ʼE Koutou Kumi Koa, “ʼE ʼIfea Ia Sehova?”
“[Neʼe] nātou fakamamaʼo ia te ʼau . . . Pea neʼe mole nātou ʼui, ‘ʼE ʼifea ia Sehova?’”—Selemia 2:5, 6.
1. He koʼe ʼe lagaʼi e te hahaʼi te fehuʼi ʼaenī, “ʼE ʼifea ia te ʼAtua?”
“ʼE ʼIFEA ia te ʼAtua?” Ko te fehuʼi ʼaia ʼe fai e te tokolahi. Ko ʼihi ia nātou ʼaia ʼe nātou faiga ke nātou mahino ki te faʼahi maʼuhiga ʼo ʼuhiga mo te Tupuʼaga, peʼe nofo ʼifea? Ko ʼihi neʼe nātou fai te fehuʼi ʼaia he neʼe hoko kia nātou he tuʼutāmaki kovi, pe neʼe nātou tau mo he mamahi lahi pea ʼe mole nātou mahino pe koʼe ʼe mole fai e te ʼAtua he meʼa. Kae ko ʼihi neʼe mole nātou fai te ʼu fehuʼi ʼaia koteʼuhi ʼe mole nātou faka tui ʼe mole maʼuli moʼoni te ʼAtua.—Pesalemo 10:4.
2. Ko ai ia nātou ʼaē neʼe fua lelei tanatou kumi ia te ʼAtua?
2 ʼIo, ʼe tokolahi te hahaʼi ʼaē ʼe nātou faka tui ʼe lahi te ʼu fakamoʼoni ʼe ʼi ai te ʼAtua. (Pesalemo 19:1; 104:24) Ko ʼihi ia nātou ʼaia ʼe nātou mulimuli pe ki he faʼahiga lotu. Kae ko te ʼu toko lauʼi miliona hahaʼi ʼi te ʼu fenua kehekehe, ʼi tanatou manako lahi ki te moʼoni neʼe nātou kumi ia te ʼAtua moʼoni. Neʼe mole vaʼiganoa tanatou ʼu faiga koteʼuhi ʼe “mole mamao ia maia tatou takitahi.”—Gaue 17:26-28.
3. (a) ʼE nofo koa te ʼAtua ʼifea? (b) Koteā te faka ʼuhiga ʼo te fehuʼi faka Tohi-Tapu ʼaenī, “ʼE ʼifea ia Sehova?”
3 Ka maʼu moʼoni e he tahi ia Sehova, ʼe mahino kia ia ko te “ʼAtua ʼe ko te Laumālie,” ʼe fakapulipuli kia mata ʼo te tagata. (Soane 4:24, MN) Neʼe talanoa ia Sesu ki te ʼAtua moʼoni ʼo ina ʼui ko “taku Tamai [ʼe] i Selo.” Koteā tona faka ʼuhiga? Ko tona faka ʼuhiga ko te koga meʼa ʼaē ʼe nofo ai tatatou Tāmai ʼe ʼi selo, ʼi hona ʼaluʼaga fakalaumālie, ʼe māʼoluga, ohage ko te lagi ʼaē ʼe māʼoluga age ʼi te kele. (Mateo 12:50; Isaia 63:15) Logola tatatou mole lava sio ki te ʼAtua ʼaki totatou ʼu mata, ʼe ina faka fealagia kia tatou ke tou ʼiloʼi ia ia pea ke tou ako he ʼu tuʼuga meʼa ʼo ʼuhiga mo tana ʼu fakatuʼutuʼu. (Ekesote 33:20; 34:6, 7) ʼE tali ki te ʼu fehuʼi ʼa te hahaʼi fakamalotoloto, ʼaē ʼe fia mahino ki te ʼuhiga ʼo te maʼuli. ʼO ʼuhiga mo te ʼu meʼa ʼaē ʼe malave ki totatou maʼuli, ʼe ina foaki mai he tafitoʼaga lelei ke tou ʼiloʼi ai tana manatu ʼo ʼuhiga mo te ʼu meʼa ʼaia, pea mo vakaʼi peʼe ʼalutahi te ʼu meʼa ʼaē ʼe tou loto kiai pea mo tana ʼu fakatuʼutuʼu. ʼE ina loto ke tou fai ni ʼu kumi ʼo ʼuhiga mo te ʼu meʼa ʼaia pea ke tou faiga ke tou maʼu te ʼu tali kiai. ʼAki te polofeta ko Selemia, neʼe fakatonutonuʼi e Sehova te hahaʼi ʼo te Iselaele ʼāfea koteʼuhi neʼe mole nātou fai te faʼahi ʼaia. Neʼe nātou ʼiloʼi te huafa ʼo te ʼAtua, kae neʼe mole nātou kumi, “ʼE ʼifea ia Sehova?” (Selemia 2:6) Neʼe mole maʼuhiga kia nātou te fakatuʼutuʼu ʼa Sehova. Neʼe mole nātou kumi tana takitaki. Kapau ʼe tonu ke koutou fai ni ʼu tonu, peʼe lahi peʼe veliveli, koutou fai te fehuʼi ʼaenī, “ʼE ʼifea ia Sehova?”
Te Hahaʼi ʼAē Neʼe Nātou Kumi Te Takitaki ʼa Te ʼAtua
4. ʼE lava ʼaoga feafeaʼi kia tatou te faʼifaʼitaki ʼa Tavite ʼi tana kumi ia Sehova?
4 ʼI tana kei tūpulaga, ko Tavite, te foha ʼo Sese, neʼe tui mālohi kia Sehova. Neʼe ina ʼiloʼi ko Sehova ʼe ko “te ʼAtua maʼuli.” Neʼe sio tonu ia Tavite ki tona puipui e Sehova. ʼAki te tui pea mo te ʼofa ki “te huafa ʼo Sehova,” neʼe matehi e Tavite te tagata lahi ko Koliate ʼo te foʼi kautau Filisitini. (1 Samuele 17:26, 34-51) Kae ʼaki tana mālo ʼaia, neʼe mole tupu ai he falala fau ʼa Tavite kia ia totonu. Logola pe koteā he faʼahiga meʼa pe neʼe ina fai, kae neʼe mole ina ʼui ʼe tapuakina anai ia ia e Sehova. ʼI te ʼu taʼu ki muli age, ʼi te temi fuli pe neʼe kumi e Tavite ia Sehova mokā ina fai hana ʼu tonu. (1 Samuele 23:2; 30:8; 2 Samuele 2:1; 5:19) Neʼe haga faikole fēnei: “Fakahā mai kia te ʼau tou ʼu ala, Ê Sehova! Akoʼi mai kia te ʼau tou ʼu haʼeleʼaga. Fakahaʼele ʼau ʼi tau moʼoni pea mo akoʼi ʼau, heʼe ko koe ko toku ʼAtua ʼo te hāofaki. Pea neʼe ʼau falala aipe kia te koe ʼi te ʼaho katoa.” (Pesalemo 25:4, 5) ʼE ko he faʼifaʼitaki lelei kia tatou ke tou muliʼi!
5, 6. Neʼe kumi feafeaʼi e Sosafate ia Sehova ʼi te ʼu ʼaluʼaga kehekehe ʼo tona maʼuli?
5 ʼI te ʼu ʼaho ʼo te Hau ko Sosafate, ia te nima hau ʼo te hōloga hau ʼo Tavite, neʼe fakatahi te ʼu kautau ʼo te ʼu puleʼaga e tolu ke nātou tauʼi ia Suta. Ko Sosafate ʼi te temi ʼaē neʼe tau ai mo te fihifihia lahi ʼaia, “neʼe ina kumi ia Sehova.” (2 Fakamatala 20:1-3) Neʼe mole ko te hoki kumi ʼaia ʼo Sehova e Sosafate. Neʼe tekeʼi e te hau te tauhi ʼo Paale ʼaē neʼe fai mālohi e te kau ʼaposita ʼo te puleʼaga noleto ʼo Iselaele, pea neʼe ina fili ke haʼele ʼi te ʼu ala ʼo Sehova. (2 Fakamatala 17:3, 4) Koia ʼi te temi leva ʼaenī kua tau ai mo te fihifihia, neʼe ‘kumi feafeaʼi e Sosafate ia Sehova’?
6 ʼI tana faikole ʼaē neʼe ina fai ʼi Selusalemi ʼi muʼa ʼo te kaugamālie ʼi te temi maʼuhiga ʼaia, neʼe fakahā e Sosafate neʼe ina manatuʼi te mālohi māfimāfi ʼo Sehova. Neʼe ina fakakaukauʼi lahi te fakatuʼutuʼu ʼa Sehova, ʼi Tana kapu te tahi ʼu puleʼaga kae ina foaki te fenua ko he tofiʼa maʼa Iselaele. Neʼe mahino ki te hau neʼe ʼaoga te tokoni ʼa Sehova kia ia. (2 Fakamatala 20:6-12) ʼI te temi ʼaia neʼe tuku koa e Sehova ke maʼu ia ia? Ei. ʼAki te Levite ko Saasiele, neʼe foaki e Sehova te ʼu fakatotonu, pea ʼi te ʼaho ake neʼe Ina foaki te mālo ki Tana hahaʼi. (2 Fakamatala 20:14-28) ʼE tou lava ʼiloʼi lelei feafeaʼi ko Sehova ʼe ina tuku anai ia ia totonu ke koutou maʼu mokā ʼe koutou kumi tana takitaki?
7. Ko te ʼu faikole fea ʼaē ʼe logoʼi e te ʼAtua?
7 Ko Sehova ʼe mole fakapalatahi. ʼE ina fakaafe te hahaʼi ʼo te ʼatu puleʼaga fuli ke nātou kumi ia ia ʼi te faikole. (Pesalemo 65:2; Gaue 10:34, 35) ʼE ina ʼiloʼi te meʼa ʼaē ʼi te loto ʼo te hahaʼi ʼaē ʼe faikole age kia te ia. ʼE ina fakapapauʼi mai ʼe ina logoʼi te ʼu faikole ʼa te kau faitotonu. (Tāʼaga Lea 15:29) ʼE ina tuku ke maʼu ia ia e te hahaʼi ʼaē ki muʼa atu neʼe mole nātou tokagaʼi ia ia, kae ʼi te temi nei kua nātou kumi tana takitaki ʼaki te agavaivai. (Isaia 65:1) ʼE toe fagono foki ki te ʼu faikole ʼa nātou ʼaē neʼe mole nātou haga taupau tana lao, kae ʼi te temi nei kua nātou fakahemala ʼaki te agavaivai. (Pesalemo 32:5, 6; Gaue 3:19) Kae ʼi te temi ʼaē ʼe mole fakalogo ai te loto ʼo he tahi ki te ʼAtua, ko tana ʼu faikole ʼe vaʼiganoa. (Maleko 7:6, 7) Tou vakaʼi he ʼu faʼifaʼitaki.
Neʼe Nātou Kole Kae Neʼe Mole Tali Age
8. Koteā ʼaē neʼe mole tali ai e Sehova ia te ʼu faikole ʼa te Hau ko Saulo?
8 ʼI te ʼosi fakahā age e te polofeta ko Samuele ki te Hau ko Saulo kua līaki ia ia e te ʼAtua, koteʼuhi neʼe talagataʼa, neʼe tulolo ia Saulo ia muʼa ʼo Sehova. (1 Samuele 15:30, 31) Kae neʼe mole fakamalotoloto tana fakahemala. Ko Saulo neʼe ina loto ke fakaʼapaʼapaʼi ia ia e te hahaʼi, kae neʼe mole fia fakalogo ia ki te ʼAtua. Ki muli age, ʼi te temi ʼaē neʼe tauʼi ai ia Iselaele e te kau Filisitini, neʼe mole faiga fakamalotoloto ia Saulo ke tokoni age ia Sehova. ʼI tana mole maʼu he tali ki tana kole, neʼe ʼalu ia ki te fafine faifakalauʼakau, logola neʼe ina ʼiloʼi neʼe tauteaʼi e Sehova te aga ʼaia. (Teutalonome 18:10-12; 1 Samuele 28:6, 7) Moʼo fakanounou ia te faʼahi ʼaia, ia 1 Fakamatala 10:14 ʼe ʼui fēnei ʼo ʼuhiga mo Saulo: “Neʼe mole ina kumi ia Sehova.” Koteā tona tupuʼaga? Koteʼuhi ko te ʼu faikole ʼa Saulo neʼe mole fai ʼaki te tui. Koia, neʼe hage pe neʼe mole faikole.
9. Koteā ʼaē neʼe kovi ʼi te kole ʼa Setesiasi ia te takitaki ʼa Sehova?
9 ʼO toe feiā pe, ʼi te fakaōvi mai ʼo te ʼosi ʼo te tuʼu ʼo te puleʼaga saute ʼo Suta, neʼe toe lahi age te ʼu faikole ʼaē neʼe fai e te hahaʼi pea mo tanatou fakafehufehuʼi ia te kau polofeta ʼa Sehova. Kae ko te hahaʼi neʼe nātou fakatahiʼi te tauhi tamapua pea mo tanatou tauhi kia Sehova. (Sofonia 1:4-6) Pea ʼi tanatou mole kumi fakamalotoloto ia te ʼAtua, koia neʼe mole nātou teuteuʼi ai tonatou ʼu loto ke nātou fakalogo ki tona finegalo. Ko te Hau ko Setesiasi neʼe ina kolekole kia Selemia ke ina kumi ia Sehova maʼa ia. Neʼe kua ʼui age pe e Sehova ki te hau te meʼa ʼaē neʼe tonu ke ina fai. Ko te hau neʼe mole fakalogo ki te leʼo ʼo Sehova, koteʼuhi neʼe mole tui pea neʼe mataku ki te hahaʼi, koia neʼe mole foaki ai e Sehova he tali ʼe ʼalutahi anai mo te meʼa ʼaē neʼe fia logo kiai te hau.—Selemia 21:1-12; 38:14-19.
10. He koʼe neʼe kovi te faʼahiga kumi takitaki ʼa Soanane kia Sehova, pea koteā te ako ʼe tou maʼu mai tana hala?
10 ʼI te ʼosi fakaʼauha ʼo Selusalemi pea mo ʼave popūla te kau Sutea e te kautau Papiloni, neʼe fakatuʼutuʼu e Soanane ke ʼalu ki Esipito mo te kiʼi kūtuga Sutea ʼaē neʼe kei nonofo ʼi Suta. Neʼe kua fai tanatou fakatuʼutuʼu, kae ʼi muʼa ʼo tanatou mavae neʼe nātou kole kia Selemia ke faikole maʼa nātou pea mo kumi te takitaki ʼa Sehova. Kae ʼi tanatou mole maʼu te tali ʼaē neʼe nātou fia logo kiai, neʼe nātou mulimuli ki te fakatuʼutuʼu ʼaē neʼe kua nātou fai. (Selemia 41:16–43:7) ʼE koutou fakatokagaʼi ʼi te ʼu meʼa ʼaia he ʼu ako ʼe ʼaoga kia koutou, ke hage la mokā koutou kumi ia Sehova, ʼe ina tuku anai ia ia totonu ke koutou maʼu?
“Koutou Vakai Te Mea Ae e Lelei”
11. He koʼe ʼe tonu ke tou maʼuliʼi ia te koga tohi ʼo Efeso 5:10?
11 Ko te tauhi moʼoni ʼe mole gata ʼaki pe ki te foaki ʼo totatou maʼuli ʼi te papitema, mo tatatou kau ki te ʼu fono ʼo te kokelekasio, pea mo tatatou kau ki te minisitelio. ʼE ko totatou faʼahiga maʼuli katoa ʼaē ʼe fakamaʼua kiai. ʼI te ʼaho fuli ʼe tou tau mo te ʼu fakahala—ko ʼihi ʼe ū, ko ʼihi ʼe tou sio kiai—ʼe feala ke nātou fakamamaʼo tatou mai te ala ʼaē ʼe pipiki ki te ʼAtua. ʼE tou tauʼi feafeaʼi anai te ʼu fakahala ʼaia? ʼI tana faitohi ki te ʼu Kilisitiano ʼo Efeso, neʼe fakaloto mālohiʼi fēnei nātou e te ʼapositolo ko Paulo: “Koutou vakai te mea ae e lelei ki te Aliki.” (Efeso 5:10) ʼE lahi te ʼu fakamatala ʼi te Tohi-Tapu ʼe nātou fakahāhā te ʼu fua lelei ʼo te faʼahi ʼaia.
12. He koʼe neʼe mole leleiʼia e Sehova te temi ʼaē neʼe ʼave ai e Tavite ia te aleka ʼo te fuakava ki Selusalemi?
12 ʼI te ʼosi fakaliliu ʼo te aleka ʼo te fuakava ki Iselaele, pea mo fualoa tona tuku ʼi Kiliate-Sealime, neʼe loto e te Hau ko Tavite ke hiki te aleka ki Selusalemi. Neʼe felogoi mo te ʼu pule ʼo te hahaʼi pea neʼe ina ʼui age kia nātou ko te Aleka ʼe ʼave anai ‘mo kapau ʼe nātou lotolelei kiai pea mo tali e Sehova.’ Kae ki te faʼahi ʼaia neʼe mole muliʼi fakalelei e Tavite ia te finegalo ʼo Sehova. Kanapaula neʼe fakalogo lelei, neʼe mole ʼave te Aleka ʼi he saliote. Neʼe tonu ke ʼamo e te kau Levite Koatite, ohage ko tona kua fakatotonu e te ʼAtua. Logola ko Tavite neʼe ina kumi tuʼumaʼu ia Sehova, kae ʼi te lakaga ʼaia neʼe mole ina muliʼi fakalelei te ʼu fakatotonu, pea neʼe fua kovi. Ki muli age, neʼe fakamoʼoni fēnei e Tavite: “Ko Sehova totatou ʼAtua neʼe ina tāʼi tatou, he neʼe mole tou kumi ia ia ʼo mulimuli ki te lao.”—1 Fakamatala 13:1-3; 15:11-13; Faka au 4:4-6, 15; 7:1-9.
13. Koteā te fakamanatu ʼaē neʼe hivaʼi ʼi te temi ʼaē neʼe maui mālie ai te ʼave ʼo te Aleka?
13 ʼI te hiki mai leva ʼo te Aleka e te kau Levite, mai te ʼapi ʼo Opete-Etome ki Selusalemi, neʼe hivaʼi te hiva neʼe fai e Tavite. ʼI te hiva ʼaia ʼe talanoa ai ki te fakamanatu fakamalotoloto: “Koutou kumi ia Sehova pea mo tona mālohi, koutou kumi tuʼumaʼu ia ia. Koutou manatuʼi tana ʼu gāue fakaofoofo ʼaē neʼe ina fai, tana ʼu milakulo pea mo tana ʼu fakamāu ʼaē ʼe haʼu mai tona gutu.”—1 Fakamatala 16:11, 12.
14. Koteā te ako ʼe tou lava maʼu mai te faʼifaʼitaki lelei ʼa Salomone pea mai te ʼu hala ʼaē neʼe ina fai ki muli age ʼi tona maʼuli?
14 ʼI muʼa ʼo tana mate, neʼe tokoniʼi e Tavite tona foha ko Salomone: “Kapau ʼe ke kumi ia [Sehova], ʼe ina faka fealagia anai ke ke maʼu ia ia.” (1 Fakamatala 28:9) ʼI tona temi hau, neʼe ʼalu ia Salomone ki Kipeone, he neʼe tuʼu ai te falelā ʼo te fono, pea neʼe fai ai te ʼu sakilifisio kia Sehova. ʼI te kolo ʼaia, neʼe fakaafe fēnei e Sehova ia Salomone: “Kole mai! Koteā ʼaē ʼe tonu ke ʼau foaki atu?” Moʼo tali ki te kole ʼa Salomone, neʼe foaki lahi age e Sehova te poto pea mo te ʼatamai mālama moʼo fakamāu ia Iselaele, pea neʼe Ina toe foaki age mo te koloā pea mo te fakaʼapaʼapa. (2 Fakamatala 1:3-12) ʼI tana fakaʼaogaʼi te ʼu fakatuʼutuʼu ʼaē neʼe fakahā age e Sehova kia Tavite, neʼe laga e Salomone he fale lotu taulekaleka. Kae ʼo ʼuhiga leva mo te ʼu fafine ʼaē neʼe ina ʼohoanaʼi, neʼe mole kumi e Salomone ia Sehova. Neʼe ʼohoanaʼi e Salomone te ʼu fafine neʼe mole nātou tauhi kia Sehova. ʼI te ʼu taʼu ki muli age ʼo tona maʼuli, neʼe nātou fakamaliu tona loto mai ia Sehova. (1 Hau 11:1-10) Koia tatau aipe peʼe lagi tou māʼoluga, mo popoto, peʼe tou ʼatamai, ʼe maʼuhiga ke tou “vakai te mea ae e lelei ki te Aliki”!
15. ʼI te ʼamanaki ʼohofiʼi ʼo Suta e te Etiopea ko Sela, he koʼe neʼe lava falala ia Asa ʼo faikole kia Sehova ke ina hāofaki ia Suta?
15 ʼE toe ʼaoga ki te faʼahi ʼaia, te fakamatala ʼo te hau ko Asa, te mokoliha ʼo Salomone. Hili taʼu e hogofulu-ma-tahi ki te nofo hau ʼa Asa, ko te Etiopea ko Sela neʼe ina taki te kautau tagata e toko tahi miliona ke nātou ʼohofiʼi ia Suta. ʼE hāofaki anai koa e Sehova ia Suta? ʼI te ʼu taʼu e 500 tupu ki muʼa atu, neʼe fakahā lelei e Sehova pe koteā anai ka hoko ki tana hahaʼi, mo kapau ʼe nātou fakalogo kia te ia pea mo haga taupau tana ʼu fakatotonu, pea koteā anai ka hoko kia nātou mo kapau ʼe mole nātou fakalogo. (Teutalonome 28:1, 7, 15, 25) ʼI te kamataʼaga ʼo tona temi hau, neʼe toʼo e Asa ʼi tona puleʼaga te ʼu aletale pea mo te ʼu pou ʼaē neʼe fakaʼaogaʼi ki te tauhi hala. Neʼe ina fakaloto mālohiʼi te hahaʼi ke nātou “kumi ia Sehova.” Neʼe mole fakatalitali ia Asa ke hoko he tuʼutāmaki kovi moʼo fai ia te faʼahi ʼaia. Koia ʼaki tana tui kia Sehova, neʼe feala ke faikole ia Asa kia te ia ke ina fai he meʼa maʼa nātou. Neʼe koteā tona fua kia nātou? Neʼe mālo ʼaupito ia Suta.—2 Fakamatala 14:2-12.
16, 17. (a) Logola neʼe mālo ia Asa, koteā te fakamanatu neʼe foaki age e Sehova kia te ia? (b) ʼI te temi ʼaē neʼe fai ai te agavale e Asa, koteā te tokoni neʼe foaki age kia ia, pea neʼe ina tali feafeaʼi te tokoni ʼaia? (c) ʼE lava fua lelei feafeaʼi kia tatou mokā ʼe tou tokagaʼi ia te aga ʼa Asa?
16 Kae ʼi te liliu mālo mai ʼa Asa ʼi te tau, neʼe fekauʼi e Sehova ia Asalia ke ʼalu ki te hau pea mo ʼui fēnei age: “Koutou fakalogo mai, Ê Asa pea mo Suta katoa pea mo Pesamino! Ko Sehova ʼe nofo fualoa mo koutou mo kapau ʼe koutou nonofo mo ia; pea kapau ʼe koutou kumi ia ia, ʼe ina tuku anai ke koutou maʼu ia ia, kae kapau ʼe koutou līaki ia ia, pea ʼe ina līaki anai ia koutou.” (2 Fakamatala 15:2) ʼI tana toe maʼu tona lotomālohi, neʼe lagolago ia Asa ki te tauhi moʼoni. Kae hili kiai taʼu e 24, ʼi tana tahi tau, neʼe mole kumi e Asa ia Sehova. Neʼe mole ina vakaʼi te Folafola ʼa te ʼAtua, pea neʼe mole kei ina manatuʼi te ʼu meʼa ʼaē neʼe fai e Sehova ʼi te temi ʼaē neʼe ʼohofiʼi ai Suta e te kautau Etiopea. ʼAki he aga vale neʼe ina fai te fuakava mo Silia.—2 Fakamatala 16:1-6.
17 ʼUhi ko te faʼahi ʼaia, neʼe uga e Sehova ia Anani te tagata fai fakakikite ke ʼalu ʼo fakatonutonuʼi ia Asa. Neʼe kei feala pe kia Asa ke fetogi, ʼi tana logo ʼaē ki te fakamahinohino ʼo te manatu ʼa Sehova ki te meʼa ʼaia. Kae neʼe ʼita ia pea neʼe ina pilisoniʼi ia Anani ʼi te fale pilisoni. (2 Fakamatala 16:7-10) ʼI meʼa fakaʼofaʼofa! Kae e feafeaʼi kia tatou? ʼE tou kumi koa te ʼAtua kae ki muli age ʼe tou fakafisi ki tana tokoni? Mokā fakaʼaogaʼi e he tagata ʼāfea loto tokaga pea mo lotoʼofa ia te Tohi-Tapu moʼo tokoniʼi ʼo tatou he neʼe tou tō ki te ʼu fakahala ʼa te malamanei, ʼe tou loto fakafetaʼi koa ki te tokoni ʼofa ʼaē ʼe ina foaki mai kia tatou ke tou mahino ki “te mea ae e lelei ki te Aliki”?
ʼAua Naʼa Galo Kia Koutou Peʼe ʼIfea Ia Sehova
18. ʼE lava ʼaoga feafeaʼi kia tatou te ʼu palalau ʼaē neʼe fai e Eliu kia Sopo?
18 ʼI te ʼu temi faigataʼaʼia, māʼiape la mo he tahi ʼe tauhi mālohi kia Sehova, ʼe feala ke agahala. ʼI te temi ʼaē neʼe tau ai Sopo mo te mahaki fakalialia, te mate ʼo tana fānau pea mo puli tona ʼu koloā, pea mo tukugakoviʼi hala ia ia e tona ʼu kaumeʼa, neʼe kua tokaga fau ki tona ʼu mamahi. Neʼe fakamanatuʼi age e Eliu kia ia te faʼahi ʼaenī: “ʼE mole he tahi neʼe ina ʼui, ‘ʼE ʼifea ia te ʼAtua toku Tupuʼaga Lahi?’” (Sopo 35:10) Neʼe tonu kia Sopo ke toe liliu mai kia Sehova pea mo ina tokagaʼi Tana manatu ʼo ʼuhiga mo te ʼaluʼaga ʼaē neʼe tau mo ia. Neʼe tali e Sopo ʼaki te agavaivai te fakamanatu ʼaia, pea ʼe feala ki tana faʼifaʼitaki ke tokoni mai kia tatou ke tou fai feiā.
19. Koteā ʼaē neʼe fai tuʼumaʼu e te hahaʼi ʼo Iselaele?
19 Neʼe ʼiloʼi e te hahaʼi ʼo Iselaele te hisitolia ʼo te ʼu gāue ʼa te ʼAtua ʼo ʼuhiga mo tonatou puleʼaga. Kae ʼi te temi ʼaē neʼe nātou tau ai mo ni ʼu fihifihia, neʼe mole kei nātou manatuʼi tana ʼu gāue. (Selemia 2:5, 6, 8) Ka nātou tau mo ni ʼu tonu ʼi tonatou maʼuli, neʼe nātou hoko atu pe tanatou fai ia te ʼu meʼa ʼaē ʼe nātou leleiʼia kae mole nātou kumi, “ʼE ʼifea ia Sehova?”—Isaia 5:11, 12.
Koutou Haga Kumi, “ʼE ʼIfea Ia Sehova?”
20, 21. (a) Ko ai ia ʼaho nei ʼe hage ko Eliseo ʼo kumi ia te takitaki ʼa Sehova? (b) ʼE tou lava faʼifaʼitakiʼi feafeaʼi tanatou tui, pea ʼe lava ʼaoga feafeaʼi kia tatou?
20 ʼI te ʼosi ʼo te minisitelio ʼa Elia, ko Eliseo ʼaē neʼe kaugana kia te ia neʼe ina toʼo tona kofu faka polofeta ʼaē neʼe tō mai ia Elia, pea neʼe ʼalu ki te vaitafe ʼo Solotane, ʼo tāʼi te vai pea mo ʼui fēnei: “ʼE ʼifea ia Sehova te ʼAtua ʼo Elia, ʼio ia Ia?” (2 Hau 2:14) Neʼe tali kiai ia Sehova, ʼo ina fakahā ko tona laumālie neʼe kua ina tuku ifo kia Eliseo. Koteā te ako ʼe tou lava maʼu mai ai?
21 Neʼe hoko te ʼu meʼa feiā ʼi te temi nei. Ko ʼihi kau Kilisitiano fakanofo neʼe nātou takitaki te gāue fai faka mafola kua nātou mamate. Ko nātou ʼaē neʼe hinoʼi ki te takitaki, neʼe nātou vakavakaʼi te Tohi-Tapu, pea mo faikole ke takitaki nātou e Sehova. Neʼe nātou kumi tuʼumaʼu, “ʼE ʼifea ia Sehova?” Koia neʼe haga aipe ia Sehova ʼo takitaki tana hahaʼi pea mo fakatuputupu tanatou gāue. ʼE tou faʼifaʼitakiʼi koa tanatou tui? (Hepeleo 13:7) Kapau ʼe tou fai feiā, pea ʼe tou nofo ōvi anai ki te kautahi ʼa Sehova, ʼe tou tali anai tana takitaki, pea ʼe tou kau lahi anai ki te gāue ʼaē ʼe lolotoga fai ʼi te takitaki ʼa Sesu Kilisito.—Sakalia 8:23.
ʼE Koutou Tali Feafeaʼi Anai?
• He koʼe ʼe tonu ke tou kumi, “ʼE ʼifea ia Sehova?”
• ʼE tou lava maʼu feafeaʼi ia ʼaho nei te tali ki te fehuʼi ʼaenī, “ʼE ʼifea ia Sehova?”
• He koʼe neʼe mole tali ʼihi faikole neʼe fai moʼo kole te takitaki fakaʼatua?
• Koteā te ʼu faʼifaʼitaki faka Tohi-Tapu ʼaē ʼe nātou fakatātā lelei te ʼaoga ʼaē ke tou “vakai te mea ae e lelei ki te Aliki”?
[Paki ʼo te pasina 9]
Neʼe kumi feafeaʼi e te Hau ko Sosafate ia Sehova?
[Paki ʼo te pasina 10]
He koʼe neʼe ʼalu ia Saulo ki he fafine faifakalauʼakau?
[Paki ʼo te pasina 12]
Tou ako, mo faikole, pea mo metitasio ke tou ʼiloʼi ‘peʼe ʼifea ia Sehova’