Te ʼu Manatu Hala ʼa Te Mālama ʼo ʼUhiga Mo Te Agatonu

ʼI TE afiafi vevela ʼo te tahi Feliaono ʼi Tel Aviv, ʼi Iselaele, ko te kiʼi tūpulaga neʼe fakatalitali fakatahi mo te tahi kau tūpulaga ʼi tuʼa ʼo te fale meʼe. Mole fualoa pea pā te foʼi pulu ʼi te lotolotoiga ʼo te kaugamālie.

Ko te tagata neʼe ina fakapā ia ia totonu mo te foʼi pulu pea neʼe mamate ai te toko 19 tūpulaga. Neʼe ʼui fēnei e te tagata tōketā ki te hahaʼi fai sulunale: “Ko taku hoki sio ʼaē ki te meʼa fakalialia feiā, neʼe leta haʼele te ʼu sino mate ʼo te kau tūpulaga.”

ʼI te sulunale The Lancet, neʼe tohi fēnei e Thurstan Brewin: “ ʼE maʼuhiga ki te hahaʼi te ʼu kalitate ohage ko te agatonu . . . , pea ko te taʼi agatonu ʼaia ʼe feala ke kamata ai he ʼu tau pea ke faigataʼa hona fakaʼosi.” Ei, mai te ʼu Tau ʼo te Keletiate ʼo aʼu ki te ʼu fakapō ʼaē neʼe fai e te kau Nasi ʼi Siamani, neʼe lahi te ligi toto ʼi te hisitolia ʼo te tagata ʼuhi ko te ʼu fakapō ʼaē neʼe fai e te hahaʼi ʼi tanatou fia agatonu.

Kua Kaugamālie Te Hahaʼi Heʼe Agatonu

ʼE mahino ia ko he agatonu fakavale ʼe feala ke fakatupu kovi, kae ʼe toe feala pe foki ke tokakovi he sosiete mo kapau ʼe mole agatonu te hahaʼi. ʼE ʼui e te Webster’s New Encyclopedic Dictionary, ko te agatonu ko tona faka ʼuhiga ‘ ʼe tou lagolago ki he tahi peʼe ki he manatu,’ pea “ko hakita fakapapau mālohi ʼe mole kita līaki anai peʼe kita kākāʼi he tahi.” Ko te tokolahi ʼe nātou vikiʼi te taʼi agatonu ʼaia, kae ʼe mole maʼu ʼi te malamanei ia te agatonu moʼoni—ʼi te maʼuli faka famili. Neʼe tuputupu vave pea mo mafola vave te ʼu mavete ʼohoana ʼuhi ko te tokaga fau ʼa te hahaʼi kia nātou totonu, mo te ʼu hoha ʼo te ʼaho fuli, pea mo te maʼuli feʼauʼaki ʼa he tahi ʼi te taumatuʼa. Pea ohage ko te hahaʼi ʼaē neʼe mamate ʼi te foʼi pulu ʼaē neʼe pā ʼi Tel Aviv, ʼi te agamāhani ko nātou ʼaē ʼe mamate ʼe ko te kau tūpulaga neʼe mole nātou fai he meʼa ʼe kovi.

ʼE ʼui fēnei e te sulunale: “Ko te akoʼi ʼo te fānau ʼe ko te tahi ʼaia tupuʼaga ʼo he maʼuli faka famili ʼe tokakovi ʼuhi ko te mavete ʼa he taumatuʼa, mo hanā tahi nofo, pea mo he taupau tokotahi ʼa te fānau, e te tāmai peʼe ko te faʼe.” Ko te ʼu kiʼi tamaliki tagata ʼaē ʼe taupau tokotahi e te faʼe, ʼe ko nātou tāfito ʼaē ʼe faigataʼa tonatou akoʼi, ʼe nātou fia fakamate, pea mo nātou māmio kovi. ʼI te taʼu fuli, ʼi Amelika ko te ʼu tamaliki e tahi miliona ʼe mavete tanatou ʼu mātuʼa, pea ʼi te tahi taʼu, ʼe feala anai ʼi te fenua ʼaia ki te vaelua ʼo te tamaliki fuli ʼaē neʼe tutupu ake ka kei nonofo fakatahi tanatou ʼu mātuʼa, ke nātou sio ʼi tonatou taʼu 18 ʼe mavete tanatou ʼu mātuʼa. ʼAki te ʼu sivi ʼaē ʼe fai, ʼe hā mai ʼe kovi ʼaupito anai te ka haʼu ʼo te kau tūpulaga e tokolahi ʼi te tahi ʼu fenua.

ʼE Faigataʼa Koa Te Taupau ʼo Te Agatonu?

ʼI te kua meʼa noaʼi ʼo te nofo agatonu, ʼe feala ke tou ʼui ʼe moʼoni te ʼu palalau ʼaenī ʼa te Hau ko Tavite: “Hāofaki ʼau, Ê Sehova, heʼe kua ʼosi te maʼuli ʼo te tagata agatonu; heʼe kua puli te hahaʼi agatonu ʼi te ʼu foha ʼo te tagata.” (Pesalemo 12:1) He koʼe ʼe mafola lahi te heʼe agatonu? ʼI te nusipepa Time ʼe ʼui fēnei e Roger Rosenblatt: “Logola ko te agatonu ʼe ko he lekula ʼe maʼuhiga, kae ʼe faigataʼa tona taupau heʼe kei lahi fau te mataku, te lotolotolua, pea mo te manatu pe ʼaē kia kita pea mo te ʼu holi ʼi totatou ʼuhiga agahala.” ʼO ʼuhiga mo te temi ʼaenī, ʼe ʼui fakalelei fēnei e te Tohi-Tapu: “E liliu anai te hahai o tahi ofa pe kia te ia, . . . o heeʼofa, o loto fefeka.”—2 Timoteo 3:1-5.

Ka tou fakatokagaʼi te gāue mālohi ʼo te taʼi agatonu ʼaia peʼe ko tana mole gāue ʼi te fakakaukau pea mo te ʼu aga ʼa he tahi, ʼe feala pe ke tou fai te fehuʼi ʼaenī: ‘Ko ai koa ʼaē ʼe tau mo feʼauga ke tou nofo agatonu ki ai?’ Tou vakaʼi te tali ki te fehuʼi ʼaia ʼi te alatike ʼaē ʼe hoa mai.

[Haʼuʼaga ʼo te paki pasina 3]

Photo above: © AFP/CORBIS