ʼE Kotou Maʼu Koa Ia Te Manatu ʼa Sehova ʼo ʼUhiga Mo Te ʼu Meʼa Taputapu?

“Tou tōkakaga . . . ke ʼaua naʼa ʼi ai he tahi ʼe fai folonikasio peʼe ko he tahi ʼe mole fakaʼapaʼapa ki te ʼu meʼa taputapu.”​—Hepeleo 12:​15, 16, MN.

1. Ko te aga fea ʼi te temi nei ʼe mole maʼu e te ʼu kaugana ʼa Sehova?

KO TE hahaʼi ʼo te mālamanei ʼe mole kei natou faka maʼuhigaʼi ia te ʼu meʼa taputapu. Ko te tagata Falani ʼe ina sivi te nātulā ʼo te tagata ko Edgar Morin neʼe ina ʼui fēnei: “ ʼE mole kei maʼuhiga ki te hahaʼi ia te fakatafitoʼaga ʼo te ʼu aga ʼaē ʼe tonu ke fai ʼo ʼuhiga mo te ʼAtua, mo te ʼu meʼa ʼaē neʼe ina faʼu, mo te fenua, mo te hisitolia, mo te tupuʼaga. . . . ʼE filifili totonu pē e te hahaʼi ia te ʼu aga ʼaē ke natou fai.” ʼE hā ʼaki mai ai ia “te laumalie o te malama-nei,” peʼe ko “te laumalie ae e lolotoga gaue i te u fanau o te talagataa.” (1 Kolonito 2:12; Efeso 2:2) ʼE mole maʼu ia te manatu pauʼu ʼaia ʼo ʼuhiga mo te ʼu meʼa taputapu e te hahaʼi ʼaē kua tauhi kiā Sehova pea mo lotolelei ke natou fakalogo ki tana pule faitotonu. (Loma 12:​1, 2) ʼE mahino ki te ʼu kaugana ʼa te ʼAtua te maʼuhiga ʼaē ʼo te taputapu, peʼe ko te māʼoniʼoni ʼo tanatou tauhi ʼaē kiā Sehova. Ko te ʼu meʼa fea ʼaē ʼe tonu ke taputapu ʼi totatou maʼuli? ʼE tou vakaʼi anai ʼi te alatike ʼaenī ia faʼahi e nima ʼe māʼoniʼoni maʼa te ʼu kaugana fuli ʼa te ʼAtua. Ko te alatike ʼaē kā hoa mai, ʼe talanoa ai anai ki te taputapu ʼo tatatou ʼu fono faka Kilisitiano. Kae koteā te faka ʼuhiga moʼoni ʼo te kupu “māʼoniʼoni”?

2, 3. (a) ʼE faka maʼuhigaʼi feafeaʼi ʼi te Tohi-Tapu ia te māʼoniʼoni ʼo Sehova? (b) ʼE tou fakahā feafeaʼi ia te māʼoniʼoni ʼo te huafa ʼo Sehova?

² ʼI te lea faka Hepeleo ʼo te Tohi-Tapu, ʼe faka ʼuhiga te kupu “māʼoniʼoni” ki te meʼa ʼe tuku keheʼi. ʼO ʼuhiga mo te tauhi, ʼe faka ʼuhiga te kupu “māʼoniʼoni” ki te meʼa ʼe tuku keheʼi mai te ʼu meʼa māhani, peʼe faka ʼuhiga ki he meʼa ʼe taputapu. Ko Sehova ʼe māʼoniʼoni. ʼE fakahigoaʼi ia ia ko “te Māʼoniʼoni ʼAupitō.” (Tāʼaga Lea 9:10; 30:3) ʼI te temi ʼo te kau Iselaele ʼo te temi muʼa, neʼe haʼi e te pelepitelo lahi ki te kie ʼaē neʼe haʼi ʼaki tona ʼulu ia te pale ʼaulo neʼe tohi ai “Ko Te Māʼoniʼoni ʼe ʼa Sehova.” (Ekesote 28:​36, 37) Ko te kau kelupimi pea mo te kau selafimi ʼaē neʼe tutuʼu ʼi te hekaʼaga hau ʼo Sehova, ʼe ʼui ʼi te Tohi-Tapu ʼe natou kalaga fēnei: “Māʼoniʼoni, māʼoniʼoni, māʼoniʼoni ia Sehova.” (Isaia 6:​2, 3; Apokalipesi 4:​6-8) Ko tona lau liuliuga ʼaia, ʼe fakahā ai ko Sehova ʼe māʼoniʼoni, mo maʼa pea mo taputapu. Pea ko ia te Matapuna ʼo te meʼa māʼoniʼoni fuli.

³ Ko te huafa ʼo Sehova ʼe taputapu, peʼe māʼoniʼoni. Neʼe ʼui fēnei e te tagata fai pesalemo: “Ke natou fakavikiviki ki tou huafa. Lahi pea mo manavahe, ko ia ʼaenī ʼe māʼoniʼoni.” (Pesalemo 99:3) Neʼe akoʼi tātou e Sesu ke tou faikole fēnei: “Ko tamatou Tamai ʼe ʼi selō, ke tāpuhā tou huafa [peʼe “ke taputapu; ke māʼoniʼoni,” kiʼi nota]!” (Mateo 6:​9, MN ) Ko Malia te faʼē fakakelekele ʼa Sesu, neʼe ina ʼui fēnei: “ ʼE fakavikiviki e toku nefesi ia Sehova, . . . neʼe fai e te Māfimāfi te ʼu meʼa lalahi kiā te au, pea ko tona huafa ʼe māʼoniʼoni.” (Luka 1:​46, 49, MN ) ʼI totatou ʼuhiga kaugana ʼa Sehova, ʼe tou fakaʼaogaʼi tona huafa ohage ko he meʼa ʼe māʼoniʼoni pea ʼe mole tou fai he meʼa ʼe ina moamoagaʼi anai te huafa māʼoniʼoni ʼaia. Pea tahi, ʼe tou maʼu ia te manatu ʼa Sehova ʼo ʼuhiga mo te meʼa ʼaē ʼe taputapu, heʼe taputapu kiā tātou ia te ʼu meʼa ʼaē ʼe taputapu kiā te ia.​—Amosi 5:​14, 15.

Te ʼu Tupuʼaga ʼo Tatatou Fakaʼapaʼapa Lahi Kiā Sesu

4. He koʼe ʼe ʼui ʼi te Tohi-Tapu ko Sesu ʼe ko “te Māʼoniʼoni”?

⁴ Ko Sesu neʼe tupu māʼoniʼoni he neʼe ko te “Alo ulutokotahi” ʼo te ʼAtua māʼoniʼoni ko Sehova. (Soane 1:14; Kolose 1:15; Hepeleo 1:​1-3) Koia lā ʼaē ʼe fakahigoaʼi ai ia ia ko “te Māʼoniʼoni ʼa te ʼAtua.” (Soane 6:​69, MN ) Neʼe nofo pē Sesu mo tona māʼoniʼoni ʼi tana hifo mai te lagi ʼo tupu tagata ʼi te kele, he neʼe ʼaofi ia te falega fānau ʼo Malia e te malumaluga ʼo te laumālie māʼoniʼoni. Neʼe ʼui fēnei e he ʼāselo kiā Malia: “ ʼE hifo anai te laumālie māʼoniʼoni kiā te koe . . . ko te tamasiʼi ʼaē kā tupu ʼe ʼui anai ʼe māʼoniʼoni, ʼAlo ʼo te ʼAtua.” (Luka 1:​35, MN ) Ko te kau Kilisitiano ʼo Selusalemi, neʼe tuʼa lua tanatou ʼui ʼi tanatou faikole ʼo ʼuhiga mo te ʼAlo ʼo te ʼAtua ʼe ko “[tana] kaugana māʼoniʼoni ko Sesu.”​—Gaue 4:​27, 30, MN.

5. Koteā te gāue taputapu neʼe fai e Sesu ʼi tana nofo ʼi te kele, pea he koʼe ʼe maʼuhiga tona taʼataʼa?

⁵ ʼI te nofo ʼaē ʼa Sesu ʼi te kele, neʼe ʼi ai te gāue taputapu neʼe tonu ke ina fai. ʼI tona papitemaʼi ʼi te taʼu 29 ʼo totatou temi, neʼe fakanofo ia Sesu ko te Pelepitelo Lahi ʼo te fale lotu lahi fakalaumālie ʼa Sehova. (Luka 3:​21, 22; Hepeleo 7:26; 8:​1, 2) Neʼe tonu ke toe mate faka sākilifisio. ʼE liliu anai tona taʼataʼa ʼaē neʼe liligi, ʼe ko he totogi moʼo hāofaki ia te hahaʼi agahala. (Mateo 20:28; Hepeleo 9:14) Koia ʼe taputapu kiā tātou ia te taʼataʼa ʼo Sesu, pea mo “mauhiga.”​—1 Petelo 1:19.

6. ʼE feafeaʼi tatatou aga kiā Kilisito Sesu, pea koteā tona tupuʼaga?

⁶ ʼI tana fia fakahā ʼe tou fakaʼapaʼapa lahi ki totatou Hau pea mo Pelepitelo Lahi ko Kilisito Sesu, neʼe tohi fēnei e te ʼapositolo ko Paulo: “[Neʼe] hikihiki e te ʼAtua [tona ʼAlo] ki he tuʼulaga māʼoluga pea mo ina tali fakalelei ke ina foaki age kiā te ia te higoa ʼaē ʼe māʼoluga age ʼi te ʼu higoa fuli pē, koteʼuhi ke tuʼutuli fuli pē ki te higoa ʼo Sesu ia nātou ʼe ʼi te lagi, pea mo nātou ʼe ʼi te kele, pea mo nātou ʼe ʼi te lalo kele, pea ke fakahā e te ʼalelo fuli pē ko Sesu Kilisito ʼe ʼAliki ki te kolōlia ʼo te ʼAtua te Tamai.” (Filipe 2:​9-11, MN ) ʼAki tatatou fakalogo fakafiafia ki totatou Takitaki pea mo Hau ko Kilisito Sesu, ia te Pule ʼo te kokelekasio faka Kilisitiano, ʼe tou fakahā ai ʼe tou maʼu ia te manatu ʼa Sehova ʼo ʼuhiga mo te ʼu meʼa taputapu.​—Mateo 23:10; Kolose 1:18.

7. ʼE tou fakahā feafeaʼi tatatou fakalogo ʼaē kiā Kilisito?

⁷ ʼE tou toe fakahā tatatou fakalogo ʼaē kiā Kilisito ʼaki tatatou fakaʼapaʼapa kiā nātou ʼaē ʼe fakaʼaogaʼi moʼo takitaki ia te gāue, heʼe ko ia totonu ʼi te temi nei ʼe ina lolotoga takitaki. ʼE tonu ke tou fakamoʼoni ʼe ko he maʼua taputapu te tuʼulaga ʼo te kau Kilisitiano fakanofo ʼaē ʼe natou faʼufaʼu te Kolesi Pule pea mo te kau taupau ʼaē neʼe natou fakanofo ke natou gāue ʼi te ʼu filiale, ʼi te ʼu tisitilike, ʼi te ʼu silikō, pea mo te ʼu kokelekasio. Koia, ko te fakatuʼutuʼu ʼaia ʼe ina fakamaʼua kiā tātou he fakaʼapaʼapa lahi pea mo he fakalogo.​—Hepeleo 13:​7, 17.

Ko He Hahaʼi Māʼoniʼoni

8, 9. (a) Neʼe liliu feafeaʼi ia te kau Iselaele ko he hahaʼi māʼoniʼoni? (b) Neʼe fakahā lelei feafeaʼi e Sehova ki te kau Iselaele ia te maʼuhiga ʼo te taputapu?

⁸ Neʼe fai e Sehova ia te fuakava mo Iselaele. Pea ʼaki te fuakava ʼaia neʼe maʼu e te puleʼaga foʼou ʼaia he tuʼulaga makehe. Neʼe faka tāpuhā nātou, pe neʼe tuku keheʼi nātou. Neʼe ʼui age e Sehova kiā nātou: “ ʼE tonu ke kotou fakahā ʼe kotou māʼoniʼoni, koteʼuhi ko au ia Sehova tokotou ʼAtua ʼe au māʼoniʼoni; pea e au fakatuʼutuʼu ke au vaheʼi keheʼi koutou mai te ʼatu hahaʼi ke kotou liliu ko hāʼaku.”​—Levitike 19:2; 20:26.

⁹ ʼI te kamata fakatuʼu ʼo te puleʼaga ʼo Iselaele, neʼe fakahā lelei e Sehova ki te kau Iselaele ia te maʼuhiga ʼaē ke natou taputapu. Māʼiape lā mo te moʼuga ʼaē neʼe natou maʼu ai te ʼu Folafola e Hogofulu, neʼe tonu ke mole natou fāfā kiai, naʼa natou mamate. Koia, ʼi te lakaga ʼaia neʼe faka ʼuhigaʼi ai te Moʼuga ʼo Sinai ʼe taputapu. (Ekesote 19:​12, 23) Neʼe toe faka ʼuhigaʼi foki neʼe taputapu ia te kau pelepitelo, mo te tapenakulo, pea mo tona ʼu naunau. (Ekesote 30:​26-30) ʼE feafeaʼi te ʼu fakatuʼutuʼu ʼi te loto kokelekasio faka Kilisitiano?

10, 11. He koʼe ʼe tou lava ʼui ʼe taputapu ia te kokelekasio ʼa te kau Kilisitiano fakanofo, pea ʼe malave feafeaʼi te faʼahi ʼaia ki te “tahi ʼu ōvi”?

¹⁰ Kiā mata ʼo Sehova ʼe taputapu ia te kokelekasio faka Kilisitiano ʼa te kau fakanofo. (1 Kolonito 1:2) Koia ʼe fakatatau ki he fale lotu māʼoniʼoni ia te kūtuga kātoa ʼo te kau Kilisitiano fakanofo ʼaē ʼi te kele, logolā ʼe mole natou faʼufaʼu te fale lotu lahi fakalaumālie ʼa Sehova. Ko Sehova ʼaki tona laumālie māʼoniʼoni ʼe ʼafio ʼi te fale lotu ʼaia. Neʼe tohi fēnei e te ʼapositolo ko Paulo: “Ia te ia [Kilisito Sesu] e fakapipiki ai te fale fuape pea e malaga ake ia o liliu ko he faletapu [“māʼoniʼoni,” MN ] i te Aliki. Pea ia te ia e lagai fakatahi ake koutou, o koutou liliu ko he nofoʼaga o te Atua i te Laumalie.”​—Efeso 2:​21, 22; 1 Petelo 2:​5, 9.

¹¹ Neʼe toe faitohi ia Paulo ki te kau Kilisitiano fakanofo, ʼo ina ʼui fēnei: “ ʼE mole koa lā kotou ʼiloʼi ko koutou te fale lotu ʼo te ʼAtua, pea ʼe nofo te laumālie ʼo te ʼAtua iā koutou? . . . ʼE māʼoniʼoni te fale lotu ʼo te ʼAtua, pea ko te fale lotu ʼaia, ʼe ko koutou.” (1 Kolonito 3:​16, 17, MN ) ʼAki tona laumālie, ʼe ‘ ʼafio’ Sehova ʼi te lotolotoiga ʼo te kau fakanofo pea mo ‘haʼele ʼi te lotomālie ʼo nātou.’ (2 Kolonito 6:16) ʼE ina taki tuʼumaʼu tana “kaugana” agatonu. (Mateo 24:​45-47) Ko te “tahi ʼu ōvi” ʼe natou leleiʼia ʼaupitō tonatou pilivilesio ʼaē ke natou fakatahi mo te kalasi ʼo te “fale lotu.”​—Soane 10:​16, MN; Mateo 25:​37-40.

Te ʼu Meʼa Taputapu ʼi Totatou Maʼuli Faka Kilisitiano

12. Koteā te ʼu meʼa ʼaē ʼe taputapu ʼi totatou maʼuli, pea koteā tona tupuʼaga?

¹² Koia ʼe mole tou punamaʼuli ai ki te lahi ʼo te ʼu faʼahi ʼe taputapu ʼi te maʼuli ʼo te kau Kilisitiano fakanofo ʼo te kokelekasio pea mo tonatou ʼu kaumeʼa. Ko tatatou ʼu felogoi ʼaē mo Sehova ʼe taputapu. (1 Fakamatala 28:9; Pesalemo 36:7) ʼI te maʼuhiga fau ʼo tatatou ʼu felogoi mo totatou ʼAtua ko Sehova, ʼe mole tou tuku anai he meʼa peʼe ko he tahi ke ina veteki te faʼahi ʼaia. (2 Fakamatala 15:2; Sakopo 4:​7, 8) ʼE kau ia te faikole ki takita taupau he felogoi lelei mo Sehova. Neʼe taputapu ʼaupitō ki te polofeta ko Taniela ia te faikole, logolā neʼe feala pē ke mate kae neʼe agatonu aipe ʼo taupau tana agamāhani ʼaē ko te faikole kiā Sehova. (Taniela 6:​7-11) Ko “te ʼu faikole ʼa te kau māʼoniʼoni,” peʼe ko te kau Kilisitiano fakanofo, ʼe fakatatau ki te ʼīsēsō ʼaē ʼe fakaʼaogaʼi ʼi te fale lotu. (Apokalipesi 5:8; 8:​3, 4, MN; Levitike 16:​12, 13) Ko te lea fakatātā ʼaia ʼe ina fakahā te maʼuhiga ʼo te taputapu ʼo te faikole. ʼI pilivilesio hata lava felogoi mo te Pule ʼo te ʼatulaulau! Koia ʼaē, ko te faikole ʼe ko he meʼa taputapu ʼi totatou maʼuli!

13. Ko te mālohi fea ʼaē ʼe māʼoniʼoni, pea ʼe feafeaʼi hatatou faka fealagia ke gāue ʼi totatou maʼuli?

¹³ ʼE ʼi ai te mālohi ʼe maʼu ʼi te maʼuli ʼo te kau Kilisitiano fakanofo pea mo tonatou ʼu kaumeʼa ʼe taputapu kiā nātou​—ko te laumālie māʼoniʼoni. Ko te laumālie ʼaia ʼe ko te mālohi gāue ʼo Sehova, pea mai te ʼaluʼaga ʼaē ʼe gāue tuʼumaʼu ki te fakahoko ʼo te finegalo ʼo te ʼAtua māʼoniʼoni, koia ʼe tuha ke higoaʼi ko te “laumālie māʼoniʼoni,” peʼe ko “te laumālie ʼo te māʼoniʼoni.” (Soane 14:​26, MN; Loma 1:​4, MN ) Ko Sehova ʼaki tona laumālie māʼoniʼoni ʼe ina foaki ia te mālohi ki tana ʼu kaugana moʼo faka mafola ia te logo lelei. (Gaue 1:8; 4:31) ʼE foaki e Sehova tona laumālie kiā “nātou ʼaē ʼe fakalogo kiā te ia ohage ko honatou pule,” kiā nātou ʼaē ʼe natou “haga haʼele ʼaki te laumālie,” kae mole natou haʼele ʼaki te ʼu holi ʼo te kakano. (Gaue 5:​32, MN; Kalate 5:​16, 25, MN; Loma 8:​5-8) Ko te mālohi ʼaia ʼe ina lava fakatupu ʼi te maʼuli ʼo te kau Kilisitiano ia “te fua o te Laumalie”​—te ʼu kalitātē​—pea mo te “aga fakamāʼoniʼoni pea mo te ʼu gāue ʼaē ʼe fakaʼiloga ʼaki te pipiki ki te ʼAtua.” (Kalate 5:​22, 23; 2 Petelo 3:​11, MN ) Kapau kiā tātou ʼe taputapu ia te laumālie māʼoniʼoni, pea ʼe tou tōkakaga anai naʼa tou fai he meʼa ʼe feala ai hatatou fakamamahiʼi te laumālie ʼaia, peʼe mo fakafeagai ki tana gāue ʼaē ʼe ina fai ʼi totatou maʼuli.​—Efeso 4:30.

14. Ko te pilivilesio fea ʼaē ʼe taputapu ki te kau fakanofo, pea ʼe feafeaʼi te lagolago ʼa te tahi ʼu ōvi ki te pilivilesio ʼaia?

¹⁴ Ko te pilivilesio ʼaē ʼe tou maʼu ʼi tatatou fua te huafa ʼo te ʼAtua māʼoniʼoni ko Sehova, pea mo liliu ko tana ʼu Fakamoʼoni, ʼe ko he meʼa ia ʼe taputapu. (Isaia 43:​10-12, 15) Neʼe fakanofo e Sehova ia te kau Kilisitiano ke natou “liliu ko te ʼu minisi ʼo he fuakava foʼou.” (2 Kolonito 3:​5, 6, MN ) Koia, ʼi tonatou ʼuhiga minisi, neʼe fakatotonu age ke natou faka mafola ia “te logo lelei ʼaenī ʼo te puleʼaga” pea mo natou “fai ni ʼu tisipulo ʼi te hahaʼi ʼo te ʼu fenua fuli pē.” (Mateo 24:​14, MN; 28:​19, 20, MN ) ʼE natou agatonu ʼo fakahoko ia te fakatotonu ʼaia, pea ko te ʼu toko miliona hahaʼi ʼe natou tali lelei kiai, ohage pē ʼe natou ʼui fēnei ki te kau fakanofo: “ ʼE matou ʼolo anai mo koutou, koteʼuhi neʼe matou logo ko te ʼAtua ʼe nofo mo koutou.” (Sakalia 8:23) Ko te hahaʼi agavaivai ʼaia ʼe natou tauhi fakafiafia pea ʼe hage pē ʼe faka ʼuhiga fakatātā ia nātou ko he “hahaʼi gāue kele” pea mo he “hahaʼi to fuʼu vite” maʼa te “kau minisi [fakanofo] ʼo totatou ʼAtua.” ʼI tanatou lagolago ʼaia, ʼe tokoni ʼaupitō ia te tahi ʼu ōvi ki te kau Kilisitiano fakanofo ki te fakahoko ʼo tanatou minisitelio ʼi te mālamanei kātoa.​—Isaia 61:​5, 6.

15. Ko te gāue fea ʼaē neʼe taputapu ki te ʼapositolo ko Paulo, pea he koʼe ʼe tou maʼu mo tātou ia te manatu ʼaia?

¹⁵ Ohage foki lā, ko te ʼapositolo ko Paulo neʼe taputapu peʼe māʼoniʼoni kiā ia tana minisitelio ki te kaugamālie. Neʼe ina fakatatau ia ia ki “[he] tagata kaugana ʼa Kilisito Sesu ki te ʼu puleʼaga, [ʼi tana] kau ki te gāue māʼoniʼoni ʼo te logo lelei ʼa te ʼAtua.” (Loma 15:​16, MN ) ʼI tana faitohi ki te kau Kilisitiano ʼo Kolonito, neʼe fakatatau e Paulo tana minisitelio ki he “koloa.” (2 Kolonito 4:​1, 7, MN ) ʼAki te fakahoko ʼo tatatou minisitelio ki te hahaʼi, ʼe tou fakahā “te ʼu folafola taputapu ʼa te ʼAtua.” (1 Petelo 4:​11, MN ) Koia, peʼe tou kau ʼi te kau fakanofo peʼe ko te tahi ʼu ōvi, kae ʼe ko he pilivilesio taputapu kiā tātou tata kau ki te gāue fai faka mafola.

‘Tou Fakaʼosi Te Māʼoniʼoni ʼAki Te Manavasiʼi Ki Te ʼAtua’

16. Koteā ʼaē kā tokoni mai anai ke tou tekeʼi naʼa tou liliu ko ni hahaʼi ʼe “mole fakaʼapaʼapa ki te ʼu meʼa taputapu”?

¹⁶ Neʼe fakatokagaʼi e te ʼapositolo ko Paulo ki tona ʼu kaugā gāue Kilisitiano ke natou tōkakaga naʼa natou liliu ko ni hahaʼi ʼe “mole fakaʼapaʼapa ki te ʼu meʼa taputapu.” Kae neʼe ina tokoniʼi nātou ke natou ‘haga māʼoniʼoni,’ ʼo “tōkakaga . . . ke ʼaua naʼa ʼi ai he aka kona pea mo fakatupu kovi, ʼo feala ai ke heʼemaʼa ai ia he tokolahi.” (Hepeleo 12:​14-16, MN ) Ko te kupusiga palalau “aka kona” ʼe faka ʼuhiga ki te tokosiʼi ʼaē ʼi te kokelekasio, ʼe lagi natou muhumuhu ki te faʼahiga fai ʼaē ʼo te ʼu gāue ʼi te kokelekasio. Ohage lā, lagi mole natou lagolago ki te ʼu manatu ʼa Sehova ʼo ʼuhiga mo te taputapu ʼo te ʼohoana peʼe ko te maʼuhiga ʼaē ke maʼu te agamaʼa. (1 Tesalonika 4:​3-7; Hepeleo 13:4) Peʼe lagi natou lagolago ki te ʼu akonaki faka ʼaposita, “te ʼu akonaki noa ʼaē ʼe natou ʼulihi te meʼa ʼaē ʼe māʼoniʼoni,” ʼe talanoa kiai ia nātou ʼaē “neʼe . . . mavae ʼi te moʼoni.”​—2 Timoteo 2:​16-18, MN.

17. He koʼe ʼe fakamaʼua ki te kau fakanofo ke natou fakahā tuʼumaʼu ia tanatou maʼu ia te manatu ʼa Sehova ʼo ʼuhiga mo te māʼoniʼoni?

¹⁷ Ki tona ʼu tehina fakanofo, neʼe tohi fēnei e Paulo: “Kāiga ʼofaina, tou fakamaʼa ia tātou mai te meʼa ʼuli fuli pē ʼo te kakano pea mo te laumālie, ʼo fakaʼosi te māʼoniʼoni ʼi te manavasiʼi ki te ʼAtua.” (2 Kolonito 7:​1, MN ) ʼE hā ʼi te palalau ʼaia, ko te kau Kilisitiano fakanofo ʼaē ʼe natou “kau ki [te] paui mai selo,” ʼe tonu ke natou faiga tuʼumaʼu ʼo fakahā ʼe natou maʼu ia te manatu ʼa Sehova ʼo ʼuhiga mo te māʼoniʼoni ʼi te ʼu faʼahi fuli ʼo tonatou maʼuli. (Hepeleo 3:1) ʼO toe feiā mo te ʼapositolo ko Petelo neʼe ina fakaloto mālohiʼi fēnei tona ʼu tehina fakanofo: “Ohage ko he ʼu fānau talagafua, ke ʼaua naʼa kotou toe maʼuli ʼo ʼalutahi mo te ʼu holi ʼaē neʼe kotou maʼu ʼi te temi muʼa, ʼi te temi ʼaē neʼe kei kotou nonofo ai ʼi te fakapōʼuli, kae ʼo ʼalutahi mo te Māʼoniʼoni ʼaē neʼe ina pāuiʼi koutou, mo koutou foki ke kotou liliu ʼo māʼoniʼoni ʼi takotou aga kātoa.”​—1 Petelo 1:​14, 15, MN.

18, 19. (a) ʼE fakahā feafeaʼi e te “toe hahaʼi tokolahi” tanatou maʼu ia te manatu ʼa Sehova ʼo ʼuhiga mo te ʼu meʼa taputapu? (b) Koteā te tahi age meʼa taputapu ʼi totatou maʼuli faka Kilisitiano ʼe tou vakaʼi anai ʼi te alatike kā hoa mai?

¹⁸ ʼE feafeaʼi ki te “toe hahaʼi tokolahi” ʼaē kā māʼuʼuli anai ʼi “te mamahi lahi”? ʼE tonu foki mo nātou ke natou maʼu ia te manatu ʼa Sehova ʼo ʼuhiga mo te ʼu meʼa taputapu. ʼI te tohi ʼo Apokalipesi, ʼe talanoa kiā nātou ʼaē ʼe natou foaki kiā Sehova he ‘tauhi taputapu’ ʼi te malaʼe ʼo tona fale lotu fakalaumālie ʼaē ʼe tuʼu ʼi te kele. ʼE natou tui ki te sākilifisio faitotogi ʼa Kilisito, pea ʼe ʼui kua natou “fō tonatou ʼu kofu pea mo fakahihina ʼi te taʼataʼa ʼo te akeno.” (Apokalipesi 7:​9, 14, 15, MN ) Kua hage ʼe natou maʼa iā muʼa ʼo Sehova pea ʼe fakamaʼua kiā nātou ke natou “fakamaʼa ia [nātou] mai te meʼa ʼuli fuli pē ʼo te kakano pea mo te laumālie, ʼo fakaʼosi te māʼoniʼoni ʼi te manavasiʼi ki te ʼAtua.”

¹⁹ Ko te koga maʼuhiga ʼi te maʼuli ʼo te kau Kilisitiano fakanofo pea mo tonatou ʼu kaumeʼa, ʼe ko tanatou kau tuʼumaʼu ki te ʼu fono ʼo tauhi kiā Sehova pea mo natou ako tana Folafola. ʼE taputapu kiā Sehova te ʼu fakatahitahi ʼa tana hahaʼi. ʼE tou vakaʼi anai ʼi te alatike kā hoa mai, peʼe feafeaʼi pea he koʼe ʼe tonu ke tou maʼu ia te manatu ʼa Sehova ʼo ʼuhiga mo te ʼu meʼa taputapu ʼi te koga maʼuhiga ʼaia.

Moʼo Fakamanatu

• Ko te manatu fea ʼo te mālamanei ʼe mole maʼu e te ʼu kaugana ʼa Sehova?

• He koʼe ko Sehova ia te Matapuna ʼo te ʼu meʼa fuli ʼe māʼoniʼoni?

• ʼE feafeaʼi hatatou fakahā ʼe tou fakaʼapaʼapa ki te māʼoniʼoni ʼo Kilisito?

• Ko te ʼu meʼa fea ʼi totatou maʼuli ʼe tonu ke taputapu kiā tātou?

[Paki ʼo te pasina 23]

Ko te kau Iselaele ʼo te temi muʼa, neʼe taputapu kiā nātou te kau pelepitelo, mo te tapenakulo, pea mo tona ʼu naunau

[Paki ʼo te pasina 24]

ʼE faʼufaʼu e te kau Kilisitiano fakanofo ʼaē ʼi te kele ia he fale lotu māʼoniʼoni

[Paki ʼo te pasina 25]

Ko te faikole pea mo tatatou minisitelio ki te hahaʼi ʼe ko he ʼu pilivilesio taputapu