Tou Fiafia ʼi Totatou ʼUhiga Kilisitiano
“Ko ia ʼaē ʼe fia faka kolōlia kiā ia, ke faka kolōlia kiā Sehova.”—1 Kolonito 1:31, MN.
1. Koteā te manatu ʼaē kua mafola ʼo ʼuhiga mo te lotu?
MOLE heʼeki faʼa fualoa, neʼe talanoa te tagata ʼe tokaga ki te ʼu meʼa faka lotu ki te manatu ʼaē ʼe maʼu e te hahaʼi tokolahi ʼo ʼuhiga mo tanatou tui. Neʼe ina fakamahino fēnei: “Ko te manatu tāfito ʼa te hahaʼi ʼi te ʼu lotu ʼo totatou temi, ʼe ko tanatou mole toe kau ki he lotu.” Neʼe ina ʼui ʼe “mole kei tokaga he tahi ki tana lotu.” Neʼe ina ʼui fēnei: “Tokolahi te hahaʼi ʼe nātou tui ki te ʼAtua . . . ; kae ʼe mole nātou tokagaʼi ia ia.”
2. (a) He koʼe ʼe mole tou punamaʼuli ki te mole kei tui mālohi ʼa te hahaʼi? (b) Koteā te fua kovi ʼe feala ke hoko ki te kau Kilisitiano mo kapau ʼe mole kei maʼuhiga kiā nātou tanatou tauhi?
2 ʼE mole punamaʼuli te kau ako ʼo te Tohi-Tapu ki te mole kei tui mālohi ʼa te hahaʼi. (Luka 18:8) Pea ʼo ʼuhiga mo te ʼu lotu fuli, ʼe mole fakapunamaʼuli te mole kei tōkakaga kiai ʼa te hahaʼi. Neʼe kua fualoa te kākāʼi pea mo te fakaloto mamahi e te lotu hala ia te malamanei. (Apokalipesi 17:15, 16) Kae ki te kau Kilisitiano moʼoni, ʼe feala ke fua kovi kiā nātou mo kapau ʼe mole nātou tauhi ʼaki he loto kātoa ki te ʼAtua pea mokā ʼe mole kei nātou faʼafai ʼi tanatou tauhi. ʼE mole feala ke tou meʼa noaʼi tatatou tui, pea mo tou fakavaivai tatatou faʼafai ʼi te tauhi ki te ʼAtua pea mo te moʼoni ʼo te Tohi-Tapu. Neʼe fakatokaga fēnei e Sesu ki te ʼu ʼuluaki Kilisitiano ʼo Laotisea: “ ʼE mole ke momoko peʼe ke vela. Neʼe au loto ke ke momoko peʼe ke vela. . . . [Kae ʼe ke] māfana.”—Apokalipesi 3:15-18, MN.
Tou ʼIloʼi Totatou ʼUhiga Kilisitiano
3. Koteā te ʼu faʼahi ʼe feala ke fiafia ai te kau Kilisitiano?
3 Ke ʼaua naʼa vaivai tanatou tauhi, ʼe tonu ki te kau Kilisitiano ke nātou ʼiloʼi lelei tonatou ʼuhiga Kilisitiano, pea mo nātou fiafia ʼuhi ko tanatou kehekehe mo te malamanei. ʼUhi ko tatou ko te ʼu kaugana ʼa Sehova pea mo te ʼu tisipulo ʼa Kilisito, ʼe feala ke tou ʼiloʼi ʼaki te Tohi-Tapu peʼe ko ai ia tatou. Ko tatou ko te kau “fakamoʼoni” ʼa Sehova, mo he ʼu “kauga gaue a te Atua,” ʼi tatatou lagolago lelei ki te fakahā ʼo te “Logolelei” ki te hahaʼi. (Isaia 43:10; 1 Kolonito 3:9; Mateo 24:14) ʼE tou “feʼofaʼaki.” (Soane 13:34) Ko te kau Kilisitiano moʼoni ʼe ko he ʼu hahaʼi “ ʼe nātou maʼu te ʼu fealagia ʼaē ʼe gāueʼi moʼo ʼiloʼi te meʼa ʼaē ʼe lelei pea mo te meʼa ʼaē ʼe kovi, ʼuhi heʼe nātou fakaʼaogaʼi.” (Hepeleo 5:14, MN ) Ko tatou ko “he u malama i te malama-nei.” (Filipe 2:15) ʼE tou faiga ke tou “mau he aga taulekaleka i te lotolotoga o te hahai pagani.”—1 Petelo 2:12; 2 Petelo 3:11, 14.
4. Koteā te tahi ʼu faʼahi ʼe ʼiloʼi e te kau ʼatolasio ʼa Sehova?
4 ʼE toe ʼiloʼi e te kau ʼatolasio moʼoni ʼa Sehova ko nātou “ ʼe mole nātou kau ʼi te malamanei,” ohage pe ko tanatou Tagata Takitaki, ia Sesu Kilisito, neʼe mole kau ʼi te malamanei. (Soane 17:16, MN ) ʼE nātou fakamamaʼo ʼi “te ʼu puleʼaga,” ʼaē ʼe nātou “fakapōʼuli ʼi te fakakaukau, pea mo mamaʼo mai te maʼuli ʼaē ʼe haʼu mai te ʼAtua.” (Efeso 4:17, 18, MN ) Koia, ko te ʼu tisipulo ʼa Sesu ʼe nātou “līaki te heʼe aga faka lotu pea mo te ʼu holi ʼo te mālama, pea mo [nātou] maʼuli fakapotopoto pea mo agatonu, pea mo [nātou] pipiki ki te ʼAtua ʼi te lotolotoiga ʼo te tuʼu ʼo te ʼu faʼahiga meʼa ʼaenī.”—Tito 2:12, MN.
5. Koteā te faka ʼuhiga ʼo te fakatokaga ʼaē ke tou “fia kolōlia kiā Sehova”?
5 Ko tatatou mahino lelei kiā tatou pea mo tatatou ʼu felogoi mo te Tuʼi Pule ʼo te ʼatulaulau ʼe ina uga ai tatou ke tou “fia faka kolōlia kiā Sehova.” (1 Kolonito 1:31, MN ) Koteā koa te faʼahiga fia faka kolōlia ʼaia? ʼI totatou ʼuhiga kau Kilisitiano moʼoni, ʼe tou fiafia ʼi tatatou tauhi kiā Sehova, totatou ʼAtua. ʼE tou mulimuli ki te fakatokaga ʼaenī: “Ko ʼaē ʼe laupisi ke laupisi ʼo ʼuhiga mo te meʼa ʼaenī: ʼe fakasiosio tonu pea ʼe ina ʼiloʼi au, ʼe ina ʼiloʼi ko au ia Sehova, ia Ia ʼaē ʼe lotoʼofa, pea mo ina fai te lao mo te faitotonu ki te kele.” (Selemia 9:24) ʼE tou “fia faka kolōlia” ʼuhi ko te pilivilesio ʼaē ʼo tatatou ʼiloʼi te ʼAtua pea mo tana fakaʼaogaʼi tatou ke tou tokoni ki te hahaʼi.
Te Faʼahi ʼAē ʼe Faigataʼa Ai
6. He koʼe ʼe feala ke faigataʼa ki ʼihi hanatou manatuʼi tonatou ʼuhiga Kilisitiano?
6 ʼE moʼoni, ʼe mole faigafua tuʼumaʼu hatatou mahino lelei ko totatou ʼuhiga Kilisitiano ʼe ina fakakeheʼi tatou mo te hahaʼi. Ko te tūpulaga neʼe lahilahi ake ʼi te famili Kilisitiano, neʼe ina manatuʼi neʼe ʼi ai te temi neʼe vaivai ai ʼi te faʼahi fakalaumālie. ʼE ina ʼui fēnei: “ ʼI ʼihi temi, neʼe hage neʼe mole au ʼiloʼi te tupuʼaga ʼo taku liliu ko he Fakamoʼoni ʼa Sehova. Neʼe akoʼi mai kiā au te moʼoni ʼo te Tohi-Tapu talu mai taku kei veliveli. ʼI ʼihi temi neʼe au manatu ʼe ko he lotu pe ohage ko teʼu lotu fuli.” Ko ʼihi neʼe lagi galo kiā nātou tonatou ʼuhiga Kilisitiano, ʼuhi ko te ʼu fakafiafia ʼo te mālama, mo te ʼu logo ʼi te televisio, mo te lātio, mo te sulunale, pea mo te ʼu manatu ʼaē ʼe mafola ʼi te temi nei ʼo ʼuhiga mo te maʼuli pea ʼe mole ʼalutahi mo te manatu ʼa te ʼAtua. (Efeso 2:2, 3) Ko ʼihi Kilisitiano ʼe nātou lotolotolua ʼi ʼihi temi pea mo nātou toe vakavakaʼi te ʼu meʼa ʼaē ʼe maʼuhiga kiā nātou pea mo tanatou ʼu fakatuʼutuʼu.
7. (a) Koteā te faʼahiga sivisivi ʼe tonu ke fai e te ʼu kaugana ʼa te ʼAtua? (b) Koteā te tuʼutāmaki ʼaē ʼe feala ke hoko?
7 ʼE kovi koa hatatou fai ʼi ʼihi temi he sivisivi ʼo tatou? Kailoa ia. ʼE lagi koutou manatuʼi neʼe fakaloto mālohiʼi e Paulo te kau Kilisitiano ke nātou sivisivi ia nātou totonu, ʼo ina ʼui fēnei: “Koutou haga ʼahiʼahiʼi ia koutou ke koutou ʼiloʼi peʼe koutou nonofo ʼi te tui, koutou sivi tuʼumaʼu pe koteā tokotou ʼuhiga totonu.” (2 Kolonito 13:5, MN ) Neʼe fakaloto mālohiʼi ʼi henī e te ʼapositolo te kau Kilisitiano ke nātou faiga fakamalotoloto ke nātou mahino ki tonatou ʼu vaivaiʼaga fakalaumālie, ʼaki te fakatuʼutuʼu ʼaē ke nātou fetogi te ʼu faʼahi ʼaia. Ko he Kilisitiano, mokā ina vakavakaʼi peʼe kei nofo ʼi te tui, ʼe tonu ke ina ʼiloʼi peʼe ʼalutahi tana ʼu palalau pea mo tana ʼu gāue mo tana tui. Kae ʼe feala ke vāʼiganoa pea mo fua kovi kiā tatou ʼi te faʼahi fakalaumālie, mo kapau ʼe tou fai he sivisivi ʼo mulimuli ki te malamanei, peʼe tou fai ʼi tuʼa atu ʼo tatatou ʼu felogoi mo Sehova peʼe ko te kokelekasio faka Kilisitiano.a ʼE mole he temi ʼe tou fia ‘tūkia anai ʼo ʼuhiga mo tatatou tui.’—1 Timoteo 1:19.
ʼE Mole Hāo Te Kau Kilisitiano Mai Te ʼu Faigataʼaʼia
8, 9. (a) Neʼe fakahā feafeaʼi e Moisese tana lotolotolua? (b) Koteā te tali ʼa Sehova ki te ʼu manatu ʼaia ʼa Moisese? (c) ʼE malave feafeaʼi kiā koutou te ʼu fakapapau ʼaē neʼe fai e Sehova?
8 ʼE tonu koa ke manatu e te kau Kilisitiano ʼaē ʼe lotolotolua ʼi ʼihi temi, kua nātou agahala? Kailoa ia. ʼE feala ke nātou maʼu he fīmālie ʼi tanatou ʼiloʼi ʼaē neʼe kua hoko te ʼu meʼa feiā. Neʼe hoko te faʼahi ʼaia ki te kau fakamoʼoni agatonu ʼa te ʼAtua ʼi te temi muʼa. Ohage la ko Moisese, ʼaē neʼe ina fakahā tana tui lahi, mo tana agatonu pea mo tana tauhi fakamalotoloto. ʼI te temi ʼaē neʼe tuku age kiā ia te gāue maʼuhiga, neʼe lotolotolua Moisese, ʼo ina tali fēnei: “Ko ai koa ia au?” (Ekesote 3:11) ʼE hā mai neʼe manatu e Moisese ko ia ʼe mole maʼuhiga, neʼe mole feala ke ina fakahoko te gāue ʼaia. Neʼe lagi manatu e Moisese ʼe mole tāu mo te gāue ʼaia ʼuhi ko te ʼu ʼaluʼaga kehekehe ʼo tona maʼuli: Neʼe tupu ʼi he puleʼaga neʼe maʼuli popūla. Neʼe līaki ia ia e te kau Iselaele. Neʼe mole poto ʼi te palalau. (Ekesote 1:13, 14; 2:11-14; 4:10) Neʼe ko he tagata tauhi manu, pea neʼe ko he gāue neʼe fehiʼa kiai te kau Esipito. (Senesi 46:34) ʼE mole fakapunamaʼuli ai tana manatu ʼaē ʼe mole tāu mo ia ke liliu ko te tagata ʼaē ka ina faka ʼāteainaʼi te hahaʼi ʼa te ʼAtua ʼaē neʼe faka popūlaʼi.
9 Neʼe faka fīmālieʼi e Sehova ia Moisese ʼo ina fai age kiā ia te ʼu fakapapau mālohi e lua: “ ʼE au nofo anai mo koe, pea koʼeni te fakaʼiloga kiā koe ko au ʼaē neʼe au fekauʼi koe: ka ʼosi anai tau fakamavae ʼo te hahaʼi mai Esipito, ʼe koutou tauhi anai ki te ʼAtua moʼoni ʼi te moʼuga ʼaenī.” (Ekesote 3:12) Neʼe ʼui age e te ʼAtua ki tona kaugana ʼaē neʼe lotolotolua, ʼe nofo tuʼumaʼu pe anai mo ia. Pea neʼe toe fakahā e Sehova ʼe ina faka ʼāteaina moʼoni anai tana hahaʼi. ʼI te ʼu temi fuli pe, neʼe fakapapau e Sehova ʼe tokoni anai ki tana ʼu kaugana. Ohage la, ʼaki ia Moisese, neʼe ina ʼui fēnei ki te puleʼaga ʼo Iselaele ʼi tanatou ʼamanaki hū ki te Kele ʼo te Fakapapau: “Koutou lototoʼa pea mo mālolohi. . . . Ko Sehova tou ʼAtua ʼaē ʼe haʼele ʼi ʼou muʼa. ʼE mole mavae anai ia te koe pea ʼe mole ina līaki kātoa anai koe.” (Teutalonome 31:6) Neʼe toe ʼui papau fēnei e Sehova kiā Sosue: “ ʼE mole lava tuʼu anai he tahi ʼi ʼou muʼa ʼi tou temi maʼuli. . . . ʼE au nofo anai mo koe. ʼE mole au mavae anai ia te koe pea ʼe mole au līaki kātoa anai koe.” (Sosue 1:5) Pea ʼe ina fakapapau fēnei ki te kau Kilisitiano: “E mole au tukunoa anai koe, pea e mole au liaki anai koe.” (Hepeleo 13:5) ʼAki te toe tokoni mālohi ʼaia ʼe tonu ai ke tou fiafia ʼi totatou ʼuhiga kau Kilisitiano.
10, 11. Koteā te tokoni neʼe maʼu e te Levite ko Asafe, ke ina taupau te manatu ʼaē ʼe lelei ʼo ʼuhiga mo te maʼuhiga ʼo tana tauhi ʼaē kiā Sehova?
10 Hili taʼu e 500 ʼi te temi ʼaē neʼe maʼuli ai Moisese, ko te Levite agatonu ʼe higoa ko Asafe, neʼe ina tohi fakahagatonu tana lotolotolua ʼo ʼuhiga mo te maʼuhiga ʼaē ke nofo agatonu. ʼI tana faiga ʼaē ke tauhi ki te ʼAtua logola te ʼu ʼahiʼahi pea mo te ʼu fakahala, neʼe sio e Asafe ko ʼihi ʼaē neʼe nātou manukiʼi te ʼAtua, neʼe nātou mālolohi age pea mo lahi age tonatou ʼu koloā. Neʼe malave feafeaʼi kiā Asafe? Neʼe ina tala fēnei: “Kiā au, neʼe teitei pe ke hēʼia toku ʼu vaʼe, neʼe meihiʼi pe ke au heke. He neʼe au fakaʼamu ki te ʼu tagata ʼaē ʼe nātou fia faka kolōliaʼi pe kiā nātou, ʼi taku sio ki te tokalelei ʼo te kau agakovi.” Neʼe kamata lotolotolua ʼo ʼuhiga mo te maʼuhiga ʼaē ʼo tana ʼatolasio kiā Sehova. Neʼe manatu fēnei ia Asafe: “ ʼIo, neʼe vaʼiganoa taku fakamaʼa toku loto pea mo taku fanofanoʼi ʼoku nima ʼi te heʼe agahala. Neʼe tauteaʼi au ʼi te ʼaho kātoa.”—Pesalemo 73:2, 3, 13, 14.
11 Neʼe koteā ʼaē neʼe fai e Asafe ʼi tana manatu feiā? Neʼe fakafisi koa neʼe mole ina maʼu he ʼu manatu feiā? Kailoa ia. Neʼe ina fakahā te faʼahi ʼaia ʼi tana faikole ki te ʼAtua, ohage ko tona tuʼu ʼi te Pesalemo 73. Neʼe tupu leva te fetogi ʼo Asafe ʼi tana ʼalu ki te sagatualio ʼi te fale lotu. ʼI tana ʼi ai, neʼe mahino ai kiā ia ʼe mole he tahi age meʼa ʼe lelei ʼage ʼi tana tauhi ʼaē ki te ʼAtua. ʼI tana toe mahino ki te maʼuhiga ʼaē ʼo tana tauhi ki te ʼAtua, neʼe mahino kiā ia ko Sehova ʼe fehiʼa ki te ʼu aga ʼaē ʼe kovi pea ʼi tona temi totonu, ʼe ina tauteaʼi anai te kau agakovi. (Pesalemo 73:17-19) ʼI tana fetogi ʼaia tana fakakaukau, neʼe fakaloloto e Asafe tana mahino ʼaē ki tona pilivilesio ʼaē ke kaugana kiā Sehova. Neʼe ina ʼui fēnei ki te ʼAtua: “ ʼE au nofo tuʼumaʼu mo koe, neʼe ke puke toku nima mataʼu. ʼE ke taki anai au ʼaki tau tokoni, ʼosi ʼaia pea ʼe ke taki anai au ki te kolōlia.” (Pesalemo 73:23, 24) Neʼe toe maʼu e Asafe tana fiafia ʼi tana tauhi ki te ʼAtua.—Pesalemo 34:2.
ʼE Nātou ʼIloʼi Lelei Tonatou ʼUhiga Kilisitiano
12, 13. Tuku mai he ʼu faʼifaʼitaki ʼi te Tohi-Tapu ʼo he ʼu hahaʼi neʼe nātou fiafia ʼi tanatou felogoi mo te ʼAtua.
12 ʼE feala ke tou fakamālohiʼi totatou ʼuhiga Kilisitiano, mo kapau ʼe tou vakavakaʼi pea mo faʼifaʼitakiʼi te tui ʼo te kau ʼatolasio agatonu, ʼaē logope la te ʼu faigataʼaʼia, kae neʼe nātou fiafia ʼi tanatou ʼu felogoi mo te ʼAtua. Ohage la ko Sosefo, te foha ʼo Sakopo. ʼI tona temi tūpulaga, neʼe fai te aga fakakākā kiā ia pea neʼe fakatau ke liliu ia ia ko he sinifu pea neʼe ʼave ki Esipito, ʼaē ʼe vaha mamaʼo ʼi ni ʼu kilometa mo tana tāmai ʼaē neʼe manavasiʼi ki te ʼAtua pea mo tona loto fale, ʼaē neʼe ina maʼu ai te ʼofa pea mo te tokoni. ʼI tana nofo ʼi Esipito, neʼe mole he tahi neʼe feala ke ina foaki kiā Sosefo he ʼu tokoni fakaʼatua, pea neʼe ina ʼutakiʼi te ʼu ʼaluʼaga faigataʼa ʼaē neʼe ʼahiʼahiʼi ai tana aga maʼa pea mo tana falala ki te ʼAtua. Kae ʼe hā lelei mai neʼe ina faiga mālohi ke ina manatuʼi tuʼumaʼu ko ia ko te kaugana ʼa te ʼAtua, pea neʼe nofo agatonu ʼo mulimuli ki te meʼa ʼaē neʼe ina ʼiloʼi ʼe faitotonu. Neʼe fiafia ʼi tana ʼatolasio kiā Sehova, logola te agakovi ʼa te hahaʼi, pea neʼe mole ufiufi ʼi tana fakahā tana ʼu manatu.—Senesi 39:7-10.
13 Hili taʼu e 800 kiai, ko te kiʼi taʼahine Iselaele ʼaē neʼe puke pea mo liliu ko te sinifu ʼo te senelale Silia ko Naamane, neʼe mole galo kiā ia neʼe ʼatolasio kiā Sehova. Neʼe ina maʼu te faigamālie, koia ʼaki he lototoʼa neʼe fai fagonogono ʼo ʼuhiga mo Sehova ʼo ina ʼui ko Elia neʼe ko te polofeta ʼo te ʼAtua moʼoni. (2 Hau 5:1-19) Hili ni ʼu taʼu, ko te Hau tūpulaga ko Sosiasi, logola te kua agakovi ʼo te fenua, kae neʼe ina fakatuʼu te ʼu lao ʼo ʼuhiga mo te ʼu fetogi faka lotu, neʼe ina toe gaohi te fale lotu ʼa te ʼAtua, pea mo ina fakaloto mālohi te hahaʼi ke nātou toe tauhi kiā Sehova. Neʼe fiafia ʼi tana tui pea mo tana tauhi. (2 Fakamatala, kapite 34 mo te 35) Ko Taniela pea mo tona ʼu kaumeʼa Hepeleo e toko tolu ʼi Papiloni, neʼe mole galo kiā nātou tonatou ʼuhiga kaugana ʼo Sehova, pea neʼe nātou nonofo agatonu ʼi te faigataʼaʼia pea mo te fakahala. Neʼe nātou fiafia moʼoni ʼi tanatou kaugana kiā Sehova.—Taniela 1:8-20.
Tou Fiafia ʼi Totatou ʼUhiga Kilisitiano
14, 15. Koteā ʼaē ʼe tupu ai tatatou fia faka kolōlia ʼi totatou ʼuhiga Kilisitiano?
14 Neʼe lava tauʼi e te ʼu kaugana ʼo te ʼAtua te ʼu faigataʼaʼia ʼaia koteʼuhi neʼe nātou fiafia ʼi tanatou ʼu felogoi mo te ʼAtua. E feafeaʼi ia tatou ia ʼaho nei? Koteā ʼaē ʼe tou fia faka kolōlia ai ʼi totatou ʼuhiga Kilisitiano?
15 ʼUluaki, ʼe tou loto fakafetaʼi ʼi tatatou kau ki te hahaʼi ʼaē ʼe nātou toʼo te huafa ʼo Sehova, ʼaē ʼe nātou maʼu tana tapuakina pea mo tona ʼofa. ʼE ʼiloʼi lelei e te ʼAtua tana hahaʼi. Ko te ʼapositolo ko Paulo, ʼaē neʼe maʼuli ʼi te temi ʼaē neʼe lahi ai te ʼu lotu, neʼe ina tohi fēnei: “E iloi e te Aliki natou ae a ana.” (2 Timoteo 2:19; Faka au 16:5) ʼE fiafia ia Sehova ʼi te hahaʼi “ae a ana.” ʼE ina ʼui fēnei: “Ko ʼaē ʼe ala kiā koutou ʼe ala ia ki toku kanoʼi mata.” (Sakalia 2:8) ʼE hā lelei mai ʼe ʼofa Sehova kiā tatou. Pea ko tatatou ʼu felogoi lelei mo ia ʼe tonu ke fakatafito ki he ʼofa moʼoni kiā te ia. Neʼe ʼui fēnei e Paulo: “Kapau ko he tahi e ofa ki te Atua, e iloi e te Atua iaʼia.”—1 Kolonito 8:3.
16, 17. He koʼe ʼe feala ki te kau Kilisitiano, tūpulaga pea mo mātutuʼa, ke nātou fiafia ʼi tonatou tofiʼa fakalaumālie?
16 Ko te kau tūpulaga ʼaē neʼe lahilahi ake ʼi he famili Fakamoʼoni ʼa Sehova, ʼe lelei hanatou vakavakaʼi peʼe kei maʼuhiga ʼaupito kiā nātou tonatou ʼuhiga Kilisitiano, peʼe nātou felogoi takitokotahi mo te ʼAtua. ʼE mole feala ke nātou mulimuli pe ki te tui ʼo tanatou ʼu mātuʼa. ʼO ʼuhiga mo te ʼu kaugana takitokotahi ʼa te ʼAtua, neʼe tohi fēnei e Paulo: “ ʼE tuʼu peʼe tō maʼa tona ʼAliki.” Pea ʼe tou hoko atu fēnei Paulo: “ ʼE tou tahi huʼi maʼua anai ki te ʼAtua maʼa tatou takitokotahi.” (Loma 14:4, 12, MN ) Koia, ko te tali ʼo te moʼoni ʼuhi pe ko te ʼu mātuʼa kae mole ʼalu kātoa ai tokita loto, ʼe mole feala ke fakatupu ai he ʼu felogoi lelei pea mo tologa mo Sehova.
17 ʼI te hisitolia, neʼe tokolahi ʼaupito te kau fakamoʼoni ʼa Sehova. ʼE kamata mai te tagata agatonu ko Apele—kua hili kiai sēkulō e 60—ʼo aʼu ki te “toe hahaʼi tokolahi” ʼo te kau Fakamoʼoni ʼo totatou temi, ʼaē ko te kau ʼatolasio kaugamālie ʼo Sehova ʼaē ʼe nātou maʼu anai te ka haʼu heʼegata. (Apokalipesi 7:9, MN; Hepeleo 11:4) ʼE ko tatou te hahaʼi fakamuli ʼo te kau ʼatolasio kaugamālie pea mo agatonu ʼaia. ʼE ko he tofiʼa fakalaumālie pea mo maʼuhiga ʼaia ʼe tou maʼu!
18. Ko te ʼu meʼa ʼaē ʼe maʼuhiga kiā tatou pea mo tatatou ʼu lekula, ʼe ina fakakeheʼi feafeaʼi tatou mai te malamanei?
18 ʼE toe kau ki totatou ʼuhiga Kilisitiano te ʼu meʼa ʼaē ʼe maʼuhiga kiā tatou, mo te ʼu kalitātē, mo te ʼu lekula pea mo te ʼu agaaga ʼaē ʼe feala ai ke ʼiloʼi ko tatou ko he kau Kilisitiano. ʼE ko “te Ala,” peʼe ko te maʼuli lelei tokotahi pe ʼaia ʼe ʼalutahi mo te finegalo ʼo te ʼAtua. (Gaue 9:2; Efeso 4:22-24) Ko te kau Kilisitiano ʼe nātou “vakaʼi peʼe moʼoni ia meʼa fuli” pea mo nātou “puke maʼu te meʼa ʼaē ʼe lelei.” (1 Tesalonika 5:21, MN ) ʼE tou mahino lelei ki te kehekehe ʼaupito ʼo te Lotu Faka Kilisitiano moʼoni pea mo te malamanei ʼaē ʼe mamaʼo ʼi te ʼAtua. ʼE fakahā lelei mai e Sehova te kehekehe ʼo te tauhi moʼoni pea mo te tauhi hala. ʼAki tana polofeta ko Malakia, neʼe ina ʼui fēnei: “ ʼE mahino papau ia, ʼe koutou toe sisio anai ki te kehekehe ʼo te tagata faitotonu pea mo te tagata agakovi, te kehekehe ʼo te tagata ʼaē ʼe kaugana ki te ʼAtua pea mo te tagata ʼaē neʼe mole kaugana kiā te ia.”—Malakia 3:18.
19. Koteā ʼaē ʼe mole meʼa noaʼi anai e te kau Kilisitiano moʼoni?
19 ʼUhi ʼaē ʼe maʼuhiga age takita fia faka kolōlia kiā Sehova ʼi hatatou fakafiafia te malamanei ʼaē ʼe maveuveu pea mo hēʼia, koteā ʼaē ʼe feala ke tokoni mai kiā tatou ke tou taupau te fiafia ʼi totatou ʼAtua pea mo tatatou mahino ki totatou ʼuhiga Kilisitiano? ʼE tou vakaʼi anai te ʼu tokoni lelei ʼaia ʼi te alatike ka hoko mai. ʼI tatatou vakaʼi te ʼu faʼahi ʼaia, ʼe feala ke tou tui papau ai, ko te kau Kilisitiano moʼoni ʼe mole nātou liliu anai ko he ʼu hahaʼi ʼe nātou meʼa noaʼi tanatou lotu.
[Kiʼi nota]
a ʼE tou talanoa pe ʼi henī ki totatou ʼuhiga fakalaumālie. Maʼa ʼihi, kapau ʼe nātou maʼu he faʼahiga mahaki ʼulu, ʼe lelei anai ke nātou ʼolo ki he ʼu tōketā.
ʼE Kei Koutou Manatuʼi Koa?
• ʼE lava “fia faka kolōlia” feafeaʼi te kau Kilisitiano kiā Sehova?
• Koteā ʼaē neʼe koutou ako mai te ʼu faʼifaʼitaki ʼo Moisese pea mo Asafe?
• ʼI te Tohi-Tapu, ko ai ʼaē neʼe fiafia ʼi tanatou tauhi ki te ʼAtua?
• Koteā ʼaē ʼe tupu ai tatatou fia faka kolōlia ʼi totatou ʼuhiga Kilisitiano?
[Paki ʼo te pasina 14]
ʼI te tahi temi, neʼe lotolotolua ia Moisese
[Paki ʼo te pasina 15]
Neʼe tokolahi te ʼu kaugana ʼo Sehova ʼo te temi muʼa neʼe nātou fiafia ʼi tonatou kehekehe mo te hahaʼi