Koutou Fai Ke Lava Lelei Tokotou Maʼuli!
“Manuʼia te tagata ʼaē neʼe mole haʼele ʼi te tokoni ʼa te kau agakovi . . . ko meʼa fuli ʼe ina fai ʼe fua anai.”—Pesalemo 1:1, 3.
1. (a) Ki te tokolahi ʼi te kau tūpulaga ʼo te mālama, koteā te faka ʼuhiga ʼo he maʼuli ʼe lava lelei? (b) Koteā ʼaē ʼe ʼui e te Tohi-Tapu ʼo ʼuhiga mo te tagata ʼaē ʼe lava lelei tona maʼuli?
KIA koutou, koteā te faka ʼuhiga ʼo te maʼuli ʼaē ʼe lava lelei? Neʼe ʼui fēnei e te tūpulaga: “Ko te fakatuʼutuʼu ʼaē ʼe maʼuhiga tāfito kia ʼau, ʼe ko te lava lelei ʼo taku gāue.” Neʼe ʼui fēnei e te finemui: “ ʼE ʼau fakaʼamu tāfito ke ʼau fiafia ʼi toku maʼuli faka famili.” Kae ʼe ʼui fēnei e te tahi finemui: “ ʼE ʼau loto pe ʼau ke ʼau maʼu hoku ʼapi matalelei, haku motokā matalelei . . . ʼE ʼau tokaga pe ʼau ki toku maʼuli.” Kae ko tona kiʼi mele, ʼe mole feala ke kita ʼui ʼe lava lelei te maʼuli ʼa he tahi ʼaki te paʼaga, peʼe ko te maʼuli faka famili, peʼe ʼaki he gāue ʼe haʼele lelei. Ia Pesalemo 1:1-3, ʼe tou lau fēnei: “Manuʼia te tagata ʼaē neʼe mole haʼele ʼi te tokoni ʼa te kau agakovi . . . Ko tona fiafia ʼe ʼi te lao ʼa Sehova . . . ko meʼa fuli ʼe ina fai ʼe fua anai.”
2. ʼE maʼu ʼifea te maʼuli ʼaē ʼe lava lelei moʼoni, pea koteā te meʼa e tahi ʼe tonu ke tou fai ke kita maʼu ai te maʼuli ʼaia?
2 ʼE fakapapau ʼi henī e te Tohi-Tapu he meʼa ʼe mole feala ke foaki e te tagata—ko te lava lelei ʼo tokita maʼuli! Kae ʼe mole faka ʼuhiga ia ki te maʼu paʼaga. ʼE fai e te Tohi-Tapu te fakatokaga ʼaenī: “Koteuhi ko te aka o te kovi fuape e ko te manumanu paaga.” (1 Timoteo 6:10) ʼE hoki lava lelei totatou maʼuli mokā tou fakafiafia te ʼAtua—pea ʼe kau kiai tatatou mulimuli ki tana ʼu lao. Ko te meʼa pe ʼaia e tahi ʼaē ka tou maʼu ai anai te fiafia moʼoni! Lagi mole tou faʼa leleiʼia te manatu ʼaē ke tou mulimuli ki te lao ʼa Sehova pea ke fakatotonu mai te meʼa ʼaē ʼe tonu ke tou fai. Kae neʼe ʼui fēnei e Sesu: “Manuia te hahai e masiva i onatou loto, e anatou te Puleaga o Selo.” (Mateo 5:3) Peʼe koutou mahino kiai peʼe kailoa, kae neʼe fakatupu koutou ʼaki te holi ki te ʼu meʼa fakalaumālie—te fia ʼiloʼi ʼo te ʼAtua pea mo te fia mahino ki tana ʼu fakatuʼutuʼu. Koia, ʼe feala ke koutou fiafia moʼoni mo kapau ʼe koutou fakafimālie te holi ʼaia pea mo koutou mulimuli ki “te lao ʼa Sehova.”
Te ʼAoga ʼa Te ʼu Lao ʼa Te ʼAtua Kia Tatou
3. He koʼe ʼe tonu ke tou fiafia ʼi te takitaki ʼo tatou e Sehova?
3 Neʼe tohi fēnei e te polofeta ko Selemia: “ ʼE ʼau ʼiloʼi pe, Ê Sehova, ko te tagata ʼaē neʼe toʼo mai te kele ʼe mole ʼa ia tona ala. ʼE mole ʼa te tagata ʼaē ʼe haʼele te takitaki ʼo tana haʼele.” (Selemia 10:23) ʼE moʼoni te faʼahi ʼaia ki te hahaʼi fuli pe, ki te kau tūpulaga pea mo te hahaʼi lalahi. Ko tona faka ʼuhiga, ʼe mole tou maʼu te poto, mo te māhani ʼi te maʼuli, pea mo te ʼatamai mālama moʼo takitaki tatatou ala, pea tahi ʼe mole tonu ke tou fai te faʼahi ʼaia. Ia Apokalipesi 4:11, ʼe ʼui fēnei e te Tohi-Tapu: “E ke taau, Aliki [“Sehova,” MN] tomatou Atua, ke ke tali te kololia, mo te fakaapaapa pea mo te mafimafi, koteuhi nee ke fakatupu ia meafuape, pea nee ke finegalo ke natou mauli pea nee fakatupu ai natou.” Ko Sehova totatou Tupuʼaga, ko ia “te matapuna ʼo te maʼuli.” (Pesalemo 36:9) Koia, ʼe ko ia tokotahi pe ʼaē ʼe ina ʼiloʼi lelei peʼe tonu ke tou fakaʼaogaʼi feafeaʼi totatou maʼuli. Pea neʼe ina fai te ʼu lao, ʼo mole ina fai ke puli ai tatatou fiafia kae moʼo tokoni mai ke fua lelei kia tatou. (Isaia 48:17) Kapau ʼe mole tou tokagaʼi tana ʼu lao pea ʼe fua kovi anai ia kia tatou.
4. He koʼe e tokolahi te kau tūpulaga ʼe nātou maumauʼi tonatou maʼuli?
4 Ohage la, ʼe kua koutou feʼekeʼaki koa la pe koʼe ʼe tokolahi te kau tūpulaga ʼe nātou maumauʼi tonatou maʼuli ʼaki te toloke, mo te ʼu aga fakalialia, pea mo te tahi ʼu aga kovi? ʼE fakamahino fēnei ia Pesalemo 36:1, 2: “Ko te meʼa ʼaē ʼe ʼui e te talagataʼa ki te tagata agakovi ʼe ʼi tona loto; ʼe mole he manavasiʼi ki te ʼAtua ʼi ʼona muʼa mata. He neʼe agamālū fau kia ia, ki ʼona mata totonu, ke ina maʼu tana hala ke fehiʼa ki ai.” ʼUhi ko tanatou mole “manavasiʼi ki te ʼAtua,” ko te tokolahi ʼo te kau tūpulaga ʼe nātou faihala ʼo nātou manatu ʼe mole fua kovi anai tanatou ʼu aga kovi. Kae ki muli age, ʼe hoko kia nātou te meʼa ʼaē ʼe ʼui e te pelesepeto ʼaenī ʼaē ʼe mole feala ke fetogi: “Ko te mea ae e to e te tagata pea e ina utu anai. Ko ia ae e ina to i tona kakano, mai te kakano e ina utu anai te aga maveuveu. Kae kia ia ae e ina to i te Laumalie, mai te Laumalie e ina utu anai te mauli heegata.”—Kalate 6:7, 8.
‘Koutou Lau Te ʼu ʼAho’
5, 6. (a) He koʼe ʼe tonu ki te kau tūpulaga ke nātou ‘lau tanatou ʼu ʼaho,’ pea koteā tona faka ʼuhiga? (b) Koteā te faka ʼuhiga ʼo te ʼui ʼaē ke tou ‘manatuʼi totatou Tupuʼaga Lahi’?
5 Koteā ʼaē ʼe feala ke koutou fai ke lava lelei ai tokotou maʼuli pea mo koutou ‘utu te mauli heegata’? Neʼe tohi fēnei e Moisese: “Ko te ʼu ʼaho ʼo totatou ʼu taʼu ʼe ko taʼu e fitugofulu; pea kapau ko he mālohi makehe pea ʼe aʼu kia taʼu e valugofulu . . . ʼE fakalaka vave, pea ʼe tou mavae.” (Pesalemo 90:10) ʼE lagi tahitahiga takotou manatu ki te mate, peʼe mole lagi koutou manatu pe la kiai. ʼI tona fakahagatonu, ʼe lahi te ʼu meʼa ʼe fai e te kau tūpulaga ʼi tanatou manatu ʼaē ʼe mole nātou mamate anai. Kae neʼe fakahā fakahagatonu mai e Moisese te moʼoni fakaloto mamahi, ʼo ina ʼui ko te maʼuli ʼe nounou. ʼE mole feala ke tou ʼui peʼe tou aʼu anai ki totatou taʼu 70 peʼe 80. ʼE feala ke mamate he kau tūpulaga kei mālolohi, ʼuhi “ko te ʼu temi pea mo te ʼu meʼa [ʼaē ʼe hoko] fakafokifā.” (Tagata Tānaki 9:11) Koia, ʼe tou fakaʼaogaʼi feafeaʼi anai ʼi te temi nei tatatou maʼuli ʼaē ʼe maʼuhiga? Neʼe faikole fēnei ia Moisese: “Fakahā mai kia mātou peʼe feafeaʼi te lau ʼo tomatou ʼu ʼaho ʼi hona faʼahiga ʼaluʼaga ke mātou maʼu ai he loto fakapotopoto.”—Pesalemo 90:12.
6 Koteā te faka ʼuhiga ʼo te lau ʼo totatou ʼu ʼaho? ʼE mole faka ʼuhiga ke tou kumi pe ko temi ʼe fia kei toe ke tou maʼuʼuli ai. Neʼe faikole Moisese ke akoʼi e Sehova Tana hahaʼi peʼe tonu ke nātou fakaʼaogaʼi feafeaʼi te ʼu ʼaho ʼaē kei toe ki tonatou maʼuli moʼo vikiʼi ia Ia. ʼE koutou lau koa te ʼu ʼaho ʼo tokotou maʼuli—ʼo koutou faka ʼuhiga te ʼu ʼaho fuli ʼaia ʼe ko he faʼahi maʼuhiga ke koutou fakaʼaogaʼi moʼo fakavikiviki ki te ʼAtua? ʼE fai e te Tohi-Tapu te fakaloto mālohi ʼaenī ki te kau tūpulaga: “Ke ke fakamamaʼo mai tou loto te lotomamahi, pea mo ke leʼei kehe te malaʼia mai tou kakano, heʼe ko te temi tūpulaga pea mo te kamata ʼo te maʼuli ʼe vaʼiganoa. Koia, ke ke manatuʼi tou Tupuʼaga lahi ʼi te ʼu ʼaho ʼo tou temi tūpulaga.” (Tagata Tānaki 11:10–12:1) Ko te manatuʼi ʼo totatou Tupuʼaga ʼe mole faka ʼuhiga pe ke ʼaua naʼa tou galoʼi ʼe maʼuli moʼoni. ʼI te temi ʼaē neʼe kole fēnei age e te tagata fai fakapō kia Sesu, “Manatui au moka ke haeleʼage ki tou Puleaga,” neʼe mole loto pe ia ke manatuʼi e Sesu tona higoa. Neʼe ina loto ke fai e Sesu he meʼa maʼa ia, ke ina fakatuʼuake ia ia! (Luka 23:42; vakaʼi ia Senesi 40:14, 23; Sopo 14:13.) ʼO toe feiā mo tatou, ko tatatou manatuʼi ia Sehova ko tona faka ʼuhiga ke tou fai he meʼa, ke tou fai te ʼu meʼa ʼaē ʼe fiafia ai. ʼE feala koa ke ʼui ʼo ʼuhiga mo koutou ʼe koutou manatuʼi ia Sehova?
ʼAua Naʼa Koutou Holi Ki Te Maʼuli ʼa Te Kau Agakovi
7. He koʼe ʼe fili e ʼihi kau tūpulaga ke nātou galoʼi tonatou Tupuʼaga? Koutou tuku mai he faʼifaʼitaki.
7 Tokolahi te kau tūpulaga neʼe nātou fili ke nātou galoʼi ia Sehova, he neʼe nātou manatu ʼe lahi fau te ʼu tapu ʼi te maʼuli ʼa te kau Fakamoʼoni ʼa Sehova. ʼE ʼui fēnei e te tēhina Sepania ʼo ʼuhiga mo te ʼu meʼa ʼaē neʼe manatu kiai ʼi tona temi tūpulaga: “Neʼe ʼau leleiʼia te mālama he neʼe hage kia ʼau ʼe faigataʼa fau te moʼoni pea mo fefeka fau. Maʼa ʼaku, neʼe tonu pe ia ke ʼau haʼu ʼo heka, mo ako, mo kau ki te ʼu fono, ke ʼau ʼai he hēkesi kae neʼe mole ʼau fia fai te ʼu meʼa ʼaia.” ʼI ʼihi temi, ʼe koutou manatu koa ʼe mole koutou lava maʼu he ʼu meʼa ʼuhi ko takotou tauhi ki te ʼAtua? ʼE lagi koutou punamaʼuli anai ʼi hakotou ʼiloʼi neʼe manatu feiā te tagata neʼe kau ʼi te hahaʼi ʼaē neʼe nātou tohi te Tohi-Tapu. Koutou avahi takotou Tohi-Tapu pea koutou lau te Pesalemo 73.
8. He koʼe ko Asafe neʼe “fakaʼamu ki te ʼu tagata ʼaē ʼe nātou laupisi pe kia nātou totonu”?
8 Tou vakaʼi fakalelei te pesalemo ʼaia. ʼE ʼui fēnei e te vaega 2 pea mo te 3: “Kia ʼau, neʼe teitei pe ke hēʼia toku ʼu vaʼe, neʼe meihiʼi pe ke ʼau heke. He neʼe ʼau fakaʼamu ki te ʼu tagata ʼaē ʼe nātou laupisi pe kia nātou, ʼi taku sio ki te tokalelei ʼo te kau agakovi.” Ohage ko tona fakahā e te kupu tāfito ʼo te kapite ʼaia, neʼe ko Asafe ʼaē neʼe ina tohi te pesalemo ʼaia. Neʼe ko te Levite fai mahōlō, pea neʼe maʼuli ʼi te temi ʼo te Hau ko Tavite. (1 Fakamatala 25:1, 2; 2 Fakamatala 29:30) Logope la neʼe ina maʼu te pilivilesio ʼaē ke tauhi ʼi te fale lotu ʼa te ʼAtua, kae neʼe “fakaʼamu” ia ki te ʼu tagata ʼaē neʼe nātou laupisi tanatou meʼa noaʼi te lao. Neʼe hage neʼe mole hanatou fihifihia; neʼe hage neʼe nātou maʼuli tokalelei pea mo fīmālie. ʼI tona fakahagatonu, ko te hage ʼaē ʼe haʼele lelei tonatou maʼuli, neʼe kua ‘fakalaka ia ʼi te ʼu meʼa ʼaē neʼe lava fakakaukauʼi e te loto.’ (Vaega 5 mo te 7) “ ʼAki he fialahi,” neʼe nātou palalau ki te ʼu meʼa lalahi ʼaē neʼe nātou fai. (Vaega 8) “Neʼe nātou ʼai tonatou gutu ki te lagi pea ʼe feʼaluʼaki tonatou ʼalelo ʼi te kele,” ʼo mole nātou tokagaʼi he tahi—ʼi te lagi peʼe ʼi te kele.—Vaega 9.
9. ʼE lava liliu feafeaʼi ʼihi kau tūpulaga Kilisitiano ia ʼaho nei ʼo nātou hage ko Asafe?
9 ʼE lagi tatau te aga ʼo te tamaliki ʼi te faleako. ʼE lagi koutou logo ki tanatou laupisi ki te ʼu felāveʼi fakasino heʼeʼaoga ʼaē neʼe nātou fai, te ʼu lafeti fakavale ʼaē neʼe nātou kau ai, pea mo tanatou ʼinu kava pea mo tanatou palu te toloke. Kapau ʼe koutou fakatatau tonatou maʼuli ʼaē ʼe nātou ʼui ʼe ko he maʼuli fakafiafia, ʼaki te ala fāveliveli ʼaē ʼe tonu ke koutou muliʼi ʼi tokotou ʼuhiga Kilisitiano, ʼi ʼihi temi ʼe lagi koutou “fakaʼamu ki te ʼu tagata ʼaē ʼe nātou laupisi pe kia nātou.” (Mateo 7:13, 14) Neʼe ʼui fakahagatonu e Asafe: “ ʼE moʼoni ʼe vaʼiganoa taku fakamaʼa toku loto pea mo fanofano ʼoku ʼu nima ʼi te heʼe agahala. Pea neʼe ʼau liliu ʼo taʼomia ʼi te ʼaho katoa.” (Vaega 13 mo te 14) Ei, neʼe ina fia ʼiloʼi peʼe maʼuhiga koa tana tauhi ʼaē ki te ʼAtua pea mo tana maʼuli agatonu.
10, 11. (a) Koteā ʼaē neʼe fetogi ai te manatu ʼa Asafe? (b) He koʼe ʼe ʼui ʼe haʼele te hahaʼi agakovi “ ʼi he kele mahekeheke”? Koutou tuku mai he faʼifaʼitaki.
10 Meʼa lelei foki, he neʼe mole nofo fualoa ia Asafe ʼi te lotolotolua ʼaia. Neʼe mahino vave kia ia neʼe mole ko he tokalelei moʼoni ʼaē neʼe maʼu e te hahaʼi agakovi—kae neʼe faka temi pe ia! Neʼe ina ʼui fēnei: “Ei, ʼe ke tuku nātou ki he kele ʼe mahekeheke. Neʼe ke fakaʼauha nātou. Kua nātou liliu fakafokifā pe ko he meʼa ʼe sioʼi fakapunamaʼuli! Kua nātou aʼu ki tonatou fakaʼosi, kua fakaʼauha nātou ʼaki te ʼu meʼa fakamataku neʼe hoko fakapunamaʼuli!” (Vaega 18 mo te 19) ʼE toe feiā mo te tokolahi ʼo takotou ʼu kaumeʼa, ʼe nātou haʼele ʼi “he kele ʼe mahekeheke.” ʼAki te temi, ʼe nātou tuʼutāmaki anai ʼi tanatou aga ʼaē ʼe fakafeagai ki te ʼAtua, lagi ko te faitama ʼa he taʼahine, peʼe pikisia he tahi ʼi te ʼu mahaki ʼaē ʼe maʼu ʼi te ʼu felāveʼi fakasino, peʼe pilisoniʼi peʼe mate! Pea ko te meʼa ʼaē ʼe kovi tāfito, ko tanatou mole kei vāhaʼa lelei mo te ʼAtua.—Sakopo 4:4.
11 Neʼe fakatokagaʼi e te tuagaʼane finemui ʼi Sepania te moʼoni ʼo te ʼu palalau ʼaia. ʼI tana kei finemui, neʼe ina leleiʼia te ʼu meʼa ʼo te mālama, he neʼe fakatahi lelei mo te kau tūpulaga ʼaē neʼe mole tui ki te ʼAtua. Mole tuai, pea neʼe manako ki te tama ʼi te kau tūpulaga ʼaia—kae ko te tama neʼe toloke. Ko te finemui ʼaia neʼe mole ina fakaʼaogaʼi te toloke, kae neʼe ina totogi te toloke maʼa te tama. ʼE ina ʼui fēnei: “Neʼe ʼau tokoni kia ia moʼo fai ʼo tana foʼi huki.” Meʼa lelei foki, he neʼe mahino ki te tuagaʼane ʼaia te kovi ʼo tana aga pea neʼe toe liliu mai ki te moʼoni. Kae mole fualoa, pea neʼe punamaʼuli ʼaupito ʼi tana logo ʼaē kua mate tona kaumeʼa ʼaē neʼe toloke ʼi te SITA. Ei, ohage pe ko te meʼa neʼe ʼui e te tagata fai pesalemo, ko te hahaʼi ʼaē ʼe mole tui ki te ʼAtua ʼe nātou haʼele “ ʼi he kele ʼe mahekeheke.” Ko ʼihi neʼe mamate, ʼuhi ko tonatou maʼuli heʼeʼaoga. Kia nātou ʼaē ʼe kei maʼuʼuli, kapau ʼe mole nātou fetogi tanatou aga, pea ʼe nātou felāveʼi anai ʼi te ka haʼu mo te “ha . . . mai Selo te Aliki Sesu fakatahi mo te kau aselo o tona Mafimafi, i he afi ulo o fakahoko te lagavaka kia natou e mole natou iloi te Atua, pea mo natou e mole fakalogo ki te Evaselio o totatou Aliki ko Sesu.”—2 Tesalonika 1:7, 8.
12. Neʼe mahino feafeaʼi ki te tūpulaga Saponia te mole fakapotopoto ʼo te fakaʼamu kia nātou ʼaē ʼe agakovi?
12 Koia ʼe mole ko he meʼa fakapotopoto tatatou fakaʼamu kia “natou e mole natou iloi te Atua”! ʼI tona ʼuhiga moʼoni, ʼe tonu ke tou fakaʼamu kia nātou ʼaē ʼe nātou ʼiloʼi ia Sehova pea mo ʼamanaki ke nātou maʼuʼuli ʼo heʼegata. Neʼe mahino kiai te tēhina tūpulaga ʼo Saponia. ʼI tona ʼuhiga tūpulaga, neʼe fakaʼamu mo ia ki he “ ʼāteaina ʼe lahi age.” ʼE ina fakamahino fēnei: “Neʼe ʼau manatu neʼe ʼau hala ʼi he meʼa. Pea neʼe ʼau fakakaukau peʼe feafeaʼi anai toku maʼuli mo kapau ʼe ʼau līaki te moʼoni. Neʼe ʼau fakakaukau ʼe ʼau maʼuli anai ia taʼu e 70 peʼe 80 pea ʼau mate. Kae ʼe foaki mai e Sehova te ʼamanaki ʼaē ke tou maʼuli ʼo heʼegata! Ko taku mahino ki te faʼahi ʼaia, neʼe tokoni mai kia ʼau ke ʼau leleiʼia te ʼu meʼa ʼaē kua ʼau maʼu.” Kae ʼe mole faigafua takita nofo agatonu ʼi he mālama ʼe mole muliʼi ai e te hahaʼi te ʼu lao ʼa te ʼAtua. Koteā ʼaē ʼe feala ke koutou fai ke koutou tauʼi te ʼu fakaneke ʼaia?
Koutou Tokakaga Ki ʼAkotou ʼu Fakakaugā!
13, 14. He koʼe ʼe maʼuhiga ke koutou filifili lelei takotou ʼu fakakaugā?
13 Tou toe vakaʼi te ʼu palalau ʼo ʼuhiga mo te tagata ʼaē ʼe lava lelei tona maʼuli, ʼaē ʼe talanoa ki ai ia Pesalemo 1:1-3: “Manuʼia te tagata ʼaē neʼe mole haʼele ʼi te tokoni ʼa te kau agakovi, pea neʼe mole tuʼu ʼi te ala ʼo te kau agahala, pea neʼe mole heka ʼi te hekaʼaga ʼo te hahaʼi vāvā. Kae ko tona fiafia ʼe ʼi te lao ʼa Sehova, pea ʼi tana lao ʼe ina lau leʼo veliveli ʼi te ʼaho mo te po. ʼE liliu anai ko he fuʼu ʼakau ʼe to ōvi ki te vaitafe, ʼe fua ʼi tona temi tonu pea ʼe mole fefe tona ʼu lau, pea ko meʼa fuli ʼe ina fai ʼe fua anai.”
14 Koutou ʼuluaki fakatokagaʼi ko takotou ʼu fakakaugā ʼe maʼuhiga ʼaupito. ʼE ʼui fēnei ia Tāʼaga Lea 13:20: “Ko ʼaē ʼe haʼele mo te kau poto ʼe liliu anai ia ʼo poto, kae ko ʼaē ʼe fakatahi mo te kau vale, ʼe fua kovi anai kia ia.” ʼE mole faka ʼuhiga leva ke mole koutou kumi hakotou ʼu kaumeʼa, peʼe koutou agakovi ki te kau tūpulaga ʼaē ʼe mole ko he kau Fakamoʼoni ʼa Sehova. Kae ʼe uga tatou e te Tohi-Tapu ke tou ʼofa ki te hahaʼi pea mo tou “nofo tokalelei mo te hahai fuape.” (Loma 12:18; Mateo 22:39) Kae ʼe feala ke koutou ‘haʼele ʼi te tokoni’ ʼo nātou ʼaē ʼe mole mulimuli ki te ʼu lekula ʼa Tohi-Tapu, mo kapau ʼe koutou fakatahi tuʼumaʼu mo nātou.
Te ʼu Fua Lelei ʼo Te Lau ʼo Te Tohi-Tapu
15. Koteā ʼaē ʼe tonu ke fai e te kau tūpulaga ke tupu ai hanatou fia lau ia te Tohi-Tapu?
15 Neʼe toe ʼui foki e te tagata fai pesalemo, ko te tagata ʼaē ʼe lava lelei tona maʼuli ʼe fiafia ʼi te lau “leʼo veliveli ʼi te ʼaho mo te po” ia te lao ʼa te ʼAtua. (Pesalemo 1:1, 2) ʼE moʼoni, ʼe mole faigafua te lau ʼo te Tohi-Tapu, heʼe tohi “ai he u mea e faigataa te mahino ki ai.” (2 Petelo 3:16) Kae ko te lau ʼo te Tohi-Tapu ʼe mole tonu ke hage ko he kavega. Pea ʼe feala ke koutou “holi mālohi ki te huʼa pipi maʼa” ʼa te Folafola ʼa te ʼAtua. (1 Petelo 2:2, MN) Koutou faiga ke koutou lau hona kiʼi koga veliveli ʼi te ʼaho fuli. Kapau ʼe ʼi ai ni puani ʼe mole koutou mahino kiai, koutou fai he ʼu kumi. ʼOsi ʼaia pea koutou metitasioʼi te meʼa ʼaē neʼe koutou lau. (Pesalemo 77:11, 12) Kapau ʼe faigataʼa hakotou tokakaga ki te meʼa ʼaē ʼe koutou lau, pea koutou lau leʼolahi. ʼAki te temi, ʼe mahino papau ia ʼe tuputupu anai takotou fia lau te Tohi-Tapu. ʼE ʼui fēnei e te tuagaʼane kei finemui ʼi Pelesia: “Maʼa ʼaku, neʼe hage neʼe mamaʼo ia Sehova. Kae lolotoga ni ʼu māhina, neʼe ʼau hikihiki taku ako tokotahi pea mo taku lau te Tohi-Tapu. ʼI te temi nei, kua ʼau logoʼi kua mālohi age taku ʼu felogoi mo Sehova pea kua toe mālohi age taku tui kia te ia.”
16. Koteā ʼaē ʼe feala ke tou fai ke ʼaoga lahi kia tatou te ʼu fono?
16 ʼE toe maʼuhiga foki ke koutou kau ki te ʼu fono ʼo te kokelekasio ke koutou tuputupu ai ʼi te faʼahi fakalaumālie. Kapau ʼe koutou “vakai, pe e feafeai tautou fagono,” pea ʼe koutou maʼu anai he ʼu fakaloto mālohi lahi. (Luka 8:18) ʼE koutou manatu koa ʼi ʼihi temi ʼe mole he ʼaoga ʼo te ʼu fono? Koutou fai kia koutou te ʼu fehuʼi ʼaenī, ‘Koteā ʼaē ʼe ʼau fai ke ʼaoga kia ʼau te ʼu fono? ʼE ʼau fakalogo koa? ʼE ʼau teuteuʼi koa? ʼE ʼau fai koa haku ʼu tali?’ Koteʼuhi ʼe fakahā mai e te Tohi-Tapu ke tou “fe’tokagaʼaki o fakaʼalaʼala ki te fai o te ofa pea mo te u gaue lelei, . . . tou fe’tokoniʼaki.” (Hepeleo 10:24, 25) Moʼo fai te meʼa ʼaia ʼe tonu ke koutou fai hakotou ʼu tali! Kae kapau ʼe koutou fia tali, pea ʼe tonu ke koutou teuteuʼi fakatomuʼa. ʼE ʼui fēnei e te tuagaʼane kei finemui: “ ʼE faigafua age hakita tali ʼi te ʼu fono mo kapau neʼe kita teuteuʼi.”
ʼE Fua Lelei Te Mulimuli Ki Te Ala ʼa Te ʼAtua
17. ʼE lava feafeaʼi ki he tahi ʼe ina lau tuʼumaʼu te Tohi-Tapu ke hage “ko he fuʼu ʼakau ʼe to ōvi ki te vaitafe”?
17 ʼE ʼui ki muli age e te tagata fai pesalemo, ko te tagata ʼaē ʼe lava lelei tona maʼuli, ʼe hage ko “he fuʼu ʼakau ʼe to ōvi ki te vaitafe.” Ko te vaitafe neʼe lagi ko te ʼu luo vai ʼaē neʼe keli moʼo fakavai te ʼu fuʼu ʼakau ʼi te ʼu gāueʼaga. (Isaia 44:4) Ko takotou lau te Tohi-Tapu ʼi te ʼaho fuli ʼe hage ko hakotou fakaʼaogaʼi he meʼa kai pea mo he meʼa ʼinu ʼe foaki tuʼumaʼu atu. (Selemia 17:8) ʼE koutou maʼu anai ʼi te ʼaho fuli te mālohi ʼaē ʼe ʼaoga kia koutou moʼo kātakiʼi te ʼu ʼahiʼahi pea mo te ʼu faigataʼaʼia. ʼI takotou ako te ʼu manatu ʼa Sehova, ʼe koutou maʼu anai te poto ʼaē ʼe ʼaoga kia koutou ke koutou fai he ʼu puleʼaki ʼe fakapotopoto.
18. Ko ai ʼaē ʼe feala ke tokoni ki he tūpulaga ke fua lelei moʼoni tana tauhi ʼaē kia Sehova?
18 ʼI ʼihi temi, ʼe feala ke hage kia koutou ʼe faigataʼa te tauhi kia Sehova. Kae ʼaua naʼa koutou manatu ʼi he temi ʼe faigataʼa fau tona fakahoko. (Teutalonome 30:11) ʼE fakapapau mai e te Tohi-Tapu ʼaki te temi, ‘ko meʼa fuli ʼaē ka koutou fai ʼe ʼi ai anai hona fua,’ mo kapau ʼe koutou tokaga ʼuluaki ke koutou fai te ʼu meʼa ʼaē ʼe leleiʼia e Sehova pea mo fakafiafia tona loto! (Tāʼaga Lea 27:11) Pea koutou manatuʼi, ʼe mole koutou tokotahi. ʼE tokoni atu ia Sehova pea mo Sesu Kilisito. (Mateo 28:20; Hepeleo 13:5) ʼE nā ʼiloʼi te ʼu fakahala ʼaē ʼe fai atu kia koutou, pea ʼe mole nā līaki anai koutou. (Pesalemo 55:22) ʼE toe lagolago atu foki mo “[tokotou ʼu] tehina” pea mo takotou ʼu mātuʼa mo kapau ʼe nā tauhi kia Sehova. (1 Petelo 2:17) ʼAki te ʼu tokoni ʼaia, mo takotou lotomālohi pea mo takotou faiga, ʼe lava lelei anai tokotou maʼuli ʼi te temi nei ʼo talu ai!
Fehuʼi Fakamanatu
◻ Koteā te maʼuli ʼaē ʼe lava lelei moʼoni?
◻ He koʼe ʼe tonu ke takitaki tatou e Sehova?
◻ Koteā tona faka ʼuhiga ki te kau tūpulaga ke nātou ‘lau tonatou ʼu ʼaho’?
◻ He koʼe ʼe mole fakapotopoto te fakaʼamu kia nātou ʼaē ʼe agakovi?
◻ ʼE lava tokoni feafeaʼi te lau ʼo te Tohi-Tapu ʼi te ʼaho fuli pea mo te kau tuʼumaʼu ki te ʼu fono, ke lava lelei te maʼuli ʼa te kau tūpulaga?
[Paki ʼo te pasina 20]
ʼE lahi te kau tūpulaga ʼe feala ke tuʼutāmakiʼia, koteʼuhi ʼe mole nātou “manavasiʼi ki te ʼAtua”
[Paki ʼo te pasina 22]
ʼE tau galoʼi e te kau tūpulaga ʼe ʼi ai anai he ʼu fua kovi ʼo tanatou aga
[Paki ʼo te pasina 23]
Koutou leleiʼia te lau ʼo te Tohi-Tapu
[Paki ʼo te pasina 23]
ʼE koutou leleiʼia anai te ʼu fono mo kapau ʼe koutou fai hakotou ʼu tali