ʼE Maʼuli Te Folafola ʼa Sehova

Ko He ʼu Puani Maʼuhiga ʼi Te Tohi ʼo Te Kau Tuʼi Fakamāu

NEʼE tali feafeaʼi e Sehova ia te lītuʼa ʼo tana hahaʼi kiā te ia kae nātou kamata tauhi ki te ʼu ʼatua loi? Kae e feafeaʼi age la ʼi tanatou logogataʼa liuliuga pea mo nātou pāui leva kiā te ia ke tokoni age kiā nātou ʼi tonatou ʼu faigataʼaʼia? Neʼe hāofaki koa ia nātou e Sehova logola te ʼu faʼahi ʼaia? ʼE maʼu te ʼu tali ki te ʼu fehuʼi ʼaia pea mo te tahi ʼu fehuʼi maʼuhiga ʼi te tohi ʼa te Kau Tuʼi Fakamāu. Neʼe hoki fakaʼosi te tohi ʼaia e te polofeta ko Samuele ʼi te lagi taʼu 1100 ʼi muʼa ʼo totatou temi, kae ʼe ina fakamatala te ʼu meʼa ʼaē neʼe hoko lolotoga te ʼu taʼu e 330​—mai te mate ʼo Sosue ʼo aʼu ki te fakanofo ʼo te ʼuluaki hau ʼo Iselaele.

ʼE kau te tohi ʼa te Kau Tuʼi Fakamāu ki te folafola mālohi ʼa te ʼAtua, pea ʼe maʼuhiga ʼaupito kiā tatou. (Hepeleo 4:12) ʼAki te ʼu fakamatala maʼuhiga ʼo te tohi ʼaia, ʼe feala ai hatatou mahino lelei ki te ʼulugaaga ʼo te ʼAtua. Ko te ʼu ako ʼaē ʼe tou maʼu, ʼe fakamālohiʼi ai tatatou tui pea mo tokoni mai ke tou tapiki maʼu ki “te mauli mooni,” ia te maʼuli heʼegata ʼi te mālama foʼou ʼaē neʼe fakapapau mai e te ʼAtua. (1 Timoteo 6:12, 19; 2 Petelo 3:13) Ko te hāofaki tuʼa lahi e Sehova ia tana hahaʼi, ʼe ko he fakamelomelo ʼaia ʼo te hāofaki lahi ʼaē ka fakahoko anai e tona ʼAlo, ia Sesu Kilisito, ʼi te temi ka haʼu.

HE KOʼE NEʼE ʼAOGA KE ʼI AI HE KAU TUʼI FAKAMĀU?

(Kau Tuʼi Fakamāu 1:1–3:6)

ʼI te ʼosi lavā ʼo te ʼu hau ʼo te fenua ʼo Kanaane ʼi te temi pule ʼo Sosue, neʼe tahi hū te ʼu telepi ʼo Iselaele ki tona tofiʼa pea mo maʼu tona kele. Kae ko te kau Iselaele neʼe mole nātou kapu ia te hahaʼi ʼo te fenua, pea neʼe liliu ia te faʼahi ʼaia ko he hele moʼo fakahēʼi ia Iselaele.

Ko te taʼiake ʼaē neʼe tupu ake kae kua mate Sosue, ‘neʼe mole nātou ʼiloʼi ia Sehova, pea mo te gāue ʼaē neʼe ina fai ki Iselaele.’ (Kau Tuʼi Fakamāu 2:10) Pea tahi, neʼe kamata ʼohoana te kau Iselaele mo te kau Kanaane pea mo tauhi ki tonatou ʼu ʼatua. Koia neʼe tuku ai e Sehova ia te kau Iselaele ke ʼohofiʼi e tonatou ʼu fili. Kae ʼi te kua kovi ʼo tonatou fakapōpulaʼi, neʼe pāuiʼi te ʼu foha ʼo Iselaele ki te ʼAtua moʼoni ke tokoni age kiā nātou. Lolotoga te temi ʼaia ʼo te maʼuli faka politike, mo faka fenua pea mo faka lotu ʼo Iselaele, neʼe kamata mai ai te hōloga ʼa te kau tuʼi fakamāu ʼaē neʼe fakaʼaogaʼi e Sehova moʼo hāofaki mai tana hahaʼi mai tonatou ʼu fili.

Te ʼu Tali Ki Te ʼu Fehuʼi Faka Tohi-Tapu:

1:2, 4​—He koʼe neʼe hinoʼi ia Suta ko te ʼuluaki telepi ʼaia ʼaē ka maʼu tofiʼa ʼi te kele ʼo te fakapapau? ʼI tona fakahagatonu, ko te pilivilesio ʼaia neʼe tonu ke maʼu e te telepi ʼo Lupeni, ia te ʼuluaki foha ʼo Sakopo. Kae ʼi te lea faka polofeta ʼaē neʼe fai e Sakopo ʼi muʼa ʼo tana mate, neʼe ina fakakikite ai ʼe mole tonu ke laka ia Lupeni, ʼo toʼo ai ia ia tona ʼuhiga ʼuluaki tupu. Ko Simeone mo Levi, ʼaē neʼe nā aga fekai, neʼe tonu ke fakamavetevete ia nāua ʼi te fenua ʼo Iselaele. (Senesi 49:3-5, 7) Pea ko ia ʼaē neʼe feala ke ina maʼu ia te pilivilesio ʼaia, neʼe ko Suta, te fā foha ʼo Sakopo. Ko Simeone, ʼaē neʼe hake mo Suta, neʼe ina maʼu te ʼu kele liliki neʼe mavetevete ʼi te telituale lahi ʼo Suta.a​—Sosue 19:9.

1:6, 7​—He koʼe neʼe tuʼusi te ʼu kauʼi tuhi matuʼa pea mo te ʼu kauʼi vaʼe matuʼa ʼa te ʼu hau ʼaē kua lavā? Ko he tahi neʼe mole kei ʼi ai hona kauʼi tuhi matuʼa pea mo hona kauʼi vaʼe matuʼa neʼe mole kei lava kau ki he tau. Heʼe ko he tagata solia neʼe mole kei ʼi ai hona kauʼi tuhi matuʼa, neʼe mole feala hana puke he heletā peʼe ko he tao. Pea neʼe faigataʼa hakita tuʼu lelei mo kapau neʼe mole kei ʼi ai hota kauʼi vaʼe matuʼa.

Te ʼu Puani ʼe Tou Lava Tāʼofi:

2:10-12. ʼE tonu ke ʼi ai hatatou polokalama ako Tohi-Tapu ʼe tou fai tuʼumaʼu ke ‘ ʼaua naʼa galo iā tatou te ʼu gāue ʼa Sehova.’ (Pesalemo 103:2) ʼE tonu ke fakahū e te ʼu mātuʼa ia te moʼoni ʼo te Folafola ʼa te ʼAtua ki te ʼu loto ʼo tanatou ʼu fānau.​—Teutalonome 6:6-9.

2:14, 21, 22. Neʼe fakagafua e Sehova ke hoko te ʼu meʼa kovi ki tana hahaʼi ʼaē neʼe talagataʼa, he neʼe ina fia fakatūʼā nātou, mo fakamaʼa ia nātou, pea mo uga nātou ke nātou tafoki age kiā te ia.

NEʼE FOAKI AGE E SEHOVA IA TE KAU TUʼI FAKAMĀU

(Kau Tuʼi Fakamāu 3:7–16:31)

Ko te fakamatala ʼo te ʼu mālo ʼa te kau tuʼi fakamāu, ʼe kamata ʼaki te fakagata e Oteniele ia te ʼu taʼu e valu ʼaē neʼe fakapōpulaʼi ai ia Iselaele e te hau Mesopotamia. ʼAki he lototoʼa, neʼe matehi e Ehuti ia te hau foʼi sino Moapite ko Ekelone. Ko Samekale neʼe ina matehi e ia tokotahi te toko 600 kau Filisitini ʼaki te moʼi ʼakau ʼaē ʼe fakaʼaogaʼi moʼo taki te faga pipi. ʼAki te fakaloto mālohi ʼa te fafine polofeta ko Tepola pea mo te lagolago ʼa Sehova, ko Palake pea mo tana toko hogofulu afe kau solia ʼaē neʼe mole faʼa lelei tanatou ʼu mahafu, neʼe nātou tuli ia te foʼi kautau mālohi ʼa Sisela. Neʼe hinoʼi leva e Sehova ia Seteone ʼo ina faka fealagia age kiā ia pea mo tana toko 300 kau solia ke nātou mālo ʼi te kau Matianite.

ʼAki ia Sefeteo, neʼe hāofaki e Sehova ia Iselaele mai te kau Amonite. ʼI te toko 12 kau tagata ʼaē neʼe tuʼi fakamāu ʼi Iselaele, neʼe kau ai ia Tola, mo Saile, mo Ipesane, mo Elone pea mo Apitone. Neʼe fakaʼosi te temi ʼa te Kau Tuʼi Fakamāu ʼaki ia Samisoni, ʼaē neʼe ina tauʼi te kau Filisitini.

Te ʼu Tali Ki Te ʼu Fehuʼi Faka Tohi-Tapu:

4:8​—He koʼe neʼe faiga mālohi e Palake ke ʼalu age ia te polofeta ko Tepola ki te koga meʼa ʼaē neʼe fai ai te tau? ʼE mahino mai, neʼe fakafuafua e Palake ʼe mole lelei hana ʼalu tokotahi ʼo tauʼi ia te kautau ʼa Sisela. Ko tana ʼiloʼi ʼaē ʼe kaugā ʼolo mo te fafine polofeta, neʼe ko he fakaloto mālohi kiā ia pea mo tana hahaʼi tau, ʼe takitaki nātou e te ʼAtua pea mo nātou maʼu ai ia te loto falala. Ko te faiga mālohi ʼa Palake ke kaugā ʼolo ia Tepola mo nātou lolotoga te temi tau, neʼe mole ko he vaivaiʼia, kae neʼe ko he fakahā ʼaia ʼo tana tui mālohi.

5:20​—Neʼe hoko feafeaʼi te tau ʼa te ʼu fetuʼu mai te lagi moʼo lagolago kiā Palake? ʼE mole ʼui mai ʼi te Tohi-Tapu peʼe neʼe tokoni te kau ʼāselo ki te tau ʼaia, peʼe ko he ʼu foʼi maka ʼaē neʼe tō mai te lagi, peʼe ko he ʼu fai fakakikite ʼa Sisela ʼaki te ʼu fetuʼu pea neʼe hala tana fai fakakikite ʼaia. Kae ko te faʼahi ʼe tou ʼiloʼi papau, neʼe tokoni te ʼAtua ki te tau ʼaia.

7:1-3; 8:10​—He koʼe neʼe ʼui e Sehova ko te toko 32 000 kau solia ʼa Seteone neʼe kaugamālie fau moʼo tauʼi ʼo tonatou ʼu fili ʼaē neʼe nātou toko 135 000? Koteʼuhi neʼe ko Sehova ʼaē neʼe ina foaki te mālo kiā Seteone mo tana kau solia. Neʼe mole loto e Sehova ke nātou manatu neʼe nātou mālo ʼi te kau Matianite ʼaki tonatou mālohi fakatagata.

11:30, 31​—Ko te fakapapau ʼaē neʼe fai e Sefeteo, neʼe faka ʼuhiga koa ki he sākilifisio fakatagata? Neʼe mole ko te manatu ʼaia ʼa Sefeteo, koteʼuhi neʼe fakatotonu fēnei ʼi te Lao: “ ʼAua naʼa maʼu ʼi tou loto fale he tahi ʼe ina tutu tona foha peʼe ko tona ʼofafine ʼi te afi.” (Teutalonome 18:10) Pea neʼe mole manatu ia Sefeteo ki he manu kae neʼe manatu ki he tagata. Ko te ʼu manu ʼaē neʼe lava fakaʼaogaʼi ki te ʼu sākilifisio neʼe mole taupau ʼi te ʼu loto fale ʼa te kau Iselaele. Pea ko te mōlagaʼi ʼo he manu neʼe mole ko he meʼa makehe. Neʼe lagi ʼiloʼi e Sefeteo ko ia ʼaē ka hū mai anai ki tuʼa ʼi tona ʼapi ʼo faka felāveʼi mo ia ʼe ko tona ʼofafine. Ko ia ʼaia ʼe foaki anai “ohage ko he holokoseta,” ko tona faka ʼuhiga ko te tagata ʼaia peʼe ko te fafine ʼaia ʼe foaki kātoa anai tona maʼuli ki te tauhi kiā Sehova ʼi te sagatualio.

Te ʼu Puani ʼe Tou Lava Tāʼofi:

3:10. Ko te fua lelei ʼi te ʼu faiga ki te ʼu meʼa fakalaumālie, ʼe mole fakalogo ki te poto fakatagata, kae ʼe fakalogo ki te laumālie ʼo Sehova.​—Pesalemo 127:1.

3:21. Neʼe faiva ia Ehuti ʼi te fakaʼaogaʼi ʼo tana heletā ʼaki he lototoʼa. ʼE tonu ke tou faiva ʼi te fakaʼaogaʼi ʼo “te heleta a te Laumalie, aia e ko te Folafola a te Atua.” Ko tona faka ʼuhiga, ʼaki he lototoʼa ʼe tonu ke tou faiva ʼi te fakaʼaogaʼi ʼo te Tohi-Tapu ʼi tatatou minisitelio.​—Efeso 6:17; 2 Timoteo 2:15.

6:11-15; 8:1-3, 22, 23. ʼE tou maʼu te ʼu ako e tolu mai te aga fakapoipoi ʼa Seteone: (1) Ka foaki mai he pilivilesio gāue kiā tatou, ʼe tonu ke tou fakakaukau ki te kavega ʼaē ʼe pipiki kiai, kae mole tonu pe ke tou manatu ki te tuʼulaga māʼoluga ʼaē ʼe lagi pipiki kiai. (2) Ka tou felogoi mo nātou ʼaē ʼe hoko ʼita, ʼe ko he aga fakapotopoto hatatou aga fakapoipoi. (3) ʼE puipui tatou e te aga fakapoipoi ke ʼaua naʼa tou hoha fau ki te tuʼulaga.

6:17-22, 36-40. ʼE tonu ke tou nonofo tokaga pea ke ‘ ʼaua naʼa tou hoko tui ki te ʼu palalau fuape ʼe haʼu mai he laumālie.” Kae ʼe tonu ke tou “ ʼahiʼahiʼi te ʼu folafola ʼaē ʼe haʼu mai he laumālie ke [tou] ʼiloʼi ai peʼe haʼu moʼoni mai te ʼAtua.” (1 Soane 4:1, MN ) Ke ʼiloʼi papau e he tagata ʼāfea kei foʼofoʼou peʼe ko te tokoni ʼaē ka ina fai ʼe fakatafito moʼoni anai ki te Folafola ʼa te ʼAtua, ʼe lelei hana kumi tokoni ki he tagata ʼāfea kua māhani.

6:25-27. Neʼe fakaʼeteʼete ia Seteone ke ʼaua naʼa hoʼi ʼiʼita noa te ʼu hahaʼi ʼaē neʼe fakafeagai kiā ia. Ka tou fai faka mafola, ʼe tonu ke tou tōkakaga naʼa tou hoʼi fakamamahiʼi te hahaʼi ʼaki tatatou ʼu faʼahiga palalau.

7:6. Ka tou tauhi kiā Sehova, ʼe tonu ke tou hage ko te toko 300 tagata ʼa Seteone​—ke tou nonofo ʼalaʼala.

9:8-15. ʼE ko he aga vale ia hakita fiatuʼu pea mo fia maʼu tuʼulaga.

11:35-37. Ko te faʼifaʼitaki lelei ʼa Sefeteo neʼe lagi tokoni lahi ki tona ʼofafine ke ina maʼu he tui mālohi pea mo ina maʼu te manatu faka sākilifisio. ʼE lava tuku he faʼifaʼitaki feiā e te ʼu mātuʼa ki tanatou ʼu fānau.

11:40. ʼE ko he meʼa fakaloto mālohi, mokā kita fai he ʼu fakamālo ki he tahi ʼe maʼuli faka sākilifisio moʼo tauhi kiā Sehova.

13:8. Ka nātou akoʼi tanatou ʼu fānau, ʼe tonu ke faikole te ʼu mātuʼa kiā Sehova ke ina takitaki ia nātou pea ke nātou muliʼi tana ʼu fakatotonu.​—2 Timoteo 3:16.

14:16, 17; 16:16. Ko te fakakinauʼi ʼo he tahi ʼaki te ʼu tagi pea mo te ʼu fakakinakina ʼe feala ke ina maumauʼi he ʼu felogoi.​—Tāʼaga Lea 19:13; 21:19.

KO TE TAHI ʼU AGAHALA ʼI ISELAELE

(Kau Tuʼi Fakamāu 17:1–21:25)

ʼE maʼu te ʼu fakamatala maʼuhiga e lua ʼi te koga fakaʼosi ʼo te tohi ʼa te Kau Tuʼi Fakamāu. Ko te ʼuluaki fakamatala ʼe talanoa ai ki te tagata ko Mikea, neʼe ina fakatuʼu te tamapua ʼi tona ʼapi pea neʼe ina fakaʼaogaʼi te Levite ke gāue faka pelepitelo maʼa ia. ʼI tanatou ʼosi holoʼi te kolo ko Laisi, peʼe ko Lesemi, neʼe laga e te telepi ʼo Tani tonatou kolo pea neʼe nātou fakahigoaʼi ko Tani. ʼI tanatou fakaʼaogaʼi te tamapua ʼa Mikea pea mo tana pelepitelo, neʼe nātou fakatuʼu te faʼahiga tauhi ʼi Tani. ʼE mahino mai, ko te kau Tani neʼe nātou maʼu ia te kolo ʼo Laisi ʼi muʼa ʼo te mate ʼo Sosue.​—Sosue 19:47.

Neʼe hoko te lua ʼaluʼaga kae mole heʼeki faʼa fualoa ia te ʼosi mate ʼa Sosue. Ko te ʼu hahaʼi tagata ʼo te kolo ko Kipea neʼe nātou fakaʼalikiʼi te fafine, ʼo iku ai ki te teitei matehi ʼo te telepi kātoa ʼo Pesamino​—ʼo gata pe ki te toko 600 tagata neʼe nātou hāo mai te mātea ʼaia. Kae neʼe fai te fakatuʼutuʼu ʼaoga kiā nātou ke nātou maʼu honatou ʼu ʼohoana, pea neʼe nātou tuputupu ai ʼo aʼu ki te teitei toko 60 000 kau tagata solia ʼi te temi hau ʼo Tavite​—1 Fakamatala 7:6-11.

Te ʼu Tali Ki Te ʼu Fehuʼi Faka Tohi-Tapu:

17:6; 21:25​—Kapau ‘neʼe kua tahi māhani pe te hahaʼi ʼi te fai ʼo te meʼa ʼaē neʼe matatonu kiā ia,’ neʼe tupu ai koa he maveuveu? Kailoa ia, koteʼuhi neʼe kua lahi te ʼu fakatuʼutuʼu neʼe kua fai e Sehova maʼa tana hahaʼi. Neʼe ina foaki age kiā nātou te Lao pea mo te kau pelepitelo moʼo akoʼi ʼo nātou ki tona ala. ʼAki te Ulime pea mo te Tumime, neʼe feala ai ki te pelepitelo lahi ke ina kole age ki te ʼAtua he ʼu puleʼaki moʼo fakatokatoka te ʼu fihifihia maʼuhiga. (Ekesote 28:30) Neʼe takitahi te kolo mo tona ʼu tagata ʼāfea, ʼe nātou foaki he ʼu tokoni loloto. Ka fakaʼaogaʼi te ʼu fakatuʼutuʼu ʼaia e he tagata Iselaele, neʼe ina maʼu ai he takitaki maʼuhiga ki tona leʼo ʼo loto. ʼI tana fai ‘ ʼo te meʼa ʼaē neʼe matatonu ʼi tana sio’ ʼo mulimuli ki te ʼu fakatuʼutuʼu ʼaia, neʼe tō lelei pe ia. Kae neʼe fua kovi ki he tahi, mo kapau neʼe ina meʼa noaʼi te Lao pea mo faʼifaʼitaliha ʼo ʼuhiga mo tana aga pea mo tana tauhi.

20:17-48​—He koʼe neʼe tuku e Sehova ke mālo tuʼa lua ia te hahaʼi ʼo Pesamino ʼi te tahi ʼu telepi, logola neʼe tonu ke fakatūʼā te hahaʼi ʼo Pesamino? ʼI tana tuku ke mamate he hahaʼi tokolahi ʼi te ʼu telepi agatonu, neʼe ʼahiʼahiʼi e Sehova tonatou loto moʼoni ke taʼaki te agakovi mai Iselaele.

Te ʼu Puani ʼe Tou Lava Tāʼofi:

19:14, 15. Neʼe ʼiloga ʼi te mole fia tali kāiga ʼo te hahaʼi ʼo Kipea ia te mole lelei ʼo tanatou aga. ʼE tokoniʼi te kau Kilisitiano ke nātou “mauliʼi te aga talitali kaiga.”​—Loma 12:13.

Kua Ōvi Mai Te Hāofaki

Kei toe he kiʼi temi siʼi pe, pea ko te Puleʼaga ʼo te ʼAtua ʼaē ʼe takitaki e Kilisito, ʼe ina fakaʼauha anai ia te mālama agakovi, kae ina hāofaki te tokolahi ʼaē neʼe nonofo agatonu pea neʼe mole honatou lākahala. (Tāʼaga Lea 2:21, 22; Taniela 2:44) ‘ ʼI te temi ʼaia, ʼe mamate ai anai te ʼu fili fuli ʼo Sehova, pea ko nātou ʼaē ʼe ʼoʼofa kiā te ia, ʼe nātou hage anai ko te laʼā mokā hopo ake ʼi tona gigila kātoa.’ (Kau Tuʼi Fakamāu 5:31) Tou fakahā ʼe tou kau kiā nātou ʼaē ʼe ʼoʼofa kiā Sehova, ʼo tou maʼuliʼi te ʼu meʼa ʼaē neʼe tou akoʼi mai te tohi ʼo te Kau Tuʼi Fakamāu.

Koʼeni te moʼoni ʼaē neʼe fakahā putuputu ʼi te ʼu fakamatala ʼa te Kau Tuʼi Fakamāu: Ko te fakalogo kiā Sehova ʼe iku ki he ʼu tapuakina lahi, kae ko te logogataʼa ʼe iku ki te malaʼia. Koia ʼe maʼuhiga ai ke tou liliu ʼo “fakalogo mo toutou loto katoa” ki te finegalo ʼo te ʼAtua ʼaē kua ina fakahā mai.​—Loma 6:17; 1 Soane 2:17.

[Kiʼi nota]

[Mape ʼo te pasina 25]

(Vakaʼi te nusipepa)

“Neʼe fakanofo e Sehova ia te kau tuʼi fakamāu, pea neʼe nātou hāofaki [ia Iselaele] mai te hahaʼi kaihaʼa.”​—Kau Tuʼi Fakamāu 2:16

TE KAU TUʼI FAKAMĀU

1. Oteniele (Telepi ʼo Manase)

2. Ehuti (Telepi ʼo Suta)

3. Samekale (Telepi ʼo Suta)

4. Palake (Telepi ʼo Nefetali)

5. Seteone (Telepi ʼo Isakale)

6. Tola (Telepi ʼo Manase)

7. Saile (Telepi ʼo Manase)

8. Sefeteo (Telepi ʼo Kate)

9. Ipesane (Telepi ʼo Asele)

10. Elone (Telepi ʼo Sapulone)

11. Apitone (Telepi ʼo Efelaime)

12. Samisoni (Telepi ʼo Suta)

NEFETALI

ASELE

SAPULONE

TANI

ISAKALE

MANASE

EFELAIME

PESAMINO

SUTA

TANI

MANASE

KATE

LUPENI

[Paki ʼo te pasina 26]

Koteā te ako ʼe tou tāʼofi mai te faiga mālohi ʼa Palake ke kaugā ʼolo ia te polofeta ko Tepola mo nātou ki te koga meʼa ʼaē neʼe fai ai te tau?