“Koʼeni Totatou ʼAtua”
Ko te ʼu manatu ʼaē ʼe tou vakaʼi ʼi te ʼu alatike ako ʼaenī e lua ʼe fakatafito ki te tohi Approchez-vous de Jéhovah, ʼaē neʼe hā ʼi te ʼu fakatahi faka tisitilike ʼaē neʼe fai ʼi te malamanei katoa lolotoga te ʼu taʼu 2002/2003.—Vakaʼi te alatike “Neʼe Ina Fakafonu Toku Loto,” ʼi te pasina 20.
“Koʼeni totatou ʼAtua. Neʼe tou falala kia te ia, pea ʼe ina hāofaki anai tatou. Koʼeni ia Sehova.”—Isaia 25:9.
1, 2. (a) Neʼe fakahigoaʼi feafeaʼi e Sehova te pateliaka ko Apalahamo, pea koteā te fehuʼi ʼe feala ke tou fai ai? (b) ʼE fakahā lelei feafeaʼi mai e te Tohi-Tapu ʼe feala ke tou felogoi lelei mo te ʼAtua?
“TOKU kaumeʼa.” Neʼe fakahigoaʼi feiā ia te pateliaka ko Apalahamo, e Sehova, te Tupuʼaga ʼo te lagi mo te kele. (Isaia 41:8) Koutou fakakaukauʼi age muʼa—ʼe feala ki he tagata ke kaumeʼa mo te Tuʼi ʼAliki ʼo te ʼatulaulau! ʼE lagi koutou feʼekeʼaki anai, ‘ ʼE feala koa ke ʼau felogoi lelei feiā mo te ʼAtua?’
2 ʼE ʼui papau mai e te Tohi-Tapu ʼe feala ke tou felogoi lelei mo te ʼAtua. Neʼe felogoi lelei feiā ia Apalahamo mo Sehova he neʼe “tui . . . ki te Atua.” (Sakopo 2:23) ʼO toe feiā ia ʼaho nei, “ ʼe kaumeʼa [ia Sehova] mo te hahaʼi faitotonu.” (Tāʼaga Lea 3:32) Ia Sakopo 4:8, ʼe fakaloto mālohiʼi fēnei tatou e te Tohi-Tapu: “Koutou fakaovi ki te Atua pea e fakaovi atu anai kia koutou.” ʼE mahino mai, kapau ʼe tou faiga ke tou fakaōvi kia Sehova, pea ʼe fakaōvi mai anai kia tatou. Kae ko te ʼu palalau ʼaia, ko tona faka ʼuhiga koa, ko tatou—hahaʼi agahala—ʼaē ʼe tou ʼuluaki fakaōvi kia te ia? Kailoa ia! ʼE feala ke tou felogoi lelei mo Sehova ʼuhi pe he neʼe fai e totatou ʼAtua ʼofa te ʼu fakatuʼutuʼu maʼuhiga e lua.—Pesalemo 25:14.
3. Koteā te ʼu fakatuʼutuʼu e lua neʼe fai e Sehova ke feala ai ke tou liliu ko hona ʼu kaumeʼa?
3 ʼUluaki, neʼe fakatuʼutuʼu e Sehova ke “foaki [e Sesu] tona mauli moʼo totogi aki o te tokolahi.” (Mateo 20:28) Ko te sakilifisio faitotogi ʼaia ʼe ina faka fealagia ke tou fakaōvi ki te ʼAtua. ʼE ʼui fēnei e te Tohi-Tapu: “E tou ofa, koteuhi nee uluaki ofa ia kia tatou.” (1 Soane 4:19) Ei, ʼuhi ʼaē ko te ʼAtua neʼe “uluaki ofa ia kia tatou,” koia neʼe ina faka fealagia ai ke tou kaumeʼa mo ia. Lua, neʼe fakahā e Sehova totonu tona ʼulugaaga kia tatou. Ka tou kaumeʼa mo he tahi, ʼe tou felogoi lelei mo ia heʼe tou ʼiloʼi moʼoni ia ia, mo tou leleiʼia pea mo maʼuhiga kia tatou tona ʼu agaaga. Ko tona faka ʼuhiga, kapau la ko Sehova neʼe ko he ʼAtua ʼe mole ina fakahā mai peʼe ko ai ia ia pea mo tona ʼulugaaga, ʼe mahino ia ʼe mole feala anai ke tou fakaōvi kia te ia. Kae ʼe mole feiā, heʼe loto e Sehova ke tou ʼiloʼi ia ia. (Isaia 45:19) ʼI tana Folafola, te Tohi-Tapu, ʼe ina fakamatala mai tona ʼulugaaga ʼaki he ʼu kupu ʼe feala ke tou mahino kiai—ʼo fakamoʼoni ai ʼe ʼofa kia tatou, pea ʼe ina toe loto foki ke tou ʼiloʼi pea mo ʼofa kia te ia ohage ko hatatou Tāmai ʼe ʼi selo.
4. E feafeaʼi tokita loto ʼo ʼuhiga mo Sehova ʼi tatatou ʼiloʼi lelei tona ʼu kalitate?
4 Kua koutou sio koa ki he tamasiʼi ʼe ina fakahā tana tāmai ki tona ʼu kaumeʼa pea ʼe fiafia pea mo fia meamea ʼo ina ʼui fēnei: “Koʼeni taku tāmai”? ʼE toe feiā mo te kau atolasio ʼa te ʼAtua ʼo ʼuhiga mo Sehova. ʼE fakakikite e te Tohi-Tapu te temi ʼaē ka ʼui ai e te hahaʼi agatonu: “Koʼeni tomatou ʼAtua!” (Isaia 25:8, 9) Kapau ʼe tou ʼiloʼi lelei te ʼu kalitate ʼo Sehova, pea ʼe toe mālohi anai tatatou tui papau ʼe ko Sehova tatatou Tāmai pea mo totatou Kaumeʼa ʼaē ʼe lelei tokotahi. Ei, ko tatatou mahino ki te ʼu kalitate ʼo Sehova ʼe ina uga ai tatou ke tou fakaōvi kia te ia. Koia tou vakaʼi peʼe fakahā feafeaʼi e te Tohi-Tapu te ʼu kalitate maʼuhiga ʼo Sehova—te mālohi, te faitotonu, te poto pea mo te ʼofa. ʼI te alatike ʼaenī, ʼe tou talanoa anai ki te ʼu ʼuluaki kalitate e tolu.
“ ʼE Mālohi ʼAupito”
5. He koʼe ʼe tau mo feʼauga ke fakahigoa tokotahi pe ia Sehova ko “te Māfimāfi,” pea ʼe ina fakaʼaogaʼi feafeaʼi tona mālohi fakaofoofo?
5 Ko Sehova “ ʼe mālohi ʼaupito.” (Sopo 37:23) ʼE ʼui fēnei ia Selemia 10:6: “ ʼE mole ʼi ai he tahi ʼe tatau mo koe, Ê Sehova. ʼE ke lahi, pea ko tou huafa ʼe lahi ʼi te māfimāfi.” ʼO mole hage ko te ʼu meʼa ʼaē neʼe fakatupu, ko Sehova ʼe mole he tuʼakoi ʼo tona mālohi. ʼUhi ko te faʼahi ʼaia, ko ia tokotahi pe ʼaē ʼe fakahigoa ko “te Māfimāfi.” (Apokalipesi 15:3, MN ) ʼE fakaʼaogaʼi e Sehova tona mālohi fakaofoofo moʼo fakatupu, mo fakaʼauha, mo puipui pea mo toe laga. Tou vakaʼi pe te ʼu faʼifaʼitaki e lua: tona mālohi moʼo fakatupu ia meʼa fuli pea mo tona mālohi moʼo puipui.
6, 7. ʼE mālohi feafeaʼi te laʼā, pea koteā te moʼoni ʼe ina fakahā ai?
6 Ka koutou nonofo ʼi tuʼa ʼi he ʼaho ʼe laʼaina, ʼe logo feafeaʼi tokotou kili? ʼE ina logoʼi te māfana ʼo te laʼā. Kae ʼi tona fakahagatonu, ʼe koutou logoʼi te meʼa ʼaē neʼe fakatupu e Sehova ʼaki tona mālohi. E feafeaʼi te mālohi ʼo te laʼā? Ko te lotomalie ʼo te laʼā ʼe vela ʼaupito, heʼe ko ʼona degrés e 15 miliona Celsius. Kapau neʼe feala ke koutou toʼo he kiʼi koga pe ʼo te lotomalie ʼaia ʼo te laʼā ʼo ʼai ki te kele, pea ʼe mole he meʼa ʼe maʼuli anai ia kilometa e 150. ʼI te ʼu sekonita fuli, ko te mālohi ʼaē ʼe haʼu mai te laʼā ʼe tatau mo te paʼulu ʼo he ʼu foʼi pulu nukeleʼea e lauʼi teau miliona. Kae ko te kele ʼe vaha lelei mo te laʼā. Kapau neʼe ōvi fau kiai, pea ʼe magemage anai te kele, pea kapau neʼe mamaʼo fau, pea ʼe ʼaisi anai te kele katoa. Kapau la neʼe mole vaha lelei te tuʼu mamaʼo ʼo te kele mo te laʼā, ʼe mahino ia ʼe mole feala anai ke maʼuli he meʼa ʼi te kele.
7 Logola ʼe fakalogo tonatou maʼuli ki te laʼā, kae tokolahi te hahaʼi ʼe nātou meʼa noaʼi tana gāue. ʼE mole nātou ʼiloʼi te meʼa ʼaē ʼe feala ke nātou ako mai te laʼā. ʼE ʼui fēnei ia Pesalemo 74:16 ʼo ʼuhiga mo Sehova: “Neʼe ke teuteuʼi te meʼa fakamālama, ei te laʼā.” Ei, ʼe faka kolōlia e te laʼā ia Sehova, “te Tupuʼaga ʼo te lagi pea mo te kele.” (Pesalemo 146:6) ʼE kau ia te laʼā ʼi te ʼu meʼa ʼaē neʼe fakatupu, ʼaē ʼe tou akoʼi ai te toe mālohi lahi ʼo Sehova. Kapau ʼe lahi te ʼu meʼa ʼe tou ako ʼo ʼuhiga mo te mālohi ʼo Sehova moʼo fakatupu ia meʼa fuli pe, pea ʼe toe lahi ʼaupito anai tatatou fakaʼapaʼapa kia te ia.
8, 9. (a) Koteā te fakamatala matalelei ʼe ina fakahā mai kia tatou te loto ʼaē ʼa Sehova ke ina puipui pea mo tokaga ki tana kau atolasio? (b) Neʼe tokaga feafeaʼi te tagata tauhi ōvi ʼi te temi ʼo te Tohi-Tapu ki tana ʼu ōvi, pea koteā ʼaē ʼe tou ako ai ʼo ʼuhiga mo te Tagata Tauhi Ōvi Lahi?
8 ʼE toe fakaʼaogaʼi e Sehova tona mālohi moʼo puipui tana ʼu kaugana pea mo tokaga kia nātou. ʼE mālohi pea mo malave kia tatou te fakamatala ʼa te Tohi-Tapu ʼo ʼuhiga mo te ʼu fakapapau ʼa Sehova ke ina puipui tana hahaʼi. Ohage la, koutou vakaʼi ia Isaia 40:11. ʼE fakatatau ʼi henī ia Sehova ki he tagata tauhi ōvi pea ʼe fakatatau tana hahaʼi ki he ʼu ōvi. ʼE tou lau fēnei: “Ohage ko he tagata tauhi manu, ʼe ina fafaga anai tana faga ōvi. ʼAki tona nima, ʼe ina fakatahiʼi anai te ʼu akeno; pea ʼe ina fua anai nātou ʼi tona fatafata. ʼE ina takitaki fakalelei anai te ʼu ōvi ʼaē ʼe kei fāgai.” ʼE feala koa ke koutou fakakaukauʼi te fakamatala ʼaia?
9 ʼE mole lahi te ʼu manu ʼaē ʼe nātou hage ko te ʼu ōvi, ʼaē ʼe ko he ʼu manu ʼe vaivavai. Ko te tagata tauhi ōvi ʼi te temi ʼo te Tohi-Tapu neʼe tonu ke lototoʼa moʼo puipui tana ʼu ōvi mai te ʼu lupo, te ʼu uluso, pea mo te ʼu laione. (1 Samuele 17:34-36; Soane 10:10-13) Kae ʼi ʼihi temi neʼe tonu ki te tagata tauhi ōvi ke ina puipui pea mo tokaga ki te ʼu ōvi ʼaē neʼe ʼaoga ke gaohi fakaleleiʼi. Ohage la, ka fānau he ōvi ʼo mamaʼo mai te faga manu, ʼe puipui feafeaʼi anai e te tagata tauhi ōvi te kiʼi akeno ʼaē ʼe kei vaivai? Neʼe tonu ke ina fua, lagi lolotoga ni ʼu ʼaho, ʼi “tona fatafata”—ʼi tona kofu tuʼa ʼaē ʼe loa. Neʼe haʼu feafeaʼi te kiʼi akeno ki te fatafata ʼo te tagata tauhi ōvi? Neʼe feala ki te kiʼi akeno ke fakaōvi ki te tagata tauhi ōvi pea mo leʼei māmālie tona vaʼe. Kae neʼe ko te tagata tauhi ōvi ʼaē neʼe tonu ke punou, ʼo fua ake te kiʼi akeno ʼo hili ki tona fatafata. ʼE ko he paki matalelei ʼaia ʼo te lotolelei ʼo totatou Tauhi Ōvi Lahi ke ina puipui pea mo tokaga ki tana ʼu kaugana!
10. Koteā te puipui ʼaē ʼe foaki mai e Sehova ia ʼaho nei, pea he koʼe ʼe maʼuhiga ʼaupito te puipui ʼaia?
10 Neʼe mole fakapapau pe ʼe Sehova ʼe ina puipui anai tatou. ʼI te temi muʼa, neʼe ina fakahā ʼaki te milakulo ʼe feala ke ina “haofaki . . . te hahai agatonu mai te ahiahi.” (2 Petelo 2:9) E feafeaʼi ia ʼaho nei? ʼE tou ʼiloʼi ia ʼaho nei ʼe mole ina fakaʼaogaʼi tona mālohi moʼo puipui tatou mai te ʼu tuʼutāmaki fuli pe. Kae ʼe ʼi ai te meʼa lahi age ʼe ina foaki mai, ʼe ko he puipui fakalaumālie. Ko totatou ʼAtua ʼofa ʼe ina puipui tatou mai te ʼu mamahi fakalaumālie, ʼo ina foaki mai te meʼa ʼaē ʼe ʼaoga kia tatou ke tou kātakiʼi te ʼu ʼahiʼahi pea mo taupau tuʼumaʼu tatatou ʼu felogoi mo ia. Ohage la ʼe ʼui fēnei ia Luka 11:13: “Kapau leva, ko koutou agakovi, e koutou popoto i te fai meaofa lelei ki autou fanau, pea e lahi feafeai anai te foaki e te Tamai i Selo ia te Laumalie-Maonioni kia ia e ina kole kia te ia.” Ko te mālohi ʼaia ʼe feala ke ina foaki mai te ʼu kalitate ʼaoga moʼo tauʼi he ʼahiʼahi peʼe ko he fihifihia. (2 Kolonito 4:7) Koia ʼe tokaga ia Sehova ʼo taupau totatou maʼuli, mole ki he ʼu kiʼi taʼu pe, kae ki te heʼegata. Tou manatuʼi te ʼamanaki ʼaia, pea ʼe liliu anai kia tatou te ʼu mamahi fuli ʼo te tuʼu ʼaenī “ ʼo faka temi pe pea mo maʼamaʼa.” (2 Kolonito 4:17, MN ) ʼE mole tou fia fakaōvi koa la ki he ʼAtua ʼe ina fakaʼaogaʼi tona mālohi ʼaki te ʼofa ke fua lelei kia tatou?
“Ko Sehova ʼe Manako Ki Te Faitotonu”
11, 12. (a) He koʼe ko te faitotonu ʼa Sehova ʼe ina fakaōvi tatou kia te ia? (b) Koteā te manatu ʼa Tavite ʼo ʼuhiga mo te faitotonu ʼa te ʼAtua, pea ʼe fakafimālie feafeaʼi tatou e te ʼu palalau ʼaia ʼaē ʼe haʼu mai te ʼAtua?
11 ʼE fai tuʼumaʼu pe e Sehova te meʼa ʼaē ʼe faitotonu, pea ʼe mole fakapalatahi. Ko te faitotonu ʼa te ʼAtua ʼe mole ko he kalitate ʼe fefeka, heʼe mole tou fia fakaōvi anai kia te ia, kae ʼe ko he kalitate ʼe lelei, heʼe ina fakaōvi tatou kia Sehova. ʼE fakamatala lelei e te Tohi-Tapu te fakaloto fīmālie ʼo te kalitate ʼaia. Tou vakaʼi te ʼu ʼaluʼaga e tolu ʼe fakahā ai e Sehova tona faitotonu.
12 ʼUluaki, ko te faitotonu ʼa Sehova ʼe ina uga ia ia ke agatonu ki tana ʼu kaugana. Ko te tagata fai pesalemo ko Tavite, neʼe ina ʼiloʼi lelei te agaaga ʼaia ʼo te faitotonu ʼa Sehova. ʼAki te meʼa ʼaē neʼe hoko kia ia pea mo tana ako te ʼu ala ʼo te ʼAtua, koteā ʼaē neʼe ʼiloʼi ai e Tavite? Neʼe ina tala fēnei: “Ko Sehova ʼe ʼofa ki te faitotonu, pea ʼe mole ina līaki anai te tagata agatonu. ʼE ina taupau anai nātou ʼo aʼu ki he ʼu temi ʼe mole ʼiloʼi hona gataʼaga.” (Pesalemo 37:28) Ko he fakapapau fakaloto fīmālie! ʼE mole he temi, ʼe līaki anai e totatou ʼAtua te hahaʼi ʼaē ʼe agatonu kia te ia. ʼE tou lava falala ki tana kaumeʼa mo tatou pea mo tana ʼofa kia tatou. ʼE feala te faʼahi ʼaia ʼuhi ko tana faitotonu!—Tāʼaga Lea 2:7, 8.
13. ʼI te Lao ʼaē neʼe ina foaki ki Iselaele, ʼe hā feafeaʼi te tokaga ʼa Sehova kia nātou ʼaē ʼe nonofo ʼi te faigataʼaʼia?
13 Lua, ko te faitotonu ʼa te ʼAtua ʼe ina tokagaʼi te ʼu meʼa ʼaē ʼe ʼaoga kia ia ʼaē ʼe lotomamahi. Ko te Lao ʼaē neʼe foaki e Sehova ki Iselaele, ʼe hā lelei ai tana tokaga kia nātou ʼaē ʼe nonofo ʼi te faigataʼaʼia. Ohage la, neʼe fai e te Lao he fakatuʼutuʼu ke taupau e te hahaʼi te ʼu fānau ʼaē ʼe hala mo tāmai pea mo te ʼu fafine vitua. (Teutalonome 24:17-21) ʼI tana ʼiloʼi te faigataʼa ʼo te maʼuli ʼo te ʼu famili ʼaia, neʼe liliu ia Sehova totonu ko tonatou Tuʼi Fakamāu pea mo he Puipuiʼaga, ohage ko he tāmai. (Teutalonome 10:17, 18) Neʼe ina fai te fakatokaga ki te kau Iselaele, kapau ʼe nātou gaohi koviʼi te ʼu fafine vitua pea mo te fānau, pea ʼe ina logoʼi anai tanatou tagi. Ohage ko tona tuʼu ia Ekesote 22:22-24, ʼe ina ʼui fēnei: “ ʼE ulo anai toku ʼita.” Logola ko te ʼita ʼe mole ko te kalitate maʼuhiga ʼaia ʼo te ʼAtua, kae ʼe tupu te faʼahi ʼaia heʼe mole ina leleiʼia te aga heʼe faitotonu, tāfito la mokā ʼe fai ki he ʼu hahaʼi ʼe vaivavai.—Pesalemo 103:6.
14. Koteā te fakamoʼoni lahi ʼe hā ai ko Sehova ʼe mole fakapalatahi?
14 Tolu, ia Teutalonome 10:17, ʼe fakapapau mai e te Tohi-Tapu ko Sehova “ ʼe mole fakapalatahi pea ʼe mole ina tali he totogi fakafūfū.” ʼO mole hage ko te hahaʼi tokolahi ʼaē ʼe mālolohi pea mo maʼuhiga, ko Sehova ʼe mole mulimuli ia ki te ʼu koloā peʼe ki te meʼa ʼaē ʼe hā ki tuʼa. ʼE mole fakapalatahi peʼe filifili hahaʼi. Koʼeni te fakamoʼoni ʼo tana mole fakapalatahi: ko te fealagia ʼaē ke tou liliu ko tana kau atolasio moʼoni ʼo heʼegata, ʼe mole faka tuʼakoi pe ki he kūtuga e tokosiʼi. Kae ʼe ʼui fēnei ia Gaue 10:34, 35 (MN ): “Ko te ʼAtua ʼe mole fakapalatahi; kae ʼi te puleʼaga fuli pe ko te tagata ʼaē ʼe manavasiʼi kia te ia pea mo ina maʼuliʼi te faitotonu ʼe ina tali leleiʼi ia ia.” ʼE foaki te fealagia ʼaia ki te hahaʼi fuli pe, ʼo mole lauʼia tonatou tuʼulaga ʼi te gāue, tonatou lanu, peʼe ko te fenua ʼaē ʼe nātou nonofo ai. ʼE mole koa la ko te faitotonu moʼoni ʼaia? Koia ko he mahino lelei ki te faitotonu ʼa Sehova ʼe ina fakaōvi ai tatou kia te ia!
‘Te Loloto ʼo Te Poto ʼo Te ʼAtua!’
15. Koteā te poto, pea ʼe fakahā feafeaʼi e Sehova te kalitate ʼaia?
15 Neʼe uga te ʼapositolo ko Paulo ke ina ʼui fēnei ia Loma 11:33 (MN ): “Siʼi loloto ʼo . . . te poto pea mo te ʼatamai mālama ʼo te ʼAtua!” ʼE moʼoni, kapau ʼe tou vakavakaʼi te ʼu faʼahi kehekehe ʼo te poto lahi ʼo Sehova, pea ʼe tou fakaʼapaʼapa lahi anai kia te ia. Kae ʼe tou lava fakamahino feafeaʼi te kalitate ʼaia? ʼAki te poto, ʼe tou maʼu ai te ʼatamai mālama, te fakasiosio tonu, mo te mahino pea ʼe ina fakaʼaogaʼi te ʼu kalitate fuli ʼaia. ʼAki tona ʼatamai mālama lahi pea mo tana mahino loloto, ʼe fai tuʼumaʼu e Sehova te ʼu puleʼaki ʼaē ʼe lelei tokotahi, ʼo ina fakahoko ʼi hona ʼaluʼaga ʼe lelei ʼaupito.
16, 17. Ko te ʼu meʼa ʼaē neʼe fakatupu e Sehova ʼe nātou fakamoʼoni feafeaʼi ki tona poto lahi? Koutou tuku mai he faʼifaʼitaki.
16 Koteā ʼihi fakamoʼoni ʼo te poto lahi ʼo Sehova? ʼE ʼui fēnei ia Pesalemo 104:24: “ ʼE lahi tau ʼu gāue Ê Sehova! Neʼe ke fai tau ʼu gāue fuli ʼaia ʼaki te poto. ʼE mahu tou ʼu koloā ʼi te kele.” Koia kapau ʼe tou ʼiloʼi lelei te ʼu meʼa ʼaē neʼe fai e Sehova, pea ʼe tou fakaʼapaʼapa lahi anai ʼuhi ko tona poto. Neʼe lahi te ʼu meʼa ʼaē neʼe ako e te hahaʼi popoto ʼaki te ʼu meʼa ʼaē neʼe fakatupu e Sehova. ʼE ʼi ai mo te faʼahi ʼe higoa ko te chimie biomimétique, ʼe faiga ke ina faʼifaʼitakiʼi te ʼu meʼa ʼaē neʼe fakatupu.
17 Ohage la, lagi neʼe koutou feʼekeʼaki ʼo ʼuhiga mo te matalelei ʼo te filo ʼo te kavelevele. ʼE moʼoni ʼe ko he meʼa fakaofoofo. ʼE hage ko he ʼu kiʼi kauʼi filo ʼe maumau gafua kae ʼe nātou mālohi age ʼi te ukamea, mo mālohi age ʼi te ʼu kofu ʼaē ʼe puipui kita ki te ʼu foʼi pulu ʼo he fana. Koteā te faka ʼuhiga moʼoni ʼo te faʼahi ʼaia? Koutou fakakaukauʼi age muʼa mo kapau neʼe tui e te kavelevele he toe filo lahi ohage ko te kupega toho ʼaē ʼe fakaʼaogaʼi ʼi te ʼu vaka gelu. Ko te mālohi ʼo te filo ʼaia ʼe feala ke ina puke he foʼi vakalele ʼe lele vave. Ei, neʼe fai e Sehova ia meʼa fuli pe “ ʼaki te poto.”
18. ʼE hā feafeaʼi te poto ʼo Sehova ʼi tana fakaʼaogaʼi te ʼu tagata moʼo tohi tana Folafola, te Tohi-Tapu?
18 Ko te fakamoʼoni lahi ʼaē ʼe feala ke tou maʼu ʼo ʼuhiga mo te poto ʼo Sehova, ʼe tou maʼu ʼi tana Folafola, te Tohi-Tapu. Ko te ʼu tokoni poto ʼaē ʼe tou maʼu ʼi tona ʼu pasina, ʼe ina fakahā moʼoni mai te maʼuli ʼaē ʼe tonu ke tou mulimuli kiai. (Isaia 48:17) Kae ʼe tou toe sio ki te poto lahi tokotahi ʼo Sehova ʼi te faʼahiga tohi ʼo te Tohi-Tapu. ʼO feafeaʼi? ʼI tona poto, neʼe fili e Sehova ke ina fakaʼaogaʼi te ʼu tagata ke nātou tohi tana Folafola. Kanapaula neʼe ina fakaʼaogaʼi he kau ʼaselo ke nātou tohi te Folafola, pea ʼe tatau anai koa te malave ʼo te Tohi-Tapu ki te hahaʼi? ʼE moʼoni, ko te ʼu ʼaselo neʼe feala pe ʼaki tanatou faʼahiga sio ke nātou fakamatala peʼe feafeaʼi ia Sehova, pea neʼe feala ke nātou fakahā mai tanatou nonofo agatonu kia te ia. Kae neʼe feala moʼoni koa ke tou mahino ki te faʼahiga manatu ʼa te ʼu meʼa maʼuli fakalaumālie ʼe haohaoa, ʼaē ʼe lahi age tonatou poto ia tatou, tanatou ʼiloʼi te ʼu meʼa pea mo tonatou mālohi?—Hepeleo 2:6, 7.
19. Koteā te faʼifaʼitaki ʼaē ʼe ina fakahā mai ko te fakaʼaogaʼi ʼo he ʼu tagata moʼo tohi ia te Tohi-Tapu ʼe fakaloto māfana pea mo uga ai tatou ke tou fia lau?
19 Ko te fakaʼaogaʼi ʼo he ʼu tagata ke nātou faitohi ʼe foaki ai te loto māfana pea mo tou fia lau ai te Tohi-Tapu. Ko te ʼu tagata ʼaē neʼe nātou tohi te Tohi-Tapu neʼe tatau pe tonatou natula mo tatou. ʼUhi ko tonatou ʼuhiga agahala, neʼe nātou tau mo he ʼu ʼahiʼahi pea mo he ʼu fakaneke ʼe tatau mo tatou. ʼI ʼihi ʼaluʼaga, ʼe nātou faitohi ʼo ʼuhiga mo nātou totonu, te ʼu meʼa ʼe nātou logoʼi pea mo tonatou ʼu fihifihia. (2 Kolonito 12:7-10) Koia neʼe nātou tohi he ʼu kupu neʼe mole feala ke fakaʼaogaʼi e te ʼu ʼaselo. Ohage la, tou vakaʼi te ʼu palalau ʼa Tavite ʼaē ʼe tuʼu ia Pesalemo 51. ʼO mulimuli ki te meʼa ʼaē ʼe tohi ʼi te kamata ʼo te kapite, neʼe tohi e Tavite te pesalemo ʼaia kae kua ina fai tana agahala mamafa. Neʼe ina fakahā ia meʼa fuli ʼaē ʼi tona loto, ʼo fakahemala moʼoni pea mo kole ke fakamolemole age te ʼAtua. ʼE ʼui fēnei ʼi te vaega 2 pea mo te 3: “Fufulu katoa ʼau mai taku hala, pea mo fakamaʼa ʼau mai taku agahala. Koteʼuhi, ʼe ʼau ʼiloʼi taku ʼu talagataʼa, pea ko taku agahala ʼe nofo tuʼumaʼu ʼi ʼoku muʼa.” Koutou fakatokagaʼi mo te vaega 5: “Koʼeni, ʼi te mamahi neʼe fānauʼi ʼau ʼi te hala, pea ʼi te agahala neʼe fakatupu ʼau e taku faʼe.” ʼE toe ʼui fēnei ʼi te vaega 17: “Ko te ʼu sakilifisio ʼaē ʼe fai ki te ʼAtua, ʼe ko he ʼatamai lavea; ko he loto lavea mo taʼomia, Ê ʼAtua, ʼe mole ke fehiʼa anai kiai.” ʼE koutou logoʼi koa te tuʼania ʼa te tagata faitohi ʼaia? ʼE gata pe ki he tagata agahala neʼe feala ke ina fakahā he ʼu meʼa feiā.
20, 21. (a) He koʼe ʼe feala ke tou ʼui, logola ʼe ko he ʼu tagata ʼaē neʼe nātou tohi te Tohi-Tapu, kae ʼe tou maʼu ai te poto ʼo Sehova? (b) Koteā ʼaē ka tou vakaʼi anai ʼi te alatike ka hoa mai?
20 ʼAki tana fakaʼaogaʼi te ʼu tagata agahala ʼaia, neʼe foaki e Sehova te meʼa pe ʼaē ʼe feʼauga kia tatou—ko he fakamatala ʼe “haʼu mai te ʼAtua” kae ʼaki te faʼahiga sio ʼa te tagata, ke faigafua hatatou mahino kiai. (2 Timoteo 3:16, MN ) Ei, ko te kau tagata faitohi ʼaia neʼe takitaki nātou e te laumālie maʼoniʼoni. Koia neʼe nātou fakahā ai te poto ʼo Sehova, kae mole ko tonatou poto ʼo nātou. ʼE feala ke tou falala katoa ki te poto ʼaia, pea ʼe māʼoluga ʼaupito ia ʼi totatou poto, koia neʼe fakaloto mālohiʼi ai fēnei tatou e te ʼAtua: “Falala kia Sehova ʼaki tou loto katoa pea ʼaua naʼa ke falala ki tou ʼatamai totonu. ʼI tou ʼu ala fuli tokagaʼi ia ia, pea ko ia, ʼe ina fakatonutonuʼi anai tou ʼu ala foufou.” (Tāʼaga Lea 3:5, 6) Kapau ʼe tou tokagaʼi te tokoni ʼaia, pea ʼe tou fakaōvi lelei ai ki totatou ʼAtua poto.
21 Ko te ʼofa ʼe ko te kalitate ʼaē ʼe lelei pea mo matalelei ʼaupito ʼi te ʼu kalitate ʼo Sehova. ʼE tou vakaʼi anai ʼi te alatike ka hoa mai pe neʼe fakahā feafeaʼi e Sehova tona ʼofa.
ʼE Kei Koutou Manatuʼi Koa?
• Koteā te ʼu fakatuʼutuʼu neʼe fai e Sehova ke feala hatatou fakakaumeʼa mo ia?
• Koteā ʼihi faʼifaʼitaki ʼo te mālohi ʼo Sehova moʼo fakatupu pea mo puipui?
• ʼE fakahā feafeaʼi e Sehova tana faitotonu?
• ʼE tou sio feafeaʼi ki te poto ʼo Sehova ʼi te ʼu meʼa ʼaē neʼe ina fakatupu pea mo te Tohi-Tapu?
[Paki ʼo te pasina 10]
Ohage ko he tagata tauhi ōvi ʼe ina fua he kiʼi akeno ʼi tona fatafata, ko Sehova ʼe tokaga ʼaki te ʼofa ki Tana faga ōvi
[Paki ʼo te pasina 13]
ʼE tou sio ki te poto ʼo Sehova ʼi te ʼaluʼaga ʼaē neʼe tohi ai te Tohi-Tapu