Te Fihifihia ʼo ʼUhiga Mo Te Gāue

“Ko te gāue! ʼI meʼa lelei hatatou ʼiloʼi ʼe kei ʼi ai pe tatatou gāue.”​—Te fafine faitohi ko Katherine Mansfield (1888-1923).

ʼE KOUTOU manatu tahi koa mo te ʼu palalau ʼaia? Koteā takotou manatu ʼo ʼuhiga mo te gāue? ʼE lagi loaloaga fau maʼa koutou te gāue ʼaē ʼe koutou fai ʼi te vāhaʼa ʼi muʼa ʼo te hoko mai ʼo te fakaʼosi vāhaʼa ʼaē ka koutou mālōlō ai. Peʼe lagi kua liliu te gāue ʼe ko he meʼa fakafiafia kiā koutou?

Ki te tokolahi, ʼe nātou teitei fakaʼaogaʼi kātoa tonatou temi ki te gāue. ʼAki tatatou gāue, ʼe feala ai hatatou ʼiloʼi peʼe tou māʼuʼuli anai ʼifea pea ʼe feafeaʼi anai totatou maʼuli. Mai te temi mālohi ʼo te hahaʼi ki tonatou temi mātutuʼa, tokolahi ʼe nātou ʼui ko te gāue neʼe maʼuhiga ʼaupito ʼi tonatou maʼuli. ʼE feala ke fua lelei tatatou gāue ki niʼihi. Ko ʼihi ʼe nātou fakafuafua te maʼuhiga ʼo he gāue mokā ʼe lelei te totogi ʼo te gāue ʼaia peʼe nātou maʼu tuʼulaga ai, kae ki ʼihi ko te gāue ʼe hage pe ko he meʼa moʼo fakaʼaogaʼi te temi peʼe ko he meʼa fakapuli temi.

ʼE ʼi ai te hahaʼi ʼaē ʼe nātou gāue moʼo taupau tonatou maʼuli, kae ko ʼihi ko te fakatuʼutuʼu tāfito ʼo tonatou maʼuli, ʼe ko te gāue; ʼe mamate ʼihi he neʼe nātou gāue kinakina peʼe ko te lahi fau ʼo tanatou gāue. Mole heʼeki faʼa fualoa, neʼe ʼui e te ʼAtu Puleʼaga Fakatahi, neʼe lahi age te ʼu mamahi pea mo te mamate ʼa te hahaʼi ʼi te gāue, mokā fakatatau ki te ʼu mamahi peʼe ko te hahaʼi ʼaē neʼe mamate ʼi “te ʼu tau peʼe ʼi te fakaʼaogaʼi fakavalevale ʼo te toloke pea mo te kava.” ʼO ʼuhiga mo te faʼahi ʼaia, neʼe ʼui fēnei ʼi te nusipepa The Guardian ʼo Lonitoni: “Ko te toko lua miliona tupu hahaʼi ʼe nātou mamate ʼi te taʼu fuli ʼi te ʼu tuʼutāmaki peʼe ko te ʼu mahaki ʼo te gāue . . . ʼUhi ko te efu, te mamanu ʼa te ʼu produits chimiques, mo te logoaʼa pea mo te radiation, ʼe tupu ai te kosea, mo te mahaki mafu pea mo te ʼu mahaki ulu.” Tahi faʼahi ʼe hoko, ko te fakagāueʼi kinakina ʼo te tamaliki.

ʼE ʼi ai mo te faʼahi ʼaē ʼe fakahigoaʼi e te tōketā ko Steven Berglas ko te “gaʼegaʼe ʼaupito” ʼuhi ko te gāue. ʼE talanoa ʼo ʼuhiga mo te hahaʼi gāue ʼaē kua nātou aʼu ki he tuʼulaga māʼoluga kae ʼe kei nātou “hoha tuʼumaʼu pe, mo loto tuʼania, mo gaʼegaʼe peʼe lotovaivai heʼe kua nātou kaugana ki tanatou gāue, pea kua faigataʼa hanatou tuku peʼe mole kei nātou fiafia ai.”

ʼE Kehekehe Te Gāue Kinakina Pea Mo Te Gāue Fakavale

ʼI te malamanei, tokolahi te hahaʼi ʼe nātou gāue lahi, koia ʼe tonu ai ke tou ʼiloʼi kehekehe te hahaʼi ʼaē ʼe gāue kinakina pea mo te hahaʼi ʼaē ʼe gāue fakavale. ʼI te mālama ʼe hoko fakafokifā ai te ʼu tuʼutāmaki kua fia nonofo pe te hahaʼi ʼaē ʼe gāue fakavale ʼi tanatou ʼu fale gāue; kae ko te hahaʼi ʼaē ʼe gāue kinakina ʼe nātou faka ʼuhiga te gāue ohage ko he faʼahi ʼe maʼuhiga pea ʼi ʼihi temi ʼe nātou faka ʼuhiga ohage ko he fakamaʼua. Ko te gāue kua liliu maʼa te hahaʼi ʼaē ʼe gāue fakavale, ʼe ko te meʼa pe ʼaia ʼe tahi ʼe maʼuhiga ʼi tonatou maʼuli; kae ki te hahaʼi ʼaē ʼe gāue kinakina ʼe feala hanatou fakagata tanatou gāue kae nātou manatu ki he tahi age meʼa, ohage la ʼe nātou tuku tanatou gāue kae nātou ʼolo ʼo haʼele mo tonatou kiʼi famili. ʼE fiafia te hahaʼi ʼaē ʼe gāue fakavale ʼi hanatou hoha ki tanatou gāue, pea ʼe nātou maʼu he faʼahiga mālohi mokā nātou gāue; kae ʼe mole manatu feiā ia te hahaʼi ʼaē ʼe gāue kinakina.

ʼI te mālama ʼaē ʼe tou māʼuʼuli ai, kua faigataʼa te ʼiloʼi kehekehe ʼo te gāue fakavale pea mo te gāue kinakina, heʼe maʼa te mālama ko te lahi fau ʼo te gāue ʼe ko he meʼa lelei. ʼAki te Internet pea mo te ʼu telefoni feʼāveʼaki, kua faigataʼa he ʼiloʼi kehekehe ʼo te fale gāue pea mo te loto fale. Ko ʼihi ʼe nātou gāue fakavale anai, ʼi he potu peʼe ʼi he temi pe ʼe feala ke nātou gāue ai.

Koteā te manatu ʼa ʼihi ʼo ʼuhiga mo te taʼi gāue fakavale ʼaia? Ko te hahaʼi ʼaē ʼe nātou sivisivi te agaaga ʼo te tagata, neʼe nātou fakatokagaʼi ko te faʼahiga hahaʼi ʼaē ʼe gāue fau pea mo lotohoha, ʼe nātou fakatuputupu te faʼahi fakalaumālie ʼi tanatou ʼu fale gāue, pea ʼe nātou fakapipiki tonatou maʼuli faka lotu pea mo tanatou gāue. Neʼe ʼui ʼi te sulunale San Francisco Examiner “kua ʼai fakatahi e te hahaʼi fuli ia te ʼu meʼa fakalaumālie pea mo te gāue.”

ʼO ʼuhiga mo te matani gāue ʼe higoa ko Silicon Valley, ko te koga meʼa ʼi Amelika ʼe faʼu ai te ʼu masini foʼou, ʼe ʼui fēnei ʼi te nusipepa: “Kua fakatokagaʼi e te ʼu pule gāue kua ʼāsili lāvaki te ʼu taulaga motokā ʼo te ʼu fale gāue heʼe kua lahi te hahaʼi gāue kua fakamavae, kae kua fonu te ʼu taulaga motokā ʼi te ʼu koga meʼa ʼaē ʼe ʼolo kiai te hahaʼi ʼi te afiafi moʼo ako ia te Tohi-Tapu.” Logola tata mole ʼiloʼi lelei te faka ʼuhiga ʼo te faʼahi ʼaia, kae kua mahino ki te hahaʼi tokolahi ia te lelei ʼo te ʼu tokoni faka Tohi-Tapu ki tanatou ʼu fakatuʼutuʼu gāue, ke feala hanatou maʼuli fakapotopoto.

Koteā te ʼu tokoni ʼaē ʼe tou maʼu ʼi te Tohi-Tapu ke tou aga fakapotopoto ʼo ʼuhiga mo tatatou gāue? Ko te ʼu pelesepeto faka Tohi-Tapu fea ʼe lava tokoni mai kiā tatou ke tou fakahoko fakapotopoto ia te ʼu gāue ʼo te temi nei? ʼE tali anai ki te ʼu fehuʼi ʼaia ia te alatike ʼaē ka hoa mai.