ʼE Fua Koa Te Moʼoni Ia Nātou ʼAē ʼe Koutou Akoʼi?

NEʼE lotomamahi ʼaupito ia te ʼu mātuʼa ʼa te tama ko Eric, ʼi te temi ʼaē neʼe ina ʼui age kiā nāua ʼe mole kei fia kau ki te kau Fakamoʼoni ʼa Sehova. ʼI muʼa ʼo te hoko ʼo te faʼahi ʼaia, neʼe mole nā tokagaʼi he fetogi ʼi tana aga. ʼI tana kei veliveli, neʼe kau ia Eric ki te ako faka famili, mo te ʼu fono, pea mo te fai faka mafola mo te kokelekasio. Neʼe hage ia neʼe ʼofa ki te moʼoni. Kae ʼi temi leva ʼaē neʼe mavae ai ʼi tonatou ʼapi, neʼe ʼiloʼi ai e tana ʼu mātuʼa ko te moʼoni ʼo te Tohi-Tapu neʼe mole malave ki tona loto. Neʼe nā punamaʼuli ai pea mo nā lotomamahi.

Neʼe toe lotomamahi ʼihi ʼi te temi ʼaē neʼe fakagata fakapunamaʼuli ai e he tahi tana ako Tohi-Tapu. ʼI te ʼu ʼaluʼaga ʼaia, ʼe tau feʼekeʼaki fēnei ʼihi: ‘He koʼe neʼe mole au tokagaʼi he meʼa?’ Kae ʼe feala koa ke tou ʼiloʼi peʼe fua te moʼoni ia nātou ʼaē ʼe tou akoʼi, ʼi muʼa ʼo te hoko ʼo he tuʼutāmaki fakalaumālie? ʼO ʼuhiga mo te faʼahi ʼaia, ʼe tou lava ʼiloʼi papau feafeaʼi peʼe malave te moʼoni ia tatou ohage ko tona malave ia nātou ʼaē ʼe tou akoʼi? ʼI tana lea fakatātā ʼo ʼuhiga mo te tagata to pulapula, neʼe tuku mai e Sesu he ʼu manatu ʼe feala ai hatatou tali ki te ʼu fehuʼi ʼaia.

ʼE Tonu Ke Malave Te Moʼoni Ki Te Loto

Neʼe ʼui fēnei e Sesu: “Ko te pulapula e ko te folafola a te Atua. Pea ko [te pulapula ʼaē ʼe to] i te kele lelei, ko natou ae e natou fagono ki te folafola pea e natou taofi mo he loto e taau mo lelei pea e natou fua i te kataki.” (Luka 8:11, 15) ʼI muʼa ʼo te fua ʼo te moʼoni ʼo te Puleʼaga ʼi tatatou kau ako, ʼe tonu ke aka te moʼoni ʼi tonatou loto. ʼE fakapapau mai e Sesu, ohage ko he pulapula ʼi he moʼi kele lelei, ka malave te moʼoni ʼa te ʼAtua ki te loto ʼo he tahi ʼe lelei, pea ʼe homo atu aipe pea mo fua. Koteā ʼaē ʼe tonu ke ina maʼu?

ʼE maʼuhiga ke ina maʼu he ʼu kalitātē ʼe haʼu mai tona loto, kae mole ko he ʼu meʼa pe ʼe hā mai ki tuʼa. Ko he tahi ʼe ina fakahoko māhani he ʼu gāue fakalaumālie, ʼe mole ina fakahā tuʼumaʼu mai te ʼu meʼa ʼaē ʼe nofo moʼoni ʼi tona loto. (Selemia 17:9, 10; Mateo 15:7-9) ʼE tonu ke tou sio loloto age. ʼE tonu ke fetogi kātoa tona ʼu holi, te ʼu meʼa ʼaē ʼe ina uga ia ia, pea mo te ʼu meʼa ʼaē ʼe ina fakamuʼamuʼa. ʼE tonu ke ina maʼu te ʼulugaaga foʼou, ʼaē ʼe mulimuli ki te finegalo ʼo te ʼAtua. (Efeso 4:20-24) Tou toʼo he faʼifaʼitaki: ʼI te logo ʼa te kau Tesalonika ki te logo lelei, neʼe ʼui e Paulo neʼe nātou tali te logo ʼaia ohage ko te folafola ʼa te ʼAtua. Kae neʼe faka tui ia Paulo ko te moʼoni neʼe “toe gāue ia [nātou],” ʼuhi ko tanatou faʼa kātaki, mo tanatou tui pea mo tonatou ʼofa.​—1 Tesalonika 2:13, 14, MN; 3:6.

ʼE moʼoni, ko te meʼa ʼaē ʼi te loto ʼo he tahi ʼe ina ako ia te Tohi-Tapu, ʼe hā fakatomuʼa anai peʼe ki muli age ʼi tana aga, ohage ko te meʼa ʼaē neʼe hoko kiā Eric. (Maleko 7:21, 22; Sakopo 1:14, 15) Meʼa fakaʼofaʼofa heʼe ʼaki te temi ko te ʼu agaaga ʼaē ʼe kovi ʼi he tahi ʼe ʼasi lelei ʼi tana aga, kae kua lagi tauhala. Koia ko te meʼa ʼaē ʼe faigataʼa, ko tatatou faiga ʼaē ke tou ʼiloʼi he ʼu vaivaiʼaga ʼo he tahi ʼi muʼa ʼo hanatou liliu ko he ʼu meʼa fakatupu tūkia kiā ia ʼi te faʼahi fakalaumālie. ʼE tonu ke tou maʼu he puleʼaki ke tou ʼiloʼi te ʼu meʼa ʼaē ʼi tona loto. Koteā ʼaē ʼe feala ke tou fai?

Te Faʼahiga Faiako ʼa Sesu

Neʼe feala kiā Sesu ke ina ʼiloʼi moʼoni te ʼu meʼa ʼaē ʼi te loto ʼo he tahi. (Mateo 12:25) Kae ʼe mole he tahi iā tatou ʼe ina lava fai ia te faʼahi ʼaia. Kae neʼe ina fakahā mai ʼe feala mo tatou ke tou ʼiloʼi te ʼu holi ʼa he tahi, te ʼu meʼa ʼaē ʼe ina uga ia ia, pea mo te ʼu meʼa ʼaē ʼe ina fakamuʼamuʼa. Ohage pe ko he tōketā faiva ʼe ina fakaʼaogaʼi he ʼu meʼa gāue kehekehe moʼo vakaʼi peʼe koteā ʼaē ʼe mahaki ai te mafu ʼo he tahi, ko Sesu neʼe ina fakaʼaogaʼi te Folafola ʼa te ʼAtua moʼo ʼiloʼi pea mo fakahā te ʼu “fakakaukau mo te u manatu o te loto,” logola neʼe mole heʼeki ʼasi ki tuʼa.​—Tāʼaga Lea 20:5; Hepeleo 4:12.

Ohage la, ʼi te tahi lakaga, neʼe tokoni Sesu kiā Petelo ke tokaga ki tona vaivaiʼaga ʼaē neʼe tupu ai tana tūkia ki muli age. Neʼe ʼiloʼi e Sesu ʼe ʼofa Petelo kiā te ia. Koia ʼaē neʼe foaki e Sesu kiā Petelo ia “te u kalavi o te Puleaga.” (Mateo 16:13-19) Kae neʼe toe ʼiloʼi e Sesu ko Satana neʼe ina fia fakatō tana kau ʼapositolo. ʼI te ʼu ʼaho ka hoko mai, ʼe hoko anai te ʼu ʼahiʼahi lahi kiā nātou. Neʼe ʼiloʼi e Sesu ko ʼihi ʼi tana kau tisipulo neʼe vaivaiʼia tanatou tui. Koia neʼe ina fakahā fakahagatonu age kiā nātou te ʼu faʼahi ʼaē neʼe tonu ke nātou gāueʼi. Tou vakaʼi age muʼa pe neʼe feafeaʼi tana palalau ki te faʼahi ʼaia.

ʼE ʼui fēnei ia Mateo 16:21: “Mai te temi aia, nee kamata fakaha e Sesu Kilisito ki ana tisipulo, e maua . . . ke tali mamahi lahi . . . [mo] tamatei.” Koutou tokagaʼi neʼe mole tala age pe e Sesu te ʼu meʼa ʼaē ka hoko kiā ia, kae neʼe ina fakahā age kiā nātou he ʼu vaega Tohi-Tapu, ohage ko Pesalemo 22:14-18 peʼe ko Isaia 53:10-12, ʼaē ʼe fakahā ai ko te Mesia ʼe tonu anai ke mamahi pea mo matehi. Koia ʼi tana lau age pea mo talanoa age ki te ʼu vaega Tohi-Tapu, neʼe foaki ai e Sesu he faigamālie kiā Petelo pea mo te tahi kau tisipulo ke nātou fakahā te ʼu meʼa ʼaē ʼi tonatou loto. Neʼe koteā tanatou tali ʼo ʼuhiga mo te fakataga ʼaē neʼe ʼamanaki hoko mai?

ʼE tou punamaʼuli ʼo ʼuhiga mo te tali ʼaē neʼe fai e Petelo, he neʼe ko he tahi neʼe lototoʼa pea mo faʼafai. Kae ʼi tana tali fakavilivili age, neʼe ina fakahā ai te vaivaiʼaga ʼo tana fakakaukau. Neʼe ina ʼui fēnei: “Agalelei kiā te koe, ʼAliki; kailoa, ʼe mole hoko anai kiā te koe he meʼa feiā.” Neʼe hala te faʼahiga fakakaukau ʼa Petelo, koteʼuhi ohage ko tona fakahā e Sesu, ko Petelo neʼe mole “manatu ʼaki te ʼu manatu ʼa te ʼAtua, kae ʼaki te ʼu manatu ʼa te tagata”​—pea neʼe ko he hala mamafa neʼe feala ke ʼi ai hona ʼu fua kovi. Koteā ʼaē neʼe fai e Sesu ʼi te temi ʼaia? ʼI tana ʼosi fakatonutonuʼi ia Petelo, neʼe ʼui age e Sesu kiā ia pea mo tana ʼu tisipulo: “Kapau ʼe fia muli mai he tahi iā te au, ke fakafisi ia kiā ia totonu pea ke ina toʼo tona pou fakamamahi pea ke muli tuʼumaʼu iā te au.” Neʼe ina fakaʼaogaʼi te ʼu manatu ʼaē ʼe tou maʼu ia Pesalemo 49:8 pea mo Pesalemo 62:12, pea ʼaki he agalelei, neʼe ina toe fakamanatuʼi age kiā nātou ko tonatou ka haʼu heʼegata ʼe mole fakalogo ki te tagata, ʼaē neʼe mole feala ke ina hāofaki he tahi, kae ʼe fakalogo ia ki te ʼAtua.​—Mateo 16:22-28, MN.

Logola ki muli age neʼe mataku faka temi ia Petelo pea neʼe fakafisi tuʼa tolu kiā Sesu, kae ʼe mahino ia ko tana fai palalau ʼaia pea mo te tahi atu ʼu fai palalau neʼe tokoni kiā ia ke toe mālohi ʼi te faʼahi fakalaumālie. (Soane 21:15-19) Hili kiai ʼaho e 50, ʼaki he lototoʼa, neʼe tuʼu ia Petelo ia muʼa ʼo te hahaʼi tokolahi ʼi Selusalemi moʼo fakamoʼoni ki te fakatuʼuake ʼa Sesu. ʼI te ʼu vāhaʼa, mo te ʼu māhina, pea mo te taʼu ki muli age, neʼe lototoʼa ʼi tona puke tuʼa lahi, mo tona tā, pea mo tona pilisoniʼi, ʼo ina tuku ai he faʼifaʼitaki lahi ʼo he tahi ʼe nofo agatonu pea ʼe mole mataku.​—Gaue 2:14-36; 4:18-21; 5:29-32, 40-42; 12:3-5.

Koteā te ako kiā tatou? ʼE koutou lava mahino koa peʼe koteā ʼaē neʼe fai e Sesu moʼo ʼiloʼi pea mo fakahā te meʼa ʼaē neʼe ʼi te loto ʼo Petelo? ʼUluaki, neʼe ina filifili te ʼu vaega ʼaē ʼe lelei moʼo fakahā kiā Petelo te faʼahi ʼaē ʼe tonu ke tokaga kiai. Pea neʼe ina foaki kiā Petelo te faigamālie ke ina fakahā te meʼa ʼaē ʼi tona loto. Moʼo fakaʼosi, neʼe ina fakahā te tahi ʼu vaega Tohi-Tapu moʼo tokoni kiā Petelo ke fetogi tana fakakaukau pea mo te ʼu meʼa ʼaē ʼi tona loto. ʼE lagi koutou manatu ʼe mole feala hakotou faiako feiā, kae tou vakaʼi te ʼu meʼa e lua neʼe hoko, ʼe fakahā ai peʼe lava tokoni feafeaʼi tatatou teuteuʼi te ako pea mo te falala kiā Sehova ke feala hatatou mulimuli ki te faʼifaʼitaki ʼa Sesu.

Tou Faigaʼi Ke Tou ʼIloʼi Te Meʼa ʼAē ʼi Te Loto

Ko te tāmai Kilisitiano neʼe ina ʼiloʼi ko tona ʼu kiʼi foha veliveli e lua neʼe nā kaihaʼa te ʼu foʼi lole ʼi te pilo gāue ʼo te tagata faiako, koia neʼe ina ʼaumai nāua ʼo palalauʼi. Neʼe mole ina meʼa noaʼi ia te faʼahi ʼaia, ʼo ina ʼui ʼe kei nā veliveli, kae ʼe ina ʼui fēnei: “Neʼe au faiga ke au ʼiloʼi te meʼa ʼaē ʼi tonā loto, pe koteā ʼaē neʼe tupu ai tanā fai ia te aga kovi ʼaia.”

Neʼe fehuʼi e te tāmai ki tona ʼu foha peʼe koteā ʼaē neʼe hoko kiā Akani, ʼaē ʼe fakamatala ia Sosue kapite 7. Neʼe mahino atu aipe te ʼu kiʼi tama pea nā fakamoʼoni neʼe kovi tanā aga. Neʼe kua hoha tonā leʼo ʼo loto. Koia neʼe fakalau age e te tāmai ia Efeso 4:28 (MN ), ʼaē ʼe ʼui fēnei ai: “Ke ʼaua naʼa toe kaihaʼa te tagata kaihaʼa, kae ke gāue kinakina . . . ke maʼu hana meʼa ke ina foaki ki ʼaē ʼe nofo ʼi te faigataʼaʼia.” Neʼe toe mālohi ia te tokoni faka Tohi-Tapu ʼaia, he neʼe fakatotonu age e te tāmai ki tona ʼu foha ke nā toʼo he ʼu foʼi lole moʼo liufaki ki te tagata faiako te ʼu foʼi lole ʼaē neʼe nā kaihaʼa.

ʼE ʼui fēnei e te tāmai: “ ʼI tamā fai palalau mo tamā ʼu tama, neʼe ma faiga ke ma pulihi te ʼu meʼa kovi ʼo tonā loto ʼaē neʼe ʼasi mai ki tuʼa, pea mo fetogi ʼaki he ʼu manatu ʼe lelei pea mo maʼa.” ʼI tanā faʼifaʼitakiʼi ia Sesu ʼi te temi ʼaē neʼe nā akoʼi ai tanā fānau, ʼe mahino ia ʼaki te temi neʼe maʼu e te ʼu mātuʼa ʼaia he ʼu fua lelei. Ki muli age, ko te ʼu tamā ʼaia e lua neʼe nā gāue ʼi te Petele ʼi Amelika, pea ʼe kei gāue ai te tokotahi ia nāua talu mai taʼu e 25.

Koʼeni te tahi faʼifaʼitaki ʼa te tuagaʼane neʼe tokoni ki te fafine neʼe ina fai tana ako Tohi-Tapu. Ko te fafine ʼaia neʼe kau ki te ʼu fono pea mo fai faka mafola pea neʼe kua ina fakahā tana fia papitema. Kae ko te fafine ʼaia neʼe falala fau kiā ia kae mole falala lahi kiā Sehova. ʼE ʼui fēnei e te tuagaʼane: “Neʼe ko he fafine neʼe maʼuli tokotahi, pea neʼe mole ina tokagaʼi ʼe kua loto faʼifaʼitaliha fau. Neʼe au tuʼania naʼa mahaki ʼulu peʼe tō ʼi te faʼahi fakalaumālie.”

Koia neʼe fakatuʼutuʼu ai e te tuagaʼane ke fai palalau mo te fafine ako ʼaia kiā Mateo 6:33, ʼo ina fakaloto mālohiʼi ia ia ke ina fetogi te ʼu meʼa ʼaē ʼe ina fakamuʼamuʼa, ke ina fakamuʼamuʼa te Puleʼaga, pea mo falala kiā Sehova ke ina fakafua lelei tana ʼu gāue. Neʼe ina fehuʼi fakahagatonu age kiā ia: “ ʼUhi ko tau maʼuli tokotahi, ʼe faigataʼa koa kiā koe ke ke falala ki te hahaʼi, ʼo feiā mo Sehova?” Neʼe fakamoʼoni age e te fafine neʼe kua tahitahiga tana faikole. Neʼe fakaloto mālohiʼi ia ia e te tuagaʼane ke mulimuli ki te tokoni ʼaē ʼe tuʼu ia Pesalemo 55:22, ʼo ina tuku tana kavega kiā Sehova heʼe fakapapau mai ia 1 Petelo 5:7, ʼe “tokaga ia kia koutou.” Neʼe malave te ʼu palalau ʼaia ki tona loto. ʼE ʼui fēnei e te tuagaʼane: “Neʼe tagi ai ʼi te lakaga ʼaia, kae neʼe ko he meʼa tahitahiga taku sio kiā ia ʼe tagi.”

Ke Haga Gāue Te Moʼoni Ia Koutou

ʼE tou fiafia lahi mokā tou sio ʼe tali lelei e tatatou kau ako te ʼu tokoni ʼa te Tohi-Tapu. Kae ke feala ke fua lelei tatatou tokoni ki niʼihi, ʼe tonu kiā tatou totonu ke tou tuku he faʼifaʼitaki lelei. (Suta 22, 23) ʼE tonu kiā tatou fuli ke tou “haga gāue ki [totatou] hāofaki ʼaki te manavahe.” (Filipe 2:12, MN ) Ko tona faka ʼuhiga, ke tou tuku tuʼumaʼu ke faka mālamagia totatou loto e te Tohi-Tapu, ke feala ai hatatou ʼiloʼi ia te ʼu aga, mo te ʼu holi, pea mo te ʼu meʼa ʼe tou leleiʼia ʼaē ʼe tonu ke fetogi.​—2 Petelo 1:19.

Ohage la, kua fakavaivai koa takotou kau ki te ʼu gāue faka Kilisitiano? Kapau koia, pea koteā tona tupuʼaga? ʼE lagi tupu ko takotou falala fau kiā koutou totonu. E feafeaʼi hakotou ʼiloʼi ia te faʼahi ʼaia? Koutou lau ia Asea 1:2-11, pea koutou fakakaukauʼi fakamalotoloto te ʼu faʼahiga palalau ʼa Sehova ki te kau Sutea ʼaē neʼe liliu mai tonatou ʼaunofo. Pea koutou fai kiā koutou te fehuʼi ʼaenī: ‘ ʼE au tokaga fau koa ki te falā pea mo te ʼu koloā ʼaē ʼe au maʼu? ʼE au falala moʼoni koa ʼe tokaga Sehova ki taku famili mo kapau ʼe au fakamuʼamuʼa te ʼu meʼa fakalaumālie? Peʼe au manatu koa ʼe tonu ke au ʼuluaki tokaga muʼa kiā au?’ Kapau ʼe tonu ke koutou fetogi takotou ʼu fakakaukau pea mo te ʼu meʼa ʼi tokotou loto, pea ʼaua naʼa koutou atalitali. Ko te ʼu tokoni faka Tohi-Tapu, ohage ko ʼaē ʼe tuʼu ia Mateo 6:25-33, mo Luka 12:13-21 pea mo 1 Timoteo 6:6-12, ʼe fakahā ai he manatu fakapotopoto ʼo ʼuhiga mo te ʼu koloā pea mo te ʼu meʼa fakasino ʼaē ʼe ʼaoga kiā tatou, pea ʼe feala ai ke tou maʼu tuʼumaʼu te tapuakina ʼa Sehova.​—Malakia 3:10.

ʼE feala ke tou fakakaukauʼi totatou ʼaluʼaga mo kapau ʼe tou fai he sivisivi fakahagatonu feiā ʼo tatou. ʼE feala ke faigataʼa kiā tatou hatatou tali te fakahā mai ʼo hotatou ʼu vaivaiʼaga. Kae kapau ʼe koutou ʼofa ʼo tokoni ki takotou fānau, peʼe ko he tahi ʼe koutou fai tana ako Tohi-Tapu, peʼe ko koutou totonu, peʼe faigafua peʼe faigataʼa ia te faʼahi ʼaia, kae ʼe feala ai ke koutou hāofaki tona maʼuli peʼe ko tokotou maʼuli.​—Kalate 6:1.

Kae e feafeaʼi mo kapau ʼe hage ʼe mole he fua ʼo te ʼu meʼa ʼaia neʼe koutou fai? ʼAua naʼa koutou lotovaivai vave. ʼE lagi mole faigafua anai ke fetogi te loto agahala ʼa he tahi, pea mo ʼaoga anai ki ai he temi loaloaga, pea ʼi ʼihi temi ʼe feala ke fakatupu ʼita. Kae ʼe toe feala ke koutou maʼu mo he fakapale lahi.

Ki muli age, ko te tūpulaga ko Eric, ʼaē neʼe tou talanoa ki ai ʼi te kamata, neʼe ina fakakaukauʼi tona maʼuli pea neʼe toe kamata “haele i te ala o te mooni.” (2 Soane 4) ʼE ina ʼui fēnei: “Neʼe hoki au toe liliu mai kiā Sehova, ʼi taku mahino ʼaē neʼe au līaki ia te faʼahi maʼuhiga.” ʼAki te tokoni ʼa tana ʼu mātuʼa, kua toe tauhi agatonu ia Eric ki te ʼAtua ʼi te temi nei. Logola ki muʼa atu neʼe ʼita ʼi te ʼu faiga tuʼumaʼu ʼo tana ʼu mātuʼa ke nā ʼiloʼi te meʼa ʼaē ʼi tona loto, kae ʼi te temi nei ʼe loto fakafetaʼi ki te ʼu meʼa ʼaē neʼe nā fai.” ʼE ina ʼui fēnei: “ ʼE agalelei ʼaupito taku ʼu mātuʼa. Neʼe nā ʼofa tuʼumaʼu kiā au.”

Ko tatatou faiga ʼaē ke faka mālamagia e te Folafola ʼa te ʼAtua te ʼu loto ʼo nātou ʼaē ʼe tou akoʼi, ʼe ko he fakahā ʼaia ʼo tatatou loto manavaʼofa. (Pesalemo 141:5) Koutou haga vakavakaʼi fakalelei te loto ʼo takotou fānau, pea mo ʼaē ʼo takotou kau ako Tohi-Tapu, ke koutou ʼiloʼi papau peʼe kua nātou kamata maʼuliʼi te ʼulugaaga foʼou faka Kilisitiano. Koutou haga fai ke gāue ia te moʼoni ʼi niʼihi pea mo koutou totonu, ʼo koutou “ave fakahagatonu te folafola o te mooni.”​—2 Timoteo 2:15.

[Paki ʼo te pasina 29]

Neʼe fakahā e te ʼu palalau ʼa Sesu ia te vaivaiʼaga ʼa Petelo

[Paki ʼo te pasina 31]

Tou fakaʼaogaʼi te Tohi-Tapu ke tou ʼiloʼi te meʼa ʼaē ʼi te loto ʼo he tahi