Ko Te Ako ʼe Fua Lelei Kia Tatou Pea Mo Fakafiafia

“Kapau ʼe ke haga kumi . . . ʼe ke maʼu anai te ʼatamai mālama ʼo ʼuhiga mo te ʼAtua.”​—⁠Tāʼaga Lea 2⁠:​4, 5.

1. ʼE tou lava maʼu feafeaʼi he fiafia ʼi tatatou ʼu temi lautohi?

KO TE hahaʼi tokolahi ʼe nātou lautohi heʼe nātou leleiʼia. Kapau ʼe ko he tohi lelei, pea ko tona lau ʼe lava liliu ko he temi fakafiafia. ʼO hilifaki ki tanatou lau tuʼumaʼu ia te Tohi-Tapu, ko ʼihi Kilisitiano ʼe nātou maʼu he fiafia moʼoni ʼi tanatou lau te ʼu tohi ʼo Pesalemo, mo Tāʼaga Lea, mo te ʼu Evaselio, peʼe ko te tahi ʼu koga ʼo te Tohi-Tapu. ʼE nātou fiafia ʼaupito ʼi te ʼu palalau pea mo te ʼu manatu taulekaleka ʼaē ʼe nātou maʼu ai. Neʼe fili e ʼihi ke nātou lau te Annuaire ʼa te kau Fakamoʼoni ʼa Sehova, pe ko te Réveillez-vous !, pe ko te ʼu hisitolia ʼo te ʼu Kilisitiano ʼaē ʼe fakamatala ʼi te nusipepa ʼaenī, peʼe ko te ʼu alatike ʼo ʼuhiga mo te hisitolia, mo te seokalafia, pea mo te ʼu sivi ʼo te natula.

2, 3. (a) Koteā te ʼaluʼaga ʼaē ʼe feala ke fakatatau ai te ʼu manatu fakalaumālie loloto ki he meʼa kai fefeka? (b) Koteā ʼaē ʼe fakamaʼua e te ako?

² Ko te lautohi ʼe ko he temi mālōlō, kae ko te ako ʼe maʼua ke tou fakakaukau ai. Neʼe tohi fēnei e te tagata fai filosofia Pilitania ko Francis Bacon: “Ko ʼihi tohi ʼe tonu ke kita ʼahiʼahiʼi, ko ʼihi ʼe tonu ke kita folo, pea ʼe mole lahi te ʼu tohi ʼaē ʼe tonu ke kita mama pea ke hifo lelei.” ʼE kau te Tohi-Tapu ʼi te ʼu faʼahiga tohi fakamuli ʼaia. Neʼe tohi fēnei e te ʼapositolo ko Paulo: “O uhiga mo ia [ia Kilisito, ʼaē ʼe ina fakatātā ia Melekiseteke ʼaē neʼe Hau pea mo Pelepitelo], e lahi te u mea ke tala pea e faigataa mo tona fakamahino, koteuhi kua koutou liliu o taliga logogataʼa. . . . Ko te meakai fefeka maʼa te hahai lalahi, kia natou e natou akoi onatou ulugaʼaga ki te iloi o te kehekehe o te lelei pea mo te kovi.” (Hepeleo 5⁠:​11, 14) Ko te meʼa kai fefeka ʼe tonu ke mama ʼi muʼa ʼo tona folo pea ke hifo lelei. Ko te ʼu manatu fakalaumālie ʼaē ʼe loloto ʼe tonu muʼa ke fakakaukauʼi ʼi muʼa ʼo tonatou hū ki totatou ʼatamai pea mo tou tāʼofi maʼu.

³ ʼE fakamahino fēnei e te tikisionalio, ko te kupu “ako” ʼe ko “te fakahaga ʼo totatou ʼatamai ke ina maʼu te ʼatamai mālama peʼe ke mahino kiai, ʼaki te lautohi, mo tona fakakaukauʼi fakalelei, pea mo te tahi ʼu meʼa.” Koia, ko tona faka ʼuhiga ʼe mole tonu pe ke kita lau he ʼu pasina, kae ʼe feala ke kita fakaʼiloga he ʼu kupu mokā kita lautohi. Ko te ako ʼe ina fakamaʼua ke tou gāue, ke tou fakakaukauʼi, pea mo fakaʼaogaʼi tatatou fakasiosio tonu. ʼE tonu ke tou faʼafai mokā tou ako, kae ʼe mole faka ʼuhiga leva ʼe mole tou fiafia anai ʼi te fai ʼo te faʼahi ʼaia.

Tou Leleiʼia Te Ako

4. Ohage ko tana ʼui e te tagata fai pesalemo, ʼe lava liliu feafeaʼi te ako ʼo te Folafola ʼa te ʼAtua ko he meʼa fakamokomoko ki te loto pea mo fua lelei?

⁴ Ko te lau pea mo te ako ʼo te Folafola ʼa te ʼAtua, ʼe feala ke ina fakamokomoko totatou loto pea mo fakaloto mālohi. Neʼe tala fēnei e te tagata fai pesalemo: “Ko te lao ʼa Sehova ʼe haohaoa, ʼo ina fakamaʼuli te nefesi. Ko te fakamanatu ʼa Sehova ʼe tāu mo te falala, ʼo ina fakaliliu ʼo poto ia ia ʼaē ʼe mole heʼeki fakapotopoto. Ko te ʼu fakatotonu ʼa Sehova ʼe totonu, ʼo nātou fakafiafia te loto; ko te fakatotonu ʼa Sehova ʼe maʼa, ʼo ina fakagigila te ʼu mata.” (Pesalemo 19⁠:​7, 8) Ko te ʼu lao pea mo te ʼu fakamanatu ʼa Sehova ʼe nātou fakaloto mālohiʼi totatou nefesi, mo hikihiki totatou ʼaluʼaga fakalaumālie, mo nātou foaki mai he fiafia lahi, pea mo fakagigila totatou ʼu mata, ke tou mahino lelei ai ki te ʼu fakatuʼutuʼu fakatalakitupua ʼa Sehova. ʼI meʼa fakafiafia foki!

5. Koteā te ʼu ʼaluʼaga ʼaē ʼe feala ke tou maʼu ai he fiafia lahi ʼi te ako?

⁵ Ka tou sio ki te ʼu fua lelei ʼo tatatou gāue, pea ʼe tou leleiʼia te gāue ʼaia. Koia, kapau ʼe tou fia leleiʼia te ako, pea ʼe tonu ke tou foimo maʼuliʼi te ʼatamai mālama ʼaē kua tou maʼu. Neʼe tohi fēnei e Sakopo: “Kae kia ia ae e ina sioʼi te lao mooni, ia te lao o te ateaina pea nofo ai, e mole ko he tahi e ina fakalogo pea e ina galoi, kae ko he tahi e ina fai mo gaue, e manuia anai i tana gaue.” (Sakopo 1⁠:25) Kapau ʼe tou foimo maʼuliʼi te ʼu puani ʼaē neʼe tou ako, pea ʼe tou maʼu ai he toe fiafia lahi. ʼE tou toe fiafia lahi anai mo kapau ʼe tou fai he ʼu kumi ke tou maʼu tāfito te tali ki he fehuʼi neʼe fai mai ʼi tatatou gāue fai faka mafola peʼe ʼi te ʼu ako.

Tou Pipiki Ki Te Folafola ʼa Te ʼAtua

6. Neʼe fakahā feafeaʼi e ia ʼaē neʼe ina tohi te Pesalemo 119 tana pipiki ki te folafola ʼa Sehova?

⁶ Ko te tagata ʼaē neʼe ina tohi te Pesalemo 119, lagi ko Esekiasi ʼi tana kei tama ʼaliki tūpulaga, neʼe ina fakahā tana pipiki ki te folafola ʼa Sehova. Neʼe fai tuketuke ʼo ina ʼui fēnei: “ ʼE ʼau pipiki anai ki tau ʼu fakatotonu. ʼE mole ʼau galoʼi anai tau folafola. Pea ʼe ʼau pipiki ki tau ʼu fakamanatu . . . ʼE ʼau pipiki anai ki tau ʼu fakatotonu ʼaē neʼe ʼau manako kiai. Ke haʼu kia te ʼau tou ʼu manavaʼofa, ke ʼau maʼuli ai! Heʼe ʼau pipiki ki tau lao. Neʼe ʼau holi mālohi ki tau fakamaʼuli, Ê Sehova, pea ʼe ʼau pipiki ki tau lao.”​—⁠Pesalemo 119⁠:​16, 24, 47, 77, 174.

7, 8. (a) Ohage ko tona ʼui e te tikisionalio, koteā te faka ʼuhiga ʼo te ʼui ʼaē ke kita “pipiki” ki te Folafola ʼa te ʼAtua? (b) ʼE tou lava fakahā feafeaʼi tatatou ʼofa ki te Folafola ʼa te ʼAtua? (c) Neʼe teuteuʼi feafeaʼi e Esitalasi tona loto ʼi muʼa ʼo tana lau te Lao ʼa Sehova?

⁷ ʼE fakamahino fēnei e te tikisionalio ʼo te ʼu Tohi Faka Hepeleo ʼo te Tohi-Tapu te faka ʼuhiga ʼo te kupu ʼaē neʼe fakaliliu ʼaki te kupu “pipiki” ia Pesalemo 119: “Ko tona fakaʼaogaʼi ʼi te vaega 16 ʼe tatau mo te ʼu [kupu] fakafiafia . . . pea mo metitasio . . . Koʼeni tona tahi fakaliliu: ʼe fiafia, mo metitasio, mo ina leleiʼia . . . Ko te ʼu faʼahiga fai ʼaia, ʼe lagi hā ʼaki ai, kapau ʼe fakakaukau lelei he tahi, pea ʼe feala ai ke ina leleiʼia te folafola ʼa Iave. . . . ʼE faka ʼuhiga ki he meʼa ʼe haʼu mai totatou loto.”a

⁸ Ei, ko totatou ʼofa ki te Folafola ʼa Sehova ʼe tonu ke haʼu mai totatou loto, te faʼahi ʼaē ʼe tupu ai te ʼu meʼa ʼaē ʼe tou logoʼi. ʼE tonu ke tou fia fuafualoa ʼi he ʼu vaega neʼe hoki tou lau age pe. ʼE tonu ke tou fakakaukauʼi te ʼu manatu fakalaumālie loloto, mo tou tokakaga fakalelei kiai, pea mo tou metitasio kiai. ʼE maʼua ke tou fakakaukauʼi te ʼu faʼahi ʼaia pea mo faikole. Ohage ko Esitalasi, ʼe maʼua ke tou teuteuʼi totatou loto ki te lau pea mo te ako ʼo te Folafola ʼa te ʼAtua. Neʼe tohi fēnei ʼo ʼuhiga mo ia: “Neʼe teuteuʼi e Esitalasi tona loto moʼo vakavakaʼi ʼo te lao ʼa Sehova, pea ke ina maʼuliʼi, pea mo akoʼi ʼi Iselaele te pelesepeto pea mo te faitotonu.” (Esitalasi 7⁠:10) Koutou fakatokagaʼi te ʼu fakatuʼutuʼu e tolu ʼaē neʼe teuteuʼi ai e Esitalasi tona loto: ke ina ako, mo ina maʼuliʼi, pea mo ina akoʼi ki te hahaʼi. ʼE tonu ke tou mulimuli ki tana faʼifaʼitaki.

ʼE Kau Te Ako Ki Te Tauhi ʼAē ʼe Tou Fai

9, 10. (a) Neʼe fakahā feafeaʼi e te tagata fai pesalemo tana fia ʼiloʼi te Folafola ʼa Sehova? (b) Koteā te faka ʼuhiga ʼo te fakaliliu ʼo te kupu faka Hepeleo “[ʼe kita] fia ʼiloʼi” (c) He koe ʼe maʼuhiga kia tatou ke tou faka ʼuhiga te ako ʼo te Tohi-Tapu ohage ko “he tauhi”?

⁹ ʼE ʼui e te tagata fai pesalemo, neʼe ina fia ʼiloʼi te ʼu lao ʼa Sehova, mo tana ʼu fakatotonu, pea mo tana ʼu fakamanatu. ʼE hiva fēnei: “ ʼE ʼau fia ʼiloʼi tau ʼu fakatotonu, pea ʼe ʼau fia vakaʼi tau ʼu ala. . . . ʼE ʼau hiki anai ʼoku nima ki tau ʼu fakatotonu ʼaē neʼe ʼau ʼofa ai, pea ʼe ʼau fia ʼiloʼi tau ʼu lekula. ʼE ʼau ʼofa ʼaupito ki tau lao! ʼI te ʼaho fuli pe ʼe ʼau manatu kiai. Kua ʼau liliu ʼo sio lelei age ʼi taku ʼu hahaʼi faiako, heʼe ʼau manatuʼi tau ʼu fakamanatu.” (Pesalemo 119⁠:​15, 48, 97, 99) Koteā te faka ʼuhiga ʼo te ʼui ʼaē ke kita “fia ʼiloʼi” ia te Folafola ʼa Sehova?

¹⁰ Ko te kupu faka Hepeleo ʼaē neʼe fakaliliu ʼaki te kupu “[ʼe kita] fia ʼiloʼi,” ʼe toe faka ʼuhiga foki ki te “metitasio, mo te fakakaukau,” “ke kita fakakaukauʼi te faʼahi ʼaia.” “ ʼE ko te fakakaukauʼi fakalogologo ia te ʼu gāue ʼa te ʼAtua . . . pea mo te folafola ʼa te ʼAtua.” (Theological Wordbook of the Old Testament) ʼE faka ʼuhiga te kupu “fia ʼiloʼi” ki “te metitasio ʼa te tagata fai pesalemo,” “tana ako ʼaki te ʼofa” ia te lao ʼa te ʼAtua, ohage ko “hana tauhi.” Kapau ʼe tou faka ʼuhiga tatatou ako te Folafola ʼa te ʼAtua ohage ko he koga ʼo tatatou tauhi, pea ʼe tou fai fakalelei anai te faʼahi ʼaia. Koia ʼe tonu ai ke tou fai fakalelei te faʼahi ʼaia pea mo tou fai ʼaki te faikole. ʼE kau te ako ki tatatou tauhi pea ʼe tonu ke tou fai moʼo hikihiki tatatou tauhi.

Tou Vakaʼi Loloto Te Folafola ʼa Te ʼAtua

11. ʼE fakahā feafeaʼi e Sehova te ʼu manatu fakalaumālie loloto ki tana hahaʼi?

¹¹ ʼI tana fakaʼapaʼapa lahi, neʼe ʼui fēnei e te tagata fai pesalemo: “ ʼE lahi ʼaupito tau ʼu gāue, Ê Sehova! ʼE loloto ʼaupito tau ʼu manatu.” (Pesalemo 92⁠:⁠5) Pea neʼe talanoa te ʼapositolo ko Paulo ki “te ʼu meʼa loloto ʼa te ʼAtua,” te ʼu manatu loloto ʼaē ʼe fakahā e Sehova ki tana hahaʼi “ ʼaki tona laumālie,” ʼaē ʼe maʼu e te kalasi ʼo te kaugana agatonu mo fakapotopoto. (1 Kolonito 2⁠:​10, MN; Mateo 24⁠:45) ʼE foaki tuʼumaʼu mai e te kalasi ʼo te kaugana te meʼa kai fakalaumālie kia tatou fuli​—⁠te “huʼa pipi” maʼa nātou ʼaē ʼe foʼofoʼou mai kae ko te “meakai fefeka,” ʼe foaki ki “te hahai lalahi.”​—⁠Hepeleo 5⁠:​11-14.

12. Koutou tuku mai he faʼifaʼitaki ʼo “he ʼu meʼa loloto ʼa te ʼAtua” neʼe fakamahino e te kalasi ʼo te kaugana.

¹² Ke tou mahino ki “te ʼu meʼa loloto [ʼaia] ʼa te ʼAtua,” ʼe tonu ke tou faikole ʼi muʼa ʼo tatatou ako pea mo tou fakakaukauʼi tana Folafola. Ohage la, neʼe tā te alatike lelei ʼe ina fakahā ai peʼe lava fakahā feafeaʼi e Sehova tana faitotonu pea mo tana fakamolemole gafua. ʼI tana fakahā tana fakamolemole gafua ʼe mole ina meʼa noaʼi ai tana faitotonu; kailoa, he ko te loto fakamolemole ʼa te ʼAtua ʼe ko te fakahā ʼaia ʼo tana faitotonu pea mo tona ʼofa. Ka ina fakamāu he tahi neʼe agahala, ʼe ʼuluaki vakaʼi e Sehova peʼe feala ke ina fakamolemole age ki ai, ʼo fakatafito ki te sakilifisio faitotogi ʼo tona ʼAlo. Kapau ʼe mole fakahemala ia ia ʼaē neʼe agahala peʼe agatuʼu, pea ʼe tuku e te ʼAtua ke hoko kia ia tana faitotonu ʼo mole ina fakahā he manavaʼofa ki ai. ʼI te ʼu faʼahi fuli, ʼe agatonu ai Sehova ki tana ʼu pelesepeto māʼoluga.b (Loma 3⁠:​21-26) ‘ ʼI loloto leva ʼo te poto ʼo te ʼAtua!’​—⁠Loma 11⁠:⁠33.

13. ʼE tonu ke tou fakahā feafeaʼi tatatou loto fakafetaʼi ʼo ʼuhiga mo “te lahi ʼaupito” ʼo te ʼu moʼoni fakalaumālie ʼaē kua tou maʼu?

¹³ Ohage ko te tagata fai pesalemo, ʼe tou fiafia ʼi te vaevae e Sehova tana ʼu tuʼuga manatu mo tatou. Neʼe tohi fēnei e Tavite: “Koia, ʼe maʼuhiga kia te ʼau tau ʼu manatu! Ê ʼAtua, ʼe nātou lahi ʼaupito! Kapau ʼe ʼau faiga ke ʼau lau nātou, e nātou kaugamālie age ʼi te ʼu fisiʼi ʼone.” (Pesalemo 139⁠:​17, 18) Logola ko te ʼu meʼa ʼaē kua tou mālama kiai ia ʼaho nei, ʼe ko he kiʼi koga veliveli ʼaupito mokā fakatatau ki te ʼu tuʼuga manatu ʼa Sehova ʼaē ka ina fakahā mai lolotoga he temi heʼegata, kae ʼe tou leleiʼia “te lahi ʼaupito” ʼo te ʼu moʼoni fakalaumālie maʼuhiga ʼaē kua fakahā mai, pea ʼe tou vakaʼi loloto te ʼu tuʼuga meʼa ʼaē ʼe tohi ʼi te Folafola ʼa te ʼAtua.​—⁠Pesalemo 119⁠:​160, te kiʼi nota ʼi te lalo pasina.

Tou Faiga Lahi Pea Mo Tou Maʼu Te ʼu Meʼa Gāue Lelei

14. ʼE faka maʼuhigaʼi feafeaʼi e Tāʼaga Lea 2⁠:​1-6, te maʼua ʼaē ke tou faʼafai mokā tou ako te Folafola ʼa te ʼAtua?

¹⁴ ʼE tonu ke tou faʼafai mokā tou ako te Tohi-Tapu. ʼE tou maʼu te manatu ʼaia mokā tou lau fakalelei ia Tāʼaga Lea 2⁠:​1-6. Koutou fakatokagaʼi te ʼu kupu ʼaē neʼe fakaʼaogaʼi e te Hau poto ko Salomone moʼo faka maʼuhigaʼi te maʼua ʼaē ke kita maʼu ia te ʼatamai mālama fakaʼatua, mo te poto, pea mo te fakasiosio tonu. Neʼe ina tohi fēnei: “Ê toku foha, kapau ʼe ke tali taku ʼu folafola pea mo ke taupau fakalelei ia te koe taku ʼu fakatotonu, ke feala ai hau tokaga ki te poto ʼaki tou taliga, ke ke fakafalele tou loto ki te fakasiosio tonu; kapau leva ʼe ke pāui ki te ʼatamai pea mo kapau ʼe ke kalaga ʼaki tou leʼo ki te fakasiosio tonu, kapau ʼe ke haga kumi te meʼa ʼaia ohage ko te siliva pea kapau ʼe ke kumi tuʼumaʼu ohage ko he ʼu koloā maʼuhiga neʼe fufū, pea ʼe ke mahino ai anai ki te manavasiʼi kia Sehova pea ʼe ke maʼu ai anai te ʼatamai mālama ʼo ʼuhiga mo te ʼAtua. Heʼe foaki e Sehova totonu ia te poto; ʼe haʼu mai tona gutu te ʼatamai mālama pea mo te fakasiosio tonu.” Ei, ke tou maʼu he ʼu fua lelei ʼi tatatou ako ʼe tonu ke tou kumi, ke tou keli, ohage ko hatatou kumi he ʼu koloā neʼe fufū.

15. Ko te fakatātā faka Tohi-Tapu fea ʼaē ʼe fakahā lelei ai te maʼua ʼaē ke tou maʼu he ʼu faʼahiga fai lelei ʼo tatatou ako?

¹⁵ Tahi ʼaē meʼa, kapau ʼe tou loto ke lahi te ʼu meʼa ʼaē ʼe tou ako ʼi te faʼahi fakalaumālie, pea ʼe toe maʼua foki ke lelei mo tatatou faʼahiga fai tatatou ako. Neʼe tohi fēnei e Salomone: “Kapau kua feku he meʼa gāue ukamea pea neʼe mole fakamāsilaʼi e he tahi tona mataʼi hele, pea ʼe ina fakaʼaogaʼi anai tona mālohi katoa.” (Tagata Tānaki 10⁠:10) Kapau ʼe fakaʼaogaʼi e he tagata gāue he meʼa gāue ʼe feku, peʼe kapau ʼe mole poto ʼi tona fakaʼaogaʼi lelei, pea ʼe kinakina ʼaupito anai ʼi tona fakaʼaogaʼi pea ʼe kovi anai tana gāue. ʼO toe feiā pe, ʼe feala ke kehekehe te ʼu fua lelei ʼaē ʼe tou maʼu ʼi te temi ʼaē ʼe tou ako ai, ʼo fakalogo ki tatatou faʼahiga fai ʼo tatatou ako. ʼE feala ke tou maʼu he ʼu tokoni lelei moʼo hikihiki tatatou faʼahiga ako ʼi te kapite 7 ʼo te tohi Manuel pour l’École du ministère théocratique.c

16. Koteā te ʼu tokoni ʼaoga ʼaē neʼe tuku mai moʼo tokoni kia tatou ke loloto tatatou ako?

¹⁶ Ka kamata e he tagata tufuga tana gāue, pea ʼe ina toʼo te ʼu meʼa gāue fuli ʼaē ka ina fakaʼaogaʼi anai. ʼO toe feiā, ka tou kamata tatatou ako, pea ʼe tonu ke tou filifili ʼi tatatou tānakiʼaga tohi te ʼu meʼa gāue ʼaē ka tou fakaʼaogaʼi anai ki tatatou ako. Koutou manatuʼi ko te ako ʼe ko he gāue pea ʼe tonu ke kita fakakaukau, pea ʼe toe lelei foki ke kita heka fakalelei. Kapau ʼe tou loto ke tokagaʼi tuʼumaʼu e tatatou fakakaukau te meʼa ʼaē ʼe tou ako, pea ʼe lagi lelei age ke tou fakaʼaogaʼi he hekaʼaga pea mo he laupapa peʼe ko he pilō gāue, kae mole tou takokoto peʼe tou heheka ʼi te foʼi hekaʼaga ʼo te salō. Kapau kua fuafualoa takotou ako, pea ʼe lagi lelei kia koutou ke ai hakotou kiʼi tuʼu peʼe koutou ʼolo ʼo haʼele ʼi tuʼa.

17, 18. Koutou tuku mai he ʼu faʼifaʼitaki ʼo te fakaʼaogaʼi ʼo te ʼu meʼa gāue lelei ʼaē ʼe tou maʼu ki te ako.

¹⁷ ʼE tapuke te ʼu meʼa gāue maʼuhiga ʼe koutou lava fakaʼaogaʼi. Ko te meʼa ʼaē ʼe maʼuhiga tāfito ʼi te ʼu meʼa ʼaia ʼe ko te Tohi-Tapu Traduction du monde nouveau, ʼaē kua maʼu katoa peʼe fakakoga ia lea e 37. ʼE maʼu ʼi te Traduction du monde nouveau te ʼu kiʼi fakaʼiloga moʼo fakahā te tahi ʼu vaega, pea mo te “Tānakiʼaga ʼo te ʼu Tohi ʼo te Tohi-Tapu” ʼaē ʼe fakahā ai te higoa ʼo ia ʼaē neʼe ina tohi, te koga meʼa ʼaē neʼe tohi ai, pea mo te temi loaloaga ʼaē neʼe ina fakaʼaogaʼi moʼo fai ʼo te tohi ʼaia. ʼE toe ʼi ai mo te kumiʼaga ʼo te ʼu kupu ʼo te Tohi-Tapu, mo te ʼu fakamahinohino, pea mo te ʼu mape. ʼI ʼihi lea, ko te Tohi-Tapu ʼaia ʼe tā mata lalahi, ʼe fakahigoaʼi ko te La Bible de référence. ʼE maʼu ai te ʼu meʼa fuli ʼaē neʼe tou talanoa kiai pea mo te tahi ʼu meʼa, pea mo te ʼu kiʼi nota ʼi te lalo pasina, neʼe toe tohi te ʼu kiʼi nota ʼaia ʼi te tānakiʼaga. ʼE koutou fakaʼaogaʼi fuli koa te ʼu tohi ʼaē ʼe koutou maʼu ʼi takotou lea moʼo tokoni ki takotou keli loloto ia te Folafola ʼa te ʼAtua?

¹⁸ Ko te tahi meʼa gāue maʼuhiga ʼe ko te ʼu tohi faka Tohi-Tapu lalahi, Étude perspicace des Écritures. Kapau ʼe koutou maʼu te tohi ʼaia ʼi he lea ʼe koutou mahino kiai, pea ʼe tonu ke koutou fakaʼaogaʼi tuʼumaʼu mokā koutou fai takotou ako. ʼE koutou maʼu ai anai he ʼu manatu ʼo ʼuhiga mo te ʼu tuʼuga puani ʼo te Tohi-Tapu. Ko te tahi meʼa gāue feiā ʼe ʼaoga ʼe ko te tohi “Toute Écriture est inspirée de Dieu et utile.” Ka koutou kamata lau he tohi ʼo te Tohi-Tapu, pea ʼe lelei ke koutou vakaʼi te ako ʼo te tohi ʼaia ʼi te tohi “Toute Écriture” ke koutou mahino ai ki te koga meʼa pea mo te ʼaluʼaga faka hisitolia, pea mo te fakamatala fakanounou ʼo te ʼu manatu ʼaē ʼe tuʼu ʼi te tohi faka Tohi-Tapu ʼaia pea mo tona ʼaoga kia tatou. Ko te tahi meʼa gāue neʼe hoki maʼu pe ʼe ko te Watchtower Library ko he polokalama ki te olotinatea, pea kua maʼu ʼi te temi nei ia lea e hiva.

19. (a) He koʼe neʼe foaki mai e Sehova he ʼu meʼa gāue lelei moʼo ako ʼo te Tohi-Tapu? (b) Koteā ʼaē ʼe ʼaoga ke lelei ai tatatou lau te Tohi-Tapu pea mo tona akoʼi?

¹⁹ Neʼe foaki e Sehova te ʼu meʼa gāue fuli ʼaia ʼaki “te kaugana agatonu mo fakapotopoto,” ke feala ki tana ʼu kaugana ʼi te kele ke nātou ‘kumi pea mo maʼu te ʼatamai mālama ʼo ʼuhiga mo te ʼAtua.’ (Tāʼaga Lea 2⁠:​4, 5) Kapau ʼe tou fai hatatou ʼu fakatuʼutuʼu lelei ki te ako, pea ʼe feala ai anai ke tou aʼu ki he ʼatamai mālama ʼe lelei age ʼo ʼuhiga mo Sehova, pea mo tou fiafia ʼi tatatou ʼu felogoi mo ia. (Pesalemo 63⁠:​1-8) Ei, ko te ako ko tona faka ʼuhiga ʼe kita gāue, kae ʼe ko he gāue ʼe kita leleiʼia pea ʼe fua lelei kia kita. Kae ʼe tonu ke koutou fakaʼaogaʼi hokotou temi ki te faʼahi ʼaia, pea ʼe lagi koutou fakakaukau fēnei: ‘ ʼE ʼau maʼu anai ʼifea he temi ke ʼau lau ai te Tohi-Tapu pea mo fai taku ako tokotahi?’ ʼE tou vakaʼi anai te faʼahi ʼaia ʼi te alatike fakaʼosi.

[Kiʼi nota]

Te ʼu Fehuʼi Fakamanatu

• ʼE lava liliu feafeaʼi tatatou ako takitokotahi ko he meʼa fakamokomoko pea mo fua lelei?

• Ohage ko te tagata fai pesalemo, ʼe tou lava fakahā feafeaʼi tatatou “pipiki” pea mo tatatou “fia ʼiloʼi” te Folafola ʼa Sehova?

• ʼE fakahā feafeaʼi e Tāʼaga Lea 2⁠:​1-6 te maʼua ʼaē ke tou faiga mokā tou ako te Folafola ʼa te ʼAtua?

• Koteā te ʼu meʼa gāue lelei ʼaē neʼe foaki mai e Sehova ki te ako?

[Paki ʼo te pasina 14]

Ko te fakakaukauʼi pea mo te faikole, ʼe tokoni mai ke tou fakatuputupu te ʼofa ki te Folafola ʼa te ʼAtua

[Paki ʼo te pasina 17]

ʼE koutou fakaʼaogaʼi koa te ʼu tohi ako fuli ʼaē ʼe koutou maʼu moʼo kumi loloto ʼi te Folafola ʼa te ʼAtua?