“Omai Kia Te Au, . . . Pea e Au Fakafimalieʼi Anai Koutou”

ʼE Maʼua He Folahi Vave ʼUhi Ko Te Tuputupu Fakaofoofo

NEʼE ʼui fēnei e Sesu Kilisito: “Omai kia te au, . . . pea e au fakafimalieʼi anai koutou.” (Mateo 11:28) Ko he fakaafe fakaloto māfana ʼaē neʼe fai e te Pule ʼo te kokelekasio faka Kilisitiano! (Efeso 5:23) Ka tou fakakaukauʼi te ʼu palalau ʼaia, ʼe tou leleiʼia moʼoni te matapuna maʼuhiga ʼo te fakafimālie—ko te fakatahi mo ʼotatou ʼu tēhina mo tuagaʼane ʼi te ʼu fono faka Kilisitiano. ʼE mahino ia ʼe tou manatu tahi mo te tagata fai pesalemo ʼaē neʼe hiva fēnei: “ ʼE ko he meʼa lelei pea mo fakafiafia ki he ʼu tēhina hanatou nonofo fakatahi ʼi te logo tahi!”—Pesalemo 133:1.

Ei, ko te ʼu fakakaugā ʼaē ʼe lelei ʼaupito kia tatou, ʼe ko te ʼu fakakaugā ʼo te ʼu fono, pea ʼe ko he meʼa fakafiafia pea mo lelei te ʼu felogoi fakalaumālie ʼaē ʼe kita maʼu ai. ʼE mole tou punamaʼuli ki te ʼui fēnei ʼa te kiʼi finemui: “ ʼI te ʼaho katoa ʼe ʼau nofo ʼi te faleako, pea ʼe ko he kavega kia ʼau. Kae ko te ʼu fono ʼe hage ko he ʼu vai ʼi he toafa, ʼe ʼau ʼalu ʼo fakafimālieʼi ai taku fia ʼinu, ke feala haku lotomālohi ki te ako ʼi te ʼapogipogi ake.” Neʼe ʼui fēnei e te tahi finemui: “Neʼe ʼau fakatokagaʼi ko taku fakatahi tuʼumaʼu mo te hahaʼi ʼaē ʼe ʼoʼofa kia Sehova, ʼe tokoni mai ke ʼau nofo ovi kia te ia.”

ʼE fakaʼaogaʼi te Fale ʼo Te Puleʼaga ʼa te kau Fakamoʼoni ʼa Sehova ko he koga meʼa moʼo fakahoko fakatahi ai te tauhi moʼoni. ʼE lahi te ʼu koga meʼa, ʼe fai tuʼa lua ai ʼi te vāhaʼa fuli te ʼu fono ʼi te Fale ʼo Te Puleʼaga, pea kapau kua feala pea ʼe fakaloto mālohiʼi te kau ako Tohi-Tapu ke nātou kau ki te ʼu fono ke nātou maʼu ai he fakafimālie.—Hepeleo 10:24, 25.

Ko He Faʼahi Kua Maʼuhiga ʼAupito

Kae ʼe tou tokagaʼi, ʼe mole ko te kau Fakamoʼoni ʼa Sehova fuli ʼaē ʼe nātou fakatahi ʼi he Fale lelei ʼo Te Puleʼaga. ʼAki te tuputupu ʼo kaugamālie ʼaupito ʼo te kau fai faka mafola ʼo te Puleʼaga, kua ʼi ai te faʼahi kua maʼuhiga ʼaupito ke fai. ʼE kei ʼaoga ke ʼi ai he ʼu Fale ʼo Te Puleʼaga ʼe lauʼi afe, kae tāfito ʼi te ʼu fenua ʼaē ʼe lolotoga laga.—Isaia 54:2; 60:22.

Tou toʼo he faʼifaʼitaki: ʼi te République démocratique du Congo, ko te ʼu Fale ʼo Te Puleʼaga e hogofulu ki te ʼu kokelekasio e 290. ʼE maʼuhiga ʼaupito ke laga he tahi ʼu Fale ʼo Te Puleʼaga ʼi te fenua ʼaia. ʼI Angola, ʼe lahi ʼaupito te ʼu kokelekasio ʼe nātou fono ʼi tuʼa, koteʼuhi ʼe mole lahi te ʼu Fale ʼo Te Puleʼaga. ʼE toe hoko pe foki te fihifihia ʼaia ʼi te tahi ʼu fenua.

Koia talu mai te taʼu 1999, neʼe faigaʼi ke fai he tokoni ki te laga ʼo he ʼu Fale ʼo Te Puleʼaga ʼi te ʼu fenua māsisiva. Neʼe fai te ʼu fakatuʼutuʼu e te ʼu tēhina poto gāue ke nātou tokoni ki te laga fale ʼi te ʼu fenua ʼaia. Ka fakatahiʼi he ʼu faiga feiā mo he fia gāue ʼaki he loto lelei ʼo te ʼu tēhina ʼo te koga meʼa, pea ʼe maʼu ai te ʼu fua fakaloto mālohi. Pea ki te ʼu tēhina ʼo te koga meʼa ʼaē ʼe fai ai te laga fale, ʼe akoʼi nātou ki te gāue. ʼE fai te ʼu faʼahi fuli ʼaia moʼo tokoni ki te laga ʼo te ʼu Fale ʼo Te Puleʼaga ʼi tonatou fenua.

Koia ʼe fai te ʼu tokoni ʼaoga ki te laga ʼo te ʼu Fale ʼo Te Puleʼaga ʼo mulimuli ki te ʼu faʼahiga gāue pea mo te ʼu meʼa ʼe fakaʼaogaʼi ʼi te fenua. Ko te fakatuʼutuʼu ʼaē ʼe faiga kiai, ʼe ko te laga ʼo he ʼu Fale ʼo Te Puleʼaga pea mo te ʼu puleʼaki moʼo taupau fakalelei ʼo mulimuli ki te ʼu ʼaluʼaga ʼo te fenua.—2 Kolonito 8:14, 15.

Ko He ʼu Tuputupu Fakaloto Mālohi

Koteā te fua ʼo te faiga ʼaia ke fakatuʼu he ʼu fale fono? ʼI te kamataʼaga ʼo te taʼu 2001, koʼeni te fakamatala mai Malawi: “Ko te meʼa ʼaē neʼe fai ʼi te fenua ʼaia, ʼe ko he meʼa fakaofoofo ʼaupito. ʼI te ʼu māhina e lua ka tuʼu mai, ʼe mātou fakaʼosi anai te laga ʼo te tahi ʼu Fale ʼo Te Puleʼaga.” (Paki 1 mo te 2) ʼI Togo ʼi te ʼu māhina ʼaenī kua hili, neʼe lava fakatuʼu e te kau gāue lotolelei ia te ʼu Fale matalelei ʼo Te Puleʼaga. (Paki 3) ʼAki te tokoni maʼuhiga ʼa te kau gāue loto lelei, neʼe lava fakatuʼu te ʼu fale fono matalelei ʼi Mekesike, mo Pelesile pea mo te tahi ʼu fenua.

ʼE fakatokagaʼi e te ʼu kokelekasio mokā laga he Fale ʼo Te Puleʼaga, pea ʼe mahino ki te hahaʼi ʼo te koga meʼa ʼe nonofo anai te kau Fakamoʼoni ʼa Sehova ʼi te koga meʼa ʼaia. Tokolahi neʼe hage neʼe mole fia fakatahi mo te kau Fakamoʼoni, kae neʼe hoki nātou ʼōmai kiai ʼi te temi ʼaē neʼe maʼu ai honatou fale fono lelei. Koʼeni te fakamatala ʼa te kokelekasio ʼo Nafisi ʼi Malawi: “ ʼI te temi nei kua ʼi ai tomatou Fale matalelei ʼo Te Puleʼaga, pea kua ʼi ai te fagonogono lelei. Koia kua faigafua te kamata ʼo he ʼu ako Tohi-Tapu.”

Neʼe manukiʼi te ʼu tēhina ʼo te kokelekasio ʼo Kraké ʼi Bénin koteʼuhi ko tonatou ʼuluaki Fale ʼo Te Puleʼaga neʼe fakaʼofaʼofa mokā fakatatau ki te ʼu ʼēkelesia. (Paki 4) ʼI te temi nei kua maʼu e te kokelekasio tona Fale matalelei ʼo Te Puleʼaga ʼe ina fakahāhā te tauhi moʼoni ʼi he ʼaluʼaga ʼe tāu mo te faʼahi ʼaia. (Paki 5) ʼI te kokelekasio ʼaia, neʼe ko tana ʼu tagata fai faka mafola ʼo te Puleʼaga e toko 34, ʼaki he toko 73 ʼe kau tuʼumaʼu ʼi te ʼu fono ʼo te ʼAhotapu, pea ʼi te avahi ʼo te Fale ʼo Te Puleʼaga, neʼe ko te toko 651 ʼaē neʼe kau ai. Tokolahi ia nātou neʼe ko he ʼu hahaʼi mai te kolo lahi pea neʼe fetogi tanatou manatu ʼo ʼuhiga mo te kau Fakamoʼoni ʼi tanatou sisio ki te fale ʼaē neʼe lava laga e te ʼu tēhina ʼi he kiʼi temi nounou. Neʼe tohi fēnei e te filiale ʼo Zimbabwe, mo manatuʼi te ʼu tuputupu ʼo ʼuhiga mo te faʼahi ʼaia ʼi te temi kua hili: “Hili te māhina ki te ʼosi laga ʼo te Fale foʼou ʼo Te Puleʼaga, neʼe kua tuʼa lua age te kaugamālie ʼo nātou ʼaē ʼe kau ki te ʼu fono.”—Paki 6 mo te 7.

ʼE mahino ia, ko te ʼu tuʼuga Fale ʼo Te Puleʼaga ʼaia ʼe tokoni ki te foaki ʼo he fakafimālie ki te kau Kilisitiano ʼaē kua foaki tonatou maʼuli kia Sehova ʼo feiā mo te hahaʼi ʼaē ʼe fia fai ki te moʼoni. Neʼe ʼui fēnei e te Fakamoʼoni ʼi Ukraine ʼo ʼuhiga mo te kamata fakaʼaogaʼi ʼo te Fale foʼou ʼo Te Puleʼaga e te ʼu kokelekasio: “ ʼE lahi ʼaupito tomatou fiafia. Neʼe mātou sio tonu ki te tokoni ʼa Sehova ki tana hahaʼi.”

[Talanoa ʼo te pasina 10, 11]

Ko He Lagolago ʼe Leleiʼia

ʼE ōfo te kau Fakamoʼoni ʼa Sehova ʼi te tuputupu vave ʼaē neʼe hoko, ke feala ke laga he tahi ʼu Fale ʼo Te Puleʼaga ʼi te malamanei katoa. ʼE haga tuputupu aipe te hahaʼi tauhi ʼa Sehova ʼi te ʼu fenua kehekehe, koia ʼe maʼua ai anai ʼi te ka haʼu, ke laga he ʼu Fale foʼou ʼo Te Puleʼaga. ʼE fakafuafua, lolotoga te taʼu gāue 2001, neʼe ko te ʼu kokelekasio foʼou e 32 neʼe fakatuʼu ʼi te vāhaʼa fuli! ʼE ʼaoga ki te ʼu kokelekasio ʼaia ke ʼi ai honatou ʼu fale fono ke nātou fakatahi ai moʼo fai tanatou tauhi.

Ko te fehuʼi ʼe feala ke lagaʼi, ‘e feafeaʼi hatatou lagolago ʼi te faʼahi faka paʼaga ki te ʼu fakatuʼutuʼu ʼo te laga ʼo he ʼu Fale foʼou ʼo Te Puleʼaga, tāfito la ʼi te ʼu fenua māsisiva?’ Ki te koga ʼaia, ʼe maʼua ke lagolago kiai te ʼAtua pea mo foaki he ʼu meʼa ʼofa e te tagata.

ʼO mulimuli ki tana fakapapau, ʼe tuku ifo e Sehova tona laumālie maʼoniʼoni ki tana ʼu kaugana, moʼo faka fealagia kia nātou “ke natou gaue ki te lelei, mo fakakoloa natou i te u gaue lelei mo taulekaleka, ke lahi tanatou faiʼofa pea mo mauli vaevae.” (1 Timoteo 6:18) ʼE uga te kau Fakamoʼoni ʼa Sehova e te laumālie ʼo te ʼAtua ke nātou lagolago ki te gāue fai faka mafola ʼo te Puleʼaga ʼi tona ʼu faʼahiga fai kehekehe—ʼo foaki tonatou temi, tonatou mālohi, tanatou gāue takitokotahi, pea mo he tahi ʼu ʼaluʼaga ʼi te ʼu gāue faka Kilisitiano.

ʼE fakahā e te kau Fakamoʼoni pea mo ʼihi hahaʼi tonatou loto fia foaki, ʼo nātou lagolago ʼi te faʼahi faka paʼaga ki te gāue ʼaē ko te fakalahi pea mo te laga ʼo he ʼu fale. ʼO hilifaki ki tanatou lagolago ki te totogi ʼo te ʼu maʼua māhani ʼo te kokelekasio, ʼe nātou toe lagolago pe foki ki te ʼu gāue laga fale ʼaē ʼe fai ʼi te tahi ʼu potu ʼo te kele.

ʼI te ʼu kokelekasio fuli, ʼe ʼi ai te ʼu kesi ʼe tohi lelei ai “Te ʼu meʼa ʼofa ki te gāue faka malamanei—Mateo 24:14.” Kapau ʼe tou loto kiai, pea ʼe tou lava fafaʼo ki loto te ʼu meʼa ʼofa ʼaē ʼe tou loto kiai. (2 Hau 12:9) ʼE maʼuhiga te ʼu meʼa ʼofa fuli, peʼe lahi peʼe veliveli. (Maleko 12:42-44) ʼE fakaʼaogaʼi te ʼu meʼa ʼofa ʼaia ʼo mulimuli ki te potu ʼe ʼaoga ai, ohage la ko te laga ʼo te ʼu Fale ʼo Te Puleʼaga. ʼE mole fakaʼaogaʼi te falā ʼaia moʼo totogi ʼo nātou ʼaē ʼe nātou fakahoko te gāue, koteʼuhi ʼe mole totogi ia nātou.

ʼE fakaʼaogaʼi moʼoni koa te falā ʼaia ko te ʼu meʼa ʼofa ki te gāue ʼaē ʼe hoko ʼi te malamanei katoa? Ei. ʼE fakahā e te filiale ʼo Lipelia—ko he fenua ʼe hoko ai te tau ʼi te loto fenua—ʼe lahi ʼaupito te ʼu tēhina ʼo te fenua ʼe mole nātou maʼu gāue pea ʼe nātou māsisiva. Kae ʼe lava feafeaʼi ki te hahaʼi ʼa Sehova ʼi te fenua ʼaia, ke nātou maʼu honatou ʼu fale fono lelei? ʼE ʼui fēnei e te filiale: “Ko te ʼu meʼa ʼofa ʼo te ʼu tēhina ʼo te ʼu fenua tai ʼe fakaʼaogaʼi anai moʼo fakahoko te gāue ʼaia. Pea ʼe ko he fakatuʼutuʼu ʼofa pea mo fakapotopoto!”

ʼE toe lagolago pe foki te ʼu tēhina ʼo te fenua, logola tanatou mole maʼu meʼa. Koʼeni te fakamatala mai te fenua Afelika ko Sierra Leone: “ ʼE lagolago te ʼu tēhina ʼo te fenua ki te ʼu faiga pea mo nātou fiafia ʼi te foaki ki te gāue, ʼaki he ʼu faʼahiga meʼa ʼofa ʼe nātou lava foaki ki te laga ʼo te ʼu Fale ʼo Te Puleʼaga.”

Ko te ʼu faiga ʼaia ki te laga fale ʼe fakavikiviki tāfito kia Sehova. ʼAki he loto fiafia, ʼe ʼui fēnei e te ʼu tēhina mai Lipelia: “Ko te laga ʼo he ʼu fale fono lelei maʼa te tauhi ʼi te fenua katoa, ʼe ina fakahā anai kua tuʼu te tauhi moʼoni ʼi Lipelia pea ʼe ina faka maʼuhigaʼi anai pea mo fakamataleleiʼi te huafa lahi ʼo totatou ʼAtua.”