Tou Lototoʼa Ohage Ko Selemia
“Falala kia Sehova, ke ke lotomālohi, pea ke mālohi tou loto! ʼIo, falala kia Sehova.”—Pesalemo 27:14.
1. Koteā te tapuakina lahi ʼe maʼu e te kau Fakamoʼoni ʼa Sehova?
ʼE NONOFO te kau Fakamoʼoni ʼa Sehova ʼi te palatiso fakalaumālie. (Isaia 11:6-9) ʼI te mālama maveuveu ʼaenī, ʼe nātou maʼu mo tonatou ʼu tēhina te ʼaluʼaga makehe ʼi te faʼahi fakalaumālie, ʼo nātou maʼuli ʼi te tokalelei mo Sehova ʼAtua pea mo nātou felogoi lelei. (Pesalemo 29:11; Isaia 54:13) Pea ʼe tuputupu tonatou palatiso fakalaumālie. Ko nātou fuli ʼaē ʼe nātou ‘fai mo tonatou loto katoa te finegalo ʼo te ʼAtua’ ʼe nātou kau ki te fakalahi ʼo te palatiso ʼaia. (Efeso 6:6) ʼO feafeaʼi? Kapau ʼe tou mulimuli ki te ʼu pelesepeto faka Tohi-Tapu pea mo akoʼi te hahaʼi ke nātou fai ia te faʼahi ʼaia, pea ʼe tou fakaafe mo te hahaʼi ʼaia ke nātou maʼu te ʼu tapuakina ʼo te palatiso ʼaia.—Mateo 28:19, 20; Soane 15:8.
2, 3. Koteā ʼaē ʼe ʼutakiʼi e te kau Kilisitiano moʼoni?
2 Kae ʼe mole ʼui leva ʼe mole kei tou tau mo ni ʼu faigataʼaʼia ʼi tatatou maʼuʼuli ʼi te palatiso fakalaumālie. Kei tou heʼe haohaoa, mo mahahaki, mo matutuʼa, pea mo mamate. Tahi ʼaē meʼa, ʼe tou sio mata ki te hoko ʼo te ʼu lea faka polofeta ʼo ʼuhiga mo te ʼu “aho fakamuli.” (2 Timoteo 3:1) ʼE mole hāo te kau Fakamoʼoni ʼa Sehova mai te ʼu mamahi ʼaē ʼe hoko ʼi te malamanei katoa, ia te ʼu tau, te ʼu fakapō, te mahaki, te hoge, pea mo ʼihi age mamahi.—Maleko 13:3-10; Luka 21:10, 11.
3 ʼO hilifaki mai ki totatou maʼuli heʼe haohaoa pea mo te ʼu temi faigataʼa, ʼe mahino kia tatou ʼi tuʼa atu ʼo te palatiso fakalaumālie ʼaē ʼe maʼu ai te ʼofa, ʼe kei hoko kia tatou te ʼu fakafeagai lahi mai te hahaʼi ʼo tuʼa. Neʼe fakatokaga fēnei ia Sesu ki tana kau tisipulo: “Mai tona ʼuhiga ʼaē ʼe mole koutou kau ʼi te malamanei, ka neʼe ʼau filifili koutou mai te lotolotoiga ʼo te malamanei, ko te tupuʼaga la ʼaia ʼo te fehiʼa ʼa te malamanei kia koutou. Koutou manatuʼi te folafola ʼaē neʼe ʼau tala atu kia koutou: Ko he tagata kaugana ʼe mole lahi ake ia ʼi tona pule. Kapau neʼe nātou fakatagaʼi ʼau, pea ʼe nātou fakatagaʼi anai mo koutou.” (Soane 15:18-21, MN ) ʼE hoko te ʼu faʼahi ʼaia ʼi te temi nei. Tokolahi te hahaʼi ʼe mole heʼeki nātou mahino ki tatatou tauhi peʼe mole heʼeki nātou tali. Ko ʼihi ʼe nātou palalau kovi, mo manukinuki, pea ohage ko te ʼui ʼa Sesu ʼe nātou fehiʼa kia tatou. (Mateo 10:22) ʼI te agamāhani, ʼi te televisio pea mo te lātio ʼe tala ai te ʼu loi ʼo ʼuhiga mo tatou. (Pesalemo 109:1-3) ʼIo, ʼe tou tau mo te ʼu fihifihia, pea ʼe lagi feala ai ki ʼihi ia tatou ke nātou lotovaivai. E feafeaʼi hatatou ʼutakiʼi te ʼu meʼa ʼaia?
4. ʼE tou maʼu maifea te tokoni moʼo ʼutakiʼi totatou ʼu mamahi?
4 ʼE tokoni mai anai Sehova kia tatou. ʼAki te tokoni ʼa te laumālie maʼoniʼoni, neʼe ʼui fēnei e te tagata fai pesalemo: “ ʼE lahi te ʼu malaʼia ʼo te tagata faitotonu, kae ko Sehova ʼe ina faka ʼāteaina ia ia mai te ʼu faʼahi fuli.” (Pesalemo 34:19; 1 Kolonito 10:13) Tokolahi ia tatou ʼe tou lava fakamoʼoni, ka tou falala katoa kia Sehova, pea ʼe ina foaki mai tona mālohi moʼo kātakiʼi te ʼu mamahi fuli. Ko totatou ʼofa kia te ia pea mo te fiafia ʼaē ʼe tou maʼu, ʼe tokoni mai kia tatou ke tou tauʼi te lotovaivai pea mo te mataku. (Hepeleo 12:2) Koia, logola te ʼu fihifihia, kae ʼe tou haga nofo mālohi aipe.
Neʼe Lotomālohi Selemia ʼi Te Folafola ʼa Te ʼAtua
5, 6. (a) Koteā te ʼu faʼifaʼitaki ʼe tou maʼu ʼo ʼuhiga mo te kau atolasio moʼoni neʼe nātou lava ʼutakiʼi? (b) Neʼe koteā te tali ʼa Selemia ʼi tona pāuiʼi ke liliu ko he polofeta?
5 ʼI te lolotoga ʼo te hisitolia, neʼe fiafia pe te ʼu kaugana agatonu ʼa Sehova logola te ʼu faigataʼaʼia ʼaē neʼe tau mo nātou. Ko ʼihi neʼe maʼuʼuli ʼi te ʼu temi ʼaē neʼe fakahoko ai e Sehova tana hāūhāū ki te hahaʼi heʼe agatonu. Ko Selemia neʼe kau ʼi te kau agatonu ʼaia pea mo te tokosiʼi ʼo tona temi, ʼo feiā mo te kau Kilisitiano ʼo te ʼuluaki sēkulō. Neʼe tohi te ʼu faʼifaʼitaki ʼaia ʼi te Tohi-Tapu moʼo fakaloto mālohiʼi ʼo tatou, pea ʼe tou maʼu ai te ʼu tuʼuga ako maʼa tatou. (Loma 15:4) Ohage ko te faʼifaʼitaki ʼaenī ka tou vakaʼi ʼo Selemia.
6 ʼI tona temi tūpulaga neʼe pāuiʼi ia ia ke liliu ko he polofeta ʼi Suta. Neʼe mole ko he gāue faigafua. Tokolahi neʼe nātou tauhi ki te ʼu ʼatua hala. Logola te agatonu ʼa Sosiasi ʼaē neʼe hau ʼi te temi ʼaē neʼe kamata ai te minisitelio ʼo Selemia, kae neʼe mole agatonu te ʼu hau fuli ʼaē neʼe hoa kia ia, pea ko te tokolahi ʼo te kau polofeta pea mo te kau pelepitelo, ʼaē neʼe tonu ke nātou akoʼi te hahaʼi, neʼe mole nātou lagolago ki te moʼoni. (Selemia 1:1, 2; 6:13; 23:11) Kae neʼe feafeaʼi ia Selemia ʼi te temi ʼaē neʼe pāuiʼi ai ia ia e Sehova ke liliu ko he polofeta? Neʼe mataku! (Selemia 1:8, 17) Neʼe manatuʼi e Selemia tana ʼuluaki tali: “Neʼe ʼau ʼui: ‘Kailoa, Ê Tuʼi ʼAliki ko Sehova! ʼE mole ʼau poto ʼi te palalau, heʼe kei ʼau tamasiʼi.’ ”—Selemia 1:6.
7. Neʼe feafeaʼi te aga ʼa te hahaʼi ʼo te telituale kia Selemia, pea neʼe ina tali feafeaʼi kiai?
7 Ko te hahaʼi ʼo te telituale ʼo Selemia neʼe mole nātou tali leleiʼi tana gāue, pea neʼe tuʼa lahi tana felāveʼi mo te ʼu fakafeagai mālohi. ʼI te tahi ʼaluʼaga, neʼe fepataki ia ia e te pelepitelo ko Pasule pea mo ina pilisoniʼi ia ia. Neʼe fakamatala fēnei e Selemia te ʼu meʼa ʼaē neʼe ina logoʼi ʼi tona loto: “Neʼe ʼau ʼui: ‘ ʼE mole ʼau toe talanoa anai ʼo ʼuhiga mo ia [Sehova], pea ʼe mole ʼau toe palalau anai ki tona huafa.’ ” Neʼe lagi koutou manatu feiā ʼi ʼihi temi—ke koutou līaki ia meʼa fuli. Koutou fakatokagaʼi te meʼa ʼaē neʼe tokoni kia Selemia ke haga faʼa kātaki. Neʼe ina ʼui fēnei: “[Ko te folafola ʼa te ʼAtua, peʼe ko tana logo] neʼe hage ʼi toku loto ko he afi kakaha ʼe nofo ʼi toku ʼu hui; pea neʼe ʼau fiu ʼi tona tāʼofi, pea neʼe mole feala haku kātakiʼi.” (Selemia 20:9) ʼE malave feiā koa kia koutou te Folafola ʼa te ʼAtua?
Te ʼu Kaugā Gāue ʼo Selemia
8, 9. (a) Neʼe koteā te vaivaiʼaga ʼo Ulia, pea neʼe koteā tona fua? (b) He koʼe neʼe lotovaivai ia Paluke, pea neʼe tokoniʼi feafeaʼi?
8 Neʼe mole fai fakakikite tokotahi ia Selemia. Neʼe ʼi ai tona ʼu kaugā gāue, pea neʼe ko he meʼa fakaloto mālohi kia ia. ʼI ʼihi temi, neʼe mole aga fakapotopoto tona ʼu kaugā gāue. Ohage la, ko te tahi polofeta ko Ulia neʼe ina fakahā te fakatokaga ki Selusalemi pea mo Suta “ ʼo mulimuli pe ki te ʼu folafola fuli ʼa Selemia.” Kae ʼi te temi ʼaē neʼe fakatotonu ai e te Hau ko Sehoiakimi ke matehi ia Ulia, neʼe hola te polofeta ʼaia ki Esipito. Kae neʼe mole hāo ʼi tana hola ʼaia. Neʼe tuli ia ia e te ʼu kaugana ʼa te hau, ʼo nātou maʼu, pea mo toe ʼaumai ki Selusalemi, pea neʼe matehi ai. Neʼe lagi tupu ai he mataku ʼa Selemia!—Selemia 26:20-23.
9 Ko te tahi kaugā gāue ʼo Selemia neʼe ko te sikalaipe ko Paluke. Ko Paluke neʼe tokoni lelei kia Selemia, kae ʼi te tahi ʼaluʼaga neʼe mole kei ina maʼu te sio fakalaumālie. Neʼe kamata meo, ʼo ʼui maʼana: “Malaʼia kia te ʼau, heʼe ko Sehova neʼe ina hilifaki mai te lotomamahi ki toku mamahi! Kua ʼau fiu ʼi te toʼetoʼe, pea mole kei ʼau maʼu hoku fīmālie.” ʼI te kua lotovaivai ʼa Paluke neʼe mole kei ina leleiʼia te ʼu meʼa fakalaumālie. Kae neʼe foaki e Sehova te tokoni poto kia Paluke, pea neʼe ina tali. Pea neʼe fakapapauʼi age kia ia ʼe hāo anai ʼi te fakaʼauha ʼo Selusalemi. (Selemia 45:1-5) ʼE mahino ia neʼe lotomālohi ia Selemia ʼi te toe maʼu e Paluke tona poto fakalaumālie!
Neʼe Tokoni Ia Sehova Ki Tana Polofeta
10. Koteā te ʼu fakapapau neʼe fai e Sehova kia Selemia moʼo tokoni kia ia?
10 Ko te meʼa ʼaē neʼe maʼuhiga tāfito, heʼe ko Sehova neʼe mole ina līʼakina ia Selemia. Neʼe mahino ki te loto ʼo tana polofeta pea neʼe ina foaki age te mālohi pea mo te tokoni ʼaē neʼe ʼaoga kia ia. Ohage la, ʼi te kamataʼaga ʼo te minisitelio ʼo Selemia neʼe lotolotolua ʼo ʼuhiga mo tona ʼu fealagia, kae neʼe ʼui fēnei age e Sehova: “ ʼAua naʼa ke mataku ʼuhi ko tonatou ʼu fofoga, koteʼuhi ‘ ʼe ʼau nofo mo koe ʼo hāofaki koe’ ko te tala ʼaia ʼa Sehova.” Pea ʼi tana ʼosi foaki age tana gāue faka polofeta, neʼe ʼui age e Sehova: “ ʼE mahino papau ʼe nātou tauʼi anai koe, kae ʼe mole nātou mālo anai ia koe, koteʼuhi ‘ ʼe ʼau nofo mo koe moʼou hāofaki,’ ko te tala ʼaia ʼa Sehova.” (Selemia 1:8, 19) Neʼe ko he fakapapau fakaloto fīmālie, pea neʼe fakahoko moʼoni e Sehova tana fakapapau.
11. ʼE tou ʼiloʼi feafeaʼi neʼe fakahoko e Sehova tana fakapapau ʼaē ke tokoni kia Selemia?
11 Pea ʼi temi ʼaē neʼe fakamaʼu ai ia Selemia ʼi te ʼu papa, pea mo tona vāʼi e te hahaʼi, neʼe ina ʼui fēnei ʼaki he loto falala: “Neʼe kau ia Sehova mo ʼau ohage ko he tagata mālohi pea mo fakamatakutaku. Koia, ko te hahaʼi ʼaē ʼe nātou fakatagaʼi ʼau ʼe nātou tūkia anai pea ʼe mole nātou mālo anai. Ei ʼe nātou ufiufi lahi anai.” (Selemia 20:11) ʼI he ʼu taʼu ki muli age, ʼi te temi ʼaē neʼe fonofono ai te hahaʼi ke nātou matehi ia Selemia, ko Sehova neʼe tokoni tuʼumaʼu aipe kia ia; pea ohage ko Paluke, neʼe hāo pea mo ʼāteaina ia Selemia ʼi te fakaʼauha ʼo Selusalemi, kae ki te hahaʼi ʼaē neʼe nātou fakatagaʼi pea mole nātou tokagaʼi tana ʼu fakatokaga, neʼe mamate pe neʼe ʼave ʼo faka popūlaʼi ʼi Papiloni.
12. Logola te ʼu tupuʼaga ʼaē ʼe feala ke tou lotovaivai ai, koteā ʼaē ʼe tonu ke tou manatuʼi tuʼumaʼu?
12 Ohage ko Selemia, ia ʼaho nei ʼe lahi te kau Fakamoʼoni ʼa Sehova ʼe nātou kātakiʼi te ʼu mamahi. Ohage ko tatatou vakaʼi ʼi te kamata, ʼe tou mamahi ʼuhi ko totatou ʼuhiga heʼe haohaoa, peʼe ko te ʼu maveuveu ʼo te malamanei, peʼe ko te hahaʼi ʼaē ʼe nātou fakafeagai ki tatatou gāue. ʼE feala ki te ʼu taʼi mamahi ʼaia ke tupu ai hotatou lotovaivai. Ohage ko Selemia, ʼe feala ke tou feʼekeʼaki peʼe tonu ke hoko atu tatatou tauhi. ʼE moʼoni, ʼe feala ʼi ʼihi temi ke tou lotovaivai. Ko te lotovaivai ʼe ina ʼahiʼahiʼi peʼe loloto totatou ʼofa kia Sehova. Koia tou faiga ke ʼaua naʼa tou tuku te lotovaivai ke ina fakavaivai tatou mai te gāue ʼa Sehova ohage ko Ulia. Kae tou faʼifaʼitakiʼi Selemia pea mo tou falala ki te tokoni mai ʼa Sehova.
ʼE Tou Tauʼi Feafeaʼi Te Lotovaivai
13. E feafeaʼi hatatou mulimuli ki te faʼifaʼitaki ʼo Selemia pea mo Tavite?
13 Neʼe felogoi tuʼumaʼu ia Selemia pea mo Sehova ʼAtua, ʼo ina fakahā te ʼu meʼa ʼaē ʼi tona loto pea mo ina kolekole tona mālohi. ʼE ko he faʼifaʼitaki lelei ke tou mulimuli kiai. ʼI te temi muʼa, ko Tavite ʼaē neʼe falala mo ia ki te Matapuna ʼo te mālohi ʼaia, neʼe ina ʼui fēnei: “Fakalogo mai ki taku ʼu palalau, Ê Sehova; mahino ki taku ʼu toʼetoʼe. Tokagaʼi taku kole tokoni atu, Ê toku Hau pea mo toku ʼAtua, koteʼuhi ko koe ʼaē ʼe ʼau faikole atu ki ai.” (Pesalemo 5:1, 2) ʼE ʼasi mai ʼi te hisitolia ʼo te maʼuli ʼo Tavite, ko Sehova neʼe ina tali liuliuga ki tana ʼu faikole ʼaē neʼe ina kole ai ke tokoni age kia ia. (Pesalemo 18:1, 2; 21:1-5) ʼO toe feiā pe mo tatou, mokā ʼe hage ʼe tou mafasia pea mo faigataʼaʼia ʼaupito ʼi totatou ʼu fihifihia, ʼe ko he meʼa fakaloto fīmālie ʼaupito hatatou faikole kia Sehova pea mo fakahā age te ʼu meʼa ʼaē ʼi totatou loto. (Filipe 4:6, 7; 1 Tesalonika 5:16-18) ʼE mole fakafisi mai anai ia Sehova ki tatatou ʼu faikole. Kae ʼe ina fakamoʼoni mai ‘ ʼe tokaga mai kia tatou.’ (1 Petelo 5:6, 7) Kae kapau ʼe tou faikole kia Sehova, ʼe tonu ke tou fakalogo ki te meʼa ʼaē ʼe ina ʼui mai kia tatou!
14. Neʼe malave feafeaʼi kia Selemia te ʼu folafola ʼa Sehova?
14 ʼE palalau feafeaʼi mai ia Sehova kia tatou? Tou toe vakaʼi age muʼa ia te felogoi ʼa Sehova mo Selemia. Neʼe felogoi fakahagatonu ia Sehova mo Selemia koteʼuhi neʼe ko te polofeta. ʼE fakamatala fēnei e Selemia pe neʼe malave feafeaʼi te ʼu folafola ʼa te ʼAtua ki tona loto: “Neʼe maʼu tau ʼu folafola, pea neʼe ʼau kai; pea neʼe liliu tau folafola ko toku fakafiafia pea mo te fiafia ʼo toku loto; he kua faka fetapa ki tou huafa ʼaki ia te ʼau, Ê Sehova ʼAtua ʼo te ʼatu kautau.” (Selemia 15:16) Ei, neʼe fiafia ia Selemia he neʼe ina kalagaʼi te huafa ʼo te ʼAtua, pea neʼe maʼuhiga ki te polofeta ia Tana ʼu folafola. Pea ohage ko te ʼapositolo ko Paulo, neʼe lotomālohi ia Selemia ke ina tala te logo ʼaē neʼe foaki age kia ia.—Loma 1:15, 16.
15. ʼE tou lava fakahū feafeaʼi te ʼu folafola ʼa Sehova ki totatou loto, pea ko te ʼu meʼa fea ʼaē ka ina uga tatou ke tou tala te huafa ʼo Sehova pea mo tona Puleʼaga?
15 ʼI te temi nei, ʼe mole kei felogoi fakahagatonu ia Sehova mo he tahi. Kae ʼe tou maʼu te ʼu folafola ʼa te ʼAtua ʼi te Tohi-Tapu. Koia, kapau ʼe tou ako fakamalotoloto te Tohi-Tapu pea mo metitasioʼi fakalelei te ʼu meʼa ʼaē ʼe tou ako, ko totatou loto ʼe hopo “fakafiafia [anai] pea mo . . . fiafia” ʼi te ʼu folafola ʼa te ʼAtua. Pea ʼe tou fiafia ʼi te toʼo kia tatou te huafa ʼo Sehova mokā ʼe tou tala te ʼu folafola ʼaia ki te hahaʼi. ʼAua naʼa galo kia tatou ʼe mole ʼi ai he tahi hahaʼi ʼi te malamanei ʼe nātou tala te huafa ʼo Sehova. Gata pe ki tana kau Fakamoʼoni ʼe nātou tala te logo lelei ʼaē kua fakatuʼu te Puleʼaga ʼo te ʼAtua pea mo nātou akoʼi te hahaʼi agavaivai ke nātou liliu ko he ʼu tisipulo ʼa Sesu Kilisito. (Mateo 28:19, 20) ʼE tou fiafia ʼi te ʼu tapuakina ʼaē ʼe tou maʼu! Ka tou fakatokagaʼi te toe pilivilesio ʼaia neʼe foaki fakaʼofa mai e Sehova kia tatou, e feafeaʼi hatatou mole tala te huafa ʼo Sehova pea mo tona Puleʼaga?
Tou Tokakaga Ki Totatou ʼu Fakakaugā
16, 17. Neʼe koteā te manatu ʼa Selemia ʼo ʼuhiga mo te ʼu fakakaugā, pea e feafeaʼi hatatou faʼifaʼitakiʼi ia ia?
16 ʼE fakahā e Selemia te tahi meʼa neʼe tokoni kia ia ke lototoʼa. Neʼe ina ʼui fēnei: “Neʼe mole ʼau heka mo te hahaʼi fakahuahua ke ʼau fakafiafia mo nātou. Neʼe ʼau heka tokotahi ʼuhi ko tou nima, he neʼe ʼau fonu ʼi tou hāūhāū.” (Selemia 15:17) Neʼe leleiʼia age e Selemia hana nofo tokotahi ʼi hana fakatahi mo he ʼu fakakaugā kovi. Ia ʼaho nei ʼe tonu ke toe feiā mo tatou. ʼE mole galo kia tatou te fakatokaga ʼa te ʼapositolo ko Paulo ʼaē “ko te ʼu fakakaugā kovi ʼe nātou fakatupu kovi ki he ʼu agamāhani ʼe lelei,” māʼia mo tatatou ʼu agamāhani lelei ʼaē kua fualoa tatatou maʼu.—1 Kolonito 15:33, MN.
17 Ko te ʼu fakakaugā kovi ʼe feala ke nātou ʼulihi tatatou fakakaukau ʼaki te ʼu manatu ʼo te malamanei. (1 Kolonito 2:12; Efeso 2:2; Sakopo 4:4) Koia tou akoʼi totatou ʼu fealagia fakakaukau ke feala hatatou ʼiloʼi te ʼu fakakaugā kovi pea mo tekeʼi. (Hepeleo 5:14) ʼI takotou manatu, mo kanapaula neʼe maʼuli ia Paulo ia ʼaho nei, koteā ʼapē ʼe ina ʼui ki he Kilisitiano ʼe ina sioʼi he ʼu ʼata ʼe fakaʼasi ai he ʼu agamālohi peʼe ko he ʼu aga heʼeʼaoga, peʼe ko he ʼu faigaoʼi agamālohi? E feafeaʼi ʼapē hana tokoniʼi he tēhina ʼe fakakaugā mo ni hahaʼi ʼe mole ina ʼiloʼi ʼi te Internet? Koteā ʼapē tana manatu ki he Kilisitiano ʼe lahi tona temi ʼe ina fakaʼaogaʼi ki te gaoʼi viteo peʼe ko te sioʼi ʼo te televisio kae ʼe mole ina fai hana ako tokotahi ʼo te Tohi-Tapu?—2 Kolonito 6:14b; Efeso 5:3-5, 15, 16.
Tou Haga Nofo ʼi Te Palatiso Fakalaumālie
18. Koteā anai ka tokoni mai ke tou nonofo mālohi ʼi te faʼahi fakalaumālie?
18 ʼE tou leleiʼia totatou palatiso fakalaumālie. ʼE mole ʼi ai he meʼa feiā ʼi te malamanei ia ʼaho nei. Māʼiape la mo te hahaʼi heʼe tui ʼe nātou palalau lelei ki te ʼofa, mo te agalelei, pea mo te agaʼofa ʼa te kau Kilisitiano. (Efeso 4:31, 32) Kae ʼe maʼuhiga ʼaupito ʼi te temi nei ke tou tauʼi te lotovaivai. Ko te ʼu fakakaugā lelei, mo te faikole, pea mo te ʼu agamāhani lelei ʼo te ako ʼo te Tohi-Tapu ʼe tokoni mai kia tatou ke tou mālolohi ʼi te faʼahi fakalaumālie. Ko te ʼu meʼa ʼaia ʼe nātou fakaloto mālohiʼi anai tatou ke tou falala katoa kia Sehova ʼi te ʼu temi fihifihia.—2 Kolonito 4:7, 8.
19, 20. (a) Koteā anai ka tokoni mai kia tatou ke tou faʼa kātaki? (b) Neʼe fai maʼa ai te alatike ka hoa mai, pea ʼe toe ʼaoga pe foki kia ai?
19 ʼAua naʼa tou tuku ki te hahaʼi ʼaē ʼe fehihiʼa ki tatatou logo faka Tohi-Tapu ke nātou fakamatakuʼi tatou pea mo fakavaivaiʼi tatatou tui. Ohage pe ko te ʼu fili ʼaē neʼe nātou fakatagaʼi ia Selemia, ko nātou ʼaē fakafeagai mai kia tatou ʼe nātou fakafeagai ki te ʼAtua. ʼE mole nātou mālo anai. Ko Sehova, ʼaē ʼe mālohi age ʼi ʼotatou fili, ʼe ina ʼui fēnei mai: “Falala kia Sehova, ke ke lotomālohi, pea ke mālohi tou loto! ʼIo, falala kia Sehova.” (Pesalemo 27:14) Kapau kua aka mālohi ʼi totatou loto te falala ʼaē kia Sehova, ʼofa pe ke tou fai tuʼumaʼu te meʼa ʼaē ʼe lelei. Kapau ʼe tou falala ohage ko Selemia pea mo Paluke, ʼe mahino papau ia ʼe tou utu anai mo kapau ʼe mole tou fiu.—Kalate 6:9.
20 Ko te tauʼi ʼo te lotovaivai ʼe ko he tau mālohi ki te kau Kilisitiano tokolahi. Kae ko te kau tūpulaga ʼe nātou felāveʼi mo te ʼu faʼahiga fihifihia. Kae ʼe nātou toe maʼu pe foki mo te ʼu fealagia lelei. Neʼe fai tāfito te alatike ʼaenī ka hoa mai ki te kau tūpulaga ʼaē ʼe nātou kau ʼi totatou ʼu kokelekasio. ʼE toe ʼaoga anai ki te ʼu mātuʼa pea mo te kau Kilisitiano fuli ʼaē kua fakapotopoto ʼi te kokelekasio ke nātou tokoni ki te kau tūpulaga ʼo te kokelekasio, ʼaki tanatou ʼu palalau, mo tanatou faʼifaʼitaki, pea mo fai he ʼu tokoni ʼaoga.
ʼE Koutou Tali Feafeaʼi Anai?
• He koʼe ʼe feala ke tou tau mo he ʼu ʼaluʼaga fakatupu lotovaivai, pea ko ai anai ʼe tonu ke tou kumi tokoni ki ai?
• Neʼe tauʼi feafeaʼi e Selemia te lotovaivai logola neʼe ina fai te gāue faigataʼa?
• Koteā ʼaē ka ina fakaliliu anai totatou loto ke ‘fiafia’ logola te ʼu fihifihia?
[Paki ʼo te pasina 9]
Neʼe manatu ia Selemia ʼe kei tūpulaga fau pea mo vale ʼi te fai ʼo te gāue faka polofeta
[Paki ʼo te pasina 10]
Māʼia mo te temi ʼaē neʼe fakatagaʼi ai, neʼe ʼiloʼi e Selemia ko Sehova neʼe nofo mo ia “ohage ko he tagata mālohi pea mo fakamatakutaku”