‘E ʼAtua, Foaki Mai Tou Mālama’

“Foaki mai tou mālama pea mo tau moʼoni. Ke nā taki tonu ia ʼau.”​—⁠Pesalemo 43⁠:⁠3.

1. ʼE fakahā feafeaʼi e Sehova tana ʼu fakatuʼutuʼu?

ʼE TOKAGA fakalelei ia Sehova mokā ina fakahā tana ʼu fakatuʼutuʼu ki tana ʼu kaugana. ʼE mole ina fakahā tuʼa tahi te moʼoni katoa, ohage ko he meʼa fakatupu pulagia, kae ʼe ina faka mālamagia māmālie tatou. Ko totatou haʼele ʼi te ala ʼo te maʼuli ʼe feala ke fakatatau ki he tagata ʼe kamata hana haʼele loaloaga. ʼE ina kamata ʼi te kei hegihegi pea ʼe kei fakapōpōʼuli. ʼI te hopo māmālie ake ʼo te laʼā, kua kamata sio te tagata ʼaia ki te ʼu meʼa ʼaē ʼi ʼona tafaʼaki. ʼE ʼi ai ʼihi meʼa ʼe mole heʼeki faʼa sio lelei kiai. Kae ʼi te hoko atu ʼo te hopo ʼo te laʼā, kua lava sio lelei leva ki tona ala. ʼE toe feiā pe mo te mālama fakalaumālie ʼaē ʼe foaki mai e te ʼAtua. ʼAki te temi, ʼe ina tuku mai te fealagia ʼaē ke tou mālama ki ʼihi meʼa. Ko te ʼAlo ʼo te ʼAtua, ia Sesu Kilisito, neʼe ina toe fai feiā ʼi tana foaki mai te mālama fakalaumālie. Tou vakaʼi pe neʼe faka mālamagia feafeaʼi e Sehova tana hahaʼi ʼi te ʼu temi muʼa, pea ʼe ina fai feafeaʼi ia ʼaho nei.

2. Neʼe foaki feafeaʼi e Sehova te mālama ʼi muʼa ʼo te temi ʼo te kau Kilisitiano?

² Neʼe lagi ko te ʼu foha ʼo Kole ʼaē neʼe nātou tohi te Pesalemo 43. ʼI tonatou ʼuhiga Levite, neʼe nātou maʼu te pilivilesio ʼaē ke nātou akoʼi ki te hahaʼi te Lao ʼa te ʼAtua. (Malakia 2⁠:⁠7) Kae ʼe mahino ia, neʼe ko Sehova tanatou Tagata Faiako Lahi, pea neʼe nātou ʼiloʼi ko ia te Matapuna ʼo te poto fuli pe. (Isaia 30⁠:20) Neʼe faikole fēnei te tagata fai pesalemo: “Ê ʼAtua, . . . foaki mai tou mālama pea mo tau moʼoni. Ke nā taki tonu ia ʼau.” (Pesalemo 43⁠:​1, 3) Neʼe akoʼi e Sehova tana ʼu ala ki te kau Iselaele ʼi te ʼu temi ʼaē neʼe nātou agatonu tuʼumaʼu ai kia te ia. Hili kiai ni ʼu sēkulō, neʼe foaki age kia nātou e Sehova te mālama pea mo te moʼoni, ʼi hona ʼaluʼaga fakatalakitupua. Neʼe ina fai te faʼahi ʼaia ʼi tana fekauʼi ifo tona ʼAlo ki te kele.

3. Neʼe ʼahiʼahiʼi feafeaʼi te kau Sutea e te ʼu meʼa ʼaē neʼe akoʼi age e Sesu?

³ Ko te tagata, ko Sesu Kilisito, te ʼAlo ʼo te ʼAtua, neʼe ko “te malama o te malama-nei.” (Soane 8⁠:12) Neʼe ina akoʼi te hahaʼi ʼaki te ʼu meʼa foʼou, ko te ʼu “akonaki fakatata.” (Maleko 4⁠:⁠2) Neʼe ina ʼui fēnei kia Posio Pilato: “E mole i te malama aeni toku puleagahau.” (Soane 18⁠:36) Neʼe ko he manatu foʼou ʼaia ki he tagata Loma, pea ʼe mahino ia neʼe toe foʼou maʼa te kau Sutea ʼaē neʼe tauhi fakavale ki tonatou fenua, he neʼe nātou manatu ʼe maumauʼi anai e te Mesia te Puleʼaga ʼo Loma, pea ina toe foaki anai ki Iselaele tona kolōlia ʼo te temi muʼa. Neʼe fakahā e Sesu te mālama ʼaē neʼe haʼu mai ia Sehova, kae neʼe mole leleiʼia e te kau takitaki Sutea tana ʼu palalau, he neʼe “lahiʼage tanatou manako ki te vikiviki fakatagata i tonatou ofa ki te kololia o te Atua.” (Soane 12⁠:​42, 43) Tokolahi ʼi te kau Sutea neʼe nātou fili ke nātou pipiki ki tanatou ʼu talatuku fakatagata, kae nātou fakafisi ki te mālama fakalaumālie pea mo te moʼoni ʼaē neʼe haʼu mai te ʼAtua.​—⁠Pesalemo 43⁠:3; Mateo 13⁠:⁠15.

4. ʼE tou ʼiloʼi feafeaʼi neʼe kei tonu ke haga tuputupu te mahino ʼa te kau tisipulo ʼa Sesu?

⁴ Kae neʼe tali fiafia e he ʼu tagata pea mo he ʼu fafine fakamalotoloto te moʼoni ʼaē neʼe akoʼi age e Sesu. Neʼe nātou tuputupu vave ʼi tanatou mahino ki te ʼu fakatuʼutuʼu ʼa te ʼAtua. Kae ʼi te ʼamanaki mate ʼo tanatou Tagata Faiako, neʼe kei lahi te ʼu meʼa neʼe kei toe ke nātou ako. Neʼe ʼui fēnei e Sesu kia nātou: “E kei lahi ia mea e au mau ke au tala atu kia koutou, kae e heeki koutou lavai tona fua i te lakaga-nei.” (Soane 16⁠:12) Ei, neʼe tonu ke haga tuputupu te kau tisipulo ʼi tanatou mahino ki te moʼoni ʼa te ʼAtua.

ʼE Hoko Atu Te Gigila ʼo Te Mālama

5. Koteā te fehuʼi ʼaē neʼe lagaʼi ʼi te ʼuluaki sēkulō, pea ko ai ʼaē neʼe tonu ke ina fakatokatoka te faʼahi ʼaia?

⁵ ʼI te ʼosi mate ʼo Sesu pea mo tona ʼosi fakatuʼuake, neʼe ʼāsili age te gigila ʼo te mālama ʼo te ʼAtua. ʼI te meʼa ʼaē neʼe hā kia Petelo, neʼe fakahā ai e Sehova, ʼo kamata atu ʼi te temi ʼaia, kua feala ke liliu te kau Senitile neʼe mole silikosisioʼi ko he ʼu tisipulo ʼa Kilisito. (Gaue 10⁠:​9-17) Neʼe ko he meʼa maʼuhiga ʼaia! Kae neʼe lagaʼi ai te fehuʼi: neʼe fakamaʼua koa e Sehova ke silikosisio te kau Senitile ʼaē ʼe liliu ko he kau Kilisitiano? Neʼe mole fai te tali ki te fehuʼi ʼaia ʼi te meʼa ʼaē neʼe hā kia Petelo, pea neʼe fihi te kau Kilisitiano ʼo ʼuhiga mo te faʼahi ʼaia. Neʼe tonu ke fai he fakatokatoka, naʼa tahi ʼalu tanatou logo tahi. Koia, ʼi Selusalemi, “neʼe fakatahi te kau ʼapositolo pea mo te kau tagata ʼāfea moʼo vakaʼi te faʼahi ʼaia.”​—⁠Gaue 15⁠:​1, 2, 6, MN.

6. Koteā te ʼu meʼa ʼaē neʼe fai e te kau ʼapositolo pea mo te kau tagata ʼāfea ʼi tanatou vakavakaʼi te fehuʼi ʼo te silikosisio?

⁶ Neʼe lava ʼiloʼi feafeaʼi e nātou ʼaē neʼe kau ki te fono ʼaia, te finegalo ʼo te ʼAtua ʼo ʼuhiga mo te kau Kilisitiano Senitile? Neʼe mole fekauʼi e Sehova he ʼaselo ke ina takitaki te fai palalau pea neʼe mole he meʼa neʼe hā age kia nātou. Kae neʼe maʼu e te kau ʼapositolo pea mo te kau tagata ʼāfea he takitaki. Neʼe nātou fakalogo ki te ʼu fakamatala ʼo ʼihi kau Sutea Kilisitiano neʼe nātou sio ki te aga ʼa te ʼAtua ki te hahaʼi ʼo te ʼu puleʼaga, he neʼe ina fakahifo ifo tona laumālie maʼoniʼoni ki te kau Senitile ʼaē neʼe mole silikosisio. Tahi ʼaē meʼa neʼe nātou vakaʼi mo te manatu ʼo te Tohi-Tapu. Pea neʼe fai e te tisipulo ko Sake te tokoni neʼe fakatafito ki te vaega neʼe nātou mahino lelei kiai. ʼI tanatou vakavakaʼi fakalelei te ʼu fakamoʼoni ʼaia, neʼe mahino lelei ai kia nātou te finegalo ʼo te ʼAtua. Neʼe mole maʼua ke silikosisio te hahaʼi ʼo te ʼu puleʼaga ke tali nātou e Sehova. Neʼe foimo tohi ai e te kau ʼapositolo pea mo te ʼu tagata ʼāfea te tonu ʼaē neʼe fai, ke feala ke mulimuli kiai te kau Kilisitiano.​—⁠Gaue 15⁠:​12-29; 16⁠:⁠4.

7. Neʼe tali feafeaʼi te ʼu fetogi e te kau Kilisitiano ʼo te ʼuluaki sēkulō?

⁷ ʼO mole hage ko te kau takitaki lotu Sutea ʼaē neʼe nātou pipiki ki te ʼu talatuku ʼo tanatou ʼu kui, neʼe fiafia te kau Kilisitiano Sutea ʼi te fakahā age te manatu foʼou fakaofoofo ʼaia ʼo te fakatuʼutuʼu ʼa te ʼAtua ʼo ʼuhiga mo te hahaʼi ʼo te ʼu puleʼaga, tatau aipe pe neʼe tonu ai ke nātou fetogi tanatou manatu ʼo ʼuhiga mo te kau Senitile. Neʼe tapuakina e Sehova tanatou manatu agavaivai ʼaia, pea “neʼe hoko atu te mālohi ʼo te ʼu kokelekasio ʼi te tui pea mo tuputupu tonatou kaugamālie ʼi te ʼaho fuli.”​—⁠Gaue 15⁠:31; 16⁠:​5, MN.

8. (a) ʼE tou ʼiloʼi feafeaʼi neʼe ʼaoga ke faka mālamagia lahi te kau Kilisitiano ʼi te vave fakaʼosi ʼo te ʼuluaki sēkulō? (b) Koteā te ʼu fehuʼi ʼaē ka tou vakaʼi?

⁸ Neʼe hoko atu te gigila ʼo te mālama fakalaumālie ʼi te ʼuluaki sēkulō. Kae neʼe mole fakahā e Sehova te ʼu agaaga fuli ʼo tana ʼu fakatuʼutuʼu ki te kau ʼuluaki Kilisitiano. Neʼe ʼui fēnei e te ʼapositolo ko Paulo ki te kau tisipulo ʼo te ʼuluaki sēkulō: “I te temi-nei e tou sio i he sioata pea e nenefu.” (1 Kolonito 13⁠:12) Ko te taʼi sioʼata ʼaia neʼe mole ina fakaʼata lelei. Koia, ʼi te kamata, neʼe faka tuʼakoi te mahino ʼa te kau Kilisitiano ki te mālama fakalaumālie. ʼI te ʼosi mate ʼa te kau ʼapositolo, neʼe ʼi ai te temi neʼe mū māmālie ai te mālama, kae ʼi te ʼu temi ʼaenī, kua mahu te ʼatamai mālama ʼo te Tohi-Tapu. (Taniela 12⁠:⁠4) ʼE faka mālamagia feafeaʼi e Sehova tana hahaʼi ia ʼaho nei? Pea ʼe tou tali feafeaʼi mokā ina foaki mai he tahi ʼu fakamahino faka Tohi-Tapu?

ʼE ʼĀsili Mū Te Mālama

9. Neʼe feafeaʼi te ako Tohi-Tapu ʼaē neʼe fai e te kau Ako ʼo te Tohi-Tapu, ʼaē neʼe makehe pea mo lelei?

⁹ ʼI totatou temi, ko te ʼuluaki faka mālamagia neʼe kamata ʼi te fakaʼosi ʼo te 19 sēkulō, ʼi te temi ʼaē neʼe ako fakamalotoloto ai te Tohi-Tapu e he ʼu tagata pea mo he ʼu fafine Kilisitiano. Neʼe fēnei tanatou ako te Tohi-Tapu: neʼe lagaʼi e he tahi te fehuʼi; pea neʼe nātou vakavakaʼi te ʼu vaega faka Tohi-Tapu fuli ʼaē ʼe pipiki kiai. Ka hage neʼe mole tatau te ʼu manatu ʼo he ʼu vaega e lua, pea neʼe faiga e te kau Kilisitiano fakamalotoloto ʼaia ke faka ʼalutahi te ʼu vaega ʼaia e lua. ʼO mole hage ko te kau takitaki lotu ʼo te temi ʼaia, ko te kau Ako ʼo te Tohi-Tapu (ʼaē ʼe fakahigoa ʼi te temi ʼaenī ko te kau Fakamoʼoni ʼa Sehova) neʼe nātou fakatotonu ke takitaki nātou e te Tohi-Tapu kae mole ko te ʼu talatuku peʼe ko te ʼu akonaki fakatagata. ʼI tanatou ʼosi vakavakaʼi te ʼu fakamoʼoni faka Tohi-Tapu fuli, neʼe nātou tohi leva te ʼu meʼa ʼaē neʼe nātou mahino kiai. ʼI tanatou fai ʼaia, neʼe fakatonutonuʼi ai tanatou mahino ki te ʼatu akonaki tāfito ʼo te Tohi-Tapu.

10. Koteā te ʼu tohi ʼaē neʼe fai e Charles Taze Russell moʼo tokoni ki te ako ʼo te Tohi-Tapu?

¹⁰ Neʼe makehe ʼaupito ia Charles Taze Russell ʼi te kau Ako ʼo te Tohi-Tapu. Neʼe ina fai te ʼu tohi e ono moʼo tokoni ki te ako ʼo te Tohi-Tapu, ko tona kupu tāfito ko te ʼu Études des Écritures. Neʼe faiga e te Tēhina ko Russell ke ina fai te fitu tohi, ʼaē neʼe fakamahino ai te ʼu tohi ʼo Esekiele pea mo te Apokalipesi. Neʼe ina ʼui fēnei: “Kapau ʼe ʼau maʼu te kalavi, pea ʼe ʼau tohi anai te Fitu Tohi.” Kae neʼe ina toe ʼui fēnei: “Kapau ʼe foaki e te ʼAliki te kalavi ki he tahi kehe, pea ʼe feala ke ina fai te tohi ʼaia.”

11. Koteā te pikipikiga ʼo te temi pea mo tatatou mahino ki te ʼu fakatuʼutuʼu ʼa te ʼAtua?

¹¹ ʼE fakahā e te ʼu palalau ʼaia ʼo C. T. Russell te faʼahi maʼuhiga ʼaē ʼe feala ai hatatou mahino ki te ʼu vaega faka Tohi-Tapu​—⁠ʼe ko te temi. Neʼe ʼiloʼi e te Tēhina ko Russell neʼe mole feala ke ina fakakinauʼi te ʼAtua ke ina foaki age te mālama ʼo ʼuhiga mo te tohi ʼo Apokalipesi, ohage pe ko te mole lava kole e te tagata ʼaē ʼe haʼele ke hopo fakatomuʼa ake te laʼā.

ʼE Fakahā ʼi Te Temi ʼAē Kua Fakakatofa e Te ʼAtua

12. (a) Ko te temi fea ʼaē ʼe tou mahino lelei ai ki he lea faka polofeta? (b) Koteā te faʼifaʼitaki ʼaē ʼe hā ai ko tatatou mahino ki te lea faka polofeta ʼe fakalogo ki te temi ʼaē kua fakakatofa e te ʼAtua? (Vakaʼi te kiʼi nota ʼi te lalo pasina.)

¹² Neʼe hoki mahino te kau ʼapositolo ki te ʼatu ʼu lea faka polofeta ʼo ʼuhiga mo te Mesia ʼi te ʼosi mate ʼa Sesu pea mo tona ʼosi fakatuʼuake, pea ʼe toe feiā pe mo te kau Kilisitiano ia ʼaho nei, ʼe hoki nātou mahino lelei ki te ʼu agaaga fuli ʼo te ʼu lea faka polofeta mokā ʼosi hoko. (Luka 24⁠:​15, 27; Gaue 1⁠:​15-21; 4⁠:​26, 27) Ko te tohi ʼo Apokalipesi ʼe ko he tohi faka polofeta, koia ʼe hoki tou mahino lelei anai kiai mokā ʼosi hoko te ʼu meʼa ʼaē ʼe talanoa kiai. Ohage la, neʼe mole feala ke mahino lelei kia C. T. Russell te faka ʼuhiga ʼo te manu fekai lanu kula fakatātā ʼaē ʼe talanoa ia Apokalipesi 17⁠:​9-11, koteʼuhi ko te ʼu puleʼaga ʼaē ʼe fakatātā kiai e te manu ʼaia, te Sosiete ʼo te ʼu Puleʼaga pea mo te ʼAtu Puleʼaga Fakatahi, neʼe mole heʼeki fakatuʼu ʼi tona temi māʼia pe la ʼi tana ʼosi mate.a

13. Koteā ʼaē ʼe tautau hoko mokā tuku mai he faka mālamagia ʼo ʼuhiga mo he manatu faka Tohi-Tapu?

¹³ ʼI te temi ʼaē neʼe mahino ai ki te ʼu ʼuluaki Kilisitiano ʼe feala ke liliu te kau Senitile ko he kau Kilisitiano, neʼe lagaʼi e te fetogi ʼaia te fehuʼi ki te maʼua ʼaē ke silikosisio te hahaʼi ʼo te ʼu puleʼaga. Ko te faʼahi ʼaia neʼe ina uga te kau ʼapositolo pea mo te ʼu tagata ʼāfea ke nātou toe vakaʼi te faʼahi ʼo te silikosisio. ʼE toe moʼoni te faʼahi ʼaia ia ʼaho nei. Ka tuku mai he faka mālamagia ʼo ʼuhiga mo he manatu faka Tohi-Tapu, pea ʼi ʼihi temi, ʼe tonu ki te ʼu kaugana fakanofo ʼa te ʼAtua, “te kaugana agatonu mo fakapotopoto,” ke nātou toe vakavakaʼi te manatu ʼaia, ohage ko te ʼu faʼifaʼitaki ʼaenī ʼaē ka tou vakaʼi neʼe mole heʼeki faʼa fualoa tonatou hoko.​—⁠Mateo 24⁠:⁠45.

14-16. Ko te fetogi ʼo tatatou manatu ʼo ʼuhiga mo te fale lotu fakalaumālie, neʼe malave feafeaʼi ki tatatou mahino ki te kapite 40 ki te 48 ʼo Esekiele?

¹⁴ ʼI te taʼu 1971, neʼe tā te fakamahino ʼo ʼuhiga mo te lea faka polofeta ʼo Esekiele ʼi te tohi “Les nations sauront que je suis Jéhovah” — Comment? Ko te tahi kapite ʼo te tohi ʼaia neʼe talanoa fakanounou ki te fale lotu ʼaē neʼe hā kia Esekiele. (Esekiele, kapite 40 ki te 48) ʼI te temi ʼaia, neʼe fia ʼiloʼi tāfito e te kau Kilisitiano pe koteā te faka ʼuhiga ʼo te fale lotu ʼa Esekiele ʼi te mālama foʼou.​—⁠2 Petelo 3⁠:⁠13.

¹⁵ Kae ko te ʼu alatike e lua ʼaē neʼe tā ʼi Te Tule Leʼo Fakafalani ʼo te ʼaho 1 ʼo Malesio 1973, neʼe malave ki tatatou mahino ki te meʼa ʼaē neʼe hā kia Esekiele. Neʼe ina fakamahino pe koteā te fale lotu lahi fakalaumālie ʼaē neʼe talanoa kiai te ʼapositolo ko Paulo ia Hepeleo kapite 10. Neʼe fakamahino e Te Tule Leʼo ko te Potu Taputapu pea mo te malaʼe ʼo te loto fale lotu fakalaumālie, ʼe faka ʼuhiga ki te ʼaluʼaga ʼo te kau fakanofo ʼi tanatou kei maʼuʼuli ʼi te kele. ʼI te toe vakavakaʼi ʼo te kapite 40 ki te 48 ʼo Esekiele ʼi te ʼu taʼu ki muli age, neʼe mahino ai leva kapau kua fakatuʼu te fale lotu fakalaumālie ʼi te temi nei, pea ʼe toe feiā mo te fale lotu ʼaē neʼe hā kia Esekiele, ʼe kua fakatuʼu ʼi te temi nei. ʼO feafeaʼi?

¹⁶ ʼI te meʼa ʼaē neʼe hā kia Esekiele, ʼe tou sio ai ki te kau pelepitelo ʼe nātou gāue ʼi te ʼu malaʼe ʼo te fale lotu, ʼo tauhi ki te ʼu telepi ʼaē ʼe mole kau ki te hōloga faka pelepitelo. ʼE fakatātā lelei e te kau pelepitelo ʼaia te “kautahi fakapelepitelo o te hau,” te ʼu kaugana fakanofo ʼa Sehova. (1 Petelo 2⁠:⁠9) Kae ʼe mole nātou gāue anai ʼi te malaʼe ʼo te fale lotu ʼaē ʼe tuʼu ʼi te kele ʼo aʼu ki te fakaʼosi ʼo te ʼAfio ʼa Kilisito ia Taʼu e Afe. (Apokalipesi 20⁠:⁠4) Lolotoga te koga lahi ʼo te temi ʼaia, peʼe lagi ko te temi katoa ʼaia, ko te kau fakanofo ʼe nātou tauhi anai ki te ʼAtua ʼi “selo totonu” ʼi te Potu Taputapu ʼAupito ʼo te fale lotu fakalaumālie. (Hepeleo 9⁠:24) Mai tona ʼaluʼaga ʼaē ʼe tou sio ki te kau pelepitelo ʼe nātou feʼoloʼaki ʼi te ʼu malaʼe ʼo te fale lotu ʼaē neʼe hā kia Esekiele, koia ko te meʼa ʼaia neʼe hā ʼe lolotoga hoko ʼi te temi nei, ʼi te kei maʼuʼuli ʼa ʼihi kau fakanofo ʼi te kele. ʼO mulimuli ki te manatu ʼaia, ʼi Te Tule Leʼo ʼo te ʼaho 1 ʼo Malesio 1999, neʼe fakahā ai pea mo fakamahino lelei ai te manatu ʼaia. Koia, ʼo aʼu mai ki te fakaʼosi ʼo te 20 sēkulō, neʼe tuku ifo te mālama fakalaumālie ʼo ʼuhiga mo te lea faka polofeta ʼo Esekiele.

Koutou Tali Ke Fetogi Takotou Manatu

17. Talu mai takotou maʼu te ʼatamai mālama ʼo te moʼoni, koteā te ʼu fetogi ʼaē neʼe koutou fai ʼo ʼuhiga mo takotou ʼu manatu ʼāfea, pea neʼe fua lelei feafeaʼi kia koutou?

¹⁷ Ko ʼaē ʼe ina fia maʼu te ʼatamai mālama ʼo ʼuhiga mo te moʼoni, ʼe tonu ke ina tali ke “puke fakapopula te fakakaukau fuape o taki ke fakalogo kia Kilisito.” (2 Kolonito 10⁠:⁠5) ʼE mole faigafua tuʼumaʼu te faʼahi ʼaia, tāfito la mokā mālohi ʼihi manatu ʼi totatou ʼatamai. Ohage la, ʼi muʼa ʼo takotou ako te ʼu moʼoni fakaʼatua, neʼe lagi koutou leleiʼia he ʼu ʼaho lafeti faka lotu, he neʼe koutou fakafiafia ai mo takotou famili. ʼI takotou kamata ako te Tohi-Tapu, neʼe koutou mahino ai ko te ʼu lafeti ʼaia ʼe ko he ʼu lafeti pagani. ʼI te kamata, neʼe lagi faigataʼa takotou maʼuliʼi te ʼu meʼa ʼaē neʼe koutou ako. Kae ki muli age, neʼe mālohi age takotou ʼofa ki te ʼAtua ʼi te ʼu lafeti faka lotu, pea neʼe koutou fakagata ai takotou kau ki te ʼu lafeti ʼaē ʼe mole leleiʼia e te ʼAtua. Neʼe mole tapuakina koa la e Sehova te tonu ʼaia neʼe koutou fai?​—⁠Vakaʼi ia Hepeleo 11⁠:⁠25.

18. Koteā ʼaē ʼe tonu ke tou fai mokā fakamālamaʼi lelei tatatou mahino ki te moʼoni ʼo te Tohi-Tapu?

¹⁸ ʼE tapuakina tuʼumaʼu tatou mokā tou mulimuli ki te ʼu meʼa ʼaē ʼe kole mai e te ʼAtua. (Isaia 48⁠:​17, 18) Koia, ka fakamālamaʼi lelei tatatou mahino ki he vaega faka Tohi-Tapu, pea tou fiafia ʼi te haʼele ki muʼa ʼo te moʼoni! ʼE mahino papau ia, ko te hoko atu ʼaia ʼo tatatou fakamālamaʼi, ʼe ko he fakamoʼoni ʼe tou haʼele ʼi te ala ʼaē ʼe lelei. ʼE ko “te ala [ʼaia] ʼo te kau faitotonu” ʼaē “ ʼe hage ko te mālama gigila ʼaē ʼe fakaʼāʼāsili tana mālama ʼo aʼu ki te katoa ʼo te mafoa ʼo te ʼaho.” (Tāʼaga Lea 4⁠:18) ʼE moʼoni, ʼi te temi ʼaenī ʼe ʼi ai te ʼu agaaga ʼo te fakatuʼutuʼu ʼa te ʼAtua ʼe tou “fakapōʼuli” kiai. Kae ka hoko mai te temi ʼaē kua fakakatofa e te ʼAtua, pea ʼe tou sio anai ki te matalelei katoa ʼo te moʼoni, mo kapau ʼe tou haʼele tuʼumaʼu ʼi “te ala.” ʼI te temi ʼaenī, tou fakafetaʼi ʼo ʼuhiga mo te ʼu moʼoni ʼaē kua fakamahino mai e Sehova, ʼo tou atalitali ke ina fakamālamaʼi mai te tahi ʼu moʼoni ʼe mole heʼeki tou mahino lelei kiai.

19. Koteā ʼaē ʼe feala ke tou fai moʼo fakahā ʼe tou ʼofa ki te moʼoni?

¹⁹ Koteā te ʼu meʼa ʼaē ʼe feala ke tou fai moʼo fakahā totatou ʼofa ki te mālama ʼaia? Ko te meʼa ʼe feala ke tou fai ʼe ko te lau tuʼumaʼu ia te Folafola ʼa te ʼAtua​—⁠ʼi te ʼaho fuli kapau ʼe feala. ʼE koutou mulimuli koa ki hakotou polokalama lau ʼo te Tohi-Tapu? ʼE tou toe maʼu ʼi te ʼu nusipepa ʼo Te Tule Leʼo pea mo te Réveillez-vous !, he tuʼuga meʼa kai fakalaumālie. Koutou fakatokagaʼi mo te ʼu tohi, mo te ʼu kaupepa, pea mo te tahi ʼu tohi neʼe teuteuʼi maʼa tatou. Pea mo te ʼu fakamatala fakaloto mālohi ʼa te gāue fai faka mafola ʼo te Puleʼaga, ʼaē ʼe tā ʼi te Annuaire des Témoins de Jéhovah.

20. Koteā te pikipikiga ʼo te mālama pea mo te moʼoni ʼaē ʼe haʼu mai ia Sehova pea mo tatatou kau ki te ʼu fono faka Kilisitiano?

²⁰ Ei, neʼe fai e Sehova he tali fakatalakitupua ki te faikole ʼaē ʼe tuʼu ia Pesalemo 43⁠:⁠3. ʼE tou lau fēnei ʼi te fakaʼosi ʼo te vaega: “Ke taki ʼau [e tou mālama pea mo tou moʼoni] ki tou moʼuga taputapu pea mo tou tapenakulo taulekaleka.” ʼE koutou fakaʼamu koa ke koutou tauhi fakatahi kia Sehova mo te tahi ʼu hahaʼi? Ko te ako fakalaumālie ʼaē ʼe foaki mai ʼi tatatou ʼu fono, ʼe ko te koga maʼuhiga ʼaē ʼe foaki mai ai e Sehova te faka mālamagia ia ʼaho nei. Koteā ʼaē ʼe feala ke tou fai ke toe ʼāsili age tatatou leleiʼia te ʼu fono faka Kilisitiano? ʼE mātou fakaafe atu koutou ke koutou vakaʼi te faʼahi ʼaia ʼi te faikole, ʼi te alatike ʼaē ka hoa mai.

[Nota ʼi te lalo pasina]

ʼE Feala Koa Hakotou Tali?

• He koʼe ʼe fakahā māmālie e Sehova tana ʼu fakatuʼutuʼu?

• Neʼe fakatokatoka feafeaʼi te fihifihia ʼo te silikosisio e te kau ʼapositolo pea mo te kau tagata ʼāfea ʼo Selusalemi?

• Neʼe feafeaʼi te ako Tohi-Tapu ʼa te kau ʼuluaki Ako ʼo te Tohi-Tapu, pea he koʼe neʼe makehe te faʼahi ʼaia?

• Tuku mai he faʼifaʼitaki ʼo te fakahā mai e te ʼAtua te mālama fakalaumālie ʼi tona temi totonu.

[Paki ʼo te pasina 12]

Neʼe ʼiloʼi e Charles Taze Russell ʼe faka mālamagia anai te tohi ʼo Apokalipesi ʼi te temi ʼaē kua fakakatofa e te ʼAtua