koia neʼe ʼau fakaʼaogaʼi ai te ʼu faigamālie fuli ke ʼau fai faka mafola ki toku ʼu kaugā gāue pea mo taku ʼu faiako. ʼI te tahi po, neʼe ʼau felāveʼi mo Serge. Neʼe haʼele mo tana ʼu nusipepa. Neʼe ʼau ʼui age ki ai, “ ʼE ʼau sio ʼe ke leleiʼia te lautohi.” Pea neʼe ina tali mai, “Ei, kae kua ʼau fiu ʼi taku lau te ʼu meʼa ʼaenī.” Pea neʼe ʼau kole age kia ia, “ ʼE ke fia lau he tohi ʼe lelei ʼaupito?” Neʼe lelei tamā fai palalau ʼo ʼuhiga mo te Puleʼaga ʼo te ʼAtua, pea neʼe ina toʼo hana ʼu tohi faka Tohi-Tapu. ʼI te vāhaʼa ʼaē neʼe hoa kiai, neʼe haʼu mo ʼau ki te Fale ʼo te Puleʼaga, pea neʼe ina kamata ako ai te Tohi-Tapu.

ʼI te tahi ʼaho, neʼe ʼau kole kia Robert peʼe feala ke ʼau ʼalu ʼo fai faka mafola. Neʼe ʼalu ʼo vakaʼi tana puha, pea neʼe ina toʼo mai ai toku māfana. ʼI te ʼAhotapu ʼaē neʼe hoa kiai, neʼe ʼau kamata fai faka mafola mo ia. ʼAki te temi, ʼi te ʼaho 7 ʼo Malesio 1981, neʼe ʼau papitema ai, ʼo ʼau fakahā ai ki te hahaʼi kua ʼau foaki toku maʼuli kia Sehova ʼAtua.

Ko He Fakafimālie ʼi Te Temi ʼo Te Lotomamahi

ʼI te temi ʼaia, neʼe ʼau ʼiloʼi ai kua nofo ia Amandine pea mo tana faʼe ʼi te tahi fenua. Kae meʼa fakaʼofaʼofa foki, he neʼe tapuʼi mai e tana faʼe taku felāveʼi mo toku ʼofafine​—kae neʼe ina fai ʼo mulimuli pe ki te ʼu lao ʼo te fenua ʼaē neʼe nā nonofo ai. Neʼe ʼau lotomamahi ʼaupito. Neʼe ʼohoana te faʼe ʼa Amandine, pea neʼe ʼau toe lotomamahi ʼaupito ʼi te temi ʼaē neʼe momoli mai ai te pepa fakamoʼoni, neʼe kua vavae e tona ʼohoana toku ʼofafine​—ka heʼeki ʼau fakagafua age kia ia te faʼahi ʼaia. Neʼe mole kei feala ke ʼau ʼaʼahi toku ʼofafine. Logope la taku ʼalu ki te telepinale, kae neʼe mole fakagafua mai ke ʼau ʼaʼahi ia ia. Neʼe hage kia ʼau, ʼe ʼau ʼamo ʼi toku tuʼa he toe kavega mamafa.

Kae neʼe lagolago kia ʼau te Folafola ʼa Sehova. ʼI te tahi ʼaho, neʼe ʼau lotomamahi ʼaupito, pea neʼe ʼau lau liuliuga te ʼu palalau ʼaē ʼe tuʼu ia Tāʼaga Lea 24:10: “Neʼe ke lotovaivai koa ʼi te ʼaho ʼo te mamahi? ʼE siʼisiʼi anai tou mālohi.” Neʼe tokoni mai te vaega ʼaia ke ʼau haga kātaki. ʼI te tahi lakaga, ʼi te toe tapuʼi mai ʼaē ke ʼau ʼaʼahi toku ʼofafine, neʼe ʼau ʼalu ʼo fai faka mafola pea neʼe ʼau puke mālohi taku kato. ʼI te temi faigataʼa ʼaia, neʼe ʼau sio ai ki te moʼoni ʼo te Pesalemo 126:6, ʼaē ʼe ʼui fēnei ai: “Ko ia ʼaē ʼe hū moʼoni ki tuʼa, tatau aipe peʼe tagi, ʼo ina ʼamo te taga ʼe fonu ko te pulapula, ʼe toe liliu moʼoni mai anai ʼaki he kalaga fakafiafia, ʼo ina ʼamo he taga fulumeto.” Ko te meʼa maʼuhiga ʼaē neʼe ʼau ako ai, mokā kita tau mo he ʼu fihifihia, pea ʼe kita faiga mālohi ke kita fakatokatoka kae mole hona fua, pea ʼe tonu ke kita tuku te ʼu fihifihia ʼaia ki muli, ʼo kita lotomālohi ʼi te tauhi kia Sehova, pea hoki feala ai ke kita fiafia tuʼumaʼu.

ʼE ʼAu Faiga Ki He Meʼa ʼe Lelei Age

ʼI tanā sio ʼaē ki te ʼu fetogi ʼaē neʼe hoko ʼi toku maʼuli, neʼe loto e taku ʼu mātuʼa ke ʼau hoko atu taku ako ʼi te univelesitē. Neʼe ʼau fakamālo age kia nāua, kae neʼe kua ʼi ai taku tahi fakatuʼutuʼu. Ko te moʼoni neʼe ina faka ʼāteaina ʼau mai te ʼu filosofia fakatagata, mo te ʼu meʼa faka misitelio, pea mo te tui ki te ʼu fetuʼu. Neʼe kua ʼau maʼu te ʼu kaumeʼa moʼoni ʼe mole nātou fetāmateʼiʼaki anai ʼi he tau. Pea neʼe kua ʼau maʼu he tali ki te ʼu fehuʼi ʼaē neʼe ʼau fai ʼo ʼuhiga mo te ʼu mamahi ʼaē ʼe hoko ki te hahaʼi ʼi te kele. ʼI taku loto fakafetaʼi ʼaē ki te ʼAtua, neʼe ʼau fia tauhi kia ia ʼaki toku mālohi katoa. Neʼe foaki katoa mai e Sesu tona maʼuli moʼo fakahoko tona minisitelio, pea neʼe ʼau fia faʼifaʼitaki kia ia.

ʼI te taʼu 1983, neʼe ʼau tuku taku gāue laga fale ke feala haku gāue temi katoa ʼi te minisitelio. Neʼe ʼau faikole kia Sehova, pea neʼe ʼau maʼu ai taku gāue kogaʼi ʼaho ke ʼau maʼu haku kiʼi falā. Neʼe ʼau fiafia ʼaupito ʼi taku kau fakatahi mo Serge ki te ako ʼa te kau pionie, te tama ʼaē neʼe ʼau fai faka mafola ki ai ʼi te faleako tufuga fale! ʼI taku ʼosi gāue pionie katoa ia taʼu e tolu, neʼe ʼau loto ke toe lahi age taku selevisi kia Sehova. Koia, ʼi te taʼu 1986, neʼe hinoʼi ʼau ke ʼau pionie makehe ʼi te kiʼi kolo ʼo Provins, ʼaē ʼe mole faʼa mamaʼo ʼi Palesi. ʼI taku liliu ki fale ʼi te afiafi, neʼe ʼau faikole tuʼumaʼu kia Sehova moʼo fakamālo kia ia ki te ʼaho taulekaleka ʼaē neʼe ina foaki mai ke feala haku palalau ki te hahaʼi ʼo ʼuhiga mo ia. ʼI tona fakahagatonu, ko te ʼu meʼa e lua ʼe ʼau fiafia tāfito ai ʼi toku maʼuli, ʼe ko taku palalau ki te ʼAtua, pea mo taku fai palalau mo te hahaʼi ʼo ʼuhiga mo te ʼAtua.

Ko te tahi meʼa fakafiafia kia ʼau, neʼe ko te papitema ʼo taku faʼe ʼaē neʼe taʼu 68, pea neʼe nofo ʼi Cébazan, ko te kiʼi kolo ʼi te Potu Toga ʼo Falani. ʼI te temi ʼaē neʼe kamata lau ai e taku faʼe te Tohi-Tapu, neʼe ʼau momoli age ki ai te ʼu kiʼi pepa apone ki Te Tule Leʼo pea mo te Réveillez-vous! Neʼe ko te fafine fakapotopoto, pea neʼe mahino kia ia, neʼe moʼoni te ʼu meʼa ʼaē neʼe ina lau.

Ko Te Petele​—Ko He Palatiso Fakalaumālie Taulekaleka

ʼI te temi ʼaē neʼe fakatotonu ai e te Sosiete Watch Tower ke ina fakasiʼisiʼi te kaugamālie ʼo nātou ʼaē neʼe pionie makehe, neʼe ʼau tohi taku ʼu pepa ke ʼau kau ʼi te Ako ʼaē ʼe ina Teuteuʼi ki te Minisitelio pea ke ʼau hū ki te Petele, te filiale ʼa te kau Fakamoʼoni ʼa Sehova ʼi Falani. Neʼe ʼau tuku ke filifili e Sehova te faʼahiga selevisi ka ʼau kau kiai. Hili kiai ni ʼu māhina, ʼi Tesepeli 1989, neʼe fakaafe ʼau ki te Petele ʼo Louviers, ʼi te Potu Tokelau Hihifo ʼo Falani. Neʼe ko he tonu lelei ʼaia, he neʼe tuʼu ōvi ki te potu ʼaē neʼe nofo ai toku tēhina pea mo toku holotuʼa, ʼo feala ai ke ʼau tokoni age kia nāua moʼo taupau taku ʼu mātuʼa ʼaē neʼe mahamahaki. Kapau neʼe ʼau ʼalu ʼo gāue misionea ʼi he fenua mamaʼo, pea neʼe mole feala anai ke ʼau tokoni feiā ki taku ʼu mātuʼa.

ʼI ʼihi temi, neʼe haʼu taku faʼe ʼo ʼaʼahi mai ʼau ki te Petele. Logope la neʼe faigataʼa kia ia tana nofo mamaʼo mai ia ʼau, kae neʼe ina ʼui mai tuʼumaʼu: “Tama, nofo koe ʼi te Petele. ʼE ko he meʼa fakafiafia kia ʼau tau gāue feiā kia Sehova.” Meʼa fakaʼofaʼofa foki, he kua mamate taku ʼu mātuʼa ʼi te temi nei. Kua ʼau fakaʼamu nei ki te temi ʼaē ka ʼau toe sio ai kia nāua ʼi he kele kua liliu ko he palatiso moʼoni!

ʼI taku manatu, ko te ʼapi pe e tahi ʼaē ʼe feala ke tohi ai “ ʼE mātou loto ki te Palatiso ʼi te temi nei,” ʼe ko te Petele​—te “ ʼApi ʼo te ʼAtua,” he ko te palatiso ʼe faka ʼuhiga tāfito ki te ʼu meʼa fakalaumālie, pea ʼe lahi te ʼu meʼa fakalaumālie ʼaē ʼe fakahoko ʼi te Petele. ʼE mātou maʼu ai te faigamālie ʼaē ke tou maʼuliʼi te ʼu fua ʼo te laumālie. (Kalate 5:​22, 23) Ko te meʼa kai fakalaumālie ʼaē ʼe mātou maʼu ʼi tamatou vakaʼi te koga tohi ʼo te ʼaho pea mo te ako ʼo Te Tule Leʼo, ʼe ina fakamālohiʼi ʼau ke ʼau gāue ʼi te Petele. Tahi ʼaē meʼa, ko te Petele ʼe ko he ʼapi ʼe feala ai ke kita tuputupu ʼi te faʼahi fakalaumālie, heʼe kita fakatahi ai mo he ʼu tēhina mo tuagaʼane aga fakapotopoto kua nātou gāue agatonu kia Sehova lolotoga ni ʼu taʼu. Logope kua taʼu 17 nei taku mole heʼeki toe sio ki toku ʼofafine, kae neʼe ʼau felāveʼi mo te kau tūpulaga agatonu ʼi te Petele, pea ʼe ʼau faka ʼuhiga nātou ko haku fānau, pea ʼe ʼau fiafia ʼi taku sio kia nātou ʼe nātou tuputupu ʼi te faʼahi fakalaumālie. ʼI te ʼu taʼu ʼaenī e valu kua hili, kua ʼau fakahoko te ʼu gāue kehekehe e fitu. Logope la neʼe mole faigafua te faʼahi ʼaia, kae neʼe fua lelei kia ʼau ʼaki te temi.

ʼI muʼa atu, neʼe ʼau to te faʼahiga pulapula neʼe ina maʼu hona ʼu fua ʼo liuga teau. ʼO toe feiā aipe, neʼe mahino kia ʼau, kapau ʼe kita to te meʼa ʼaē ʼe kovi, pea ʼe kita utu anai tona ʼu fua kovi ʼo liuga teau. Ke feala hakita maʼu te aga fakapotopoto ka mole takitaki tatou e he tahi, ʼe maʼua ke hoko kia kita he ʼu faigataʼaʼia. Neʼe lelei age mo kanapaula neʼe ʼau lahi ake ʼi he famili neʼe haʼele ʼi te ʼu ala ʼo Sehova, kae mole hoko kia ʼau te ʼu faigataʼaʼia ʼaē neʼe ʼau tau mo ia ʼi toku maʼuli. ʼI pilivilesio leva ʼaē ʼe maʼu e te kau tūpulaga ʼaē ko tanatou ʼu mātuʼa ʼe ko te kau Fakamoʼoni! ʼE ʼau tui papau, ʼe lelei age hakita to te ʼu meʼa ʼaē ʼe lelei ʼi takita tauhi kia Sehova, pea mo hakita utu ʼo liuga teau te tokalelei pea mo te fīmālie.​—Kalate 6:​7, 8.

ʼI te temi ʼaē neʼe ʼau pionie ai, neʼe ʼau tau fakalaka ʼi te koloā ʼaē neʼe fakatau ai te ʼu tohi faka lotu, te koloā ʼaē neʼe ʼau tohi kiai te ʼu palalau ʼa te hahaʼi agatuʼu. Neʼe ʼau hū ki loto ʼo fai palalau mo te patolo ʼo ʼuhiga mo te ʼAtua pea mo tana ʼu fakatuʼutuʼu. Ei, ʼe ʼi ai he ʼAtua maʼuli! Tahi ʼaē meʼa, ko Sehova, ko te ʼAtua moʼoni pe e tahi, ʼe ko he Tāmai agatonu, pea mole ina līaki anai tana fānau ʼi he temi. (Apokalipesi 15:4) ʼOfa pe ke toe kaugamālie mai te hahaʼi ʼaē ka ʼōmai ki te palatiso fakalaumālie ʼi te temi nei​—pea mo te Palatiso fakakelekele ʼaē ka haʼu​—ʼo nātou tauhi pea mo vikiʼi te ʼAtua maʼuli, ia Sehova!

[Nota ʼi te lalo pasina]

[Paki ʼo te pasina 26]

ʼI taku ōfo ki te ʼu meʼa fakatalakitupua ʼo te natula, neʼe ʼau loto ai ke ʼau tui ki te ʼAtua. (ʼI te faʼahi mataʼu) ʼE ʼau gāue ʼi te Petele ʼi te temi nei