ʼE ʼAoga Te Kautahi ʼa Sehova Kia Tatou
NEʼE mole heʼeki koutou logo koa la ki he tahi ʼe ina ʼui fēnei: “ ʼE ʼau tui ki te ʼAtua kae mole ʼau tui ki he kautahi”? ʼE tau manatu feiā te hahaʼi, ʼaē ki muʼa atu neʼe nātou leleiʼia te lotu, kae ʼi te temi nei mole kei nātou falala kiai, he neʼe mole foaki age e tanatou lotu te ʼu meʼa ʼaē neʼe ʼaoga kia nātou ʼi te faʼahi fakalaumālie. Logope la tanatou mole kei falala ki te ʼu kautahi faka lotu, kae ko te tokolahi ʼe nātou ʼui ʼe kei nātou fia tauhi ki te ʼAtua. Kae ʼe nātou tui ʼe lelei age hanatou tauhi kia te ia, ʼaki pe tanatou faʼahiga tauhi, ka mole nātou fia kau ki he ʼēkelesia peʼe ko he tahi kautahi.
Kae koteā ʼaē ʼe ʼui e te Tohi-Tapu? ʼE loto koa e te ʼAtua ke fakatahitahi te kau Kilisitiano ʼi he kautahi?
Neʼe ʼAoga He Kautahi Ki Te ʼu ʼUluaki Kilisitiano
ʼI te Penikosite ʼo te taʼu 33 ʼo totatou temi, neʼe foaki e Sehova tona laumālie maʼoniʼoni ki te ʼu hahaʼi neʼe nātou fakatahitahi “ ʼi te koga meʼa pe e tahi,” neʼe ko te kogafale fata ʼi te kolo ʼo Selusalemi, kae neʼe mole nātou mavetevete. (Gaue 2:1, MN) Neʼe ko te temi ʼaia ʼaē neʼe fakatuʼu ai te kokelekasio faka Kilisitiano, pea neʼe liliu ko te kautahi faka malamanei. Neʼe ko he toe tapuakina moʼoni ki te ʼu ʼuluaki tisipulo ʼaia. Koteā tona tupuʼaga? Koteʼuhi neʼe foaki kia nātou te gāue maʼuhiga—ko te faka mafola ʼo te logo lelei ʼo te Puleʼaga ʼa te ʼAtua ʼo aʼu “ki te kelekele katoa.” (Mateo 24:14) ʼI te loto kokelekasio, ko nātou ʼaē neʼe foʼofoʼou mai neʼe nātou lava akoako ʼaki ia nātou ʼaē kua māhani, peʼe feafeaʼi te fai faka mafola.
Mole tuai pea neʼe toe faka mafola atu te logo ʼo te Puleʼaga ʼi tuʼa ʼo te kolo ʼo Selusalemi. ʼI te taʼu 62 ki te taʼu 64 ʼo totatou temi, neʼe fai e te ʼapositolo ko Petelo tana ʼuluaki tohi ki te kau Kilisitiano ʼaē neʼe “nofo-mavetevete i Ponito, mo Kalate, mo Kapatosia, mo Asia pea mo Pitinia,” ko te ʼu fenua ʼi Tulikia ia ʼaho nei. (1 Petelo 1:1) Neʼe toe ʼi ai mo te ʼu hahaʼi neʼe tui kia Kilisito ʼi Palesitina, mo Lipania, mo Silia, mo Sīpele, mo Keleka, pea mo Italia. Ohage ko tona tohi e Paulo ki te kau Kolose ʼi te taʼu 60-61 ʼo totatou temi, ko te logo lelei “neʼe faka mafola ʼi te ʼu meʼa katoa ʼaē neʼe fakatupu ʼi te lalo lagi.”—Kolose 1:23, MN.
Ko te tahi meʼa lelei ʼo te kau ki he kautahi he neʼe feala ai ke fefakaloto mālohiʼaki te kau Kilisitiano. ʼI tanatou fakatahitahi mo te kokelekasio, neʼe logo te kau Kilisitiano ki he ʼu akonaki ʼe haʼu mai te ʼAtua, mo nātou ako fakatahi te Tohi-Tapu, mo nātou vaevae te ʼu meʼa ʼaē neʼe hoko ki tonatou maʼuli moʼo fakaloto mālohiʼi tanatou tui, pea mo nātou faikole fakatahi mo tonatou ʼu tēhina mo tuagaʼane ʼi te tui.(1 Kolonito, kapite 14) Pea ko te ʼu tēhina ʼaē kua fakapotopoto neʼe feala ai ke nātou “tauhi te fagaʼovi a te Atua.”—1 Petelo 5:2.
ʼI tanatou kau ki te kokelekasio, neʼe ko te tahi fealagia ʼaia ki te kau Kilisitiano ke nātou feʼiloʼiʼaki pea mo feʼofaniʼaki. Neʼe mole manatu e te kau ʼuluaki Kilisitiano, ko he kavega tanatou fakatahitahi ʼi te kokelekasio, kae neʼe ko he faka fealagia ʼaia ke nātou felagalagaʼaki pea mo fefakaloto mālohiʼaki.—Gaue 2:42; 14:27; 1 Kolonito 14:26; Kolose 4:15, 16.
Ko te tahi tupuʼaga ʼaē neʼe ʼaoga ai ke ʼi ai he kokelekasio logo tahi ʼi te malamanei, pe ko he kautahi, he neʼe ko he faka fealagia ʼaia moʼo fakatuputupu te logo tahi. Neʼe akoʼi ai ki te kau Kilisitiano ke nātou “palalau fuli ʼi te logo tahi.” (1 Kolonito 1:10, MN) Neʼe maʼuhiga ʼaupito te faʼahi ʼaia, he neʼe kehekehe te ako pea mo te faʼahiga maʼuli ʼo te kau Kilisitiano ʼo te ʼuluaki kokelekasio. Neʼe nātou lea kehekehe, pea neʼe kehekehe mo tonatou ʼu ʼulugaaga. (Gaue 2:1-11) ʼI ʼihi temi, neʼe mole nātou manatu tahi. Kae neʼe fai te ʼu tokoni ki te kau Kilisitiano ke nātou fakatokatoka te ʼu fihifihia ʼaia ʼi te kokelekasio.—Gaue 15:1, 2; Filipe 4:2, 3.
Ko te ʼu fihifihia maʼuhiga ʼaē neʼe mole lava fakatokatoka e te ʼu tagata ʼāfea ʼo te kokelekasio, neʼe fakahā ki te ʼu tagata taupau popoto, ohage ko Paulo. Kapau neʼe fakafihiʼi he ʼu akonaki maʼuhiga, pea neʼe fakahā te faʼahi ʼaia ki te kolesi pule ʼi Selusalemi. ʼI te kamata, neʼe faʼufaʼu te kolesi pule e te kau ʼapositolo ʼa Sesu Kilisito, kae ki muli age neʼe kau kiai mo te ʼu tagata ʼāfea ʼo te kokelekasio ʼo Selusalemi. Neʼe ʼiloʼi e te ʼu kokelekasio ʼe ko te ʼAtua ʼaē neʼe ina hinoʼi te kolesi pule ke ina fai te takitaki pea mo tana hahaʼi fakafofoga ke nātou fakatuʼutuʼu te gāue, mo hinoʼi he ʼu tagata ki he ʼu gāue, pea mo fai he ʼu tonu ʼo ʼuhiga mo te ʼu akonaki. Kapau neʼe fai he tonu e te kolesi pule, pea neʼe tali e te ʼu kokelekasio te tonu ʼaia pea “nee natou fakafiafia i tonatou fakalotomalohiʼi.”—Gaue 15:1, 2, 28, 30, 31.
Ei, neʼe fakaʼaogaʼi e Sehova te kautahi ʼi te ʼuluaki sēkulō. Kae feafeaʼi ia ʼaho nei?
ʼE Tonu Ke ʼi Ai He Kautahi Ia ʼAho Nei
Ohage ko nātou ʼo te ʼuluaki sēkulō, ʼe tokaga fakalelei te kau Fakamoʼoni ʼa Sehova ia ʼaho nei ke nātou fakahoko te fakatotonu ʼaē ke faka mafola te logo lelei ʼo te Puleʼaga. Moʼo fakahoko te gāue ʼaia ʼe nātou tufa he ʼu Tohi-Tapu pea mo he ʼu tohi ako faka Tohi-Tapu, pea ʼe maʼua ki te faʼahi ʼaia ke ʼi ai he kautahi.
ʼE tonu ke teuteuʼi fakalelei te ʼu tohi faka Kilisitiano, mo vakaʼi peʼe totonu, mo tā te ʼu tohi ʼaia, pea mo momoli ki te ʼu kokelekasio. Pea ʼe tonu ke tufa e te kau Kilisitiano fuli te ʼu tohi ʼaia kia nātou ʼaē ʼe nātou fia lau. Kua logo te lauʼi miliona hahaʼi ki te logo ʼo te Puleʼaga ʼaki te faʼahiga fai ʼaia. ʼE faiga e te kau fai faka mafola ʼo te logo lelei ke nātou fakahoko lelei tanatou gāue, ʼo nātou vakavakaʼi ke fai fakatatau te gāue ʼo te ʼu telituale. Ko te ʼu meʼa fuli ʼaia, ʼe maʼua ke fai ʼaki he kautahi.
Mai tona ʼuhiga ʼaē “e mole fakakehekehei e te Atua he tahi,” koia ʼe tonu ai ke fai he ʼu fakaliliu ʼo te Tohi-Tapu pea mo te ʼu tohi faka Tohi-Tapu. (Gaue 10:34) ʼI te temi nei, ʼe feala ke lau te nusipepa ʼaenī ia lea e 132 ʼo feiā mo te Réveillez-vous!, ʼaē ʼe tā ia lea e 83. ʼE ʼaoga kiai he ʼu hahaʼi fakaliliu ʼi te malamanei katoa, pea ke fakatuʼutuʼu lelei tanatou gāue.
ʼE maʼu he ʼu fakaloto mālohi e te hahaʼi ʼo te kokelekasio mokā nātou kau ki te ʼu fono faka Kilisitiano pea mo te ʼu fakatahi lalahi. ʼE nātou logo ai ki he ʼu akonaki faka Tohi-Tapu ʼe fakaloto mālohi, mo nātou ako fakatahi te Tohi-Tapu, mo nātou vaevae he ʼu meʼa fakaloto mālohi neʼe hoko kia nātou, pea mo nātou faikole fakatahi mo tonatou ʼu tēhina mo tuagaʼane. Pea ohage ko tonatou ʼu tēhina ʼo te ʼuluaki sēkulō, ʼe nātou fiafia mokā ʼaʼahi nātou e te ʼu tagata taupau feʼoloʼaki, heʼe fakaloto mālohi ai tanatou tui. Koia, ko te kau Kilisitiano ia ʼaho nei ʼe “nātou liliu anai ko he faga ōvi pe e tahi, mo he tagata tauhi ōvi pe e tahi.”—Soane 10:16, MN.
Kae ʼe mole haohaoa te kau Fakamoʼoni ʼa Sehova, ohage pe ko nātou ʼo te ʼuluaki sēkulō. Kae ʼe nātou gāue fakatahi ʼi te logo tahi. Pea ʼe feala ai ke fakahoko te faka mafola ʼo te Puleʼaga ʼi te kele katoa.—Gaue 15:36-40; Efeso 4:13.
[Paki ʼo te pasina 31]
Ia ʼaho nei, ko te kau Kilisitiano ʼe “ko he faga ōvi pe e tahi, mo he tagata tauhi ōvi pe e tahi”