“ ʼE Ina ʼAve Te ʼu Logo Lelei ʼo He Meʼa ʼe Lelei Age”

“ ʼE matalelei ʼi te ʼu moʼuga ia te ʼu vaʼe ʼo ʼaē . . . ʼe ina ʼave te ʼu logo lelei ʼo he meʼa ʼe lelei age.”​—Isaia 52:⁠7.

1, 2. (a) Koteā te ʼu meʼa fakamataku ʼaē ʼe hoko ʼi te ʼaho fuli? (b) ʼE malave feafeaʼi ki te tokolahi te ʼu logo fakamataku ʼaē ʼe nātou logo tuʼumaʼu kiai?

IA ʼAHO nei, ʼi te malamanei kātoa ko te hahaʼi ʼe nātou logo ki te ʼu logo ʼe mole ko he ʼu logo lelei. ʼE nātou logo ʼi te ʼu lātio ki te ʼu talanoa ʼo ʼuhiga mo te ʼu mahaki fakamataku ʼe feala ai ke mamate te hahaʼi. ʼE nātou sisio ʼi te televisio ki te ʼu tamaliki pākupapaku ʼe nātou kole meʼa kai. ʼE nātou lau ʼi te sulunale neʼe paʼulu te ʼu foʼi pulu ʼo holo ai te ʼu falefata, pea mo mamate ai te ʼu hahaʼi neʼe mole nātou fai he meʼa ʼe kovi.

² Ei, ʼi te ʼaho fuli ʼe hoko te ʼu meʼa fakamataku feiā. Ko te malamanei ʼe lolotoga fetogi, ʼo ʼāsili kovi age. (1 Kolonito 7:31) Neʼe ʼui ʼi te sulunale ʼi te Potu Uesite ʼo Eulopa, ʼe hage ʼi ʼihi temi “ ʼe ʼamanaki vela” ia te malamanei kātoa. Koia, ʼe mole tou punamaʼuli ai ki te lotomamahi ʼa te hahaʼi tokolahi! ʼI te televisio ʼi Amelika, lolotoga te ʼu faifehuʼi ʼo ʼuhiga mo te ʼu tala logo, neʼe ʼui e te tagata ia te manatu ʼe teitei maʼu pe e te ʼu lauʼi miliona hahaʼi: ‘ ʼE au lotomamahi ʼaupito mokā ʼosi taku fakalogo ki te ʼu tala logo. ʼI te temi fuli pe, ʼe tou logo ki te ʼu logo ʼe mole ko he ʼu logo lelei, pea ʼe ko he meʼa fakaloto mamahi.’

Te ʼu Logo ʼe Tonu Ke Logo Kiai Te Hahaʼi Fuli

3. (a) Koteā te logo lelei ʼaē ʼe fakahā ʼi te Tohi-Tapu? (b) He koʼe ʼe maʼuhiga kiā koutou ia te logo lelei ʼo te Puleʼaga?

³ ʼE ʼi ai koa he logo lelei ʼi te mālama ʼaenī? Ei, ʼe ʼi ai te logo lelei! ʼE ko he meʼa fakafiafia hata ʼiloʼi ko te Tohi-Tapu ʼe ina fakahā ia te logo lelei. Ko te Puleʼaga ʼo te ʼAtua ʼe ina pulihi anai te mahaki, te pakupaku, te fai fakapō, te tau, pea mo te ʼu faʼahiga mamahi kehekehe. (Pesalemo 46:9; 72:12) ʼE mole ko te ʼu taʼi logo koa la ʼaia ʼe fia logo kiai te hahaʼi fulI? Ei, pea ʼe manatu feiā ia te kau Fakamoʼoni ʼa Sehova. Koia, ʼi te ʼu potu fuli ʼo te kele ʼe ʼiloʼi tatou ʼuhi ko tatatou faka mafola tuʼumaʼu ki te ʼu hahaʼi fuape ia te logo lelei ʼo te Puleʼaga ʼo te ʼAtua.​—Mateo 24:⁠14.

4. Koteā te ʼu puani ʼaē ka tou vakaʼi ʼi te alatike ʼaenī ʼo ʼuhiga mo tatatou minisitelio, pea ko te puani fea ʼaē ka tou vakaʼi anai ʼi te alatike ʼaē ka hoa mai?

⁴ Koteā te meʼa ʼaē ʼe tou lava fai ke hoko atu tatatou kau fakafiafia pea mo fakamalotoloto ki te faka mafola ʼo te logo lelei ʼaia​—māʼia mo te ʼu telituale ʼaē ʼe mole fia logo kiai te hahaʼi? (Luka 8:15) ʼE tou vakaʼi fakanounou anai te ʼu puani maʼuhiga e tolu ʼe ʼaoga kiā tatou ʼo ʼuhiga mo tatatou fai faka mafola. ʼE tou vakaʼi anai (1) he koʼe ʼe tou kau ki te fai faka mafola; (2) koteā te logo ʼaē ʼe tou faka mafola; pea (3) e feafeaʼi tatatou faʼahiga fai faka mafola. Kapau ʼe lelei te ʼu tupuʼaga ʼo tatatou kau ki te fai faka mafola, pea mo kapau ʼe tāsilo te logo ʼaē ʼe tou faka mafola, pea mo lelei tatatou ʼu faʼahiga fai faka mafola, ʼe feala anai ke logo ia te hahaʼi fuli ʼo te kele ki te logo lelei ʼo te Puleʼaga ʼo te ʼAtua.a

He Koʼe ʼe Tou Kau Ki Te Faka Mafola ʼo Te Logo Lelei

5. (a) Koteā te tupuʼaga tāfito ʼo tatatou kau ki te minisitelio? (b) He koʼe ʼe feala ke tou ʼui ʼe tou ʼofa ki te ʼAtua mokā ʼe tou fakalogo ki te fakatotonu faka Tohi-Tapu ʼaē ke tou kau ki te fai faka mafola?

⁵ Tou vakaʼi age muʼa te ʼuluaki puani​—te ʼu tupuʼaga ʼo tatatou kau ʼaē ki te fai faka mafola. He koʼe ʼe tou kau ki te faka mafola ʼo te logo lelei? ʼE tou mulimuli ki te faʼifaʼitaki ʼa Sesu, ʼaē neʼe ina ʼui fēnei: “E au ofa i te Tamai.” (Soane 14:31; Pesalemo 40:8) ʼE tupu tāfito tatatou fai faka mafola heʼe tou ʼofa ki te ʼAtua. (Mateo 22:​37, 38) Ko te Tohi-Tapu ʼe ina fakapipiki tahi ia te ʼofa ki te ʼAtua pea mo te minisitelio, ʼi tana ʼui fēnei: “Koʼenī te faka ʼuhiga ʼo te ʼofa ʼaē ki te ʼAtua: ke tou maʼuliʼi tana ʼu fakatotonu.” (1 Soane 5:​3, MN; Soane 14:21) ʼI te ʼu fakatotonu ʼa te ʼAtua, ʼe kau ai koa te fakatotonu ʼaē ke tou ‘ ʼolo ʼo fai ni ʼu tisipulo’? (Mateo 28:19) Ei, heʼe ko Sesu totonu ʼaē neʼe ina fai ia te ʼu palalau ʼaia, kae ko te ʼu palalau ʼaia ʼe haʼu tāfito mai iā Sehova. He koʼe ʼe tou ʼui ko te ʼu palalau ʼaia ʼe haʼu mai iā Sehova? He neʼe ʼui fēnei e Sesu: “E mole au fai he mea e au’pe, kae e au tala ia mea nee ako mai e te Tamai kia te au.” (Soane 8:28; Mateo 17:5) Koia, ʼe tou fakahā anai totatou ʼofa kiā Sehova mo kapau ʼe tou fakalogo ki te fakatotonu ʼaē ke tou fai faka mafola.

6. Ko te ʼu ʼaluʼaga fea ʼaē ʼe ʼuga ai tatou ʼe totatou ʼofa ki te ʼAtua ke tou kau ki te fai faka mafola?

⁶ Tahi ʼaē meʼa, ka tou ʼofa kiā Sehova pea ʼe tou kau anai ki te fai faka mafola heʼe tou fia fakafeagai ki te ʼu loi ʼaē neʼe lau e Satana ʼo ʼuhiga mo Sehova. (2 Kolonito 4:4) Neʼe fakafihiʼi e Satana te faitotonu ʼo te pule ʼa te ʼAtua. (Senesi 3:​1-5) ʼI totatou ʼuhiga kau Fakamoʼoni ʼa Sehova, ʼe tou fia fakahā ko Satana ʼe gutuloi pea ʼe tou fia tāpuhā te huafa ʼo te ʼAtua iā muʼa ʼo te malamanei kātoa. (Isaia 43:​10-12) ʼE tou toe kau foki ki te minisitelio heʼe tou ʼiloʼi te ʼu kalitātē ʼo Sehova pea mo tana ʼu lao. ʼE tou feʼiloʼiʼaki lelei mo ia, pea ʼe tou holi mālohi ke tou palalau ki te hahaʼi ʼo ʼuhiga mo ia. ʼE tou fia palalau tuʼumaʼu ʼo ʼuhiga mo Sehova, ʼuhi ko tona lotoʼofa pea mo tana ʼu lao faitotonu. (Pesalemo 145:​7-12) ʼE tou fia fakavikiviki tuʼumaʼu ia ia pea mo fakahā tona “ ʼu kalitātē” kiā nātou ʼaē ʼe fia logo anai kiai.​—1 Petelo 2:​9, MN; Isaia 43:⁠21.

7. ʼO hilifaki ki te ʼofa ʼaē ki te ʼAtua, koteā te tahi tupuʼaga tāfito ʼo tatatou fia kau ki te gāue fai faka mafola?

⁷ ʼE ʼi ai te tahi tupuʼaga tāfito ʼo tatatou haga kau ki te minisitelio: ʼe tou fia fakafimālieʼi ia te hahaʼi ʼaē ʼe nātou lotomamahi ʼuhi ko te ʼu tuʼuga logo fakamataku ʼaē ʼe nātou logo kiai pea mo foaki he fakaloto fīmālie kiā nātou ʼaē ʼe lotomamahi ʼuhi ko he tahi age ʼu fihifihia. Ko te tupuʼaga la ʼaia ʼo tatatou faiga mālohi ke tou muliʼi te faʼifaʼitaki ʼa Sesu. Tou lau ia te fakamatala ʼaē ʼe tuʼu ʼi te tohi ʼo Maleko kapite 6.

8. Koteā ʼaē ʼe fakahā mai ʼi te fakamatala ʼo te kapite 6 ʼo te tohi ʼo Maleko ʼo ʼuhiga mo te ʼofa ʼo Sesu ki te hahaʼi?

⁸ Neʼe liliu mai te kau ʼapositolo mai tanatou fai faka mafola, pea neʼe nātou fakamatala kiā Sesu te ʼu meʼa fuli ʼaē neʼe nātou fai pea mo akoʼi ki te hahaʼi. Neʼe fakatokagaʼi e Sesu tanatou gaʼegaʼe, koia ʼe ina ʼui age kiā nātou ke nātou ʼolo ki he “koga meʼa lāvaki pea ke ʼai [hanatou] kiʼi mālōlō.” Pea neʼe nātou hake ki te vaka ʼo nātou ʼolo ki te koga meʼa lāvaki. Kae neʼe muliʼi nātou e te hahaʼi, ʼo nātou feleleʼi ʼi te mataʼone, ʼo muʼa nātou ia Sesu mo tana kau ʼapositolo. Koteā ʼaē neʼe fai e Sesu? ʼE ʼui fēnei ʼi te fakamatala: “Neʼe sio ia ki te hahaʼi tokolahi, kae neʼe ʼofa mamahi kiā nātou, koteʼuhi neʼe nātou hage ni faga ōvi ʼe mole ʼi ai honatou tagata tauhi. Pea [neʼe lahi te ʼu meʼa] neʼe ina kamata . . . [akonakiʼi] kiā nātou.” (Maleko 6:​31-34, MN ) Logola te gaʼegaʼe ʼa Sesu kae neʼe ina faka mafola te logo lelei ki te hahaʼi he neʼe ʼofa mamahi kiā nātou. ʼIo, neʼe manavaʼofa ʼaupito ia Sesu ki te hahaʼi ʼaia, he neʼe mahino ia ki te ʼu mamahi ʼaē neʼe tau mo nātou.

9. ʼO mulimuli ki te fakamatala ʼaē iā Maleko kapite 6, koteā te ʼu tupuʼaga tāfito ʼo tatatou kau ki te fai faka mafola?

⁹ Koteā te ako ʼe tou tāʼofi mai te fakamatala ʼaia? ʼI totatou ʼuhiga Kilisitiano, ʼe tonu ke tou faka mafola te logo lelei pea mo fai ni ʼu tisipulo. Ko totatou maʼua ke tou tala te logo lelei, heʼe ko te finegalo ʼo te ʼAtua ke “hāofaki te faʼahiga tagata fuli pe.” (1 Timoteo 2:​4, MN ) ʼE mole tou fakahoko tatatou minisitelio ʼuhi pe ko totatou maʼua, kae ʼe tou fai ia te faʼahi ʼaia heʼe tou ʼofa mamahi ki te hahaʼi. Kapau ohage ko Sesu ʼe tou ʼofa mamahi ki te hahaʼi, ʼe tou faiga anai ke tou fai ia meʼa fuli moʼo faka mafola tuʼumaʼu ia te logo lelei kiā nātou. (Mateo 22:39) Kapau ko te ʼu tupuʼaga tāfito ʼaia ʼo tatatou kau ki te minisitelio, pea ʼe tou fia kau tuʼumaʼu anai ki te faka mafola ʼo te logo lelei.

ʼE Tou Faka Mafola Te Logo Lelei ʼo Te Puleʼaga ʼo Te ʼAtua

10, 11. (a) ʼE talanoa feafeaʼi ia Isaia ʼo ʼuhiga mo te logo ʼaē ʼe tou faka mafola? (b) Neʼe fakahā feafeaʼi e Sesu ia te logo lelei ʼo he meʼa ʼe lelei age, pea neʼe muliʼi feafeaʼi tana faʼifaʼitaki e te ʼu kaugana ʼa te ʼAtua ʼo te temi nei?

¹⁰ Koteā te lua puani ʼo tatatou minisitelio​—ia te logo ʼaē ʼe tou faka mafola? Koteā te logo ʼaē ʼe tou faka mafola? Neʼe foaki e te polofeta ko Isaia ia te fakamatala taulekaleka ʼo ʼuhiga mo te logo ʼaē ʼe tou faka mafola: “ ʼE matalelei ʼi te ʼu moʼuga ia te ʼu vaʼe ʼo ʼaē ʼe ina ʼave te logo lelei, ʼo ʼaē ʼe ina fakahā te tokalelei, ʼo ʼaē ʼe ina ʼave te ʼu logo lelei ʼo he meʼa ʼe lelei age, ʼo ʼaē ʼe ina fakahā te hāofaki, ʼo ʼaē ʼe ina ʼui ki Sione: ‘Kua hau tou ʼAtua.’ ”​—Isaia 52:⁠7.

¹¹ Ko te kupusiga palalau maʼuhiga ʼo te vaega ʼaia, “kua hau tou ʼAtua,” ʼe ina fakamanatuʼi mai te logo ʼaē ʼe tonu ke tou faka mafola, ia te logo lelei ʼo te Puleʼaga ʼo te ʼAtua. (Maleko 13:10) Koutou toe fakatokagaʼi, ʼe fakahā ʼi te vaega ʼaia ia te manatu maʼuhiga ʼo ʼuhiga mo te logo ʼaē ʼe tou faka mafola. ʼE fakaʼaogaʼi e Isaia te ʼu kupu “hāofaki,” “logo lelei,” “tokalelei,” pea mo “he meʼa ʼe lelei age.” ʼI te ʼu sēkulō ki muli age ʼi te ʼosi mate ʼo Isaia, ʼi te ʼuluaki sēkulō ʼo totatou temi, neʼe fakahoko e Sesu Kilisito te lea faka polofeta ʼaia ʼi hona ʼaluʼaga fakaofoofo, pea ʼe ko he faʼifaʼitaki kiā tatou, ke tou faʼafai ʼo fakahā ia te logo lelei ʼo ʼuhiga mo he meʼa ʼe lelei age​—te haʼu ʼo te Puleʼaga ʼo te ʼAtua. (Luka 4:43) ʼI te temi nei, tāfito la talu mai te taʼu 1919, neʼe muliʼi e te kau Fakamoʼoni ʼa Sehova ia te faʼifaʼitaki ʼa Sesu, ʼo nātou faka mafola ʼaki he loto faʼafai ia te logo lelei ʼo ʼuhiga mo te Puleʼaga ʼo te ʼAtua ʼaē kua fakatuʼu pea mo te ʼu tapuakina ʼaē ka ina foaki mai anai.

12. ʼE malave feafeaʼi ia te logo lelei ʼo te Puleʼaga ki te hahaʼi ʼaē ʼe nātou tali?

¹² ʼE malave feafeaʼi te logo lelei ʼo te Puleʼaga ki te hahaʼi ʼaē ʼe nātou tali ia te logo ʼaia? ʼI te temi nei ohage pe ko te temi ʼo Sesu, ko te logo lelei ʼaia ʼe ina foaki ki te hahaʼi ia te ʼamanaki pea mo te loto fīmālie. (Loma 12:12; 15:14) ʼAki te logo ʼaia, ko te hahaʼi ʼaē ʼe totonu ʼonatou loto, ʼe nātou maʼu ia te ʼamanaki heʼe nātou ako ʼe ʼi ai te ʼu tupuʼaga tāfito ʼo hanatou faka tui ki he ʼu temi lelei ʼi te ka haʼu. (Mateo 6:​9, 10; 2 Petelo 3:13) Ko te ʼamanaki ʼaia, ʼe ina faka fealagia ki te hahaʼi ʼaē ʼe manavasiʼi ki te ʼAtua, ke nātou haga taupau he loto falala. ʼE ʼui e te tagata fai pesalemo ʼe “mole [nātou] tuʼania anai ki he ʼu logo ʼe kovi.”​—Pesalemo 112:​1, 7.

Ko Te Logo Lelei ʼe Ina “Faitoʼo [Anai] Ia Nātou ʼAē ʼe Lāvevea Tonatou Loto”

13. Koteā te ʼu tapuakina neʼe fakakikite e te polofeta ko Isaia ʼo ʼuhiga mo te hahaʼi ʼaē ka nātou tali ʼi te temi nei ia te logo lelei?

¹³ Tahi ʼaē meʼa, ko te logo lelei ʼaē ʼe tou faka mafola ʼe ina foaki ki te hahaʼi ʼaē ʼe nātou fakalogo, ia te fakafimālie pea mo te ʼu tapuakina ʼi te temi nei. ʼO feafeaʼi? ʼI te fakakikite ʼa te polofeta ko Isaia, neʼe ina fakahā ʼihi ʼo te ʼu tapuakina ʼaia: “Ko te laumālie ʼo te Tuʼi ʼAliki ko Sehova ʼe iā te au, heʼe ko Sehova neʼe ina fakanofo au ke au fakahā he ʼu logo lelei ki te kau agavaivai. Neʹe ina fekauʼi au ke au faitoʼo ia nātou ʼaē ʼe lāvevea tonatou loto, mo faka mafola kiā nātou ʼe pilisoni he ʼāteaina, pea ki te kau kivi ke nātou toe sisio; mo faka mafola ia te taʼu manavaʼofa ʼo Sehova pea mo te ʼaho lagavaka ʼo totatou ʼAtua; mo fakapelepeleʼi ia nātou fuli ʼaē ʼe putu.”​—Isaia 61:​1, 2; Luka 4:​16-21.

14. (a) ʼO ʼuhiga mo te logo lelei ʼo te Puleʼaga, koteā ʼaē ʼe tou mahino kiai ʼaki te kupusiga palalau moʼo “faitoʼo ia nātou ʼaē ʼe lāvevea tonatou loto”? (b) ʼE tou faʼifaʼitakiʼi feafeaʼi ia te ʼofa o Sehova ki te hahaʼi ʼaē ʼe mafasia ʼonatou loto?

¹⁴ ʼE ʼui ʼi te lea faka polofeta ʼaia, ʼaki te faka mafola ʼo te logo lelei, ʼe ‘faitoʼo anai e Sesu ia nātou ʼaē ʼe lāvevea tonatou loto.’ ʼE maʼuhiga te kupuʼi palalau ʼaē neʼe fakaʼaogaʼi e Isaia! ʼE ʼui ʼi te tikisionalio faka Tohi-Tapu, ko te kupu faka Hepeleo ʼaē neʼe fakaliliu ʼaki te kupu “faitoʼo” “ ʼe tau fakaʼaogaʼi ki te ‘haʼi’ ʼo he lavea ʼaki he kie haʼi lavea.” Ohage ko he fafine afilimie ʼe ina haʼi he mataʼi lavea ʼo he tahi. ʼO toe feiā pe, mokā nātou faka mafola ia te logo lelei ʼo te Puleʼaga, ko te kau fai faka mafola ʼe nātou foaki he fakafimālie ki te hahaʼi fuli ʼaē neʼe nātou tali te logo pea mo nātou tau mo he ʼu faʼahiga mamahi kehekehe. ʼI tanatou tokoni ʼaia ki te hahaʼi ʼaē ʼe faigataʼaʼia, ʼe nātou faʼifaʼitakiʼi te ʼofa ʼo Sehova. (Esekiele 34:​15, 16) ʼE ʼui e te tagata fai pesalemo ʼo ʼuhiga mo te ʼAtua: “ ʼE ina fakamālōlō te hahaʼi ʼaē ʼe mafasia tonatou loto, pea ʼe ina haʼihaʼi tonatou ʼu lavea.”​—Pesalemo 147:⁠3.

Ko Te Logo Lelei ʼo Te Puleʼaga ʼe Ina Fetogi Te Maʼuli ʼo Te Hahaʼi

15, 16. Ko ai te ʼu faʼifaʼitaki ʼe hā ʼaki mai neʼe tokoni pea mo fakaloto mālohiʼi nātou e te logo lelei ʼo te Puleʼaga?

¹⁵ ʼE lahi te ʼu faʼifaʼitaki ʼo te ʼu hahaʼi neʼe mafasia tonatou loto, kae neʼe nātou maʼu he tokoni pea mo he fakaloto mālohi ʼaki te logo lelei ʼo te Puleʼaga. Ohage la ʼi te Potu Saute ʼo Amelika, ko te finematuʼa ko Oreanna neʼe mole kei fia maʼuli ia. Ko te tuagaʼane Fakamoʼoni ʼa Sehova, neʼe ina kamata ʼaʼahi ia ia pea mo lau age te Tohi-Tapu pea mo Te Tohi ʼo Te ʼu Hisitolia Faka Tohi-Tapu.b ʼI te kamata, ko te finematuʼa mahaki ʼulu ʼaia neʼe fakalogo ki te lautohi kae neʼe takoto ʼi tona palepale pea mo moeʼi tona ʼu mata, pea neʼe hoi ʼi ʼihi temi. Ki muli mai, neʼe faiga ke heka ʼi tona moeʼaga lolotoga te lautohi. ʼI te tahi ʼaho, neʼe heka ʼi te hekaʼaga ʼi te salō ʼo talitali ki te haʼu ʼa te tuagaʼane ʼo fai tana ako. ʼOsi aia, pea kamata ʼalu ki te ʼu fono ʼi te Fale ʼo Te Puleʼaga. Pea ʼi tana lotomālohi ʼaki te ʼu meʼa ʼaē neʼe logo kiai ʼi te ʼu fono ʼaia, neʼe ina kamata tufa leva te ʼu tohi faka Tohi-Tapu ki te hahaʼi ʼaē neʼe ʼōmai ki tona ʼapi. Pea ʼi tona taʼu 93, neʼe papitema ia Oreanna ʼo liliu ko te Fakamoʼoni ʼa Sehova. Ko te logo ʼo te Puleʼaga neʼe ina faka fealagia kiā Oreanna ke ina toe fia hoko atu tona maʼuli.​—Tāʼaga Lea 15:30; 16:⁠24.

¹⁶ Māʼiape la mo nātou ʼaē kua vave mate ʼuhi ko te mahaki, ʼe nātou maʼu he lotomālohi ʼaki te logo lelei ʼo te Puleʼaga. Tou toʼo te faʼifaʼitaki ʼa Maria mai te Potu Uesite ʼo Eulopa. Neʼe kua vave mate he neʼe kua kovi tona mahaki pea neʼe mole kei falala ki he meʼa. Neʼe lotovaivai ʼaupito ʼi te temi ʼaē neʼe felāveʼi ai mo te kau Fakamoʼoni ʼa Sehova. Kae ʼi tana logo ki te ʼu fakatuʼutuʼu ʼa te ʼAtua, neʼe toe maʼuhiga kiā ia tona maʼuli. Neʼe papitema pea neʼe fai faka mafola mālohi. ʼI te ʼu taʼu fakaʼosi e lua ʼo tona mahaki, neʼe ʼiloga tana falala pea mo tona fiafia. Kua mate ia Maria kae neʼe falala mālohi ki te fakatuʼuake.​—Loma 8:​38, 39.

17. (a) Koteā te ʼu fetogi ʼaē ʼe hoko ki te maʼuli ʼo te hahaʼi ʼaē ʼe nātou tali te logo lelei ʼo te Puleʼaga? (b) Ko te ʼu ʼaluʼaga fea ʼaē neʼe koutou sio ai kiā Sehova ʼe ina “fakatuʼu ake ia nātou ʼaē kua mapelu ki lalo”?

¹⁷ Ko te ʼu fakamatala ʼaia ʼe ko he fakamoʼoni, ko te logo lelei ʼo te Puleʼaga ʼe ina lava fetogi ia te maʼuli ʼo te hahaʼi ʼaē ʼe nātou tali te ʼu moʼoni ʼo te Tohi-Tapu. Ko te hahaʼi ʼaē ʼe nātou putu he neʼe mate he tahi ʼe nātou ʼoʼofa ai, ʼe nātou toe lotomālohi ʼi tanatou logo ki te ʼamanaki ʼo te fakatuʼuake. (1 Tesalonika 4:13) Ko te hahaʼi māsisiva ʼaē ʼe nātou faiga ke nātou maʼu he taupau maʼuli maʼa tonatou famili, ʼe nātou toe fiafia pea mo lototoʼa ʼi tanatou logo ko Sehova ʼe mole ina līʼakina nātou mo kapau ʼe nātou nofo agatonu kiā te ia. (Pesalemo 37:28) ʼAki te tokoni ʼa Sehova, tokolahi te hahaʼi lotovaivai, ʼe nātou maʼu māmālie ia te mālohi ʼaē ʼe ʼaoga moʼo tauʼi tonatou ʼu fihifihia, pea ʼi ʼihi ʼaluʼaga ʼe nātou lava tauʼi te mahaki. (Pesalemo 40:​1, 2) ʼIo, ʼaki te mālohi ʼo tana Folafola, ko Sehova ʼi te temi nei ʼe ina “fakatuʼu ake ia nātou ʼaē kua mapelu ki lalo.” (Pesalemo 145:14) Koia kapau ʼe tou sio ʼi totatou telituale pea mo te kokelekasio ki te ʼu fua lelei ʼo te logo lelei ʼo te Puleʼaga ʼi te maʼuli ʼo te hahaʼi ʼaē ʼe mafasia tonatou loto, pea ʼaua naʼa galo iā tatou ʼi he ʼaho, ʼe tou maʼu ia te logo ʼaē ʼe lelei age ke fakahā ki te hahaʼi ia ʼaho nei!​—Pesalemo 51:⁠17.

Ko “Taku Kole Ki Te Atua o Uhiga Mo Natou Ke Natou Mauli”

18. Neʼe malave feafeaʼi kiā Paulo ia te fakafisi ʼa te kau Sutea ki te logo lelei, pea koteā tona tupuʼaga?

¹⁸ Logola ʼe lelei ʼaupito te logo lelei ʼaē ʼe tou faka mafola, kae tokolahi te hahaʼi ʼe mole fia logo kiai. ʼE koutou feafeaʼi mokā mole tali ia takotou fai faka mafola? Lagi ʼe koutou hage ko te ʼapositolo ko Paulo, ʼaē neʼe fai faka mafola putuputu ki te kau Sutea, kae tokolahi iā nātou neʼe nātou fakafisi ki te logo lelei. Neʼe lotomamahi ʼaupito ia Paulo ʼo ʼuhiga mo tanatou fakafisi ʼaia. Neʼe ina ʼui fakahagatonu fēnei: “Ko he lotomamahi lahi mo he mamahi tuumau e au nofo mo ia i toku loto.” (Loma 9:2) Neʼe fakaʼofaʼofa ia Paulo ki te kau Sutea ʼaē neʼe fai faka mafola ki ai, pea neʼe lotomamahi ʼi tanatou fakafisi ki te logo lelei.

19. (a) He koʼe ʼi ʼihi temi ʼe feala ke tou lotovaivai ai? (b) Koteā ʼaē neʼe tokoni kiā Paulo ke hoko atu tana fai faka mafola?

¹⁹ ʼE tou toe faka mafola foki mo te logo lelei ʼo te manavaʼofa. Koia, ʼe feala ke tou lotovaivai mokā ʼe fakafisi te tokolahi ki te logo lelei ʼo te Puleʼaga. ʼE hā ʼaki ai tatatou tōkakaga moʼoni ki te fīmālie ʼo te hahaʼi ʼaē ʼe tou fai faka mafola ki ai. Kae ʼaua naʼa galo kiā tatou ia te faʼifaʼitaki ʼa te ʼapositolo ko Paulo. Koteā ʼaē neʼe tokoni kiā ia ke hoko atu tana fai faka mafola? Logola neʼe lotomamahi ʼi te fakafisi ʼa te kau Sutea ki te logo lelei, kae neʼe mole situʼa ia Paulo ki te kau Sutea fuli, ʼo ina ʼui ʼe mole feala ke nātou fetogi. Kailoa, neʼe falala ko ʼihi Sutea ʼe nātou tali anai ia Kilisito. Koia, ʼi tona ʼofa ʼaē ki te hahaʼi Sutea, neʼe tohi fēnei e Paulo: “Ko te fakaamu o toku loto mo taku kole ki te Atua o uhiga mo natou ke natou mauli.”​—Loma 10:⁠1.

20, 21. (a) ʼO ʼuhiga mo tatatou minisitelio, ʼe tou lava muliʼi feafeaʼi ia te faʼifaʼitaki ʼa Paulo? (b) Ko te puani fea ʼaē ka tou vakaʼi anai ʼi te alatike ʼaē ka hoa mai?

²⁰ Koutou fakatokagaʼi te ʼu meʼa e lua ʼaē neʼe faka maʼuhigaʼi e Paulo. Neʼe loto tāfito e Paulo ke hāofaki ʼihi Sutea, pea neʼe ina kole te faʼahi ʼaia ki te ʼAtua. ʼI te temi nei, ʼe tou muliʼi te faʼifaʼitaki ʼa Paulo. ʼE tou fakaʼamu mālohi ke tou maʼu te hahaʼi ʼaē ʼe nātou lotolelei ki te logo lelei. Tou haga kole kiā Sehova ke tou maʼu te taʼi hahaʼi ʼaia ke feala hatatou tokoni kiā nātou ke nātou maʼu ia te hāofaki.​—Tāʼaga Lea 11:30; Esekiele 33:11; Soane 6:⁠44.

²¹ Kae ke feala hatatou fakahā te logo lelei ʼo te Puleʼaga ki te tokolahi, ʼe mole tonu pe ke tou ʼiloʼi he koʼe ʼe tou fai faka mafola pea koteā ʼaē ʼe tou faka mafola, kae ʼe toe tonu foki ke tou tōkakaga peʼe feafeaʼi tatatou fai faka mafola. ʼE tou vakaʼi anai te puani ʼaia ʼi te alatike ʼaē ka hoa mai.

[Kiʼi nota]

Koteā ʼAē Neʼe Koutou Ako?

• He koʼe ʼe tou kau ki te minisitelio?

• Koteā te logo tāfito ʼaē ʼe tou faka mafola?

• Ko te ʼu tapuakina fea ʼaē ʼe maʼu e nātou ʼaē ʼe nātou tali ia te logo lelei ʼo te Puleʼaga?

• Koteā ʼaē ka tokoni mai anai ke tou haga fai tatatou minisitelio?

[Paki ʼo te pasina 18]

Ko te logo lelei ʼo te Puleʼaga ʼe ina fakaloto mālohiʼi ia te hahaʼi ʼaē ʼe mafasia ʼonatou loto

[Paki ʼo te pasina 20]

Ko te faikole ʼe tokoni mai ke tou faʼa kātaki ʼi tatatou fai faka mafola