Te ʼu Fehuʼi ʼa Te Kau Lautohi

Neʼe lava feafeaʼi kiā Samisoni ke haga nofo ʼi tona ʼuhiga tagata Nasilea, kae neʼe fāfā ki te ʼu sino mate?

ʼI te Iselaele ʼāfea, neʼe feala ki he tahi ke ina fai hana fakapapau he neʼe loto kiai, ʼo liliu ai ko he tagata Nasilea lolotoga he temi neʼe faka tuʼakoi.a ʼI te ʼu fakamaʼua ʼaē neʼe fai kiā nātou ʼaē neʼe nātou fai te taʼi fakapapau ʼaia, neʼe ʼui fēnei: “ ʼI te ʼu ʼaho fuli pe ʼaē ʼe nofo kehe ai maʼa Sehova, ʼe mole feala anai hana fakaōvi ki he mate. Māʼia mo tana tāmai peʼe ko tana faʼē, peʼe ko hona tēhina peʼe ko hona tuagaʼane, ʼe mole ina ʼulihi anai ia ia mokā nātou mamate anai.” Kae e feafeaʼi mo kapau ko he tahi “ ʼe mate fakafokifā ʼi ʼona tafa”? Kapau ʼe fāfā ki te mate fakafokifā ʼaia pea ʼe ina ʼulihi ai tona ʼuhiga Nasilea. Koia neʼe ʼui fēnei ai: “ ʼE mole lau anai te ʼu ʼaho kua hili.” ʼE tonu anai ke ina fakahoko he toʼotoʼoga ʼo te fakamaʼa pea mo toe kamata te temi ʼaē neʼe fakatuʼutuʼu ki tona temi Nasilea.​—Faka au 6:6-12.

Kae neʼe mole tatau te ʼuhiga Nasilea ʼa Samisoni. ʼI muʼa ʼo te tupu ake ʼa Samisoni, neʼe ʼui fēnei age e te ʼāselo ʼa Sehova ki tana faʼē: “Koʼeni ʼe ke faitama anai, pea ʼe ke fānauʼi anai he tama; ʼe mole tonu anai ke tele tona ʼulu, koteʼuhi ko te fānau ʼaia ʼe liliu anai ko he Nasilea ʼa te ʼAtua ʼi te temi pe ʼaē ʼe ke fānauʼi ai; pea ʼe ko ia ʼaē ka ina fakatuʼutuʼu anai ia te hāofaki ʼo Iselaele mai te kau Filisitini.” (Kau Tuʼi Fakamāu 13:5) Neʼe mole fai e Samisoni he fakapapau ke liliu ai ko he Nasilea. Neʼe Nasilea he neʼe ko te ʼAtua ʼaē neʼe ina fakatuʼutuʼu ia te faʼahi ʼaia, pea ʼe nofo ʼi tona ʼuhiga ʼaia ʼi tona maʼuli kātoa. Koia ko te fakamaʼua ʼaē ke ʼaua naʼa fāfā ki he sino mate neʼe mole feala ke fakaʼaogaʼi kiā ia. Kapau neʼe fāfā hala ki he sino mate, neʼe mole feala kiā ia ke ina toe kamata tona ʼuhiga Nasilea mai tona ʼaho tupu. Koia ko te ʼu fakamaʼua ʼaē neʼe fai kiā nātou ʼaē neʼe Nasilea ʼi tonatou maʼuli kātoa, neʼe mole tatau ia mo te ʼu fakamaʼua ʼaē neʼe fai ki te kau Nasilea ʼaē neʼe nātou filifili te faʼahiga maʼuli ʼaia.

Tou vakaʼi age muʼa te ʼu fakatotonu ʼaē neʼe fai e Sehova ki te ʼu tagata ʼaē ʼe talanoa ki ai ʼi te Tohi-Tapu, neʼe nātou Nasilea ʼi tonatou maʼuli kātoa: ko Samisoni, mo Samuele, pea mo Soane Patita. Ohage ko tona fakahā ʼi ʼoluga, neʼe fakamaʼua kiā Samisoni ke ʼaua naʼa ina kosi tona lauʼulu. ʼO ʼuhiga mo tana tamasiʼi ʼaē neʼe mole heʼeki tupu, neʼe fakapapau fēnei e Ana: “ ʼE au foaki anai ia ia kiā Sehova ʼi te ʼaho fuli ʼo tona maʼuli, pea ʼe mole haʼu anai te tele ki tona ʼulu.” (1 Samuele 1:11) Ki te faʼahi ʼo Soane Patita, neʼe ʼui fēnei e te ʼāselo ʼo Sehova: “E mole inu anai ki te vino mo te kava malohi.” (Luka 1:15) Pea tahi, “kia Soane totonu nee mau e ia hona teu fuluʼi kamelo pea mo he noʼo kiliipipi i tona koga loto; pea ko tana meakai nee ko te hee mo te meli vao.” (Mateo 3:4) ʼE mole ʼi ai he tahi ia nātou toko tolu ʼaenī neʼe fakatotonu age ke nātou fakamamaʼo mai he sino mate.

Logope ko Samisoni neʼe ko te Nasilea, kae neʼe kau ki te kau tuʼi fakamāu ʼaē neʼe hinoʼi e Sehova moʼo hāofaki te kau Iselaele mai te hahaʼi kaihaʼa. (Kau Tuʼi Fakamāu 2:16) Pea ʼi tana fakahoko te faʼahi ʼaia, neʼe fāfā ai ki he ʼu sino mate. ʼI te tahi lakaga, neʼe tāmateʼi e Samisoni te toko 30 kau Filisitini, pea mo ina toʼo ʼonatou mutuʼi meʼa. Ki muli age, neʼe ina tāmateʼi te fili, “ ʼo ina tānaki te ʼu vaʼe mo te ʼu kauaga.” Neʼe ina toʼo mo te kaugao ʼo te āsino ʼe kei mata, pea ina matehi ʼaki ai te toko afe tagata. (Kau Tuʼi Fakamāu 14:19; 15:8, 15) Neʼe fai te ʼu meʼa fuli ʼaia e Samisoni ʼaki te tokoni ʼa Sehova. ʼE ʼui ʼi te Tohi-Tapu ʼe ko he tagata neʼe ina tuku he faʼifaʼitaki lelei ʼo ʼuhiga mo te tui.​—Hepeleo 11:32; 12:1.

ʼE ʼui neʼe haeʼi te laione e Samisoni “ohage ko te haeʼi lua ʼo he ʼuhiʼi tao tagata,” ko tona faka ʼuhiga koa ko te haeʼi ʼo te ʼuhiʼi tao tagata neʼe ko he meʼa neʼe fai māhani ʼi tona temi?

ʼE mole maʼu mai he fakamoʼoni ʼi te temi ʼo te kau Tuʼi Fakamāu ʼo Iselaele, neʼe ko he agamāhani ʼa te hahaʼi te haeʼi lua ʼo te ʼu ʼuhiʼi tao tagata. ʼE ʼui ʼi te tohi ʼa te Kau Tuʼi Fakamāu 14:6: “Neʼe gāue te laumālie ʼa Sehova iā [Samisoni], ʼo ina haeʼi lua [te laione mui] ohage ko te haeʼi lua ʼo he ʼuhiʼi tao tagata, kae neʼe mole ina puke he meʼa ʼi tona nima.” ʼE mahino ia ko te ʼu palalau ʼaenī ʼe ko he ʼu palalau moʼo fai he fakatatau.

Neʼe feala ke ʼi ai te ʼu faka ʼuhiga e lua ʼo te kupuʼi palalau neʼe “ina haeʼi lua.” Neʼe lagi ina haeʼi te ʼu kaugao ʼo te laione, peʼe neʼe ina fasifasiʼi te ʼu koga ʼo te laione. Kapau, neʼe ina haeʼi te ʼu kaugao ʼo te laione, pea ko he faʼahi ʼe feala tona fai ki he ʼuhiʼi tao ʼaki te mālohi fakatagata. Kapau koia ʼaia, pea ʼe hā ʼaki mai ko te matehi ʼo te laione ʼaki te ʼu nima neʼe ko he meʼa faigafua noa kiā Samisoni, ohage ko hana lava fai ki he ʼuhiʼi tao tagata. Kae e feafeaʼi age la mo kapau neʼe matehi e Samisoni ia te laione he neʼe ina fasifasiʼi tona ʼu koga? Kapau koia, pea ʼe kei feala ke faka ʼuhiga ohage ko he ʼu palalau moʼo fakatatau. ʼE tou fia mahino ʼaki te ʼu palalau fakatā, ʼaki te laumālie ʼa Sehova, neʼe feala ai kiā Samisoni ke ina fai te gāue neʼe ʼaoga kiai he mālohi makehe. ʼE fakahā e te fakatatau ʼaē ʼe tou maʼu ʼi te tohi ʼa te Kau Tuʼi Fakamāu 14:6, ʼaki te tokoni ʼa Sehova, ko he laione mālohi mo ʼitaʼita neʼe ko he meʼa noa ia kiā Samisoni, ohage pe he ʼuhiʼi tao maʼa he tagata neʼe mole ina maʼu he mālohi makehe.

[Kiʼi nota]