Koutou Fiafia ʼi “Te Mauli Mooni”

NEʼE foaki e Sehova ʼAtua ki te tagata te mahino ʼaē ki te heʼegata. (Tagata Tānaki 3:​11) ʼE mālama ai te hahaʼi ki tanatou mole maʼu he mālohi ki te mate, kae ʼe toe tupu ia nātou te holi lahi ʼaē ke nātou maʼuʼuli.

Ko te Tohi-Tapu, te Folafola ʼa te ʼAtua, ʼe ina foaki mai kia tatou te ʼamanaki lahi. (2 Timoteo 3:​16) Ko Sehova, ʼaē ko te matapuna ʼo te ʼofa, neʼe mole feala ke ina fakatupu te tagata ʼaki te fealagia ʼaē ke mahino ki te ʼuhiga ʼo te heʼegata kae ina tautea ia ia ke maʼuli faka temi pe. ʼE mole ʼalutahi mo te ʼulugaaga ʼo te ʼAtua ke ina faʼu tatou ke tou lotomamahi ʼaupito ʼuhi ko tatatou ʼaluʼaga. Neʼe mole fakatupu tatou ohage ko “he u manu vale nee tupu feia ke puke pea ke tamatei.”​—2 Petelo 2:​12.

ʼI tana fakatupu ia Atama mo Eva ʼaki te holi ʼaē ki te heʼegata, neʼe fai e Sehova ʼAtua te meʼa “ ʼe lelei ʼaupito”; neʼe ina fakatupu nāua ke feala hanā maʼuʼuli ʼo heʼegata. (Senesi 1:​31) Kae meʼa fakaʼofaʼofa, he neʼe fakaʼaogaʼi kovi e te ʼuluaki taumatuʼa tanā loto faʼitaliha, ʼo nā talagataʼa ki te fakatotonu ʼa te Tupuʼaga pea nā pulihi ai tonā ʼuhiga haohaoa ʼaē neʼe nā maʼu ʼi te kamata. Neʼe nā mamate ai, ʼo mafola ai te heʼe haohaoa pea mo te mate ki tonā hōloga.​—Senesi 2:​17; 3:​1-​24; Loma 5:​12.

ʼE fakamahino lelei mai e te Tohi-Tapu te ʼuhiga ʼo te maʼuli pea mo te mate. ʼE ina ʼui ʼi te mate, ʼe “mole he gāue, he fakatuʼutuʼu, he mālama, he poto” pea ko te kau mate “ ʼe mole kei nātou ʼiloʼi he meʼa.” (Tagata Tānaki 9:​5, 10) Ko tona faka ʼuhiga, ko te kau mate kua mamate. Ko te akonaki ʼo ʼuhiga mo te nefesi tuputupua ʼe mole tuʼu ia ʼi te Tohi-Tapu, koia ʼe mole he misitelio lahi ʼe tonu ke fakamahino ʼo ʼuhiga mo te ʼaluʼaga ʼo te kau mate.​—Senesi 3:​19; Pesalemo 146:4; Tagata Tānaki 3:​19, 20; Esekiele 18:4.a

ʼE ʼi ai te fakatuʼutuʼu ʼa te ʼAtua; neʼe mole ina fakatupu “noa” ia te kele. Neʼe ina faʼu “ke nofoʼi” e te hahaʼi haohaoa ʼi te palatiso, pea neʼe mole fetogi e te ʼAtua tona fakatuʼutuʼu. (Isaia 45:18; Malakia 3:6) Moʼo fakahoko te faʼahi ʼaia, neʼe ina fekauʼi mai tona ʼAlo ki te kele. ʼI tana nofo agatonu ʼo aʼu ki te mate, neʼe foaki e Sesu Kilisito te fealagia ʼaē ke totogi te malamanei mai te agahala pea mo te mate. ʼI tona fakahagatonu, neʼe ʼui fēnei e Sesu: “He nee ofa lahi te Atua ki te malama-nei, ko te tupuaga aia o tana foaki mai tona Alo Ulutokotahi, ke aua naa mate ia natou fuape e tui kia te ia, kae ke natou maù te mauli heegata.”​—Soane 3:​16.

Kua fualoa kiai, neʼe fakapapau e te ʼAtua ʼe ina fakatupu anai “te ʼu lagi foʼou pea mo te kele foʼou.” (Isaia 65:17; 2 Petelo 3:​13) Ko tona faka ʼuhiga, ʼe ina fili anai he kiʼi kūtuga ko te kau Kilisitiano agatonu ke nātou maʼuʼuli ʼi selo. ʼAki ia Sesu Kilisito, ʼe nātou faʼufaʼu te koga tāfito ʼo te puleʼaga. ʼE talanoa te Tohi-Tapu kiai ʼo ina ʼui ko “te puleaga o Selo,” peʼe ko “te Puleaga o te Atua,” ʼaē ka ina fakaʼaluʼalu anai te ʼu “mea i te kelekele.” (Mateo 4:​17; 12:28; Efeso 1:​10; Apokalipesi 5:​9, 10; 14:​1, 3) ʼI tana ʼosi fakaʼauha anai te hahaʼi ʼaē ʼe mole tui kia te ia pea mo fakamaʼa te kele, ʼe fakatuʼu anai kiai e te ʼAtua he sosiete fakatagata foʼou faitotonu, peʼe ko he “kele foʼou.” ʼE kau anai kiai te hahaʼi ʼaē ka puipui e te ʼAtua ʼi te fakaʼauha ʼaē kua ōvi mai ʼo te tuʼu ʼo te ʼu faʼahiga meʼa agakovi ʼaenī. (Mateo 24:​3, 7-​14, 21; Apokalipesi 7:​9, 13, 14) ʼE fakatahi anai kia nātou te hahaʼi ʼaē ka toe fakamaʼuli ʼi te fakatuʼuake ʼaē neʼe fakapapauʼi mai.​—Soane 5:​28, 29; Gaue 24:15.

“Te Mauli Mooni”

Moʼo fakamoʼoni ki te fakamatala matalelei ʼo te maʼuli ʼi te Palatiso ʼi te kele ʼi te temi ka haʼu, ʼe ʼui fēnei e te ʼAtua: “Koeni, e au fai ia mea foou fuape.” (Apokalipesi 21:5) ʼE mole feala ke mahino katoa te tagata ki te ʼu gāue matalelei ʼaē ka fakahoko anai e te ʼAtua ki te malamanei. ʼE fakatuʼu anai e te ʼAtua he palatiso ʼi te kele katoa, ohage ko te palatiso ʼo Eteni. (Luka 23:43) Ohage ko Eteni, ʼe lahi anai te ʼu lanu matalelei, mo te ʼu meʼa ka tou logo kiai pea mo kai anai kiai. ʼE mole toe ʼi ai anai te masiva pea mo te hoge, heʼe ʼui fēnei e te Tohi-Tapu ʼo ʼuhiga mo te temi ʼaia: “Koteuhi kua puli te malama-nei afea.” (Apokalipesi 21:​4; Pesalemo 72:16) ʼE mole toe ʼui anai e he tahi “ ʼE ʼau mahaki,” heʼe pulihi anai te mahaki ʼo talu ai. (Isaia 33:24) ʼE moʼoni, ko meʼa fuli ʼaē ʼe tupu ai te lotomamahi ʼa te hahaʼi ʼe pulihi anai, ʼo kau ai te fili ʼāfea ʼo te malamanei, ʼaē ko te mate. (1 Kolonito 15:26) ʼI te “kele foʼou” ʼaē neʼe sio kiai Soane, ʼaē ʼe faka ʼuhiga ki te sosiete fakatagata foʼou ʼaē ʼe puleʼi e Kilisito, neʼe logo te ʼapositolo ki he leʼo ʼe ina ʼui fēnei: “[Ko te ʼAtua] e ina holoholo anai ia loimata fuape i onatou fofoga, pea e mole toe mau anai te mate. E mole toe mau anai he putu, pe ko he lauga, pe ko he mamahi, koteuhi kua puli te malama-nei afea.” ʼE ʼi ai koa he tahi meʼa ʼe ina fakafimālieʼi pea mo fakafiafia lahi totatou loto ʼi te fakapapau ʼaia ʼaē ka fakahoko e te ʼAtua?

ʼI tana fakamatala te maʼuli ʼi te temi ka haʼu, ʼe fakahā lelei mai e te Tohi-Tapu te ʼu faʼahi ʼaē ka nātou fakafimālieʼi anai te ʼu holi ʼa te tagata, ʼo ʼuhiga mo te aga ʼaē ʼe tonu ke fai pea mo te faʼahi fakalaumālie. Ko te ʼu meʼa lelei fuli ʼaē neʼe faiga kiai e te hahaʼi ʼo aʼu ki te temi nei, ʼe fakahoko katoa anai. (Mateo 6:​10) ʼI te ʼu meʼa lelei ʼaia ʼe kau kiai te holi ʼaē ki te faitotonu, ʼaē ʼe mole heʼeki fakahoko he neʼe tau gaohi koviʼi e te kau pule aga fefeka te hahaʼi ʼaē ʼe vaivai age. (Tagata Tānaki 8:9) Neʼe fakakikite fēnei e te tagata fai pesalemo peʼe feafeaʼi anai te maʼuli ʼi te pule ʼa Kilisito: “ ʼI tona ʼu ʼaho ʼe mahu anai te agatonu pea ʼe fonu mo te tokalelei.”​—Pesalemo 72:​7, The New Jerusalem Bible.

Ko te gaohi fakatatau ʼo te hahaʼi, ʼe ko te tahi faʼahi ʼaia ʼe holi kiai te tokolahi, he neʼe nātou fai te ʼu sakilifisio lahi moʼo fakahoko te faʼahi ʼaia. ʼI te “fakafoou,” ʼe pulihi anai e te ʼAtua te fakapalatahi. (Mateo 19:28) ʼE fakaʼapaʼapa tatau anai ki te hahaʼi fuli pe. Ko te fakatatau ʼaia ka fai ʼe mole fakahoko anai e he puleʼaga aga fefeka. Kailoa, kae ʼe pulihi anai te ʼu faʼahi ʼaē ʼe tupu ai te fakapalatahi, ʼo kau ai te mānumānu pea mo te fialahi ʼaē ʼe nātou taki te hahaʼi ke nātou puleʼi ʼihi pea mo nātou tānaki he tuʼuga koloā maʼa nātou. Neʼe fakakikite fēnei e Isaia: “ ʼE mahino papau ia, ʼe nātou laga anai ni ʼu fale pea ʼe nātou nofoʼi anai; pea ʼe mahino papau ia ʼe nātou to anai he ʼu fuʼu vite pea mo nātou kai anai tona ʼu fua. ʼE mole nātou laga anai ke nofoʼi e he tahi kehe; pea ʼe mole nātou to anai ke kai e he tahi kehe.”​—Isaia 65:​21, 22.

Neʼe lotomamahi ʼaupito te hahaʼi ʼuhi ko te ligi toto ʼaē neʼe hoko ʼi te ʼu tau! Neʼe kamata te faʼahi ʼaia talu mai te fakapogi ʼo Apele ʼo aʼu ki te ʼu tau ʼaē ʼe hoko ʼi te temi nei. Talu mai fualoa mo te ʼamanaki pea mo te atalitali ʼa te hahaʼi ke fakatuʼu te tokalelei, kae mole hona fua! ʼI te Palatiso ʼaē ka toe fakatuʼu, ko te hahaʼi fuli ʼe nātou loto tokalelei anai pea mo agamālū; ʼe nātou “fiafia moʼoni anai ʼi te mahu ʼo te tokalelei.”​—Pesalemo 37:11.

ʼE ʼui fēnei ia Isaia 11:9: “ ʼE fonu moʼoni anai te kele ʼi te ʼatamai mālama ʼo ʼuhiga mo Sehova ohage ko te ʼuʼufi ʼo te tai e te ʼu vai.” ʼUhi ko totatou ʼuhiga heʼe haohaoa, ʼe mole feala ʼi te temi nei ke tou mahino katoa ki te ʼu palalau ʼaia. ʼE lagi tou ako anai peʼe feafeaʼi hatatou logo tahi mo te ʼAtua ʼaki te ʼatamai mālama totonu ʼo ʼuhiga mo ia, pea mo te iku ʼo te faʼahi ʼaia ki he toe fiafia lahi. Kae mai tona ʼaluʼaga ʼaē ʼe fakahā mai e te Tohi-Tapu ko Sehova ʼe ko te ʼAtua mālohi, mo poto, mo faitotonu, pea mo ʼofa, koia ʼe feala ai ke tou tui papau ʼe fakalogo ki te ʼu faikole fuli ʼaē ʼe fai e te hahaʼi ʼo te “kele foou.”

ʼE Hoko Moʼoni Anai “Te Mauli Mooni”​—Koutou Faiga Kiai!

Maʼa te hahaʼi tokolahi, ko te maʼuli heʼegata ʼi he mālama ʼe lelei age ʼe ko he moemisi pe ia peʼe ko he meʼa ʼe mole moʼoni. Kae kia nātou ʼaē ʼe tui moʼoni ki te fakapapau ʼa te Tohi-Tapu, ko te ʼamanaki ʼaia ʼe ko he meʼa ʼe hoko moʼoni anai. ʼE hage ko he taula ki tonatou maʼuli. (Hepeleo 6:​19) Ohage pe ko he taula ʼe ina fakatuʼu maʼu he vaka pea mo ina tāʼofi naʼa tafea, ko te ʼamanaki ki te maʼuli heʼegata ʼe ina foaki ki te hahaʼi te mālohi pea mo te falala, pea ʼe feala ai ke nātou tauʼi te ʼu faigataʼaʼia ʼo te maʼuli pea mo mālo ai.

ʼE feala ke tou tui papau ʼe fakahoko anai e te ʼAtua tana ʼu fakapapau. Neʼe ina foaki mai he fakamoʼoni ʼi tana fai he fuakava, ko he fakapapau ʼe ina fakahoko moʼoni anai. Neʼe tohi fēnei e te ʼapositolo ko Paulo: “Koia, nee finegalo te Atua ke ina fakaha leleiʼage kia natou te tofia o te fakapapau, te tuumau o tona finegalo, nee ina fai ai he fuakava. Ke aki ia mooni e lua e tuumau, e mole feala ki te Atua ke lohi, ke mau ai e tatou . . . he fakafimalieʼaga malohi ki te puke o te falala kua fakatakoto i otatou mua.” (Hepeleo 6:​17, 18) Ko te ʼu “mooni e lua e tuumau” ʼaē ʼe mole feala ke fetogi e te ʼAtua, ʼe ko tana fakapapau pea mo tona fuakava, ʼaē ʼe tou fakatafito kiai tatatou ʼu ʼamanaki.

Ko te tui ʼaē ki te ʼu fakapapau ʼa te ʼAtua ʼe ina foaki he fakafimālie lahi pea mo he fakaloto mālohi ʼi te faʼahi fakalaumālie. Ko Sosue, te tagata takitaki ʼo Iselaele, neʼe ina maʼu te taʼi tui ʼaia. ʼI te temi ʼaē neʼe fai ai e Sosue tana akonaki fakaʼosi ki te kau Iselaelite, neʼe kua matuʼa pea neʼe ina ʼiloʼi kua vave mate. Kae neʼe nofo mālohi pea mo agatonu tuʼumaʼu, ʼuhi ko tana tui ʼaē ki te ʼu fakapapau ʼa te ʼAtua. ʼI tana ʼosi ʼui ʼaē ʼe ʼalu “ ʼi te ala ʼo te kele katoa,” ʼaē ʼe ina taki te malamanei katoa ki te mate, neʼe ʼui fēnei e Sosue: “ ʼE koutou ʼiloʼi papau ʼaki tokotou loto katoa pea mo tokotou nefesi katoa, neʼe mole hala he folafola ʼi te ʼu folafola lelei fuli ʼaē neʼe ʼui atu e Sehova tokotou ʼAtua. Neʼe hoko fuli ia maʼa koutou. Neʼe mole hana folafola ʼi te ʼu folafola ʼaia neʼe mole heʼeki hoko.” ʼE moʼoni, neʼe ʼui tuʼa tolu e Sosue ko te ʼAtua ʼe ina fakahoko tuʼumaʼu tana ʼu fakapapau fuli.​—Sosue 23:14.

ʼE feala ke koutou maʼu mo koutou te tui ʼaia ki te fakapapau ʼa te ʼAtua ʼo ʼuhiga mo te mālama foʼou ʼaē ka ʼamanaki fakatuʼu. ʼAki takotou ako fakamalotoloto te Tohi-Tapu, ʼe koutou mahino anai pe ko ai ia Sehova pea he koʼe ʼe tau mo feʼauga ke koutou falala katoa kia te ia. (Apokalipesi 4:​11) Neʼe maʼu e Apalahamo, mo Sala, mo Isaake, mo Sakopo, pea mo te tahi ʼu hahaʼi faitotonu he tui mālohi, he neʼe fakatafito ki tanatou ʼiloʼi lelei ia te ʼAtua moʼoni, ko Sehova. Neʼe mālohi tuʼumaʼu tanatou ʼamanaki, logope la “nee heeki natou tali te u fakapapau” ʼi te temi ʼaē neʼe kei maʼuʼuli ai. Kae “nee natou sio mamao ki ai, mo fai ki ai tanatou fakaʼalofa.”​—Hepeleo 11:13.

ʼI tatatou mahino ki te ʼu lea faka polofeta ʼo te Tohi-Tapu, ʼe tou sio ʼi te temi nei ki te ōvi mai ʼo “te aho fakaʼilifia o te Atua Mafimafi,” ʼaē ka pulihi ai anai ʼi te kele te agakovi fuli pe. (Apokalipesi 16:​14, 16) Ohage ko te hahaʼi agatonu ʼo te temi muʼa, ʼe tonu ke tou falala ʼi tatatou atalitali ʼaē ki te ʼu meʼa ʼaē ka hoko mai, koteʼuhi ʼe tou tui pea mo tou ʼofa ki te ʼAtua pea mo “te mauli mooni.” Ko te ōvi mai ʼo te mālama foʼou, ʼe ina foaki he fakaloto mālohi lahi kia nātou ʼaē ʼe tui kia Sehova pea mo ʼofa kia te ia. ʼE tonu ke tou tokaga ki tatatou tui pea mo tatatou ʼofa, ke leleiʼia tatou e te ʼAtua pea ke ina puipui tatou ʼi tona ʼaho lahi, ʼaē kua vave hoko mai.​—Sofonia 2:3; 2 Tesalonika 1:3; Hepeleo 10:​37-​39.

Koia, ʼe koutou leleiʼia koa te maʼuli? Pea ʼe koutou manako lahi koa ki “te mauli mooni”​—ʼi tokotou ʼuhiga tagata kaugana ʼa te ʼAtua, ʼaki te ʼamanaki ʼaē ki he ka haʼu fakafiafia, ei te ʼamanaki ʼaē ki te maʼuli heʼegata? Kapau ʼe ko te faʼahi ʼaia ʼaē ʼe koutou kumi, koutou manatuʼi te tokoni ʼaē neʼe fai e te ʼapositolo ko Paulo, ʼaē neʼe ina ʼui ke tou ‘falala mole ki he ʼu koloā fakalākilua, kae ki te ʼAtua.’ Pea neʼe ina toe ʼui fēnei: “[Koutou] fakakoloa . . . i te u gaue lelei,” ʼaē ko he fakaʼapaʼapa ʼaia ki te ʼAtua, “ke [feala hatatou] mau te mauli mooni.”​—1 Timoteo 6:​17-​19.

Kapau ʼe koutou tali ke koutou ako te Tohi-Tapu mo te kau Fakamoʼoni ʼa Sehova, pea ʼe feala ai anai ke koutou maʼu te ʼatamai mālama ʼaē ʼe ina taki ki “te mauli heegata.” (Soane 17:3) ʼAki te ʼofa, ʼe fakahā e te Tohi-Tapu te fakaafe fakatāmai ʼaenī ki te hahaʼi fuape: “Ê toku foha, ʼaua naʼa galo kia koe taku lao, pea ke taupau e tou loto taku ʼu fakatotonu, heʼe hilifaki atu anai kia te koe te loaloaga ʼo te ʼu ʼaho pea mo te ʼu taʼu ʼo te maʼuli pea mo te tokalelei.”​—Tāʼaga Lea 3:​1, 2.

[Nota ʼi te lalo pasina]