Te ʼu Fehuʼi ʼa Te Kau Lautohi

Ko te temi fea neʼe fakanofo ai “te Maʼoniʼoni ʼo te ʼu Maʼoniʼoni,” ohage ko tona fakakikite ia Taniela 9:24?

Ko te lea faka polofeta ia Taniela 9:24-27 ʼe faka ʼuhiga ki te haʼu ʼo te “Mesia ʼaē ko te Takitaki”—te Kilisito. Ko te fakanofo ʼaē neʼe fakakikite ʼo “te Maʼoniʼoni ʼo te ʼu Maʼoniʼoni,” ʼe mole faka ʼuhiga ki te fakanofo ʼo te Potu Taputapu ʼAupito ʼo te fale lotu ʼi Selusalemi. Kae ko te kupusiga palalau “Maʼoniʼoni ʼo te ʼu Maʼoniʼoni” ʼe faka ʼuhiga ki te sagatualio ʼo te ʼAtua ʼi te lagi—te Potu Taputapu ʼi selo—te fale lotu lahi fakalaumālie ʼo Sehova.a—Hepeleo 8:1-5; 9:2-10, 23.

Ko te temi fea ʼaē neʼe kamata ai te gāue ʼo te fale lotu fakalaumālie ʼo te ʼAtua? Koutou fakatokagaʼi te tuʼulaga ʼo Sesu ʼi te temi ʼaē neʼe papitema ai ʼi te taʼu 29 ʼo totatou temi. Talu mai te temi ʼaia, neʼe fakahoko e Sesu te ʼu palalau ʼaē ʼe tuʼu ia Pesalemo 40:6-8. Ki muli age neʼe ʼui e te ʼapositolo ko Paulo ko Sesu neʼe faikole ki te ʼAtua, ʼo ina ʼui fēnei: “Nee mole ke fia fai sakilifisio mo molaga, kae nee ke teuteu he sino mo oku.” (Hepeleo 10:5) Neʼe mahino kia Sesu ‘neʼe mole kei fia fai’ e te ʼAtua ki he ʼu sakilifisio manu ʼi te fale lotu ʼo Selusalemi. Kae neʼe teuteuʼi e Sehova te sino haohaoa ʼo Sesu moʼo fai ʼaki he sakilifisio. Moʼo fakahā tona loto katoa ki te faʼahi ʼaia, neʼe ʼui fēnei e Sesu: “Koeni au, kuʼau haù o fai tou finegalo, Atua. He nee tohi o uhiga mo au i te takaiga tohi o te tohi.” (Hepeleo 10:7) Pea neʼe koteā te tali ʼa Sehova? ʼE ʼui fēnei ʼi te Evaselio ʼo Mateo: “Pea i te hili o tona papitemai, nee hake ake aipe Sesu mai te vai, pea nee ava atu aipe i te lakaga aia ia te u lagi, pea nee mamata ki te hifo ifo o te Laumalie o te Atua, e fakaʼata ki he lupe, o hau kia te ia. Pea koeni mo he leo mai te u lagi nee ui ifo maʼana: ‘Ko ia aeni e ko toku Alo, ia te ofaina, ia te ia kuʼau tuku ki ai te katoa o toku lelei.’ ”—Mateo 3:16, 17.

Ko te tali e Sehova ʼAtua te sakilifisio ʼo te sino ʼo Sesu, ko tona faka ʼuhiga ki te tahi ʼaletale ʼe lahi age ʼi te ʼuluaki ʼaletale ʼaē neʼe tuʼu ʼi te fale lotu ʼo Selusalemi. Neʼe ko te ʼaletale ʼaia ʼo te “finegalo” ʼo te ʼAtua, peʼe ko te fakatuʼutuʼu moʼo tali te maʼuli haohaoa ʼo Sesu ohage ko he sakilifisio. (Hepeleo 10:10) Ko te fakanofo ʼo Sesu ʼaki te laumālie maʼoniʼoni, ʼe faka ʼuhiga kua fakatuʼu katoa e te ʼAtua tona fale lotu fakalaumālie.b Koia ʼi te papitema ʼo Sesu, neʼe fakanofo te nofoʼaga ʼo te ʼAtua ʼi selo, peʼe tuku keheʼi ohage ko “te Maʼoniʼoni ʼo te ʼu Maʼoniʼoni” ʼi te fale lotu lahi fakalaumālie.

[Kiʼi nota]

[Paki ʼo te pasina 27]

Ko “te Maʼoniʼoni ʼo te ʼu Maʼoniʼoni” neʼe fakanofo ʼi te temi neʼe papitema ai ia Sesu