ʼE Koutou Fia Faʼifaʼitaki Koa Kia Sesu?
“Nee mamata ki he hahai kaugamalie pea nee fonu i te ofa kia natou, koteuhi kua natou hage he u ovi e mole honatou tauhi, pea nee lahi ia mea nee kamata akonaki ki ai kia natou.”—Maleko 6:34.
1. He koʼe ʼe maʼu e ʼihi tonatou ʼu kalitate matalelei?
ʼI TE hisitolia, neʼe hahaʼi ia nātou ʼaē neʼe nātou maʼu te ʼu kalitate matalelei. Koteā tona tupuʼaga? Koteʼuhi ʼe maʼu e Sehova ʼAtua pea ʼe ina fakahā te ʼu kalitate ohage ko te ʼofa, te agalelei, te loto fia foaki, pea mo te tahi ʼu kalitate ʼe tou leleiʼia. Pea neʼe faʼu e te ʼAtua te tagata ki tona paki. Koia, ʼe tou mahino ai pe koʼe ko te tokolahi ʼe nātou maʼu te ʼofa, mo te agalelei, mo te manavaʼofa, pea mo te tahi ʼu kalitate fakaʼatua, pea ko te tokolahi ʼe ʼi ai mo tonatou leʼo ʼo loto. (Senesi 1:26; Loma 2:14, 15) Kae ʼe lagi koutou ʼiloʼi, ʼe faigafua age ki ʼihi tanatou fakahā te ʼu kalitate ʼaia ʼi ʼihi age.
2. Koteā he ʼu gāue lelei ʼe fai e te hahaʼi, ʼi tanatou lagi manatu ʼaē ʼe nātou faʼifaʼitaki kia Kilisito?
2 ʼE lagi koutou ʼiloʼi he ʼu tagata pea mo he ʼu fafine ʼe nātou tau ʼaʼahi he kau mahahaki peʼe nātou tokoni kia nātou, mo nātou manavaʼofa kia nātou ʼaē ʼe māʼimoa, peʼe nātou foaki he ʼu meʼa ʼofa ki te kau māsisiva. Pea koutou toe manatuʼi foki mo te hahaʼi ʼaē, ʼi tanatou manavaʼofa, neʼe nātou gāue ʼi tonatou maʼuli katoa ʼi te ʼu fale ʼaē ʼe faitoʼo ai te hahaʼi kilia peʼe ko te ʼu fale ʼaē ʼe taupau ai te fānau ʼaē ʼe mole hanatou ʼu mātuʼa, mo nātou ʼaē ʼe nātou gāue ʼi te ʼu lopitali peʼe ko te ʼu fale ʼaē ʼe nātou taupau ai te kau mahaki ʼaē kua vave mamate, pe ko te hahaʼi ʼaē ʼe fia tokoni kia nātou ʼe mole honatou ʼapi pea mo nātou ʼaē neʼe feholaki mai tonatou fenua. ʼE manatu e ʼihi ia nātou ʼaia ʼe nātou faʼifaʼitakiʼi ia Sesu, ʼaē neʼe ina tuku he faʼifaʼitaki ki te kau Kilisitiano. ʼE tou lau ʼi te ʼu Evaselio, neʼe fakamālōlō e Kilisito te kau mahaki pea neʼe ina fafaga te hahaʼi ʼaē neʼe hālofia. (Maleko 1:34; 8:1-9; Luka 4:40) Ko te ʼofa, mo te lotoʼofa, pea mo te manavaʼofa ʼaē neʼe fakahā e Sesu, ʼe ko te ʼu agaaga ʼaia ʼo “te manatu a Kilisito,” he neʼe ina faʼifaʼitakiʼi tana Tāmai ʼaē ʼi selo.—1 Kolonito 2:16.
3. Ke tou maʼu he manatu fakapotopoto ʼo ʼuhiga mo te ʼu gāue ʼa Sesu, koteā ʼaē ʼe tonu ke tou vakaʼi?
3 Kae neʼe koutou fakatokagaʼi koa la, tokolahi ia nātou ʼaē ia ʼaho nei ʼe ʼofolele ʼi te ʼofa pea mo te manavaʼofa ʼa Sesu, ʼe mole nātou tokagaʼi te faʼahi tāfito ʼo te manatu ʼa Kilisito? ʼE feala ke tou mahino kiai, kapau ʼe tou vakaʼi fakalelei te kapite 6 ʼo Maleko. ʼE tou lau ai, neʼe ʼaumai e te hahaʼi te kau mahahaki kia Sesu ke ina fakamālōlō nātou. ʼI te ʼu vaega ki muli mai, ʼe tou toe fakatokagaʼi ai, neʼe fafaga faka milakulo e Sesu te lauʼi afe hahaʼi hālofia ʼaē neʼe ʼōmai kia te ia. (Maleko 6:35-44, 54-56) Ko tana fakamālōlō te kau mahaki pea mo tana fafaga te kau hālofia, neʼe ko he fakahā ʼaia ʼo tona manavaʼofa lahi, kae neʼe ko te ʼu gāue tāfito koa ʼaia ʼaē neʼe fai e Sesu moʼo tokoni ki te hahaʼi? Pea ʼe tou lava faʼifaʼitaki feafeaʼi te ʼofa, mo te agalelei, pea mo te manavaʼofa haohaoa ʼa Sesu, ʼaē neʼe faʼifaʼitaki kia Sehova?
Neʼe Uga Ia Ia Ke Ina Fakafimālie Te Hahaʼi ʼi Te Faʼahi Fakalaumālie
4. Koteā te fakamatala ʼaē ʼe tuʼu ia Maleko 6:30-34?
4 Neʼe ʼofa tāfito Sesu ki te hahaʼi he neʼe ʼaoga kia nātou te ʼu meʼa fakalaumālie. Neʼe maʼuhiga tāfito age te ʼu meʼa ʼaia, ʼi te ʼu meʼa fakasino. Koutou fakatokagaʼi te fakamatala ʼaē ʼe tuʼu ia Maleko 6:30-34. Ko te ʼu meʼa ʼaē ʼe talanoa kiai te fakamatala ʼaia neʼe hoko ʼi te ʼu kauvai ʼo te Tai ʼo Kalilea, ka kua vave hoko mai te temi ʼo te Pāsikate ʼo te taʼu 32 ʼo totatou temi. Neʼe fiafia te kau ʼapositolo he neʼe hoki ʼosi age pe tanatou fai faka mafola, pea neʼe nātou ʼōmai ai kia Sesu, ʼo nātou fia fakamatala age pe neʼe feafeaʼi tanatou gāue. Kae neʼe fakatahitahi age te hahaʼi kaugamālie. Neʼe nātou kaugamālie ʼaupito, pea neʼe mole feala ai kia Sesu pea mo tana kau ʼapositolo ke nātou kakai pea mo mālōlō. Neʼe ʼui fēnei e Sesu ki tana kau ʼapositolo: “Koutou fakamamao mai ki he faahi lavaki, pea koutou . . . malolo.” (Maleko 6:31) Pea neʼe nātou ʼolo vaka ʼo lagi ōvi atu ki Kapenaume, ʼo fakalaka ʼi te Tai ʼo Kalilea ke nātou ʼolo ki he faʼahi lāvaki. Kae neʼe feleleʼi age te hahaʼi ki te kauvai pea nātou muʼamuʼa ʼi te vaka. Neʼe koteā ʼaē neʼe fai e Sesu? Neʼe ʼita koa ʼi tana mole lava mālōlō? Kailoa ia!
5. Koteā te meʼa ʼaē neʼe logoʼi e Sesu ʼi tona loto ʼo ʼuhiga mo te hahaʼi ʼaē neʼe ʼōmai kia te ia, pea koteā ʼaē neʼe ina fai?
5 Neʼe malave ki te loto ʼo Sesu tana sio ki te lauʼi afe hahaʼi ʼaia, ʼaē neʼe kau ai mo te kau mahahaki, ʼe nātou atalitali kia te ia. (Mateo 14:14; Maleko 6:44) ʼE fakahā lelei mai e Maleko te meʼa ʼaē neʼe tupu ai te manavaʼofa ʼa Sesu pea mo te meʼa ʼaē neʼe Ina fai, heʼe ina tohi fēnei: “Nee mamata ki he hahai kaugamalie pea nee fonu i te ofa kia natou, koteuhi kua natou hage he u ovi e mole honatou tauhi, pea nee lahi ia mea nee kamata akonaki ki ai kia natou.” (Maleko 6:34) Neʼe mole sio pe Sesu ki he hahaʼi kaugamālie. Neʼe sio ia ki he ʼu hahaʼi ʼe ʼaoga kia nātou te ʼu meʼa fakalaumālie. Neʼe nātou hage ko he ʼu ōvi neʼe hēʼia pea mole he tahi moʼo tokoni kia nātou, ʼe mole hanatou tagata tauhi ōvi moʼo taki nātou ki te ʼu koga meʼa lunaʼia peʼe ko he tahi moʼo puipui ʼo nātou. Neʼe ʼiloʼi e Sesu ko te kau takitaki lotu loto fefeka, ʼaē neʼe tonu ke nātou taupau te ʼu ōvi, ʼi tona ʼuhiga moʼoni neʼe nātou fehiʼa ki te hahaʼi ʼaia, pea neʼe mole nātou fafaga nātou ʼi te faʼahi fakalaumālie. (Esekiele 34:2-4; Soane 7:47-49) Neʼe mole fia fai e Sesu te taʼi aga ʼaia, kae neʼe ina fia fai kia nātou te meʼa ʼaē ʼe lelei. Neʼe ina kamata akonaki kia nātou te Puleʼaga ʼo te ʼAtua.
6, 7. (a) ʼI te ʼu Evaselio, koteā te meʼa ʼaē neʼe ʼuluaki fai e Sesu moʼo fakafimālie ʼo te hahaʼi? (b) Koteā ʼaē neʼe ina uga ia Sesu ke fai faka mafola pea mo faiakonaki?
6 Koutou fakatokagaʼi ʼi te tahi fakamatala, te fakaʼaluʼalu ʼo te ʼu meʼa ʼaē neʼe fai e Sesu pea mo te meʼa ʼaē ʼe fakamuʼamuʼa tāfito e te fakamatala ʼaia. Neʼe tohi te fakamatala ʼaia e Luka, neʼe tōketā pea neʼe ina fai te ʼu faitoʼo maʼa te hahaʼi. “Nee . . . mulimuli [te hahaʼi ia Sesu]. Nee ina talitali natou mo akonaki kia natou o uhiga mo te Puleaga o te Atua, pea nee ina fakamauli natou nee aoga ia ke fakamauli.” (Luka 9:11; Kolose 4:14) Logope la neʼe mole feiā te ʼu fakamatala fuli ʼo ʼuhiga mo tana ʼu milakulo, kae ʼi te faʼahi ʼaenī, koteā ʼaē neʼe ʼuluaki talanoa kiai Luka? ʼE ina ʼui neʼe akonaki Sesu ki te hahaʼi.
7 ʼE ʼalutahi te faʼahi ʼaia mo te meʼa ʼaē ʼe fakamatala ia Maleko 6:34. ʼE fakahā lelei mai e te vaega ʼaia te ʼuluaki meʼa ʼaē neʼe fai e Sesu moʼo fakahā tona ʼofa. Neʼe akonaki ki te hahaʼi, ʼo ina fakafimālie nātou ʼi te faʼahi fakalaumālie. ʼI te kamata ʼo tona minisitelio, neʼe ʼui fēnei e Sesu: “Mo te u kolo alâ e tonu ke au fagonogono ai te Logolelei o te Puleaga o te Atua, ko te tupuaga aia o toku fekauʼi mai.” (Luka 4:43) ʼAua naʼa tou manatu neʼe faka mafola e Sesu te logo ʼo te Puleʼaga ohage ko he gāue neʼe ina fai feiā pe, ohage neʼe mole ina logoʼi he meʼa ʼi tona loto. Kailoa ia, kae neʼe ko tona ʼofa ki te hahaʼi ʼaē neʼe ina uga tāfito ia ia ke ina fakahā kia nātou te logo lelei. Ko te meʼa lelei tāfito ʼaē neʼe fai e Sesu—ki te kau mahaki, mo nātou ʼaē neʼe ulusino ai te ʼu temonio, mo te kau masiva, pea mo te kau hālofia—neʼe ko tana tokoni kia nātou ke nātou ʼiloʼi, mo tali, pea mo ʼofa ki te moʼoni ʼo ʼuhiga mo te Puleʼaga ʼo te ʼAtua. Neʼe maʼuhiga ʼaupito te moʼoni ʼaia ʼuhi ko te meʼa ʼaē ka fai e te Puleʼaga moʼo lagavaka te pule faʼifaʼitaliha ʼo Sehova pea mo foaki he ʼu tapuakina heʼegata ki te hahaʼi.
8. Neʼe koteā te manatu ʼa Sesu ʼo ʼuhiga mo tana fai faka mafola pea mo tana faiakonaki?
8 Ko te faʼahi tāfito ʼaē neʼe tupu ai te haʼu ʼa Sesu ki te kele, ko te faka mafola ʼo te Puleʼaga. ʼI te kua vave fakaʼosi ʼo tona minisitelio ʼi te kele, neʼe ʼui fēnei e Sesu kia Pilato: “Ko te mea aeni, nee au tupu mai ai pea nee au haele mai ai ki te malama-nei, ke au fakamooni ki te mooni. Ko natou fuape o te mooni e natou fakalogo ki toku leo.” (Soane 18:37) Neʼe tou vakaʼi ʼi te ʼu ʼuluaki alatike e lua, ko Sesu neʼe ko he tagata ʼofa, neʼe lototokaga, neʼe fia ʼolo age te hahaʼi kia te ia, neʼe fakaʼapaʼapa ki te hahaʼi, neʼe falala kia nātou pea mo ʼofa tāfito kia nātou. ʼE tonu ke tou mahino ki te ʼu faʼahi ʼaia ʼo tona ʼulugaaga mo kapau ʼe tou fia mahino moʼoni ki te manatu ʼa Kilisito. ʼE toe maʼuhiga foki ke tou ʼiloʼi ʼe kau ki te manatu ʼa Kilisito tana fakamuʼamuʼa tana fai faka mafola pea mo tana faiakonaki.
Neʼe Ina Uga Te Hahaʼi Ke Nātou Fai Faka Mafola
9. Ko ai ʼaē neʼe tonu ke nātou fakamuʼamuʼa te fai faka mafola pea mo te faiakonaki?
9 Neʼe mole ko Sesu tokotahi pe ʼaē neʼe tonu ke ina fakamuʼamuʼa te fai faka mafola pea mo te faiakonaki—moʼo fakahā tana ʼofa pea mo tana manavaʼofa. Neʼe ina uga tana kau tisipulo ke nātou faʼifaʼitakiʼi te ʼu meʼa ʼaē neʼe uga ia ia, mo te ʼu meʼa ʼaē neʼe ina fakamuʼamuʼa, pea mo te ʼu meʼa ʼaē neʼe ina fai. Ohage la, ʼi te ʼosi filifili e Sesu tana kau ʼapositolo e toko 12, koteā ʼaē neʼe tonu ke nātou fai? ʼE ʼui fēnei mai kia tatou ia Maleko 3:14, 15, MN: “Neʼe ina fakatahiʼi ia te toko hogofulu-ma-lua, ʼo ina fakahigoaʼi nātou ko ‘te kau ʼapositolo’ ke nātou nonofo mo ia, pea ke ina fekauʼi nātou ke nātou ʼolo ʼo fai faka mafola pea mo nātou maʼu te mālohi moʼo kapu ʼaki ʼo te kau temonio.” ʼE koutou sio koa ki te ʼu meʼa ʼaē neʼe tonu ke fakamuʼamuʼa e te kau ʼapositolo?
10, 11. (a) ʼI tana fekauʼi te kau ʼapositolo, koteā ʼaē neʼe ʼui e Sesu ke nātou fai? (b) ʼO ʼuhiga mo tana fekauʼi ʼaia te kau ʼapositolo, koteā te faʼahi maʼuhiga ʼaē neʼe tonu ke nātou tokakaga kiai?
10 ʼAki te temi, neʼe tuku e Sesu te mālohi ki te toko 12 moʼo fakamālōlō te hahaʼi pea mo kapu te ʼu temonio. (Mateo 10:1; Luka 9:1) Neʼe ina fekauʼi nātou ke nātou ʼolo ki “te u ovi kua hehe o te api o Iselaele.” Koteā ʼaē neʼe tonu ke nātou fai? Neʼe fakatotonu fēnei age e Sesu kia nātou: “I tautou fagona koutou fakaha mo tala: kua fakaovi mai te Puleaga o Selo. Koutou fakamalolo te hahai mahaki, fakamaa te hahai kilia, pea mo kapu te u temonio.” (Mateo 10:5-8; Luka 9:2) ʼI tona ʼuhiga moʼoni, koteā ʼaē neʼe nātou fai? “Pea neʼe nātou ʼolo ai pea [1] nātou fai faka mafola, ke feala ai ki te hahaʼi ke nātou fakahemala; pea [2] neʼe nātou kapu te ʼu temonio e tokolahi pea nātou tākai ʼaki te lolo te hahaʼi mahahaki tokolahi pea neʼe nātou fakamālōlō ia nātou.”—Maleko 6:12, 13, MN.
11 Mai tona ʼaluʼaga ʼaē ʼe mole ʼuluaki fakatuʼu ʼi te ʼu fakamatala fuli te faʼahi ʼo te faiakonaki, ko tona faka ʼuhiga koa ʼe tou faka maʼuhigaʼi fau te faiakonaki ʼaē ʼe tuʼu ʼi te ʼu fakamatala ʼi ʼoluga? (Luka 10:1-9) ʼE mole tonu ke tou meʼa noaʼi te ʼu lakaga ʼaē ʼe ʼuluaki talanoa ai ki te faiakonaki. Koutou fakatokagaʼi te ʼu vaega ki muli mai ʼo te fakamatala ʼaia. ʼI muʼa ʼo tana fekauʼi te toko 12 kau ʼapositolo, neʼe malave ki te loto ʼo Sesu te ʼaluʼaga ʼo te hahaʼi. ʼE tou lau fēnei: “Nee feʼaluʼaki Sesu i te u kolo lalahi mo te u kolo liliki fuape, nee fai akonaki i onatou sinakoka, pea nee ina fagonogono te Evaselio o te Puleaga, pea nee ina fakamauli te mahaki fuli mo te vaivai fuape. Pea i tana mamata ki te hahai, nee fonu ia i te ofa kia natou, koteuhi kua natou fakaofaofa pea mo ogosia o hage he u ovi e mole honatou tauhiovi. Pea folafolaʼage ki ana tisipulo: ‘Io, e lahi te taukai, kae e lavaki te kau gaue. Koia, koutou faikole ki te Aliki o te taukai, ke ina fekaui mai he kau gaue ki tana taukai.’ ”—Mateo 9:35-38.
12. Koteā te tahi ʼaoga ʼo te ʼu gāue faka milakulo ʼaē neʼe fai e Sesu pea mo te kau ʼapositolo?
12 ʼI tanatou fakatahi mo ia, neʼe feala ki te kau ʼapositolo ke nātou maʼu te manatu ʼa Kilisito. Neʼe feala ke nātou mahino ai, kapau ʼe nātou ʼofa moʼoni pea mo nātou manavaʼofa ki te hahaʼi, pea neʼe tonu ke nātou faka mafola pea mo faiakonaki ʼo ʼuhiga mo te Puleʼaga—he neʼe ko te faʼahi tāfito ʼaia ʼo tanatou ʼu gāue lelei. ʼO mulimuli ki te faʼahi ʼaia, ko te ʼu gāue lelei ʼi te faʼahi fakasino, ohage ko te fakamālōlō ʼo te kau mahaki, neʼe mole ko he tokoni pe ia kia nātou ʼaē neʼe ʼi te faigataʼaʼia. ʼE moʼoni neʼe lagi ʼōmai ʼihi hahaʼi ʼuhi ko te ʼu fakamālōlō pea mo te ʼu meʼa kai ʼaē neʼe foaki faka milakulo e Sesu. (Mateo 4:24, 25; 8:16; 9:32, 33; 14:35, 36; Soane 6:26) Kae ʼi tona ʼuhiga moʼoni, ko te ʼu gāue ʼaia neʼe mole ko he tokoni fakasino pe ia, kae neʼe uga ai te hahaʼi ʼaē neʼe mamata kiai, ke nātou tui ko Sesu te ʼAlo ʼo te ʼAtua pea mo “te polofeta” ʼaē neʼe fakakikite e Moisese.—Soane 6:14; Teutalonome 18:15.
13. Koteā te gāue tāfito ʼaē neʼe fakakikite ia Teutalonome 18:18 ʼo ʼuhiga mo te “polofeta”?
13 He koʼe neʼe ʼiloʼi papau neʼe ko Sesu “te polofeta”? Koteā te gāue tāfito ʼaē neʼe fakakikite ke ina fai? Neʼe tonu koa ke ʼiloa “te polofeta” ʼaia ʼaki te ʼu fakamālōlō faka milakulo peʼe ko tana manavaʼofa ʼaē ʼo fafaga te kau hālofia? Neʼe fakakikite fēnei ia Teutalonome 18:18: “ ʼE ʼau fakatuʼu anai ʼi te lotolotoiga ʼo tonatou ʼu tēhina, he polofeta ohage ko koe [Moisese]; pea ʼe ʼau ʼai anai taku ʼu folafola ki tona gutu, pea ʼe ina tala moʼoni anai kia nātou te ʼu meʼa fuli ʼaē ʼe ʼau fakatotonu age kia te ia.” Koia, ohage pe ko te ako ʼa te kau ʼapositolo ke nātou ʼofa, neʼe toe mahino foki kia nātou ʼe tonu ke hā te manatu ʼa Kilisito ʼi tanatou gāue fai faka mafola pea mo tanatou faiakonaki. Neʼe ko te meʼa lelei tokotahi ʼaia ʼaē neʼe feala ke nātou fai maʼa te hahaʼi. ʼAki te gāue ʼaia, neʼe feala ai ki te kau mahahaki pea mo te kau māsisiva ke nātou maʼu he ʼu tapuakina heʼegata, ko te ʼu tapuakina ʼaia ʼe mole ko he maʼuli nounou peʼe ko he ʼu meʼa kai.—Soane 6:26-30.
Tou Maʼu Te Manatu ʼa Kilisito Ia ʼAho Nei
14. Koteā te pikipikiga ʼo te manatu ʼa Kilisito pea mo tatatou fai faka mafola?
14 ʼE mole tonu ke tou manatu, neʼe gata pe te manatu ʼa Kilisito ʼi te ʼuluaki sēkulō—kia Sesu pea mo te ʼu ʼuluaki tisipulo ʼaē neʼe faitohi ki ai Paulo: “E matou mau te manatu a Kilisito.” (1 Kolonito 2:16) Kae ʼe tou ʼiloʼi ʼe ko hotatou maʼua ke tou faka mafola te logo lelei pea mo fai he ʼu tisipulo. (Mateo 24:14; 28:19, 20) Kae ʼe lelei hatatou fakakaukauʼi pe koteā ʼaē ʼe ina uga tatou ke tou fai te gāue ʼaia. ʼE mole tonu ke tou fai te gāue ʼaia ʼuhi pe ko tona fakamaʼua mai. Ko tatatou ʼofa ki te ʼAtua ʼe ko te ʼuluaki tupuʼaga ʼaia ʼo tatatou kau ki te minisitelio, pea ke tou faʼifaʼitakiʼi moʼoni ia Sesu, ʼe tonu ke uga tatou e tatatou manavaʼofa ke tou fai faka mafola pea mo akoʼi te hahaʼi.—Mateo 22:37-39.
15. He koʼe ʼe lelei ke tou manavaʼofa ʼi tatatou faka mafola ki te hahaʼi?
15 ʼE moʼoni, ʼe mole faigafua tuʼumaʼu hatatou manavaʼofa ki te hahaʼi ʼaē ʼe mole tou lotu tahi, tāfito la mokā mole nātou fia logo, peʼe nātou fakafisi, peʼe nātou fakafeagai mai. Kae kapau ʼe mole kei tou ʼofa pea mo manavaʼofa ki te hahaʼi, pea ʼe puli ai te mālohi maʼuhiga ʼaē ʼe ina uga tatou ke tou kau ki te minisitelio faka Kilisitiano. ʼE lava feafeaʼi hatatou maʼu te manavaʼofa? ʼE tou faiga anai ke tou maʼu te manatu ʼaē neʼe maʼu e Sesu ʼo ʼuhiga mo te hahaʼi, he neʼe “natou fakaofaofa pea mo ogosia o hage he u ovi e mole honatou tauhiovi.” (Mateo 9:36) ʼE mole hahaʼi koa la ia nātou ʼaē ʼe feiā ia ʼaho nei? Neʼe līʼakina nātou ʼi te faʼahi fakalaumālie pea neʼe fakakiviʼi nātou e te kau tauhi ōvi lotu kakā. Koia, ʼe mole nātou ʼiloʼi ai te takitaki moʼoni ʼaē ʼe fakahā ʼi te Tohi-Tapu pea mo te ʼu ʼaluʼaga faka palatiso ʼaē ka fakatuʼu e te Puleʼaga ʼo te ʼAtua ʼi totatou kele. ʼE nātou tau mo te ʼu fihifihia ʼo te maʼuli—te masiva, te tokakovi ʼa te famili, mo te mahaki, mo te mate—pea ʼe mole nātou maʼu te ʼamanaki ʼaē ʼe foaki mai e te Puleʼaga. ʼE tou maʼu tatou te logo lelei ʼaē ʼe faka fealagia ai ki te hahaʼi ke nātou maʼu te maʼuli: te Puleʼaga ʼo te ʼAtua ʼaē kua fakatuʼu ʼi selo.
16. He koʼe ʼe tonu ke tou fia vaevae te logo lelei ki te hahaʼi?
16 Ka koutou fakatokagaʼi te ʼaluʼaga fakalaumālie ʼa te hahaʼi, ʼe mole uga koa la koutou e tokotou loto ke koutou fai ia meʼa fuli ʼaē ʼe koutou lavaʼi moʼo fakahā kia nātou te fakatuʼutuʼu ʼofa ʼa te ʼAtua? Ei, ko tatatou gāue ʼe ko he gāue manavaʼofa. Kapau ʼe tou ʼofa ki te hahaʼi, ohage ko Sesu, pea ʼe hā anai ʼi totatou leʼo, mo totatou fofoga, pea mo tatatou faiakonaki. Ko te ʼu meʼa fuli ʼaia ʼe fakatupu ai te fia logo ʼa te hahaʼi ʼaē ʼe “lotolelei ki te maʼuli heʼegata.”—Gāue 13:48, MN.
17. (a) Koteā he ʼu gāue ʼe feala ke tou fakahā ai totatou ʼofa pea mo totatou manavaʼofa ki te hahaʼi? (b) He koʼe ʼe mole tonu ke tou filifili peʼe tou fai he ʼu gāue lelei peʼe tou faka mafola ki te hahaʼi?
17 ʼE mahino ia ʼe tonu ke hā totatou ʼofa pea mo totatou manavaʼofa ʼi totatou maʼuli katoa. Ko tona faka ʼuhiga ke tou agalelei kia nātou ʼaē ʼe ʼi te faigataʼaʼia, ki te kau mahahaki, pea mo te kau masiva—ʼo tou fai ia meʼa fuli ʼe tou lavaʼi moʼo fakafimālie tonatou mamahi. ʼE tou faiga anai ʼi tatatou ʼu palalau pea mo te ʼu meʼa ʼaē ʼe tou fai, ke tou fakaloto fīmālieʼi te hahaʼi ʼaē ʼe lotomamahi he kua mate he tahi neʼe nātou ʼofa mamahi ai. (Luka 7:11-15; Soane 11:33-35) Kae ko te fakahāhā ʼaia ʼo te ʼofa, mo te agalelei, pea mo te manavaʼofa ʼe mole tonu ke liliu ko te meʼa tāfito ʼaia ʼo te ʼu gāue lelei ʼaē ʼe tou fai, ohage ko tona fai e te ʼu kautahi ʼaē ʼe tokoni ki te hahaʼi. ʼE maʼuhiga age tatatou ʼu faiga ʼaē ʼe ʼalutahi mo te ʼu kalitate fakaʼatua ʼaē neʼe tou talanoa kiai, ʼo tou fakahā ʼi te gāue faka Kilisitiano ʼaē ko te fai faka mafola pea mo te faiakonaki. Koutou manatuʼi te ʼui fēnei ʼa Sesu ʼo ʼuhiga mo te kau takitaki lotu Sutea: “E koutou li ki te Faletapu te tukuhau o te minite, mo te aneto pea mo te kumino; kae e koutou tukunoa ia mea ae e mamafa o te lao: te susitisia, mo te manavaofa pea mo te tui, ko mea aeni nee maua ke fai, pea aua naa tukunoa mo ihiʼage mea.” (Mateo 23:23) Neʼe mole filifili e Sesu pe ko te meʼa fea ʼaē ka ina fai—peʼe tokoni ki te hahaʼi ʼi te faʼahi fakasino peʼe ina akoʼi kia nātou te ʼu moʼoni fakalaumālie ʼaē ʼe ina foaki te maʼuli. Neʼe ina fai te ʼu meʼa ʼaia e lua. Kae ʼe hā lelei mai neʼe ina fakamuʼamuʼa tana gāue faiakonaki, heʼe ko te gāue lelei ʼaia ʼaē neʼe ina fai, neʼe ko he tokoni heʼegata ki te hahaʼi.—Soane 20:16.
18. ʼI tatatou ʼosi vakaʼi te manatu ʼa Kilisito, koteā ʼaē ʼe ina uga ai tatou ke tou fai?
18 ʼE tonu ke tou loto fakafetaʼi kia Sehova ʼi tana fakahā mai te manatu ʼa Kilisito. ʼAki te ʼu Evaselio, ʼe tou lava ʼiloʼi lelei ai te ʼu manatu ʼo te tagata ʼaē ʼe lahi tokotahi ʼi te ʼu temi fuli, mo tona loto, mo tana ʼu kalitate, pea mo te ʼu meʼa neʼe ina fakamuʼamuʼa ʼi tona maʼuli. ʼE tonu ke tou lau, mo metitasio, pea mo maʼuliʼi te ʼu meʼa ʼaē ʼe fakahā mai e te Tohi-Tapu ʼo ʼuhiga mo Sesu. Tou manatuʼi, kapau ʼe tou mulimuli moʼoni kia Sesu, pea ʼe tonu ke tou ʼuluaki ako muʼa ke tou manatu ohage ko ia, ke hage totatou loto ko ia, pea mo tou sivi ia meʼa fuli ohage ko ia, ʼo tou faiga mālohi logola totatou ʼuhiga agahala. Koia, tou lotomālohi ke tou maʼu pea mo fakahā te manatu ʼa Kilisito. ʼE mole he faʼahiga maʼuli ʼe lelei age, he faʼahiga gaohi ʼo te hahaʼi ʼe lelei age, pea mo he faʼahiga ʼaluʼaga ʼe lelei age maʼa tatou pea mo ʼihi, ʼi hatatou mulimuli kia ia ʼaē neʼe ko te faʼifaʼitaki haohaoa ʼo totatou ʼAtua manavaʼofa ko Sehova.—2 Kolonito 1:3; Hepeleo 1:3.
ʼE Koutou Tali Feafeaʼi Anai?
• Koteā ʼaē ʼe fakahā mai e te Tohi-Tapu ʼo ʼuhiga mo te ʼu meʼa ʼaē neʼe fai e Sesu moʼo fakafimālieʼi te hahaʼi?
• Koteā ʼaē neʼe faka maʼuhigaʼi e Sesu ʼi tana fekauʼi tana kau tisipulo?
• E feafeaʼi hatatou fakahā “te manatu a Kilisito” ʼi tatatou ʼu gāue?
[Paki ʼo te pasina 24]
Koteā te meʼa lelei tāfito ʼaē ʼe feala ke fai e te kau Kilisitiano ki te hahaʼi?