Ko Nātou Kua Matutuʼa—Ko ʼOtatou Tēhina Mo Tuagaʼane Maʼuhiga
“Ko nātou ʼaia kua to ʼi te ʼapi ʼo Sehova . . . ʼe nātou fisi anai. ʼE nātou toe tuputupu anai ʼi tonatou temi matuʼa.”—Pesalemo 92:13, 14.
1. ʼE gaohi feafeaʼi te hahaʼi matutuʼa e te tokolahi?
ʼE ʼOFA ia Sehova ki tana kau kaugana agatonu fuli, ʼaē ʼe kau ai mo tana ʼu kaugana matutuʼa. Kae ʼi te sivi neʼe fai ʼi Amelika, ʼi te taʼu fuli ko te teitei nimageau afe hahaʼi matutuʼa ʼe gaohi koviʼi peʼe līʼakina. ʼE fakahā e te tahi ʼu fakamatala mai te malamanei ko te gaohi koviʼi ʼo te hahaʼi matutuʼa ʼe ko he meʼa ʼe hoko ʼi te malamanei katoa. ʼE ʼui e te kautahi, ko te tupuʼaga tāfito ʼo tonatou gaohi koviʼi heʼe maʼa “te hahaʼi tokolahi . . . ko te hoko atu ʼo te maʼuli ʼa te hahaʼi matutuʼa kae mole kei ʼi ai honatou ʼaoga, ʼe mole ʼi ai he meʼa ʼe maʼu mai ia nātou pea ʼe nātou fakalogo tāfito ke tokoni age niʼihi kia nātou.”
2. (a) Koteā te manatu ʼa Sehova ʼo ʼuhiga mo tana kau kaugana agatonu ʼaē kua matutuʼa? (b) Koteā te ʼu palalau fakaloto māfana ʼaē ʼe tou maʼu ia Pesalemo 92:12-15?
2 ʼE faka maʼuhigaʼi e Sehova ʼAtua tana kau kaugana agatonu ʼaē kua matutuʼa. ʼE ina sioʼi totatou “ ʼuhigaʼi tagata ʼaē ʼi loto”—totatou ʼuhiga fakalaumālie—kae mole ko totatou ʼu tuʼakoi fakasino. (2 Kolonito 4:16, MN ) ʼI tana Folafola, ia te Tohi-Tapu, ʼe tou maʼu te ʼu palalau fakaloto māfana ʼaenī: “ ʼE fisi anai te tagata agatonu ohage he fuʼu palema; ʼe lahi anai ohage ko he ʼu fuʼu setele ʼo Lipani. Ko nātou ʼaia kua to ʼi te ʼapi ʼo Sehova, ʼi te ʼu malaʼe ʼo totatou ʼAtua, ʼe nātou fisi anai. ʼE nātou toe tuputupu anai ʼi tonatou temi matuʼa, ʼe nātou haga nofo gako anai pea mo mālolohi, ke nātou tala ko Sehova ʼe faitotonu.” (Pesalemo 92:12-15) Koutou vakavakaʼi te ʼu vaega ʼaia ke feala hakotou ʼiloʼi, e koutou kua matutuʼa, ia te ʼu faʼahi maʼuhiga ʼaē ʼe feala ke koutou fai moʼo lagolago ki te ʼu tēhina.
“ ʼE Nātou Toe Tuputupu Anai ʼi Tonatou Temi Matuʼa”
3. (a) He koʼe koa ʼe fakatatau ia te kau tagata agatonu ki he ʼu fuʼu palema? (b) ʼE lava feafeaʼi kia nātou kua matutuʼa ke nātou ‘tuputupu ʼi tonatou temi matuʼa’?
3 ʼE fakatatau e te tagata fai pesalemo ia te tagata agatonu ki te ʼu fuʼu palema ‘ ʼe to ʼi te ʼu malaʼe ʼo totatou ʼAtua.’ “ ʼE nātou toe tuputupu anai ʼi tonatou temi matuʼa.” ʼE mole koa la ko he manatu fakaloto mālohi? ʼI te temi muʼa, neʼe ko he meʼa māhani hakita sio ki he ʼu fuʼu palema ʼi te ʼu malaʼe. Neʼe fakaʼaogaʼi te ʼu fuʼu palema moʼo faiteuteu, pea neʼe toe leleiʼia foki ʼuhi ko te mahu ʼo tona ʼu fua, pea ko ʼihi fuʼu palema ʼe feala ke fua lolotoga taʼu e teau.a ʼO feiā pe mo koutou, ʼaki takotou pipiki maʼu ki te tauhi moʼoni, ʼe koutou lava “haga fakatupu he fua ʼi te gāue lelei fuli.”—Kolose 1:10, MN.
4, 5. (a) Koteā te fua maʼuhiga ʼaē ʼe tonu ke fakatuputupu e te kau Kilisitiano? (b) Koutou fakahā mai he ʼu faʼifaʼitaki faka Tohi-Tapu ʼo he ʼu hahaʼi kua matutuʼa neʼe nātou fakatuputupu ia ‘te ʼu fua ʼo te ʼu laugutu.’
4 ʼE fakaʼamu e Sehova ke fakatupu e te kau Kilisitiano ia “te fua aia o te u laugutu”—te ʼu palalau ʼaē ʼe fai moʼo fakavikiviki kia te ia pea mo tana ʼu fakatuʼutuʼu. (Hepeleo 13:15) ʼE feala koa ke fai te fakaʼamu ʼaia kia koutou ʼaē kua matutuʼa? Ei.
5 ʼI te Tohi-Tapu, ʼe lahi te ʼu faʼifaʼitaki ʼo te ʼu hahaʼi kua matutuʼa, ʼaki he lototoʼa neʼe nātou fagonogono te huafa ʼo Sehova pea mo tana ʼu fakatuʼutuʼu. Neʼe kua “taʼu fitugofulu” tupu ia Moisese ʼi te temi ʼaē neʼe fekauʼi ai ia ia e Sehova ke liliu ko hana polofeta pea mo tagata fakafofoga. (Pesalemo 90:10; Ekesote 4:10-17) Ko te polofeta ko Taniela, logola tana kua matuʼa, neʼe mole tuʼania ʼi te palalau ki te pule faʼitaliha ʼa Sehova. ʼI te temi ʼaē neʼe fakatotonu age ai e Pelesasā kia Taniela ke ina fakamahino ia te faitohi faka misitelio ʼaē neʼe tohi ki te kaupā, neʼe lagi ko tona taʼu 90 tupu ʼaia. (Taniela, kapite 5) Kae e feafeaʼi ki te ʼapositolo ko Soane ʼaē neʼe kua matuʼa? ʼI te fakaʼosiʼosi ʼo tana tauhi agatonu, neʼe pilisoniʼi ia ia ʼi te motu ʼo Patemosi “uhi ko te folafola a te Atua mo te fakamooni a Sesu.” (Apokalipesi 1:9) ʼE lagi koutou manatuʼi he tahi ʼu hahaʼi ʼi te Tohi-Tapu neʼe nātou fakatuputupu ia ‘te ʼu fua ʼo te ʼu laugutu’ ʼi te ʼu taʼu fakaʼosi ʼo tonatou maʼuli.—1 Samuele 8:1, 10; 12:2; 1 Hau 14:4, 5; Luka 1:7, 67-79; 2:22-32.
6. Neʼe fakaʼaogaʼi feafeaʼi e Sehova ia “natou matua” ke nātou gāue ohage ko he kau polofeta ʼi te ʼu ʼaho fakamuli ʼaenī?
6 ʼAki te ʼu palalau ʼaē neʼe fai e te polofeta ko Soele, neʼe ʼui fēnei e te ʼapositolo ko Petelo: “Ia aho fakaosi, e folafola te Atua, ‘E au folahi anai toku Laumalie ki te kakano fuape [ʼo kau ai mo “natou matua”], . . . pea e natou hoko anai ko he u polofeta.’ ” (Gaue 2:17, 18; Soele 2:28) ʼO mulimuli ki te ʼu palalau ʼaia, ʼi te ʼu ʼaho fakamuli ʼaenī, ʼe fakaʼaogaʼi e Sehova te kau Kilisitiano fakanofo matutuʼa pea mo te “tahi ʼu ōvi” ke nātou tala tana ʼu fakatuʼutuʼu. (Soane 10:16, MN ) Ko ʼihi ia nātou neʼe nātou fakatuputupu te ʼu fua ʼo te Puleʼaga lolotoga te ʼu lauʼi hogofulu taʼu.
7. Koutou fakamatala he ʼu faʼifaʼitaki ʼo he ʼu hahaʼi matutuʼa ʼe nātou haga fakatuputupu te ʼu fua ʼo te Puleʼaga logola tanatou mahamahaki.
7 Tou talanoa muʼa ʼo ʼuhiga mo Sonia, ʼaē neʼe liliu ʼo fai faka mafola temi katoa ʼi te taʼu 1941. Logola kua mahaki talu mai fualoa, kae neʼe ina fai tuʼumaʼu te ʼu ako Tohi-Tapu ʼi tona ʼapi. Neʼe ina ʼui fēnei: “Ko te faka mafola ʼo te logo lelei ʼe ko he koga ia ʼo toku maʼuli. ʼI tona fakahagatonu, ko te meʼa tāfito ʼaia ʼo toku maʼuli, pea ʼe mole ʼau fia mālōlō.” Mole heʼeki faʼa fualoa, ʼi te fale fakatalitali ʼo te lopitali, ko Sonia mo tona taʼokete ko Olive, neʼe nā faka mafola te logo ʼo te Tohi-Tapu ʼo ʼuhiga mo he ʼamanaki ki te fafine ko Janet, neʼe mahaki kovi pea neʼe kua ʼamanaki mate. Ko te faʼe ʼa Janet, ʼaē neʼe tauhi lotu lelei ʼi te Katolika, neʼe malave ʼaupito kia ia te ʼofa ʼaē neʼe fai age ki tana taʼahine pea neʼe ina tali ke fai hana ako Tohi-Tapu, pea ʼi te temi nei ʼe tuputupu tana ako. ʼE koutou maʼu koa he ʼu faigamālie feiā ke koutou fakatuputupu te ʼu fua ʼo te Puleʼaga?
8. Neʼe fakahā feafeaʼi e te tagata matuʼa ko Kalepe tana falala kia Sehova, pea ʼe lava feafeaʼi ki te kau Kilisitiano matutuʼa ke nātou mulimuli ki tana faʼifaʼitaki?
8 Ko te kātaki ʼa te kau Kilisitiano matutuʼa ʼo faka mafola ia te Puleʼaga logola tonatou gaʼegaʼe pea mo mahamahaki, ʼe nātou mulimuli ki te faʼifaʼitaki ʼo te tagata Iselaele agatonu ko Kalepe, ʼaē neʼe muli haʼele ia Moisese ʼi te toafa lolotoga taʼu e fāgofulu. Neʼe kua taʼu 79 ia Kalepe ʼi te temi ʼaē neʼe fakalaka ai ʼi te Vaitafe ʼo Solotane ʼo hū ki te Kele ʼo Te Fakapapau. ʼI tana ʼosi kau ki te tau mo te kautau ʼo Iselaele lolotoga te ʼu taʼu e ono, neʼe feala pe ke ina ʼui kua tonu la ke mālōlō. Kae neʼe mole manatu feiā, heʼe ʼaki he lototoʼa, neʼe ina kole ke hinoʼi ia ia ke ʼalu ʼo ʼohofiʼi “te ʼu kolo tau lalahi” ʼi te potu moʼugaʼia ʼo Suta, ʼaē neʼe nofoʼi e te kau tagata lalahi ko te kau Anakime. ʼAki te tokoni ʼa Sehova, ko Kalepe neʼe ina “kapu ia nātou, ohage ko tona fakapapauʼi e Sehova.” (Sosue 14:9-14; 15:13, 14) ʼI takotou haga fakatuputupu te ʼu fua ʼo te Puleʼaga ʼi tokotou temi matuʼa, koutou falala ko Sehova ʼe lagolago kia koutou, ohage ko tana lagolago kia Kalepe. Pea kapau ʼe koutou nonofo agatonu, ʼe foaki moʼoni atu anai e Sehova hokotou nofoʼaga ʼi tona mālama foʼou ʼaē neʼe ina fakapapauʼi mai.—Isaia 40:29-31; 2 Petelo 3:13.
“ ʼE Nātou Haga Nofo Gako Anai Pea Mo Mālolohi”
9, 10. Koteā ʼaē ʼe fai e ʼihi Kilisitiano matutuʼa ke nātou nonofo mālohi ʼi te tui pea mo taupau maʼu tonatou mālohi fakalaumālie? (Vakaʼi te talanoa ʼi te pasina 13.)
9 ʼI tana talanoa ki te fua lelei ʼo te kau kaugana matutuʼa ʼa Sehova, neʼe hiva fēnei ia te tagata fai pesalemo: “ ʼE fisi anai te tagata agatonu ohage he fuʼu palema; ʼe lahi anai ohage ko he ʼu fuʼu setele ʼo Lipani. ʼE nātou toe tuputupu anai ʼi tonatou temi matuʼa, ʼe nātou haga nofo gako anai pea mo mālolohi.”—Pesalemo 92:12, 14.
10 E feafeaʼi hakotou taupau maʼu tokotou mālohi fakalaumālie logola kua koutou matutuʼa? ʼE matalelei tuʼumaʼu te fuʼu palema, koteʼuhi ʼe ʼi ai tuʼumaʼu he matapuna vai mokomoko. ʼO toe feiā mo koutou, ʼe feala ke koutou ʼinu te ʼu vai ʼo te moʼoni faka Tohi-Tapu ʼi takotou ako te Folafola ʼa te ʼAtua, pea mo takotou fakatahi mo tana kautahi. (Pesalemo 1:1-3; Selemia 17:7, 8) ʼAki tokotou mālohi fakalaumālie, ʼe koutou liliu ai ko he tokoni maʼuhiga ki ʼokotou tēhina mo tuagaʼane. Koutou tokagaʼi te moʼoni ʼo te ʼu palalau ʼaia ʼi te faʼifaʼitaki ʼa te tagata matuʼa pea mo Pelepitelo Lahi ko Seoiata.
11, 12. (a) Koteā te faʼahi maʼuhiga ʼaē neʼe fai e Seoiata ʼi te hisitolia ʼo te puleʼaga ʼo Suta? (b) Neʼe fakaʼaogaʼi feafeaʼi e Seoiata tona ʼu fealagia moʼo uga ke fakatuʼu ia te tauhi moʼoni?
11 Neʼe lagi taʼu teau tupu ia Seoiata ʼi te temi ʼaē neʼe puleʼi ai ia Suta e te Fineʼaliki fialahi ko Atalia ʼi tana ʼosi fakapogi tona ʼu mokopuna. Koteā ʼaē neʼe fai e te matuʼa ko Seoiata? Lolotoga taʼu e ono, ko ia mo tona ʼohoana neʼe nā fufū ʼi te fale lotu ia Seoasi, ko ia tokotahi ʼo te hōloga hau neʼe kei maʼuli. Pea hoko te fetogi fakafokifā, ko Seoiata neʼe ina fakanofo ke hau ia Seoasi ʼaē neʼe taʼu fitu, pea neʼe ina fakatotonu ke matehi ia Atalia.—2 Fakamatala 22:10-12; 23:1-3, 15, 21.
12 ʼI tona ʼuhiga tagata leʼo ʼo te hau, neʼe fakaʼaogaʼi e Seoiata tona fealagia ʼaia moʼo uga ke fakatuʼu te tauhi moʼoni. Neʼe ina “fai tana fuakava mo te hahaʼi katoa pea mo te hau, ʼe nātou haga nofo anai ko te hahaʼi ʼa Sehova.” ʼO mulimuli ki te ʼu fakatotonu ʼa Seoiata, ko te hahaʼi neʼe nātou maumauʼi te fale ʼo te ʼatua loi ko Paale pea mo nātou toʼo kehe tona ʼu ʼaletale, mo te ʼu fakatātā, pea mo te pelepitelo. ʼAki te takitaki ʼa Seoiata, neʼe toe fakatuʼu e Seoasi ia te ʼu gāue ʼi te fale lotu pea mo toe gaohi fakaleleiʼi te ʼu faʼahi ʼaē neʼe kua maumau ʼo te fale lotu. “Neʼe haga fai e Seoasi te meʼa ʼaē neʼe totonu kia mata ʼo Sehova ʼi te ʼu ʼaho fuli ʼaia ʼaē neʼe akoʼi ai ia ia e te pelepitelo ko Seoiata.” (2 Fakamatala 23:11, 16-19; 24:11-14; 2 Hau 12:2) ʼI te mate ʼa Seoiata ʼi tona taʼu 130, neʼe ʼavaifo fakaʼaliʼaliki mo te ʼu hau, koteʼuhi “neʼe ina fai te meʼa ʼaē ʼe lelei ki Iselaele, mo te ʼAtua moʼoni pea mo Tona ʼapi.”—2 Fakamatala 24:15, 16.
13. ʼE lava feafeaʼi ki te kau Kilisitiano matutuʼa ke nātou fai ‘te meʼa ʼaē ʼe lelei ki te ʼAtua moʼoni pea mo tona ʼapi’?
13 ʼE lagi veliveli te gāue ʼaē ʼe koutou lava fai moʼo fakahaʼele ki muʼa te tauhi moʼoni, koteʼuhi ʼe koutou mahaki peʼe koutou tau mo te tahi ʼu ʼaluʼaga. Tatau aipe peʼe ko te ʼaluʼaga ʼaia, kae ʼe kei koutou lava fai pe ‘te meʼa ʼaē ʼe lelei ki te ʼAtua moʼoni pea mo tona ʼapi.’ ʼE koutou lava fakahā takotou gāue mālohi ki te ʼapi fakalaumālie ʼo Sehova ʼo koutou kau pea mo lagolago ki te ʼu fono ʼo te kokelekasio, pea mo koutou gāue fai faka mafola mokā ʼe koutou fealagia. Ko takotou tali lelei te ʼu tokoni faka Tohi-Tapu, mo takotou agatonu ʼo lagolago ki “te tagata kaugana agatonu mo poto” pea mo te kokelekasio, ʼe ko he fakaloto mālohi anai ki tokotou ʼu tēhina mo tuagaʼane. (Mateo 24:45-47, MN ) ʼE koutou toe lava uga foki ʼokoutou tēhina mo tuagaʼane ki “te ofa mo te u gaue lelei.” (Hepeleo 10:24, 25; Filemone 8, 9) Pea ʼe koutou liliu anai ko he tapuakina ki niʼihi mo kapau ʼe koutou muliʼi te tokoni ʼaenī ʼa te ʼapositolo ko Paulo: “ ʼE tonu ki te kau tagata matutuʼa ke nātou aga fakapotopoto ʼi tanatou ʼu agamāhani, ke nātou aga fakatokatoka, mo nātou maʼu he ʼatamai poto, ke nātou mālohi ʼi te tui, ʼi te ʼofa, ʼi te faʼa kātaki. ʼO feiā mo te kau finematuʼa, ke nātou fai he aga ʼo he ʼu hahaʼi ʼe nātou fakaʼapaʼapa ki te ʼAtua, ke ʼaua naʼa nātou fasituʼu, mo popūla ki te ʼinu kava, kae ke nātou liliu ko he ʼu hahaʼi ʼe nātou akoʼi ki ʼihi te meʼa ʼaē ʼe lelei.”—Tito 2:2-4, MN.
14. Koteā ʼaē ʼe lava fai e te ʼu tagata taupau moʼo fakahaʼele ki muʼa te tauhi moʼoni?
14 Kua koutou tagata ʼāfea koa talu mai fualoa ʼi te moʼoni? Koʼeni te tokoni ʼa te tagata ʼāfea kua fualoa ʼi te moʼoni: “Koutou vaevae te poto ʼaē ʼe koutou maʼu lolotoga te ʼu taʼu. Koutou foaki te ʼu maʼua ki niʼihi, pea mo koutou vaevae te ʼu meʼa kua koutou māhani kiai mo nātou ʼaē ʼe nātou fia ako . . . Koutou mahino ki te ʼu fealagia ʼaē ʼe maʼu e ʼihi. Koutou fakatuputupu pea mo faka gāueʼi tonatou ʼu fealagia ʼaia. Koutou teuteu ki te ka haʼu.” (Teutalonome 3:27, 28) Ko takotou fakamalotoloto ki te gāue fai faka mafola ʼo te Puleʼaga ʼe iku ai anai ki he ʼu fua lelei lahi ki niʼihi ʼo totatou ʼu tēhina.
‘ ʼE Nātou Tala Ko Sehova ʼe Faitotonu’
15. Ko te ʼu ʼaluʼaga fea ʼaē ʼe feala ai ki te kau Kilisitiano ʼaē kua matutuʼa ke nātou “tala ko Sehova ʼe faitotonu”?
15 Ko te kau kaugana ʼa te ʼAtua ʼaē kua matutuʼa ʼe nātou fakamaʼamaʼa ʼonatou maʼua ke nātou “tala ko Sehova ʼe faitotonu.” Kapau ko koutou ko he Kilisitiano kua matuʼa, ʼe feala ke koutou fakahā ʼi takotou ʼu palalau mo takotou ʼu aga ko ‘Sehova ko tokotou Maka, ia ia ʼaē ʼe mole maʼu ai he aga heʼe faitotonu.’ (Pesalemo 92:15) ʼE fai e te fuʼu palema ia te fagonogono fakalogologo ʼo ʼuhiga mo te ʼu kalitate tauʼaluga ʼo tona Tupuʼaga. Kae ʼe foaki atu e Sehova ia te faigamālie makehe ke koutou fakamoʼoni ʼo ʼuhiga mo ia kia nātou ʼaē kua nātou tali ia te tauhi moʼoni. (Teutalonome 32:7; Pesalemo 71:17, 18; Soele 1:2, 3) He koʼe koa ʼe maʼuhiga ke koutou fai ia te fakamoʼoni ʼaia?
16. Koteā te faʼifaʼitaki faka Tohi-Tapu ʼe ina fakahā mai ia te maʼuhiga ʼo te “tala ko Sehova ʼe faitotonu”?
16 ʼI te temi ʼaē neʼe liliu ai te tagata takitaki Iselaele ko Sosue ʼo “matuʼa pea mo lahi ʼona ʼaho, . . . neʼe ina pāuiʼi ki Iselaele katoa, te kau tagata ʼāfea, mo te kau pule, mo te kau tuʼi fakamāu pea mo te kau ofisie,” pea neʼe ina fakamanatu age kia nātou te faitotonu ʼa te ʼAtua. Neʼe ina ʼui fēnei: “Neʼe mole hala mo hoko he folafola ʼi te ʼu folafola lelei fuli ʼaē neʼe tala atu e Sehova, tokotou ʼAtua. Neʼe hoko fuli ia maʼa koutou.” (Sosue 23:1, 2, 14) Lolotoga he temi, neʼe fakaloto mālohiʼi e te ʼu palalau ʼaia ia te loto ʼo te kau Iselaele ke nātou nonofo agatonu. Kae ʼi te ʼosi mate ʼo Sosue, “neʼe tupu ake te taʼiake neʼe mole nātou ʼiloʼi ia Sehova, pea mo te gāue ʼaē neʼe ina fai ki Iselaele. Pea neʼe fai e te ʼu foha ʼo Iselaele ia te meʼa ʼaē ʼe kovi kia mata ʼo Sehova pea neʼe nātou tauhi ki te ʼu Paale.”—Kau Fakamāu 2:8-11.
17. E feafeaʼi te ʼu felogoi ʼa Sehova mo tana hahaʼi ʼi te temi nei?
17 Ko te agatonu ʼa te kokelekasio faka Kilisitiano ʼo te temi nei ʼe mole fakalogo ki te fai fagonogono ʼa te kau kaugana matutuʼa ʼa te ʼAtua. Kae ʼe toe mālohi age tatatou falala kia Sehova mo tana ʼu fakapapau mokā ʼe tou logo ki he ʼu fakamatala takitokotahi ʼo te “gāue lahi” ʼaē neʼe ina fai maʼa tana hahaʼi ʼi te ʼu ʼaho fakamuli ʼaenī. (Kau Fakamāu 2:7; 2 Petelo 1:16-19) Kapau kua fualoa hakotou fakatahi mo te kautahi ʼa Sehova, ʼe lagi koutou manatuʼi te temi ʼaē neʼe lāvaki ai te kau fai faka mafola ʼo te Puleʼaga ʼi tokotou koga meʼa peʼe ʼi tokotou fenua, peʼe ko te fakafeagai ʼaē neʼe hoko ki te gāue fai faka mafola. ʼAki te temi, neʼe koutou sio ki te toʼo kehe e Sehova ia te tahi ʼu faigataʼaʼia pea mo tana ‘fakaviliviliʼi’ te tuputupu ʼo te kau fai faka mafola. (Isaia 54:17; 60:22) Neʼe koutou tokagaʼi te ʼu fakamahino ʼo te ʼu moʼoni faka Tohi-Tapu, pea mo koutou sio ki te fakamaʼa māmālie ʼo te kautahi fakahāhā ʼa te ʼAtua. (Tāʼaga Lea 4:18; Isaia 60:17) ʼE koutou faigaʼi koa ke koutou fakaloto mālohiʼi niʼihi ʼo koutou vaevae mo nātou ia te ʼu meʼa ʼaē neʼe hoko kia koutou ʼo ʼuhiga mo te faitotonu ʼa Sehova? ʼE feala ia ke fakaloto mālohi pea mo lave lelei ki te ʼu tēhina mo tuagaʼane!
18. (a) Koutou fakamatala tona ʼu fua ki ʼihi te ‘tala ʼaē ko Sehova ʼe faitotonu.’ (b) ʼE koutou logoʼi koa te faitotonu ʼa Sehova kia koutou?
18 E feafeaʼi te ʼu lakaga ʼaē neʼe koutou logoʼi tonu ia te tokaga ʼofa pea mo te takitaki ʼo tokotou maʼuli e Sehova? (Pesalemo 37:25; Mateo 6:33; 1 Petelo 5:7) Ko te tuagaʼane finematuʼa ko Martha neʼe ina tautau fakaloto mālohiʼi fēnei te hahaʼi: “Logope he faʼahiga meʼa ʼe hoko, ʼaua naʼa koutou lītuʼa kia Sehova ʼi he temi. ʼE lagolago anai kia koutou.” Neʼe malave mālohi te tokoni ʼaia kia Tolmina, neʼe kau ia nātou ʼaē neʼe nātou ako te Tohi-Tapu mo Martha pea neʼe papitema ʼi te kamataʼaga ʼo te ʼu taʼu 1960. ʼE ina fakamatala fēnei: “ ʼI te temi ʼaē neʼe mate ai toku ʼohoana, neʼe ʼau lotomamahi ʼaupito, kae ko te ʼu palalau ʼaia neʼe tokoni mai ke ʼaua naʼa ʼau tō ʼi he fono e tahi. Pea neʼe fakaloto mālohiʼi moʼoni ʼau e Sehova ke ʼau kātaki.” Neʼe toe fai pe e Tolmina ia te tokoni ʼaia ki te tokolahi ʼo nātou ʼaē neʼe ina fai tanatou ako te Tohi-Tapu lolotoga te temi fualoa. ʼI tona fakahagatonu, ʼaki he ʼu fakaloto mālohi pea mo takotou fakamatala ia te faitotonu ʼa Sehova, ʼe koutou lava lagalaga te tui ʼo te ʼu tēhina mo tuagaʼane.
ʼE Faka Maʼuhigaʼi e Sehova Te Hahaʼi Matutuʼa Agatonu
19, 20. (a) ʼE faka ʼuhiga feafeaʼi e Sehova te ʼu gāue ʼo tana kau kaugana ʼaē kua matutuʼa? (b) Koteā ʼaē ka tou vakaʼi anai ʼi te alatike ʼaē ʼe hoa mai?
19 ʼI te mālama ʼo te temi nei, ʼe mole fai he fakafetaʼi kia nātou ʼaē kua matutuʼa. (2 Timoteo 3:1, 2) Ka fai he ʼu talanoa ʼo ʼuhiga mo nātou, ʼe tau fakamanatuʼi pe te ʼu gāue ʼaē neʼe nātou fai ʼi te temi muʼa kae mole talanoaʼi te ʼu meʼa ʼaē ʼe nātou fai ʼi te temi nei. Kae ʼe ʼui fēnei ʼi te Tohi-Tapu: “ ʼE mole heʼe agatonu te ʼAtua ke ina galoʼi takotou gāue pea mo te ʼofa ʼaē neʼe koutou fakahā ʼo ʼuhiga mo tona huafa, ʼi takotou tauhi te kau maʼoniʼoni pea ʼe kei hoko atu pe takotou tauhi kia nātou.” (Hepeleo 6:10, MN ) Ei ko Sehova ʼAtua ʼe ina manatuʼi te ʼu gāue agatonu ʼaē neʼe koutou fai ki muʼa atu. Kae ʼe ina toe faka maʼuhigaʼi foki ia koutou ki te ʼu meʼa ʼaē ʼe koutou haga fai ʼi tana tauhi. Ei, ko Sehova ʼe ina faka ʼuhiga te hahaʼi matutuʼa agatonu ohage ko he kau Kilisitiano ʼe nātou fakatuputupu te ʼu fua, mo tuputupu ʼi te faʼahi fakalaumālie, pea mo mālolohi—pea ʼe ko he fakamoʼoni ʼaia ʼo tona mālohi.—Filipe 4:13.
20 ʼE koutou maʼu koa te manatu ʼa Sehova ʼo ʼuhiga mo totatou ʼu tēhina Kilisitiano ʼaē kua matutuʼa? Kapau ʼe koutou fai feiā, pea ʼe koutou fakahā ai tokotou ʼofa kia nātou. (1 Soane 3:18) ʼE tou vakaʼi anai ʼi te alatike ʼaē ka hoa mai ia he ʼu faʼahi ʼe tou lava fakahā ai te taʼi ʼofa ʼaia moʼo taupau te hahaʼi matutuʼa.
[Kiʼi nota]
a ʼE feala pe ke maʼu he ʼu fuaʼi palema e afe ʼi te ʼu fuhiga takitahi pea ʼe lava kaku ki te ʼu kilo e 8 tona mamafa peʼe laka atu. ʼE fakafuafua e te tagata faitohi, “ ʼi te temi maʼuli ʼo he fuʼu palema, ʼe feala ki te ʼu hahaʼi ʼaē ʼa nātou te fuʼu ʼakau ʼaia, ke nātou maʼu te ʼu fua ko ʼona tane e lua peʼe tolu.”
Koteā Takotou ʼu Tali?
• Koteā ʼaē ʼe fai e te hahaʼi matutuʼa moʼo ‘fakatupu he ʼu fua’?
• He koʼe koa ʼe maʼuhiga te mālohi fakalaumālie ʼo te kau Kilisitiano ʼaē kua matutuʼa?
• Koteā ʼaē ʼe lava fai e te hahaʼi matutuʼa moʼo “tala ko Sehova ʼe faitotonu”?
• He koʼe koa ʼe faka maʼuhigaʼi e Sehova tana kau kaugana ʼaē kua fualoa ʼi te moʼoni?
[Talanoa ʼo te pasina 13]
ʼE Nātou Nonofo Mālolohi ʼi Te Tui
Koteā ʼaē neʼe tokoni ki te kau Kilisitiano ʼaē kua fualoa ʼi te moʼoni ke nātou nonofo mālolohi ʼi te tui pea mo taupau tonatou mālohi fakalaumālie? Koʼeni te ʼu palalau ʼa ʼihi ia nātou:
“ ʼE maʼuhiga ʼaupito hakita lau he ʼu vaega ʼe ina fakamālohiʼi ai tatatou ʼu felogoi mo Sehova. ʼI te teitei afiafi fuli, ʼe ʼau lau ia te Pesalemo 23 mo te Pesalemo 91.”—Olive, neʼe papitema ʼi te 1930.
“Neʼe ʼau fakatuʼutuʼu ke ʼau kau tuʼumaʼu ki te fakalogo ʼo te akonaki ki te papitema pea ke ʼau fakalogo fakalelei kiai, ohage ko te ʼaho totonu ʼo toku papitema. Neʼe ko he koga maʼuhiga kia ʼau taku manatuʼi lelei taku foaki ʼo toku maʼuli kia Sehova ke ʼau haga nofo agatonu.”—Harry, neʼe papitema ʼi te 1946.
“ ʼE maʼuhiga ke kita faikole kia Sehova ʼi te ʼaho fuli—ʼo kole tuʼumaʼu ke tokoni mai, mo ina puipui pea mo tapuakina kita, pea mo ‘tou tokagaʼi ia ia ʼi totatou ʼu ala fuli.’ ” (Tāʼaga Lea 3:5, 6)—Antônio, neʼe papitema ʼi te 1951.
“ ʼI taku fakalogo ki te ʼu fakamatala ʼo nātou ʼaē kua fualoa tanatou tauhi agatonu kia Sehova, ʼe toe fakafoʼou ai taku fakatotonu ʼaē ke ʼau haga nofo agatonu kia te ia.”—Joan, neʼe papitema ʼi te 1954.
“ ʼE maʼuhiga ke mole kita tokaga fau kia kita totonu. Ko te ʼu meʼa fuli ʼaē ʼe tou maʼu ʼe haʼu mai te ʼofa makehe ʼo te ʼAtua. ʼAki te taʼi manatu ʼaia, tou haga fakaʼaogaʼi lelei te meʼa kai fakalaumālie ʼaē ʼe ʼaoga mai kia tatou ke feala hatatou kātaki ʼo aʼu ki te fakaʼosi.”—Arlene, neʼe papitema ʼi te 1954.
[Paki ʼo te pasina 11]
Ko nātou matutuʼa ʼe nātou fakatuputupu te ʼu fua maʼuhiga ʼo te Puleʼaga
[Paki ʼo te pasina 14]
Ko te mālohi fakalaumālie ʼo nātou kua matutuʼa ʼe ko he koga maʼuhiga ia