Tou Agavaivai ʼo Fakalogo Ki Te Kau Tauhi Ovi ʼOfa
“Kotou talagafua kiā nātou ʼaē ʼe natou takitaki koutou, pea mo kotou fakalogo.”—Hepeleo 13:17, MN.
1, 2. Ko te ʼu vaega faka Tohi-Tapu fea ʼaē ʼe hā ai ko Sehova pea mo Sesu ʼe ko te ʼu Tauhi Ovi ʼofa?
KO SEHOVA ʼATUA pea mo tona ʼAlo ko Sesu Kilisito ʼe ko te ʼu Tauhi Ovi ʼofa. Neʼe fakakikite fēnei e Isaia: “Koʼenī! Ko te Tuʼi ʼAliki ko Sehova ʼe haʼu totonu anai ohagē ko he tahi ʼe mālohi, pea ko tona nima ʼe pule anai maʼa ia. . . . Ohagē ko he tauhi ovi, ʼe ina fafaga anai tana faga ovi. ʼAki tona nima, ʼe ina fakatahiʼi anai te ʼu ʼakeno; ʼe ina fua anai nātou ki tona fatafata. ʼE ina takitaki fakalelei anai te ʼu ovi ʼe kei fai fāgai.”—Isaia 40:10, 11.
2 Ko te lea faka polofetā ʼaia ʼo ʼuhiga mo te fakafoʼou, neʼe ʼuluaki hoko ʼi te temi ʼaē neʼe liliu ai te toe ʼo te kau Sutea ki Suta ʼi te taʼu 537 ʼi muʼa ʼo totatou temi. (2 Fakamatala 36:22, 23) Neʼe toe hoko ʼi te taʼu 1919, ʼi te temi ʼaē neʼe faka ʼāteaina ai e Sesu Kilisito te Siliusi Lahi ia te toe ʼo te kau fakanofo mai te “Papiloni Lahi.” (Apokalipesi 18:2, MN; Isaia 44:28) ʼE ko Ia te “nima” ʼo Sehova moʼo takitaki, moʼo faka fakatahiʼi te faga ovi pea mo fafaga ia nātou ʼaki te ʼofa. Neʼe ʼui totonu e Sesu: “E ko au te tauhiovi agalelei, e au iloi aku ovi pea e natou iloi au.”—Soane 10:14.
3. ʼE fakahā feafeaʼi e Sehova ia tana tokaga ʼofa ʼaē ki te gaohi ʼo tana faga ovi?
3 Ko te lea faka polofetā ʼo Isaia 40:10, 11 ʼe ina fakahā lelei te ʼofa ʼaē ʼe maʼu e Sehova ʼo ʼuhiga mo tana ʼu kaugana. (Pesalemo 23:1-6) Lolotoga te minisitelio ʼaē ʼa Sesu ʼi te kele, neʼe ina fakahā mo ia tana tokaga ʼaē ki tana ʼu tisipulo pea mo te hahaʼi fuli. (Mateo 11:28-30; Maleko 6:34) Ko Sehova pea mo Sesu neʼe nā tauteaʼi te aga fefeka ʼa te kau tauhi ovi, peʼe ko te kau takitaki ʼo Iselaele, he neʼe mole natou gaohi fakalelei te faga ovi pea neʼe natou aga fakakākā kiai. (Esekiele 34:2-10; Mateo 23:3, 4, 15) Neʼe fakapapau fēnei e Sehova: “ ʼE au haofaki anai ʼaku ovi, pea ʼe mole toe kaihaʼa anai nātou; pea ʼe au fakamāu anai te ovi pea mo te ovi. Pea ʼe au foaki anai kiā nātou he tauhi ovi e tahi, pea ʼe tonu anai ke ina fafaga ia nātou, ʼeī, taku kaugana ko Tavite. Ko ia anai kā ina fafaga nātou, pea ko ia anai kā liliu ko tonatou tauhi ovi.” (Esekiele 34:22, 23) ʼI te temi fakaʼosi ʼaenī, ko Sesu Kilisito ia te Tavite Lahi, ʼe ko ia te “tagata tauhi ovi pē e tahi” ʼaē neʼe fakanofo e Sehova ki Tana ʼu kaugana fuli ʼi te kele, ia te kau Kilisitiano fakanofo pea mo te “tahi ʼu ovi.”—Soane 10:16, MN.
Ko Te ʼu Meʼa ʼOfa Mai Te Lagi Ki Te Kōkelekāsio
4, 5. (a) Koteā te meʼa ʼofa maʼuhiga ʼaē neʼe foaki e Sehova ki tana ʼu kaugana ʼi te kele? (b) Koteā te meʼa ʼofa ʼaē neʼe foaki e Sesu ki tana kōkelekāsio?
4 ʼI te foaki ʼaē e Sehova ki Tana ʼu kaugana ʼi te kele he “tagata tauhi ovi pē e tahi” ko Sesu Kilisito, neʼe ko he meʼa ʼofa maʼuhiga ia ʼaē neʼe ina foaki ki te kōkelekāsio faka Kilisitiano. Pea ko te meʼa ʼofa ʼaia ko he Takitaki mai te lagi, neʼe fakakikite iā Isaia 55:4: “Koʼenī! Neʼe au foaki ia ia ko he fakamoʼoni ki te ʼu kūtuga faka puleʼaga, ko te takitaki pea mo te pule ki te ʼu kūtuga faka puleʼaga.” Ko te kau Kilisitiano fakanofo pea mo nātou ʼaē ʼe kau ki te “toe hahaʼi tokolahi” neʼe fakatahiʼi mai te ʼu puleʼaga kehekehe, mo te ʼu telepī, mo te ʼu lanu, pea mo te ʼu lea. (Apokalipesi 5:9, 10; 7:9, MN ) ʼE natou faʼufaʼu he kōkelekāsio faka mālamanei, ko he “faga ovi pē e tahi” ʼe takitaki e he “tagata tauhi ovi pē e tahi” ko Kilisito Sesu.
5 Mo Sesu, neʼe ina foaki ia te meʼa ʼofa maʼuhiga ki tana kōkelekāsio ʼi te kele. Neʼe ina foaki te ʼu tagata tauhi ovi lagolago, ʼe natou muliʼi te faʼifaʼitaki ʼa Sehova pea mo Sesu, ʼo natou fafaga te faga ovi ʼaki te ʼofa. Neʼe palalau te ʼapositolo ko Paulo ʼo ʼuhiga mo te meʼa ʼofa lahi ʼaia ʼi tana tohi ʼaē ki te kau Kilisitiano ʼo Efeso. Neʼe ina tohi fēnei: “ ‘ ʼI te temi ʼaē neʼe hake ai ki ʼoluga, neʼe ina ʼave mo ia te kau pōpula; neʼe ina foaki he ʼu meʼa ʼofa ko he ʼu tagata.’ Neʼe ina foaki ʼihi ko te kau ʼapositolo, ʼihi ko te kau polofetā, ʼihi ko te kau faka mafola evaselio, ʼihi ko te kau tauhi ovi pea mo te kau faiako, moʼo fakatonutonuʼi te kau māʼoniʼoni ki he gāue faka minisitelio, ki te laga ʼo te sino ʼo Kilisito.”—Efeso 4:8, 11, 12, MN.
6. Koteā ʼaē ʼe ʼui iā Apokalipesi 1:16, 20 ʼo ʼuhiga mo te kau taupau fakanofo ʼaē ʼe kau ʼi te ʼu kolesi ʼo te kau tagata ʼāfea, pea koteā ʼaē ʼe tou lava ʼui ʼo ʼuhiga mo te ʼu tagata ʼāfea ʼaē neʼe fakanofo ʼe natou kau ʼi te tahi ʼu ovi?
6 ʼE ko te kau taupau, peʼe ko te kau tagata ʼāfea ia te ‘ ʼu meʼa ʼofa tagata’ ʼaia ʼaē neʼe fakanofo e Sehova pea mo tona ʼAlo ʼaki te laumālie māʼoniʼoni, moʼo fafaga te faga ovi ʼaki te ʼofa. (Gaue 20:28, 29) ʼI te kamata, ko te ʼu taupau ʼaia neʼe ko te kau Kilisitiano fakanofo fuli. Iā Apokalipesi 1:16, 20, ko te ʼu taupau ʼaē ʼe kau ʼi te ʼu kolesi ʼo te kau tagata ʼāfea ʼo te kōkelekāsio fakanofo neʼe fakatātā nātou ki “te u fetuu” peʼe ko “te u aselo” ʼi te nima mataʼu ʼo Kilisito, heʼe ko ia ʼaē ʼe ina takitaki nātou. Kae ʼi te temi fakaʼosi ʼaenī, ko te kau taupau fakanofo ʼaē kei māʼuʼuli ʼi te kele ʼe mole kei natou kaugamālie, kae tokolahi ʼi te kau tagata ʼāfea ʼi te ʼu kōkelekāsio ʼe natou kau ʼi te tahi ʼu ovi. Mai tona ʼaluʼaga ʼaē ko te kau tagata ʼāfea ʼaia neʼe fakanofo ʼaki te laumālie māʼoniʼoni e te ʼu tehina ʼo te Kolesi Pule, ʼe toe feala pē ke ʼui ʼe natou nonofo ʼi te nima mataʼu (peʼe ʼi te takitaki) ʼo te Tauhi Ovi Agalelei, ko Sesu Kilisito. (Isaia 61:5, 6) Mai te ʼaluʼaga ʼaē ko te kau tagata ʼāfea ʼi totatou ʼu kōkelekāsio ʼe natou toe fakalogo mo nātou kiā Kilisito, te Pule ʼo te kōkelekāsio, ʼe tuha mo nātou ke tou lagolago kātoa age kiā nātou.—Kolose 1:18.
Tou Talagafua Pea Mo Fakalogo
7. Koteā te tokoni neʼe foaki e te ʼapositolo ko Paulo ʼo ʼuhiga mo te aga ʼaē ke tou fai ki te kau taupau Kilisitiano?
7 Ko totatou ʼu Tauhi Ovi ʼaē ʼe ʼi selō, ko Sehova ʼAtua pea mo Sesu Kilisito, ʼe nā fakaʼamu ke tou talagafua pea mo fakalogo, ki te ʼu tauhi ovi lagolago ʼaē neʼe nā fakanofo mo tonatou ʼu maʼua ki te ʼu kōkelekāsio. (1 Petelo 5:5) ʼAki te takitaki ʼa te laumālie, neʼe tohi fēnei e te ʼapositolo ko Paulo: “Kotou manatuʼi ia nātou ʼaē ʼe natou takitaki koutou, ʼaē neʼe natou tala atu kiā koutou te folafola ʼa te ʼAtua, pea ʼi takotou tokagaʼi te ikuʼaga ʼo tanatou aga, kotou faʼifaʼitakiʼi tanatou tui. Kotou talagafua kiā nātou ʼaē ʼe natou takitaki koutou, pea mo kotou fakalogo, heʼe natou leʼoleʼo tuʼumaʼu ki ʼokotou nefesi, ohagē ko he ʼu tagata ʼe fakamāuʼi anai ʼi he ʼaho; koteʼuhi ke natou fai fakafiafia te faʼahi ʼaia kae ke ʼaua naʼa natou fai ʼaki he loto fītaʼa, heʼe fakatupu kovi anai kiā koutou.”—Hepeleo 13:7, 17, MN.
8. Koteā ʼaē ʼe fakaafe tātou e Paulo ke tou “tokagaʼi,” pea ʼe feafeaʼi anai tatatou “talagafua”?
8 Kotou fakatokagaʼi ʼe fakaafe tātou e Paulo ke tou “tokagaʼi” te ikuʼaga ʼo te agatonu ʼa te kau tagata ʼāfea pea mo faʼifaʼitaki tanatou tui. Tahi ʼaē, ʼe tokoni mai ke tou talagafua pea mo fakalogo ki te takitaki ʼa te ʼu tagata fakanofo ʼaia. ʼE ʼui e te tagata fai Tohi-Tapu ko R. T. France, ʼi te lea faka Keleka ko te kupu ʼaē neʼe fakaliliu ʼaki te kupu “talagafua” ʼe mole “ko te kupu ʼaē ʼe fakaʼaogaʼi māhani ki te talagafua, kae ko tona faka ʼuhiga ʼuluaki ‘fakalotoʼi,’ ʼe tou lotolelei ke natou takitaki ia tātou.” ʼE tou talagafua ki te kau tagata ʼāfea heʼe fakatotonu mai ʼi te Folafola ʼa te ʼAtua pea ʼe tou tui papau ʼe natou tokaga tāfito ki te ʼu gāue ʼo ʼuhiga mo te Puleʼaga pea mo totatou maʼuli fiafia. ʼE tou fiafia anai mo kapau ʼe tou tali fakalelei tanatou takitaki.
9. He koʼē ʼe maʼuhiga ke tou hilifaki ki tatatou talagafua ia te “fakalogo”?
9 Koteā ʼaē kā tou fai mo kapau ʼe tou lotolotolua ki he faʼahi ʼe mole tou faʼa leleiʼia ʼi te takitaki ʼa te kau tagata ʼāfea? ʼE ko te temi lā ʼaia ʼe ʼaoga ai ke tou fakalogo. ʼE faigafua hatatou talagafua mokā ʼe tāsilo he meʼa pea mo tou tali lelei, kae ʼe tou fakahā anai tatatou fakalogo moʼoni mo kapau ʼe tou tali ke tou mulimuli ki te ʼu fakatotonu logolā tatatou mole mahino ki te takitaki ʼaē ʼe foaki mai, kae tou haga fakalogo aipē. Ko Petelo ʼaē ki muli age neʼe liliu ko he ʼapositolo, neʼe ina fakahā te taʼi faʼahiga fakalogo ʼaia.—Luka 5:4, 5.
Ko Tupuʼaga e Fā Ke Tou Lotolelei ʼo Kaugā Gāue Fakatahi Mo Te ʼu Taupau Kilisitiano
10, 11. Neʼe feafeaʼi te ‘tala e te kau taupau ia te folafola ʼa te ʼAtua’ ki tonatou ʼu tehina Kilisitiano ʼo te ʼuluaki sēkulō pea mo te temi nei?
10 Iā Hepeleo 13:7, 17 ʼaē neʼe tou vakaʼi ʼi te palakalafe 7, neʼe talanoa ia te ʼapositolo ko Paulo ki te ʼu tupuʼaga e fā ʼe tonu ai ke tou talagafua pea mo fakalogo ki te ʼu taupau Kilisitiano. ʼUluaki, ʼe natou ‘tala mai kiā tātou ia te folafola ʼa te ʼAtua.’ Tou manatuʼi ʼe foaki e Sesu te “ ʼu meʼa ʼofa ko he ʼu tagata” ki te kōkelekāsio moʼo “fakatonutonuʼi te kau māʼoniʼoni.” (Efeso 4:11, 12, MN ) ʼAki te ʼu tauhi ovi agatonu, neʼe ina toe fakatonutonuʼi ia te manatu pea mo te aga ʼaē ke fai e te kau Kilisitiano ʼo te ʼuluaki sēkulō, pea ko ʼihi iā nātou neʼe takitaki e te laumālie moʼo faitohi ki te ʼu kōkelekāsio. Neʼe ina fakaʼaogaʼi te ʼu taupau fakanofo ʼaia moʼo takitaki pea mo fakaloto mālohiʼi te kau ʼuluaki Kilisitiano.—1 Kolonito 16:15-18; 2 Timoteo 2:2; Tito 1:5.
11 Iā ʼaho nei, ʼe takitaki tātou e Sesu ʼaki “te tagata kaugana agatonu mo poto,” ʼaē ʼe fakafofoga e te Kolesi Pule pea mo te kau tagata ʼāfea ʼaē neʼe fakanofo. (Mateo 24:45, MN ) Kapau ʼe tou fakaʼapaʼapa ki te “pule tauhi ovi” ko Sesu Kilisito, pea ʼe tou fakalogo anai ki te tokoni ʼaenī ʼa Paulo: “Koutou tokagai ia natou ae e gaue kinakina i te lotolotoga o koutou, pea e natou tauhi koutou i te Aliki mo fakatonutonu koutou.”—1 Petelo 5:4, MN; 1 Tesalonika 5:12; 1 Timoteo 5:17.
12. ʼE feafeaʼi te ‘leʼoleʼo tuʼumaʼu ki ʼotatou nefesi’ e te ʼu taupau?
12 Ko te lua tupuʼaga ʼaē ke tou kaugā gāue fakatahi mo te kau taupau Kilisitiano, heʼe “natou leʼoleʼo tuʼumaʼu ki [totatou ʼu] nefesi.” Kapau ʼe natou fakatokagaʼi hatatou aga ʼe feala ke tou tuʼutāmaki ai ʼi te faʼahi fakalaumālie, ʼe natou foimo tokoniʼi tātou ke tou maliu mai te faʼahi ʼaia. (Kalate 6:1) Ko te kupu ʼaē neʼe fakaliliu ʼaki “leʼoleʼo tuʼumaʼu” ko tona faka ʼuhiga “ ʼe mole natou momoe.” ʼI te manatu ʼa te tagata sivi Tohi-Tapu, ʼe “ko te nofo ʼalaʼala tuʼumaʼu ʼa te tagata tauhi ovi.” ʼO mole gata pē ʼi tanatou tōkakaga ʼaē kiā nātou ʼi te faʼahi fakalaumālie, kae feala pē ki te kau tagata ʼāfea ke mole natou mamoe ʼi tanatou tuʼaniaʼi ia totatou maʼuli fakalaumālie. ʼE mole tonu koa lā ke tou lotolelei ʼo kaugā gāue fakatahi mo te kau tauhi ovi ʼofa ʼaē ʼe takitaki e Sesu, pea ʼe natou faiga fakamālotoloto ke natou muliʼi ia te tokaga ʼofa ʼaē neʼe fai e Sesu Kilisito “te tagata tauhi ovi lahi ʼo te ʼu ovi”?—Hepeleo 13:20, MN.
13. Ko ai ʼaē kā huʼi maʼua kiai ia te kau taupau pea mo te kau Kilisitiano fuli, pea ko te ʼu ʼaluʼaga fea ʼaē ʼe natou fai anai te faʼahi ʼaia?
13 Ko te tolu tupuʼaga ʼaē ke tou lotolelei ʼo kaugā gāue fakatahi mo te kau taupau, heʼe natou leʼoleʼo tuʼumaʼu tātou “ohagē ko he ʼu tagata ʼe fakamāuʼi anai [nātou] ʼi he ʼaho.” ʼE ʼiloʼi e te ʼu taupau, ʼe takitaki nātou e te ʼu Tauhi Ovi ʼaē ʼe nonofo ʼi selō ko Sehova ʼAtua pea mo Sesu Kilisito. (Esekiele 34:22-24) Ko Sehova ʼe ko te Pule ʼo te faga ovi, ʼaē “neʼe ina totogi ʼaki te taʼataʼa ʼo tona ʼAlo totonu,” pea ʼe Ina fakamāuʼi anai te kau taupau fakanofo ʼo ʼuhiga mo tanatou faʼahiga tokaga ʼaē ki Tana faga ovi, ʼaē ʼe tonu ke natou fai “ ʼaki te ʼofa.” (Gaue 20:28, 29, MN ) Koia, ʼe tou huʼi maʼua fuli anai kiā Sehova ki te aga ʼaē ʼe tou fai ʼo ʼuhiga mo tana takitaki. (Loma 14:10-12) ʼAki tatatou talagafua ki te kau tagata ʼāfea ʼaē neʼe fakanofo, ʼe tou toe fakahā foki tatatou fakalogo ʼaē kiā Kilisito, te Pule ʼo te kōkelekāsio.—Kolose 2:19.
14. Koteā ʼaē ʼe feala ai ki he ʼu taupau Kilisitiano ke natou gāue “ ʼaki he loto fītaʼa,” pea koteā tona ʼu fua?
14 Neʼe fakahā e Paulo ia te fā tupuʼaga leva ʼaē ʼe tonu ai ke tou agavaivai ʼo fakalogo ki te kau taupau Kilisitiano. Neʼe ina tohi fēnei: “Ke natou fakafiafia . . . kae ke ʼaua naʼa natou fai ʼaki he loto fītaʼa, heʼe fakatupu kovi anai kiā koutou.” (Hepeleo 13:17, MN ) ʼE fua e te kau tagata ʼāfea ia te ʼāmoga mamafa, heʼe lahi tonatou ʼu maʼua ohagē lā ko te faiakonaki, mo te tokaga ki te faga ovi, mo takitaki te gāue fai faka mafola, mo te tokaga ki tonatou ʼu fāmili, pea mo te fakatokatoka te ʼu fihifihia ʼi te kōkelekāsio. (2 Kolonito 11:28, 29) Kapau ʼe mole tou kaugā gāue fakatahi mo nātou, ʼe tou toe faka lēsili mamafa tanatou ʼāmoga. ʼO tupu ai anai he fakahoko ʼo tonatou ʼu maʼua ʼaki he “loto fītaʼa.” Kapau ʼe mole tou kaugā gāue fakatahi mo nātou pea ʼe mole leleiʼia anai ia tātou e Sehova, pea mo toe fakatupu kovi pē kiā tātou totonu. Kae kā tou fakaʼapaʼapa pea mo kaugā gāue fakatahi mo nātou, ʼe feala ki te kau tagata ʼāfea ke natou fakahoko fakafiafia tonatou ʼu maʼua, pea ko he faʼahi ʼe lelei ki te logo tahi pea mo he kau fakafiafia ki te gāue faka mafola ʼo te Puleʼaga.—Loma 15:5, 6.
Tou Fakahā Tatatou Fakalogo
15. ʼE tou lava fakahā feafeaʼi tatatou talagafua pea mo tatatou fakalogo?
15 ʼE lahi te ʼu ʼaluʼaga ʼe tou lava kaugā gāue fakatahi ai mo te kau taupau fakanofo. ʼO mulimuli ki te ʼu ʼaluʼaga foʼou ʼe hoko ʼi te telituale, neʼe fakatuʼutuʼu koa e te kau tagata ʼāfea ke fai te ʼu vae gāue ki te fai faka mafola ʼi he ʼu ʼaho pea mo he hola ʼe fakamaʼua ai ke tou fetogi tatatou ʼu agamāhani? Tou faiga ke tou lagolago ki te ʼu fakatuʼutuʼu foʼou ʼaia. ʼE lagi tou maʼu ai anai he ʼu tapuakina ʼe mole tou ʼamanaki kiai. ʼE ʼaʼahi koa tatatou Ako Tohi e te taupau ki te gāue? Tou kau mālohi ki te fai faka mafola ʼi te vāhaʼa ʼaia. Neʼe foaki mai koa he kiʼi akonaki ke tou fai ʼi te Ako Faka Teokalatike? Tou faigaʼi ke tou kau ʼi te ʼaho ʼaia ʼi te fono moʼo fakahoko tatatou ʼu kiʼi akonaki ʼaia. Kua fakahā atu koa e te taupau ʼo te Ako Tohi ʼe ko takotou ako tohi ʼaē ʼe ina fakamaʼa te Fale ʼo Te Puleʼaga? Tou lagolago kiai, ʼo mulimuli pē ki totatou ʼu fealagia. ʼI te ʼu ʼaluʼaga ʼaia pea mo ʼihi atu, ʼe tou fakahā tatatou fakalogo ki te ʼu tagata ʼaē neʼe fakanofo e Sehova pea mo tona ʼAlo ke tokaga ki te faga ovi.
16. Kapau ʼe mole fai e he tagata ʼāfea te ʼu meʼa ohagē ko tona fakahā age, he koʼē koa ʼe mole tonu ke tou takuʼaki hatatou agatuʼu kiā nātou?
16 ʼI ʼihi temi, ʼe lagi mole fai e he tagata ʼāfea te ʼu meʼa ohagē ko tona fakahā age e te kalasi ʼo te tagata kaugana agatonu pea mo te Kolesi Pule. Kapau ʼe mole fetogi, ʼe huʼi maʼua anai kiā Sehova, “te tauhi ovi pea mo te tagata leʼoleʼo ʼo [totatou] ʼu nefesi.” (1 Petelo 2:25, MN ) Kae ʼaua naʼa tou takuʼaki he ʼu hala peʼe mo he vaivaiʼaga ʼa ʼihi tagata ʼāfea ke tou agatuʼu ai kiā nātou. ʼE mole tapuakinaʼi e Sehova te talagataʼa pea mo te agatuʼu.—Faka au 12:1, 2, 9-11.
ʼE Tapuakina e Sehova Tatatou Lotolelei Ke Tou Kaugā Gāue Fakatahi Mo Te ʼu Taupau Kilisitiano
17. Ko te aga fea ʼaē ʼe tonu anai ke tou fakahā ki totatou ʼu taupau?
17 ʼE ʼiloʼi lelei e Sehova ʼAtua ko te ʼu tagata ʼaē neʼe ina fakanofo ko te ʼu taupau ʼe natou heʼe haohaoa. Kae ʼe ina fakaʼaogaʼi pē ia nātou, pea ʼaki tona laumālie, ʼe ina fafaga tana ʼu kaugana ʼaē ʼi te kele. Ko te koga ʼaenī ʼe hoko moʼoni ki te kau tagata ʼāfea—pea mo tātou fuli—“ko te mālohi ʼaē ʼe fakalaka ʼi te mālohi māhani ʼe ko te mālohi ia ʼo te ʼAtua kae mole ko te mālohi ʼaē ʼe haʼu mai iā tātou.” (2 Kolonito 4:7, MN ) Koia ʼe tou loto fakafetaʼi anai kiā Sehova ʼo ʼuhiga mo te ʼu gāue ʼaē ʼe ina fai ʼaki totatou ʼu taupau agatonu, pea ʼe tonu anai ke tou lotolelei ʼo kaugā gāue fakatahi mo nātou.
18. Kapau ʼe tou fakalogo ki totatou ʼu taupau, ko ai ʼaē ʼe tou fakalogo ki ai?
18 ʼE faiga fakamālotoloto ia te kau taupau ke natou muliʼi te ʼu fakatotonu, ʼaē ʼe fakamaʼua ki te ʼu tauhi ovi ʼaē neʼe fakanofo e Sehova ki tana faga ovi ʼi te ʼu ʼaho fakamuli, ohagē ko tona ʼui iā Selemia 3:15: “ ʼE au foaki atu anai he ʼu tagata tauhi ovi ʼo toku loto, pea ʼe mahino ia ʼe natou fafaga anai ia koutou ʼaki te ʼatamai mālama pea mo te loto mahino.” ʼE mahino ia ko te ʼu tagata ʼāfea ʼe tāu ke vikiʼi ki te ʼu gāue lelei ʼaē ʼe natou fai ʼi te faiakonaki pea mo te puipui ʼo te faga ovi ʼa Sehova. ʼOfa pē ke tou haga fakahā totatou loto fakafetaʼi ki tanatou gāue kinakina ʼaki tatatou lotolelei ʼo kaugā gāue fakatahi mo nātou, pea mo tou talagafua, pea mo fakalogo. Kapau ʼe tou fai fēia, ʼe tou fakahā ai anai totatou loto fakafetaʼi ki tatatou ʼu Tauhi Ovi ʼaē ʼe ʼi selō, ko Sehova ʼAtua pea mo Sesu Kilisito.
Moʼo Fakamanatu
• Neʼe fakahā feafeaʼi e Sehova pea mo Sesu Kilisito ko nāua ʼe ko te ʼu Tauhi Ovi ʼofa?
• He koʼē ʼe maʼuhiga ke tou hilifaki ki tatatou talagafua ia te fakalogo?
• Ko te ʼu ʼaluʼaga fea ʼaē ʼe tou lava fakahā ai tatatou fakalogo?
[Paki ʼo te pasina 27]
ʼE fakalogo te kau tagata ʼāfea ki te takitaki ʼa Kilisito
[Paki ʼo te pasina 29]
ʼE lahi te ʼu ʼaluʼaga ke tou fakahā ai tatatou fakalogo ki te ʼu tauhi ovi ʼaē neʼe fakanofo e Sehova