ʼE Lelei Koa Takotou Faiako?

TE ʼU mātuʼa, te kau tagata ʼāfea, mo te kau fai faka mafola ʼo te logo lelei—ko nātou fuli ʼaia ʼe maʼua ke nātou liliu ko he kau faiako. Ko te ʼu mātuʼa ʼe nātou akoʼi tanatou ʼu fānau, ko te kau tagata ʼāfea ʼe nātou akoʼi te kokelekasio, pea ko te kau fai faka mafola ʼe nātou akoʼi te hahaʼi foʼou ʼaē ʼe nātou tali lelei. (Teutalonome 6:6, 7; Mateo 28:19, 20; 1 Timoteo 4:13, 16) Koteā ʼaē ʼe koutou lava fai ke lelei age takotou faiako? Ko tona faʼahiga fai, ke koutou muliʼi te faʼifaʼitaki pea mo te faʼahiga fai ʼo te ʼu tagata faiako faiva ʼaē ʼe tuʼu ʼi te Folafola ʼa te ʼAtua. Ko Esitalasi neʼe ko te tagata faiako feiā.

Tou Ako Mai Te Faʼifaʼitaki ʼo Esitalasi

Ko Esitalasi neʼe ko te pelepitelo ʼo te hōloga ʼo Alone, pea neʼe maʼuli ʼi Papiloni kua hili nei kiai taʼu e 2 500. ʼI te taʼu 468 ʼi muʼa ʼo totatou temi, neʼe ʼalu ki Selusalemi moʼo fakahaʼele ki muʼa te tauhi maʼa ʼi te kau Sutea ʼaē neʼe nonofo ai. (Esitalasi 7:1, 6, 12, 13) Neʼe tonu ke ina akoʼi te Lao ʼa te ʼAtua ki te hahaʼi. Neʼe koteā ʼaē neʼe fai e Esitalasi ke lelei tana faiakonaki? Neʼe ina fai te ʼu fakatuʼutuʼu ʼaoga. ʼE fakamatala te ʼu fakatuʼutuʼu ʼaia ia Esitalasi 7:10:

“Ko Esitalasi [1] neʼe ina teuteuʼi tona loto [2] moʼo vakavakaʼi te lao ʼa Sehova, pea [3] ke ina maʼuliʼi, pea [4] mo akoʼi ʼi Iselaele te pelesepeto pea mo te faitotonu.” Tou vakaʼi takitahi te ʼu koga ʼaia neʼe ina muliʼi pea mo tou vakaʼi ai te ako ʼe tou lava maʼu mai ai.

“Ko Esitalasi Neʼe Ina Teuteuʼi Tona Loto”

Ohage pe ko he tagata gāue kele ʼe ina teuteuʼi muʼa te kele ʼo ina fuli ʼi muʼa ʼo tana to te pulapula, ko Esitalasi ʼaki te faikole neʼe ina teuteuʼi tona loto ke ina tali te folafola ʼa te ʼAtua. (Esitalasi 10:1) Ko tona fakaliliu, neʼe ina ‘fakafalele tona loto’ ki te akonaki ʼa Sehova.—Tāʼaga Lea 2:2.

ʼO toe feiā aipe, ʼe fakahā mai e te Tohi-Tapu ko te Hau ko Sosafate “neʼe ina teuteuʼi [tona] loto ke ina kumi te ʼAtua moʼoni.” (2 Fakamatala 19:3) Kae ʼe ʼui ʼo ʼuhiga mo te taʼiake ʼo Iselaele “ ʼaē neʼe mole ina teuteuʼi tona loto,” ʼe nātou “ ʼuigataʼa pea mo agatuʼu.” (Pesalemo 78:8) Ko Sehova ʼe sio ki “te ʼuhigaʼi tagata fufū ʼo te loto.” (1 Petelo 3:4, MN ) ʼI tona fakahagatonu, “ ʼe ina akoʼi anai ki te kau agavaivai tona ala.” (Pesalemo 25:9) Koia, ʼe maʼuhiga ʼaupito ki te kau faiako ke nātou muliʼi te faʼifaʼitaki ʼa Esitalasi ʼo nātou faikole muʼa ke lelei tonatou loto!

“Moʼo Vakavakaʼi Te Lao ʼa Sehova”

Ke liliu ko he tagata faiako faʼafai, neʼe vakavakaʼi e Esitalasi ia te Folafola ʼa te ʼAtua. Kapau neʼe tonu ke koutou ʼolo ki he tōketā, ʼe mole koa la koutou fakalogo fakalelei anai pea mo koutou faigaʼi ke koutou ʼiloʼi papau pe kua koutou mahino ki te ʼu meʼa fuli ʼaē neʼe ina ʼui atu peʼe fakatotonu atu? ʼE mahino ia ʼe koutou fai fakaleleiʼi anai te koga ʼaia, koteʼuhi ʼe fakalogo kiai tokotou maʼuli. Koia, ʼe tonu ai ke tou tokagaʼi fakalelei te ʼu meʼa ʼaē ʼe palalau mai kiai ia Sehova, peʼe ina fakatotonu mai, ʼaki tana Folafola, ia te Tohi-Tapu, pea ʼaki “te kaugana agatonu mo fakapotopoto.” ʼE tonu ke tou fakalogo ki tana ʼu tokoni, koteʼuhi ʼe fua lelei ki totatou maʼuli! (Mateo 4:4; 24:45-47) ʼE moʼoni, ʼe feala pe ke faihala he tōketā, kae “ko te lao ʼa Sehova ʼe haohaoa.” (Pesalemo 19:7) ʼE mole ʼaoga ia ke tou toe ʼolo ʼo kumi he tahi age tokoni.

ʼE fakahā mai e te ʼu tohi faka Tohi-Tapu ʼo te ʼu Fakamatala (ʼaē neʼe tohi fakatahi e Esitalasi ki he tohi pe e tahi) ko Esitalasi neʼe ko he tagata neʼe ako fakamalotoloto. Moʼo fai ʼo te ʼu tohi ʼaia, neʼe lahi te ʼu tohi neʼe ina fakaʼaogaʼi moʼo fai ʼo tana ʼu kumi.a Ko te kau Sutea, ʼaē neʼe hoki tau mai pe mai Papiloni, neʼe tonu ke nātou ʼiloʼi te hisitolia ʼo tonatou puleʼaga. Neʼe mole nātou mālama lelei ki te ʼu naunau ʼo tanatou lotu, mo te gāue ʼi te fale lotu, pea mo te ʼu gāue ʼa te kau Levite. Koia neʼe maʼuhiga ʼaupito kia nātou ia te ʼu lisi ʼo te ʼu hākoga. Neʼe tokaga ia Esitalasi ki te ʼu meʼa ʼaia. ʼO aʼu ki te haʼu ʼo te Mesia, neʼe tonu ki te kau Sutea ke ʼi ai honatou puleʼaga ʼi tonatou fenua, mo he fale lotu, mo he kau pelepitelo pea mo he kovana. ʼAki te ʼu fakamatala ʼaē neʼe tānaki e Esitalasi, neʼe feala ai he taupau ʼo te logo tahi pea mo te tauhi maʼa.

ʼE tatau koa mo Esitalasi, takotou ʼu agamāhani ʼo ʼuhiga mo te ako? ʼE tokoni atu anai takotou ako fakalelei ʼo te Tohi-Tapu, ke lelei takotou faiakonaki.

Ke “Vakavakaʼi Te Lao ʼa Sehova” e Te Famili

ʼE mole gata pe te vakaʼi ʼo te lao ʼa Sehova ʼaki te ako takitokotahi. Ko te ako faka famili ʼe ko he faigamālie lelei moʼo fakahoko te koga ʼaia.

Ko Jan mo Julia, ko he taumatuʼa ʼi Holani, neʼe nā lautohi leʼo lahi ki tanā ʼu tama e toko lua ʼi te ʼaho fuli talu mai tanā tupu ake. ʼI te temi nei, ko Ivo kua taʼu 15 pea ko Edo kua taʼu 14. Pea, ʼe kei nātou fai pe tanatou ako faka famili ʼo tuʼa tahi ʼi te vāhaʼa. ʼE fakamahino fēnei e Jan: “ ʼE mole ma faigaʼi ke lahi te ʼu meʼa ka mātou vakaʼi lolotoga te ako, kae ke mahino tamā ʼu tama ki te meʼa ʼaē neʼe mātou palalau kiai.” ʼE ina toe ʼui fēnei: “ ʼE lahi te ʼu kumi ʼe nā fai. ʼE nā kumi te ʼu kupuʼi palalau ʼe mole nā ʼiloʼi ʼo feiā mo te ʼu hahaʼi faka Tohi-Tapu ʼaē ʼe mole nā ʼiloʼi—pe ko te temi fea neʼe nātou maʼuʼuli ai, ko ai ia nātou, pea koteā te meʼa neʼe nātou fai, pea mo te tahi atu ʼu meʼa. Talu tanā kua popoto ʼi te lautohi, ʼe nā vakaʼi te ʼu tohi ohage ko te tohi Étude perspicace des Écritures, te ʼu tikisionalio, pea mo te ʼu encyclopédies. ʼE fakatupu fiafia ai ki te ako faka famili. ʼE fakatalitali fakafiafia tuʼumaʼu tamā ʼu tama ki te ako faka famili.” Ko te tahi meʼa fakafiafia, ko te ʼu tamā ʼaia ʼe nā tuʼulaga ʼuluaki ʼi tanā kalasi ako ʼi te poto palalau.

Ko John mo Tini, ko te tahi taumatuʼa mai Holani, neʼe nā ako mo tanā tama ko Esli (ʼaē kua taʼu 24, pea ʼe gāue pionie ʼi te tahi kokelekasio), pea mo tanā taʼahine ko Linda (ʼaē kua taʼu 20 pea kua ʼohoana mo te tēhina). Neʼe mole nā fai pe te ako ʼaki he ʼu fehuʼi pea mo he ʼu tali, kae neʼe nā faka ʼalutahi te ako faka famili ʼo mulimuli ki te taʼu pea mo te ʼu meʼa ʼaē ʼe ʼaoga ki tanā fānau. Neʼe feafeaʼi te faʼahiga ako ʼaē neʼe nā fai?

ʼE fakamahino e John ki tona foha pea mo tona ʼofafine ke nā fili he faʼahiga puani mai te alatike “Te ʼu Fehuʼi ʼa Te Kau Lautohi” (mai Te Tule Leʼo) pea mo te alatike “Dʼaprès la Bible . . . ” (mai te Réveillez-vous !). Ki muli age, neʼe nā fakamatala te meʼa ʼaē neʼe nā teuteuʼi, pea neʼe fakatupu tuʼumaʼu ai he ʼu felogoi fakafiafia ʼi te famili. ʼAki tona fai ʼaia, neʼe faiva ai leva te fānau ʼi te fai ʼo he ʼu kumi pea mo palalau ki te ʼu meʼa ʼaē neʼe nātou maʼu ʼi tanatou ako. ʼE koutou “vakavakaʼi [koa] te lao ʼa Sehova” mo takotou fānau? Ko te potu ʼaia ʼe mole ina hikihiki pe takotou ʼu fealagia ako, kae ʼe toe tokoni ki takotou fānau ke nātou liliu ko he kau faiako lelei.

“Ke Ina Maʼuliʼi”

Neʼe maʼuliʼi e Esitalasi ia te meʼa ʼaē neʼe ina ako. Ohage la, ʼi tana kei nofo ʼi Papiloni, neʼe lagi maʼuli fīmālie. Kae ʼi tana ʼosi mahino ʼe feala hana tokoni ki tana hahaʼi ʼaē ʼe nonofo mamaʼo, neʼe ina līaki te faʼahiga maʼuli fīmālie ʼi Papiloni kae ina tali ke ʼalu ki te kolo ʼo Selusalemi, mo tona ʼu faigataʼaʼia mo te ʼu fihifihia pea mo te ʼu meʼa fakatupu tuʼutāmaki fuli ʼaē ʼe maʼu ai. ʼE mahino mai ia, neʼe mole tānaki fakaʼatamai pe e Esitalasi ia te Tohi-Tapu, kae neʼe ina fai te ʼu gāue ke ʼalutahi mo te ʼu meʼa ʼaē neʼe ina ako.—1 Timoteo 3:13.

Ki muli age, ʼi tana nofo ʼi Selusalemi, neʼe toe fakahā foki e Esitalasi tana maʼuliʼi te meʼa ʼaē neʼe ina ako pea mo ina akoʼi ki te hahaʼi. Neʼe ʼiloga lelei te faʼahi ʼaia ʼi tana logo ʼaē neʼe ʼohoana te kau tagata Iselaele mo te ʼu fafine matāpule. ʼE fakamatala mai e te Tohi-Tapu neʼe ina ‘haeʼi ai tona kofu pea mo tona pulupulu ʼaē ʼe mole hona ʼu nimaʼi kofu, pea neʼe ina fusi tona ʼu fuluʼi ʼulu pea mo tona kava, pea neʼe heka ʼaki he loto punamaʼuli ʼo aʼu ki te afiafi.’ Pea neʼe ‘ufiufi pea mo lotohoha ʼi te fakahaga tona fofoga’ kia Sehova.—Esitalasi 9:1-6.

Neʼe malave ʼaupito kia ia tana ako te lao ʼa te ʼAtua! Neʼe mahino lelei kia Esitalasi te ʼu fua kovi ʼo te talagataʼa ʼa te hahaʼi. Ko te kau Sutea ʼaē neʼe toe liliu ki tonatou fenua neʼe nātou tokosiʼi. Kapau ʼe nātou ʼohoana ki te hahaʼi ʼo tuʼa, pea ʼe feala pe ke nātou fefioʼaki mo te hahaʼi pagani ʼo te ʼu tafaʼaki, pea ʼe feala ia ke pulinoa ai te tauhi maʼa ʼi te kele!

Meʼa lelei foki, he ko te faʼifaʼitaki ʼa Esitalasi ʼi te manavasiʼi pea mo te faiga mālohi, neʼe ina uga te kau Iselaele ke nātou fakatonutonuʼi tanatou ala. Neʼe nātou fakamavae tonatou ʼu ʼohoana matāpule. Hili te ʼu māhina e tolu, neʼe kua fakatonutonuʼi ia meʼa fuli. Neʼe lelei te faiakonaki ʼa Esitalasi ʼuhi ko tana pipiki lelei ki te lao ʼa te ʼAtua.

Ko te meʼa ʼaia ʼe toe moʼoni pe foki ʼi te temi nei. Neʼe ʼui fēnei e te tāmai Kilisitiano: “ ʼE mole mulimuli te fānau ki te ʼu meʼa ʼaē ʼe koutou ʼui age; kae ʼe nātou mulimuli ki te ʼu meʼa ʼaē ʼe koutou fai!” ʼE toe moʼoni te pelesepeto ʼaia ʼi te loto kokelekasio faka Kilisitiano. Ko te kau tagata ʼāfea ʼaē ʼe nātou tuku he faʼifaʼitaki lelei ʼe feala ke nātou ʼamanaki ʼe muliʼi anai tanatou ʼu faiakonaki e te kokelekasio.

Ke “Ina Akoʼi ʼi Iselaele Te Pelesepeto Pea Mo Te Faitotonu”

ʼE ʼi ai te tahi tupuʼaga ʼo te lelei ʼo te faiako ʼa Esitalasi. Neʼe mole ina akoʼi tana ʼu manatu totonu, kae neʼe ina akoʼi “te pelesepeto mo te faitotonu.” Ko tona faka ʼuhiga, neʼe ina akoʼi te lekula peʼe ko te ʼu lao ʼa Sehova. Neʼe ko tona maʼua ʼi tona ʼuhiga pelepitelo. (Malakia 2:7) Neʼe tonu foki ke ina toe akoʼi mo te faitotonu, pea neʼe ina tuku he faʼifaʼitaki ʼo ʼuhiga mo te meʼa ʼaē ʼe ina akoʼi, ʼo pipiki maʼu pea mo pipiki fakalelei ki te ʼu meʼa ʼaē ʼe totonu. Ka fakahā e te kau takitaki ia te faitotonu, pea ʼe nofo mālohi te kokelekasio pea ʼe maʼu ai mo te ʼu fua tologa. (Tāʼaga Lea 29:4) ʼO toe feiā aipe, ko te kau tagata ʼāfea, te ʼu mātuʼa, mo te kau fai faka mafola ʼo te Puleʼaga ʼaē ʼe mālama lelei ki te Folafola ʼa te ʼAtua, ʼe nātou lagalaga anai te mālohi ʼi te faʼahi fakalaumālie, mokā nātou akoʼi te ʼu pelesepeto pea mo te faitotonu ʼa Sehova ki te kokelekasio, ki tonatou ʼu famili, pea mo nātou ʼaē ʼe nātou fia logo.

ʼE koutou ʼio koa ki te ʼui ʼaē ʼe feala ke lelei age takotou faiako mo kapau ʼe koutou muliʼi katoa te faʼifaʼitaki ʼa te tagata agatonu ko Esitalasi? Koia, ‘koutou teuteuʼi tokotou loto moʼo vakavakaʼi te lao ʼa Sehova, pea mo koutou maʼuliʼi, pea mo koutou akoʼi te pelesepeto pea mo te faitotonu ʼa Sehova.’—Esitalasi 7:10.

[Kiʼi nota]

[Talanoa ʼo te pasina 22]

KOTEĀ ʼAĒ NEʼE LELEI AI TE FAIAKONAKI ʼA ESITALASI?

1. Neʼe ina teuteuʼi fakalelei tona loto

2. Neʼe ina vakaʼi te Lao ʼa Sehova

3. Neʼe ina tuku he faʼifaʼitaki lelei ʼo maʼuliʼi te ʼu meʼa ʼaē neʼe ina ako

4. Neʼe ina faigaʼi mālohi ke ina akoʼi te manatu faka Tohi-Tapu