Te ʼu Fehuʼi ʼa Te Kau Lautohi

Neʼe lītuʼa koa ia te ʼapositolo ko Paulo ki tana tui kiā Kilisito, ʼi tana ʼui ʼaē ʼi muʼa ʼo te Sanetualio: “Ko au e ko he faliseo”?

Ke tou mahino ki te ʼu palalau ʼaia ʼa Paulo, ʼaē ʼe maʼu ia Gaue 23:​6, ʼe tonu muʼa ke tou vakaʼi te ʼaluʼaga ʼaē neʼe fai ai te ʼu palalau ʼaia.

ʼI tona ʼosi ʼohofiʼi e te hahaʼi Sutea ʼi Selusalemi, neʼe palalau ia Paulo ki te hahaʼi. Neʼe ina ʼui ko ia neʼe lahi ake “i [Selusalemi], nee . . . ako ia vae o Kamaliele te totonu o te lao o [te ʼu] matua.” Logope neʼe fakalogo age te hahaʼi kiā ia lolotoga te temi, kae ʼi tanatou kua ʼiʼita kovi, neʼe ave ia ia e te solia Loma ki te nofoʼaga ʼa te kau solia. ʼI tona ʼamanaki fue, neʼe ʼui fēnei e Paulo: “Pe e gafua kia koutou ke koutou tautea pea mo fue he tagata loma?”​—Gaue 21:27–22:⁠29.

ʼI te ʼaho ake, neʼe ave ia Paulo e te pule solia ke tuʼu ia muʼa ʼo te telepinale lahi Sutea, te Sanetualio. Neʼe sioʼi lelei ia nātou e Paulo pea mo ina tokagaʼi ko te Sanetualio neʼe faʼufaʼu e te kau Satuseo mo te kau Faliseo. Neʼe ina ʼui fēnei ai: “U tehina, ko au e ko he faliseo, ko te fanau a te faahiga faliseo, pea kua fakamauʼi au o uhiga mo te falala pea mo te tuuake a te hahai mate.” Pea ʼi tana fakaha te meʼa ʼaia, neʼe malaga he fihi ʼa te kau Faliseo mo te kau Satuseo, pea neʼe vaelua ai, “koteuhi e tala e te kau satuseo e mole he tuuake, mole he aselo pea mole he laumalie, kae ki te kau faliseo, e fakamooni natou kia mea aia.” Ko nātou ʼaē neʼe kau ki te faʼahi ʼo te kau Faliseo neʼe nātou lea fakaʼita ʼo nātou ʼui fēnei: “E mole matou mau he mea e kovi i te tagata nei.”​—Gaue 23:​6-10.

Mai te ʼaluʼaga ʼaē neʼe kua ʼiloa ia Paulo ʼe ko te Kilisitiano faʼafai, neʼe mole ina lava ʼui ki te Sanetualio ko ia ʼe maʼuli ohage ko he Faliseo. Neʼe mole feala ki te kau Faliseo ʼaē neʼe kau ai ke nātou fakamoʼoni ki he tahi ʼe ina lau ʼe Faliseo kae mole tui ki tanatou ʼu akonaki. Koia ko te ʼui e Paulo ko ia ko he Faliseo neʼe ʼi ai tona tahi faka ʼuhiga, pea neʼe lagi mahino feiā ia te kau Faliseo ʼaē neʼe kau ai.

ʼI tana ʼui ʼaē ko ia neʼe fakamāuʼi ʼo ʼuhiga mo te ʼamanaki ʼo te fakatuʼuake ʼo te kau mate, neʼe fia ʼui totonu e Paulo ʼi te faʼahi ʼaia neʼe hage ko te kau Faliseo. ʼI he faʼahiga fihi pe neʼe fai ʼo ʼuhiga mo te fakatuʼuake, neʼe kau ia Paulo ki te kau Faliseo, kae neʼe mole kau ia ki te kau Satuseo, ʼaē neʼe mole nātou tui ki te fakatuʼuake.

Ko te meʼa ʼaē neʼe tui kiai ia Paulo ʼi tona ʼuhiga Kilisitiano, neʼe mole fakafeagai ki te ʼu akonaki ʼa te kau Faliseo, ohage la ko te akonaki ʼo ʼuhiga mo te fakatuʼuake, mo te kau ʼāselo, pea mo ʼihi faʼahi ʼo te Lao. (Filipe 3:5) ʼI te ʼu faʼahi pe ʼaia, neʼe feala ke ʼui e Paulo ko ia ko te Faliseo, pea neʼe mahino feiā kiai ia nātou ʼaē neʼe kau ʼi te Sanetualio. Neʼe ina fakaʼaogaʼi tona ʼuhiga Sutea ke felogoi ai mo te telepinale Sutea.

Kae ʼe ʼiloga lelei neʼe mole lītuʼa ia Paulo ki tana tui, ʼi te hoko atu ʼo tona tali leleiʼi e Sehova. ʼI te po pe ʼo te ʼaho ʼaē neʼe fai ai e Paulo te ʼu palalau ʼaia, neʼe ʼui fēnei age e Sesu: “Lotomalohi! koteuhi nee ke fakamooni o uhiga mo au i Selusalemi pea e maua ke ke toe fakamooni i Loma.” Mai te ʼaluʼaga ʼaē neʼe maʼu e Paulo ia te tapuakina ʼa te ʼAtua, koia ʼe tou mahino ai ko Paulo neʼe mole lītuʼa ki tana tui kiā Kilisito.​—Gaue 23:11.