Ko Te Puleʼaga ʼo Te ʼAtua—Kua Fakatuʼu ʼi Te Temi Nei

“ ʼE lava felogoi feafeaʼi he ʼu fenua mokā ʼe kehekehe tanatou ʼu agaʼi fenua pea mo tonatou ʼu maʼuli? Neʼe ʼui, ʼe hoki logo tahi anai te ʼu lanu kehekehe mokā ʼohofiʼi te kele.”​—The Age, te sulunale Ositalalia.

ʼE HOKO feafeaʼi te ʼohofi ʼaia? Peʼe ʼe ina fakatahiʼi anai koa te ʼu puleʼaga fuli peʼe kailoa, kae ʼe talanoa ia te Tohi-Tapu ki te lakilisi fakamataku ʼe ina uga anai te ʼu puleʼaga ke nātou fakatahi. Pea ʼe fakahoko anai te lakilisi ʼaia e te kau laumālie fakapulipuli.

Neʼe fakakikite e Tavite te Hau ʼo te Iselaele ʼāfea ia te ʼaluʼaga ʼaia ʼo te malamanei. ʼAki te takitaki ʼa te ʼAtua, neʼe ina ʼui fēnei: “Ko te ʼu hau ʼo te kele kua nātou teuteu ki te tau pea ko te kau ʼaliki kua nātou fakatahitahi ohage ko he tokotahi ʼo fakafeagai kia Sehova pea mo ia ʼaē kua ina fakanofo, ʼo ʼui maʼa nātou ‘Tou motumotuhi tanā ʼu haʼi pea tou laku mamaʼo atu tanā ʼu maea!’ ” (Pesalemo 2:​2, 3; Gaue 4:​25, 26) Koutou fakatokagaʼi ʼe fakatahitahi te ʼu pule ʼo te malamanei moʼo fakafeagai kia Sehova, te Tupuʼaga ʼo te ʼatulaulau, pea mo tana fakanofo, ia ia ʼaē neʼe ina fakanofo ke Hau ko Sesu Kilisito. Koteā anai ka hoko?

ʼO mulimuli ki te fakaʼaluʼalu ʼo te ʼu taʼu ʼi te Tohi-Tapu pea mo te hoko ʼo te ʼu lea faka polofeta ʼi te taʼu 1914, kua fakatuʼu ʼo te Puleʼaga ʼo te ʼAtua ʼi te lagi ʼaki tona Hau ko Sesu Kilisito.a Pea ʼi te temi ʼaia neʼe fakatahitahi te ʼu puleʼaga ʼo te malamanei. Neʼe mole fakalogo te ʼu puleʼaga ʼaia ki te puleʼaga foʼou ʼaē neʼe fakatuʼu e te ʼAtua, kae neʼe nātou fakafeagai mālohi kiai​—ʼi te Tau Lahi, peʼe ko te ʼUluaki Tau Faka Malamanei.

Koteā te manatu ʼa Sehova ʼAtua ʼo ʼuhiga mo tanatou fakafeagai ʼaia? “Ko Ia ʼaē ʼe heka ʼi te lagi ʼe kata anai ia; ko Sehova totonu ʼe ina vāʼi anai ia nātou. ʼI te temi ʼaia ʼe palalau age anai kia nātou ʼi tona ʼita pea mo tona hāūhāū lahi ʼe ina fakamaveuveu anai ia nātou.” Pea ʼe ʼui anai e Sehova ki tona ʼAlo, te Hau ʼaē neʼe fakanofo ʼo te Puleʼaga: “Kole mai kia te ʼau, ke ʼau foaki atu te ʼu puleʼaga ko hou tofiʼa pea ko hou ʼu kele te ʼu potu taupotu ʼo te kele. ʼE ke laliki anai nātou ʼaki te tokotoko ukamea, ʼe ke laliki anai ke nātou lailai ohage ko he ipu maka.”​—Pesalemo 2:​4, 5, 8, 9.

Ko te fakaʼauha fakaʼosi ʼaia ʼo te ʼu puleʼaga fakafeagai, ʼe fakahoko anai ʼaki he tokotoko ukamea ʼi Halamaketone. Ko te Apokalipesi, te tohi fakaʼosi ʼo te Tohi-Tapu, ʼe ina ʼui ko te meʼa fakamataku ʼaia ʼe ko “te ʼaho lahi ʼo te ʼAtua te māfimāfi,” ʼaē neʼe fakatahitahi kiai “te ʼu hau ʼo te kele katoa ʼaē ʼe nofoʼi.” (Apokalipesi 16:14, 16, MN ) ʼAki te mālohi ʼo te kau temonio, ʼe logo tahi anai te ʼu puleʼaga ʼo te kele ki he meʼa e tahi​—ke nātou tauʼi te ʼAtua Māfimāfi.

Kua ōvi mai te temi ʼaē ka fakatahitahi ai te hahaʼi moʼo fakafeagai ki te pule faʼitaliha ʼa te ʼAtua. Kae ʼe hoko anai he meʼa faikehe, heʼe mole fua lelei anai kia nātou ia tanatou “logo tahi” ʼaia. Kae ʼe iku anai tanatou fakafeagai ʼaia ki te tokalelei kua fualoa te fakatalitali kiai ʼa te malamanei katoa. ʼO feafeaʼi? ʼI te tau fakaʼosi ʼaia, ko te Puleʼaga ʼo te ʼAtua ʼe ina “laliki anai pea mo fakatagata anai te ʼu puleʼaga fuli ʼaia [ʼo te malamanei], pea ko ia totonu ʼe tuʼu anai ʼo aʼu ki he ʼu temi ʼe mole ʼiloʼi honatou gataʼaga.” (Taniela 2:​44) Ko te tokalelei ʼaē ʼe loto kiai te malamanei ʼe foaki anai e te Puleʼaga ʼo te ʼAtua, kae mole ko he kautahi fakatagata.

Ko Te Puleʼaga ʼAē Ka Takitaki e Te Pule

ʼE ko te Puleʼaga ʼaia ʼaē ʼe faikole kiai te hahaʼi fakamalotoloto, ʼo ʼui maʼa nātou: “Ke hoko mai tou puleʼaga. Ke fai tou finegalo ʼi te kele, ohage ko selo.” (Mateo 6:​10, MN ) ʼE mole nofo te Puleʼaga ʼo te ʼAtua ʼi te loto ʼo te hahaʼi, heʼe ko te puleʼaga moʼoni kua ina fakahoko te ʼu gāue taulekaleka talu mai tona fakatuʼu ʼi te lagi ʼi te taʼu 1914. Tou vakaʼi te ʼu meʼa ʼe lagolago ki te moʼoni ʼo te gāue mālohi ʼa te Puleʼaga ʼo te ʼAtua ia ʼaho nei.

ʼUluaki, ʼe ʼi ai tona pule mālohi pea mo faiva, ko Sesu Kilisito te Hau ʼaē neʼe fakanofo. ʼI te taʼu 33 ʼo totatou temi, neʼe haga te ʼAtua ʼo fakanofo ia Sesu Kilisito ke Pule ʼi te kokelekasio faka Kilisitiano. (Efeso 1:​22) Talu mai ai, neʼe fai e Sesu tana pule, ʼo ina fakahā ai tona poto takitaki. Ohage la, ʼi te hoge neʼe hoko ʼi Sutea ʼi te ʼuluaki sēkulō, neʼe foimo fai atu aipe e te kokelekasio te fakatuʼutuʼu moʼo tokoni ki tonatou ʼu tēhina. Neʼe fai te fakatuʼutuʼu tokoni, pea neʼe fekauʼi mai Atiokia ia Palenapasi pea mo Saulo ke nā ʼolo ʼo fai te minisitelio tokoni.​—Gaue 11:27-​30.

Kua lahi te ʼu meʼa ʼe tou ʼamanaki kiai ʼe fai anai e Sesu Kilisito ʼi te kua fakatuʼu ʼo te Puleʼaga. Ka hoko he ʼu tuʼutāmaki​—he mafuike, he hoge, he lōmaki, he afā, he pa ʼo he ʼu moʼuga afi​—ʼe foimo fai te ʼu fakatuʼutuʼu tokoni e te kokelekasio ʼa te kau Fakamoʼoni ʼa Sehova maʼa tonatou ʼu tēhina mo tuagaʼane pea mo ʼihi ʼo te ʼu koga meʼa ʼaia. Ohage la, ʼi te mafuike neʼe tō ʼi El Salvador ʼi Sanualio pea mo Fepualio ʼo te taʼu 2001, neʼe fai te ʼu fakatuʼutuʼu moʼo foaki he ʼu tokoni ʼi te ʼu potu fuli ʼo te fenua, pea neʼe lagolago kiai te kau Fakamoʼoni ʼa Sehova mai Kanata, Kuatemala, pea mo Amelika. Neʼe foimo laga fakavilivili tonatou ʼu fale fono e tolu, pea mo te ʼu fale e 500.

Te Hahaʼi Fakalogo ʼo Te Puleʼaga ʼo Te ʼAtua

Talu mai tona fakatuʼu ʼi te taʼu 1914, neʼe tānaki e te Puleʼaga ʼo te ʼAtua ʼi selo tana hahaʼi fakalogo ʼi te malamanei katoa. ʼE ina fakahoko te lea faka polofeta maʼuhiga neʼe talanoa kiai ia Isaia: “ ʼE hoko moʼoni anai, ʼi te temi fakaʼosi ʼo te ʼu ʼaho, ko te moʼuga ʼo te fale ʼo Sehova ʼe fakatuʼu maʼu anai ʼi te tumutumu ʼo te ʼu moʼuga, . . . pea ko te ʼu fenua fuli ʼe nātou ʼōmai anai kiai.” ʼE ʼui e te lea faka polofeta “ ʼe tokolahi anai te hahaʼi” ʼe nātou hake ki te moʼuga ʼaia pea ʼe nātou tali anai te ʼu fakatotonu pea mo te ʼu lao ʼa Sehova.​—Isaia 2:​2, 3.

ʼE fua lelei te gāue ʼaia ʼi te temi nei​—heʼe kua fakatahitahi mai te ʼu fenua e 230 tupu, te toko 6 000 000 Kilisitiano ʼe nātou kau ki te fale tautēhina faka malamanei. ʼE punamaʼuli te hahaʼi ʼaē ʼe ʼōmai ki te ʼu fakatahi lalahi faka malamanei ʼa te kau Fakamoʼoni ʼa Sehova, ʼi tanatou sisio ki te ʼofa, te tokalelei, pea mo te logo tahi ʼi te toe hahaʼi tokolahi ʼaia, logola te kehekehe ʼo tonatou lanu, tanatou ʼu agaʼi fenua, pea mo tanatou ʼu lea.

Te Puleʼaga ʼo Te ʼAtua Pea Mo Te Ako

ʼE ʼi ai te ʼu lekula ʼa te ʼu puleʼaga fuli, pea ko te hahaʼi ʼaē ʼe nātou fia fai ki te takitaki ʼa te puleʼaga ʼaia ʼe tonu ke nātou fakalogo ki te ʼu lekula ʼaia. ʼE toe feiā mo te Puleʼaga ʼo te ʼAtua ʼe ʼi ai tana ʼu lekula maʼa nātou fuli ʼaē ʼe nātou fia lagolago kiai, pea ʼe tonu ke nātou fakalogo kiai. Kae ʼe mahino ia ʼe ko he toe gāue lahi te faka fealagia ʼaē ki he toe hahaʼi tokolahi mai ni ʼu fenua kehekehe ke nātou tali pea mo fakalogo ki ni ʼu lekula ʼe tatau. ʼE toe ʼiloga te kua fakatuʼu ʼo te Puleʼaga ʼo te ʼAtua​—ʼi te ʼu fetogi ʼaē ʼe hoko ʼi te ʼatamai pea mo te loto ʼo te hahaʼi, ʼuhi ko te polokalama ako faka Tohi-Tapu ʼaē ʼe nātou mulimuli kiai.

ʼE fakahoko feafeaʼi e te Puleʼaga te toe gāue faigataʼa ʼaia? ʼE nātou faʼifaʼitakiʼi te faʼahiga fai faka mafola ʼa te kau ʼapositolo ʼo nātou ʼolo ʼi “te u api” pea mo nātou akoʼi te hahaʼi ʼaki te Tohi-Tapu. (Gaue 5:​42; 20:20) ʼE fua lelei feafeaʼi te faʼahiga fai ʼaia? Neʼe fakamatala e te patele Katolika ko Johnson ʼi te sulunale Kanata, tana ʼu faiga ʼaē ke ina fakaloto vaivaiʼi te fafine ʼi tana ako te Tohi-Tapu mo te kau Fakamoʼoni ʼa Sehova. Neʼe ina ʼui fēnei: “Neʼe ʼau lotolotolua pea neʼe ʼau ʼiloʼi ʼe mole lava haku meʼa kia nātou. Neʼe mahino kia ʼau lolotoga te ʼu māhina neʼe fakatuputupu e te ʼu fafine Fakamoʼoni ʼaia te ʼu felogoi lelei mo te kiʼi fafine ke faigataʼa ai tana mavae mai ia nātou. Neʼe nā tokoni kia ia, neʼe nā aga fakakaumeʼa, ʼo fakatuputupu ai te ʼu felogoi ʼofa. Mole tuai pea liliu ko he tahi ʼe gāue mālohi ʼi tanatou lotu pea neʼe mole kei feala haku tāʼofi ia ia.” Ohage pe ko te fafine Katolika ʼaē neʼe malave ki tona loto ia te ʼu meʼa ʼaē neʼe akoʼi age e te kau Fakamoʼoni ʼa Sehova mai te Tohi-Tapu pea mo tanatou aga faka Kilisitiano, neʼe toe malave feiā te ʼu faʼahi ʼaia ki te loto ʼo te ʼu lauʼi miliona hahaʼi ʼo te malamanei.

Ko te faʼahiga fai ako ʼaia​—te ako ʼo te Puleʼaga​—ʼe fakatafito ki te Tohi-Tapu, ʼaē ʼe ina faka maʼuhigaʼi te ʼu aga ʼaē ʼe tonu ke fai pea mo tana ʼu lekula. ʼE ina akoʼi te hahaʼi ke nātou ʼofa pea mo fefakaʼapaʼapaʼaki logola tonatou ʼu haʼuʼaga kehekehe. (Soane 13:34, 35) ʼE toe tokoni ki te hahaʼi ke nātou mulimuli ki te tokoni ʼaenī: “Aua tautou fakatatau ki te taitupu aeni, kae koutou fetogi aki te fakafoou o toutou atamai, ke koutou iloi, pe kotea te finegalo o te Atua, te mea e lelei mo taau mo ia pea mo te mea ae e katoa.” (Loma 12:2) Ko te ʼu lauʼi miliona hahaʼi kua nātou maʼu te tokalelei pea mo te fiafia, pea mo te ʼu fakapapau ki te ka haʼu, heʼe kua nātou līaki tonatou ʼuhiga ʼāfea kae nātou maʼuliʼi te ʼu lao pea mo te ʼu pelesepeto ʼo te Puleʼaga.​—Kolose 3:​9-​11.

Ko te nusipepa ʼaenī, Te Tule Leʼo, ʼe tokoni ki te logo tahi faka malamanei ʼaia. ʼAki te ʼu faʼahiga fakaliliu pea mo te ʼu masini ʼaē ʼe ina tā te ʼu tohi ki te ʼu lea kehekehe, ʼe tā fakatahi te ʼu alatike ʼo Te Tule Leʼo ia lea e 135, pea ʼe feala ki te toko 95 ʼi te teau ʼo te kau lautohi ʼo te malamanei ke nātou ako te nusipepa pe ʼaia ʼi tanatou lea.

Neʼe fai te lisi e te tagata faitohi Mormon ʼo ʼuhiga mo te ʼu gāue lelei faka misionea ʼaē ʼe hoko ʼi tuʼa atu ʼo tana lotu. Neʼe ina kamata te lisi ʼaki Te Tule Leʼo pea mo te Réveillez-vous !, ʼaē neʼe tā e te kau Fakamoʼoni ʼa Sehova, ʼe ko te ʼu nusipepa lelei ʼaia ki te fai faka mafola, pea neʼe ina ʼui fēnei: “ ʼE mole he tahi ʼe feala ke ina ʼui ko Te Tule Leʼo peʼe ko te Réveillez-vous ! ʼe nā lagolago ki he maʼuli fakaʼaoʼaoganoa​—kailoa ia, ko te ʼu nusipepa ʼaia ʼi te ʼu tohi faka lotu fuli ʼaē neʼe ʼau lau, ʼe nā uga te hahaʼi ke nātou nonofo ʼalaʼala ʼo ʼuhiga mo te temi. ʼE fakaloto mālohi te ʼu fakamatala ʼaē ʼi Te Tule Leʼo pea mo te Réveillez-vous ! heʼe moʼoni pea mo lelei te ʼu kumi ʼaē ʼe tohi ai.”

ʼE hā lelei ko te Puleʼaga ʼo te ʼAtua ʼe gāue moʼoni ʼi te ʼu potu fuli. ʼE faka mafola fakafiafia pea mo mālohi e te kau Fakamoʼoni ʼa Sehova ia “te Logolelei aeni o te Puleaga” ki tonatou ʼu tatau, ʼo nātou fakaafe ia nātou ke nātou fakalogo ki te puleʼaga ʼaia. (Mateo 24:14) ʼE koutou tali koa te fakaafe ʼaia? ʼE koutou lava maʼu te ʼu tapuakina mo kapau ʼe koutou fakatahi mo nātou ʼaē neʼe nātou akoʼi te ʼu lekula ʼo te Puleʼaga, pea mo nātou faiga ke nātou maʼuliʼi. Tahi age meʼa lelei, ʼe koutou maʼu anai te ʼamanaki ke koutou maʼuʼuli ʼi te takitaki ʼa te Puleʼaga ʼi te mālama foʼou ʼaē neʼe fakapapauʼi mai ʼe “mauli i ai te susitisia.”​—2 Petelo 3:​13.

[Kiʼi nota]

[Paki ʼo te pasina 5]

ʼI te taʼu 1914 neʼe kau te ʼu puleʼaga ki te tau faka malamanei

[Paki ʼo te pasina 6]

Ko te ʼofa faka Kilisitiano ʼe hā ʼi te ʼu fetokoniʼaki

[Paki ʼo te pasina 7]

ʼI te vāhaʼa fuli, ʼi te malamanei katoa, ʼe tatau te ʼu meʼa ʼaē ʼe ako e te kau Fakamoʼoni ʼa Sehova