Fakatahiʼi Ki Tokotou ʼAtamai Mālama Te Loto Lolomi
“Fakatahiʼi . . . ki tokotou ʼatamai mālama te loto lolomi.”—2 Petelo 1:5-8, MN.
1. Ko te ʼu tuʼuga fihifihia ʼaē ʼe tau mo te tagata, ʼe tupu koteā?
LOLOTOGA te fakatuʼutuʼu maʼuhiga neʼe fai moʼo tauʼi te toloke, neʼe tokoniʼi fēnei te kau tūpulaga ʼo Amelika: “Koutou fakafisi ki te toloke.” ʼE mahino ia ʼe lelei age anai te maʼuli, mo kanapaula neʼe fakafisi te hahaʼi fuli, mole gata pe ki te toloke, kae ki te ʼinu kava fakavalevale, mo te ʼu faʼahiga aga heʼe fakapotopoto pea mo heʼeʼaoga, mo te ʼu aga fakakākā ʼi te gāue, pea “mo te ʼu holi ʼo te kakano”! (Loma 13:14) Kae ʼe faigafua tuʼumaʼu koa te fakafisi ki te ʼu meʼa ʼaia?
2. (a) Ko te ʼu faʼifaʼitaki faka Tohi-Tapu fea ʼaē ʼe nātou fakahā ai ʼe mole ko he meʼa foʼou, te faigataʼa ʼo te fakafisi ki he meʼa? (b) Ko te ʼu faʼifaʼitaki ʼaia ʼe nātou fakaloto mālohiʼi tatou ke tou fai tea?
2 Mai tona ʼaluʼaga ʼaē ʼe faigataʼa ki te hahaʼi heʼe haohaoa fuli tanatou loto lolomi, koia ʼe tonu ke tou fia ʼiloʼi peʼe lava feafeaʼi hatatou tauʼi totatou ʼu vaivaiʼaga. ʼE talanoa te Tohi-Tapu ʼo ʼuhiga mo te ʼu hahaʼi ʼo te temi muʼa, neʼe nātou faiga mālohi ke nātou tauhi ki te ʼAtua, kae neʼe faigataʼa ʼi ʼihi temi tanatou fakafisi ki te ʼu aga heʼeʼaoga. Koutou manatuʼi ia Tavite pea mo te agahala ʼaē neʼe ina fai, ʼi tana tono mo Pati-Sepa. Neʼe tupu ai te mate ʼo te tamasiʼi ʼaē neʼe tupu mai tanā tono, pea mo te ʼohoana ʼo Pati-Sepa, logola neʼe mole he hala ʼa nāua ʼaia. (2 Samuele 11:1-27; 12:15-18) Peʼe koutou manatuʼi te ʼapositolo ko Paulo, ʼaē neʼe ina ʼui fakahagatonu fēnei: “Ko te meʼa ʼaē ʼe lelei ʼaē ʼe ʼau fakaʼamu kiai ʼe mole ʼau fai ʼau, kae ko te meʼa ʼaē ʼe kovi ʼaē ʼe mole ʼau fakaʼamu kiai, koʼena te meʼa ia ʼaē ʼe ʼau fai.” (Loma 7:19, MN ) ʼE koutou logoʼi koa ʼi ʼihi temi te faʼahi ʼaia? Neʼe toe hoko atu fēnei e Paulo: “ ʼE ʼau logoʼi ʼi te ʼu koga ʼo toku sino te tahi lao ʼe ina tauʼi te lao ʼo toku ʼatamai, pea ʼe ina taki fakapōpula ʼau ki te lao ʼo te agahala ʼaē ʼi te ʼu koga ʼo toku sino. Tagata fakaʼofaʼofa ʼaē ko ʼau! Ko ai ka ina hāofaki anai ʼau mai te sino ʼaē ʼe tuku ki te mate?” (Loma 7:22-24, MN ) Ko te ʼu faʼifaʼitaki faka Tohi-Tapu ʼe tonu ke nātou fakaloto mālohiʼi tatatou fakatotonu ʼaē ke tou haga faiga ke toe lahi age tatatou loto lolomi.
ʼE Tonu Ke Tou Ako Te Loto Lolomi
3. Koutou fakamahino pe koʼe ʼe mole feala ke tou ʼamanaki ʼe faigafua anai hatatou maʼu te loto lolomi?
3 Ko te loto lolomi, ʼaē ʼe kau ai te lava fakafisi ki he meʼa, ʼe tuʼu ia 2 Petelo 1:5-7, pea ʼe fakapipiki kiai te tui, mo te vilitute, mo te ʼatamai mālama, mo te faʼa kātaki, mo te pipiki ki te ʼAtua, mo te ʼofa fakatautehina pea mo te ʼofa. ʼI tatatou tutupu ake, ʼe mole tou maʼu katoa te ʼu kalitate fuli ʼaia. ʼE tonu ke tou gāueʼi te ʼu kalitate ʼaia. Ke tou maʼu te ʼu kalitate ʼaia ʼe tonu ke tou fakamalotoloto pea mo tou faiga lahi. ʼE tonu koa ke tou ʼamanaki ʼe faigafua anai kia tatou te maʼu ʼo te loto lolomi?
4. He koʼe ʼe mole faiga e ʼihi ke nātou loto lolomi, pea koteā ʼaē ʼe fakaʼiloga ai?
4 ʼE moʼoni, ʼe mole lagi faiga e te tokolahi ke nātou loto lolomi. ʼE nātou maʼuʼuli pe ʼo nātou mulimuli ki te ʼu meʼa ʼe nātou loto kiai, ʼo nātou fakalogo ki te meʼa ʼaē ʼe loto kiai tonatou kakano heʼe haohaoa, ʼo mole nātou tokagaʼi tona ʼu fua kovi—kia nātou peʼe ki te hahaʼi. (Suta 10) Kua ʼiloga tāfito ʼi te temi nei, tanatou mole feala pea mo tanatou mole fia fakafisi ki te ʼu meʼa ʼaē ʼe kovi. ʼE ko te fakaʼiloga ʼaia ʼe tou maʼuʼuli ʼi “te ʼu ʼaho fakamuli” ʼaē neʼe talanoa kiai Paulo ʼi tana fakakikite fēnei: “ ʼE ʼi ai anai te ʼu temi maʼuhiga ʼaupito pea mo faigataʼa. Heʼe ko te hahaʼi ʼe kaumeʼa pe anai mo nātou totonu, kaumeʼa mo te paʼaga, fiatuʼu, fialahi, laukovi ki te ʼAtua, . . . heʼe fakatātāʼofi.”—2 Timoteo 3:1-3, MN.
5. He koʼe ʼe faiga te kau Fakamoʼoni ʼa Sehova ki te loto lolomi, pea koteā te tokoni ʼaē kei ʼaoga ʼi te temi nei?
5 ʼE ʼiloʼi lelei e te kau Fakamoʼoni ʼa Sehova te faigataʼa ʼo te maʼu ʼo te loto lolomi. Ohage ko Paulo, ʼe mahino kia nātou ʼe fetauʼaki te holi ʼaē ke nātou fakafiafia te ʼAtua ʼo nātou mulimuli ki tana ʼu lekula, pea mo te aga ʼaē ʼe uga e tonatou kakano agahala ke nātou muliʼi. ʼUhi ko te faʼahi ʼaia, ʼe nātou fia ʼiloʼi moʼoni ai peʼe feafeaʼi hanatou mālo ʼi te fihi ʼaia. ʼI te 1916, ko te nusipepa ʼaenī ʼaē ʼe koutou lolotoga lau, neʼe talanoa ki “te lelei ʼaē kia tatou ke tou loto lolomi, mo tou lolomi takita ʼu manatu, takita ʼu palalau pea mo takita aga.” Neʼe tokoni mai ai ke tou manatuʼi ia Filipe 4:8. Ko te tokoni fakaʼatua ʼi te vaega ʼaia ʼe kei ʼaoga ʼi te temi nei, logola kua hili kiai taʼu e 2 000 tupu talu mai tona tohi, pea ʼe lagi faigataʼa age tona muliʼi ʼi te temi nei, ʼi te temi ʼaē neʼe tohi ai te tokoni ʼaia peʼe ʼi te taʼu 1916. Kae ʼe faiga mālohi ia te kau Kilisitiano ke nātou fakafisi ki te ʼu holi ʼo te mālama, heʼe nātou ʼiloʼi ai ʼe nātou fakalogo ki tonatou Tupuʼaga.
6. He koʼe ʼe mole tonu ke tou lotovaivai ʼi tatatou faiga ʼaē ke tou maʼu te loto lolomi?
6 ʼE tuʼu te loto lolomi ia Kalate 5:22, 23 pea ʼe kau ʼi “te fua o te Laumalie [maʼoniʼoni].” Kapau ʼe tou maʼu te kalitate ʼaia ʼo feiā mo “te ofa, te fiafia, te tokalelei, te kataki, te agalelei, te agaofa, te agatonu, [pea mo] te agamalu,” ʼe lahi anai tona ʼu fua lelei kia tatou. Ohage ko tona fakamahino e Petelo, kapau ʼe tou maʼu te ʼu kalitate ʼaia, pea ʼe ina tāʼofi anai tatou ke mole tou “tāunoa peʼe heʼe fua” ʼi tatatou tauhi ki te ʼAtua. (2 Petelo 1:8, MN ) Kae ʼe mole tonu ke tou līaki peʼe tou tukugakoviʼi ia tatou, mo kapau ʼe mole tou maʼu vave te ʼu kalitate ʼaia peʼe mole heʼeki katoa ia tatou ohage ko te meʼa ʼaē ʼe tou loto kiai. Neʼe lagi koutou tokagaʼi ʼi te faleako ʼe ʼi ai ʼihi tamaliki, ʼe nātou mālama vave ki te ʼu meʼa ʼaē ʼe nātou ako. Peʼe ʼi te fale gāue ko ʼihi ʼe nātou mālama vave age ki he gāue foʼou ʼe akoʼi age kia nātou. ʼO toe feiā pe, ko ʼihi ʼe vave age tanatou ako pea mo tanatou maʼuliʼi ia te ʼu kalitate faka Kilisitiano ʼi ʼihi age kau Kilisitiano. Ko te meʼa ʼaē ʼe maʼuhiga ko te taupau fakalelei ʼo te ʼu kalitate fakaʼatua ʼaia. ʼE feala ke tou fai te faʼahi ʼaia mo kapau ʼe tou fakaʼaogaʼi lelei te tokoni ʼaē ʼe foaki mai e Sehova ʼaki tana Folafola pea mo tana kokelekasio. ʼE maʼuhiga age hatatou haga faiga ke tou haʼele ki muʼa, ʼi hakita fakavilivili ʼo fakahoko hakita fakatuʼutuʼu.
7. Koteā ʼaē ʼe fakahā ai ʼe maʼuhiga te loto lolomi?
7 Logola tana tuʼu fakamuli ʼi te ʼu kalitate ʼo te laumālie, kae ʼe mole faka ʼuhiga ʼe mole maʼuhiga te loto lolomi ʼi te tahi ʼu kalitate. Heʼe tonu ke tou manatuʼi ko “te ʼu gāue [fuli] ʼo te kakano” ʼe feala ke tekeʼi mo kapau ʼe tou maʼu te loto lolomi. Kae ko te hahaʼi agahala ʼe nātou fia fakahoko “te ʼu gāue ʼo te kakano . . . ko te folonikasio, te heʼe maʼa, te māmio kovi, te tauhi tamapua, te fai ʼo te ʼu meʼa fakatemonio, te ʼu fehiʼa, te fefihiʼaki, te maheka, te ʼu ʼita kovi, te ʼu kē, te ʼu mavetevete, te ʼu magaʼi lotu.” (Kalate 5:19, 20, MN ) Koia ʼe tonu ai ke tou tauʼi tuʼumaʼu, ʼo tou fakatotonu ke puli te ʼu holi kovi ʼi totatou loto pea mo totatou ʼatamai.
ʼE Faigataʼa ʼAupito Kia ʼIhi
8. Koteā ʼaē ʼe feala ai ke faigataʼa ki ʼihi hanatou loto lolomi?
8 Maʼa ʼihi kau Kilisitiano ʼe faigataʼa ʼaupito tanatou maʼu te loto lolomi. Koteā tona tupuʼaga? ʼUhi ko te ako neʼe fai age e tanatou ʼu mātuʼa, peʼe ko te ʼu meʼa neʼe hoko kia nātou ki muʼa atu. Kapau ko te maʼu pea mo te fakahā ʼo te loto lolomi ʼe mole ko he meʼa faigataʼa kia tatou, pea ʼe feala ke tou fiafia ai. Kae ʼe mahino ia ʼe tou manavaʼofa pea mo lotomahino anai kia nātou ʼaē ʼe faigataʼa ʼaupito tanatou loto lolomi, tatau aipe peʼe hoko kia tatou he ʼu fihifihia ʼuhi ko tanatou mole loto lolomi. ʼUhi ko totatou ʼuhiga heʼe haohaoa, ko ai ia tatou ʼe tonu ke ina fakahā te loto lolomi?—Loma 3:23; Efeso 4:2.
9. Koteā te ʼu vaivaiʼaga ʼo ʼihi, pea ko te temi fea ʼaē ka pulihi anai ʼo talu ai te ʼu vaivaiʼaga ʼaia?
9 Koʼeni tona faʼifaʼitaki: ʼE lagi tou ʼiloʼi ʼihi kau Kilisitiano neʼe nātou līaki te suluka peʼe ko te fakaʼaogaʼi ʼo te ʼu toloke, ʼi ʼihi temi ʼe nātou holi mālohi ke nātou toe fakaʼaogaʼi. Peʼe faigataʼa ki ʼihi hanatou fakasiʼisiʼi tanatou kai peʼe ko tanatou ʼinu. ʼE faigataʼa ki ʼihi hanatou tāʼofi tanatou palalau, koia ʼe nātou tau lākahala ai ʼi tanatou ʼu palalau. Moʼo tauʼi te ʼu faʼahi ʼaia ʼe tonu ke tou faiga mālohi moʼo gāueʼi te loto lolomi. Koteā tona tupuʼaga? ʼE ʼui fakalelei fēnei ia Sakopo 3:2: “ ʼE lahi te ʼu lakaga ʼe tou tūkia fuli ai. Kapau ʼe mole tūkia he tahi ʼi tana ʼu palalau, ʼe ko he tagata haohaoa ia, pea ʼe feala hana lolomi ia tona sino katoa.” ʼE logoʼi mālohi e ʼihi te holi ʼaē ke nātou ʼolo ki te ʼu gaoʼi paʼaga. Peʼe lagi faigataʼa ki ʼihi hanatou lolomi tonatou ʼita. ʼE lagi ʼaoga anai he temi loaloaga moʼo tauʼi te ʼu vaivaiʼaga ʼaia. Logola ʼe feala ʼi te temi ʼaenī ke tou lavaʼi te ʼu faʼahi ʼaia, kae ʼe hoki pulihi anai te ʼu holi mālohi mokā tou maʼu anai te maʼuli haohaoa. ʼI te temi nei, kapau ʼe tou faiga ke tou maʼu te loto lolomi, ʼe lava tokoni mai anai te kalitate ʼaia ke ʼaua naʼa tou toe tō ki te maʼuliʼi ʼo te agahala. ʼI tatatou haga kātaki ʼi tatatou ʼu faiga, tou fetokoniʼaki ke mole tou fiu.—Gaue 14:21, 22.
10. (a) He koʼe ʼe faigataʼa tāfito ki ʼihi tanatou maʼu te loto lolomi ʼi te faʼahi ʼo te ʼu felāveʼi fakasino? (b) Koteā te fetogi lahi neʼe fai e te tēhina? (Vakaʼi te talanoa ʼi te pasina 16.)
10 Ko te tahi faʼahi ʼe faigataʼa ai ki ʼihi ke nātou loto lolomi, ʼe ko te faʼahi ʼo te ʼu felāveʼi fakasino. ʼE kau te ʼu felāveʼi fakasino ʼi te agaaga ʼo totatou faʼu e Sehova ʼAtua. Kae ʼi ʼihi temi ʼe faigataʼa tāfito ki ʼihi hanatou mulimuli ki te ʼu lekula ʼa te ʼAtua ʼo ʼuhiga mo te ʼu felāveʼi fakasino. ʼE lagi toe ʼāsili faigataʼa kia nātou ʼuhi heʼe nātou maʼu he holi mālohi ʼaupito ki te ʼu felāveʼi fakasino. ʼE tou maʼuʼuli ʼi he mālama ʼe manako ki te ʼu felāveʼi fakasino pea ʼe lahi te ʼu ʼaluʼaga ʼe ina fakamālohiʼi ai te ʼu holi ki te ʼu felāveʼi fakasino. ʼE feala ke tupu ai lolotoga he temi, he fihifihia ki te kau Kilisitiano ʼaē ʼe nātou fia nonofo selipatea, ke feala hanatou tauhi ʼāteaina ki te ʼAtua, kae mole fakaleluʼi nātou e te ʼu faʼahi ʼaē ʼe pipiki ki te nofo ʼohoana. (1 Kolonito 7:32, 33, 37, 38) Kae ʼo mulimuli ki te tokoni faka Tohi-Tapu ʼaē ‘ ʼe lelei age hanatou ʼohoana ʼi hanatou vela ʼi te fia ʼohoana,’ ʼe lagi nātou ʼohoana anai, pea ʼe mahino ia ʼe ko he faʼahi lelei. Pea ʼe nātou fia ʼohoana anai “ ʼi te ʼAliki pe,” ʼo mulimuli ki te tokoni ʼa te Tohi-Tapu. (1 Kolonito 7:9, 39, MN ) ʼE feala ke tou tui papau ʼe fiafia ia Sehova ʼi tana sio ʼaē ki tanatou fia taupau tana ʼu pelesepeto faitotonu. Ko tonatou ʼu kaumeʼa Kilisitiano ʼe nātou fiafia ʼi hanatou fakatahi mo he kau atolasio moʼoni ʼe nātou taupau te ʼu lekula māʼoluga ʼo te aga ʼaē ʼe tonu ke fai pea mo tanatou agatonu.
11. ʼE tou lava tokoni feafeaʼi ki he tēhina peʼe ko he tuagaʼane ʼe fia ʼohoana kae mole heʼeki ina maʼu hona hoa?
11 E feafeaʼi mo kapau ʼe mole ina maʼu he tahi ke nā ʼohoana? Koutou fakakaukauʼi age muʼa te lotomamahi ʼa he tahi ʼe fia ʼohoana kae mole heʼeki ʼohoana! ʼE lagi sio ki te ʼohoana ʼo tona ʼu kaumeʼa pea mo nātou maʼu he faʼahiga fiafia, kae kei ina lolotoga kumi hona hoa. Kia nātou ʼaē ʼe nonofo ʼi te ʼaluʼaga ʼaia, ʼe feala ke nātou fai tuʼumaʼu te agamāhani kovi ʼaē ko te mule. Tatau aipe peʼe koteā te ʼaluʼaga, kae ʼe mole loto e he Kilisitiano, logola neʼe mole ina loto kiai, ke ina faka lotovaivaiʼi he tahi ʼe lolotoga faiga ke nofo maʼa. Neʼe feala pe ke tou fakaloto vaivaiʼi he tahi, kae lagi neʼe mole tou loto kiai, ʼi hatatou palalau fēnei: “Ko ʼafea koa ʼaē ka ke ʼohoana ai?” ʼE mole lagi tou manatu kovi ʼi tatatou palalau feiā, kae ʼe lelei age hatatou lolomi totatou ʼalelo ʼo ʼuhiga mo te faʼahi ʼaia! (Pesalemo 39:1) Ko nātou ʼaē ʼe nonofo maʼa ʼi tonatou temi selipatea ʼe tonu ke tou vikiʼi ia nātou. Tou faiga ke tou fakaloto mālohi ia nātou, kae mole tou ʼui he ʼu meʼa ʼe feala ke nātou lotovaivai ai. Ohage la, ʼe feala ke tou faiga ʼo fakaafe he kau selipatea ki he kakai ʼa he ʼu hahaʼi aga fakapotopoto, peʼe ki he ʼu fakatahi lelei mo te tahi kau Kilisitiano.
Ko Te Loto Lolomi ʼi Te Nofo ʼOhoana
12. He koʼe ʼe tonu ke toe maʼu mo nātou ʼaē kua ʼohoana ia te loto lolomi?
12 Ka ʼohoana he tahi pea ʼe mole faka ʼuhiga leva ʼe mole kei ʼaoga ke loto lolomi ʼo ʼuhiga mo te ʼu felāveʼi fakasino. Ohage la, ko te holi ki te ʼu felāveʼi fakasino ʼa te tagata ʼohoana pea mo te fafine ʼohoana ʼe feala ke kehekehe ʼaupito. ʼI ʼihi temi ʼe feala ki te mahaki ʼa he tahi ʼi te taumatuʼa ke faigataʼa ai te ʼu felāveʼi fakasino, peʼe ke mole kei feala. Lagi tupu ko he ʼu meʼa neʼe hoko ki muʼa atu, ʼe feala ke faigataʼa ai ki he tagata ʼohoana ke mulimuli ki te fakatotonu ʼaenī: “Ke liufaki e te tagata ki te fafine tona maʼua, kae ke toe fai feiā pe foki mo te fafine ki tona ʼohoana.” ʼI te ʼaluʼaga ʼaia, ʼe lagi tonu ke lahi age te loto lolomi ʼo tona hoa. Kae ʼe tonu kia nāua toko lua ke nā manatuʼi te tokoni ʼofa ʼa Paulo ki te kau Kilisitiano ʼohoana: “ ʼAua naʼa koulua fefakafisiʼaki, gata pe mo kapau neʼe koulua lototahi kiai, ʼi he temi kua koulua fakatotonu kiai, ke feala ai hakolua fakaʼaogaʼi he temi ki te faikole pea mo feala ke koulua toe fakatahi, naʼa fakahalaʼi tuʼumaʼu koulua e Satana ʼuhi ko takotou mole loto tātāʼofi.”—1 Kolonito 7:3, 5, MN.
13. Koteā ʼaē ʼe feala ke tou fai maʼa nātou ʼaē ʼe nātou lolotoga faiga ke nātou maʼu te loto lolomi?
13 ʼE feala ke loto fakafetaʼi lahi te ʼu taumatuʼa mo kapau ʼe nā ako ke nā loto lolomi ʼi tanā ʼu felogoi ʼaia. Pea ʼe tonu ke nā lotomahino ki te ʼu kaugā atolasio ʼaē kei nātou faiga ke nātou fakahā te loto lolomi ʼi te faʼahi ʼaia. ʼE tonu ke tou manatuʼi tuʼumaʼu ʼo faikole kia Sehova, ke ina foaki he fakasiosio tonu ki totatou ʼu tēhina fakalaumālie, mo he lototoʼa, pea mo he mālohi ke hoko atu tanatou faiga ʼaē ke nātou fakahā te loto lolomi pea mo nātou tauʼi tanatou ʼu holi kovi.—Filipe 4:6, 7.
Koutou Fetokoniʼaki
14. He koʼe ʼe tonu ke tou manavaʼofa pea mo lotomahino ki totatou ʼu tēhina Kilisitiano?
14 ʼI ʼihi temi, ʼe lagi faigataʼa kia tatou hatatou mahino ki te kau Kilisitiano ʼaē ʼe nātou lolotoga faiga ke nātou maʼu te loto lolomi ʼi he faʼahi ʼe mole faigataʼa kia tatou. Kae ʼe kehekehe te hahaʼi. ʼE logoʼi vave e ʼihi he ʼu meʼa ʼi tonatou loto, kae ko ʼihi kailoa. Kae ki ʼihi ʼe faigafua age hanatou loto lolomi, pea ʼe mole ko he fihifihia lahi kia nātou, kae faigataʼa age ki ʼihi. Kae koutou manatuʼi, ko he tahi ʼe lolotoga faiga ke loto lolomi ʼe mole ʼui leva ko he tahi ʼe kovi. ʼE loto e totatou ʼu tēhina ke tou lotomahino pea mo manavaʼofa kia nātou. ʼE tou fiafia tuʼumaʼu anai mo kapau ʼe tou haga fakahā he manavaʼofa kia nātou ʼaē kei nātou faiga ke hikihiki tanatou fakahā te loto lolomi. ʼE feala ke tou sio ki te faʼahi ʼaia ʼi te ʼu palalau ʼa Sesu ʼaē ʼe tou maʼu ia Mateo 5:7.
15. He koʼe ʼe fakaloto fīmālie te ʼu palalau ia Pesalemo 130:3 ʼo ʼuhiga mo te loto lolomi?
15 ʼE mole he temi ʼe tou fia fakamāuʼi ai he Kilisitiano he neʼe ʼi ai te lakaga neʼe mole ina fakahā ai te ʼulugaaga faka Kilisitiano. ʼI meʼa fakaloto mālohi foki tatatou ʼiloʼi ʼaē logola ʼe sio ia Sehova ki te lakaga ʼaē lagi neʼe mole tou fakahā ai te loto lolomi, kae ʼe toe sio foki ki te ʼu lakaga ʼaē neʼe tou loto lolomi ai, tatau aipe peʼe mole sio kiai totatou ʼu tēhina mo tuagaʼane. ʼE fakaloto fīmālie hatatou haga manatuʼi te ʼu palalau ia Pesalemo 130:3: “Kapau neʼe ke sivi te ʼu hala, Ê Sah, Ê Sehova, ko ai koa ʼaē ʼe feala anai ke tuʼu?”
16, 17. (a) ʼE tou lava maʼuliʼi feafeaʼi ia Kalate 6:2, 5 ʼo ʼuhiga mo te loto lolomi? (b) Koteā ʼaē ka tou vakaʼi anai ʼo ʼuhiga mo te loto lolomi?
16 Ke tou fakafiafia ia Sehova, ʼe tonu ke tou maʼu takitahi te loto lolomi, kae ʼe feala ke tou maʼu te tokoni ʼo totatou ʼu tēhina Kilisitiano. Logola ʼe tonu ke tou tahi ʼamo tana kavega ʼo ʼuhiga mo totatou ʼu maʼua takitokotahi, kae ʼi te tahi age faʼahi, ʼe tou fetokoniʼaki ke tou tauʼi totatou ʼu vaivaiʼaga. (Kalate 6:2, 5) ʼE maʼuhiga kia tatou he tāmai peʼe ko he faʼe, tokita ʼohoana, peʼe ko hokita kaumeʼa ʼe ina tāʼofi tatou ke mole tou ʼolo ki te ʼu faʼahi ʼaē ʼe mole tonu ke tou ʼolo kiai, ke mole tou sioʼi te ʼu meʼa ʼaē ʼe mole tonu ke tou sioʼi, peʼe ke mole tou fai te ʼu meʼa ʼaē ʼe mole tonu ke tou fai. ʼE tokoni mai ke tou fakahā te loto lolomi.
17 Tokolahi te kau Kilisitiano ʼe lagi nātou tali anai te ʼu manatu ʼaē neʼe tou vakaʼi ʼo ʼuhiga mo te loto lolomi, kae lagi nātou manatu ʼe kei lahi te ʼu fetogi ʼe tonu ke nātou fai. ʼE nātou loto ke katoa age ia nātou te loto lolomi, ʼi hona ʼaluʼaga ʼe feala ke nātou aʼu kiai, ʼo mulimuli ki tonatou ʼuhiga agahala. ʼE koutou manatu feiā koa? Koteā ʼaē ʼe feala ke koutou fai ke koutou maʼu ai te faʼahi ʼaia ʼo te fua ʼo te laumālie ʼo te ʼAtua? Pea ʼe lava tokoni feafeaʼi atu e te faʼahi ʼaia ke koutou fakahoko ʼi he temi loaloaga takotou ʼu fakatuʼutuʼu faka Kilisitiano? ʼE tou vakaʼi anai te ʼu fehuʼi ʼaia ʼi te alatike ka hoa mai.
Kei Koutou Manatuʼi Koa?
He Koʼe Ko Te Loto Lolomi . . .
• ʼe maʼuhiga ke maʼu e te kau Kilisitiano?
• ʼe faigataʼa tāfito ki ʼihi?
• ʼe ʼaoga ʼi te nofo ʼohoana?
• ʼe ko he kalitate ʼe feala ke tou fetokoniʼaki ke tou maʼu?
[Talanoa ʼo te pasina 16]
Neʼe Ina Ako Ke Fakafisi
Ko te Fakamoʼoni ʼa Sehova ʼe maʼuli ʼi Siamani neʼe ko tana gāue ko te vakaʼi ke haʼele lelei te ʼu polokalama televisio mo lātio. Neʼe tonu ke ina vakavakaʼi te ʼu polokalama televisio pea mo lātio kehekehe e 30. Kapau neʼe mole haʼele lelei, neʼe tonu ke ina sioʼi te polokalama ke feala ke ina maʼu te tupuʼaga ʼo tana mole haʼele. ʼE ina ʼui fēnei: “Neʼe teitei hoko tuʼumaʼu te ʼu fihifihia ʼi te temi ʼaē neʼe ʼasi mai ai he ʼu agamālohi peʼe ko he ʼu felāveʼi fakasino. Lolotoga ni ʼu ʼaho peʼe ko ni ʼu vāhaʼa, neʼe mole feala haku pulihi ʼi toku ʼatamai te ʼu felāveʼi fakasino ʼaē neʼe ʼau sio kiai.” ʼE ina tala neʼe fua kovi te faʼahi ʼaia ki tona ʼaluʼaga fakalaumālie: “Neʼe ʼau tau ʼita, heʼe ʼi taku sio ki te ʼu agamālohi, neʼe liliu ʼo faigataʼa ai kia ʼau ke ʼau loto lolomi. Neʼe mā fihi mo toku ʼohoana ʼuhi ko te ʼu felāveʼi fakasino ʼaē neʼe ʼau sio kiai. ʼI te ʼaho fuli pe neʼe tonu ke ʼau tauʼi te ʼu faʼahi ʼaia. Ke ʼaua naʼa ʼau tō ki te ʼu hele ʼaia, neʼe ʼau fakatotonu ke ʼau kumi he tahi gāue, tatau aipe pe neʼe veliveli age toku totogi. Mole faʼa fualoa kiai, neʼe ʼau maʼu te tahi gāue. Neʼe ʼau maʼu te meʼa ʼaē neʼe ʼau loto kiai.”
[Paki ʼo te pasina 15]
Ko te ʼatamai mālama ʼaē ʼe haʼu mai te ako ʼo te Tohi-Tapu ʼe tokoni mai ke tou loto lolomi