Te ʼOhoana ʼAē Neʼe Hage Neʼe Mole Feala Ke Hoko ʼa Poase Pea Mo Lute

ʼI TE ʼu temi taʼukai ʼi Petelehemi, neʼe lahi te ʼu gāue neʼe tonu ke fakahoko e te hahaʼi moʼo tae te ʼu pulapula. Neʼe ko te ʼaho loaloaga. Ko te mamanu ʼo te pulapula ʼaē neʼe hoki tae age neʼe ina fakamanatuʼi ki te kau gāue hālofia kua hoko te temi kai. Neʼe tahi fiafia ʼi tana gāue kinakina.

Ko te tagata koloaʼia pea mo maʼu kele ko Poase, neʼe kai pea mo ʼinu ʼaki he fiafia pea mo mālōlō ʼi te tuʼuga fulumeto neʼe tānaki. Neʼe fakaʼosi te ʼaho taʼukai ʼaia pea neʼe tahi kumi e te tagata hona koga meʼa ke mālōlō ai. Ko Poase, ʼaki he loto fiafia, neʼe ina kafu te kie pea mo moe ai.

Ko He Felāveʼi Fakavilivili Pea Mo Fakafūfū

ʼI te māʼupō, neʼe ala ake ia Poase he neʼe mokosia pea mo tetetete. Neʼe hage neʼe toʼo kehe e he tahi te kie ʼaē neʼe ʼuʼufi ʼaki tona ʼu vaʼe, pea neʼe ʼi ai te tahi neʼe takoto ʼi ai. ʼI te pōʼuli, ʼi tana mole ʼiloʼi ʼaē peʼe ko ai, neʼe ina fehuʼi fēnei: “Ko ai ia koe?” Neʼe tali fēnei e te leʼo ʼa te fafine: “Ko ʼau Lute tau fafine kaugana, pea ʼe tonu ke ke folahi ki tau kaugana te potu ʼo tou kie, heʼe ko koe ʼaē ʼe feala ke ke totogi.”—Lute 3:1-9.

Neʼe nā fai palalau toko lua ʼi te pōʼuli. Neʼe mole tonu ke nofo feiā he fafine ʼi te kele ʼaē neʼe tae ai te pulapula. (Lute 3:14) Kae ʼi te fakaafe ʼa Poase, neʼe takoto Lute ʼi tona ʼu vaʼe ʼo aʼu ki tana tuʼuake ʼi muʼa ʼo te hopo ake ʼo te laʼā pea ʼalu ke mole fatufatuʼi ai ia ia.

Neʼe ko he felāveʼi koa ʼaia ʼa he toko lua neʼe nā femanakoʼaki? Ko te tagata maʼu koloā ʼaia pea mo matuʼa, neʼe manako koa ia Lute—te fafine vitua masiva kei finemui mai te fenua pagani? Pe neʼe fai koa e Poase he ʼu aga ʼe kovi kia Lute ʼi tanā nonofo tokolua ʼaia ʼi te pōʼuli? Kailoa ia. Ko te meʼa ʼaē neʼe hoko neʼe ko he faʼifaʼitaki moʼoni ʼo te agatonu pea mo te ʼofa ki te ʼAtua. Pea ʼe toe malave ki totatou loto te hisitolia ʼaia.

Neʼe ko ai koa ia Lute? He koʼe neʼe ina fai te faʼahi ʼaia? Pea neʼe ko ai te tagata maʼu koloā ʼaia ko Poase?

“Ko Te Fafine Lelei ʼAupito”

Ko ni ʼu taʼu ki muʼa atu, neʼe tō te hoge ʼi Suta. Ko te famili Iselaele neʼe nātou toko fā—ko Elimeleke, mo tona ʼohoana ko Naomi, pea mo tonā ʼu foha e toko lua, ko Malone pea mo Kilione—neʼe nātou ʼolo ki te fenua ko Moape ʼaē neʼe kele lelei. Neʼe ʼohoana te ʼu foha ʼaia e lua mo te ʼu fafine Moapite, ko Lute pea mo Olefa. ʼI te ʼosi mamate ʼa te ʼu tagata ʼaia e toko tolu ʼi Moape, neʼe maʼu logo te ʼu fafine toko tolu ʼaia kua lelei te maʼuli ʼi Iselaele. Koia ko Naomi—ʼaē neʼe kua vitua, mo lotomamahi, neʼe mole kei ʼi ai hana fānau pea neʼe mole hona ʼu mokopuna—neʼe loto ia ke toe liliu ki tona fenua.—Lute 1:1-14.

ʼI tanatou ʼolo ki Iselaele, neʼe kole age e Naomi kia Olefa ke toe liliu ki tona fenua. Pea neʼe ʼui fēnei leva e Naomi kia Lute: “Sio! Ko tou tēhina ʼaē kua vitua neʼe toe liliu ki tana hahaʼi pea mo tona ʼu ʼatua. Toe liliu mo tou tēhina ʼaē kua vitua.” Kae neʼe ʼui fēnei e Lute: “Tuku tau kole mai ke ʼau līaki koe, . . . heʼe ko te faʼahi ʼaē ʼe ke ʼalu anai kiai ʼe ʼau ʼalu anai mo ʼau kiai . . . Ko tau hahaʼi ʼe liliu anai ko taku hahaʼi, pea ko tou ʼAtua ʼe liliu anai ko toku ʼAtua. Ko te koga meʼa ʼaē ʼe ke mate ai anai ʼe ʼau mate ai anai mo ʼau, pea ko te koga meʼa pe ʼaia ka tanu ai ʼau.” (Lute 1:15-17) Koia, ko te ʼu fafine vitua pea mo māsisiva ʼaia neʼe nā toe liliu ki Petelehemi. ʼI te fenua ʼaia, neʼe ōfo te hahaʼi ʼi te ʼofa pea mo te tokaga lelei ʼa Lute ki tana faʼe, ʼo nātou ʼui ʼo ʼuhiga mo ia “ ʼe lelei ʼaupito age kia [Naomi] ʼi he ʼu foha e toko fitu.” Ko ʼihi neʼe nātou ʼui ko “te fafine lelei ʼaupito.”—Lute 3:11; 4:15.

ʼI Petelehemi, ʼi te kamata tānaki ʼo te olose, neʼe ʼui fēnei e Lute kia Naomi: “Fakalelei siʼi ʼou loto, tuku ke ʼau ʼalu ki te ʼu gāueʼaga pea ke ʼau tae te pulapula ʼo ʼau mulimuli kia ia ʼaē ka lagi manavaʼofa anai kia ʼau.”—Lute 2:2.

Meʼa lelei he neʼe ʼalu ki te gāueʼaga ʼa Poase, ko te kāiga ʼo Elimeleke, te ʼohoana ʼo Naomi. Neʼe ina kole ki te tagata leʼo peʼe feala ke ʼalu ʼo tae ai te pulapula. Ko tana faʼa gāue ʼaia ʼo tae te pulapula neʼe fakaofoofo, pea neʼe vikiʼi e te tagata leʼo tana gāue kia Poase.—Lute 1:22-2:7.

Ko Te Tagata Hūfaga Pea Mo Ina Foaki He ʼu Lelei

Ko Poase neʼe tauhi fakamalotoloto kia Sehova. ʼI te uhu fuli, neʼe ʼalofa ki tana ʼu hahaʼi gāue ʼi te taʼukai, ʼo ina ʼui fēnei: “Ke nofo Sehova mo koutou,” pea neʼe nātou toe tali fēnei: “Ke tapuaki koe e Sehova.” (Lute 2:4) ʼI tana ʼosi tokagaʼi te faʼa gāue ʼa Lute pea mo ina ʼiloʼi tana agatonu kia Naomi, neʼe fai e Poase he ʼu fakatuʼutuʼu makehe ʼo ʼuhiga mo tana tae te pulapula. Moʼo fakanounou, neʼe ina ʼui fēnei kia Lute: ‘Nofo ʼi taku ʼu gāueʼaga; ʼe mole ʼaoga hau ʼalu ki te tahi ʼu gāueʼaga. Nofo ōvi ki taku ʼu fafine gāue, ʼe mole ke tuʼutāmakiʼia anai mo nātou. Neʼe ʼau fakatotonu ki te kau tagata ke mole nātou fāfā kia koe. Ka ke fia ʼinu, pea ʼe nātou ʼohu anai he moʼi vai maʼa koe.’—Lute 2:8, 9.

Neʼe tulolo ia Lute pea ina ʼui fēnei: ‘Neʼe lava feafeaʼi hau tokagaʼi ʼau, kae ko ʼau ko te matāpule?’ Neʼe tali fēnei e Poase: ‘Neʼe fakamatala katoa mai ia meʼa fuli pe neʼe ke fai maʼa te faʼe ʼo tou ʼohoana ʼi te ʼosi mate ʼo tou ʼohoana—tau mavae mai tau tāmai, mo tau faʼe, mo tou ʼu kāiga, pea mo tou fenua ʼo nofo ʼi te lotolotoiga ʼo ni ʼu hahaʼi neʼe mole heʼeki ke feʼiloʼiʼaki mo nātou. ʼOfa pe ke tapuakina e Sehova te aga ʼaē ʼe ke fai. Ke ina foaki atu kia koe te fakapale katoa.’—Lute 2:10-12.

Neʼe mole faiga e Poase ke ʼofa age ia Lute kia ia. Neʼe ina vikiʼi ia ia ʼaki he loto fakamalotoloto. Ko Lute neʼe agavaivai moʼoni, ʼo ina fakamālo ki tana fakafimālie ia ia. ʼI tana manatu, neʼe mole tau mo ia te taʼi agalelei ʼaia, pea neʼe hoko atu pe tana gāue kinakina. Ki muli age, ʼi te temi kai, neʼe pāui e Poase ia Lute, ʼo ina ʼui fēnei: ‘Hoho mai, kai te moʼi pane pea mo peke tau moʼi pane ki te vinika.’ Neʼe kai ʼo aʼu ki tana mākona pea neʼe ina taupau kehe he meʼa kai ke ʼave maʼa Naomi.—Lute 2:14.

ʼI te fakaʼosi ʼo te ʼaho, neʼe tānaki e Lute ia teitei lite olose e 22. Neʼe ina toʼo te ʼu olose ʼaia pea mo te meʼa kai ʼo toe liliu ki fale kia Naomi. (Lute 2:15-18) ʼI tana fiafia ʼaia ʼi te mahu ʼo te meʼa kai, neʼe fehuʼi fēnei e Naomi: “Neʼe ke ʼalu ʼo tae fulumeto ʼifea ʼi te ʼaho nei? . . . Ke tapuakina ia ia ʼaē neʼe ina tokagaʼi koe.” ʼI tana ʼiloʼi ʼaē neʼe ko Poase, neʼe ʼui fēnei e Naomi: “Ke tapuakina ia ia e Sehova, ʼaē neʼe mole puli tona lotoʼofa ki te kau maʼuli pea mo te kau mate. . . . Ko te tagata ʼaia ʼe kāiga mo tāua. Ko he tahi ʼi totā kau tagata totogi.”—Lute 2:19, 20.

Neʼe Ina Maʼu “He Koga Meʼa Ke Mālōlō Ai”

ʼI tana fia maʼu ʼaē “he koga meʼa ke mālōlō ai,” peʼe ko he ʼapi, maʼa tana taʼahine, neʼe fakaʼaogaʼi e Naomi te faigamālie ʼaia moʼo fakatuʼutuʼu he kole ke toe totogi ia ia, ʼo mulimuli ki te Lao ʼa te ʼAtua. (Levitike 25:25; Teutalonome 25:5, 6) Neʼe fakahā leva e Naomi kia Lute te fakatuʼutuʼu ʼaoga pea mo maʼuhiga ke ina fai—ke tokagaʼi ia ia e Poase. Neʼe teuteu pea neʼe ina ʼiloʼi lelei te ʼu palalau ʼaē ʼe tonu ke ina fai, ʼo ʼalu ai ia Lute ʼi te pōʼuli ki te kele ʼaē neʼe tae ai te pulapula ʼa Poase. Neʼe ina maʼu atu ia ia ʼe moe. Neʼe ina toʼo te kie ʼaē neʼe ʼuʼufi ʼaki tona ʼu vaʼe pea neʼe ina talitali ke ala ake.—Lute 3:1-7.

ʼI te ala ake ʼa Poase, pea ʼaki te meʼa ʼaia neʼe fai e Lute, neʼe mahino ai kia ia te faka ʼuhiga ʼo te kole ʼa Lute ke ina ‘folahi te potu ʼo tona kie ki tana fafine kaugana.’ ʼAki te meʼa ʼaia neʼe fai e Lute neʼe ʼiloʼi ai e te tagata Sutea matuʼa ʼaia, tona maʼua ʼi tona ʼuhiga tagata totogi, he neʼe ko te kāiga ʼo te ʼohoana ʼo Lute ʼaē kua mate, ia Malone.—Lute 3:9.

Neʼe mole fakapunamaʼuli te ʼalu age feiā ʼa Lute ʼi te pōʼuli. Tahi ʼaē meʼa, ko te tali ʼaē neʼe fai e Poase ki te kole ʼa Lute ke ina totogi ia ia neʼe mole fakapunamaʼuli. Neʼe lotolelei e Poase ke ina fakahoko te kole ʼaia ʼa Lute.

Neʼe lagi hā ʼi te leʼo ʼo Lute tana tuʼania, pea neʼe foimo fakaloto fīmālie ia ia e Poase, ʼo ina ʼui fēnei: “ ʼI te temi nei, toku ʼofafine, tuku tau mataku. Ko meʼa fuli ʼaē ka ke ʼui anai ʼe ʼau fai anai maʼa koe, koteʼuhi ko te hahaʼi fuli ʼe nātou ʼiloʼi ko koe ko te fafine lelei ʼaupito.”—Lute 3:11.

Neʼe tokagaʼi e Poase te ʼu gāue fakavikiviki ʼaē neʼe fai e Lute, ʼo hā lelei ʼi tana ʼui fēnei: “Ke tapuakiʼi koe e Sehova, toku ʼofafine. Neʼe ke fakahā tou lotoʼofa, ʼo lelei age tau fakahā fakamuli ʼaenī ʼi tau fakahā ʼuluaki.” (Lute 3:10) Neʼe ʼuluaki fakahā e Lute te lotoʼofa, peʼe ko te ʼofa agatonu, kia Naomi. Neʼe ina fakahā fakamuli te kalitate ʼaia ʼi tana tala age pe ko ai ia ia kia Poase, ʼaē neʼe kua matuʼa, he neʼe ko ia te tagata totogi. Neʼe ina loto ki he hōloga maʼa Malone, tona ʼohoana ʼaē kua mate, pea mo Naomi.

ʼE Mole Tali e Te Tagata Totogi Ke Ina Fakahoko Tona Maʼua

ʼI te ʼaho ake, neʼe pāui e Poase te tagata ʼo tona famili, ʼe mole tala mai tona higoa ʼaē neʼe ōvi age tana fakakāiga mo Naomi ia Poase. Ia muʼa ʼo te hahaʼi pea mo te ʼu matuʼa ʼo te kolo, neʼe ʼui fēnei e Poase: ‘Neʼe ʼau manatu neʼe tonu ke ʼau fakahā atu te fealagia ʼaē ke ke totogi mai ia Naomi te moʼi kele ʼo tona ʼohoana ko Elimeleke, heʼe tonu ke ina fakatau.’ Pea toe hoko atu fēnei e Poase: ‘ ʼE ke fia totogi koa te moʼi kele? Kapau ʼe mole ke loto kiai, pea ʼe ʼau totogi anai ʼau.’ Pea neʼe fakahā age e te tagata ʼaia ʼe ina toe totogi anai te moʼi kele.—Lute 4:1-4.

Kae neʼe punamaʼuli leva te tagata ʼaia. Neʼe ʼui fēnei leva e Poase ia muʼa ʼo te hahaʼi ʼaē neʼe mamata kiai: “Ko te ʼaho ʼaē ka ke totogi anai te gāueʼaga mai te nima ʼo Naomi, pea ʼe tonu anai ke ke toe totogi mo Lute, te ʼohoana ʼo te tagata ʼaē kua mate, ke maʼu e tona hōloga te higoa ʼo te tagata kua mate.” ʼI tana tuʼania ʼaē naʼa puli ai mo tona tofiʼa ʼoʼona, neʼe fakahā age e te tagata ʼe mole ina toe totogi anai, ʼo ina ʼui fēnei: “ ʼE mole feala ke ʼau toe totogi.”—Lute 4:5, 6.

ʼO mulimuli ki te agaʼi fenua, ko te tagata ʼaē neʼe mole feala ke ina toe totogi neʼe tonu ke ina huʼi tona savate pea mo ina foaki ki tona kāiga. Koia ʼi te ʼui ʼaē ʼa te tagata totogi kia Poase, “Totogi koe maʼa koe,” neʼe ina huʼi ai tona savate. Pea neʼe ʼui fēnei e Poase ki te ʼu matuʼa pea mo te hahaʼi: “ ʼE koutou sio mata ʼi te ʼaho nei ʼe ʼau totogi ia meʼa fuli ʼa Elimeleke pea mo meʼa fuli ʼa Kilione pea mo Malone mai te nima ʼo Naomi. Pea mo Lute te fafine Moapite, te ʼohoana ʼo Malone, ʼe ʼau totogi maʼa ʼaku ke liliu ko toku ʼohoana, ke hoko atu te higoa ʼo te mate ki tona hōloga . . . ʼE koutou sio mata kiai ia ʼaho nei.”—Lute 4:7-10.

Ko te hahaʼi fuli ʼaē neʼe tutuʼu ʼi te matapā neʼe nātou ʼui fēnei kia Poase: “Ke faka fealagia e Sehova ke hage te fafine ʼaenā ʼe hū ki tou ʼapi ko Lasele pea mo Lea, ʼaē neʼe nā laga toko lua te ʼapi ʼo Iselaele, pea mo ke fakahā tou maʼuhiga ʼi Efalata pea mo ʼiloa tou higoa ʼi Petelehemi.”—Lute 4:11, 12.

ʼAki te tapuakina ʼa te hahaʼi, neʼe ʼohoana ia Poase mo Lute. Neʼe ina fānauʼi te tama neʼe higoa ko Opete, pea neʼe liliu ai ia Lute mo Poase ko te ʼu kui ʼo te Hau ko Tavite pea mo Sesu Kilisito.—Lute 4:13-17; Mateo 1:5, 6, 16.

“Ko He Fakapale Katoa”

ʼI te hisitolia, ʼo kamata mai tana ʼalofa ki te hahaʼi gāue ʼo aʼu ki tana tali te maʼua ʼaē ke taupau te huafa ʼo te famili ʼo Elimeleke, neʼe fakahā e Poase neʼe ko he tagata makehe—ʼe ina fakahoko tana ʼu gāue pea ʼe ko he tagata ʼe pule. Pea neʼe ko he tagata neʼe loto lolomi, mo tui pea mo agatonu. Neʼe toe loto fia foaki ia Poase, mo agalelei, mo maʼa ʼi tana ʼu aga, pea mo fakalogo katoa ki te ʼu fakatotonu ʼa Sehova.

Neʼe makehe ia Lute ʼi tana ʼofa kia Sehova, mo tana ʼofa agatonu kia Naomi, pea mo tana faʼa gāue pea mo agavaivai. ʼE mole tou punamaʼuli ai ki te ʼui ʼa te hahaʼi ʼo ʼuhiga mo ia neʼe ko “te fafine lelei ʼaupito.” Neʼe mole kai ki “te pane ʼo te pikoʼelo,” pea ʼaki tana gāue kinakina, neʼe feala hana taupau te maʼuli ʼo tana faʼe ʼaē neʼe nofo ʼi te faigataʼaʼia. (Tāʼaga Lea 31:27, 31) ʼI tana fakahoko tona maʼua kia Naomi, neʼe lagi logoʼi e Lute te fiafia ʼi tana foaki.—Gaue 20:35; 1 Timoteo 5:4, 8.

 Ko te ʼu faʼifaʼitaki lelei ʼaia ʼe tou maʼu ʼi te tohi ʼo Lute! Neʼe manatuʼi e Sehova ia Naomi. Neʼe maʼu e Lute “he fakapale katoa” ʼi tana liliu ko he kui ʼa Sesu Kilisito. Neʼe fakapale ia Poase ʼaki “te fafine [ʼe] lelei ʼaupito.” Kia tatou ko te ʼu hahaʼi ʼaia ʼe ko he ʼu faʼifaʼitaki lelei ʼo te tui.

[Talanoa ʼo te pasina 26]

Ko He ʼAmanaki

Kapau ʼe hage kia koutou ʼe koutou maʼuʼuli ʼi he temi ʼe mole fakafiafia, pea ko te hisitolia ʼo Lute ʼe feala ke ina foaki atu he ʼamanaki. ʼE ʼasi mai ʼe ko te tohi maʼuhiga pea mo fakaʼosi ʼaia ʼo te tohi ʼo te Kau Fakamāu. ʼE fakamatala ʼi te tohi ʼo Lute pe neʼe fakaʼaogaʼi feafeaʼi e Sehova he fafine vitua agavaivai mai te fenua matāpule ʼo Moape ke tupu ai he hau maʼa tana hahaʼi. ʼI te ʼu meʼa ʼaē neʼe hoko ʼi te tohi ʼo te Kau Fakamāu, ko te tui ʼa Lute ʼe gigila ohage ko he mālama ʼo te temi ʼaia. ʼAki takotou lau te hisitolia ʼo Lute, ʼe feala ke koutou tui papau tatau aipe te lagi faigataʼa ʼo te ʼu temi, kae ʼe tokaga tuʼumaʼu te ʼAtua ki tana hahaʼi pea mo ina fakahoko tana ʼu fakatuʼutuʼu.