“Koutou Fakaovi Ki Te Atua Pea e Fakaovi Atu Anai Kia Koutou”
Tona Maʼuli ʼi Muʼa Pea Ki Muli Age—Neʼe Fetogi Katoa Tona Maʼuli
NEʼE kua liliu te maʼuli ʼo Matsepang ko he maʼuli mamahi pea mole hona ʼuhiga! Neʼe ko te taʼahine neʼe maʼuli ʼi Lesotho, ko te fenua ʼe tuʼu ʼi te lotomalie ʼo te Potu Saute ʼo Afelika. Neʼe tupu ake ia Matsepang ʼi te lotu Katolika. Ko te ʼu taupoʼou, neʼe mole nātou tokoni ki ai ke fia tauhi ki te ʼAtua, kae neʼe gaohi koviʼi ia ia ʼo nātou totogi ke ina fai he ʼu aga heʼeʼaoga.
ʼAki te faʼahi ʼaia, neʼe mole kei fia fai ia Matsepang ki he lotu, pea mo tui ki he Tupuʼaga ʼofa, ʼe tokaga moʼoni ki te tagata. ʼUhi ko tona līʼakina pea mo tona kākāʼi, neʼe loloto ʼaupito te mamahi ʼo te loto ʼo Matsepang pea mo tana ʼui ʼaē ʼe mole ʼi ai hona ʼuhiga. Neʼe lahilahi ake ʼo agamālohi pea mo aga ʼitaʼita. Neʼe ina fai te ʼu aga kovi.
Ki muli age, neʼe kau ia Matsepang ʼi te kūtuga ʼe nātou kaihaʼa te hahaʼi ʼi te ʼu loto saliote afi. Neʼe puke ia ia pea neʼe pilisoniʼi ʼi te Potu Saute ʼo Afelika. Ki muli age, neʼe ʼave ki tona fenua, ʼi Lesotho, pea neʼe hoko atu tana ʼu aga kovi, mo tana toloke, mo tana agamālohi pea mo tana ʼu felāveʼi fakasino heʼeʼaoga.
ʼI te kua mamahi ʼaupito ʼo tona maʼuli, neʼe kole mamahi e Matsepang ki te ʼAtua ke tokoni ifo kia te ia. Neʼe fēnei tana fakapapau, “ ʼAtua, kapau ʼe hoko atu toku maʼuli, pea ʼe ʼau fai anai te meʼa ʼaē ʼe ʼau lavaʼi moʼo tauhi kia te koe.”
Mole fualoa, pea ʼolo ake kia Matsepang ia te ʼu misionea, ko te ʼu Fakamoʼoni ʼa Sehova. Neʼe nā ʼui age ke nā fai hana ako Tohi-Tapu. ʼI tana ako ʼaia, neʼe mahino kia ia ko te ʼAtua ʼe mole ko he ʼAtua ʼe mole ina fia ʼiloʼi te meʼa ʼaē ʼe hoko kia tatou peʼe mole tokaga kia tatou. ʼI tona fakahagatonu, neʼe mahino kia ia ko Satana, “te tāmai ʼo te loi,” ʼe ina fakaʼaogaʼi ia te ʼu kākā moʼo fakatupu ʼi te loto ʼo niʼihi te manatu ʼaē ʼe mole ʼi ai honatou ʼuhiga, pea mo uga nātou ke nātou manatu ʼe mole feala ke ʼofainaʼi nātou e Sehova.—Soane 8:44, MN; Efeso 6:11.
Kae neʼe ko he meʼa fakaloto fīmālie kia Matsepang tana ʼiloʼi ʼaē ʼe tou lava maʼu he fakaʼapaʼapa kia kita totonu mo kapau ʼe tou fakahemala ki tatatou ʼu hala ʼo te temi kua hili, mo tou faiga ke fakamolemole mai te ʼAtua, pea mo faigaʼi ke tou fakafiafia ia ia! Neʼe tokoniʼi ia ia ke mahino “ko te ʼAtua ʼe lahi age ia ʼi totatou loto,” pea ko tana sio kia tatou ʼe kehe age ia ʼi tatatou faʼahiga sio kia tatou totonu.—1 Soane 3:19, 20, MN.
Neʼe fiafia ia Matsepang ʼi tana lau ia te ʼu palalau ʼaenī ʼa te tagata fai pesalemo ko Tavite: “Ko Sehova ʼe ōvi kia nātou ʼaē ʼe loto lavea; pea ʼe ina hāofaki ia nātou ʼaē ʼe taʼomia tonatou laumālie.” (Pesalemo 34:18, MN ) Ohage ko nātou ʼaē ʼe “taʼomia tonatou laumālie,” neʼe mahino kia ia ʼe mole lītuʼa ia Sehova ki tana ʼu kaugana, tatau aipe peʼe līʼakina ʼihi ia nātou peʼe nātou ʼui ʼe mole nātou maʼuhiga. Neʼe malave ki tona loto tana ʼiloʼi ʼaē ko te ʼAtua ʼe tokaga ki tana ʼu ōvi fuli, pea mo lagolago kia nātou ʼi te ʼu temi faigataʼa. (Pesalemo 55:22; 1 Petelo 5:6, 7) Neʼe malave tāfito kia ia te ʼu palalau ʼaenī: “Koutou fakaovi ki te Atua pea e fakaovi atu anai kia koutou.”—Sakopo 4:8.
Neʼe mole tuai pea neʼe ʼiloga te mālohi ʼo te Folafola ʼa te ʼAtua ʼi te maʼuli ʼo Matsepang. Neʼe kamata kau tuʼumaʼu ki te ʼu fono faka Kilisitiano pea neʼe ina līaki tana ʼu aga ʼaē ʼe mole ʼalutahi mo te Tohi-Tapu. Koteā tona fua? Kua ina logoʼi ʼe tāu mo ia ke ʼofa ki ai te ʼAtua pea mo tali leleiʼi ia ia. Talu pe tona papitema ʼo liliu ai ko te Fakamoʼoni ʼa Sehova, kua lauʼi afe te ʼu hola neʼe ina fakaʼaogaʼi ʼi te minisitelio faka Kilisitiano moʼo faka mafola te logo lelei ʼo ʼuhiga mo te Puleʼaga. Logope te ʼu mamahi ʼaē neʼe hoko kia ia ʼi te temi kua hili, kua maʼu nei e Matsepang ia te maʼuli fiafia pea mo ʼaoga. ʼE ko he fakamoʼoni ʼaia ko te Tohi-Tapu ʼe ina hikihiki te maʼuli ʼo te hahaʼi!—Hepeleo 4:12.
[Talanoa ʼo te pasina 9]
Te ʼu Pelesepeto Faka Tohi-Tapu ʼe Nātou Fetogi Te Maʼuli
ʼI te ʼu pelesepeto faka Tohi-Tapu ʼaē neʼe nātou fakaloto fīmālieʼi ia nātou ʼaē neʼe gaohi koviʼi ʼe kau ai te ʼu pelesepeto ʼaenī:
“ ʼI te hoha lahi ʼo toku loto, neʼe fakapelepeleʼi toku nefesi e tau ʼu fakaloto fīmālie.” (Pesalemo 94:19) Ko te “ ʼu fakaloto fīmālie” ʼa Sehova ʼaē ʼe maʼu ʼi tana Folafola, ʼe ko he toe fakaloto fīmālie ia. Ko te fakaʼaogaʼi ʼo te ʼu fakaloto fīmālie ʼaia lolotoga te metitasio pea mo te faikole, ʼe tokoni mai ke tou fakamaʼamaʼa mai tatatou ʼu tuʼania pea mo ina fakatupu he falala ki te ʼAtua ohage ko he Kaumeʼa ʼe lotomahino.
“[Ko Sehova] ʼe ina fakamālōlō ia nātou ʼaē ʼe taʼomia tonatou loto, pea ʼe ina haʼi tonatou ʼu koga ʼaē ʼe lavea.” (Pesalemo 147:3) Kapau ʼe tou fakafetaʼi ki te manavaʼofa ʼo Sehova pea mo tana fakatuʼutuʼu ʼaē ke ina ʼuʼufi tatatou ʼu agahala ʼaki te sakilifisio faitotogi ʼa Sesu, ʼaki he loto falala ʼe tou lava fakaōvi ki te ʼAtua ʼaki he loto ʼe mole taʼomia. ʼE tou lava maʼu mai ai ia he fīmālie pea mo he tokalelei ʼo te ʼatamai.
“ ʼE mole he tahi ʼe feala ke haʼu kia te ʼau [Sesu Kilisito], mo kapau ko te Tāmai ʼaē neʼe ina fekauʼi mai ʼau ʼe mole ina taki mai ia ia; pea ko ʼau ʼe ʼau fakatuʼuake anai ia ia ʼi te ʼaho fakamuli.” (Soane 6:44, MN ) ʼAki tona laumālie maʼoniʼoni pea mo te gāue fai faka mafola ʼo te Puleʼaga, ko Sehova ʼe ina taki tatou takitokotahi ki tona ʼAlo pea mo ina foaki mai te ʼamanaki ʼo te maʼuli heʼegata.
[Paki ʼo te pasina 9]
“ ʼAtua, kapau ʼe hoko atu toku maʼuli, pea ʼe ʼau fai anai te meʼa ʼaē ʼe ʼau lavaʼi moʼo tauhi kia te koe”