Koutou Maʼu Te Fīmālie ʼi Te Mālohi ʼo Sehova
“ ʼI te hoha lahi ʼo toku loto, ko tau ʼu fakaloto fīmālie neʼe nātou kamata fakapelepeleʼi toku nefesi.”—Pesalemo 94:19.
ʼE MAʼU ʼi te Tohi-Tapu he ʼu palalau fakaloto fīmālie maʼa nātou fuli ʼaē ʼe nātou fia maʼu te faʼahi ʼaia. Koia, ʼe mole tou punamaʼuli ai ki te ʼui fēnei e te tohi The World Book Encyclopedia: “Kua tokolahi te hahaʼi ʼaē kua nātou lau te Tohi-Tapu, heʼe nātou maʼu ai he fakaloto fīmālie, mo he ʼamanaki, pea mo he takitaki ʼi te ʼu temi maveuveu pea mo tuʼutāmakiʼia.” Koteā tona tupuʼaga?
Koteʼuhi ko te Tohi-Tapu ʼe haʼu mai totatou Tupuʼaga ʼofa, “te Atua o te u fakafimalie,” ia Ia ʼaē “e ina fakafimalieʼi tatou i otatou mamahi fuape.” (2 Kolonito 1:3, 4) ʼE ko ia “te ʼAtua ʼaē ʼe ina foaki ia . . . te fakaloto fīmālie.” (Loma 15:5, MN) Neʼe tuku mai e Sehova te faʼifaʼitaki ʼi tana foaki mai kia tatou te meʼa ʼaē ʼe feala ke ina fakafimālie tatou fuli. Neʼe ina fekauʼi mai ki te kele tona ʼAlo ʼulu tokotahi, ia Kilisito Sesu, ke ina foaki mai kia tatou te ʼamanaki pea mo te fakaloto fīmālie. Neʼe faiakonaki fēnei Sesu: “He nee ofa lahi te Atua ki te malama-nei, ko te tupuaga aia o tana foaki mai tona Alo Ulutokotahi, ke aua naa mate ia natou fuape e tui kia te ia, kae ke natou maù te mauli heegata.” (Soane 3:16) ʼO ʼuhiga mo Sehova, ʼe ʼui fēnei e te Tohi-Tapu: “ ʼE ina ʼamo te kavega maʼa tatou ʼi te ʼaho fuli, te ʼAtua moʼoni ʼo totatou hāofakiʼaga.” (Pesalemo 68:19) Ko te hahaʼi ʼaē ʼe manavasiʼi ki te ʼAtua ʼe feala ke nātou tui papau pea mo ʼui fēnei: “Kua ʼau ʼai ia Sehova ʼi ʼoku muʼa tuʼumaʼu pe. ʼE mole ʼau tūkia anai, heʼe nofo ʼi toku toʼomataʼu.”—Pesalemo 16:8.
Ko te ʼu vaega faka Tohi-Tapu ʼaia ʼe nātou fakahā mai te ʼofa lahi ʼo Sehova ʼAtua kia tatou. ʼE hā lelei ai tana holi lahi ʼaē ke ina foaki mai he fakafimālie lahi, pea mo fakamaʼamaʼa totatou lotomamahi ʼi te ʼu temi faigataʼa—pea ʼe ina lava fai te faʼahi ʼaia. “ ʼE ina foaki te mālohi kia ia ʼaē kua gaʼegaʼe; pea ʼe ina fakatuputupu te mālohi ia ia ʼaē ʼe mole hona mālohi.” (Isaia 40:29) ʼE tou lava maʼu feafeaʼi te fīmālie ʼi te mālohi ʼo Sehova?
Ko Te Loto Tokaga ʼa Sehova ʼe Ina Fakafimālie
Neʼe tohi fēnei e te tagata fai pesalemo: “Tuku tau kavega kia Sehova totonu, pea ko ia totonu ʼe lagolago anai kia te koe. ʼE mole ina fakagafua anai ke tūkia ia ia ʼaē ʼe faitotonu.” (Pesalemo 55:22) ʼE moʼoni, ʼe tokaga ia Sehova ʼAtua ki te hahaʼi. Neʼe fakaloto fīmālie fēnei e te ʼapositolo ko Petelo ki te kau Kilisitiano ʼo te ʼuluaki sēkulō: “E tokaga ia [te ʼAtua] kia koutou.” (1 Petelo 5:7). Neʼe fakahā lelei e Sesu ʼe maʼuhiga te hahaʼi kia mata ʼo te ʼAtua, he neʼe ina ʼui fēnei: “Pe e mole fakatau misi e nima ki te fala lua? E mole he tahi ia natou e galoi ia mua o te Atua. Pea kua lau katoa ia fuluʼiulu o outou ulu, aua tautou tuania, e koutou mauhigaʼage i te fakatahiʼi o te faga misi fuape.” (Luka 12:6, 7) ʼE tou maʼuhiga kia mata ʼo te ʼAtua, heʼe tokaga kia tatou, māʼia mo te ʼu ki meʼa veliveli ʼaē ʼe hoko kia tatou. ʼE ina ʼiloʼi te ʼu meʼa ʼaē ʼe mole tou ʼiloʼi, heʼe tokaga moʼoni kia tatou takitokotahi.
ʼI tana ʼiloʼi ʼaē te tokaga ʼaia ʼa Sehova kia ia, neʼe fīmālie ai ia Svetlana, te taʼahine ʼaē neʼe maʼuli faka paomutu, ʼaē neʼe tou talanoa ki ai ʼi te ʼuluaki alatike. Neʼe ʼamanaki fakamate ʼi te temi ʼaē neʼe felāveʼi ai mo te kau Fakamoʼoni ʼa Sehova. Pea neʼe ina ako ai te Tohi-Tapu, pea neʼe tokoni ai kia ia ke ina ʼiloʼi lelei ia Sehova, ko he tahi ʼe maʼuli moʼoni pea ʼe ina loto ke maui mālie tona maʼuli. Neʼe malave te faʼahi ʼaia ki tona loto, pea neʼe uga ai ia ia ke ina fetogi tona faʼahiga maʼuli pea ke ina foaki tona maʼuli ki te ʼAtua. ʼAki tana ako, neʼe toe maʼu e Svetlana he faʼahiga fakaʼapaʼapa ki tona matagafua, he neʼe ʼaoga kia ia moʼo kātakiʼi tana ʼu fihifihia pea ke maʼuli fiafia. ʼI te temi ʼaenī, ʼe ina ʼui fēnei: “Kua ʼau tui papau ʼe mole he temi ʼe līʼakina ai ʼau anai e Sehova. Neʼe mahino ai kia ʼau te moʼoni ʼo te ʼu palalau ʼaē ʼe tohi ia 1 Petelo 5:7 (MN), ʼe ʼui fēnei ai: ‘Vevete kia [Sehova] takotou ʼu tuʼania fuli, heʼe tokaga ia kia koutou.’ ”
ʼE Fakafimālie Te ʼAmanaki ʼo Te Tohi-Tapu
ʼE foaki e te ʼAtua te fakaloto fīmālie ʼi tana Folafola, heʼe maʼu ai te ʼamanaki taulekaleka ki te ka haʼu. Neʼe tohi fēnei e te ʼapositolo ko Paulo: “Heʼe ko meʼa fuli ʼaē neʼe tohi ʼi te temi muʼa, neʼe tohi ia moʼo akoʼi ʼo tatou, koteʼuhi ke tou maʼu te ʼamanaki ʼaki tatatou faʼa kātaki pea mo te fakaloto fīmālie ʼaē ʼe haʼu mai te Tohi-Tapu.” (Loma 15:4, MN) Neʼe fakahā lelei e Paulo te pikipikiga ʼo te ʼamanaki moʼoni pea mo te fakaloto fīmālie ʼo ina tohi fēnei: “[Ko] te ʼAtua tatatou Tāmai, ʼaē neʼe ʼoʼofa kia tatou pea neʼe nā foaki te fakafimālie heʼegata pea mo te ʼamanaki lelei ʼaki te ʼofa makehe, ke nā fakafimālieʼi ʼokotou loto pea mo fakamālohiʼi koutou ʼaki te ʼu gāue pea mo te ʼu palalau lelei.” (2 Tesalonika 2:16, 17, MN) Ko te “ ʼamanaki lelei” ʼaia ʼe faka ʼuhiga ki te ʼamanaki ʼaē ke tou maʼuʼuli haohaoa, mo fiafia, pea mo heʼegata ʼi te palatiso ʼi te kele.—2 Petelo 3:13.
Ko te ʼamanaki moʼoni pea mo taulekaleka ʼaia neʼe ina fakaloto mālohiʼi ia Laimonis, te tagata ʼinu kava pea mo palalisia ʼaē neʼe tou talanoa ki ai ʼi te ʼuluaki alatike. ʼI tana lau te ʼu tohi ʼa te kau Fakamoʼoni ʼa Sehova ʼaē ʼe fakatafito ki te Tohi-Tapu, neʼe fiafia ai ʼi tana ʼiloʼi te mālama foʼou ʼaē ka puleʼi e te Puleʼaga ʼo te ʼAtua, pea ʼe fakamālōlō katoa ai anai. ʼI te Tohi-Tapu, neʼe ina lau te fakapapau ʼaenī ʼo ʼuhiga mo te fakamālōlō faka milakulo ʼaē ka hoko: “ ʼI te temi ʼaia ʼe ava ai anai te ʼu mata ʼo te kau kivi, pea ʼe ava ai anai te ʼu taliga ʼo te kau tuli. ʼI te temi ʼaia ko te ketu ʼe kake anai ohage he tia pea ko te ʼalelo ʼo te tagata noa ʼe kalaga fakafiafia anai.” (Isaia 35:5, 6) Ke feala ke maʼuli ʼi te Palatiso ʼaia, neʼe fai e Laimonis te ʼu fetogi lahi. Neʼe ina tuku tana ʼinu pea neʼe fakatokagaʼi tana ʼu fetogi e te hahaʼi ʼo tona vāhaʼa fale pea mo tona ʼu feʼilo. ʼI te temi nei, ʼe lahi te ʼu ako Tohi-Tapu ʼaē ʼe ina fai, ʼo ina vaevae ki te hahaʼi te ʼamanaki fakaloto fīmālie ʼaē ʼe foaki mai e te Tohi-Tapu.
Te ʼAoga ʼo Te Faikole
Ka tou lotomamahi, pea ʼe feala ke tou maʼu he fakaloto fīmālie ʼi tatatou faikole kia Sehova. ʼE ina lava toʼo tatatou kavega. Lolotoga tatatou ʼu faikole, ʼe tou lava maʼu te fīmālie mokā tou manatuʼi te ʼu meʼa ʼaē ʼe ʼui ʼi te Folafola ʼa te ʼAtua. Ko te kapite loaloaga ʼo te tohi ʼo Pesalemo, ʼi te Tohi-Tapu, ʼe hage ko he faikole taulekaleka. Neʼe hiva fēnei te tagata fai pesalemo: “Neʼe ʼau manatuʼi tau ʼu faifakamāu talu mai te ʼu temi ʼaē ʼe mole ʼiloʼi hona kamataʼaga, Ê Sehova, pea ʼe ʼau loto fīmālie ai.” (Pesalemo 119:52) Ka hoko he ʼu ʼaluʼaga faigataʼa, tāfito la mokā ko he mahaki kovi, pea ʼe tahitahiga te maʼu ʼo he puleʼaki lelei kiai. Kapau ʼe tou falala ki totatou mālohi, pea ʼe mole tou ʼiloʼi he faʼahi ke tou haga kiai. Neʼe fakatokagaʼi e te tokolahi, mokā kua nātou fai ia meʼa fuli ʼe nātou lavaʼi, mokā nātou faikole ki te ʼAtua pea ʼe nātou maʼu ai te fakaloto fīmālie lahi, pea ʼaki te temi, ʼe nātou maʼu te ʼu puleʼaki neʼe mole nātou ʼamanaki kiai.—1 Kolonito 10:13.
Ko Pat, ʼaē neʼe leletakiʼi ki lopitali, neʼe ina maʼu te fakaloto fīmālie ʼaia ʼo te faikole. ʼI tona kua logo lelei, neʼe ina ʼui fēnei: “Neʼe ʼau faikole kia Sehova pea neʼe ʼau ako moʼoni ai ke ʼau tuku toku maʼuli ki ʼona nima, ʼo ʼau falala ke ʼau fai ia meʼa fuli ʼaē neʼe finegalo kiai. Lolotoga te temi katoa ʼaia, neʼe mole ʼau hoha; neʼe ʼau maʼu te tokalelei ʼo te ʼAtua, ʼaē ʼe talanoa kiai ia Filipe 4:6, 7.” ʼE ko he fakaloto fīmālie lahi kia tatou fuli ia te ʼu vaega ʼaia! ʼE tokoni fēnei mai ia Paulo: “Aua naa koutou tuania i he mea, kae i te meafuape aki te faikole mo te lauga fakatahi mo te u fakafetai, koutou fakaha ki te Atua autou u kole. Pea ko te tokalelei o te Atua aia e fakalaka i te atamai fuape, e ina malui anai outou loto mo autou fakakaukau ia Kilisito Sesu.”
ʼE Fakaloto Fīmālie Tatou e Te Laumālie Maʼoniʼoni
ʼI te po ʼi muʼa ʼo tona mate, neʼe fakahā lelei e Sesu ki tana kau ʼapositolo kua ʼamanaki mavae ia nātou. Neʼe nātou lotohoha ai pea mo lotomamahi. (Soane 13:33, 36; 14:27-31) ʼI tana ʼiloʼi ʼaē ʼe ʼaoga ke fakaloto fīmālieʼi tuʼumaʼu nātou, neʼe fakapapau fēnei age e Sesu: “ ʼE ʼau fai anai he kole ki te Tāmai, pea ʼe ina foaki atu anai kia koutou he tahi tokoni [peʼe, he fakaloto fīmālie] ke nofo mo koutou ʼo talu ai.” (Soane 14:16; kiʼi nota ʼi te lalo pasina, MN) ʼI henī, neʼe talanoa ia Sesu ki te laumālie maʼoniʼoni ʼo te ʼAtua. ʼO hilifaki ki te tahi ʼu meʼa, ko te laumālie ʼo te ʼAtua neʼe ina fakaloto fīmālieʼi te kau ʼapositolo ʼi tonatou ʼu ʼahiʼahi, pea mo fakaloto mālohiʼi nātou ke nātou haga fakahoko te finegalo ʼo te ʼAtua.—Gaue 4:31.
Ko Angie, ʼaē neʼe meihiʼi mate tona ʼohoana ʼi tona fakaʼī kovi, neʼe ina lava kātakiʼi tona lotohoha pea mo tona lotomamahi lahi ʼi te ʼaluʼaga ʼaia. Koteā ʼaē neʼe tokoni kia ia? ʼE ina ʼui fēnei: “Kapau neʼe mole tokoni te laumālie maʼoniʼoni ʼo Sehova kia tatou, pea neʼe mole tou lavaʼi te ʼu meʼa ʼaē neʼe hoko mai kia tatou pea mo tou nofo mālohi. ʼI te ʼu temi ʼaē ʼe tou lotovaivai ai, ʼe ko te ʼu temi ʼaia ʼaē ʼe hā ai te mālohi ʼo Sehova, pea ʼe ko he tule mālohi ʼi tatatou ʼu temi faigataʼa.”
Ko He Fale Tautēhina ʼe Fakaloto Fīmālie
Tatau aipe te ʼaluʼaga ʼaē ʼe feala ke hoko ʼi te maʼuli ʼo he tahi, ʼe lagi hoko anai mo te ʼu meʼa fakaloto mamahi, kae ʼe feala ke ina maʼu te fakaloto fīmālie ʼi te fale tautēhina ʼi te loto kokelekasio ʼa Sehova. ʼE foaki e te fale tautēhina ʼaia te tokoni ʼi te faʼahi fakalaumālie kia nātou ʼaē ʼe fakatahi kiai. ʼI te kokelekasio, ʼe tou lava maʼu ai he ʼu hahaʼi ʼofa, mo loto tokaga, pea mo he ʼu kaumeʼa fakaloto fīmālie, ʼe nātou fia tokoni pea mo fakafimālieʼi te hahaʼi ʼi te ʼu temi faigataʼaʼia.—2 Kolonito 7:5-7.
ʼE akoʼi ki te kokelekasio faka Kilisitiano ke nātou “fai ia te lelei ki te tagata fuape, kae tafito ia te lelei o te kaiga o te tui.” (Kalate 6:10) Ko tonatou akoʼi ʼaia, ʼaē ʼe fakatafito ki te Tohi-Tapu, ʼe ina uga nātou ke nātou feʼofaʼofani pea mo fefakahāʼaki te manavaʼofa fakatautehina. (Loma 12:10; 1 Petelo 3:8) ʼE fakaloto mālohiʼi te ʼu tēhina pea mo te ʼu tuagaʼane fakalaumālie ʼi te kokelekasio ke nātou agalelei, mo fakaloto fīmālie pea mo manavaʼofa.—Efeso 4:32.
Ko Joe pea mo Rebecca, ʼaē kua mate tanā tama, neʼe nā maʼu te fakaloto fīmālie ʼaia mai te kokelekasio. ʼE nā ʼui fēnei: “Ko Sehova pea mo tona kokelekasio ʼofa neʼe nātou tokoni mai kia māua ʼi te temi faigataʼa ʼaia. Neʼe momoli mai te ʼu lauʼi teau kate, mo te ʼu tohi, pea ko ʼihi neʼe nātou telefoni mai. Neʼe ma ʼiloʼi ai te maʼuhiga ʼaupito ʼo totatou ʼu tēhina. ʼI tamā kei lotomamahi lahi ʼi te mate ʼaia neʼe hoko, neʼe tokoni mai kia māua te ʼu kokelekasio, ʼo nātou fai mai hamā meʼa kai pea mo fakamaʼa tomā ʼapi.
Koutou Maʼu Te Fakaloto Fīmālie
Ka kamata agi mālohi te ʼu matagi ʼo te ʼu faigataʼaʼia, pea mo tō hoholo te ʼua pea mo te ʼuamaka ʼo te lotomamahi, pea ʼe foaki atu e te ʼAtua te puipui ʼaē ʼe fakaloto fīmālie. ʼE fakamatala feiā e te tahi pesalemo tana foaki te nonoʼaga fīmālie: “ ʼAki tona ʼu fuluʼi kapakau, ʼe ina tāʼofi anai ke fakaōvi he tahi kia koe, pea ʼe ke nono anai ʼi ʼona lalo kapakau.” (Pesalemo 91:4) ʼE lagi fakatātā ʼi henī ki te akuila. ʼE ko he fakatātā ʼo te manulele, ʼe sio ki he tuʼutāmaki pea ina folahi tana ʼu kapakau moʼo puipui tona ʼu ʼuhi. ʼI hona ʼaluʼaga lahi age, ʼe liliu Sehova ko he Puipuiʼaga moʼoni kia nātou fuli ʼaē ʼe nātou kumi nonoʼaga ia te ia.—Pesalemo 7:1.
Kapau ʼe koutou fia ʼiloʼi he tahi ʼu manatu ʼo ʼuhiga mo te ʼAtua, mo tona ʼulugaaga, mo tana ʼu fakatuʼutuʼu, pea mo tana lava fakafimālieʼi koutou, pea ʼe fakaafe atu koutou ke koutou ako tana Folafola. ʼE ko he meʼa fakafiafia anai ki te kau Fakamoʼoni ʼa Sehova te tokoni atu kia koutou ʼi te faʼahi ʼaia. Ei, ʼe feala mo koutou ke koutou maʼu te fīmālie ʼi te mālohi ʼo Sehova!
[Paki ʼo te pasina 7]
ʼE feala ke kita fīmālie ʼi te ʼamanaki ki te ka haʼu ʼaē ʼe fakatafito ki te Tohi-Tapu