Te ʼu Fehuʼi ʼa Te Kau Lautohi
ʼI te Iselaele ʼāfea, neʼe koteā te faka ʼuhiga ʼo te mālama faka milakulo ʼaē neʼe fakahigoaʼi ko te Sekina ʼaē neʼe hā ʼi te Potu Taputapu ʼAupito ʼo te tapenakulo pea mo te fale lotu?
Ko Sehova, te Tāmai ʼofa ʼaē neʼe ina puipui te kau Iselaele, neʼe ina fakahā te fakaʼiloga ki tana hahaʼi ke nātou ʼiloʼi ʼe nofo mo nātou. Ko te fakaʼiloga ʼaia, neʼe ko te ʼao gigila pea mo mālamagia neʼe ʼasi tuʼumaʼu ʼi tanatou fale lotu.
Ko te mālama ʼaia neʼe ʼiloga lelei, neʼe ina fakatātā te nofo fakapulipuli ʼa Sehova ʼi te fale lotu. Neʼe ʼasi ʼi te Potu Taputapu ʼAupito ʼo te tapenakulo, pea mo te Potu Taputapu ʼAupito ʼo te fale lotu ʼaē neʼe laga e Salomone. Ko te mālama ʼaia neʼe mole ko Sehova. ʼE mole feala ia ki te ʼAtua ke nofo ʼi he fale neʼe laga e te tagata. (2 Fakamatala 6:18; Gaue 17:24) ʼAki te mālama fakaʼatua ʼaia ʼaē neʼe hā ʼi te sagatualio ʼo te ʼAtua, neʼe feala ai ki te pelepitelo lahi pea mo te kau Iselaele ke nātou falala ko Sehova ʼe nofo ʼi tonatou lotolotoiga moʼo puipui pea mo taupau ia nātou.
Hili te temi ʼaē neʼe tohi ai te Tohi-Tapu, neʼe fakahigoaʼi te mālama ʼaia ʼi te lea Faka Alamea ko te Sekina (shekhinah), ko he kupu ʼe ko tona faka ʼuhiga “ko te meʼa ʼaē ʼe nofo ai” peʼe ko “te nofoʼaga.” Ko te kupuʼi palalau ʼaia ʼe mole tuʼu ʼi te Tohi-Tapu, kae ʼe maʼu ʼi te ʼu fakaliliu Faka Alamea ʼo te ʼu Tohi Faka Hepeleo, ʼaē ʼe toe fakahigoaʼi foki ko te ʼu Targums.
ʼI te temi ʼaē neʼe foaki ai e Sehova ia te ʼu fakatotonu kiā Moisese ʼo ʼuhiga mo te laga ʼo te tapenakulo, neʼe ina ʼui fēnei: “ ʼE tonu anai ke ke ʼai te tapunu ki te Aleka, pea ke ke ʼai ki te loto Aleka ia te fakamoʼoni ʼaē ka au foaki atu anai. Pea ʼe ko te faʼahi ʼaia ʼaē ka au felāveʼi ai anai mo koe pea ʼe au palalau anai mo koe, ʼi te fuga tapunu, ʼi te vaha ʼo te ʼu kelupimi e lua ʼaē ʼe tuʼu ʼi ʼoluga ʼo te aleka.” (Ekesote 25:21, 22) Ko te Aleka ʼaē ʼe talanoa kiai neʼe ko he puha neʼe ʼaofi ʼaki te aulo, pea neʼe tuku ʼi te Potu Taputapu ʼAupito. Neʼe ʼi ai te ʼu kelupimi aulo e lua ʼi te fuga tāpunu ʼo te Aleka.
Neʼe palalau ia Sehova mai te faʼahi fea? Neʼe ina tali ki te fehuʼi ʼaia ʼo ina ʼui fēnei kiā Moisese: “ ʼE au hā anai ʼi te ʼao ʼi te fuga tāpunu.” (Levitike 16:2) Neʼe maʼaliʼali te ʼao ʼaia ʼi ʼoluga ʼo te Aleka tapu ʼi te vaha ʼo te ʼu kelupimi aulo e lua. ʼE mole fakahā mai ʼi te Tohi-Tapu pe neʼe lahi feafeaʼi te ʼao ʼaia ʼo feiā mo tona vaha mamaʼo mo te ʼu kelupimi.
Ko te ʼao ʼaia neʼe ina fakamālamaʼi te Potu Taputapu ʼAupito. Neʼe ko te mālama pe ʼaia e tahi ʼi te faʼahi ʼaia. Neʼe ʼaoga te mālama ʼaia ki te pelepitelo lahi mokā hū ki te koga fale taupotu ʼaia ʼi te ʼAho ʼo Te Faifakalelei. Neʼe tuʼu iā muʼa ʼo te ʼafioʼaga ʼo Sehova.
ʼE ʼi ai koa he faka ʼuhiga ʼo te mālama faka milakulo ʼaia ki te kau Kilisitiano? Neʼe hā te meʼa ki te ʼapositolo ko Soane, ʼo ʼuhiga mo he kolo “e mole toe i ai anai te pouli.” Ko te kolo ʼaia ʼe ko te Selusalemi Foʼou, ʼaē ʼe faʼufaʼu e te kau Kilisitiano fakanofo ʼaē kua fakatuʼuake ke nātou kaugā hau mo Sesu. Ko te mālama ʼo te kolo fakatātā ʼaia ʼe mole haʼu mai te laʼā peʼe ko te māhina. Ko te kolōlia totonu ʼo Sehova ʼAtua ʼaē ʼe ina fakamālamaʼi te kautahi ʼaia, ohage ko te fakamālamaʼi e te ʼao ʼo te Sekina ia te Potu Taputapu ʼAupito. ʼO feiā mo te Akeno, ia Sesu Kilisito, ʼe ko te “malama” ʼo te kolo. Pea ko te “kolo” ʼaia ʼe ina fakamū tona mālama fakalaumālie pea mo tona ʼofa moʼo takitaki ʼaki ia te hahaʼi ʼaē neʼe totogi mai te ʼu puleʼaga fuli.—Apokalipesi 21:22-25.
Mai te ʼaluʼaga ʼaē ʼe nātou maʼu te ʼu tapuakina lahi ʼaia mai te ʼAtua, ʼe feala ke tui papau ia te kau atolasio ʼa Sehova ko ia ko tanatou Tauhi Ōvi ʼe ina puipui ia nātou, pea ʼe ko hanatou Tāmai ʼe ʼofa kiā nātou.