Watchtower TANAKIʼAGA TOHI ʼI TE NETI
Watchtower
TANAKIʼAGA TOHI ʼI TE NETI
Faka'uvea
  • TOHI-TAPU
  • TOHI
  • FONO
  • w06 1/3 p. 3-7
  • Ko He ʼu Gāue Moʼo Fakahoko Te Fakatuʼutuʼu ʼa Te ʼAtua

Aucune vidéo n'est disponible pour cette sélection.

Il y a eu un problème lors du chargement de la vidéo.

  • Ko He ʼu Gāue Moʼo Fakahoko Te Fakatuʼutuʼu ʼa Te ʼAtua
  • Te Tule Leʼo—2006
  • Manatu Tafito
  • He Tahi ʼu Alatike
  • Neʼe Fakafihiʼi Te Fakatuʼutuʼu ʼa Sehova
  • “Te Meʼa Fakalilo Taputapu ʼo Tona Finegalo”
  • “Te Meʼa Fakalilo Taputapu ʼo Te Puleʼaga ʼo Te ʼAtua”
  • ʼE Hoko Moʼoni Anai Te Fakatuʼutuʼu ʼa Sehova
  • Ko He Meʼa Fakalilo ʼe Mole Tonu Ke Fufū e Te Kau Kilisitiano!
    Te Tule Leʼo—1997
  • Ko Te Pule Faʼitaliha ʼa Sehova Pea Mo Te Puleʼaga ʼo Te ʼAtua
    Te Tule Leʼo—2007
  • Ko Te Fakatahiʼi ʼo Te ʼu Meʼa ʼAē ʼi Te Lagi Pea Mo Te ʼu Meʼa ʼAē ʼi Te Kele
    Te Tule Leʼo—2006
  • Te Hoko Faka Kolōlia ʼo Te Fakatuʼutuʼu ʼa Sehova
    Koutou Atolasio Ki Te ʼAtua Moʼoni Pe e Tahi
Hoko Atu
Te Tule Leʼo—2006
w06 1/3 p. 3-7

Ko He ʼu Gāue Moʼo Fakahoko Te Fakatuʼutuʼu ʼa Te ʼAtua

“[Ko te ʼAtua] ʼe ina fai ia meʼa fuli ʼo mulimuli ki te fakatuʼutuʼu ʼo tona finegalo.”​—Efeso 1:​11, MN.

1. He koʼe ʼe fakatahitahi anai te ʼu kokelekasio fuli ʼo te kau Fakamoʼoni ʼa Sehova ʼi te ʼaho 12 ʼo ʼApelili 2006?

ʼI TE Feliafā ʼafiafi, ʼi te ʼaho 12 ʼo ʼApelili 2006, ko hahaʼi ʼe teitei toko 16 miliona ʼaē ka fakatahitahi anai moʼo fakamanatuʼi te Taumafa ʼo te ʼAliki. ʼI te ʼu fale fono fuli, ʼe teuteuʼi anai te laupapa ke hili kiai te pane ʼe mole hona meʼa fakatupu, ʼaē ʼe ina fakatātā ia te sino ʼo Kilisito, pea mo te vino kula, ʼaē ʼe ina fakatātā ia tona taʼataʼa. ʼI te koga fakamuli ʼo te akonaki ʼaē ʼe fakamahino ai te faka ʼuhiga ʼo te Fakamanatu ʼo te mate ʼa Sesu, ko te pane pea mo te vino ʼe feʼaveʼaki anai ʼi te nofoʼaki kātoa, ʼo kamata ʼuluaki ʼaki te pane pea fakaʼosi ʼaki te vino. ʼI ʼihi kokelekasio ʼa te kau Fakamoʼoni ʼa Sehova, ko te tokotahi peʼe laka atu ʼaē ka nātou kai anai ia te pane pea mo ʼinu ia te vino. Kae ʼe lahi te ʼu kokelekasio ʼe mole fakaʼaogaʼi anai e he tahi ia te ʼu meʼa ʼaia. He koʼe koa ko te kau Kilisitiano tokosiʼi pe ʼaē ko tanatou ʼamanaki ko te ʼolo ki selo, ʼe nātou ʼinu ia te vino pea mo kai ia te pane, kae tokolahi age ia nātou ʼaē ʼe mole nātou fai te faʼahi ʼaia, ʼaē ko tanatou ʼamanaki ʼe ko te māʼuʼuli ʼo talu ai ʼi te kele?

2, 3. (a) Neʼe fakatupu feafeaʼi e Sehova ia meʼa fuli ke ʼalutahi mo tona finegalo? (b) He koʼe neʼe fakatupu e Sehova ia te kele pea mo te tagata?

2 Ko Sehova ʼe ko he ʼAtua ʼe ʼi ai tona finegalo. Moʼo fakahoko tona finegalo, ʼe ina “fai ia meʼa fuli ʼo mulimuli ki te fakatuʼutuʼu ʼo tona finegalo.” (Efeso 1:​11, MN ) Neʼe ina ʼuluaki fakatupu tona ʼAlo ʼulu tokotahi. (Soane 1:​1, 14; Apokalipesi 3:14) Pea ʼaki tona ʼAlo, neʼe ina fakatupu tona ʼu foha fakalaumālie, ʼo hoa atu kiai ia te ʼatulaulau, mo te kele pea mo te tagata.​—Sopo 38:​4, 7; Pesalemo 103:​19-21; Soane 1:​2, 3; Kolose 1:​15, 16.

3 Neʼe mole fakatupu e Sehova te kele ke liliu ko he potu ʼe ʼahiʼahi ai peʼe ko ai ʼaē ka lava liliu anai ko hona foha fakalaumālie ʼi selo, ohage ko tona akoʼi e te ʼatu ʼu lotu ʼo te Keletiate. Neʼe ina fakatupu te kele heʼe ina loto ke “nofoʼi.” (Isaia 45:18) Neʼe fakatupu e te ʼAtua te kele maʼa te tagata pea neʼe ina fakatupu te tagata maʼa te kele. (Pesalemo 115:16) Ko te kele kātoa neʼe tonu ke liliu ko he palatiso, ʼe nonofo ai ni hahaʼi faitotonu, ʼe nātou gāueʼi anai te kele pea mo taupau fakalelei. Neʼe mole heʼeki he ʼaho neʼe ina ʼui age ai ki te ʼuluaki taumātuʼa, ʼe feala anai hanā ʼolo ki selo.​—Senesi 1:​26-28; 2:​7, 8, 15.

Neʼe Fakafihiʼi Te Fakatuʼutuʼu ʼa Sehova

4. ʼI te kamata mai ʼa te malamanei, neʼe fakafihiʼi feafeaʼi te faʼahiga pule ʼa Sehova?

4 Ko te tahi foha fakalaumālie ʼa te ʼAtua neʼe agatuʼu pea neʼe ina fakaʼaogaʼi kovi tona loto faʼifaʼitaliha ʼaē neʼe foaki age e Sehova, ʼo ina fia tāʼofi te hoko ʼo te finegalo ʼo te ʼAtua. Neʼe ina fakamaveu te tokalelei ʼo nātou fuli ʼaē ʼe nātou fakalogo ki te pule ʼa Sehova ʼuhi ko tanatou ʼofa kiā te ia. Neʼe fakaneke e Satana te ʼuluaki taumātuʼa ke mole nā fakalogo ki te ʼAtua. (Senesi 3:​1-6) Neʼe mole ina fakafihiʼi te mālohi ʼo Sehova, kae neʼe ina fakafihiʼi Tana faʼahiga pule pea mo tona maʼua ʼaē ke pule. Koia ʼi te kamata mai ʼa te malamanei, neʼe lagaʼi ʼi te kele te fehuʼi maʼuhiga ʼo ʼuhiga mo te pule ʼa Sehova.

5. Koteā te tahi fakafifihi ʼaē neʼe fai, pea ko ai ʼaē ʼe toe fakapipiki ki ai?

5 Neʼe ʼi ai te tahi fakafifihi neʼe fai e Satana ʼi te temi ʼo Sopo, ʼe pipiki ki tana ʼuluaki fakafifihi ʼo ʼuhiga mo te pule ʼa Sehova ʼi te ʼatulaulau. Neʼe lau e Satana, ko te hahaʼi ʼaē neʼe fakatupu e Sehova, ʼe nātou fakalogo pea mo tauhi kiā te Ia ʼaki he loto ʼe mole lelei. Neʼe ina ʼui ʼe tupu tanatou fia tauhi kiā Sehova ʼuhi pe ko te ʼu lelei ʼaē ʼe nātou maʼu ai, kae kapau ʼe ʼahiʼahiʼi anai nātou pea ʼe nātou lītuʼa anai kiā te ia. (Sopo 1:​7-11; 2:​4, 5) Logola neʼe fai te fakafifihi ʼaia ʼo ʼuhiga mo te ʼu hahaʼi kaugana ʼa Sehova, kae ʼe toe fakapipiki foki ki ai mo te kau ʼāselo ʼa Sehova, pea mo te ʼAlo ʼulu tokotahi ʼo Sehova.

6. Neʼe nofo agatonu feafeaʼi ia Sehova ki tana fakatuʼutuʼu pea mo tona huafa?

6 Neʼe agatonu Sehova ki tana fakatuʼutuʼu pea mo te faka ʼuhiga ʼo tona huafa, ʼo ina fakaliliu ia ia totonu ko he Polofeta pea mo he Fakamaʼuli.a Neʼe ina ʼui fēnei kiā Satana: “ ʼE au tuku anai he fehiʼa iā koe mo te fafine, ʼi tou hāko pea mo tona hāko. Pea ʼe ina maumauʼi anai koe ʼi tou ʼulu pea ʼe ke maumauʼi anai ia ia ʼi tona muliʼi vaʼe.” (Senesi 3:15) ʼAki te Hāko ʼo te “fafine,” ʼaē ko tona ʼohoana peʼe ko tana kautahi ʼaē ʼi selo, ʼe tali anai Sehova ki te fakafifihi ʼa Satana pea mo ina foaki ki te hōloga ʼo Atama te ʼamanaki ʼo te faka ʼāteaina pea mo te maʼuli.​—Loma 5:21; Kalate 4:​26, 31.

“Te Meʼa Fakalilo Taputapu ʼo Tona Finegalo”

7. Koteā te fakatuʼutuʼu ʼaē neʼe fakahā e Sehova ʼaki te ʼapositolo ko Paulo?

7 ʼI tana tohi ki te kau Kilisitiano ʼo Efeso, neʼe fakamahino lelei e te ʼapositolo ko Paulo te meʼa ʼaē ʼe fai e Sehova moʼo fakahoko ia tana fakatuʼutuʼu. Neʼe ina tohi fēnei: “Neʼe ina fakahā mai kiā tatou te meʼa fakalilo taputapu ʼo tona finegalo. ʼAenī ʼe fai pe ki te meʼa ʼe ina leleiʼia, ʼaē neʼe ina loto e ia totonu ki he gāue ʼe ina takitaki ʼi te fakaʼosi ʼo te ʼu temi ʼaē kua fakakatofa, ko tona faka ʼuhiga, ko te toe fakatahiʼi ʼo meʼa fuli iā Kilisito, te ʼu meʼa ʼaē ʼi te lagi pea mo te ʼu meʼa ʼaē ʼi te kele.” (Efeso 1:​9, 10, MN ) Ko te fakatuʼutuʼu fakakolōlia ʼa Sehova ke logo tahi te ʼatulaulau, pea ko meʼa fuli ʼaē neʼe ina fakatupu ke nātou fakalogo ʼaki te ʼofa ki tona pule. (Apokalipesi 4:11) ʼE tāpuhā ai anai tona huafa, ʼe hā ai anai te gutuloi ʼa Satana, pea ʼe hoko anai te finegalo ʼa te ʼAtua “i te kelekele o hage ko Selo.”​—Mateo 6:⁠10.

8. ʼE faka ʼuhiga kiteā ia te ‘gāue ʼaē ʼe takitaki’ e te ʼAtua?

8 Ko te “meʼa ʼaē ʼe . . . leleiʼia” e Sehova, peʼe ko tana fakatuʼutuʼu, ʼe ina fakahoko anai ʼaki “he gāue ʼe ina takitaki.” ʼE fakaʼaogaʼi ʼi henī e Paulo te kupu ʼe faka ʼuhiga ki “te fakatuʼutuʼu gāue ʼa he loto fale.” ʼE mole faka ʼuhiga ia ki he puleʼaga, ohage ko te Puleʼaga faka Mesianike, kae ʼe faka ʼuhiga ki he faʼahiga takitaki ʼo he ʼu gāue.b Ko te faʼahiga takitaki ʼaē e Sehova tana ʼu gāue moʼo fakahoko tana fakatuʼutuʼu, ʼe pipiki kiai “te meʼa fakalilo taputapu,” ʼaē ka fakaʼiloʼilo māmālie anai ʼi te hoholo ʼo te ʼu sēkulō.​—Efeso 1:10; 3:​9, nota ʼi te lalo pasina.

9. Neʼe fakahā māmālie feafeaʼi e Sehova te meʼa fakalilo taputapu ʼo ʼuhiga mo tona finegalo?

9 ʼAki te ʼu fuakava ʼaē neʼe fai e Sehova, neʼe ina fakahā ʼaki te temi peʼe fakahoko feafeaʼi anai tana fakatuʼutuʼu ʼo ʼuhiga mo te Hāko ʼaē neʼe ina fakapapau ʼi Eteni. Ko te fuakava ʼaē neʼe ina fai mo Apalahamo, neʼe fakahā ai ko te Hāko ʼaē neʼe fakapapau ʼe hifo anai mai te hōloga ʼo Apalahamo, pea ʼaki ia ia ʼe tapuakina anai “te ʼu puleʼaga fuape ʼo te kele.” Neʼe toe fakahā ʼi te fuakava ʼaia ko te tahi ʼu hahaʼi ʼe toe fakatahi anai mo te ʼuluaki koga ʼo te hāko. (Senesi 22:​17, 18) Ko te fuakava ʼo te Lao ʼaē neʼe fai mo te Iselaele fakasino, neʼe ina fakahā te fakatuʼutuʼu ʼa Sehova ke ʼi ai “he puleʼaga faka pelepitelo.” (Ekesote 19:​5, 6) Ko te fuakava ʼaē neʼe ina fai mo Tavite neʼe hā ʼaki ai ko te Hāko ʼe liliu anai ko te Pule ʼo te Puleʼaga ʼo aʼu ki he ʼu temi ʼe mole ʼiloʼi hona gataʼaga. (2 Samuele 7:​12, 13; Pesalemo 89:​3, 4) ʼI te ʼosi taki e te Lao ia te kau Sutea ki te Mesia, neʼe fakahā e Sehova te tahi ʼu faʼahi ʼo ʼuhiga mo te fakahoko ʼo tana fakatuʼutuʼu. (Kalate 3:​19, 24) Ko te hahaʼi ʼaia ʼaē neʼe tonu ke nātou fakatahi mo te ʼuluaki koga ʼo te hāko, ʼe nātou faʼufaʼu te “puleʼaga faka pelepitelo” ʼaē neʼe fakakikite, pea ʼe nātou kau ki “te fuakava foʼou,” heʼe ko nātou ia te “Iselaele” foʼou, te Iselaele fakalaumālie.​—Selemia 31:​31-34; Hepeleo 8:​7-9.c

10, 11. (a) Neʼe fakahā feafeaʼi e Sehova te Hāko ʼaē neʼe fakakikite? (b) He koʼe neʼe tonu ke haʼu te ʼAlo ʼulu tokotahi ʼa te ʼAtua ki te kele?

10 Moʼo fakahoko te gāue ʼaē ʼe takitaki e te ʼAtua ʼo ʼuhiga mo tana fakatuʼutuʼu, neʼe hoko mai te temi ʼaē ke tupu ʼi te kele ia te Hāko ʼaē neʼe fakakikite. Neʼe fekauʼi e Sehova te ʼāselo ko Kapeliele ke ina tala kiā Malia ʼe ina fānauʼi anai he tama ʼe tonu ke fakahigoaʼi ko Sesu. Neʼe ʼui fēnei e te ʼāselo kiā ia: “E lahi anai pea e fakahigoa anai ko te Alo o te Matuaki-Maoluga, e foakiʼage anai kia te ia e te Aliki-Atua te afioʼaga o Tavite tana tamai. E pule anai ki te api o Sakopo o talu ai, pea e mole he gataʼaga anai o tona Puleaga.” (Luka 1:​32, 33) ʼI te ʼu palalau ʼaia, neʼe ʼiloʼi lelei peʼe ko ai te Hāko ʼaē neʼe fakapapauʼi.​—Kalate 3:16; 4:⁠4.

11 Ko te ʼAlo ʼulu tokotahi ʼa Sehova neʼe tonu ke haʼu ki te kele pea ke felāveʼi mo ni ʼu ʼahiʼahi lahi. Neʼe fakalogo kiā Sesu te tali lelei ʼaē neʼe tonu ke fai ki te fakafifihi ʼa Satana. ʼE nofo agatonu anai koa ki tana Tāmai? Neʼe kau te faʼahi ʼaia ki te meʼa fakalilo taputapu. Ki muli age, neʼe fakamahino e te ʼapositolo ko Paulo te meʼa ʼaē neʼe fai e Sesu: “ ʼE moʼoni ʼe lahi te meʼa fakalilo taputapu ʼo te pipiki ʼaia ki te ʼAtua: ‘Neʼe hā ʼi te kakano, neʼe tala ʼe faitotonu ʼi te laumālie, neʼe hā ki te kau ʼāselo, neʼe faka mafola ʼi te ʼu puleʼaga, neʼe tui ki ai te malamanei, neʼe toʼo ake ʼi te kolōlia.’ ” (1 Timoteo 3:​16, MN ) Ei, ʼi tana nofo agatonu ʼo aʼu ki tana mate, neʼe foaki e Sesu te tali maʼuhiga ki te fakafifihi ʼaē neʼe lagaʼi e Satana. Kae neʼe ʼi ai te tahi ʼu faʼahi ʼo te meʼa fakalilo taputapu neʼe kei toe ke fakahā.

“Te Meʼa Fakalilo Taputapu ʼo Te Puleʼaga ʼo Te ʼAtua”

12, 13. (a) Koteā te tahi faʼahi ʼo “te meʼa fakalilo taputapu ʼo te puleʼaga ʼo te ʼAtua”? (b) Koteā ʼaē neʼe tonu ke fai e Sehova ʼi tana filifili te hahaʼi ke nātou ʼolo ki selo?

12 ʼI tana tahi fai faka mafola ʼi Kalilea, neʼe fakahā e Sesu ko te meʼa fakalilo taputapu neʼe ʼi ai tona pikipikiga mo tona puleʼaga faka Mesianike. Neʼe ina ʼui fēnei ki tana ʼu tisipulo: “Kua tuku atu kiā koutou te mahino ki te ʼu meʼa fakalilo taputapu ʼo te puleʼaga ʼo selo [“te Puleaga o te Atua,” iā Maleko 4:11].” (Mateo 13:​11, MN ) ʼE kau ki te meʼa fakalilo ʼaia ia nātou ʼaē neʼe filifili e Sehova, te “kiʼi faga ōvi,” ʼaē ko te toko 144 000 hahaʼi, ke nātou kau ki te hāko, ʼaē ko tona ʼAlo, pea mo kaugā hau mo ia ʼi selo.​—Luka 12:32; Apokalipesi 14:​1, 4.

13 Neʼe fakatupu te tagata ke maʼuli ʼi te kele, koia neʼe maʼua ai ke fai e Sehova “he fakatupu foʼou” ke feala ai ki he ʼu hahaʼi ke nātou ʼolo ki selo. (2 Kolonito 5:17) Ko te ʼapositolo ko Petelo ʼe kau ia nātou ʼaē neʼe filifili ke nātou ʼolo ki selo, pea neʼe ina tohi fēnei: “Ke tapuakiʼi te ʼAtua pea mo Tāmai ʼo totatou ʼAliki ko Sesu Kilisito, koteʼuhi ʼaki tona manavaʼofa lahi, neʼe ina tuku mai kiā tatou he tupu foʼou, ki he ʼamanaki maʼuli, ʼaki te toe fakatuʼuake ʼa Sesu Kilisito mai te kau mate, ki he tōfiga ʼe heʼe popo, heʼe ʼuli, heʼe fefe. Ko te tōfiga ʼaia ʼe tāʼofi maʼa koutou ʼi te lagi.”​—1 Petelo 1:​3, 4, MN.

14. (a) Neʼe kau feafeaʼi te hahaʼi ʼaē ʼe mole Sutea ki “te meʼa fakalilo taputapu ʼo te puleʼaga ʼo te ʼAtua”? (b) He koʼe ʼe feala ke tou mahino ki te ʼu “mea loloto [ʼaia] o te Atua”?

14 Ko te tahi faʼahi ʼo te meʼa fakalilo taputapu ʼo te Puleʼaga ka haʼu, neʼe ko te finegalo ʼo te ʼAtua ke kau ia te hahaʼi ʼaē ʼe mole Sutea ki te tokosiʼi ʼaē ka kaugā hau anai mo Kilisito ʼi selo. Neʼe fakamahino e Paulo te faʼahi ʼaia ʼo te ‘gāue ʼaē ʼe takitaki’ e Sehova, peʼe ko te ʼu gāue ʼaē ʼe ina fai moʼo fakahoko tana fakatuʼutuʼu, ʼo ina ʼui fēnei: “ ʼI te tahi ʼu taʼiake, neʼe mole ʼiloʼi e te ʼu foha ʼo te tagata te meʼa fakalilo ʼaia ohage ko tona fakahā age ʼi te temi nei ʼaki te laumālie ki te kau ʼapositolo maʼoniʼoni pea mo te kau polofeta, ʼaē ko tona faka ʼuhiga, ko te ʼu hahaʼi ʼo te ʼu puleʼaga ʼe nātou kaugā maʼu tofiʼa anai pea mo kau fakatahi ki te sino pea mo nātou kau mo tatou ki te fakapapau ʼi te logo tahi mo Kilisito Sesu, ʼaki te logo lelei.” (Efeso 3:​5, 6, MN ) Ko te mahino ki te faʼahi ʼaia ʼo te meʼa fakalilo taputapu neʼe foaki ki te “kau ʼapositolo maʼoniʼoni.” ʼO toe feiā ia ʼaho nei, kapau ʼe mole tokoni mai te laumālie maʼoniʼoni, pea ʼe mole feala ke tou mahino ki te ʼu “mea loloto [ʼaia] o te Atua.”​—1 Kolonito 2:10; 4:1; Kolose 1:​26, 27.

15, 16. He koʼe neʼe filifili e Sehova he ʼu hahaʼi mai te kele ke nātou kaugā hau mo Kilisito?

15 Ko “te toko teau fagofulu-ma-fa afe” ʼaē ʼe nātou tutuʼu mo “te Akeno” ʼi te Moʼuga ʼo Sione ʼi selo, neʼe “[“totogi,” MN ] mai te kele,” neʼe “[“totogi,” MN ] natou mai te hahai, e ko te u uluaki fua ki te Atua mo te Akeno,” ia Sesu Kilisito. (Apokalipesi 14:​1-4) Neʼe filifili e Sehova te ʼuluaki ʼo tona ʼu foha ʼaē ʼi selo ke liliu ko te koga tāfito ʼo te hāko ʼaē neʼe fakapapauʼi ʼi Eteni, kae he koʼe neʼe ina filifili te tahi ʼu hahaʼi mai te kele ke nātou kaugā gāue mo Kilisito? ʼE fakamahino e te ʼapositolo ko Paulo, ko nātou ʼaia neʼe “pāui ʼo mulimuli ki tona finegalo [ʼa Sehova],” “ ʼo mulimuli ki te faʼahi ʼaē ʼe loto kiai tona finegalo.”​—Loma 8:​17, 28-30, MN; Efeso 1:​5, 11, MN; 2 Timoteo 1:⁠9.

16 Ko te fakatuʼutuʼu ʼa Sehova ke tāpuhā tona huafa lahi pea mo maʼoniʼoni, pea mo fakatonuhia tana pule ki te ʼatulaulau. ʼAki tana fakatuʼutuʼu fakapotopoto ia tana ʼu gāue, neʼe fekauʼi e Sehova tona ʼAlo ʼulu tokotahi ki te kele, ʼaē neʼe ʼahiʼahiʼi ʼo aʼu ki tana mate. Tahi ʼaē meʼa, ʼo ʼuhiga mo te Puleʼaga faka Mesianike ʼo tona ʼAlo, neʼe fakatuʼutuʼu e Sehova ke kau kiai he ʼu hahaʼi neʼe nātou lagolago mo nātou ki Tana pule ʼo aʼu ki tanatou mamate.​—Efeso 1:​8-12; Apokalipesi 2:​10, 11.

17. He koʼe ʼe feala ke tou fiafia ʼi tatatou ʼiloʼi ʼaē ko Kilisito mo tona ʼu kaugā hau, neʼe nātou māʼuʼuli ʼi te tahi temi ʼi te kele?

17 Neʼe fakahā e Sehova tona ʼofa lahi ki te hōloga ʼo Atama, ʼi tana fekauʼi mai tona ʼAlo ki te kele pea mo tana filifili ʼi te malamanei ia nātou ʼaē ka kaugā hau mo tona ʼAlo ʼi te Puleʼaga. Neʼe fua lelei feafeaʼi te fakatuʼutuʼu ʼaia kiā nātou ʼaē neʼe nonofo agatonu kiā Sehova, mai ia Apele ʼo aʼu ki te temi nei? Ko te hahaʼi ʼe nātou popūla ki te agahala pea mo te mate, koia ʼe ʼaoga ai kiā nātou he fakamālōlō ʼi te faʼahi fakalaumālie pea mo te faʼahi fakasino, pea mo foaki kiā nātou ia te maʼuli haohaoa, ohage ko te fakatuʼutuʼu ʼaē neʼe fai e Sehova maʼa te malamanei ʼi te kamata. (Loma 5:12) ʼE ko he fakaloto fīmālie kiā nātou fuli ʼaē ʼe nātou ʼamanaki ki te maʼuli heʼegata ʼi te kele, hanatou ʼiloʼi ʼe fakahā anai e tonatou Hau te ʼofa pea mo te lotomahino, ohage pe ko tana fakahā ki tana kau tisipulo lolotoga tana minisitelio ʼi te kele! (Mateo 11:​28, 29; Hepeleo 2:​17, 18; 4:15; 7:​25, 26) Pea ʼe nātou toe loto fīmālie ʼi tanatou ʼiloʼi ko te ʼu kaugā hau pea mo kaugā pelepitelo ʼa Kilisito ʼi selo, neʼe ko he ʼu tagata pea mo he ʼu fafine tui, neʼe nātou tau mo ni ʼu vaivaiʼaga pea mo he ʼu fihifihia ʼi tonatou maʼuli, ohage pe ko tatou!​—Loma 7:​21-25.

ʼE Hoko Moʼoni Anai Te Fakatuʼutuʼu ʼa Sehova

18, 19. He koʼe kua tou mahino lelei ki te ʼu palalau ʼa Paulo iā Efeso 1:​8-11, pea koteā ʼaē ka tou vakaʼi anai ʼi te alatike ʼaē ka hoa mai?

18 Kua tou mahino lelei leva ʼi te temi nei ki te faka ʼuhiga ʼo te ʼu palalau ʼa Paulo ki te kau Kilisitiano fakanofo, ʼaē ʼe tou maʼu iā Efeso 1:​8-11, MN. Neʼe ina ʼui ko Sehova neʼe ina fakahā kiā nātou “te meʼa fakalilo taputapu ʼo tona finegalo,” mo “hinoʼi nātou ko he ʼu maʼu tofiʼa” mo Kilisito, pea “neʼe filifili fakatomuʼa nātou ʼo mulimuli ki tana fakatuʼutuʼu ʼaē ʼe ina fai ia meʼa fuli ʼo mulimuli ki te fakatuʼutuʼu ʼo tona finegalo.” ʼE tou sio ai ko te faʼahi ʼaia ʼe ʼalutahi mo te ʼu gāue ʼaē ʼe fai e Sehova moʼo fakahoko tana fakatuʼutuʼu. ʼAki ia te faʼahi ʼaia, ʼe tou mahino ai pe koʼe ʼe ko te kau Kilisitiano tokosiʼi ʼaē ʼe nātou ʼinu te vino pea mo kai te pane ʼi te Taumafa ʼo te ʼAliki.

19 ʼI te alatike ʼaē ka hoa mai, ʼe tou vakaʼi anai te faka ʼuhiga ʼo te Fakamanatu ʼo te mate ʼa Kilisito maʼa te kau Kilisitiano ʼaē ko tanatou ʼamanaki ko te ʼolo ki selo. ʼE tou toe ako anai pe koʼe ʼe tonu ki te ʼu lauʼi miliona hahaʼi ʼaē ko tanatou ʼamanaki ko te māʼuʼuli ʼi te kele, ke nātou fia ʼiloʼi te faka ʼuhiga ʼo te ʼAho ʼo te Fakamanatu.

[Kiʼi nota]

a Ko te huafa ʼo te ʼAtua ko tona faka ʼuhiga “ ʼE Ina Fakahoko.” Ko Sehova ʼe feala ke liliu ko meʼa fuape ʼaē ʼe ʼaoga moʼo fakahoko ʼo tana fakatuʼutuʼu.​—Ekesote 3:​14, nota ʼi te lalo pasina.

b ʼE hā ʼi te ʼu palalau ʼa Paulo, ko te ‘gāue ʼaē ʼe takitaki’ neʼe kua kamata ia ʼi tona temi, kae ʼe fakahā ʼi te Tohi-Tapu ko te Puleʼaga Faka Mesianike neʼe hoki fakatuʼu pe ia ʼi te taʼu 1914.

c Kapau ʼe koutou fia maʼu he tahi ʼu manatu ʼo ʼuhiga mo te ʼu fuakava ʼaia ʼaē neʼe fai moʼo fakahoko te fakatuʼutuʼu ʼa te ʼAtua, koutou vakaʼi Te Tule Leʼo Fakafalani ʼo te ʼaho 1 ʼo Fepualio 1989, ʼi te pasina 10 ki te 15.

Moʼo Fakamanatu

• He koʼe neʼe fakatupu e Sehova ia te kele pea mo ina tuku kiai te tagata?

• He koʼe neʼe tonu ke ʼahiʼahiʼi te ʼAlo ʼulu tokotahi ʼa Sehova ʼi te kele?

• He koʼe neʼe filifili e Sehova he ʼu hahaʼi mai te kele ke nātou kaugā hau mo Kilisito?

    Te ʼu Tohi Fakaʼuvea (1978-2025)
    Mavae
    Hu Ki Loto
    • Faka'uvea
    • Vaevae
    • Préférences
    • Copyright © 2025 Watch Tower Bible and Tract Society of Pennsylvania
    • Conditions d’utilisation
    • Règles de confidentialité
    • Paramètres de confidentialité
    • JW.ORG
    • Hu Ki Loto
    Vaevae