Te ʼu Fehuʼi ʼa Te Kau Lautohi

He koʼe ko Sesu, ʼi tona ʼosi fakatuʼuake, neʼe ina ʼui age kiā Tomasi ke ina fāfā ia ia kae ki muʼa atu neʼe mole ina fakagafua age kiā Malia Maketalena?

Ka tou lau ʼihi fakaliliu ʼāfea ʼo te Tohi-Tapu, pea ʼe hage neʼe ʼui age e Sesu kiā Malia Maketalena ke mole fāfā age kiā te ia. Ohage la ko te Tohi-Tapu ʼo Louis Second, ʼe ina fakaliliu fēnei te ʼu palalau ʼa Sesu: “ ʼAua naʼa ke fāfā mai kiā te au, heʼe mole heʼeki au hake ki taku Tāmai.” (Soane 20:17) Kae ko te kupu faka Keleka, ʼaē ʼi te agamāhani ʼe fakaliliu ʼaki te kupu “fāfā,” ʼe faka ʼuhiga ki te ʼu kupu “tapiki, puke, kapa.” ʼE mole matatonu te ʼui ʼaē neʼe tāʼofi e Sesu ia Malia Maketalena ke ina haga pe ʼo fāfā kiā ia, heʼe neʼe ina tuku te tahi ʼu fafine ʼaē neʼe ʼi tona falemaka ke nā ‘puke tona ʼu vaʼe.’​—Mateo 28:9.

ʼE lahi te ʼu Tohi-Tapu ʼi totatou temi, ohage ko te Les Saintes Écritures — Traduction du monde nouveau, mo te Tauhi Foou, ʼe nātou tokoni mai ke tou mahino ki te faka ʼuhiga moʼoni ʼo te ʼu palalau ʼa Sesu, ʼo nātou fakaliliu fēnei: “Tuku tau tapiki mai kiā te au” pea “Tuku tau puke feiaʼi au.” He koʼe neʼe palalau feiā ia Sesu kiā Malia Maketalena, ʼaē neʼe kaumeʼa lelei mo ia?​—Luka 8:​1-3.

ʼE hā mai neʼe tuʼania ia Malia Maketalena naʼa mavae Sesu pea hake ki selo. ʼI tana fia nofo ʼaē mo tona ʼAliki, neʼe tapiki mālohi kiā Sesu, ʼo mole ina tuku ia ia ke ʼalu. Moʼo fakahā lelei age kiā Malia ʼe mole heʼeki tonu ke mavae, neʼe fakatotonu e Sesu kiā ia ke tuku tana tapiki kiā te ia kae ke ʼalu ʼo tala ki tana ʼu tisipulo kua fakatuʼuake.​—Soane 20:17.

Neʼe kehe te ʼu palalau ʼaē neʼe fai e Sesu kiā Tomasi. ʼI te ʼasi ʼa Sesu ki ʼihi ʼo tana kau tisipulo, neʼe puli ia Tomasi. ʼI te ʼosi tala age ʼo te logo kiā Tomasi, neʼe lotolotolua ʼo ʼuhiga mo te fakatuʼuake ʼa Sesu, ʼo ina ʼui ʼe hoki tui anai mo kapau ʼe sio ki te ʼu lavea ʼo Sesu ʼi te ʼu faʼo pea mo ʼai tona nima ki te faʼahi vakavaka ʼo Sesu ʼaē neʼe hokaʼi. Hili ʼaho e valu, neʼe toe ʼasi Sesu ki tana kau tisipulo. Neʼe kau ai Tomasi, pea neʼe ʼui age e Sesu ke ina fāfā ki tona ʼu lavea.​—Soane 20:24-​27.

Koia, ʼi te faʼahi ʼo Malia Maketalena, neʼe fia fakahā age e Sesu ʼe mole tonu ke ina tāʼofi ia ia ke mavae; ʼi te faʼahi ia ʼo Tomasi, neʼe tokoni Sesu ki te tagata neʼe lotolotolua. ʼI te ʼu ʼaluʼaga ʼaia e lua, neʼe tonu te ʼu aga ʼaia ʼaē neʼe fai e Sesu.