Koutou Fakahā Tokotou ʼOfa ʼi Tokotou Loto Fale

“TUTU mo kapau ʼe ke lavaʼi! Haga ʼo tutu!” ko te fakaneke ʼaia ʼa Tohru ki tona ʼohoana, ia Yoko.a “ ʼE ʼau tutu anai,” ko tana tali age ʼaia ki ai pea mo toloʼi te kauʼi puhaafi moʼo tutu te paki ʼo nāua toko lua. Pea fokifā pe kua ina tali ki tona ʼohoana, “ ʼe ʼau tutu anai te ʼapi!” Pea ʼai te foʼi pa e Tohru ki tona ʼohoana, ʼo fakaʼosi ai tanā fetalanoaʼaki.

ʼI te ʼu taʼu e tolu ki muʼa atu, neʼe kamata faʼufaʼu e Tohru mo Yoko tonā maʼuli faka taumatuʼa. Koteā koa ʼaē neʼe tokakovi ai tonā maʼuli? Logope ko Tohru neʼe hage ko he tagata agalelei, kae maʼa tona ʼohoana ʼe mole ina fakahā age ki ai tona ʼofa, pea neʼe tahitahiga tana tokaga ki te meʼa ʼe logoʼi e tona ʼohoana. Neʼe hage ia neʼe mole lava liufaki e Tohru ia te ʼofa ʼaē neʼe fakaʼamu kiai tona ʼohoana. ʼI tana mole lava kātakiʼi te faʼahi ʼaia, neʼe liliu ai ia Yoko ʼo lotokovi pea mo ʼitaʼita. Neʼe tuputupu ia ia te ʼu fihifihia, ohage ko te mole kei mamoe, mo te lotohoha, tana mole kei kai lelei, te aga ʼitaʼia, mo te lotovaivai pea mo hoko mataku. Kae neʼe hage neʼe mole tokagaʼi e Tohru ia te meʼa ʼaia neʼe hoko ʼi tona loto fale. Neʼe hage kia ia ʼe lelei pe ia meʼa fuli.

“Te ʼu Temi Maʼuhiga ʼAupito Mo Faigataʼa”

Ko te ʼu taʼi fihifihia ʼaia ʼe ko he meʼa māhani ia ʼi te temi nei. Neʼe fakakikite e te ʼapositolo ko Paulo ʼe fakaʼiloga anai totatou temi e te hahaʼi “heʼeʼofa.” (2 Timoteo 3:​1-5, MN ) Ko te kupuʼi palalau faka Keleka ʼaē neʼe fakaliliu ʼaki te kupu “heʼeʼofa” ʼe ʼalutahi mo te taʼi ʼofa ʼe maʼu e he famili. ʼE mahino ia ʼi totatou temi ʼe tou sisio ai ki te mole kei maʼu ʼo te taʼi ʼofa ʼaia. Pea kapau ʼe kei maʼu te ʼofa ʼaia, kae ʼe lagi tahitahiga te fefakahāʼaki e he famili.

ʼI te temi nei ʼe lahi te ʼu mātuʼa ʼe mole nātou popoto ʼi te fakahā tonatou ʼofa ki tanatou fānau. Ko ʼihi neʼe nātou tutupu ake ʼi he maʼuli faka famili ʼe mole maʼu ai te ʼofa, pea ʼe lagi nātou tokagaʼi neʼe feala pe ke lelei age te maʼuli mo kanapaula neʼe maʼu ai te ʼofa. ʼE ʼiloga ia neʼe ko te faʼahi neʼe hoko kia Tohru. Lolotoga tana kei veliveli, neʼe maʼumaʼua tuʼumaʼu tana tāmai pea neʼe haʼu ki fale kae kua pōʼuli. Neʼe tahitahiga tana palalau kia Tohru, pea ka gū age ki ai, ʼe ina fai fakaʼita. Neʼe toe gāue ʼaho katoa ia te faʼe ʼa Tohru pea neʼe mole lahi tona temi ʼe nofo ai mo Tohru. Neʼe nofo tuʼumaʼu ia Tohru ʼo sioʼi te televisio. Neʼe mole ʼi ai he fefakamāloʼaki peʼe ko he felogoi ʼi te famili.

ʼE feala pe ke tokoni ki te faʼahi ʼaia ia te agaʼi fenua. ʼI ʼihi koga meʼa ʼi Amelika ʼo te potu Saute, ko he tagata ʼe mole tonu ke ina fakahā tona ʼofa ki tona ʼohoana. ʼE lahi te ʼu fenua ʼi te potu Hahake pea mo te ʼu fenua Afelika, ʼe mole ʼalutahi mo te agaʼi fenua hakita fakahā ʼaki te ʼu palalau pea mo te aga ʼe kita ʼofa ki he tahi. ʼE lagi faigataʼa ki te ʼu tagata hanatou ʼui ki tonatou ʼohoana peʼe ki te fānau “ ʼe ʼau ʼofa ia koe.” Kae ʼe tou lava maʼu he ako mai te ʼuluaki felogoi faka famili, ʼaē neʼe mole holo ʼaki te temi.

Ko He Faʼifaʼitaki ʼo Te Felogoi Faka Famili

Ko te faʼifaʼitaki lelei ʼo te famili ʼe maʼu ʼi te felogoi ʼa Sehova ʼAtua pea mo tona ʼAlo ʼulu tokotahi. ʼE nā fefakahā lelei ʼaki tonā feʼofani. Lolotoga te ʼu taʼu ʼe lauʼi afe, ko te laumālie ʼaē neʼe liliu ki muli age ko Sesu Kilisito neʼe ina leleiʼia tana ʼu felogoi fakafiafia mo tana Tāmai. Neʼe ina fakamatala fēnei te felogoi ʼaia: “Neʼe ʼau liliu ai ʼi ʼona tafa ko he tufuga faiva pea neʼe ʼau liliu ko he tahi neʼe ʼofa tāfito ki ai ʼi te ʼaho mo te ʼaho, ʼo ʼau fiafia ʼi ʼona muʼa ʼi te temi fuli pe.” (Tāʼaga Lea 8:​30) Neʼe ʼiloʼi papau e te ʼAlo ia te ʼofa ʼo tana Tāmai koia neʼe ina lava fakahā ai ki ʼihi ko Sehova neʼe ʼofa tāfito ki ai ʼi te ʼaho mo te ʼaho. Neʼe fiafia tuʼumaʼu ʼi te nofo mo tana Tāmai.

ʼO hoko ai mo tana liliu ko te tagata ko Sesu, neʼe fakahā age e te Tāmai tona ʼofa ki tona ʼAlo. ʼI te ʼosi papitema ʼa Sesu, neʼe ina logoʼi fēnei ia te leʼo ʼo tana Tāmai: “Ko ia aeni e ko toku Alo, ia te ofaina, ia te ia kuʼau tuku ki ai te katoa o toku lelei.” (Mateo 3:​17) Neʼe ko he ʼofa ʼaia pea mo he fakaloto mālohi ki te kamataʼaga ʼo te gāue ʼa Sesu neʼe hinoʼi age ke ina fai ʼi te kele! ʼE mahino ia neʼe malave ki tona loto tana logo ki te tali ʼo tana Tāmai, ʼo lagi ina manatuʼi ai tona maʼuli katoa ʼi selo.

Koia ʼe tuku mai e Sehova ia te faʼifaʼitaki lelei ʼo ʼuhiga mo te fakahā katoa ʼo tona ʼofa ki tona famili ʼi te ʼatulaulau katoa. Kapau ʼe tou tali ia Sesu Kilisito, pea ʼe feala mo tatou ke tou maʼu te ʼofa ʼo Sehova. (Soane 16:27) Logola ʼe mole tou logo anai ki he ʼu palalau mai te lagi, kae ʼe tou sio anai ki te ʼofa ʼo Sehova ʼi te ʼu meʼa ʼaē neʼe ina fakatupu, ʼi te sakilifisio faitotogi ʼa Sesu, pea mo te tahi ʼu ʼaluʼaga. (1 Soane 4:​9, 10) ʼE fakalogo ia Sehova ki tatatou ʼu faikole pea mo ina tali kiai ke fua lelei kia tatou. (Pesalemo 145:18; Isaia 48:17) ʼAki tatatou fakatuputupu he felogoi lelei mo Sehova, ʼe tou fakalahilahi ai tatatou mahino ki tana tokaga ʼofa.

Neʼe akoʼi e Sesu mai tana Tāmai ia te agalelei, mo te loto tokaga, pea mo te manavaʼofa ki ʼihi. Neʼe ina fakamahino fēnei: “Ko meafuape e fai e te Tamai, pea ko meape aia e fai tatau e te Alo. Koteuhi e ofa te Tamai ki te Alo pea e ina fakaha kia te ia te meafuape e ina fai.” (Soane 5:​19, 20) Koia ʼe tou lava ako te fakahā ʼo te ʼofa mokā tou ako te faʼifaʼitaki ʼaē neʼe tuku mai e Sesu ʼi te temi ʼaē neʼe nofo ai ʼi te kele.​—Filipe 1:8.

Te ʼOfa ʼi Te Famili​—ʼO Feafeaʼi?

Mai te ʼaluʼaga ʼaē “ko te ʼAtua ʼe ʼofa” pea neʼe fakatupu tatou “ki tona paki,” koia ʼe tou maʼu ai te fealagia ʼaē ko te logoʼi pea mo te fakahā ʼo te ʼofa. (1 Soane 4:8, MN; Senesi 1:​26, 27) Kae ko te fealagia ʼaia ʼe mole hoko fua feiā pe. Moʼo fakahā te ʼofa, ʼe tonu muʼa ke tou logoʼi te ʼofa mai totatou ʼohoana pea mo te fānau. Koutou sivisivi fakalelei pea mo tokagaʼi te ʼu kalitate maʼuhiga ʼe nātou maʼu, tatau aipe peʼe hage kia koutou ʼe mole ʼi ai honatou ʼu kalitate, pea koutou fakakaukauʼi te faʼahi ʼaia. ʼE lagi koutou ʼui anai ‘ ʼe mole ʼi ai he meʼa ʼe lelei ʼi toku ʼohoana [peʼe ko te fafine peʼe ko te tagata, peʼe ko te fānau].’ Ko nātou ʼaē neʼe ʼohoana kae neʼe ko he filifili neʼe fai e he tahi kehe, ʼe feala pe ke mole nātou faʼa ʼoʼofa ki tonatou ʼohoana. Ko ʼihi taumatuʼa neʼe lagi mole fia maʼu fānau. Kae koutou tokagaʼi te meʼa neʼe logoʼi e Sehova ʼo ʼuhiga mo tona ʼohoana fakatā, ia te puleʼaga ʼo Iselaele, ʼi te hogofulu sēkulō ʼi muʼa ʼo totatou temi. ʼI te temi ʼaē neʼe ʼui ai e tana polofeta ko Elia ʼe mole ʼi ai he tahi age tagata tauhi kia Sehova ʼi te ʼu telepi e hogofulu ʼo Iselaele, neʼe vakavakaʼi fakalelei e Sehova pea neʼe ina maʼu te toe hahaʼi kaugamālie​—te toko 7 000—⁠neʼe nātou maʼu te ʼu kalitate neʼe ina leleiʼia. ʼE koutou lava faʼifaʼitakiʼi koa ia Sehova ʼo koutou kumi te meʼa ʼaē ʼe lelei ia nātou ʼo tokotou famili?​—1 Hau 19:14-​18.

Kae ke feala ki tokotou famili ke nātou logoʼi tokotou ʼofa kia nātou, ʼe tonu ke koutou faigaʼi muʼa tona fakahā. Kapau ʼe koutou fakatokagaʼi he meʼa ʼe feala ke koutou vikiʼi, koutou fai te faʼahi ʼaia. ʼI te Folafola ʼa te ʼAtua ʼe talanoa ai ʼo ʼuhiga mo te fafine faʼafai, pea ʼe ina fakahā te ʼu koga maʼuhiga ʼo tona famili: “Neʼe tutuʼu ake tana ʼu tama pea neʼe nātou vikiviki ia ia; ko tona pule ʼe tuʼu ake pea ʼe ina vikiviki ia ia.” (Tāʼaga Lea 31:28) Koutou tokagaʼi te fakahā faʼifaʼitaliha e te famili tonatou ʼofa. ʼAki tana vikiviki ki tona ʼohoana, ʼe tuku ai e he tāmai he faʼifaʼitaki lelei ki tona foha, ʼo ina fakaloto mālohiʼi ia ia ke ina fakavikiviki ki tona ʼohoana mokā ʼohoana.

ʼE tonu foki ki te ʼu mātuʼa ke nātou vikiʼi tanatou fānau. Ko te faʼahi ʼaia ʼe feala ke tokoni ki te fānau ke nātou fakahū ki tonatou loto ia te loto fakaʼapaʼapa. ʼI tona fakahagatonu, ʼe lava feafeaʼi ki he tagata ke ‘ ʼofa ki tona kāiga ohage ko ia totonu mo kapau la ʼe fehiʼa ia kia ia totonu? (Mateo 22:39) ʼI te tahi faʼahi, kapau ʼe fakakoviʼi tuʼumaʼu te fānau e tanatou ʼu mātuʼa, ʼo mole nātou fakamālo kia nātou ʼi he temi, pea ʼe feala pe ki te fānau ke pulinoa tonatou ʼuhiga pea lagi faigataʼa ai kia nātou hanatou fakahā tonatou ʼofa ki niʼihi.​—Efeso 4:​31, 32.

ʼE Koutou Lava Maʼu He Tokoni

Kae e feafeaʼi la mo kapau neʼe koutou lahilahi ake ʼi he famili ʼe mole fefakahāʼaki te ʼofa? ʼE kei feala pe hakotou ako ia te fakahā ʼo te ʼofa. Ko te ʼuluaki meʼa ʼe tonu ke fai, ʼe ko te ʼiloʼi peʼe ʼifea te fihifihia pea mo kita mahino ki te maʼua ʼaē ke fai he fetogi. ʼE lahi te tokoni ʼa te Folafola ʼa te ʼAtua, ia te Tohi-Tapu ki te faʼahi ʼaia. ʼE feala pe ke fakatatau ki he sioʼata. Ka tou sioʼi fakalelei ia tatou ʼi te sioʼata fakatā ʼaē ko te ʼu akonaki ʼo te Tohi-Tapu, ko tatatou ʼu tōtō ʼi tatatou ʼu fakakaukau ʼe toe tapa mai, peʼe fakahā mai. (Sakopo 1:​23) ʼAki tatatou mulimuli ki te ʼu akonaki faka Tohi-Tapu, ʼe tou lava fakatonutonuʼi te ʼu faʼahi ʼaē ʼe mole mata feʼauga. (Efeso 4:​20-​24; Filipe 4:​8, 9) ʼE ʼaoga ke tou fai tuʼumaʼu, ke ʼaua naʼa tou ‘fiu ʼi he temi ia te fai ʼo te meʼa ʼaē ʼe lelei.’​—Kalate 6:9.

Maʼa ʼihi, ʼe faigataʼa te fakahā ʼo te ʼofa ʼuhi ko tanatou agaʼi fenua pea mo te faʼahiga ako ʼaē neʼe fai age e tanatou ʼu mātuʼa. Kae ʼe fakahā e te ʼu sivi neʼe hoki fai pe ʼe maʼu te ʼu puleʼaki ki te ʼu taʼi fihifihia ʼaia. ʼE fakamahino e te tōketā ko Daniel Goleman, ʼe tōketā ki te ʼu mahaki ʼulu, ‘ ʼe feala ke fetogi, māʼia mo te ʼu agamāhani kua tauʼaka loloto ʼi totatou loto talu mai tatatou kei veliveli.’ Kua laka ʼi te ʼu sēkulō e 19, neʼe fakahā mai e te Tohi-Tapu, ʼaki te tokoni ʼa te laumālie ʼa te ʼAtua, ʼe feala ke fetogi mo te ʼu agamāhani kua tauʼaka loloto ʼi te loto ʼo he tahi. ʼE ina tokoniʼi fēnei mai ia tatou: “Koutou toʼo kehe ia koutou tokotou ʼuhigaʼi tagata ʼāfea mo ʼana gāue, pea ke koutou kofuʼi te ʼuhigaʼi tagata foʼou.”​—Kolose 3:​9, 10, MN.

Kapau kua ʼiloʼi te fihifihia, pea ʼe feala ke ako e te famili ia te Tohi-Tapu ʼo manatuʼi ke fakahoko te ʼu meʼa ʼaē ʼe ʼaoga kiai. Ohage la, he koʼe koa ʼe mole tou kumi ia te kupu “ ʼofa” ʼi te Concordance ʼo te Tohi-Tapu? ʼE lagi koutou maʼu anai he vaega ohage ko ia ʼaenī: “Neʼe koutou logo ki te faʼa kātaki ʼa Sopo pea mo te ikuʼaga ʼaē neʼe tuku age e Sehova, ko Sehova ʼe fonu ʼi te ʼofa pea mo te manavaʼofa.” (Sakopo 5:​11, MN ) Pea hoki koutou vakaʼi te fakamatala faka Tohi-Tapu ʼo Sopo, ʼo koutou tokagaʼi te fakahā e Sehova tona ʼofa pea mo tona manavaʼofa kia Sopo. ʼE mahino ia ʼe koutou fia faʼifaʼitakiʼi ia Sehova ʼo koutou fakahā he ʼofa lahi mo he manavaʼofa lahi ki tokotou famili.

Kae ʼi totatou ʼuhiga agahala, “ ʼe lahi te ʼu lakaga ʼe tou tūkia fuli ai” ʼi tatatou ʼu palalau. (Sakopo 3:2, MN ) ʼI te maʼuli faka famili, ʼe lagi tou fakaʼaogaʼi kovi totatou ʼalelo. ʼE ʼaoga leva kiai ia te faikole pea mo te falala kia Sehova. ʼAua naʼa koutou lotovaivai ʼo ʼui ʼe mole he puleʼaki ki te faʼahi ʼaia. “Koutou faikole tuumau.” (1 Tesalonika 5:​17) ʼE tokoni anai ia Sehova kia nātou ʼaē ʼe nātou fakaʼamu ki te ʼofa ʼi te famili, pea mo nātou ʼaē ʼe nātou fia fakahā te taʼi ʼofa ʼaia kae ʼe mole nātou faʼa fai te faʼahi ʼaia.

Pea tahi ʼaē meʼa, neʼe foaki fakaʼofa mai e Sehova ia te tokoni ʼi te kokelekasio faka Kilisitiano. Neʼe tohi fēnei e Sakopo: “ ʼE mahaki [fakalaumālie] koa he tahi ia koutou? Ke ina pāui ki ʼona tafa te ʼu tagata ʼāfea ʼo te kokelekasio, pea ke nātou faikole ʼo ʼuhiga mo ia, ʼo tākaiʼaki te lolo ʼaki te huafa ʼo Sehova.” (Sakopo 5:​14, MN ) Ei, ʼe feala ki te kau tagata ʼāfea ʼi te ʼu kokelekasio ʼo te kau Fakamoʼoni ʼa Sehova ke lahi hanatou tokoni ki te ʼu famili ʼaē ʼe tau mo te fihifihia ʼaē ko te fefakahāʼaki ʼo te ʼofa. Logope ko te kau tagata ʼāfea ʼe mole ko he ʼu tōketā ki te ʼu mahaki ʼulu, kae ʼaki te loto tokaga ʼe feala ke nātou tokoni ki tonatou ʼu tēhina, kae mole ʼa nātou ia te ʼui age te meʼa ʼaē ʼe tonu ke nātou fai, kae ke nātou fakamanatuʼi age ia te manatu ʼa Sehova pea mo faikole mo nātou pea mo fai te kole maʼa nātou ʼaia.​—Pesalemo 119:105; Kalate 6:1.

ʼO ʼuhiga mo Tohru mo Yoko, neʼe fakalogo tuʼumaʼu te kau tagata ʼāfea ki tonā ʼu fihifihia pea mo fakaloto fīmālieʼi ia nāua. (1 Petelo 5:​2, 3) ʼI ʼihi lakaga, neʼe ʼaʼahi ia nāua e te tagata ʼāfea mo tona ʼohoana, ʼo lava maʼu ai e Yoko ia te ʼu fua lelei mai te ʼu fakamatala ʼo he fafine kua māhani ʼi te maʼuli, pea mo ina fakamanatuʼi age kia Yoko ke ‘fakapotopoto ʼo ʼofa ki tona ʼohoana.’ (Tito 2:​3, 4) ʼAki tanatou lotomahino pea mo fia vaevae ia te ʼu mamahi pea mo te ʼu lotomamahi ʼo tonatou ʼu tēhina Kilisitiano, ʼe liliu ai te kau tagata ʼāfea “ko he nonoʼaga mokā matagi pea ko he holaʼaga mokā afā.”​—Isaia 32:​1, 2.

ʼAki te tokoni ʼa te ʼu tagata ʼāfea agalelei, neʼe mahino ai kia Tohru ko tona fihifihia ʼe ko tana mole lava fakahā tona ʼofa pea ʼi “te u aho fakamuli,” ʼe tauʼi e Satana ia te maʼuli faka famili. (2 Timoteo 3:1) Neʼe fakatotonu ai e Tohru ke ina fai he puleʼaki ki te fihifihia ʼaia. Neʼe kamata mahino kia ia ko tana mole lava fakahā tona ʼofa, ʼe tupu koteʼuhi neʼe lahilahi ake kae neʼe mole ina logoʼi he ʼofa neʼe fai age kia ia. ʼAki te ako fakamalotoloto ʼo te Tohi-Tapu pea mo te faikole, neʼe tokagaʼi māmālie e Tohru ia te ʼu meʼa ʼe ʼaoga tāfito kia Yoko ʼi te faʼahi ʼo te loto.

Logope neʼe ʼita kia Tohru, kae ʼi te mahino ʼa Yoko ki te maʼuli ʼāfea ʼaē neʼe nofo ai tona ʼohoana pea mo tana ʼiloʼi ia tana ʼu tōtō, neʼe sio lelei ai leva ki te ʼu faiga fakamalotoloto ʼo tona ʼohoana. (Mateo 7:​1-3; Loma 5:​12; Kolose 3:​12-​14) Neʼe ina kole mamahi kia Sehova ke ina tuku ifo kia ia te mālohi ke haga ʼofa ki tona ʼohoana. (Filipe 4:​6, 7) ʼAki te temi, neʼe fakahā e Tohru tona ʼofa, ʼo fiafia ai tona ʼohoana.

Ei, tatau aipe peʼe koutou faigataʼaʼia ia te logoʼi peʼe ko te fakahā ʼo te ʼofa, kae ʼe koutou lava tauʼi ia te fihifihia ʼaia. ʼE foaki katoa mai e te Folafola ʼa te ʼAtua ia te takitaki. (Pesalemo 19:7) ʼAki takotou mahino lelei ki te fihifihia ʼaia, mo takotou faigaʼi ke koutou tokaga ki te ʼu meʼa ʼaē ʼe lelei ki tokotou famili, mo takotou ako pea mo maʼuliʼi ia te Folafola ʼa te ʼAtua, mo takotou falala kia Sehova ʼi te faikole fakamalotoloto, pea mo te kumi tokoni ki te kau tagata ʼāfea ʼaē kua fotufotuʼa ʼi te faʼahi faka Kilisitiano, ʼe koutou lava tauʼi ai te meʼa ʼaē ʼe hage ko he faigataʼaʼia lahi kia koutou mo tokotou famili. (1 Petelo 5:7) ʼE feala ke koutou fakafiafia ohage ko te meʼa ʼaē neʼe hoko ki te tagata ʼohoana ʼi Amelika. Neʼe tokoniʼi ia ia ke ina fakahā tona ʼofa ki tona ʼohoana. ʼI tana lava ʼui ki tona ʼohoana “ ʼe ʼau ʼofa ia koe,” neʼe punamaʼuli ki te tali neʼe fai age ki te meʼa ʼaē neʼe ina ʼui. Neʼe ʼui fēnei age e te fafine, ʼaki he ʼu loʼimata ʼo te fiafia: “Mo ʼau foki la ʼe ʼau ʼofa ia koe, kae ko tau hoki ʼui mai te meʼa ʼaia talu mai ia taʼu e 25.” ʼAua naʼa koutou fakatalitali ke hili he temi loaloaga feiā pea hoki koutou fakahā tokotou ʼofa ki tokotou ʼohoana mo takotou fānau!

[Kiʼi nota]

[Paki ʼo te pasina 28]

ʼE foaki e Sehova ia te tokoni ʼi tana Folafola, ia te Tohi-Tapu