Ko Sehova Totatou Tokoni

“Ko toku tokoni ʼe haʼu mai ia Sehova, te Tupuʼaga ʼo te lagi pea mo te kele.”—Pesalemo 121:2.

1, 2. (a) He koʼe ʼe feala ke tou ʼui ʼi ʼihi temi ʼe ʼaoga ai kiā tatou he tokoni? (b) Ko te faʼahiga tokoni fea ʼaē ʼe foaki mai e Sehova?

ʼE ʼAOGA kiā tatou fuli ke tokoni mai he tahi. ʼI ʼihi temi, ʼe ʼaoga kiā tatou fuli ke tokoni mai he tahi moʼo maʼu puleʼaki ʼo ʼuhiga mo he fihifihia lahi, moʼo kātakiʼi te lotomamahi ʼi te mate ʼo he tahi, pea mo ʼutakiʼi he ʼahiʼahi faigataʼa. ʼI te agamāhani, ka kumi tokoni te hahaʼi, ʼe nātou ʼolo ki honatou kaumeʼa ʼe agalelei. Ka nātou vaevae mo ia te ʼu kavega ʼaia, pea ʼe faigafua ai leva hanatou ʼamo. Kae ʼe faka tuʼakoi te ʼu meʼa ʼaē ʼe lava fai e he kaumeʼa moʼo tokoni mai. Pea ʼi te tahi faʼahi, ʼe mole feala tuʼumaʼu ki ʼihi ke nātou tokoni mai ʼi te temi fuli pe ʼaē ʼe ʼaoga ai.

² Kae ʼe ʼi ai te Matapuna ʼe lava tokoni mai, ʼe mole he tuʼakoi ʼo tona mālohi pea mo te ʼu meʼa ʼaē ʼe ina maʼu moʼo tokoni mai. Tahi ʼaē meʼa, ʼe ina fakapapau mai ʼe mole ina līaki anai tatou ʼi he temi. ʼE fakahā mai e te tagata fai pesalemo te higoa ʼo te Matapuna ʼaia, ʼo ina ʼui fēnei ʼaki he loto falala: “Ko toku tokoni ʼe haʼu mai ia Sehova.” (Pesalemo 121:2) He koʼe neʼe falala ia te tagata fai pesalemo ko Sehova ʼe tokoni age anai kiā ia? Moʼo tali kiai, tou vakaʼi te Pesalemo kapite 121. ʼE tou mahino ai anai ki te ʼu tupuʼaga ʼaē ʼe tou lava falala ai mo tatou, ʼe tokoni mai anai Sehova.

Ko He Tokoni ʼe Mole Gata ʼi He Temi

3. Ko te ʼu moʼuga fea ʼaē neʼe lagi hiki ake kiai te ʼu mata ʼo te tagata fai pesalemo, pea koteā tona tupuʼaga?

³ ʼE fakahā tāfito ʼi te ʼu ʼuluaki palalau ʼo te tagata fai pesalemo, ʼe tou lava falala heʼe ko Sehova ia te Tupuʼaga ʼo meʼa fuli. Neʼe ina ʼui fēnei: “ ʼE au hiki ake anai ʼoku mata ki te ʼu moʼuga. ʼE haʼu anai maifea toku tokoni? Ko toku tokoni ʼe haʼu mai ia Sehova, te Tupuʼaga ʼo te lagi pea mo te kele.” (Pesalemo 121:1, 2) Neʼe mole ko he moʼuga feiā pe ʼaē neʼe sioʼi e te tagata fai pesalemo. ʼI te temi ʼaē neʼe ina tohi ai te ʼu palalau ʼaia, neʼe tuʼu te fale lotu ʼa Sehova ʼi Selusalemi. Ko te kolo ʼaia, ʼaē neʼe tuʼu ʼi te ʼu fuga moʼuga ʼo Suta, neʼe ko te ʼafioʼaga fakatātā ʼaia ʼo Sehova. (Pesalemo 135:21) Neʼe lagi hiki ake te ʼu mata ʼo te tagata fai pesalemo ki te ʼu moʼuga ʼo Selusalemi ʼaē neʼe tuʼu ai te fale lotu ʼa Sehova, ʼaki te falala ʼaē ʼe tokoni Sehova kiā ia. He koʼe neʼe tui papau ia te tagata fai pesalemo ʼe lava tokoni ia Sehova kiā ia? He ko Ia “te Tupuʼaga ʼo te lagi pea mo te kele.” ʼE hage neʼe ʼui fēnei e te tagata fai pesalemo: ‘Ei, ʼe mole he meʼa ʼe ina lava tāʼofi te Tupuʼaga māfimāfi ke tokoni mai!’​—Isaia 40:26.

4. Neʼe fakahā feafeaʼi e te tagata fai pesalemo ko Sehova ʼe tokaga tuʼumaʼu ke maʼu e tana hahaʼi te ʼu meʼa ʼaē ʼe ʼaoga kiā nātou, pea he koʼe ʼe ko he ʼu palalau fakaloto fīmālie lahi?

⁴ Ki muli age, ʼe fakamahino e te tagata fai pesalemo ko Sehova ʼe tokaga tuʼumaʼu ki te ʼu meʼa ʼaē ʼe ʼaoga ki tana ʼu kaugana. Neʼe ina ʼui fēnei: “ ʼE mole ina tuku anai ke fesiʼiaʼaki tou vaʼe. Ko Ia ʼaē ʼe ina taupau koe ʼe mole tulemoe anai. Sio! ʼE mole tulemoe anai pea mo māʼumoea anai, ia ia ʼaē ʼe ina taupau ia Iselaele.” (Pesalemo 121:3, 4) ʼE mole feala ki te ʼAtua ke ina tuku nātou ʼaē ʼe falala kiā te ia ke nātou “fesiʼiaʼaki,” peʼe nātou fetōkaʼi ʼo mole feala hanatou toe tutuʼu ake. (Tāʼaga Lea 24:16) Koteā tona tupuʼaga? Heʼe ko Sehova ʼe hage ko he tagata tauhi ōvi ʼe tokaga lelei ki tana ʼu ōvi. ʼE ko he ʼu palalau ʼe fakaloto fīmālie lahi! ʼE tokaga anai ʼi te temi fuli pe ke maʼu e tana hahaʼi te ʼu meʼa ʼaē ʼe ʼaoga kiā nātou, pea ʼe ina taupau nātou ʼi te ʼaho mo te po.

5. He koʼe ʼe ʼui ko Sehova ʼe tuʼu ʼi te “nima mataʼu”?

⁵ ʼI tana falala ʼaē ko Sehova ʼe ko he ʼAtua ʼe agatonu pea mo ina puipui tana hahaʼi, neʼe tohi fēnei e te tagata fai pesalemo: “Ko Sehova ʼe ina taupau koe. Ko Sehova ʼe ko tou malumaluʼaga ʼi tou nima mataʼu. Lolotoga te ʼaho ʼe mole ke mamahi anai ʼi te laʼā, peʼe ko te māhina ʼi te pōʼuli.” (Pesalemo 121:5, 6) Maʼa he tahi ʼe haʼele lalo ʼi te ʼu fenua Alape ʼaē ʼe kovi ai te taʼi laʼā, ʼe ko he meʼa lelei he malumaluʼaga moʼo puipui ia ia mai te vela ʼo te laʼā. Ko Sehova ʼe hage ko he malumaluʼaga ki tana hahaʼi, ʼe ina puipui nātou mai te ʼu malaʼia, ʼaē ʼe hage ko te vevela ʼo te taʼi laʼā. Koutou tokagaʼi, ʼe ʼui ko Sehova ʼe nofo ʼi te “nima mataʼu.” ʼI te ʼu tau ʼo te temi muʼa, ko te nima mataʼu ʼo te tagata solia neʼe mole puipui e te meʼa tali tau, ʼaē neʼe ina puke ʼaki tona nima hema. Moʼo puipui ia ia, ko he kaumeʼa agatonu neʼe tuʼu ʼi te faʼahi mataʼu ʼo te tagata solia ʼaia ʼo nā kaugā tau fakatahi. Ohage ko te kaumeʼa ʼaia, ʼe agatonu Sehova ʼo tuʼu ia tafa ʼo tana kau atolasio, ʼo tokoni tuʼumaʼu kiā nātou.

6, 7. (a) ʼE fakapapau feafeaʼi mai e te tagata fai pesalemo ʼe mole gata anai ʼi he temi te tokoni ʼa Sehova ki tana hahaʼi? (b) He koʼe ʼe feala ke tou falala ohage ko te tagata fai pesalemo?

⁶ ʼE gata anai koa ʼi he temi te tokoni ʼa Sehova ki tana hahaʼi? Kailoa, ʼe mole hoko anai he meʼa feiā! Neʼe fakaʼosi fēnei e te tagata fai pesalemo: “Ko Sehova totonu ʼe ina taupau anai koe mai te ʼu malaʼia fuli pe. ʼE ina taupau anai tou nefesi. Ko Sehova totonu ʼe ina taupau anai tau ʼalu pea mo tau haʼu, ʼo kamata atu ʼi te temi nei pea ki he ʼu temi ʼe mole ʼiloʼi hona gataʼaga.” (Pesalemo 121:7, 8) ʼI te vaega 5, neʼe ʼui e te tagata fai pesalemo, “ko Sehova ʼe ina taupau ia koe,” moʼo fakahā mai ʼe ko he meʼa ʼe ina fai ʼi te temi nei. Pea ʼi te ʼu vaega ki muli age, neʼe tohi e te tagata fai pesalemo, “ko Sehova totonu ʼe ina taupau anai ia koe,” moʼo fakahā mai ʼe ko he meʼa ʼe ina fai anai ʼi te ka haʼu. Koia ʼe tui papau ai te kau atolasio moʼoni ʼe hoko atu pe anai te tokoni ʼa Sehova ʼi te temi ka haʼu. Tatau aipe peʼe ko te faʼahi fea ʼaē ʼe nātou ʼolo kiai, peʼe koteā tonatou ʼu fihifihia, kae ʼe feala pe anai ke tokoni tuʼumaʼu Sehova kiā nātou.​—Tāʼaga Lea 12:21.

⁷ Koia neʼe tui papau e te tagata ʼaē neʼe ina tohi te Pesalemo kapite 121, ko te Tupuʼaga māfimāfi ʼe ina taupau tana kau kaugana ohage ko he tagata tauhi ōvi agalelei ʼe tokaga lelei ki tana faga ōvi pea mo he tagata taupau ʼe nofo tokaga. ʼE mole fetogi Sehova, koia ʼe feala ai ke tou falala kātoa ohage ko te tagata fai pesalemo. (Malakia 3:6) Ko tona faka ʼuhiga koa ʼe ina puipui tuʼumaʼu anai tatou ʼi te faʼahi fakasino? Kailoa ia, kae kapau ʼe tou kole tuʼumaʼu ke tokoni mai, pea ʼe ina hāofaki anai tatou mai te ʼu meʼa fuli ʼaē ʼe feala ke fua kovi kiā tatou ʼi te faʼahi fakalaumālie. ʼE feala ai ke tou feʼekeʼaki fēnei: ‘ ʼE tokoni feafeaʼi mai ia Sehova?’ Tou vakaʼi te ʼu faʼahi e fā ʼe fakaʼaogaʼi e Sehova moʼo tokoni mai. ʼI te alatike ʼaenī, ʼe tou vakaʼi anai pe neʼe tokoni feafeaʼi ki tana kau kaugana ʼi te temi muʼa. ʼI te alatike ʼaē ka hoa mai, ʼe tou vakaʼi anai peʼe feafeaʼi tana tokoni ki tana hahaʼi ia ʼaho nei.

Te Tokoni ʼa Te Kau ʼĀselo

8. He koʼe ʼe mole fakapunamaʼuli te tōkakaga lelei ʼa te kau ʼāselo ki te lelei ʼo te maʼuli ʼa te ʼu kaugana ʼa te ʼAtua ʼi te kele?

⁸ ʼE pule Sehova ki te ʼu lauʼi miliale ʼāselo. (Taniela 7:9, 10) Ko te ʼu foha fakalaumālie ʼaia ʼe nātou agatonu ʼi te fakahoko ʼo tona finegalo. (Pesalemo 103:20) ʼE nātou ʼiloʼi lelei ʼe ʼofa lahi Sehova ki tana kau atolasio ʼi te kele pea mo fia tokoni kiā nātou. Koia ʼe mole fakapunamaʼuli te tōkakaga lelei ʼa te kau ʼāselo ki te lelei ʼo te maʼuli ʼa te ʼu kaugana ʼa te ʼAtua ʼi te kele. (Luka 15:10) ʼE mahino ia ʼe fiafia te kau ʼāselo ʼi tonatou fakaʼaogaʼi e Sehova moʼo tokoni ki te hahaʼi. Neʼe fakaʼaogaʼi feafeaʼi e Sehova te kau ʼāselo moʼo tokoni ki tana ʼu kaugana ʼi te temi muʼa?

9. Tuku mai he faʼifaʼitaki ʼe fakahā ai neʼe foaki e te ʼAtua te mālohi ki te kau ʼāselo moʼo puipui te hahaʼi agatonu?

⁹ Neʼe foaki e te ʼAtua te mālohi ki te kau ʼāselo moʼo puipui pea mo hāofaki te ʼu hahaʼi agatonu. Ko te ʼu ʼāselo e toko lua neʼe nā tokoni kiā Lote pea mo tona ʼu ʼofafine ke nātou hāo ʼi te fakaʼauha ʼo Sotoma pea mo Komola. (Senesi 19:1, 15-17) Ko te ʼāselo e tahi neʼe ina matehi te kau solia Asilia e toko 185 000 ʼaē neʼe ʼōmai moʼo tauʼi ia Selusalemi. (2 Hau 19:35) ʼI te temi ʼaē neʼe lī ai ia Taniela ki te luo ʼo te ʼu laione, ko Sehova neʼe ina “fekauʼi mai tana ʼāselo pea neʼe ina māpunuʼi te gutu ʼo te ʼu laione.” (Taniela 6:21, 22) Neʼe faka ʼāteainaʼi e te ʼāselo ia te ʼapositolo ko Petelo mai te fale pilisoni. (Gaue 12:6-11) ʼE lahi te tahi ʼu fakamatala ʼe tuʼu ʼi te Tohi-Tapu ʼe fakahā ai te puipui ʼaē neʼe foaki e te kau ʼāselo, ʼo mulimuli ki te ʼui fēnei ʼaē ia Pesalemo 34:7: “ ʼE nofo te ʼāselo ʼa Sehova ʼo ʼatakai ia nātou ʼaē ʼe nātou manavasiʼi kiā te ia, pea ʼe ina hāofaki nātou.”

10. Neʼe fakaʼaogaʼi feafeaʼi e Sehova he ʼāselo moʼo fakaloto mālohiʼi ia te polofeta ko Taniela?

¹⁰ ʼI te tahi ʼaluʼaga, neʼe fakaʼaogaʼi e Sehova te kau ʼāselo ke nātou fakaloto mālohiʼi ia te hahaʼi agatonu. ʼE tou maʼu te faʼifaʼitaki malave loto iā Taniela kapite 10. ʼI te temi ʼaia, neʼe lagi teitei taʼu 100 ia Taniela. ʼE mahino ia, neʼe lotovaivai ʼaupito ia te polofeta, ʼuhi ko te tuku maumau feiā ʼaē ʼo Selusalemi pea mo te tuai ʼo te toe laga ʼo te fale lotu. Neʼe toe hoha tona loto he neʼe hā ia te meʼa fakamataku kiā ia. (Taniela 10:2, 3, 8) Ko te ʼAtua, ʼi tona ʼofa, neʼe ina fekauʼi ifo he ʼāselo ke ina fakaloto mālohiʼi ia ia. Neʼe fakamanatuʼi age tuʼa lahi e te ʼāselo kiā Taniela ko ia ʼe ko he “tagata ʼofaina ʼaupito” kiā mata ʼo te ʼAtua. Neʼe koteā tona fua? Neʼe ʼui fēnei e te polofeta matuʼa ʼaia ki te ʼāselo: “Neʼe ke fakaloto mālohiʼi au.”​—Taniela 10:11, 19.

11. Ko te faʼifaʼitaki fea ʼaē ʼe ina fakahā lelei mai neʼe fakaʼaogaʼi te kau ʼāselo moʼo takitaki te gāue ʼaē ko te faka mafola ʼo te logo lelei?

¹¹ Neʼe toe fakaʼaogaʼi e Sehova te kau ʼāselo moʼo takitaki ʼo te gāue ʼaē ko te faka mafola ʼo te logo lelei. Neʼe taki e te ʼāselo ia Filipe ke fai faka mafola ʼo ʼuhiga mo Kilisito ki te enuke etiopea, ʼo iku ai mo tona papitema. (Gaue 8:26, 27, 36, 38) ʼI he kiʼi temi siʼi ki muli age, neʼe finegalo te ʼAtua ke faka mafola ia te logo lelei ki te kau Senitile ʼaē neʼe mole silikosisioʼi. Neʼe hā te ʼāselo kiā Kolonelio, te Senitile neʼe manavasiʼi ki te ʼAtua, pea neʼe ina fakatotonu age ke ʼalu ʼo kumi mai te ʼapositolo ko Petelo. ʼI te temi ʼaē neʼe maʼu ai ia Petelo e te ʼu kaugana ʼa Kolonelio, neʼe nātou ʼui fēnei age: “Ko [Kolonelio, MN ] . . . nee fakatotonuʼage e he aselo maonioni ke fekauiʼage koe ki tona api pea ke fagono ia ki au akonaki.” Neʼe mulimuli ia Petelo ki te fakatotonu ʼaia, pea ko te ʼuluaki Senitile ʼaia ʼaē neʼe heʼeki silikosisioʼi neʼe kau ki te kokelekasio faka Kilisitiano. (Gaue 10:22, 44-48) ʼE malave feafeaʼi kiā koutou mo kapau ʼe koutou ʼiloʼi neʼe tokoni atu he ʼāselo ke koutou maʼu he tahi ʼe ina tali lelei te gāue?

Te Tokoni ʼo Te Laumālie Maʼoniʼoni

12, 13. (a) He koʼe neʼe feala ke falala te kau ʼapositolo ʼa Sesu ki te tokoni ʼa te laumālie maʼoniʼoni? (b) Neʼe foaki feafeaʼi e te laumālie maʼoniʼoni te mālohi ki te ʼu Kilisitiano ʼo te ʼuluaki sēkulō?

¹² ʼI muʼa ʼo tona mate, neʼe fakapapau e Sesu ki tana kau ʼapositolo ʼe ʼi ai anai hanatou tokoni. ʼE foaki anai kiā nātou e te Tāmai he “tokoni, ko te laumālie maʼoniʼoni.” (Soane 14:26, MN ) Neʼe feala ke falala te kau ʼapositolo ʼe tokoni age anai ia te laumālie maʼoniʼoni. ʼE lahi te ʼu faʼifaʼitaki ʼi te Tohi-Tapu, ʼe fakahā ai pe neʼe fakaʼaogaʼi feafeaʼi e Sehova te laumālie maʼoniʼoni, te mālohi lahi tokotahi ʼaia, moʼo tokoni ki tana hahaʼi.

¹³ ʼE lahi te ʼu ʼaluʼaga, neʼe fakaʼaogaʼi te laumālie maʼoniʼoni moʼo foaki te mālohi ki ni ʼu hahaʼi ke nātou fakahoko te finegalo ʼo Sehova. Neʼe foaki e te laumālie maʼoniʼoni ia te mālohi ki te kau Tuʼi Fakamāu ke nātou faka ʼāteaina ia Iselaele. (Kau Tuʼi Fakamāu 3:9, 10; 6:34) Neʼe toe foaki e te laumālie ʼaia te mālohi ki te ʼu Kilisitiano ʼo te ʼuluaki sēkulō ke hoko atu tanatou fai faka mafola ʼaki he lototoʼa logola te ʼu fakafeagai kehekehe fuli. (Gaue 1:8; 4:31) Ko te fua lelei ʼo tanatou minisitelio, neʼe ko he fakamoʼoni lelei ʼaia ʼo te gāue ʼa te laumālie maʼoniʼoni. Neʼe mole he tahi age mālohi neʼe feala ke tokoni ki ‘ni ʼu tagata neʼe mole ako pea neʼe ko he ʼu tagata ohage ko te tagata fuli pe’ ke nātou faka mafola te logo ʼo te Puleʼaga ʼi te mālama ʼo te temi ʼaia.​—Gaue 4:13; Kolose 1:23.

14. Neʼe fakaʼaogaʼi feafeaʼi e Sehova tona laumālie maʼoniʼoni moʼo faka mālamagia tana hahaʼi?

¹⁴ Neʼe toe fakaʼaogaʼi e Sehova tona laumālie maʼoniʼoni moʼo faka mālamagia tana hahaʼi. ʼAki te tokoni ʼa te laumālie ʼa te ʼAtua, neʼe feala kiā Sosefo ke ina fakamahino te ʼu moemisi ʼa Falaone, ʼaē neʼe fakakikite ai te ʼu meʼa ʼaē ka hoko. (Senesi 41:16, 38, 39) ʼAki tona laumālie, neʼe faka fealagia e Sehova ke mahino te hahaʼi agavaivai ki tana ʼu fakatuʼutuʼu, kae ke fufū ki te hahaʼi fialahi. (Mateo 11:25) Koia, ʼo ʼuhiga mo te ʼu meʼa ʼaē ʼe foaki e Sehova “kia natou e oʼofa ia te ia,” neʼe ʼui fēnei e te ʼapositolo ko Paulo: “Nee fakaha mai e te Atua kia matou aki tona Laumalie.” (1 Kolonito 2:7-10) Neʼe hoki feala ki he tahi ke mahino moʼoni ki te finegalo ʼo te ʼAtua, ʼaki pe te tokoni ʼa te laumālie maʼoniʼoni.

Te Tokoni ʼa Te Folafola ʼa Te ʼAtua

15, 16. Koteā ʼaē neʼe ʼui age e te ʼAtua kiā Sosue ke ina fai ke feala hana aga fakapotopoto?

¹⁵ Ko te Folafola ʼa Sehova ʼe “ ʼaoga moʼo akoʼi,” pea ʼe ina faka fealagia te ʼu kaugana ʼa te ʼAtua ke nātou “kātoa lelei . . . , pea mo teuteu lelei ki te ʼu gāue lelei fuli pe.” (2 Timoteo 3:16, 17, MN ) ʼE lahi te ʼu faʼifaʼitaki ʼi te Tohi-Tapu, ʼe fakahā ai te tokoni ʼaē neʼe maʼu e te hahaʼi ʼa te ʼAtua ʼo te temi muʼa ʼaki te ʼu koga tohi ʼo tana Folafola ʼaē neʼe kua ʼosi tohi ʼi te temi ʼaia.

¹⁶ Neʼe tokoni te Tohi-Tapu moʼo takitaki lelei te kau atolasio ʼa te ʼAtua. ʼI te temi ʼaē neʼe tuku age ai kiā Sosue te maʼua ʼaē ke ina takitaki ia Iselaele, neʼe ʼui fēnei age e te ʼAtua kiā ia: “Ko te tohi ʼaenī ʼo te lao [ʼaē neʼe tohi e Moisese] ʼe mole tonu anai ke mamaʼo mai tou gutu, pea ʼe tonu anai ke ke lau leʼo veliveli ʼi te ʼaho mo te po, ke feala hau tokaga ʼo fai ʼo mulimuli kiā meʼa fuli ʼaē ʼe tohi ai; heʼe feala ai leva ke ke fakatupu manuʼia ki tou ala pea mo feala ai leva ke ke aga fakapotopoto.” Koutou tokagaʼi, neʼe mole fakapapau age e te ʼAtua kiā Sosue ʼe ina maʼu faka milakulo anai te poto. Kapau neʼe lau e Sosue pea mo metitāsio ki te ‘tohi ʼo te lao,’ pea ʼe aga fakapotopoto anai.​—Sosue 1:8; Pesalemo 1:1-3.

17. Neʼe tokoni feafeaʼi kiā Taniela pea mo te Hau ko Sosiasi ia te ʼu koga tohi faka Tohi-Tapu ʼaē neʼe maʼu ʼi te temi ʼaia?

¹⁷ Neʼe fakaʼaogaʼi e Sehova tana Folafola moʼo fakahā tona finegalo pea mo tana fakatuʼutuʼu. Ohage la ko Taniela, ʼaki te ʼu tohi ʼo Selemia, neʼe mahino ai kiā ia peʼe ko temi e fia ʼaē ka tuku lāvaki ai ia Selusalemi. (Selemia 25:11; Taniela 9:2) Koutou toe tokagaʼi te meʼa ʼaē neʼe hoko ʼi te temi pule ʼo te Hau ko Sosiasi ʼi Suta. ʼI te temi ʼaia, ko te puleʼaga ʼaia neʼe kua fakamamaʼo mai ia Sehova, pea neʼe ʼiloga lelei ko te ʼu hau neʼe mole kei nātou hiki ia te Lao maʼa nātou pea mo nātou maʼuliʼi. (Teutalonome 17:18-20) Kae ʼi te toe laga ʼo te fale lotu, neʼe maʼu “te tohi ʼo te lao,” ʼaē neʼe lagi tohi e Moisese. Neʼe lagi ko te ʼuluaki tohi ʼaia ʼo te Lao, ʼaē neʼe tohi kātoa kua hili kiai taʼu e 800. ʼI tana ʼosi logo ki te lau age ʼo te ʼu folafola ʼaē neʼe tohi ai, neʼe mahino ai kiā Sosiasi ko tona puleʼaga neʼe mole kei ina fai ia te finegalo ʼo Sehova, pea neʼe fai ai leva e te hau he ʼu fakatuʼutuʼu mālohi ke mulimuli ki te meʼa ʼaē neʼe tohi. (2 Hau 22:8; 23:1-7) ʼE hā lelei mai neʼe tokoni ki te hahaʼi ʼa te ʼAtua ʼo te temi muʼa ia te ʼu koga Tohi-Tapu ʼaē neʼe maʼu ʼi tonatou temi.

Te Tokoni ʼo Tana ʼu Kaugana

18. He koʼe ʼe feala ke tou ʼui ko te tokoni ʼa he kaugana moʼoni ki he tahi age kaugana ʼe ko he tokoni ʼe haʼu mai ia Sehova?

¹⁸ ʼI te agamāhani, ko te tokoni ʼaē ʼe foaki mai e Sehova ʼe ina fai ʼaki tana ʼu kaugana. ʼI tona ʼuhiga moʼoni, ʼi te temi ʼaē ʼe tokoni ai he atolasio moʼoni ki he tahi age, pea ʼe ko te tokoni ʼaia ʼa te ʼAtua. He koʼe ʼe tou lava fakamoʼoni ia te faʼahi ʼaia? ʼUhi ko faʼahi e lua. ʼUluaki, ʼe fakaʼaogaʼi e te ʼAtua tona laumālie maʼoniʼoni. Ko te laumālie ʼaia ʼe ina fakatupu te ʼu fua ʼaē ko te ʼofa mo te agalelei, iā nātou ʼaē ʼe nātou tali te gāue ʼaia ʼo te laumālie. (Kalate 5:22, 23) Koia, ka fia tokoni he kaugana ʼa te ʼAtua ki he tahi, pea ʼe ko he fakaʼiloga ʼaia ʼo te gāue ʼo te laumālie ʼa Sehova. Lua, neʼe faʼu tatou ki te pāki ʼo te ʼAtua. (Senesi 1:26) Ko tona faka ʼuhiga ʼaē ʼe feala ke tou fakahā tona ʼu kalitātē, ohage ko tona agalelei pea mo tona manavaʼofa. Koia ʼi te ʼu temi fuli pe ʼaē ʼe tokoni ai he kaugana ʼa Sehova ki he tahi, pea ko te tokoni moʼoni ʼaia ʼe haʼu mai tonatou Tupuʼaga, ʼaē ʼe nātou faʼifaʼitakiʼi.

19. ʼO mulimuli ki te ʼu fakamatala ʼaē ʼe tuʼu ʼi te Tohi-Tapu, neʼe tokoni feafeaʼi Sehova ʼaki tana ʼu kaugana?

¹⁹ ʼI te temi muʼa, neʼe fakaʼaogaʼi feafeaʼi e Sehova tana ʼu kaugana moʼo foaki he tokoni? ʼI te agamāhani, neʼe uga e Sehova hana kaugana ke fai tokoni ki he tahi age, ohage ko te fai tokoni ʼa Selemia kiā Paluke, ʼo ina hāofaki ai tona maʼuli. (Selemia 45:1-5) ʼI ʼihi temi, neʼe uga te kau atolasio moʼoni ke nātou foaki he ʼu koloā moʼo tokoni ki tonatou ʼu tēhina, ohage ko te temi ʼaē neʼe fakahā ai e te kau Kilisitiano ʼi Masetonia pea mo Akaia tanatou fia tokoni ki tonatou ʼu tēhina ʼi Selusalemi ʼaē neʼe nonofo ʼi te faigataʼaʼia. Neʼe ʼui e te ʼapositolo ko Paulo, ʼuhi ko te loto fia foaki, neʼe tupu ai “te fakafetai ki te Atua.”​—2 Kolonito 9:11.

20, 21. Ko te ʼu ʼaluʼaga fea ʼaē neʼe fakaloto mālohiʼi ai ia te ʼapositolo ko Paulo e te ʼu tēhina ʼo Loma?

²⁰ ʼE malave loto tāfito ia te ʼu fakamatala ʼo ʼuhiga mo te ʼu faiga ʼa te ʼu kaugana ʼa Sehova ke nātou fefakaloto mālohiʼaki. Tou vakaʼi te faʼifaʼitaki ʼo ʼuhiga mo te ʼapositolo ko Paulo. ʼI tona ʼave pilisoni ki Loma, neʼe ʼalu Paulo ʼi te ala lahi Loma ʼaē ʼe higoa ko te Ala ʼo Apiu. Ko te koga fakaʼosi ʼo te fagona ʼaia neʼe mole faigafua, he neʼe tonu ke fakalaka te hahaʼi folau ʼi he koga meʼa neʼe vaiʼia.a Ko te ʼu tēhina ʼo te kokelekasio ʼo Loma neʼe nātou ʼiloʼi ʼe haʼu Paulo. Koteā ʼaē neʼe nātou fai? Neʼe nātou fakafīfīmālie koa ʼo atalitali ʼi tonatou ʼu ʼapi ʼi te kolo ʼo aʼu ki te tau mai ʼa Paulo pea nātou ʼōmai leva ʼo faka felāveʼi kiā ia?

²¹ Ko te tagata faitohi ʼo te Tohi-Tapu ko Luka, ʼaē neʼe kaugā fagona mo Paulo, ʼe ina fakamatala mai te meʼa ʼaē neʼe hoko: “Nee logo te u tehina [mai Loma] kua matou nofo i te kolo aia, pea nee natou omai o fakatalitali kia matou i [“te Fakatauʼaga Meʼa ʼo Apiu,” MN ] mo [“Te ʼu Fale Tali Fagona e Tolu,” MN ].” Koutou fakakaukauʼi age muʼa te meʼa ʼaia neʼe hoko. ʼI tanatou ʼiloʼi ʼaē ʼe haʼu ia Paulo, ko te ʼu tēhina neʼe ʼōmai mai Loma ke nātou felāveʼi mo ia. Ko ʼihi ʼu tēhina neʼe nātou atalitali ʼi te Fakatauʼaga Meʼa ʼo Apiu, neʼe ko te koga meʼa ʼiloa neʼe vaha mamaʼo mo Loma ia kilometa e 74. Ko ʼihi tēhina, neʼe nātou atalitali ʼi te fale tali fagona ʼe higoa ko Te ʼu Fale Tali Fagona e Tolu ʼaē ʼe vaha mamaʼo mo Loma ia kilometa e 58. Neʼe malave feafeaʼi kiā Paulo? “I te sio a Paulo kia natou nee fakafetai ki te Atua, pea nee lotomalohi ai.” (Gaue 28:15) Koutou fakakaukauʼi age muʼa, ʼi te sio pe ʼa Paulo ki te ʼu tēhina ʼaia ʼaē neʼe nātou faiga mālohi ke nātou fagona ʼi te ala loaloaga ʼaia, neʼe ina maʼu ai te mālohi pea mo te loto fīmālie. Pea ko ai ʼaē neʼe fakamālo kiai ia Paulo ʼi te tokoni ʼaia? Neʼe fakamālo kiā Sehova ʼAtua, te Matapuna ʼo te tokoni ʼaia.

22. Ko te vaega Tohi-Tapu fea ʼaē ki te taʼu 2005, pea koteā ʼaē ka tou vakaʼi anai ʼi te alatike ʼaē ka hoko mai?

²² ʼE hā lelei ʼi te ʼu fakamatala ʼo te Tohi-Tapu ʼe ko Sehova totatou tokoni pea ʼe mole hona tatau. Koia ʼe tāu mo feʼauga ia te vaega Tohi-Tapu ʼo te taʼu 2005 ʼa te kau Fakamoʼoni ʼa Sehova, ia te vaega ʼo Pesalemo 121:2: “Ko toku tokoni ʼe haʼu mai ia Sehova.” Kae ʼe tokoni feafeaʼi ia Sehova kiā tatou iā ʼaho nei? ʼE tou vakaʼi anai te faʼahi ʼaia ʼi te alatike ʼaē ka hoko mai.

[Kiʼi nota]

Kei Koutou Manatuʼi Koa?

Neʼe tokoni feafeaʼi ia Sehova​—

• ʼaki te kau ʼāselo?

• ʼaki tona laumālie maʼoniʼoni?

• ʼaki tana Folafola?

• ʼaki tana ʼu kaugana?

[Talanoa ʼo te pasina 15]

Te vaega faka Tohi-Tapu ʼo te taʼu 2005: “Ko toku tokoni ʼe haʼu mai ia Sehova.”​—Pesalemo 121:2.

[Paki ʼo te pasina 16]

Neʼe fakamālo Paulo ki te ʼAtua ʼo ʼuhiga mo te tokoni age ʼa te ʼu tēhina ʼo Loma