Ko Enoke Neʼe Haʼele Mo Te ʼAtua ʼi He Mālama Fakapikopiko

ʼE ʼUI e te Tevolo ʼe ina lava fakamaliu te hahaʼi fuli mai te ʼAtua, pea ʼi ʼihi temi ʼe hage neʼe moʼoni te faʼahi ʼaia. Neʼe mole ʼi ai he tahi neʼe kaugana agatonu kia Sehova, hili sēkulō e nima ki te ʼosi mate ʼa Apele. Kae neʼe ko he agamāhani ia te agahala pea mo te mole fia pipiki ki te ʼAtua.

Neʼe tupu ia Enoke ʼi te temi ʼaē neʼe kovi ʼaupito ai te maʼuli fakalaumālie ʼa te hahaʼi. ʼE fakafuafua e te Tohi-Tapu neʼe tupu ʼi te taʼu 3404 ʼi muʼa ʼo totatou temi. Neʼe mole hage ia Enoke ko te hahaʼi ʼo tona temi, he neʼe ko he tagata neʼe leleiʼia e te ʼAtua. Neʼe ʼui e te ʼapositolo ko Paulo ʼe kau ia Enoke ki te kau kaugana ʼa Sehova ʼaē neʼe nātou tuku he faʼifaʼitaki lelei ki te kau Kilisitiano ʼo ʼuhiga mo tanatou tui. Neʼe ko ai ia Enoke? Koteā te ʼu fihifihia ʼaē neʼe tau mo ia? Pea neʼe ina tauʼi feafeaʼi? Pea koteā te ʼaoga ʼo tana nofo agatonu kia tatou?

ʼI te temi ʼo Enosi, teitei pe ko sēkulō e fā ʼi muʼa ʼo te temi ʼo Enoke, “neʼe kamata fetapā te hahaʼi ki te huafa ʼo Sehova.” (Senesi 4:26) Neʼe kua fakaʼaogaʼi te huafa ʼo te ʼAtua talu mai te kamataʼaga ʼo te maʼuli ʼo te tagata. Koia, ko te meʼa ʼaē neʼe kamata ʼi te kei maʼuli ʼa Enosi, neʼe mole ko he fetapā kia Sehova ʼaki te tui pea mo te tauhi moʼoni. Neʼe ʼui e ʼihi kau popoto Hepeleo ʼe tonu ke fakaliliu fēnei ia Senesi 4:26 “neʼe kamata vaʼivaʼigaʼi.” Neʼe lagi fakaʼaogaʼi te huafa ʼo Sehova e ʼihi tagata kia nātou totonu, peʼe ki ʼihi tagata neʼe nātou lau ʼe nātou tauhi ki te ʼAtua. Pe neʼe lagi nātou fakaʼaogaʼi tona huafa ki te ʼu tamapua.

‘Ko Enoke Neʼe Haʼele Mo Te ʼAtua Moʼoni’

Logope neʼe maʼuli ia Enoke ʼi te lotolotoiga ʼo te hahaʼi neʼe aga heʼe lotu, kae neʼe “haʼele mo te ʼAtua moʼoni,” ia Sehova. ʼE mole ʼui mai ʼo ʼuhiga mo tona ʼu kui—ia Seti, mo Enosi, mo Kenani, Mahalaleele, pea mo Salete—pe neʼe nātou haʼele mo te ʼAtua. Pea kapau neʼe fai te potu ʼaia kae neʼe mole nātou tatau mo Enoke, ʼaē neʼe makehe age tona maʼuli ia nātou.—Senesi 5:3-27.

Ko te haʼele mo Sehova neʼe faka ʼuhiga ki he aga kua māhani pea mo he felogoi lelei ʼaupito mo te ʼAtua, koteʼuhi neʼe ʼalutahi te maʼuli ʼo Enoke mo te finegalo ʼo te ʼAtua. Neʼe leleiʼia e Sehova te tauhi ʼa Enoke. ʼE ʼui tonu e te Septante ko “Enoke neʼe leleiʼia ʼaupito” e te ʼAtua, pea ko te manatu ʼaia neʼe toe fakahā e Paulo.—Senesi 5:22; Hepeleo 11:5.

Ko te faʼahi neʼe maʼuhiga tāfito ʼi te felogoi lelei ʼa Enoke mo Sehova neʼe ko tana tui. Neʼe lagi tui ki te fakapapau ʼo ʼuhiga mo te “hako” ʼo te “fafine” ʼa te ʼAtua. Kapau neʼe feʼiloʼiʼaki lelei ia Enoke mo Atama, neʼe lagi feala aipe kia ia ke ina maʼu he ʼu logo ʼo ʼuhiga mo te ʼu felogoi ʼa te ʼAtua mo te ʼuluaki taumatuʼa ʼi Eteni. Ko te ʼatamai mālama ʼaia neʼe maʼu e Enoke ʼo ʼuhiga mo te ʼAtua, neʼe ina fakaliliu ia ia ʼo kau ki te faʼahiga tagata ʼaē neʼe nātou “kumi moʼoni ia Ia.”—Senesi 3:15; Hepeleo 11:6, 13, MN.

Ki te faʼahi ʼo Enoke ʼo feiā mo tatou, ko he felogoi lelei mo Sehova ʼe mole gata ʼaki pe takita ʼiloʼi te ʼAtua. Kapau ʼe tou ʼofa makehe ki he tahi, ʼe mole koa la moʼoni te ʼui ʼaē ʼe mulimuli tatatou ʼu faʼahiga manatu peʼe ko tatatou aga ki tana ʼu faʼahiga manatu? ʼE mole tou fai anai he ʼu faʼahiga palalau peʼe ko he ʼu aga ʼe ina maumauʼi anai tatatou fakakaumeʼa ʼaia. Pea kapau ʼe tou tokagaʼi ʼe tonu ke tou fai he ʼu fetogi ʼi totatou maʼuli, ʼe mole koa la tou fai anai te faʼahi ʼaia heʼe tou faiga ke lelei te felogoi ʼaia?

Ko totatou loto ʼaē ke tou taupau he felogoi lelei mo te ʼAtua ʼe tonu foki ke malave ki te ʼu faʼahiga meʼa ʼaē ʼe tou fai. ʼUluaki, ʼe tonu muʼa ke tou ʼiloʼi lelei te meʼa ʼaē ʼe ina tali pea mo te meʼa ʼaē ʼe mole ina tali. Pea ʼe tonu ke takitaki tatou e te meʼa ʼaia kua tou ʼiloʼi, ʼo tou faigaʼi ke tou fakafiafia ia ia ʼaki tatatou ʼu manatu pea mo tatatou ʼu aga.

Ei, kapau ʼe tou fia haʼele mo te ʼAtua, pea ʼe tonu ke tou fai te ʼu meʼa ʼaē ʼe ina leleiʼia. Neʼe fai e Enoke te faʼahi ʼaia lolotoga te ʼu taʼu ʼe lauʼi teau. ʼI tona fakahagatonu, ko te kupuʼi palalau faka Hepeleo ʼaē moʼo fakahā ko Enoke “neʼe haʼele” mo te ʼAtua, ʼe faka ʼuhiga ki he aga ʼe fai liuliuga, mo fai hoholo. Ko Noe neʼe ko te tahi tagata agatonu ‘neʼe haʼele mo te ʼAtua.’—Senesi 6:9.

Ko Enoke neʼe ko te pule famili, neʼe ʼi ai tona ʼohoana mo tona ʼu “foha mo ʼofafine.” Neʼe ʼi ai tona foha, ko Metusela. (Senesi 5:21, 22) Neʼe lagi fai e Enoke ia meʼa fuli moʼo takitaki fakalelei tona famili. Kae ʼaki te aga heʼe lotu ʼi tona ʼu tafaʼaki, neʼe mole ko he meʼa faigafua kia ia he tauhi ki te ʼAtua. Neʼe lagi ko te tokotahi pe ʼo tona temi neʼe tui kia Sehova, ko Lameke, te tāmai ʼa Noe. (Senesi 5:28, 29) Kae neʼe faʼafai aipe ia Enoke ʼo maʼuliʼi te tauhi moʼoni.

Koteā ʼaē neʼe tokoni kia Enoke ke nofo agatonu ki te ʼAtua? ʼE mahino mai, neʼe mole fakatahi mo te hahaʼi ʼaē neʼe nātou vaʼivaʼigaʼi te huafa ʼo Sehova peʼe ko te hahaʼi ʼaē neʼe mole ko he ʼu fakakaugā lelei maʼa he tahi ʼe tauhi ki te ʼAtua. Neʼe lagi toe lotomālohi pe foki ia Enoke ʼuhi ko tana kumi tokoni kia Sehova ʼi te faikole, ke ʼaua naʼa ina fai he meʼa ʼe mole leleiʼia e tona Tupuʼaga.

Te Lea Faka Polofeta ʼo ʼUhiga Mo Te Aga Heʼe Lotu

ʼE faigataʼa te taupau ʼo he ʼu aga maʼa, tāfito mokā ʼe aga heʼe lotu te hahaʼi ʼo totatou ʼu tafaʼaki. Kae neʼe tala foki e Enoke te logo mālohi ʼo ʼuhiga mo te fakamāuʼi ʼo te kau agakovi. ʼAki te takitaki ʼa te laumālie ʼa te ʼAtua, neʼe fakakikite fēnei e Enoke: “Koʼeni! Kua haʼu ia Sehova mo ʼana miliate maʼoniʼoni, moʼo fakahoko te fakamāu ki te hahaʼi fuli, pea mo fakahā te hala ʼa te hahaʼi ʼaē ʼe aga heʼe faka lotu ʼo ʼuhiga mo tanatou meʼa noaʼi te ʼAtua ʼi tanatou ʼu aga fakafeagai ʼo feiā mo te ʼu meʼa fakaufiufi fuli ʼaē neʼe lau e te kau agahala heʼe lotu kia te ia.”—Suta 14, 15, MN.

Neʼe malave feafeaʼi te logo ʼaia ki te hahaʼi aga fakalialia ʼaē neʼe mole tui ki te ʼAtua? ʼE mahino ia, ʼo ʼuhiga mo te ʼu palalau fefeka ʼaia neʼe fai e Enoke, neʼe tupu ai tona fehiʼaʼinaʼi, pea neʼe lagi vāʼi mo manukiʼi ia ia e te hahaʼi, pea mo nātou fakamatakuʼi ia ia. Neʼe lagi fia tāpunuʼi ʼosi tona gutu e ʼihi hahaʼi. Kae neʼe mole mataku ia Enoke. Neʼe ina ʼiloʼi te meʼa ʼaē neʼe hoko ki te tagata faitotonu ko Apele pea ohage ko ia, neʼe lotomālohi ia Enoke ke tauhi ki te ʼAtua tatau aipe pe koteā he faʼahiga meʼa ʼe feala ke hoko kia ia.

“Neʼe Toʼo Ia Ia e Te ʼAtua”

ʼE mahino ia neʼe tuʼutāmakiʼia te maʼuli ʼo Enoke ʼi te temi ʼaē “neʼe toʼo ai ia ia e te ʼAtua.” (Senesi 5:24) Neʼe mole tali e Sehova ke maʼuli mamahi tana polofeta agatonu ʼi tona ʼu fili aga ʼitaʼita. ʼE ʼui fēnei e te ʼapositolo ko Paulo, “nee toʼo Enoke, naʼa sio ki te mate.” (Hepeleo 11:5) ʼE ʼui ai e te tokolahi neʼe mole mate ia Enoke—neʼe toʼo ia ia e te ʼAtua ʼo ʼave ki te lagi, ʼo hoko atu ai tona maʼuli. Kae neʼe tala fakahagatonu fēnei e Sesu: “Nee heeki he tahi kua hake ake ki Selo, gatape kia ia nee hifo ifo mai Selo, te Foha o te tagata.” Ko Sesu neʼe ko he “fakamelomelo” ʼo nātou fuli ka hake anai ki selo.—Soane 3:13; Hepeleo 6: 19, 20.

Kapau koia ʼaia, koteā te meʼa ʼaē neʼe hoko kia Enoke? Ko tona ‘toʼo, naʼa sio ki te mate’ ʼe lagi faka ʼuhiga neʼe toʼo ia ia e te ʼAtua kae moe pea neʼe lagi mate feiā ai. ʼI te ʼu ʼaluʼaga ʼaia, neʼe mole logoʼi e Enoke te ʼu mamahi ʼo te mate. Koia, “neʼe mole maʼu ia ia ʼi he faʼahi,” he neʼe lagi pulihi tona sino e Sehova ohage ko tana fai ki te sino ʼo Moisese.—Teutalonome 34:5, 6.

Neʼe maʼuli ia Enoke ia taʼu e 365—neʼe nounou age tona maʼuli ʼi te maʼuli ʼo te hahaʼi ʼo tona temi. Kae ko te meʼa ʼaē ʼe maʼuhiga kia nātou ʼaē ʼe ʼoʼofa kia Sehova, ʼe ko te tauhi agatonu kia te ia ʼo kaku ki tonatou mate. ʼE tou ʼiloʼi neʼe fai feiā ia Enoke koteʼuhi “ ʼi muʼa ʼo tona toʼo, neʼe fakamoʼoni age neʼe ina fakafiafia te ʼAtua.” ʼE mole fakahā e te Tohi-Tapu pe neʼe feafeaʼi te faʼahiga felogoi ʼa Sehova mo Enoke. Kae ʼi muʼa ʼo te mate ʼa Enoke, neʼe fakamoʼoni age ki ai tona leleiʼia e te ʼAtua, pea ʼe tou tui papau ʼe manatuʼi anai ia ia e Sehova ʼi te fakatuʼuake.

Koutou Faʼifaʼitakiʼi Te Tui ʼa Enoke

ʼE feala ke tou faʼifaʼitakiʼi lelei te tui ʼa te ʼu tagata neʼe nātou pipiki ki te ʼAtua. (Hepeleo 13:7) ʼI tana tui ki te ʼAtua, neʼe gāue ia Enoke ʼi tona ʼuhiga ʼuluaki polofeta agatonu ʼa te ʼAtua. Neʼe hage pe te mālama ʼo te temi ʼo Enoke ko totatou temi—te agamālohi, te vaʼivaʼigaʼi, pea mo tanatou mole pipiki ki te ʼAtua. Kae neʼe kehe ia Enoke. Neʼe ina maʼu te tui moʼoni pea neʼe ko he faʼifaʼitaki ʼi te tauhi ki te ʼAtua. ʼE moʼoni neʼe tuku age e Sehova he logo fakamāu mamafa ke ina kalagaʼi, kae neʼe ina toe fakaloto mālohiʼi ia ia ke ina tala te logo ʼaia. ʼAki he lototoʼa, neʼe fakahoko e Enoke tana gāue ʼaia, pea neʼe tokaga te ʼAtua ki ai ʼi te ʼu fakafeagai ʼo tona ʼu fili.

Kapau ʼe tou fakahā te tui ohage ko tona fai e Enoke, ʼe fakamālohi anai tatou e Sehova ke tou tala tana logo ʼi te ʼu ʼaho fakamuli ʼaenī. ʼE tokoni mai anai ke tou kātakiʼi te ʼu fakafeagai ʼaki he lototoʼa, pea ʼaki tatatou tauhi ki te ʼAtua ʼe tou kehe anai mai te mālama ʼaē ʼe mole tauhi ki te ʼAtua. ʼE faka fealagia mai anai e te tui ke tou haʼele mo te ʼAtua pea mo tou fai he ʼu aga ʼe fakafiafia ki tona loto. (Tāʼaga Lea 27:11) ʼAki te tui, neʼe lava haʼele ia Enoke mo Sehova ʼi he mālama ʼe mole tauhi ki te ʼAtua, pea ʼe mahino ia ʼe tou lava fai feiā mo tatou.

[Talanoa ʼo te pasina 30]

ʼE Fakaʼaogaʼi Koa e Te Tohi-Tapu Ia Te Tohi ʼa Enoke?

Ko te tohi ʼa Enoke ʼe ko te tohi apocryphe (ko he tohi neʼe fufū) pea ʼe ko te pseudépigraphe (ko he tohi ʼe loi te higoa ʼaē ʼe fakatoʼo kiai). ʼE fakahigoaʼi hala ko te tohi ʼa Enoke. Neʼe lagi fai te tohi ʼaia ʼi te lua peʼe ko te ʼuluaki sēkulō ʼi muʼa ʼo totatou temi; pea ko he fakatahiʼi ʼo te ʼu fagana faka Sutea, kae ʼe ʼiloga lelei ʼe ko he gāue ʼa he kau popoto ʼo ʼuhiga mo te fakamatala nounou ʼo te tohi ʼo Senesi kia Enoke. ʼAki te manatu ʼaia, ʼe feʼauga ai kia nātou ʼe nātou ʼoʼofa ki te Folafola ʼa te ʼAtua ke nātou mahino, ʼe mole tonu ke nātou fakaʼaogaʼi te tohi ʼaia.

ʼI te Tohi-Tapu, ʼe hā tuʼa tahi te ʼu palalau faka polofeta ʼaenī ʼa Enoke ʼi te tohi ʼo Suta: “ ‘Koʼeni! Kua haʼu ia Sehova mo ʼana miliate maʼoniʼoni, moʼo fakahoko te fakamāu ki te hahaʼi fuli, pea mo fakahā te hala ʼa te hahaʼi ʼaē ʼe aga heʼe lotu ʼo ʼuhiga mo tanatou meʼa noaʼi te ʼAtua ʼi tanatou ʼu aga fakafeagai, ʼo feiā mo te ʼu meʼa fakaufiufi fuli ʼaē neʼe lau e te kau agahala aga heʼe lotu kia te ia.” (Suta 14, 15, MN ) Tokolahi te kau tagata sivi Tohi-Tapu ʼe nātou ʼui ko te lea faka polofeta ʼa Enoke ki te hahaʼi aga heʼe lotu, neʼe toʼo mai te Tohi ʼa Enoke. ʼE feala koa ke fakaʼaogaʼi e Suta he tohi ʼe mole ko he tohi faka Tohi-Tapu ʼe mole feala hatatou falala kiai?

ʼE mole fakahā ʼi te Tohi-Tapu pe neʼe ʼiloʼi feafeaʼi e Suta te lea faka polofeta ʼa Enoke. Neʼe lagi ina toʼo mai he tohi neʼe ʼiloʼi e te hahaʼi, lagi ko he talatuku neʼe tuku holo talu mai te temi muʼa. Neʼe fai feiā e Paulo ʼi tana palalau ʼo ʼuhiga mo Sane pea mo Samepele, te ʼu tagata gaohi meʼa fakamanamana ʼi te ʼapi ʼo Falaone, ʼaē neʼe nā fakafeagai kia Moisese. Kapau neʼe lava fakaʼaogaʼi e te tagata faitohi ʼo te Tohi ʼa Enoke te ʼu tohi ʼāfea ʼaia, pea ʼe feafeaʼi age la kia Suta?a—Ekesote 7:11, 22; 2 Timoteo 3:8.

ʼE mole maʼuhiga kia tatou pe neʼe maʼu feafeaʼi e Suta ia te logo ʼo ʼuhiga mo te lea faka polofeta ʼa Enoke. Kae ʼe moʼoni te lea faka polofeta ʼaia, koteʼuhi neʼe faitohi ia Suta ʼaki te takitaki fakaʼatua. (2 Timoteo 3:16) Neʼe tokaga te laumālie maʼoniʼoni ʼa te ʼAtua ke ʼaua naʼa tohi he meʼa ʼe mole moʼoni.

[Kiʼi nota]

[Paki ʼo te pasina 31]

ʼAki he lototoʼa, neʼe tala e Enoke ia te logo ʼa Sehova