ʼE Feafeaʼi Hatatou Lava Fakafeagai Ki Te Kau Temonio?
“Ko te kau ʼāselo ʼaē neʼe mole natou taupau maʼu tonatou tuʼulaga olisinale, kae natou siʼaki tonatou nofoʼaga, [ko te ʼAtua] neʼe ina tāʼofi nātou ʼaki he ʼu haʼi heʼegata, ʼi te fakapōʼuli mātolu, ki te fakamāu ʼo te ʼaho lahi.”—Suta 6, MN.
1, 2. Koteā te ʼu fehuʼi ʼe malaga ʼo ʼuhiga mo Satana te Tēvolo pea mo te kau temonio?
ʼE FAKATOKAGA fēnei mai e te ʼapositolo ko Petelo: “Kotou nonofo ʼalaʼala, kotou nonofo tōkakaga. Ko tokotou fili, ia te Tēvolo, ʼe feʼaluʼaki ohagē ko he laione ʼe gugulu, ʼo ina kumi ke ina kai he tahi.” (1 Petelo 5:8, MN ) ʼO ʼuhiga mo te kau temonio, ʼe ʼui fēnei e te ʼapositolo ko Paulo: “ ʼE mole au loto ke kotou fakatahi mo te kau temonio. ʼE mole feala ke kotou ʼinu ki te ʼipu ʼa Sehova pea mo te ʼipu ʼa te kau temonio; ʼe mole feala ke kotou kau ki ‘te laupapa ʼa Sehova’ pea mo te laupapa ʼa te kau temonio.”—1 Kolonito 10:20, 21, MN.
2 Ko ai koa ia Satana te Tēvolo pea mo te kau temonio? Neʼe feafeaʼi tonatou kamataʼaga? Ko te ʼAtua koa ʼaē neʼe ina fakatupu ia nātou? ʼE feafeaʼi te mālohi ʼo tanatou fakahala ki te hahaʼi? Kapau ʼe ʼi ai he puipui, koteā te puipui ʼaia ʼe tou maʼu moʼo fakafeagai kiā nātou?
Neʼe Feafeaʼi Te Kamataʼaga ʼa Satana Pea Mo Te Kau Temonio?
3. Neʼe liliu feafeaʼi he ʼāselo ʼa te ʼAtua ko Satana te Tēvolo?
3 ʼI te kamataʼaga ʼo te hisitolia ʼo te tagata, ʼi te kamata maʼuli ʼa te ʼuluaki tagata mo te ʼuluaki fafine ʼi te ʼōloto ʼo Eteni, neʼe fakafeagai te ʼāselo ʼa te ʼAtua. Koteā tona tupuʼaga? He neʼe mole ina leleiʼia tana gāue ʼaē neʼe ina maʼu ʼi te kautahi ʼa Sehova ʼi te lagi. ʼAki te fakatupu ʼo Atama mo Eva, neʼe ina maʼu ai te faigamālie moʼo fakahalaʼi tanā fakalogo pea mo tanā ʼatolasio mai te ʼAtua moʼoni kae ke nā ʼatolasio age kiā te ia. ʼI tana fakafeagai ki te ʼAtua pea mo fakahalaʼi te ʼuluaki taumātuʼa ke nā agahala, neʼe liliu ai te ʼāselo ʼaia ko Satana te Tēvolo. ʼAki te temi, ko ʼihi kau ʼāselo neʼe kau mo nātou ki tana fakafeagai. ʼO feafeaʼi?—Senesi 3:1-6; Loma 5:12; Apokalipesi 12:9.
4. Koteā ʼaē neʼe fai e ʼihi ʼāselo fakafeagai ʼi muʼa ʼo te Tulivio ʼi te temi ʼo Noe?
4 ʼI te Tohi-Tapu, ʼe tou lau ʼi muʼa ʼo te hoko mai ʼo te Tulivio ʼi te temi ʼo Noe, ko ʼihi ʼāselo neʼe kehe leva tanatou tokagaʼi ia te ʼu fafine ʼo te kele. ʼAki he fakatuʼutuʼu ʼe mole lelei, ʼe ʼui fēnei ʼi te Tohi-Tapu: “Ko te ʼu foha [ʼi te lagi] ʼo te ʼAtua moʼoni neʼe natou tokagaʼi ko te ʼu ʼofafine ʼo te ʼu tagata, ʼe finelelei; pea neʼe natou toʼo maʼa nātou tonatou ʼu ʼohoana, ia nātou fuli ʼaē neʼe natou filifili.” Neʼe mole lelei te ʼu fai ʼohoana ʼaia, pea neʼe tutupu ai te ʼu fānau agamālohi neʼe higoaʼi ko te kau Nefilime. (Senesi 6:2-4) Koia ko te kau laumālie fakapulipuli ʼaē neʼe talagataʼa leva ki te ʼAtua neʼe natou lagolago ki te fakafeagai ʼa Satana ʼaē kiā Sehova.
5. Koteā ʼaē neʼe hoko ki te kau talagataʼa ʼi te temi ʼaē neʼe fakaʼauha ai e Sehova te kele ʼaki te Tulivio lahi?
5 ʼI te fakatō ifo e Sehova te Tulivio ki te mālamanei, neʼe mamate ai te kau Nefilime pea mo tanatou ʼu faʼē. Neʼe tonu foki ki te kau ʼāselo talagataʼa ke natou huʼi ʼonatou sinoʼi tagata kae natou toe liliu ki te lagi. Kae neʼe mole feala hanatou toe toʼo “tonatou tuʼulaga olisinale” ʼaē neʼe natou maʼu mo te ʼAtua. Kae neʼe tuku nātou ki te “fakapōʼuli [fakalaumālie] mātolu,” neʼe ko te Taletale.—Suta 6, MN; 2 Petelo 2:4, MN.
6. ʼE fakahalaʼi feafeaʼi e te kau temonio ia te hahaʼi?
6 ʼI te mole kei maʼu e te kau ʼāselo agakovi “tonatou tuʼulaga olisinale,” neʼe natou liliu ko te kau temonio ʼa Satana pea neʼe natou lagolago ki tana ʼu fakatuʼutuʼu agakovi. Talu mai te temi ʼaia, ʼe mole kei feala ki te kau temonio ke natou kofuʼi he ʼu sinoʼi tagata. Kae ʼe feala hanatou kākāʼi te hahaʼi ke natou fai he ʼu faʼahiga felāveʼi fakasino heʼeʼaoga. ʼE toe fakahalaʼi e te kau temonio ia te mālamanei ʼaki te faifakalauʼakau, ohagē lā ko te ʼu faitutuku, te vaudou, pea mo te ʼu fai fakakikite faka temonio. (Teutalonome 18:10-13; 2 Fakamatala 33:6) Ko te ikuʼaga ʼo te kau ʼāselo agakovi ʼe tatau mo ʼaē ʼa te Tēvolo—te fakaʼauha heʼegata. (Mateo 25:41; Apokalipesi 20:10) Lolotoga te temi ʼaia, ʼe tonu ke tou mālolohi pea mo fakafeagai kiā nātou. ʼE tonu ke tou tōkakaga ʼo mahino ki te mālohi ʼaē ʼe maʼu e Satana pea mo te ʼu meʼa ʼaē ʼe tou lava fai moʼo fakafeagai kiā te ia pea mo tana kau temonio.
ʼE Feafeaʼi Te Mālohi ʼo Satana?
7. ʼE puleʼi feafeaʼi e Satana te mālamanei?
7 Neʼe moamoagaʼi e Satana ia Sehova lolotoga te hisitolia. (Tāʼaga Lea 27:11) Pea neʼe ina fakahehē mo te hahaʼi tokolahi. ʼE ʼui fēnei iā 1 Soane 5:19: “E mauli te malama-nei katoa i te Kovi.” Ko te tupuʼaga lā ʼaia ʼo te faiga ʼa te Tēvolo ke ina ʼahiʼahiʼi ia Sesu, ʼo ina momoli age te pule pea mo te kolōlia ʼo “te atu puleaga o te kelekele katoa.” (Luka 4:5-7) ʼO ʼuhiga mo Satana, ʼe ʼui fēnei e te ʼapositolo ko Paulo: “Kapau kua uʼufi tamatou Evaselio, kua uʼufi kia natou e lolotoga auha, aia kua fakakivi e te atua o te malama-nei te u fakakaukau a te hahai e mole tui, naa natou mamata ki te huhulu o te malama o te Evaselio o te kololia o Kilisito, iaʼia ko te fakatata o te Atua.” (2 Kolonito 4:3, 4) Ko Satana ʼe “ko te kaka ia pea ko te tamai o te kaka” kae ʼe ina lava fakaliliu ia ia ko “he aselo o te malama.” (Soane 8:44; 2 Kolonito 11:14) ʼE ina maʼu te mālohi pea mo te ʼu puleʼaki moʼo fakakiviʼi te ʼatamai ʼo te kau takitaki ʼo te mālamanei pea mo te hahaʼi ʼe fakalogo kiai. ʼAki te ʼu manatu hala pea mo te ʼu fāgana faka lotu mo te ʼu loi, ʼe ina kākāʼi ai te mālamanei.
8. Koteā ʼaē ʼe fakahā ʼi te Tohi-Tapu ʼo ʼuhiga mo te fakahala ʼa Satana?
8 Ko te mālohi pea mo te fakahala ʼa Satana neʼe hā lelei ʼi te temi ʼo te polofetā ko Taniela, iā sēkulō e nima ʼi muʼa ʼo totatou temi. ʼI te temi ʼaē neʼe fekauʼi ai e Sehova he ʼāselo moʼo fakaloto mālohiʼi ia Taniela, neʼe tau ia te ʼāselo mo “te tama ʼaliki [fakalaumālie] ʼo te puleʼaga hau ʼo Pelesia.” Neʼe tāʼofi te ʼāselo agatonu lolotoga ʼaho e 21 ʼo aʼu ki te temi neʼe haʼu ai “Mikaele, te tama ʼaliki lahi ʼi te ʼu tama ʼaliki,” ʼo tokoni age kiā te ia. ʼE ʼi ai mo te fakamatala fēia ʼo ʼuhiga mo “te tama ʼaliki [temonio] ʼo Keleka.” (Taniela 10:12, 13, 20) Iā Apokalipesi 13:1, 2, ʼe ʼui ko Satana ʼe ko “te talakone” ʼaē ʼe ina foaki ki te manu fekai faka politike “tona malohi, mo tona afioʼaga pea mo tana pule lahi.”
9. Ko ai koa ʼaē ʼe fakafeagai kiai te kau Kilisitiano?
9 ʼE mole tou punamaʼuli ki te faitohi fēnei ʼa te ʼapositolo ko Paulo: “Ko tatatou tau ʼe mole fai ʼo fakafeagai ki te toto pea mo te kakano, kae ʼe fakafeagai ki te ʼu puleʼaga, ʼe fakafeagai ki te kau takitaki, ʼe fakafeagai ki te kau pule ʼo te mālama ʼo te ʼu fakapōʼuli ʼaia, ʼe fakafeagai ki te ʼu mālohi fakalaumālie agakovi ʼaē ʼe nonofo ʼi te ʼu potu ʼo te lagi.” (Efeso 6:12, MN ) Māʼiapē lā mo te temi nei, ko te ʼu mālohi faka temonio ʼaē ʼe puleʼi e Satana te Tēvolo ʼe natou takitaki fakapulipuli, ʼe natou fakahalaʼi te ʼu tagata takitaki pea mo te hahaʼi ʼo te mālamanei, ʼo natou uga ia nātou ke natou fai he ʼu agakovi ʼe faigataʼa hona fakamatala, ohagē ko te fakapō ʼo he lanu kātoa, mo he ʼu agamālohi, pea mo he ʼu agakovi. ʼE tou vakaʼi leva ʼi te temi nei peʼe feafeaʼi hatatou lava tekeʼi te ʼu laumālie mālohi agakovi ʼaia.
Koteā Te Puipui ʼAē ʼe Tou Maʼu Moʼo Fakafeagai Ki Te Kau Temonio?
10, 11. ʼE feafeaʼi hatatou lava fakafeagai kiā Satana pea mo tana kau ʼāselo agakovi?
10 ʼE mole tou lava fakafeagai kiā Satana pea mo tana kau ʼāselo agakovi ʼaki pē totatou mālohi fakatagata, peʼe ʼi te faʼahi fakasino peʼe fakaʼatamai. ʼE tokoniʼi fēnei tātou e Paulo: “Ke kotou haga maʼu te mālohi ʼi te ʼAliki pea mo te mālohi ʼo tona māfimāfi.” ʼE tonu ke tou haga ki te ʼAtua ke ina puipui tātou. ʼE toe ʼui fēnei e Paulo: “Ke kotou kofuʼi te teu tau kātoa ʼo te ʼAtua ke feala ai hakotou tutuʼu mālohi ʼo fakafeagai ki te ʼu kākā ʼa te Tēvolo . . . Kotou toʼo te teu tau kātoa ʼo te ʼAtua, ke feala ai hakotou tekeʼi te ʼaho ʼo te agakovi pea, ʼi te kua ʼosi ʼo te fai ʼo te meʼa fuli ke kotou tuʼu mālohi.”—Efeso 6:10, 11, 13, MN.
11 Neʼe tuʼa lua te fakaloto mālohiʼi e Paulo tona ʼu tehina Kilisitiano ke natou kofuʼi “te teu tau kātoa ʼo te ʼAtua.” Ko te kupu “kātoa” ʼe faka ʼuhiga ʼe mole kita tekeʼi he fakahala ʼa te kau temonio ʼaki hata kihiʼi faiga pē. Koia, koteā te ʼu koga maʼuhiga ʼo te teu tau fakalaumālie ʼaē ʼe fakamaʼua tāfito iā ʼaho nei ke kofuʼi nei e te kau Kilisitiano moʼo fakafeagai ki te kau temonio?
ʼE Feafeaʼi Hatatou “Tuʼu Mālohi”?
12. ʼE lava haʼi feafeaʼi e te kau Kilisitiano ia tonatou koga loto ʼaki te moʼoni?
12 ʼE fakamahino fēnei e Paulo: “Koia, kotou nonofo mālohi, ʼo kotou nonoʼo ʼokotou koga loto ʼaki te moʼoni, ʼo kotou kofuʼi ia te kofu ukamea ʼo te faitotonu.” (Efeso 6:14, MN ) Ko te ʼu koga e lua ʼo te teu tau ʼaē ʼe talanoa ʼi henī ʼe ko te kiliʼi pipi, pea mo he kofu ukamea. Neʼe tonu ke haʼi lelei te kiliʼi pipi ʼa he tagata sōlia ki tona koga loto moʼo puipui tona ʼu ifiifi (koga loto pea mo tona lalo fatu) pea neʼe tautau kiai te ʼaiʼaga ʼo tana heletā. ʼO toe fēia ki te moʼoni ʼo te Tohi-Tapu, ʼe tonu ke hagē ʼe ʼaofi kātoa iā tātou, ke tou maʼuliʼi. ʼE ʼi ai koa hatatou polokalama moʼo lau ʼi te ʼaho fuli te Tohi-Tapu? ʼE kau koa kiai te fāmili kātoa? Ko he agamāhani koa tatatou vakaʼi faka fāmili te koga tohi ʼo te ʼaho? Tahi ʼaē meʼa, ʼe tou ʼiloʼi koa ia te ʼu fakamahino foʼou ʼi te ʼu tohi faka Tohi-Tapu ʼaē ʼe foaki mai e “te tagata kaugana agatonu mo poto”? (Mateo 24:45, MN ) Kapau ʼe tou fai fēia, pea ʼe tou lolotoga faigaʼi ke tou maʼuliʼi ia te tokoni ʼa Paulo. ʼE tou toe maʼu foki mo te ʼu foʼi ʼata viteo pea mo te ʼu ʼata DVD ʼaē ʼe tou toe maʼu aipē te ʼu tokoni faka Tohi-Tapu. Ko tatatou pipiki maʼu ki te moʼoni, ʼe tokoni mai anai ke tou fai he ʼu tonu ʼe fakapotopoto pea mo puipui ia tātou ke ʼaua naʼa tou fai he aga ʼe kovi.
13. ʼE feafeaʼi hatatou lava puipui totatou mafu fakatātā?
13 Ko te kofu ukamea neʼe ina puipui te fatafata ʼo te tagata sōlia, mo tona mafu, pea mo te tahi ʼu koga maʼuhiga ʼo tona sino. ʼE feala ki te Kilisitiano ke ina puipui tona mafu fakatātā—te tagata ʼaē ʼi tona loto—ʼaki hana ʼofa ki te faitotonu ʼa te ʼAtua pea mo maʼuliʼi te ʼu lēkula faitotonu ʼa Sehova. Ko te kofu ukamea fakatātā ʼe ina puipui tātou naʼa tou mamaʼo mai te Folafola ʼa te ʼAtua. Kapau ʼe tou “fehiʼa ki te meʼa ʼaē ʼe kovi, pea [mo tou] manako ki te meʼa ʼaē ʼe lelei,” pea ʼe tou tāʼofi anai ʼotatou vaʼe “mai te ʼu ala kovi fuli.”—Amosi 5:15; Pesalemo 119:101.
14. Koteā te faka ʼuhiga ko ʼotatou “vaʼe ʼe fakatui ʼaki te logo lelei ʼo te tokalelei”?
14 ʼI te agamāhani, neʼe tui e te ʼu tagata sōlia Loma tonatou ʼu sūlie lelei mokā natou haʼele loaloaga ʼi he ʼu lauʼi kilometa ʼo te ʼu telituale ʼaē ʼe pule ai tonatou puleʼaga. Koteā ʼapē te faka ʼuhiga ki te kau Kilisitiano ia te kupusiga palalau “te ʼu vaʼe ʼe fakatui ʼaki te logo lelei ʼo te tokalelei”? (Efeso 6:15, MN ) Ko tona faka ʼuhiga kua tou tokalelei ki he gāue. Kua tou tokalelei ki te faka mafola ʼo te logo lelei ʼo te Puleʼaga ʼo te ʼAtua ʼi te ʼu faigamālie fuli. (Loma 10:13-15) ʼE puipui tātou ki “te ʼu kākā” ʼa Satana peʼe ko tana “ ʼu puleʼaki” mo kapau ʼe tou kau mālohi ki te minisitelio faka Kilisitiano.—Efeso 6:11, MN; nota ʼi te lalo pāsina.
15. (a) Koteā ʼaē ʼe hā mai ʼe maʼuhiga ʼaupitō ia te meʼa tali tau lahi ʼo te tui? (b) Ko “te ʼu mahafu kakaha” fea ʼaē ʼe feala ke natou maumauʼi tatatou tui?
15 ʼE toe ʼui ʼe Paulo: “Kae tāfito foki, ke kotou toʼo te meʼa tali tau lahi ʼo te tui, ʼaē ʼe feala ai anai ke kotou matehi te ʼu mahafu kakaha fuli ʼa te agakovi.” (Efeso 6:16, MN ) ʼE kamata te tokoni ʼaē ke tou toʼo te meʼa tali tau lahi ʼo te tui ʼaki te kupu “kae tāfito foki,” ʼo fakahā ai te maʼuhiga ʼaupitō ʼo te koga ʼaia ʼo te teu tau. ʼE mole tonu ke puli te koga ʼaia ʼi tatatou tui. Ohagē ko te puipui ʼa he meʼa tali tau lahi, ko tatatou tui ʼe ina puipui tātou mai “te ʼu mahafu kakaha” ʼa Satana. Koteā te faka ʼuhiga ʼo te ʼu mahafu ʼaia iā ʼaho nei? ʼE lagi ko he ʼu laukovi, mo he ʼu fasituʼu, pea mo he ʼu loi ʼe fai e te ʼu fili pea mo te kau ʼapositā moʼo fakavaivaiʼi tatatou tui. Ko “te ʼu mahafu” ʼaia ʼe feala pē foki ko he ʼu ʼahiʼahi ʼi te faʼahi faka koloa, ke tou tōkakaga fau ki te totogi ʼo he ʼu tuʼuga meʼa pea mo fakatupu iā tātou ke tou fia fakataupiepie mo nātou ʼaē kua higa ki te faʼahiga maʼuli mānumānu ʼaia. Lagi neʼe natou totogi honatou fale ʼe lahi age pea mo lelei age, pea mo he ʼu motokā, peʼe mo fakahāhā te totogi kovi ʼo tonatou ʼu meʼa gigila pea mo te ʼu mutuʼi meʼa ʼo te lamote. ʼAua naʼa fia faʼifaʼitakiʼi te maʼuli ʼo ʼihi, kae ʼe tonu ke mālohi tatatou tui moʼo teteke “te ʼu mahafu kakaha” ʼaia. ʼE feafeaʼi hatatou laga pea mo taupau he tui mālohi?—1 Petelo 3:3-5; 1 Soane 2:15-17.
16. Koteā ʼaē ʼe lava tokoni kiā tātou ke tou laga he tui ke mālohi?
16 ʼE tou lava fakaovi ki te ʼAtua ʼaki te fai tuʼumaʼu ʼo te ako takitokotahi ʼo te Tohi-Tapu pea mo te ʼu faikole fakamālotoloto. ʼE tou lava kolekole kiā Sehova ke ina faka mālohiʼi tatatou tui pea mo tou faka ʼalutahi tatatou ʼu aga mo te ʼu meʼa ʼaē neʼe tou kole ki te ʼAtua. Ohagē lā, ʼe tou teuteuʼi fakalelei koa ʼi te vāhaʼa fuli tatatou Tule Leʼo, ʼaki te fakatuʼutuʼu ʼaē ke tou fai he ʼu tali? ʼE mālohi anai tatatou tui mo kapau ʼe tou ako te Tohi-Tapu pea mo te ʼu tohi faka Tohi-Tapu.—Hepeleo 10:38, 39; 11:6.
17. ʼE feafeaʼi hatatou lava “tali . . . te puloga tau ʼo te haofaki”?
17 ʼE fakaʼosi e Paulo tana fakamatala ʼo te teu tau fakalaumālie ʼaki te tokoni ʼaenī: “Kotou tali . . . te puloga tau ʼo te haofaki, pea mo te heletā ʼo te laumālie, ʼaē ko te folafola ʼa te ʼAtua.” (Efeso 6:17, MN ) Ko te puloga neʼe ina puipui te ʼulu pea mo te ʼuto ʼo te tagata sōlia, te koga tāfito ʼaē ʼe fai ai te ʼu tonu. ʼO toe fēia mo te ʼamanaki faka Kilisitiano, ʼe ina puipui totatou ʼu fealagia fakakaukau. (1 Tesalonika 5:8) ʼE mole tou fafaʼo anai totatou ʼatamai ʼaki he ʼu fakatuʼutuʼu faka mālamanei pea mo he ʼu manatu mānumānu, kae ohagē ko Sesu ʼe tou taupau tāfito anai te ʼamanaki ʼaē neʼe foaki mai e te ʼAtua.—Hepeleo 12:2.
18. He koʼē ʼe mole tonu ke tou meʼa noaʼi tatatou polokalama ʼo ʼuhiga mo te lau tuʼumaʼu ʼo te Tohi-Tapu?
18 Ko tatatou puipui fakaʼosi ki te fakahala ʼa Satana pea mo tana kau temonio ʼe ko te Folafola ʼa te ʼAtua, peʼe ko te logo ʼaē ʼi te Tohi-Tapu. Ko he tahi ʼaia tupuʼaga ke tou tōkakaga ʼo lau tuʼumaʼu te Tohi-Tapu. Heʼe ko he ʼatamai mālama lelei ʼo te Folafola ʼa te ʼAtua ʼe ina puipui tātou mai te ʼu loi ʼa Satana pea mo tana kau temonio, pea mo te ʼu fasituʼu ʼa te kau ʼapositā.
Tou “Faikole ʼi Te Lakaga Fuapē”
19, 20. (a) Koteā ʼaē kā hoko anai kiā Satana pea mo tana kau temonio? (b) Koteā ʼaē ʼe ina lava fakaloto mālohiʼi tātou ʼi te faʼahi fakalaumālie?
19 Kua vave pē te fakaʼauha ʼo Satana, mo tana kau temonio pea mo te mālama agakovi. Kua ʼiloʼi e Satana kua “nounou tona temi.” ʼE ʼita pea ʼe ʼalu ʼo tauʼi ia “nātou [ʼe] mulimuli ki te ʼu fakatotonu ʼa te ʼAtua pea mo natou maʼu te gāue ʼaē ko te fakamoʼoni kiā Sesu.” (Apokalipesi 12:12, 17, MN ) ʼE tonu ke tou fakafeagai kiā Satana pea mo tana kau temonio.
20 ʼE tou loto fakafetaʼi ki te tokoni ʼaē ke tou kofuʼi te teu tau kātoa ʼo te ʼAtua! ʼE fakaʼosi e Paulo tana palalau ʼo ʼuhiga mo te teu tau fakalaumālie ʼaki te tokoni ʼaenī: “ ʼAki te ʼu faʼahiga faikole fuapē pea mo te ʼu kole mamahi, kotou faikole ʼi te lakaga fuapē ʼi te laumālie. Pea ki te faʼahi ʼaia, kotou nonofo ʼalaʼala ʼaki te faʼa kātaki fuapē, pea mo he kole mamahi maʼa te kau māʼoniʼoni fuli.” (Efeso 6:18, MN ) ʼE feala ki te faikole ke ina fakaloto mālohiʼi tātou ʼi te faʼahi fakalaumālie pea mo tokoni mai ke tou nofo tokaga. Tou fakaʼaogaʼi te ʼu palalau ʼa Paulo pea mo tou faikole, heʼe tokoni mai anai ke tou fakafeagai kiā Satana pea mo tana kau temonio.
Koteā ʼAē Neʼe Kotou Ako?
• Neʼe feafeaʼi te kamataʼaga ʼa Satana pea mo tana kau temonio?
• ʼE feafeaʼi te mālohi ʼo te Tēvolo?
• Koteā te puipui ʼaē ʼe tou maʼu moʼo fakafeagai kiā Satana pea mo tana kau temonio?
• ʼE feafeaʼi hatatou lava kofuʼi te teu tau kātoa ʼo te ʼAtua?
[Paki ʼo te pasina 12]
“Ko te ʼu foha ʼo te ʼAtua moʼoni neʼe natou tokagaʼi . . . te ʼu ʼofafine ʼo te ʼu tagata”
[Paki ʼo te pasina 14]
ʼE kotou lava fakamatalatala koa te ʼu koga ʼe ono ʼo totatou teu tau fakalaumālie?