“Koutou Fakaovi Ki Te Atua”
“Koutou fakaovi ki te Atua pea e fakaovi atu anai kia koutou.”—Sakopo 4:8.
1, 2. (a) Koteā ʼaē ʼe ʼui e te hahaʼi ʼe tou logo māhani kiai? (b) Koteā te tokoni neʼe foaki e Sakopo, pea he koʼe neʼe ʼaoga te tokoni ʼaia?
“KO TE ʼAtua ʼe nofo mo tatou.” Neʼe tohi te ʼu palalau ʼaia ʼi te ʼu fuka ʼo te ʼu puleʼaga ʼo toe feiā mo te ʼu teu ʼo te kau solia. Neʼe tohi ʼi te ʼu foʼi piesi pea mo te ʼu paʼaga ʼo te temi nei te ʼu kupusiga palalau “ ʼE mātou falala ki te ʼAtua.” ʼE ko he meʼa māhani hatatou logo ʼe ʼui e te hahaʼi ʼe nātou felogoi lelei mo te ʼAtua. Kae ʼe lagi koutou fakamoʼoni anai ka tou fia maʼu te taʼi felogoi ʼaia ʼe mole gata ʼaki pe te ʼu palalau peʼe ke tohi he ʼu meʼa ke feala ke sio kiai niʼihi.
2 ʼE fakahā e te Tohi-Tapu ʼe feala ke tou felogoi mo te ʼAtua. Kae ʼe fakamaʼua kiai te ʼu faiga. Ohage pe ko ʼihi Kilisitiano fakanofo ʼo te ʼuluaki sēkulō neʼe ʼaoga ke nātou fakaloto mālohiʼi tanatou ʼu felogoi mo Sehova ʼAtua. Ko te Kilisitiano taupau ko Sakopo neʼe ina fakatokagaʼi ʼihi Kilisitiano ʼo ʼuhiga mo te ʼu holi ʼo tonatou kakano pea mo te puli ʼo tonatou maʼa fakalaumālie. ʼI tana tokoni ʼaia, neʼe ina foaki ai te tokoni fakaloto mālohi ʼaenī: “Koutou fakaovi ki te Atua pea e fakaovi atu anai kia koutou.” (Sakopo 4:1-12) Neʼe faka ʼuhiga feafeaʼi e Sakopo te ʼui ʼaē ke “fakaovi”?
3, 4. (a) Neʼe koteā ʼaē neʼe fakamanatuʼi ki ʼihi ʼi te ʼuluaki sēkulō ʼi tanatou lau te tohi ʼa Sakopo ʼaki te kupusiga palalau ʼaenī ke “koutou fakaovi ki te Atua”? (b) He koʼe ʼe tou ʼiloʼi papau ʼe tou lava fakaōvi ki te ʼAtua?
3 Neʼe fakaʼaogaʼi e Sakopo te kupusiga palalau neʼe māhani kiai te tokolahi ʼaē neʼe nātou lau tana tohi. Ko te Lao ʼa Moisese neʼe ina foaki te ʼu fakatotonu makehe ki te kau pelepitelo ʼo ʼuhiga mo tanatou “fakaōvi” kia Sehova maʼa te hahaʼi. (Ekesote 19:22) Koia neʼe fakamanatuʼi ai kia nātou ʼaē ʼe nātou lau te tohi ʼa Sakopo, ʼe mole tonu ke nātou meʼa noaʼi tanatou fakaōvi kia Sehova. Ko Sehova ʼe māʼoluga tokotahi ʼi te ʼatulaulau.
4 Tahi ʼaē meʼa, ohage ko tona ʼui e te tagata sivi Tohi-Tapu, “ko te tokoni [ia Sakopo 4:8] ʼe ina fakahā te manatu maʼuhiga.” Neʼe ʼiloʼi e Sakopo ko Sehova neʼe ina fakaafe tuʼumaʼu te hahaʼi heʼe haohaoa ke nātou fakaōvi age kia te Ia. (2 Fakamatala 15:2) Ko te sakilifisio ʼa Sesu neʼe ina avahi te ala ʼaē ke tou fakaōvi ai ki te ʼAtua. (Efeso 3:11, 12) Ia ʼaho nei, ko te ala moʼo fakaōvi ki te ʼAtua kua avahi ki te toko miliona hahaʼi! Koteā ʼaē ʼe tou lava fai moʼo fakaʼaogaʼi te faigamālie taulekaleka ʼaia? ʼE tou vakaʼi fakanounou anai te ʼu puani e tolu ʼe feala ai ke tou fakaōvi kia Sehova ʼAtua.
Koutou Haga “Ako Te ʼIloʼi” ʼo Te ʼAtua
5, 6. ʼE fakatā feafeaʼi e te faʼifaʼitaki ʼo te tūpulaga ko Samuele te faka ʼuhiga ʼo te ʼui ʼaē ke “ako te ʼiloʼi” ʼo te ʼAtua?
5 Ia Soane 17:3, MN, neʼe ʼui fēnei e Sesu: “Ko te faka ʼuhiga ʼaenī ʼo te maʼuli heʼegata, ke nātou ako te ʼiloʼi ʼo koe, te ʼAtua moʼoni pe ʼaē e tahi, pea mo ia ʼaē neʼe ke fekauʼi mai, ia Sesu Kilisito.” Koteā ʼaē neʼe fia ʼui e Sesu ʼi tana palalau ʼaē ‘ke nātou ako te ʼiloʼi’ ʼo te ʼAtua? ʼE ʼui e te tokolahi ʼo te kau popoto ʼe maʼuhiga age te kupu ʼaē neʼe fakaʼaogaʼi mai te lea faka Keleka—ʼe ko he gāue ʼe fai hoholo, ʼo feala ke iku ki he ʼu felogoiʼaki lelei ʼa niʼihi.
6 Ko te ako ke ʼiloʼi lelei te ʼAtua neʼe mole ko he manatu foʼou ʼi te temi ʼo Sesu. Ohage la, ʼi te ʼu Tohi Faka Hepeleo, ʼe tou lau ʼi te kei veliveli ʼa Samuele, neʼe “mole heʼeki ina ako ke ina ʼiloʼi Sehova.” (1 Samuele 3:7) Ko tona faka ʼuhiga koa neʼe ʼiloʼi veliveli pe e Samuele tona ʼAtua? Kailoa. ʼE mahino papau ia, neʼe kua lahi te ʼu meʼa neʼe kua akoʼi age e tana ʼu mātuʼa pea mo te kau pelepitelo. Kae ʼi te manatu ʼa te tagata fai Tohi-Tapu ko te kupu faka Hepeleo ʼaē neʼe fakaʼaogaʼi ʼi te vaega ʼaia neʼe lagi “fakaʼaogaʼi moʼo faka maʼuhigaʼi he felogoi ʼe lahi age.” Neʼe mole heʼeki ako e Samuele ke ina ʼiloʼi lelei ia Sehova, ohage ko tana ʼiloʼi ia ia ki muli age ʼi tana liliu ko te tagata fakahoko palalau ʼa Sehova. ʼI te lahilahi ake ʼa Samuele, neʼe ina ako lelei ai ke ina ʼiloʼi ia Sehova, ʼo ina maʼu ai te ʼu felogoi lelei mo ia.—1 Samuele 3:19, 20.
7, 8. (a) He koʼe ʼe mole tonu ke tou lotovaivai ʼi te ako ʼo te ʼu akonaki faka Tohi-Tapu ʼe loloto age? (b) Koteā te tahi ʼu moʼoni loloto ʼo te Folafola ʼa te ʼAtua ʼe lelei anai ke tou ako?
7 ʼE koutou lolotoga ako koa ke koutou ʼiloʼi ia Sehova ke feala ai hakotou felogoi lelei mo ia? Kapau ʼe koutou fai te faʼahi ʼaia, ʼe tonu ke koutou “holi mālohi” ki te meʼa kai fakalaumālie ʼaē ʼe foaki atu e te ʼAtua. (1 Petelo 2:2, MN ) ʼAua naʼa koutou faka tuʼakoi takotou ako ʼaki pe te ʼu ʼuluaki akonaki faka Tohi-Tapu. Koutou faiga ke koutou ako he tahi age ʼu akonaki faka Tohi-Tapu ʼe loloto age. (Hepeleo 5:12-14) ʼE koutou lotovaivai koa ʼi te fai ʼo he ʼu kumi ki te ʼu akonaki ʼaia heʼe ʼi takotou manatu ʼe faigataʼa fau? Kapau koia, koutou manatuʼi ko Sehova ʼe ko te “Faiako Lahi.” (Isaia 30:20) ʼE ina ʼiloʼi peʼe feafeaʼi te foaki ʼo te ʼu moʼoni loloto ki te ʼatamai ʼo te ʼu hahaʼi heʼe haohaoa. Pea ʼe ina lava tapuakina takotou ʼu faiga fakamalotoloto ʼaē ke koutou mahino ki te ʼu meʼa ʼaē ʼe ina lolotoga akoʼi atu.—Pesalemo 25:4.
8 He koʼe ʼe mole koutou vakaʼi e koutou totonu he ʼu akonaki ʼi “[te ʼu] mea loloto o te Atua”? (1 Kolonito 2:10) Ko te ʼu meʼa ʼaia ʼe ʼaoga heʼe mole tatau mo te ʼu akonaki noa ʼaē ʼe fihi kiai te kau teolosia pea mo te kau takitaki lotu. ʼE maʼuli te ʼu akonaki ʼaia heʼe feala ai ke tou ako te ʼu meʼa maʼuhiga ʼo ʼuhiga mo te ʼatamai pea mo te loto ʼo tatatou Tāmai ʼofa. Ohage la, ko te totogi, te “meʼa fakalilo tapu,” pea mo te ʼu fuakava kehekehe ʼaē neʼe fakaʼaogaʼi e Sehova moʼo tapuakinaʼi tana hahaʼi pea mo fakahoko ai tana ʼu fakatuʼutuʼu—ko te ʼu akonaki ʼaia pea mo ʼihi age ʼe nātou lelei pea mo ʼaoga ki tatatou ʼu kumi pea mo tatatou ako takitokotahi.—1 Kolonito 2:7, MN.
9, 10. (a) He koʼe ʼe fakatupu tuʼutāmaki te fialahi, pea koteā ʼaē ka tokoni mai anai kia tatou ke tou tekeʼi te aga ʼaia? (b) Ka tou maʼu te ʼatamai mālama ʼo ʼuhiga mo Sehova, he koʼe ʼe tonu ke tou faiga ke tou agavaivai?
9 Koutou tokakaga ʼi takotou tuputupu ʼi te ʼatamai ki te ʼu moʼoni loloto fakalaumālie, ʼe feala ke tupu ia koutou—te fialahi. (1 Kolonito 8:1) ʼE fakatupu tuʼutāmaki te fialahi, heʼe ina fakamamaʼo te hahaʼi mai te ʼAtua. (Tāʼaga Lea 16:5; Sakopo 4:6) Koutou manatuʼi, ʼe mole tonu ke fia hā he tahi ʼuhi ko te ʼatamai mālama ʼaē ʼe ina maʼu. Moʼo fakatā te faʼahi ʼaia, koutou fakatokagaʼi te ʼu ʼuluaki palalau ʼo te tohi ʼe ina vikiʼi te ʼu kumi fakapotopoto ʼe mole heʼeki faʼa fualoa tona fai ʼa te malamanei: “ ʼI te lahi ʼo te ʼu meʼa ʼaē ʼe tou ako ke tou ʼiloʼi, pea ʼe tou mahino ai te mole heʼeki lahi ʼo te ʼu meʼa ʼaē kua tou mahino kiai. . . . Ko meʼa fuli neʼe tou ako ʼe mole honatou ʼuhiga mokā ʼe fakatatau ki te ʼu meʼa ʼaē ʼe kei toe ke tou ako.” ʼE lelei te taʼi fakasiosio agavaivai ʼaia. E feafeaʼi leva ʼo ʼuhiga mo te ʼatamai mālama lahi ʼaupito—te ʼatamai mālama ʼo ʼuhiga mo Sehova ʼAtua—ʼaē ʼe ʼaoga tāfito ai ke tou agavaivai. Koteā tona tupuʼaga?
10 Koutou fakatokagaʼi te tahi ʼu fakamatala faka Tohi-Tapu ʼo ʼuhiga mo Sehova. “ ʼE loloto ʼaupito tau ʼu manatu.” (Pesalemo 92:5) “Ko [te] ʼatamai [ʼo Sehova] ʼe mole he maʼu kiai.” (Pesalemo 147:5) “ ʼE mole feala ia ke ʼiloʼi [te] ʼatamai [ʼo Sehova].” (Isaia 40:28) “Oiau! ko te loloto o te koloa mo te poto pea mo te malama o te Atua!” (Loma 11:33) ʼE mahino ia, ʼe mole tou ʼiloʼi anai te ʼu meʼa fuli ʼaē ʼe tonu ke tou ʼiloʼi ʼo ʼuhiga mo Sehova. (Tagata Tānaki 3:11) ʼE lahi te ʼu meʼa taulekaleka ʼe ina akoʼi mai kia tatou, pea kei lahi te ʼu tuʼuga meʼa ke tou ako ʼo ʼuhiga mo te ʼatamai mālama. ʼE tou maʼu koa te fakatuʼutuʼu ʼaia ʼe taulekaleka pea mole faigataʼa kia tatou? Ka tou ako, tou fakaʼaogaʼi tuʼumaʼu totatou ʼatamai mālama moʼo fakaōvi kia Sehova pea mo tokoni ki niʼihi—kae ʼaua naʼa tou fakaʼaogaʼi moʼo fakavikiviki ʼo tatou totonu.—Mateo 23:12; Luka 9:48.
Koutou Fakahā Tokotou ʼOfa ʼAē Kia Sehova
11, 12. (a) ʼE tonu ke malave feafeaʼi kia tatou te ʼatamai mālama ʼaē ʼe tou ako ʼo ʼuhiga mo Sehova? (b) Koteā ʼaē ʼe tou ʼiloʼi ai ʼe ʼofa moʼoni he tahi ki te ʼAtua?
11 ʼE tautonu, ia te fakapipiki e te ʼapositolo ko Paulo ia te ʼatamai pea mo te ʼofa. Neʼe ina tohi fēnei: “ ʼE ʼau haga faikole ʼo ʼuhiga mo te potu ʼaenī ʼi ʼaku ʼu faikole: ke ʼāsili tuputupu aipe tokotou ʼofa ʼi he ʼatamai mālama totonu pea mo he fakasiosio totonu ʼe katoa.” (Filipe 1:9, MN ) ʼO mole hage ia ko te fialahi, ko te ʼu moʼoni fuli ʼaē ʼe tou ako ʼo ʼuhiga mo Sehova pea mo tana ʼu fakatuʼutuʼu ʼe tonu ke nātou fakatuputupu totatou ʼofa ki tatatou Tāmai ʼaē ʼe ʼi selo.
12 ʼIo, tokolahi te hahaʼi ʼe nātou ʼui ʼe nātou ʼofa ki te ʼAtua kae mole ko te moʼoni. ʼE lagi nātou fakamalotoloto ʼuhi ko te ʼu manatu mālohi ʼi ʼonatou ʼu loto. ʼE lelei te ʼu taʼi manatu ʼaia pea mo ʼaoga mo kapau ʼe ʼalutahi mo te ʼatamai mālama totonu. Kae ko te ʼu manatu ʼaia ʼe mole tatau mo te ʼofa moʼoni ʼaē ki te ʼAtua. He koʼe ʼe mole ko te ʼofa moʼoni ʼaia? Koutou fakatokagaʼi peʼe faka ʼuhiga feafeaʼi e te Folafola ʼa te ʼAtua ia te ʼofa ʼaia: “Ko te ofa aeni o te Atua: ke tou taupau tana u fekau, pea e mole mamafa tana u fekau.” (1 Soane 5:3) Koia ko te ʼofa kia Sehova ʼe moʼoni mo kapau ʼe fakahā ʼaki he ʼu gāue fakalogo.
13. ʼE tokoni feafeaʼi mai anai te manavasiʼi faka lotu ke tou fakahā totatou ʼofa kia Sehova?
13 ʼE tokoni anai kia tatou ia te manavasiʼi faka lotu ke tou fakalogo kia Sehova. ʼE tou manavahe lahi pea mo fakaʼapaʼapa lahi kia Sehova ʼuhi ko tatatou ako ke tou ʼiloʼi ia ia, pea mo tatatou ako tona maʼoniʼoni heʼegata, tona kolōlia, tona mālohi, tana faitotonu, tona poto, pea mo tona ʼofa. ʼE maʼuhiga te taʼi manavasiʼi ʼaia moʼo fakaōvi kia te ia. Koutou fakatokagaʼi pe koteā ʼaē ʼe ʼui ia Pesalemo 25:14: “ ʼE kaumeʼa Sehova mo nātou ʼaē ʼe manavasiʼi kia te ia.” Koia kapau ʼe tou manavasiʼi naʼa tou fai he meʼa ʼe kovi ki tatatou Tāmai ʼofaina ʼaē ʼe ʼi selo, ʼe feala ke tou fakaōvi kia te ia. ʼE tokoni mai anai kia tatou ia te manavasiʼi faka lotu ke tou tokagaʼi te tokoni poto ʼaē ia Tāʼaga Lea 3:6: “ ʼI tou ʼu ala fuli tokagaʼi ia ia, pea ko ia, ʼe ina fakatonutonuʼi anai tou ʼu ala foufou.” Koteā tona faka ʼuhiga?
14, 15. (a) Koteā la he ʼu tonu ʼe tou fai ʼi te ʼaho fuli? (b) ʼE tou lava fakahā feafeaʼi ʼaki te ʼu tonu ʼaē ʼe tou fai ʼe tou manavasiʼi faka lotu?
14 ʼI te ʼaho fuli ʼe tonu ke koutou fai te ʼu tonu, te ʼu tonu ʼe maʼuhiga pea mo ʼihi ʼe mole faʼa maʼuhiga. Ohage la, e feafeaʼi anai takotou ʼu fai palalau mo tokotou ʼu kaugā gāue, tokotou ʼu kaugā ako, tokotou ʼu vāhaʼa fale? (Luka 6:45) ʼE koutou fai fakalelei anai te gāue ʼaē ʼe foaki atu, peʼe koutou fakataviliʼi anai kehe pe ke ʼosi? (Kolose 3:23) ʼE lahi anai koa takotou fakakaugā ki te hahaʼi ʼaē ʼe mole nātou faʼa ʼofa kia Sehova peʼe mole nātou ʼoʼofa tuʼa tahi kia te ia, peʼe koutou faiga anai ke koutou fakamālohiʼi takotou ʼu felogoi mo te hahaʼi ʼaē ʼe mālolohi ʼi te faʼahi fakalaumālie? (Tāʼaga Lea 13:20) Koteā anai ka koutou fai, māʼiape la ʼi te ʼu kiʼi ʼaluʼaga veliveli, moʼo fakahaʼele ki muʼa te ʼu gāue ʼo te Puleʼaga ʼo te ʼAtua? (Mateo 6:33) Kapau ko te ʼu pelesepeto feiā ʼaē ʼe nātou takitaki takotou ʼu tonu ʼi te ʼaho fuli, pea ʼe koutou lolotoga tokagaʼi ia Sehova “ ʼi [tokotou] ʼu ala fuli.”
15 ʼIo ʼi te ʼu tonu fuli ʼaē ʼe tou fai, ʼe tonu ke takitaki tatou e te manatu ʼaenī: ‘Koteā anai te meʼa ʼe loto e Sehova ke ʼau fai? Koteā ʼapē te meʼa ʼe ina leleiʼia anai?’ (Tāʼaga Lea 27:11) Ko te taʼi manavasiʼi faka lotu ʼaia ʼe ko he ʼaluʼaga lelei moʼo fakahā totatou ʼofa kia Sehova. ʼE uga anai tatou e te manavasiʼi faka lotu ke tou aga maʼa—ʼi te faʼahi fakalaumālie, ʼi te aga ʼaē ʼe tonu ke tou fai, pea mo te faʼahi fakasino. Koutou manatuʼi, ʼi te vaega pe ʼaia ʼaē ʼe fakaloto mālohiʼi ai e Sakopo te kau Kilisitiano “[ke nātou] fakaovi ki te Atua,” ʼe ina toe ʼui fēnei ai: “Koutou fufulu outou nima hahai agahala, pea koutou fakamaʼa outou loto hahai lotolotolua.”—Sakopo 4:8.
16. Ka tou foaki kia Sehova, koteā te meʼa ʼe mole tou lava fakahoko, kae koteā te meʼa ʼe tou lava fai fakalelei tuʼumaʼu?
16 ʼE mahino ia, ko totatou ʼofa ʼaē kia Sehova ʼe mole gata pe ʼi tatatou mole fai ia te meʼa ʼaē ʼe kovi. Ko te ʼofa ʼe ina toe uga tatou ke tou fai te meʼa ʼaē ʼe lelei. Ohage la, ʼe tou tali feafeaʼi ki te toe manavaʼofa lahi ʼo Sehova? Neʼe tohi fēnei e Sakopo: “Ko te faiofa taulekaleka fuape mo meaofa lelei fuape e fakahifo mai oluga, mai te Tamai o te u malama.” (Sakopo 1:17) ʼI tona fakahagatonu, ka tou foaki kia Sehova totatou ʼu koloā, ʼe mole tou faka koloaʼia ia ia. Kua ina maʼu te ʼu lelei pea mo te ʼu koloā fuli. (Pesalemo 50:12) Pea ka tou foaki kia Sehova totatou temi pea mo totatou mālohi, ʼe mole tou fakakatoa he meʼa ʼe mole heʼeki ina maʼu. Māʼiape la mo kapau ʼe mole tou fia faka mafola te logo lelei ʼo te Puleʼaga ʼo te ʼAtua, ʼe ina lava uga te ʼu maka ke nātou kalaga! Kae he koʼe koa ʼe tou foaki kia Sehova totatou ʼu koloā, totatou temi, pea mo totatou mālohi? ʼUluaki, ʼe tou fai te faʼahi ʼaia heʼe tou ʼofa kia te ia ʼaki totatou loto katoa, totatou nefesi katoa, totatou laumālie katoa, pea mo totatou mālohi katoa.—Maleko 12:29, 30.
17. Koteā ʼaē ʼe ina lava uga tatou ke tou foaki fakafiafia kia Sehova?
17 Ka tou foaki kia Sehova, ʼe tonu ke tou fai fakafiafia te faʼahi ʼaia, “koteuhi e ofa te Atua kia ia ae e ina foaki fakafiafia.” (2 Kolonito 9:7) Ko te pelesepeto ʼaē ʼe tuʼu ia Teutalonome 16:17 ʼe lava tokoni kia tatou ke tou foaki fakafiafia: “ ʼE tonu ke tahi foaki te meʼa ʼofa ʼo mulimuli ki te tapuakina ʼa Sehova tou ʼAtua ʼaē neʼe ina foaki atu.” Ka tou sio ki te manavaʼofa ʼo Sehova ʼaē kia tatou, ʼe tou logoʼi ʼe tou fia foaki fakafiafia kia te ia. ʼE tou fakafiafia tona loto mokā tou foaki feiā, ohage pe ko he kiʼi meʼa ʼofa ʼa he tamasiʼi ʼofaina ʼe fakafiafia ki tana ʼu mātuʼa. Ko tatatou fakahā feiā ʼo totatou ʼofa ʼe tokoni mai anai ke tou fakaōvi kia Sehova.
Tou Fakatuputupu Tatatou Felogoi ʼAki Te Faikole
18. He koʼe ʼe tonu ke tou fakakaukauʼi peʼe feafeaʼi hatatou hikihiki ia te lelei ʼo tatatou ʼu faikole?
18 Ko tatatou ʼu faikole takitokotahi ʼe ko he ʼu temi maʼuhiga ʼaia—ʼe ko he ʼu fealagia, ke tou fai palalau ʼāteaina pea mo fakahagatonu mo tatatou Tāmai ʼaē ʼe ʼi selo. (Filipe 4:6) ʼUhi he ko te faikole ʼe ko he ʼaluʼaga maʼuhiga ʼo tatatou fakaōvi ki te ʼAtua, ʼe tonu ke tou tuʼu pea mo fakakaukauʼi te lelei ʼo tatatou ʼu faikole. ʼE mole ʼui leva ke makehe feafeaʼi tatatou ʼu palalau, kae ʼe tonu ke fakamalotoloto tatatou ʼu palalau pea ke haʼu mai totatou loto. ʼE tou lava hikihiki feafeaʼi te lelei ʼo tatatou ʼu faikole?
19, 20. He koʼe ʼe tonu ke tou metitasio ʼi muʼa ʼo tatatou faikole, pea koteā te ʼu meʼa lelei ʼe ʼaoga ke tou metitasioʼi?
19 ʼI muʼa ʼo tatatou faikole ʼe lagi tou faigaʼi muʼa ke tou metitasio. Kapau ʼe tou metitasio ʼi muʼa ʼo hakita faikole, ʼe feala ke maʼuhiga pea mo lelei tatatou ʼu faikole, pea ʼe mole tou lau liuliuga anai he ʼu palalau kua tou māhani kiai. (Tāʼaga Lea 15:28, 29) ʼE lagi feala ke tou fakakaukauʼi te ʼu kupu tāfito neʼe talanoa kiai Sesu ʼi tana faikole faʼifaʼitaki pea mo vakaʼi pe feafeaʼi hona fakapipiki ki totatou ʼu ʼaluʼaga heʼe feala ke tokoni kia tatou. (Mateo 6:9-13) Ohage la, ʼe feala ke tou feʼekeʼaki pe koteā te kiʼi koga ʼe tou fakaʼamu ke tou ʼaoga kiai ʼi tatatou fai ia te finegalo ʼo Sehova ʼi te kele. ʼE tou fakahā koa kia Sehova tatatou fakaʼamu ʼaē ke ina fakaʼaogaʼi lahi tatou pea mo kole tana tokoni moʼo fakahoko te ʼu maʼua kehekehe ʼaē neʼe ina foaki mai kia tatou? ʼE tou mafasia koa ʼi ni ʼu tuʼania ʼo ʼuhiga mo he ʼu meʼa fakasino ʼe ʼaoga kia tatou? Koteā tatatou ʼu agahala ʼe tonu ke fakamolemoleʼi, pea ko ai koa ʼaē ʼe tonu ke tou fakamolemole ki ai? Koteā te ʼu fakahala ʼe tau mo tatou, pea ʼe mahino koa kia tatou ʼe foimo ʼaoga kia tatou ʼi te faʼahi ʼaia te puipui ʼa Sehova?
20 Tahi ʼaē meʼa, ʼe tou lava manatuʼi te hahaʼi ʼaē ʼe tou ʼiloʼi ʼe ʼaoga tāfito kia nātou te tokoni ʼa Sehova. (2 Kolonito 1:11) Kae ʼaua naʼa galo ia tatou ke tou fakafetaʼi ki te faʼahi ʼaia. Kapau ʼe tou tuʼu pea mo fakakaukauʼi te faʼahi ʼaia, ʼe mahino papau ia ʼe lahi te ʼu tupuʼaga ke tou fakafetaʼi ai kia Sehova pea mo fakavikiviki kia te ia ʼi te ʼaho fuli ʼo ʼuhiga mo tona loto ʼofa lahi. (Teutalonome 8:10; Luka 10:21) Ka tou fai te faʼahi ʼaia ʼe tou toe maʼu te tahi tapuakina—ʼe lava tokoni mai kia tatou ke tou lotomālohi pea mo loto fakafetaʼi ʼo ʼuhiga mo te maʼuli.
21. Koteā te ʼu faʼifaʼitaki faka Tohi-Tapu ʼe tou lava ako pea ʼe tokoni mai anai mokā ʼe tou fakaōvi kia Sehova ʼi te faikole?
21 Ko tatatou ako ʼe toe lava tokoni ki tatatou ʼu faikole. ʼE tou maʼu ʼi te Folafola ʼa te ʼAtua te ʼu faikole maʼuhiga ʼa te ʼu tagata agatonu pea mo te ʼu fafine agatonu. Ohage la, kapau ʼe tou tau mo he fihifihia faigataʼa, pea ʼe ina fakatupu ia tatou he ʼu lotohoha pea mo tou matataku ʼo ʼuhiga mo totatou maʼuli fīmālie peʼe ko nātou ʼaē ʼe tou ʼoʼofa ai, ʼe tou lava lau te faikole ʼa Sakopo ʼi tana ʼamanaki fetaulaki mo tona taʼokete lagavaka ko Esau. (Senesi 32:9-12) Peʼe tou lava ako te faikole neʼe fai e te Hau ko Asa ʼi te temi ʼaē neʼe ʼamanaki ʼohofiʼi ai te hahaʼi ʼa te ʼAtua e te foʼi kautau e toko tahi miliona kau Etiopea. (2 Fakamatala 14:11, 12) Kapau ʼe tou hoha ʼuhi ko he fihifihia ʼe ina lava fakalainoaʼi te ʼuhiga ʼo Sehova, pea ʼe lelei ke tou lau te faikole ʼa Elia neʼe ina fai ʼi muʼa ʼo te kau atolasio ʼa Paale ʼi te Moʼuga ʼo Kalemeli, ʼo feiā mo te faikole ʼa Nehemia ʼo ʼuhiga mo te ʼaluʼaga fakaʼofaʼofa ʼo Selusalemi. (1 Hau 18:36, 37; Nehemia 1:4-11) Ko te lau pea mo te metitasioʼi ʼo te ʼu faikole ʼaia ʼe feala ai ke mālohi tatatou tui pea mo foaki mai he ʼu manatu peʼe feafeaʼi hatatou fakaōvi fakalelei kia Sehova ʼaki te ʼu meʼa ʼaē ʼe tou mafasia ai.
22. Koteā te koga tohi ʼo te taʼu 2003, pea koteā te ʼu fehuʼi ʼe tou lava fai e tatou totonu lolotoga te taʼu ʼaia?
22 ʼE mahino mai, ʼe maʼuhiga pea mo ʼaoga ke tou tokagaʼi te tokoni ʼa Sakopo ke “[tou] fakaovi ki te Atua.” (Sakopo 4:8) ʼOfa pe ke tou tokagaʼi te tokoni ʼaia ʼo tou tuputupu ʼi tatatou ʼatamai mālama ʼo ʼuhiga mo te ʼAtua, ʼo tou faiga ke tou fakahā totatou ʼofa lahi kia te ia, pea mo fakatuputupu tatatou felogoi mo ia ʼaki tatatou ʼu faikole. Lolotoga te taʼu 2003, tou taupau maʼu ʼi totatou ʼatamai ia te koga tohi ʼo te taʼu ia Sakopo 4:8, pea tou haga sivisivi ia tatou totonu peʼe tou lolotoga fakaōvi kia Sehova. Kae e feafeaʼi ki te koga fakamuli ʼo te vaega ʼaia? E “fakaovi atu anai [feafeaʼi ia Sehova] kia koutou,” ʼaki te ʼu tapuakina fea? ʼE talanoa anai te alatike ka hoa mai ki te faʼahi ʼaia.
Kei Koutou Manatuʼi Koa?
• He koʼe ʼe ko he meʼa maʼuhiga tatatou fakaōvi kia Sehova?
• Koteā te ʼu fakatuʼutuʼu ʼe feala ke tou fai ʼo ʼuhiga mo tatatou ako ke tou ʼiloʼi ia Sehova?
• ʼE tou lava fakahā feafeaʼi ʼe tou ʼofa moʼoni kia Sehova?
• Ko te ʼu ʼaluʼaga fea ʼe tou lava fakatuputupu ke lahi age hatatou felogoi mo Sehova ʼi te faikole?
[Talanoa ʼo te pasina 12]
Te vaega faka Tohi-Tapu ʼo te taʼu 2003: “Koutou fakaovi ki te Atua pea e fakaovi atu anai kia koutou.”—Sakopo 4:8.
[Paki ʼo te pasina 8, 9]
ʼI te lahilahi ake ʼa Samuele neʼe ina ako ke ina ʼiloʼi lelei ia Sehova
[Paki ʼo te pasina 12]
Ko te faikole ʼaē neʼe fai e Elia ʼi te Moʼuga ʼo Kalemeli ʼe ko he faʼifaʼitaki lelei maʼa tatou