Te ʼu Fakaneke ʼo Tokotou ʼu Tatau—ʼE Feala Koa Ke Fua Lelei Kia Koutou?
Ko tatou fuli neʼe tou tutupu ʼaki te holi ʼaē ke tali tatou e totatou ʼu tatau. ʼE mole he tahi ʼe ina loto ke līaki ia ia, peʼe fehiʼa ki ai he tahi. Koia ko te ʼu meʼa ʼaē ʼe fai e tatatou ʼu tatau ʼe malave kia tatou.
KO TOKITA tatau ʼe faka ʼuhiga ki “he tahi ʼe tatau tona tuʼulaga mo kita; . . . ʼe kau ki he ʼu hahaʼi ʼe nātou fakatahitahi heʼe nātou taʼu tahi peʼe nātou tuʼulaga tahi.” Pea ʼe fakaneke tatou e totatou ʼu tatau ke tou mulimuli ki tanatou manatu pea mo tanatou aga, peʼe tou mālama kiai peʼe kailoa. ʼI te agamāhani, ʼe ʼui ko te ʼu fakaneke ʼo totatou ʼu tatau ʼe ko he meʼa kovi. Kae ohage ko te meʼa ʼaē ka tou vakaʼi, ʼe feala hatatou fetogi te ʼaluʼaga ʼaia ke fua lelei kia tatou.
ʼE Malave Ki Te Kau Tūpulaga Pea Mo Te Kau Lalahi
ʼE mole ko te kau tūpulaga pe ʼaē ʼe fakaneke nātou e tonatou ʼu tatau, kae ʼe toe feiā mo te hahaʼi fuli tatau aipe peʼe nātou taʼu fia. ʼE ʼasi te malave ʼaia kia tatou mo kapau ʼe tou fai te ʼu fehuʼi ʼaenī: “Kapau ʼe fai te faʼahi ʼaenī e te tahi ʼu hahaʼi, he koʼe koa ʼe mole feala ke ʼau fai te meʼa ʼaia?” “He koʼe koa ʼe tonu ke ʼau kehe tuʼumaʼu mo nātou?” “Koteā te meʼa ʼaē ka ʼui anai e te hahaʼi peʼe koteā anai tanatou manatu?” “Ko toku ʼu kaumeʼa fuli ʼe nātou teuteu ʼohoana peʼe kua nātou ʼohoana, kae ʼe mole feiā ʼo ʼuhiga mo ʼau. ʼE ʼi ai koa he meʼa ʼe mole lelei ʼo ʼuhiga mo ʼau?”
Tatau aipe peʼe tou taʼu fia, kae ʼe fakaneke tatou ke tou mulimuli ki te ʼu meʼa ʼaē ʼe fai e te hahaʼi, kae ʼe mālohi tāfito te ʼu fakaneke ʼaia ʼi te temi tūpulaga. ʼE ʼui e te tikisionalio The World Book Encyclopedia, ko “te tokolahi ʼo te kau tūpulaga ʼe nātou fakatahi tuʼumaʼu mo tonatou ʼu tatau, ʼaē ko tonatou ʼu kaumeʼa pea mo tonatou ʼu feʼilo. Ko te kau tūpulaga ʼe nātou ʼolo ki tonatou ʼu tatau, kae mole ki tanatou ʼu mātuʼa, heʼe nātou loto ke tali nātou e tonatou ʼu tatau pea ʼe lagi nātou fetogi anai tanatou aga ke tali nātou.” Tahi ʼaē meʼa, ko te kau tūpulaga, “ ʼe nātou manatu kua nātou lahilahi lelei ake mo kapau ʼe tali nātou e tonatou ʼu tatau peʼe ʼofainaʼi nātou.” Koia la ʼaē ʼe nātou “tokagaʼi te ʼu faʼahi ʼaē, ʼi tanatou manatu, ʼe fakalogo pe kiai tonatou tali e te tamaliki, ohage la ko tanatou faʼahiga teu, mo tanatou lava takitaki, pea mo tanatou lava lafi mo he taʼahine pe ko he tama.”
ʼE lagi mahino ki te ʼu taumatuʼa, ʼe nātou filifili tonatou ʼapi, pe ko tonatou motokā, peʼe nātou maʼu fānau anai peʼe kailoa, ʼuhi ko te ʼu fakaneke ʼo te hahaʼi peʼe nātou fai ʼo mulimuli ki te ʼu meʼa ʼaē ʼe tali e tonatou lanu pea mo tonatou ʼu feʼilo. Pea ʼe lahi te ʼu maʼua ʼe tonu ke huʼi e ʼihi famili, heʼe nātou fia maʼu te ʼu meʼa ʼaē ʼe maʼu e tonatou ʼu vāhaʼa fale pea mo tonatou ʼu tatau. Ei, ʼe feala ke hā ʼi tatatou ʼu fakatuʼutuʼu, mo tatatou ʼu manatu pea mo tatatou ʼu puleʼaki, peʼe malave kia tatou te manatu ʼa totatou ʼu tatau. Mai tona ʼuhiga ʼaē ʼe mālohi te faʼahi ʼaia, ʼe feala koa hatatou fakaʼaogaʼi ke fua lelei kia tatou, pea ke tokoni mai te mālohi ʼaia ke tou haʼele ʼi te ala ʼaē ʼe tou fia haʼele ai? Ei, ʼe feala te faʼahi ʼaia!
Tou Fakaʼaogaʼi Totatou ʼu Fakakaugā Ke Fua Lelei Kia Tatou
Ko te kau tōketā pea mo te hahaʼi ʼaē ʼe nātou tokaga ki te kau mahahaki, ʼe nātou ʼiloʼi ʼe maʼuhiga ki te kau mahaki ke nātou maʼu ʼi tonatou ʼu tafaʼaki he ʼu hahaʼi ʼe fiafia pea ʼe nātou fai he ʼu meʼa ʼe lave lelei anai kia nātou. Ko te taʼi fakakaugā ʼaia ʼe tokoni ki te faitoʼo ʼo te kau mahaki. Ohage la, ko nātou ʼaē ʼe māʼimoa, ʼe feala ke nātou toe lelei ʼi te faʼahi fakasino pea mo te faʼahi ʼo te loto ʼaki te faʼifaʼitaki lelei pea mo te ʼu fakaloto mālohi ʼo he ʼu hahaʼi neʼe tau mo te taʼi mahaki moa ʼaia. ʼE hā lelei ai, kapau ʼe kita fakatahi mo he ʼu hahaʼi ʼe loto falala pea ko he ʼu faʼifaʼitaki lelei, pea ʼe fua lelei anai kia kita.
ʼE toe feiā pe mo te kokelekasio faka Kilisitiano, ko te tupuʼaga la ʼaia ʼo te fakatotonu ʼa Sehova ki tana hahaʼi ke nātou fakatahi tuʼumaʼu. ʼE ina uga tatou ke ‘tou fe’tokagaʼaki o fakaʼalaʼala ki te fai o te ofa pea mo te u gaue lelei pea ke tou fe’tokoniʼaki.’ (Hepeleo 10:24, 25) ʼE maʼuhiga ʼaupito te fakaloto mālohi ʼaia ʼuhi ko te ʼu fakaneke ʼo te mālama ʼaenī pea ʼe fakatupu vaivai pea mo fakatupu mamahi kia tatou. Koia ʼe tonu ki te kau Kilisitiano ke nātou ‘faiga mālohi’ ke nātou nonofo ʼalaʼala ʼi te faʼahi fakalaumālie. (Luka 13:24, MN) ʼE ʼaoga kia tatou te lagolago ʼofa ʼo totatou ʼu tēhina pea ʼe tou loto fakafetaʼi ʼo ʼuhiga mo te faʼahi ʼaia. Tahi ʼaē meʼa, ko ʼihi ʼe lagi nātou kātakiʼi te mamahi ʼo he ʼu ‘foto i tonatou kakano’ ʼuhi ko he mahaki peʼe nātou māʼimoa. (2 Kolonito 12:7) Ko ʼihi ʼe nātou faiga mālohi ke nātou tauʼi he ʼu agamāhani ʼe kovi pe ko te lotohoha, peʼe lagi nātou maʼuli kinakina. Koia ʼe ko he agapoto ke tou fakatahi mo te hahaʼi ʼaē ʼe nātou fakaōvi kia Sehova ʼAtua pea ʼe nātou tauhi fakafiafia kia te ia. Ko totatou ʼu tatau ʼaia ʼe nātou fakaloto mālohiʼi tatou, pea mo tokoni mai ke tou ‘nofo agatonu pea mo kātaki ʼo kaku ki te fakaʼosi.’—Mateo 24:13.
Kapau ʼe tou filifili lelei totatou ʼu fakakaugā, pea ʼe feala ke fua lelei kia tatou. Tahi ʼaē meʼa, ko te meʼa kai fakalaumālie pea mo te takitaki ʼaē ʼe foaki mai ʼi te ʼu fono, ʼe tokoni ki te ʼu fakaloto mālohi ʼaē ʼe fai kia tatou e totatou ʼu tatau.
ʼE mahino ia, ʼe mole faigafua ki ʼihi tanatou kau ki te ʼu fono. Ko ʼihi ʼe mole tokoni lelei kia nātou tonatou ʼu ʼohoana peʼe mole nātou lagolago kia nātou, ko ʼihi ʼe tonu ke nātou teuteuʼi tanatou fānau, pea ko ʼihi ʼe mole hanatou motokā. Kae koutou fakakaukauʼi age muʼa: kapau ʼe mole koutou tuku te ʼu fihifihia ke nātou tāʼofi takotou kau ki te ʼu fono, pea ʼe feala ke fakaloto mālohiʼi e takotou faʼifaʼitaki ia nātou ʼaē ʼe tau mo te ʼu taʼi faigataʼaʼia feiā. Ko tona faka ʼuhiga, ʼe mole gata pe ki takotou tuku he faʼifaʼitaki lelei, kae ʼe toe feala kia koutou pea mo te tahi ʼu hahaʼi ke koutou uga tokotou ʼu tatau ke nātou fai he ʼu meʼa lelei ʼaki tonatou lotolelei.
ʼI tona fakahagatonu, ko te ʼapositolo ko Paulo, ʼaē neʼe tau mo te ʼatu ʼu ʼahiʼahi pea mo te ʼu fihifihia, neʼe ina fakaloto mālohiʼi te kau Kilisitiano ke nātou faʼifaʼitakiʼi ia ia pea mo te tahi ʼu Kilisitiano aga fakapotopoto. Neʼe ina ʼui fēnei: “Koutou liliu ko oku faifaitaki, u tehina, pea koutou tokagai ia natou e mauli o fai ki te faifaitakiʼaga e koutou mau ia matou.” (Filipe 3:17; 4:9) Neʼe fakatokagaʼi e te kau ʼuluaki Kilisitiano ʼo Tesalonika te faʼifaʼitaki lelei ʼo Paulo. Neʼe tohi fēnei e Paulo ʼo ʼuhiga mo nātou: “Pea mo koutou, nee matou liliu mo te Aliki ko outou faifaitakiʼaga, i tautou talitali te Folafola aki te fiafia o te Laumalie-Maonioni i te lolotoga o tautou tali mamahi lahi, nee koutou liliu ai ko he faifaitaki ki te hahai tui katoa i Masetonia mo Akaia.” (1 Tesalonika 1:6, 7) Koia kapau ʼe tou maʼu he faʼahiga manatu ʼe lelei pea mo tou tuku he faʼifaʼitaki lelei, pea ʼe feala ke malave te ʼu faʼahi ʼaia kia nātou ʼaē ʼe tou fakakaugā mo nātou.
Koutou Tekeʼi Te ʼu Fakaneke Kovi
Kapau ʼe tou fia tekeʼi te ʼu fakaneke kovi, pea ʼe tonu ke tou tokakaga lelei ke ʼaua naʼa tou mulimuli kia ‘nātou ʼaē ʼe mulimuli ki te kakano.’ (Loma 8:4, 5, MN; 1 Soane 2:15-17) He kapau ʼe mole tou fai te faʼahi ʼaia pea ko te ʼu fakaneke ʼo totatou ʼu fakakaugā kovi, ʼe nātou fakamamaʼo anai tatou mai ia Sehova pea mo tona ʼu tokoni poto. ʼE ʼui fēnei ia Tāʼaga Lea 13:20: “Ko ʼaē ʼe haʼele mo te kau poto ʼe liliu anai ia ʼo poto, kae ko ʼaē ʼe fakatahi mo te kau vale, ʼe fua kovi anai kia ia.” ʼE koutou ʼiloʼi koa la he tahi neʼe hēʼia ʼuhi ko te ʼu fakaneke ʼo he ʼu fakakaugā kovi? Ohage la, ko ʼihi Kilisitiano neʼe nātou higa ki te manako ki te ʼu koloā, mo te aga heʼeʼaoga, peʼe ko te ʼinu kava pea mo te toloke, ʼuhi ko te ʼu fakaneke ʼo te hahaʼi ʼaē neʼe nātou fakakaugā mo nātou.
ʼE toe feiā mo te kokelekasio, kapau ʼe tou filifili ke tou fakatahi mo he ʼu hahaʼi ʼe vaivai ʼi te faʼahi fakalaumālie, pea ʼe feala ke nātou fakaneke tatou ke tou fai he ʼu meʼa kovi. (1 Kolonito 15:33; 2 Tesalonika 3:14) ʼI te agamāhani, ko te hahaʼi ʼaia ʼe mole nātou leleiʼia te ʼu fai palalau ʼo ʼuhiga mo te ʼu meʼa fakalaumālie, pea ʼi ʼihi temi ʼe nātou vāʼi ia nātou ʼaē ʼe nātou leleiʼia te faʼahi ʼaia. Kapau ʼe tou filifili ke tou fakakaugā mo te hahaʼi ʼaia, pea ʼe lagi fakaneke anai tatou ke tou muliʼi nātou, mole tuai pea tou faʼifaʼitakiʼi anai tanatou ʼu manatu pea mo tanatou aga. Lagi ʼe tou meʼa noaʼi anai ia nātou ʼaē ʼe fakamalotoloto ʼi tanatou tui, pea ʼe nātou faiga ke nātou haʼele ki muʼa ʼi te faʼahi fakalaumālie.—1 Timoteo 4:15.
ʼE ko he agapoto ke tou fakakaumeʼa mo nātou ʼaē ʼe faiga ke nātou fakafiafia ia Sehova, pea ʼe nātou leleiʼia te ʼu meʼa fakalaumālie! Ko te ʼu taʼi kaumeʼa ʼaia ʼe nātou tokoni mai ke tou fakahā “te poto mai oluga.” “E maʼa, e tokalelei, e agamalu, e fakatokatoka, e fonu i te manavaofa pea e fua lelei, . . . pea e mole malualoi.” (Sakopo 3:17) ʼE mole faka ʼuhiga leva ko te hahaʼi ʼaē ʼe nātou leleiʼia te ʼu meʼa fakalaumālie, ʼe mole feala hanatou fai palalau ki he tahi ʼu meʼa. Kailoa! Koutou fakakaukauʼi te ʼatu ʼu meʼa kehekehe ʼaē ʼe talanoa kiai te ʼu tohi ʼo te Sosiete Watch Tower ohage ko te Réveillez-vous! ʼE lahi ʼaupito te ʼu meʼa ʼaē ʼe feala ke tou palalau kiai, pea kapau ʼe tou fakatokagaʼi te ʼu faʼahi ʼaia, pea ʼe tou fakahā ai ʼe tou leleiʼia totatou maʼuli pea mo te ʼu gāue ʼa Sehova.
Ohage ko he tagata ʼe gaoʼi tennis ʼe feala ke ina hikihiki tana poto faigaoʼi mokā gaoʼi mo he tahi ʼu hahaʼi faiva, ʼo toe feiā pe, ko totatou ʼu fakakaugā lelei ʼe tokoni mai kia tatou ke tou tuputupu ʼi te faʼahi fakaʼatamai, mo te faʼahi ʼo te loto pea mo te faʼahi fakalaumālie. ʼI te tahi faʼahi, ko te ʼu fakakaugā kovi ʼe feala ke nātou uga tatou ke tou malualoi ʼo tou maʼuli fakakākā. ʼE ko he meʼa lelei ke tou taupau maʼa totatou leʼo ʼo loto ke feala ai hatatou fakaʼapaʼapa kia tatou totonu!
Te ʼu Fua Lelei Ki ʼIhi
Ko te hahaʼi tokolahi ʼe nātou manatu, ʼe mole ko he meʼa faigataʼa te ako ʼo te ʼu akonaki ʼo te Tohi-Tapu, pea mo te ʼu meʼa ʼaē ʼe fakamaʼua mai ʼi te faʼahi fakalaumālie pea mo te aga ʼaē ʼe tonu ke fai. Kae ko te meʼa ʼaē ʼe faigataʼa ʼe ko te maʼuliʼi ʼo te ʼu meʼa ʼaia. Ohage ko tona fakahā mai e te ʼu faʼifaʼitaki ʼaē ka hoa mai, ko totatou ʼu fakakaugā lelei ʼe feala ke nātou tokoni mai kia tatou ke tou tauhi kia Sehova ʼaki he loto katoa.
Ko he Fakamoʼoni ʼe gāue temi katoa ʼi te fai faka mafola mo tona ʼohoana, neʼe ina ʼui ko te faʼifaʼitaki ʼo tona ʼu tatau neʼe malave ki te ʼu fakatuʼutuʼu ʼaē neʼe ina fai ki tona maʼuli. ʼI tana lahi ake, neʼe ina kātakiʼi te ʼu fakaneke kovi ʼo ʼihi hahaʼi. Kae neʼe ina filifili ke fakakaumeʼa mo nātou ʼaē neʼe nātou uga ia ia ke kau tuʼumaʼu ʼi te minisitelio pea mo te ʼu fono. ʼI tana fakatahi tuʼumaʼu mo te ʼu kaumeʼa ʼaia neʼe liliu ai ko he tagata ʼe fakapotopoto ʼi te faʼahi fakalaumālie.
Neʼe tohi fēnei e te tahi Fakamoʼoni: “ ʼI tamā ʼosi ʼohoana, ko ʼau pea mo toku hoa neʼe ma ʼolo ki te kokelekasio neʼe pionie ai he tahi taumatuʼa neʼe mātou taʼu tahi. Ko tonā faʼifaʼitaki neʼe ina uga māua ke ma toʼo te minisitelio temi katoa. Pea neʼe ma fakaloto mālohiʼi te kokelekasio ke nātou faka maʼuhigaʼi te selevisi pionie. Ko te meʼa ʼaē neʼe hoko ai, ko te tokolahi neʼe nātou liliu ko he ʼu pionie.”
ʼE faigafua age anai kia tatou ke tou fakalogo kia Sehova, kapau ʼe tou fakatahi mo nātou ʼaē ʼe ʼi ai hanatou ʼu fakatuʼutuʼu faka teokalatike. ʼE ko te tahi fua lelei ʼaia ʼo te ʼu fakakaugā lelei. Ko he Fakamoʼoni neʼe kamata ʼi te minisitelio temi katoa ʼi tana kei tūpulaga pea neʼe liliu ko he tagata taupau feʼaluʼaki ʼi tana lahi ake, pea ʼi te temi nei ʼe gāue ʼi he filiale ʼo te Sosiete Watch Tower. Neʼe ina tohi fēnei: “Ko te ʼu meʼa ʼaē ʼe kei ʼau manatuʼi ʼo ʼuhiga mo taku kei veliveli, pea ko he ʼu suvenia ʼe ʼau leleiʼia ʼaupito, ʼe ko te ʼu ʼaʼahi ʼo nātou ʼaē neʼe kau ki te gāue temi katoa. Neʼe mātou fakaafe tuʼumaʼu nātou ke mātou kakai fakatahi. Neʼe foaki mai e te taupau feʼaluʼaki he kato fai faka mafola ʼi toku taʼu hogofulu pea ʼe kei ʼau taupau lelei te kato ʼaia ʼi te temi nei.”
ʼI tana manatuʼi tona temi tūpulaga, ʼe toe ʼui fēnei e te Fakamoʼoni ʼaia: “Ko te tokolahi ʼo te kau tūpulaga ʼo te kokelekasio neʼe nātou fia kau ki te ʼu gāue ʼa te kokelekasio, pea ko tonatou faʼifaʼitaki neʼe ina uga mātou ke mātou faʼifaʼitakiʼi nātou.” Ko tona ʼu fakakaugā lelei neʼe tokoni ki te tūpulaga ʼaia, ʼaē neʼe hage ko he kiʼi muko, ke tuputupu ʼo liliu ko te tagata Kilisitiano ʼe hage ko he fuʼu ʼakau mālohi mo tuʼutonu. ʼU mātuʼa, ʼe koutou fakaafe koa kiō koutou he ʼu hahaʼi ʼe feala ke nātou fakaloto mālohiʼi takotou fānau?—Malakia 3:16.
ʼE mahino ia, ʼe mole feala kia tatou fuli ke tou kau ki te minisitelio temi katoa ohage ko nātou ʼaē neʼe tou talanoa ki ai. Kae ʼe feala kia tatou fuli ke tou ako ke tou ʼofa kia Sehova ‘aki totatou loto katoa, mo totatou laumalie katoa, pea mo totatou atamai katoa.’ (Mateo 22:37) ʼE maʼuhiga ʼaupito ke tou filifili lelei totatou ʼu fakakaugā heʼe feala ke nātou fakaloto mālohiʼi tatou ki te ʼofa ʼaia pea ʼe fakalogo kiai tatatou ʼamanaki ki te maʼuli heʼegata.
Neʼe fakahā mai e te tagata fai pesalemo te puleʼaki faigafua ke maui mālie totatou maʼuli: “Manuʼia te tagata ʼaē neʼe mole haʼele ʼi te tokoni ʼa te kau agakovi, pea neʼe mole tuʼu ʼi te ala ʼo te kau agahala, pea neʼe mole heka ʼi te hekaʼaga ʼo te hahaʼi vāvā. Kae ko tona fiafia ʼe ʼi te lao ʼa Sehova, pea ʼi tana lao ʼe ina lau leʼo veliveli ʼi te ʼaho mo te po. ʼE liliu anai ko he fuʼu ʼakau ʼe to ōvi ki te vaitafe, ʼe fua ʼi tona temi tonu pea ʼe mole fefe tona ʼu lau, pea ko meʼa fuli ʼe ina fai ʼe fua anai.”—Pesalemo 1:1-3.
ʼE ko he fakapapau taulekaleka ʼaia! Tatau aipe peʼe tou heʼe haohaoa pea mo agahala, kae ʼe maui mālie anai totatou maʼuli mo kapau ʼe tou tuku ke takitaki tatou e Sehova, pea kapau ʼe tou fakaʼaogaʼi te ʼu fakakaugā lelei ʼaē ʼe foaki mai e totatou ʼAtua—“[totatou u] tehina i te malama-nei.”—1 Petelo 5:9.
[Paki ʼo te pasina 24]
ʼE tou maʼu ʼi te kokelekasio he ʼu fakakaugā lelei
[Paki ʼo te pasina 25]
ʼU mātuʼa, koutou uga takotou fānau ke fakatahi mo he ʼu tamaliki ʼe nātou fakaloto mālohiʼi anai nātou