Tou Faka Maʼuhigaʼi Tatatou ʼu Fono Taputapu
“ ʼE au toe ʼaumai anai foki mo nātou ki toku moʼuga māʼoniʼoni pea ʼe au fakafiafiaʼi anai ia nātou ʼi toku fale faikole.”—Isaia 56:7.
1. Ko te ʼu tupuʼaga faka Tohi-Tapu fea ʼaē ʼe tou maʼu ke tupu ai hatatou fakahā ia te fakaʼapaʼapa ʼaē ʼe tuha mo tatatou ʼu fono?
NEʼE fakamāʼopoʼopo e Sehova tana hahaʼi, ia te kau Kilisitiano fakanofo pea mo tonatou ʼu kaumeʼa, ke natou tauhi kiā te ia ʼi tona “moʼuga māʼoniʼoni.” ʼE ina fakafiafiaʼi ia nātou ʼi tona “fale faikole,” tona fale lotu fakalaumālie, ʼaē ko “[he] fale faikole ki te ʼu puleʼaga fuli.” (Isaia 56:7; Maleko 11:17, MN ) ʼE hā mai ʼi te ʼu fakatuʼutuʼu ʼaia, ko te tauhi ʼa Sehova ʼe māʼoniʼoni, mo maʼa, pea mo māʼoluga. Kā tou fakahā ia te fakaʼapaʼapa ʼaē ʼe tuha mo tatatou ʼu fono, mo te ʼu meʼa ʼaē ʼe tou ako pea mo te tauhi, ʼe tou fakahā ai ʼe tou maʼu ia te manatu ʼa Sehova ʼo ʼuhiga mo te ʼu meʼa taputapu.
2. Koteā ʼaē ʼe hā mai neʼe taputapu kiā Sehova ia te potu ʼaē neʼe ina filifili ke fai ai tana tauhi, pea neʼe toe fakahā feafeaʼi e Sesu tana maʼu ia te manatu ʼaia?
2 ʼI te temi ʼo te kau Iselaele ʼo te temi muʼa, ko te potu ʼaē neʼe filifili e Sehova ke fai ai tana tauhi neʼe taputapu. Ko te tapenakulo, ʼo feiā mo tona ʼu meʼa fakateuteu pea mo tona ʼu naunau neʼe kua tapuakinaʼi pea mo fakamaʼa ke ‘liliu moʼoni ʼo māʼoniʼoni.’ (Ekesote 30:26-29) Neʼe kogafale lua ia te sagatualio, ko te tahi kogafale neʼe higoaʼi ko “te Potu Taputapu” pea ko te tahi ko “te Potu Taputapu ʼAupitō.” (Hepeleo 9:2, 3, MN ) Ki muli age, neʼe fetogi te tapenakulo ʼaki te fale lotu ʼi Selusalemi. ʼI te kua tauhi leva ʼo Sehova ʼi te kolo ʼo Selusalemi, koia neʼe fakahigoaʼi ai ko “te kolo taputapu.” (Nehemia 11:1; Mateo 27:53, MN ) Lolotoga tona minisitelio ʼi te kele, neʼe fakahā e Sesu ia te fakaʼapaʼapa ʼaē ʼe tuha mo te fale lotu. Neʼe ʼita ʼaupitō ia Sesu ki te hahaʼi ʼi tanatou mole fakaʼapaʼapa ki te fale lotu, he neʼe natou fai tanatou ʼu fakatau koloa ʼi ai pea mo alaʼi moʼo tuʼusi ai ke ʼaua naʼa foli fau tonatou fagona.—Maleko 11:15, 16.
3. ʼE hā feafeaʼi neʼe taputapu te ʼu fakatahi lalahi ʼa te kau Iselaele?
3 Ko te kau Iselaele neʼe natou fakatahitahi tuʼumaʼu moʼo tauhi kiā Sehova pea mo fakalogo ki te lau ʼo tana Lao. Neʼe fakahigoaʼi ʼihi ʼaho ʼo tonatou ʼu ʼaho fakafiafia, ko te ʼu fakatahi māʼoniʼoni peʼe ko he ʼu toʼotoʼoga fakamamalu, ʼo hā ai te taputapu ʼo te ʼu fakatahitahi ʼaia. (Levitike 23:2, 3, 36, 37) ʼI te tahi fakatahi lahi ʼi te temi ʼo Esitalasi pea mo Nehemia, ko te kau Levite “neʼe natou fakamahino [ai] te lao ki te hahaʼi.” Pea ko “te hahaʼi fuli neʼe natou fētagihi ʼi tanatou logo ki te ʼu folafola ʼo te lao,” pea “neʼe . . . fakatotonu [e te kau Levite] ki te hahaʼi fuli ke natou fakalogologo, ʼo ʼui fēnei: ‘Tuku takotou fētagihi! heʼe ko te ʼaho ʼaenī ʼe māʼoniʼoni.’ ” ʼOsi ʼaia, ʼaki he “toe fiafia lahi” neʼe fai e te kau Iselaele ia te Lafeti ʼo te ʼu Fale Lau ʼo ʼaho fitu. Koia, “neʼe lau leʼo lahi te tohi ʼo te lao ʼa te ʼAtua moʼoni, ʼi te ʼaho fuli, talu mai te ʼuluaki ʼaho ʼo aʼu ki te ʼaho fakaʼosi; pea neʼe natou fai te fakatahi iā ʼaho e fitu, pea ʼi te valu ʼaho neʼe fai ai te fakatahi mamalu, ʼo mulimuli ki te ʼu meʼa kua fakatuʼutuʼu.” (Nehemia 8:7-11, 17, 18) Ko te ʼu fakatahi lalahi ʼaia neʼe ko he ʼu temi māʼoniʼoni ʼaupitō, pea neʼe fakamaʼua ki te nofoʼaki ke natou fakalogo mo fakaʼapaʼapa.
Ko Tatatou ʼu Fono ʼe Ko Te ʼu Fakatahitahi Taputapu
4, 5. Ko te ʼu faʼahi fea ʼo tatatou ʼu fono ʼe hā ai ʼe ko he ʼu fakatahitahi ʼe taputapu?
4 ʼIo, ʼi te temi nei ʼe mole kei ʼi ai he kolo tapu ʼa Sehova ʼi te kele, pea mo hona fale lotu ke fai ai te tauhi ʼaē kiā te ia. Kae ʼe mole tonu ke galo kiā tātou, ʼe ko he ʼu fakatahitahi taputapu ia te ʼu fono ʼaē ʼe tou kau kiai moʼo tauhi kiā Sehova. Tuʼa tolu ʼi te vāhaʼa, ʼe tou fono ai, mo lau pea mo ako ia te Tohi-Tapu. Ko te Folafola ʼa Sehova ʼe “fakamatalatala,” pea ohage ko te temi ʼo Nehemia, ʼe “fakamahinohino te meʼa ʼaē neʼe [tou] lau.” (Nehemia 8:8) Ko tatatou ʼu fono fuli ʼe kamata pea mo fakaʼosi ʼaki te faikole, pea ʼe tou hiva ai te ʼu kātiko moʼo fakavikiviki kiā Sehova. (Pesalemo 26:12) Ko te ʼu fono ʼe kau ki tatatou tauhi pea ʼe tonu ke tou fakahā ai he aga faka lotu pea mo tou fakalogo fakaʼapaʼapa ki tona ʼu koga kehekehe.
5 ʼE tapuakina e Sehova ia tana hahaʼi mokā natou fakatahi moʼo tauhi kiā te ia, moʼo ako tana Folafola, pea mo fakatahi fakafiafia mo totatou ʼu tehina mo tuagaʼane Kilisitiano. Kā tou fakatahi ʼi te ʼu fono, ʼe tou tui papau ko te faʼahi ʼaia ‘ ʼe fakatotonu e Sehova ke tou maʼu tana tapuakina.’ (Pesalemo 133:1, 3) ʼE tou maʼu anai ia te tapuakina ʼaia mo kapau ʼe tou kau pea mo fakalogo lelei ki te polokalama fakalaumālie. Tahi ʼaē meʼa, neʼe ʼui fēnei e Sesu: “Ko te faahi e fakatahi ai he tokolua, pe ko he tokotolu i toku huafa, e au afio i te lotolotoga o natou.” ʼI te ʼu vaega ki muʼa pea ki muli mai ʼo te kāpite, neʼe fai te tokoni ʼaia ki te kau tagata ʼāfea ʼaē ʼe natou fono moʼo fakatokatoka ia te ʼu fihifihia ʼaē ʼe hoko ʼi te ʼu tehina mo tuagaʼane, kae ʼe toe fakaʼaogaʼi pē foki ki tatatou ʼu fono. (Mateo 18:20) Kapau ko Kilisito, ʼe ʼafio ʼaki te laumālie māʼoniʼoni mokā fakatahi te kau Kilisitiano ʼi tona huafa, ʼe mole tonu koa lā ke tou faka ʼuhiga ia te ʼu fakatahitahi ʼaia ʼe taputapu?
6. Koteā ʼaē ʼe tou lava ʼui ʼo ʼuhiga mo te ʼu koga meʼa ʼaē ʼe tou fakatahitahi kiai, peʼe lahi pea mo veliveli?
6 ʼE moʼoni, ʼe mole nofo ia Sehova ʼi he ʼu fale lotu neʼe faʼu e te tagata. Kae ko tatatou ʼu Fale ʼo Te Puleʼaga ʼe tou fai ai tatatou tauhi moʼoni. (Gaue 7:48; 17:24) ʼE tou fakatahi ai moʼo ako ia te Folafola ʼa Sehova, mo faikole kiā te ia, pea mo hiva tona ʼu fakavikiviki. ʼE toe fakaʼaogaʼi ki tatatou tauhi mo tatatou ʼu Fale Fakatahi. Ko te tahi age ʼu fale lalahi ʼe lue moʼo fai ai tatatou ʼu fakatahi lalahi—ohage lā ko te ʼu fale faigaoʼi ʼaē ʼe tou lue moʼo fai kiai tatatou ʼu fakatahi lalahi—kua liliu ko he ʼu faʼahi ʼe tou tauhi ai mokā tou fakaʼaogaʼi moʼo fai tatatou ʼu fakatahi taputapu. Ko te ʼu faigamālie ʼaia ki te tauhi, peʼe lahi pea mo veliveli, kae ʼe tuha mo tatatou fakaʼapaʼapa, pea ʼe hā anai te faʼahi ʼaia ʼi tatatou aga pea mo tatatou faiteuteu.
Te ʼu Faʼahi ʼAē Ke Tou Fakahā Ai Te Fakaʼapaʼapa Ki Tatatou ʼu Fakatahi Lalahi
7. Ko te faʼahi fea ʼe feala ai ke tou fakahā tatatou fakaʼapaʼapa ki tatatou ʼu fakatahitahi?
7 ʼE ʼi ai te ʼu faʼahi ʼe feala ai hata fakahā te fakaʼapaʼapa ki tatatou ʼu fakatahi lalahi. ʼUluaki, tou kau ki te hiva ʼo te ʼu kātiko ʼo te Puleʼaga. ʼE lahi te ʼu kātiko, ko tona ʼu palalau ʼe ko he ʼu faikole pea koia ʼe tonu anai ke tou hiva fakaʼapaʼapa. ʼO ʼuhiga mo Sesu, ko te ʼapositolo ko Paulo neʼe ina fakaʼaogaʼi ia te Pesalemo 22: “E au fagonogono anai tou huafa ki oku tehina, i te lotolotoiga o te fakatahi e au hiva anai kia te koe.” (Hepeleo 2:12) Koia, ʼe tonu ke kita fakamāmāhani ʼo heheka ʼi muʼa ʼo te fakahā mai e te tehina pelesitā ia te kātiko, pea kā tou hiva, ke tou fakakaukauʼi te ʼuhiga ʼo tona ʼu kupu. ʼOfa pē ke hā ʼi tatatou hiva te ʼu meʼa ʼaē neʼe ʼi te loto ʼa te tagata fai pesalemo ʼaē neʼe ʼui fēnei: “ ʼE au fakafetaʼi anai kiā Sehova mo toku loto kātoa ʼi te lotolotoiga ʼo te hahaʼi kaumeʼa agatonu pea mo te fakatahi.” (Pesalemo 111:1) ʼEī, ko te hiva ʼo te ʼu fakavikiviki kiā Sehova ʼe ko he tupuʼaga lelei ke tou ʼomai tautonu ai ki tatatou ʼu fono pea mo kau kiai ʼo aʼu ki te fakaʼosi.
8. Ko te faʼifaʼitaki fea ʼi te Tohi-Tapu ʼe hā ai ko te ʼu faikole ʼaē ʼe fai ʼi tatatou ʼu fono ʼe tuha ke tou fakalogo fakaʼapaʼapa kiai?
8 Ko te faikole fakamalotoloto ʼaē ʼe fai maʼa nātou fuli ʼaē ʼe maʼopoʼopo ʼi te ʼu fakatahi ʼaia, ʼe ko te tahi ʼaia fakatuʼutuʼu moʼo faka mālohiʼi ai tatatou ʼu fono fuli ʼi te faʼahi fakalaumālie. ʼI te tahi ʼaluʼaga, ko te kau Kilisitiano ʼo te ʼuluaki sēkulō ʼo Selusalemi neʼe natou fakatahi pea mo natou “hiki fakatahi . . . ʼonatou leʼo ki te ʼAtua” ʼaki he faikole fakamalotoloto. Koia logolā te fakataga kae neʼe hoko atu pē tanatou “talanoa . . . ki te folafola ʼa te ʼAtua ʼaki te lototoʼa.” (Gaue 4:24-31, MN ) ʼE feala koa ke tou manatu ʼi te temi ʼaē neʼe fai ai te kole, ko nātou ʼaē neʼe kau ai neʼe mole mulimuli ki te faikole? Kailoa ia, neʼe natou faikole “fakatahi”. Ko te ʼu faikole ʼaē ʼe fai ʼi tatatou ʼu fono, ʼe hā ai te fakaʼapaʼapa ʼo te nofoʼaki kātoa. ʼE tuha ke tou fakalogo fakaʼapaʼapa ki te ʼu faikole ʼaia.
9. ʼE feafeaʼi hatatou lava fakahā ʼaki totatou ʼu teu pea mo tatatou aga ʼe tou fakaʼapaʼapa ki te ʼu fakatahi taputapu?
9 Tahi ʼaē, aki tatatou faʼahiga faiteuteu, ʼe tou lava fakahā ia te lahi ʼo tatatou fakaʼapaʼapa ki te taputapu ʼo tatatou ʼu fakatahi. ʼAki totatou ʼu mutuʼi meʼa pea mo te helu ʼo totatou ʼu lauʼulu, ʼe tou toe fakatupu ake te fakaʼapaʼapa ki tatatou ʼu fono. Neʼe tokoni fēnei ia te ʼapositolo ko Paulo: “ ʼE au loto ʼi te potu fuli pē ke haga faikole te tagata, ʼo hiki he ʼu nima agatonu, ʼaua naʼa ʼiʼita peʼe mo kē. ʼO toe feiā, ʼe au loto ki te ʼu fafine, ke natou teuteu ʼaki he teu ʼe lelei, ʼaki te agavaivai pea mo te fakapotopoto, ke ʼaua naʼa natou fai he ʼu fī ʼulu, peʼe ko he ʼaulo, mo ni ʼu mataʼi tofe, mo ni ʼu mutuʼi meʼa totogi kovi, kae ke natou teuteu ʼi hona ʼaluʼaga ʼe tāu mo feʼauga mo te ʼu fafine ʼaē ʼe natou lau ʼe natou fakaʼapaʼapa ki te ʼAtua.” (1 Timoteo 2:8-10, MN ) Kā tou kau ki he ʼu fakatahi lalahi ʼe fai ʼi he ʼu malaʼe faigaoʼi, ʼe tou tui anai hotatou ʼu mutuʼi meʼa ʼo mulimuli ki te tuʼu ʼo te ʼaho pea mo tuha mo te toʼotoʼoga. Pea kapau ʼe tou fakaʼapaʼapa ki te toʼotoʼoga, ʼe mole tou kai anai peʼe mo gau kamu lolotoga te polokalama ʼo te ʼu fakatahi lalahi. ʼAki totatou ʼu teu pea mo tatatou aga ʼi tatatou ʼu fakatahi lalahi, ʼe tou faka maʼuhigaʼi ia Sehova ʼAtua, mo tana tauhi, pea mo totatou ʼu tehina mo tuagaʼane.
Ko He Aga ʼe Tuha Mo Te ʼu Kaugana ʼa Te ʼAtua
10. Neʼe fakahā feafeaʼi e te ʼapositolo ko Paulo te maʼuhiga ʼaē ke fai he aga fakaʼapaʼapa ʼi tatatou ʼu fono faka Kilisitiano?
10 Iā 1 Kolonito, kāpite 14, ʼe tou maʼu ai te tokoni fakapotopoto ʼaē neʼe fai e te ʼapositolo ko Paulo ʼo ʼuhiga mo te aga ʼaē ʼe tonu ke fai e te kau Kilisitiano ʼi tanatou ʼu fono. Neʼe ina ʼui fakaʼosi fēnei ʼi te kāpite 14: “Koutou fai ia meafuape i te fakapotopoto mo te fakatokatoka.” (1 Kolonito 14:40) ʼE kau te ʼu fono ʼi te ʼu koga maʼuhiga ʼo te ʼu gāue ʼa te kokelekasio, koia ʼe tonu ai ke tou fai ia te aga ʼaē ʼe tuha mo he ʼu kaugana ʼa te ʼAtua.
11, 12. (a) Koteā ʼaē ʼe tonu ke mahino lelei ki te fānau ʼaē ʼe kau ki tatatou ʼu fono? (b) Ko te ʼaluʼaga fea ʼaē ʼe feala ai ki te fānau ke natou fakahā tanatou tui ʼi tatatou ʼu fono?
11 Tāfito lā te ʼu fānau, ʼe tonu ke akoʼi age te aga ʼaē ʼe tonu ke natou fai ʼi te ʼu fono. Ko te ʼu mātuʼa Kilisitiano ʼe tonu ke natou fakamahino ki ʼanatou fānau ko te Fale ʼo Te Puleʼaga pea mo te ʼapi ʼaē ʼe fai ai te Ako Tohi, ʼe mole tonu ke natou gaoʼi ai. ʼE ko he ʼu koga meʼa ʼe tou ʼatolasio ai kiā Sehova pea mo ako tana Folafola. Neʼe ʼui fēnei e te Hau poto ko Salomone: “Tokaga ki tou ʼu vaʼe mokā ke ʼalu ki te ʼapi ʼo te ʼAtua moʼoni; pea ʼe tou fakaōvi kiai moʼo fakalogo.” (Tagata Tānaki 5:1) Neʼe akoʼi e Moisese ki te kau Iselaele ke natou maʼopoʼopo fakatahi, te hahaʼi lalahi pea mo “nātou liliki”. Neʼe ina ʼui fēnei: “Fakatahiʼi te hahaʼi . . . ke natou fakalogo pea ke natou ako, heʼe tonu ke natou manavasiʼi kiā Sehova tokotou ʼAtua pea mo tōkakaga ʼo maʼuliʼi te ʼu folafola fuli ʼo te lao ʼaenī. Pea ko tonatou ʼu foha ʼaē neʼe mole natou ʼiloʼi, ʼe tonu ke natou fakalogo, pea ʼe tonu ke natou ako ke natou manavasiʼi kiā Sehova.”—Teutalonome 31:12, 13.
12 Mole heʼeki fetogi te ʼu fakatotonu ʼaia iā ʼaho nei, heʼe ko te tamaliki ʼaē ʼe kau ki te ʼu fono mo ʼanatou mātuʼa, ʼe tonu ʼuluaki ke natou fakalogo pea mo natou ako. Kapau kua natou lavaʼi te fakalogo pea mo mahino ki te ʼu akonaki tāfito ʼo te ʼu moʼoni faka Tohi-Tapu, ʼe feala anai ki te fānau ke natou “fakahā [tanatou tui] iā muʼa ʼo te kaugamālie” ʼaki he fai ʼo hanatou ʼu tali. (Loma 10:10, MN ) Kapau kei veliveli he tamasiʼi, ʼe lagi lelei ke fakanounou tana tali ki te ʼu fehuʼi ʼaē ʼe mahino kiai. ʼUluaki, ʼe lagi ina lau anai tana tali, kae ʼaki te temi, ʼe faiga anai ke ina fai tana tali ʼaki tana ʼu palalau māhani. ʼE ko he meʼa lelei kiā ia pea mo fiafia ai, pea kā feiā te fakahā fakafiafia ʼo he tui, ʼe fiafia ai anai ia te nofoʼaki kātoa. ʼE mahino ia, ʼe tuku anai e te ʼu mātuʼa he faʼifaʼitaki lelei ʼaki tanatou ʼu tali. Kapau ko he faʼahi ʼe fealagia, pea ʼe lelei ke tahi nofo te tamasiʼi mo tana Tohi-Tapu, mo tana kātiko, pea mo te ʼu tohi faka Tohi-Tapu ʼaē ʼe fakaʼaogaʼi ʼi te ʼu fono. ʼE tonu ke mahino kiā nātou, ʼe tonu ke natou fakahā ia te fakaʼapaʼapa ʼaē ʼe tuha mo te ʼu tohi faka Tohi-Tapu ʼaia. Kapau ʼe akoʼi feiā e te ʼu mātuʼa ia tanatou fānau, pea ʼe mahino lelei anai ki te fānau, ko tatatou ʼu fono ʼe ko he ʼu fakatahitahi ʼe taputapu.
13. Koteā ʼaē ʼe tou fakaʼamu kiai ʼo ʼuhiga mo nātou ʼaē ko tanatou hoki ʼomai ʼaia ki tatatou ʼu fono?
13 ʼIo, ʼe mole tou loto anai ke hage tatatou ʼu fono ko te ʼu fakatahi ʼa te ʼu ʼēkelesia ʼo te Keletiate. Heʼe ʼi te ʼu toʼotoʼoga ʼaia, ʼe mole ʼi ai te feʼofaʼaki pea mo fia māʼoniʼoni fau, peʼe logoaʼa ohage ko te ʼu fai mahōlō. ʼE tou loto ke fakaloto mālohi pea mo tali kāiga lelei ia tatatou ʼu fono ʼaē ʼe fai ʼi te ʼu Fale ʼo Te Puleʼaga, kae ke mole liliu ko he fakatahitahiʼaga pē ʼa he foʼi kūtuga. ʼE tou fakatahi moʼo ʼatolasio kiā Sehova, koia ʼaē ʼe tonu ai ke hā ia te fakaʼapaʼapa tuʼumaʼu ʼi tatatou ʼu fono. ʼE tou fakaʼamu ko nātou ʼaē neʼe ko tanatou hoki ʼomai ʼaia ki te fono, kā ʼosi tanatou fakalogo ki he akonaki pea mo sioʼi tatatou aga, mo ʼaē ʼo ʼatatou fānau, ke natou ʼui fēnei: “E afio mooni te Atua ia koutou.”—1 Kolonito 14:25.
Ko He Fakatuʼutuʼu ʼo Talu Ai ʼi Tatatou Tauhi
14, 15. (a) ʼE feafeaʼi hatatou lava tekeʼi ke mole tou ‘meʼa noaʼi te ʼapi ʼo totatou ʼAtua’? (b) Neʼe feafeaʼi te ʼuluaki hoko ʼo te koga tohi ʼo Isaia 66:23?
14 Ohage ko te faʼahi kua tou talanoa kiai, ʼe lolotoga fakatahitahiʼi e Sehova tana hahaʼi pea mo fakafiafiaʼi ia nātou ʼi tona “fale faikole,” tona fale lotu fakalaumālie. (Isaia 56:7) Ko te tagata agatonu ko Nehemia neʼe ina fakamanatuʼi age ki tona ʼu tehina Sutea, ʼe tonu ke natou fakahā ʼaki tonatou ʼu koloa ia te fakaʼapaʼapa ʼaē ʼe tuha mo te fale lotu. Neʼe ina ʼui fēnei: “ ʼE mole tonu ke tou meʼa noaʼi te ʼapi ʼo totatou ʼAtua.” (Nehemia 10:39) Tahi ʼaē, ʼe mole tonu ke tou meʼa noaʼi te fakaafe ʼa Sehova moʼo tauhi ia ia ʼi tona “fale faikole.”
15 Moʼo fakahā ia te maʼuhiga ʼaē ke fakatahitahi tuʼumaʼu ki te tauhi, neʼe fakakikite fēnei e Isaia: “ ‘ ʼE mahino papau ia, mai te māhina foʼou ʼo aʼu ki te māhina foʼou, mai te sāpato ki te tahi sāpato, ʼe ʼomai anai te kakano fuli pē ʼo tulolo ʼi ʼoku muʼa,’ ko te ʼui ʼaia ʼa Sehova.” (Isaia 66:23) ʼE hoko te faʼahi ʼaia iā ʼaho nei. Heʼe ʼi te taʼu fuli, ʼi te vāhaʼa fuli ʼo te ʼu māhina fuli, ko te kau Kilisitiano ʼaē kua foaki tonatou maʼuli kiā Sehova ʼe natou fakatahi moʼo tauhi kiā Sehova. ʼE natou fai te faʼahi ʼaia, mo ʼihi ʼatu ʼu gāue, pea ʼe natou kau ki te ʼu fono faka Kilisitiano pea mo te fai faka mafola ʼi te minisitelio. ʼE kotou kau koa iā nātou ʼaē ʼe ‘kau tuʼumaʼu pea mo tulolo ʼi muʼa ʼo Sehova’?
16. He koʼe ʼe tonu ke liliu tata kau tuʼumaʼu ki te ʼu fono ʼe ko he fakatuʼutuʼu ʼo talu ai ʼi totatou maʼuli ʼi te temi nei?
16 Ko te ʼu palalau ʼo te koga tohi ʼo Isaia 66:23, ʼe hoko kātoa anai ʼo heʼegata ʼi te mālama foʼou ʼaē neʼe fakapapauʼi mai e Sehova. ʼI te temi ʼaia, ʼi te vāhaʼa pea mo te māhina fuli ko “te kakano fuli” ʼe “ ʼomai anai . . . ʼo tulolo ʼi . . . muʼa,” peʼe tauhi, kiā Sehova ʼi he ʼu temi ʼo heʼegata. Mai tona ʼaluʼaga ʼaē ko he fono moʼo tauhi kiā Sehova ʼe liliu anai ko he fakatuʼutuʼu ʼo talu ai ʼi totatou maʼuli fakalaumālie ʼi te mālama foʼou, ʼe mole tou fia kau tuʼumaʼu koa lā ki tatatou ʼu fakatahi taputapu ʼaē ko he fakatuʼutuʼu ʼo talu ai ʼi totatou maʼuli ʼi te temi nei?
17. He koʼe ʼe ʼaoga kiā tātou tatatou ʼu fono “tāfito lā heʼe kua [tou] sio ki te fakaōvi mai ʼo te ʼaho”?
17 ʼI te kua ōvi mai ʼo te fakaʼosi, tou faiga mālohi age ʼo kau ki tatatou ʼu fakatahi faka Kilisitiano moʼo tauhi kiā Sehova. ʼO mole gata pē ʼi te taputapu ʼo tatatou ʼu fono, tou toe tōkakaga naʼa tou tuku tatatou gāue faka mālama, mo tatatou ako faka mālama, peʼe ko he tahi ʼu faʼahiga ako faka mālama, ke natou faka galoʼi te maʼuhiga ʼo tatatou fakatahi tuʼumaʼu mo totatou ʼu tehina mo tuagaʼane ʼi te tui. ʼE ʼaoga kiā tātou ia te mālohi ʼaē ʼe tou maʼu mai te ʼu fono ʼaia. Ko tatatou ʼu fono ʼe natou foaki mai ia te faigamālie ke tou feʼiloʼiʼaki mo ʼotatou tehina mo tuagaʼane, ke tou fefakaloto mālohiʼaki, pea mo feʼugaʼaki ki te “ ʼofa pea mo te ʼu gāue lelei.” ʼE tonu ke tou fai te faʼahi ʼaia, “tāfito lā heʼe kua [tou] sio ki te fakaōvi mai ʼo te ʼaho.” (Hepeleo 10:24, 25, MN ) Koia ʼofa pē, ke tou fakahā tuʼumaʼu ia te fakaʼapaʼapa ʼaē ʼe tuha mo te ʼu fakatahi taputapu, ʼo tou kau tuʼumaʼu kiai, ʼo tou teu fakaʼapaʼapa, pea mo fai te aga ʼaē ʼe tuha mo te ʼu fakatahi. Kapau ʼe tou fai feiā, ʼe tou fakahā ʼe tou maʼu ia te manatu ʼa Sehova ʼo ʼuhiga mo te ʼu meʼa taputapu.
Moʼo Fakamanatu
• Koteā ʼaē ʼe hā ai ko te ʼu fakatahitahi ʼa te hahaʼi ʼa Sehova ʼe tonu ke taputapu?
• Ko te ʼu faʼahi fea ʼo tatatou ʼu fono ʼe hā ai ʼe ko he ʼu fakatahitahi ʼe taputapu?
• ʼE lava fakahā feafeaʼi e te fānau ʼe natou fakaʼapaʼapa ki te taputapu ʼo tatatou ʼu fono?
• He koʼe ʼe tonu ke liliu tatatou kau tuʼumaʼu ki te ʼu fono ʼe ko he fakatuʼutuʼu ʼo talu ai ʼi totatou maʼuli?
[Paki ʼo te pasina 28]
Ko te ʼu fono ʼaē ʼe tou kau kiai moʼo tauhi kiā Sehova ʼe ko he ʼu fakatahitahi taputapu ʼi he faʼahi pē ʼe fai ai
[Paki ʼo te pasina 31]
Ko tatatou ʼu fānau ʼaē ʼe kau ki te ʼu fono ʼe tonu ke natou fakalogo pea mo ako