Kua Vave Fakagata Ia Te ʼu Mamahi Fuli
“Ko te Maka, ʼe haohaoa tana gāue.”—Teutalonome 32:4.
1, 2. (a) He koʼē ʼe kotou leleiʼia ia te ʼamanaki ki te maʼuli heʼegata? (b) Koteā ʼaē ʼe mole fakatui ai te tokolahi ʼe ʼi ai he ʼAtua ʼe ina fai te ʼu fakapapau taulekaleka ki te kā haʼu?
KOTOU fakakaukauʼi age muʼa tokotou maʼuli ʼi te Palatiso! Lagi ʼe kotou sio ʼe kotou feʼoloʼaki ʼo mamata ki te kele taulekaleka pea mo ako ia he ʼu tuʼuga meʼa ʼe māʼuʼuli. Peʼe lagi ʼe kotou fakakaukau ki te fiafia ʼaē kā kotou maʼu anai ʼi hakotou gāue fakatahi mo niʼihi moʼo tokaga ki te kele pea mo fakaliliu ia te kele kātoa ko he ʼōloto. Peʼe lagi ʼe kotou fakakaukauʼi age hokotou ʼu fealagia ʼe kotou lava fakatuputupu ʼi he faʼahiga gāue, ohagē lā ko te faʼu fale, te fai musika, peʼe ko he tahi age ʼu meʼa, lagi ʼi te temi nei ʼe mole kotou lava fai heʼe mole maʼu hokotou temi kiai. Koia ʼe kotou leleiʼia ia te ʼamanaki ki te maʼuli ʼaē ʼe higoaʼi ʼi te Tohi-Tapu ko “te mauli mooni”—te maʼuli ʼaē neʼe fakatuʼutuʼu e Sehova ʼi te kamata maʼa tātou, ia te maʼuli heʼegata.—1 Timoteo 6:19, Tauhi Foou.
2 ʼE ko he meʼa fakafiafia pea mo he pilivilēsio hata fakahā ki te hahaʼi ia te ʼamanaki taulekaleka ʼaia ʼe fakahā mai ʼi te Tohi-Tapu. Kae tokolahi ʼe mole natou tui ki te taʼi ʼamanaki ʼaia. ʼE natou ʼui ko he moemisi, ko he fakatuʼutuʼu maʼa te hahaʼi ʼe hoko tui. ʼE lagi mata faigataʼa hanatou tui ki he ʼAtua ʼe ina fakapapau mai he maʼuli heʼegata ʼi te Palatiso. Koteā tona tupuʼaga? Heʼe ki ʼihi, ʼuhi ko te agakovi ʼe mole feala ia ke hoko he ʼu meʼa fēia. Heʼe ʼi tanatou manatu, kapau ʼe ʼi ai he ʼAtua ʼe mālohi pea mo ʼofa, ʼe mole feala ke ʼi ai te agakovi pea mo te mamahi ʼi te mālamanei. ʼI tanatou manatu, ʼe mole feala ia ke ʼi ai he ʼatua ʼe ina fakagafua ia te agakovi—heʼe kapau lā ʼe maʼuli moʼoni ia te taʼi ʼAtua ʼaia, pea ʼe mahino ia ʼe mole ko he ʼatua mālohi ia peʼe lagi mole tokaga ia kiā tātou. Ki ʼihi, ʼe natou fakatui ki te taʼi manatu ʼaia. Ko Satana ʼe ina maʼu ia te mālohi moʼo fakapōʼuli ia te ʼatamai ʼo te hahaʼi.—2 Kolonito 4:4.
3. Koteā te fehuʼi faigataʼa ʼaē ʼe tou lava tokoni ki te hahaʼi ke natou maʼu he tali kiai, pea he koʼē ʼe ko tātou pē ʼaē ʼe tou lava foaki he tokoni kiā nātou?
3 ʼI totatou ʼuhiga kau Fakamoʼoni ʼa Sehova, ʼe ko tātou ʼaē ʼe tou lava foaki he tokoni ki te hahaʼi ʼaē ʼe kākāʼi e Satana pea mo te mālama ʼaenī. (1 Kolonito 1:20; 3:19) ʼE tou mahino, pe koʼē ʼe tokolahi ʼe mole natou tui ki te ʼu fakapapau ʼo te Tohi-Tapu, heʼe mole natou ʼiloʼi ia Sehova. ʼE lagi mole natou ʼiloʼi tona huafa pea mo te faka ʼuhiga ʼo te huafa ʼaia, pea lagi natou mahino veliveli pē ki tona ʼu kalitātē peʼe ki te moʼoni ʼaē ʼo tana ʼu fakapapau. ʼAmusia tātou ʼe tou maʼu ia te ʼatamai mālama ʼo ʼuhiga mo te ʼu faʼahi ʼaia. ʼI ʼihi temi, ʼe lelei ke tou toe fakakaukauʼi te tokoni ʼaē ʼe tou lava foaki ki te hahaʼi ʼaē ʼe “fakapouli onatou atamai,” ke natou maʼu te tali ki te fehuʼi faigataʼa ʼaupitō ʼaenī ʼe fai e te tagata: “He koʼē koa ʼe fakagafua e te ʼAtua ia te agakovi pea mo te mamahi?” (Efesi 4:18, Tauhi Foou) ʼE tou ʼuluaki vakaʼi anai ia te faʼahiga tali ʼaē ʼe lelei ke tou fai ki te fehuʼi ʼaia. ʼOsi ʼaia, pea tou vakaʼi leva peʼe ʼiloga feafeaʼi ia te ʼu kalitātē ʼo Sehova ʼi tana faʼahiga fakatokatoka ia te agakovi.
Te ʼu Faʼahiga Tali ʼAē ʼe Lelei Ke Tou Fai Ki Te Fehuʼi
4, 5. Koteā te meʼa ʼe tonu muʼa ke tou fai mokā fehuʼi mai e he tahi, pe koʼē ʼe fakagafua e te ʼAtua ia te mamahi? Kotou fakamahino.
4 Kā fehuʼi mai e he tahi, pe koʼē ʼe fakagafua e te ʼAtua ia te mamahi, ʼe feafeaʼi anai hatatou tali age kiai? ʼE lagi tou fia foimo foaki age anai he ʼu fakamatala ki tana fehuʼi, ʼo tou kamata fakahā age ia te ʼu meʼa ʼaē neʼe hoko ʼi te ʼōloto ʼo Eteni. ʼI ʼihi temi, ʼe tou lava tali age fēia. Kae ʼe tonu ke tou tōkakaga. ʼE lagi lelei ʼi muʼa ʼo hata tali fakahagatonu age ki te fehuʼi ʼo te fakagafua ʼaē e te ʼAtua ia te agakovi, ke kita fakamahino age muʼa ʼihi ʼu faʼahi. (Tāʼaga Lea 25:11; Kolose 4:6) Tou vakaʼi age muʼa te ʼu puani e tolu ʼe ʼaoga kiā tātou moʼo tokoni ki he tahi, ʼi muʼa ʼo hatatou tali fakahagatonu age ki te fehuʼi.
5 ʼUluaki, kapau ʼe tuʼania he tahi ki te tuputupu ʼo te agakovi ʼi te mālamanei, lagi he neʼe hoko kiā ia he tuʼutāmaki peʼe ki niʼihi neʼe ʼofa mamahi kiai. Koia ʼe lagi lelei anai ke tou lotomahino ki te ʼu meʼa ʼaē ʼi tona loto. Neʼe tokoniʼi fēnei te kau Kilisitiano e te ʼapositolo ko Paulo: “Koutou tagi mo natou e fetagihi.” (Loma 12:15, Tauhi Foou) ʼE feala ke malave ki te loto ʼo te hahaʼi mo kapau ʼe tou lotomahino peʼe mo “agalelei.” (1 Petelo 3:8, Tauhi Foou) Kapau ʼe sio ʼe tou tokagaʼi tana manatu, pea ʼe mahino ia ʼe fia fakalogo anai ki te ʼu meʼa ʼaē kā tou palalau age kiai.
6, 7. He koʼē ʼe tonu ke tou vikiʼi he tahi ʼe ina fai fakamālotoloto mai he fehuʼi fakalaumālie ʼo ʼuhiga mo he akonaki faka Tohi-Tapu ʼe mole mahino kiai?
6 Lua, tou vikiʼi he tahi ʼe ina fai fakamālotoloto mai te fehuʼi ʼaia. Ko ʼihi ʼe natou ʼui, kapau ʼe fai e te hahaʼi te ʼu taʼi fehuʼi ʼaia, ʼe mole tui natou ki te ʼAtua pea ʼe mole natou fakaʼapaʼapa ki ai. Lagi ko he tagata takitaki lotu ʼaē neʼe ina ʼui age te faʼahi ʼaia. Kae ʼe mole tou ʼui leva ʼe mole tui he tahi ki te ʼAtua ʼuhi ko tana fai ia te fehuʼi ʼaia. Māʼiapē lā mo te hahaʼi agatonu ʼo te temi muʼa neʼe natou fai te ʼu taʼi fehuʼi ʼaia. Ohagē lā, neʼe fai e te tagata fai pesalemo ko Tavite ia te ʼu fehuʼi ʼaenī: “He koʼē koa, Ê Sehova, ʼe ke tuʼu mamaʼo? He koʼē koa ʼe ke nono ʼi te ʼu temi ʼo te mamahi?” (Pesalemo 10:1) ʼO toe fēia mo te polofetā ko Hapakuke, neʼe ina fai te ʼu fehuʼi ʼaenī: “ ʼE tonu anai koa ke au kalaga ʼo aʼu ki ʼāfea, Ê Sehova, ke ke haofaki au, kae mole ke logo kiai? ʼO aʼu anai koa ki ʼāfea taku pāui kiā te koe ke ke tokoni mai ʼuhi ko te agamālohi, kae mole ke haofaki koe? He koʼē ʼe ke fakamamata mai kiā te au te meʼa ʼaē ʼe kovi pea mo ke haga sioʼi te maveuveu? Pea he koʼē ʼe tuʼu ʼi ʼoku muʼa ia te kaihaʼa ʼo te ʼu koloa pea mo te agamālohi, pea he koʼē ʼe ʼi ai te ʼu kē, pea he koʼē ʼe mālo te kē?”—Hapakuke 1:2, 3.
7 Ko te ʼu tagata ʼaia, neʼe natou agatonu pea neʼe natou fakaʼapaʼapa lahi ki te ʼAtua. Neʼe fakatonutonuʼi koa nātou ʼi tanatou lagaʼi te ʼu fehuʼi maʼuhiga ʼaia? Kailoa ia, kae neʼe fakatuʼutuʼu e Sehova ke tohi ʼi tana Folafola ia tanatou ʼu fehuʼi fakamālotoloto ʼaia. Iā ʼaho nei, ko he tahi ʼe ina tuʼaniaʼi te tuputupu ʼo te agakovi ʼe lagi hālofia ʼi te faʼahi fakalaumālie, pea ʼe ina fia maʼu te ʼu tali ʼo tana ʼu fehuʼi, ʼaē ko te Tohi-Tapu pē ʼe ina lava foaki age kiai. Tou manatuʼi, neʼe vikiʼi e Sesu ia nātou ʼaē ʼe hālofia ʼi te faʼahi fakalaumālie, peʼe ko nātou ʼaē ʼe natou “ ʼiloʼi tonatou masiva fakalaumālie.” (Mateo 5:3) ʼE ko he pilivilēsio hata tokoni ki te taʼi hahaʼi ʼaia ke natou maʼu ia te fiafia ʼaē neʼe fakapapau mai e Sesu!
8. Koteā te ʼu akonaki hala ʼaē neʼe tupu ai te tukugākoviʼi ʼo te ʼAtua e te hahaʼi, ʼe ko ia ʼaē ʼe tupu ai te mamahi, pea ʼe tou lava tokoni feafeaʼi kiā nātou?
8 Tolu, ʼe lagi ʼaoga ke tou tokoni ki he tahi ke mahino ʼe mole ko te ʼAtua ʼaē ʼe hoko ai te tuputupu ʼo te agakovi ʼi te mālamanei. Tokolahi te hahaʼi neʼe akoʼi age kiā nātou, ko te ʼAtua ʼe pule ki te mālamanei ʼaē ʼe tou māʼuʼuli ai, pea kua fualoa ia te fakatuʼutuʼu e te ʼAtua ia meʼa fuli ʼaē kā hoko kiā tātou, pea ʼe mole feala hata mahino ki te ʼu malaʼia ʼaē ʼe ina tuku ifo ki te mālamanei. ʼE mole moʼoni ia te ʼu akonaki ʼaia heʼe natou moamoagaʼi te ʼAtua pea mo tukugākoviʼi ia ia ʼo ʼuhiga mo te agakovi pea mo te mamahi ʼaē ʼe hoko ʼi te mālamanei. Koia, ʼe lagi tonu ai ke tou fakaʼaogaʼi ia te Folafola ʼa te ʼAtua moʼo fakatonutonuʼi te ʼu fakamatala ʼaia. (2 Timoteo 3:16) ʼE mole ko Sehova ʼaē ʼe ina puleʼi te mālama agakovi ʼaenī; kae ko Satana te Tēvolo ʼaē ʼe ina puleʼi. (1 Soane 5:19) ʼE mole heʼeki fakatuʼutuʼu fakatomuʼa e Sehova te maʼuli ʼo te hahaʼi; ʼe ina foaki ki te tagata takitokotahi ia te loto faʼifaʼitaliha pea mo te ʼu fealagia ke ina fili te meʼa ʼaē ʼe lelei pea mo te meʼa ʼaē ʼe kovi, te meʼa ʼaē ʼe faitotonu pea mo te meʼa ʼaē ʼe heʼe faitotonu. (Teutalonome 30:19) Pea ko Sehova ʼe mole he temi ʼe ina fai he aga ʼe kovi; ʼe fehiʼa ia ki te agakovi pea ʼe tokaga kiā nātou ʼaē ʼe gaohi koviʼi.—Sopo 34:10; Tāʼaga Lea 6:16-19; 1 Petelo 5:7.
9. Koteā te ʼu tohi faka Tohi-Tapu neʼe foaki mai e “te tagata kaugana agatonu mo poto” moʼo tokoni ki te hahaʼi ke natou mahino, pe koʼē ʼe fakagafua e Sehova ʼAtua ia te mamahi?
9 Kā kua ʼosi leva te ʼu fakamahino ʼaia ʼi takotou fai age, lagi kua feala kiā ia ʼaē ʼe fai palalau mo koutou, ke mahino pe koʼē ʼe fakagafua e te ʼAtua ia te mamahi. Moʼo tokoni kiā koutou, neʼe foaki mai e “te tagata kaugana agatonu mo poto” ia te ʼu tuʼuga tohi faka Tohi-Tapu moʼo tali ki te faʼahi ʼaia. (Mateo 24:45-47) Ohagē lā, ʼi te Fakatahi Faka Tisitilike ʼo te taʼu 2005-2006 ʼaē ko tona kupu tāfito ia “Te Fakalogo Ki Te ʼAtua,” neʼe fakahā ai te kiʼi pepa lotu Kua Vave Fakagata Te ʼu Mamahi Fuli! Kapau ʼe maʼu te kiʼi pepa lotu ʼaia ʼi takotou lea, kotou fakamāmāhani mo te ʼu manatu ʼaē ʼe tuʼu ʼi ai. ʼO toe fēia, mo te tohi Koteā ʼAē ʼe Akoʼi Moʼoni Mai ʼi Te Tohi-Tapu? ʼaē kua tā ʼi te temi nei kiā lea e 157, ʼe ʼi ai te kāpite ʼe talanoa tāfito ki te fehuʼi maʼuhiga ʼaia. Kotou fakaʼaogaʼi lahi ia te ʼu tohi faka Tohi-Tapu ʼaia. ʼE fakamahino ʼi te ʼu tohi ʼaia, te fakamatala faka Tohi-Tapu ʼo te fakafihiʼi ʼi Eteni ia te pule faʼitaliha ʼo te ʼatulaulau pea mo te faʼahiga fakatokatoka ʼaē neʼe filifili e Sehova ke ina fakaʼaogaʼi ki te fakafifihi ʼaia. Kotou toe manatuʼi foki mokā kotou vakaʼi te fehuʼi ʼaia, fakahā age ki ai te faʼahi tāfito ʼo te ʼatamai mālama ʼaia. ʼE ko te ʼatamai mālama ʼo ʼuhiga mo Sehova pea mo tona ʼu kalitātē taulekaleka.
Tou Faka Maʼuhigaʼi Te ʼu Kalitātē ʼo Sehova
10. He koʼē ki te tokolahi ʼe mata faigataʼa hanatou mahino ki te fakagafua ʼaē e te ʼAtua ia te mamahi, pea ko te ʼatamai mālama fea ʼaē kā tokoni anai kiā nātou?
10 Kapau ʼe kotou tokoni ki te hahaʼi ke natou mahino pe koʼē neʼe fakagafua e Sehova ki te tagata ke ina puleʼi pē ia ia totonu ʼaki te takitaki ʼa Satana, kotou faka maʼuhigaʼi tāfito ia te ʼu kalitātē taulekaleka ʼo Sehova. Tokolahi te hahaʼi ʼe natou ʼiloʼi ʼe mālohi ia te ʼAtua, pea ʼi te agamāhani ʼe natou logo ʼe higoaʼi ko te ʼAtua Māfimāfi. Kae ʼe lagi mata faigataʼa hanatou mahino pe koʼē ʼe mole fakaʼaogaʼi e te ʼAtua ia tona mālohi lahi moʼo fakagata te heʼe faitotonu pea mo te mamahi. ʼE lagi mole natou mahino ki te tahi age ʼu kalitātē ʼo Sehova, ohagē ko tona māʼoniʼoni, tana faitotonu, tona poto, pea mo tona ʼofa, pea ʼe ina fakaʼaogaʼi kātoa pea mo fakapotopoto ia tona ʼu kalitātē ʼaia. Koia, ʼe ʼui fēnei ai ʼi te Tohi-Tapu: “ ʼE haohaoa tana gāue.” (Teutalonome 32:4) ʼE feafeaʼi hakotou fakaʼaogaʼi te ʼu kalitātē ʼaia moʼo tali ki te ʼu fehuʼi ʼaē ʼe lagaʼi māhani ki te faʼahi ʼaia? Tou vakaʼi age muʼa te ʼu faʼifaʼitaki.
11, 12. (a) He koʼē neʼe mole feala ke fakamolemole ia te agahala ʼa Atama mo Eva? (b) He koʼē ʼe mole fakagafua anai e Sehova ia te agahala ke hoholo ʼo talu ai?
11 Neʼe feala pē koa kiā Sehova ke ina fakamolemole ia te agahala ʼa Atama mo Eva? Neʼe mole ʼi ai he fakamolemole neʼe fakatuʼutuʼu ki te agahala ʼaē neʼe nā fai, he neʼe nā haohaoa, pea neʼe ʼiloʼi lelei pē e Atama mo Eva ia te meʼa ʼaē ʼe nā fai, ʼo nā fili faʼifaʼitaliha ke nā situʼa ki te pule faʼitaliha ʼa Sehova kae nā fakalogo nāua ki te takitaki ʼa Satana. Koia ʼe mole tou punamaʼuli ai ki te mole fakahemala ʼa te ʼu agatuʼu ʼaia. Kae kā fehuʼi mai ia te hahaʼi pe koʼē neʼe mole fakamolemole e Sehova ia tanā talagataʼa, lagi ʼe natou feʼekeʼaki, he koʼē neʼe mole meʼa noaʼi muʼa e Sehova ia tana ʼu lēkula kae neʼe ina fakagafua ia te agahala pea mo te talagataʼa. Ko te tali ki te fehuʼi ʼaia ʼe pipiki ki te kalitātē maʼuhiga ʼo te ʼulugaaga ʼa Sehova: tona ʼuhiga māʼoniʼoni.—Ekesote 28:36; 39:30.
12 ʼE tuʼa lahi te fakahā ʼi te Tohi-Tapu ia te ʼuhiga māʼoniʼoni ʼo Sehova. Kae meʼa fakaʼofaʼofa, heʼe tokosiʼi te hahaʼi ʼi te tuʼu agakovi ʼaenī ʼe natou mahino ki te kalitātē ʼaia. Ko Sehova ʼe maʼa, mo taputapu, pea ʼe haohaoa ia mai te agahala. (Isaia 6:3; 59:2) ʼO ʼuhiga mo te agahala, neʼe kua ina fakatuʼutuʼu te puleʼaki moʼo totogi ia te faʼahi ʼaia, moʼo toʼo te agahala, kae ʼe mole ina fakagafua anai ke hoholo ʼo talu ai. Kanapau lā neʼe fakagafua e Sehova ia te agahala ke hoholo ʼo talu ai, kanaʼaua lā neʼe mole ʼi ai anai hatatou ʼamanaki ki te kā haʼu. (Tāʼaga Lea 14:12) ʼI te temi ʼaē kua ina fakakatofa kiai, ʼe toe haga anai ia Sehova ʼo toe fakaliliu ia te kele kātoa ke māʼoniʼoni. ʼE hoko moʼoni te faʼahi ʼaia, heʼe ko te finegalo ʼo te Māʼoniʼoni.
13, 14. He koʼē neʼe mole fakaʼauha e Sehova ia te ʼu agatuʼu ʼi Eteni?
13 Neʼe feala pē koa kiā Sehova ke ina fakaʼauha ia te ʼu agatuʼu ʼi Eteni pea mo ina toe kamata tana fakatuʼutuʼu? Neʼe maʼu pē e Sehova ia te mālohi moʼo fai ia te faʼahi ʼaia; pea kua vave pē tana fakaʼaogaʼi ʼo te mālohi ʼaia moʼo fakaʼauha ia te kau agakovi fuli. ʼE feala ke ʼui fēnei e ʼihi: ‘He koʼē neʼe mole ina fai te faʼahi ʼaia ʼi te moʼi temi ʼaē neʼe kei toko tolu ai te kau talagataʼa ʼi te ʼatulaulau? ʼE mole tāʼofi ai anai koa ia te hoholo ʼo te agahala pea mo te malaʼia fuli ʼaē ʼe tou sio kiai ʼi te mālamanei?’ He koʼē neʼe mole fai e Sehova ia te puleʼaki ʼaia? ʼE ʼui fēnei iā Teutalonome 32:4: “Ko tona ʼu ala fuli ʼe faitotonu.” Ko Sehova ʼe pipiki mālohi ki te faitotonu. ʼEī, “ko Sehova ʼe ʼofa ki te faitotonu.” (Pesalemo 37:28) ʼI te ʼofa ʼa Sehova ki te faitotonu, koia ʼaē neʼe mole ina fakaʼauha ai te ʼu agatuʼu ʼi Eteni. He koʼē neʼe ina fai ia te fakatuʼutuʼu ʼaia?
14 ʼI te fakafeagai ʼa Satana neʼe malaga ai te fehuʼi ʼo ʼuhiga mo te lakatonu ʼo te pule faʼitaliha ʼa te ʼAtua. Pea neʼe tonu leva ki te faitotonu ʼa Sehova ke fai he tali ki te fakafifihi ʼa Satana. Kana neʼe tauteaʼi atu aipē te ʼu agatuʼu, he neʼe tuha mo nātou ia te faʼahi ʼaia, ʼe mole maʼu anai ia te tali ki te fehuʼi ʼaia. ʼE fakahā pē anai e Sehova ʼi tana tautea ʼaia ia tona mālohi ʼaupitō, kae neʼe mole ko tona mālohi ʼaē neʼe fakafifihi. Tahi ʼaē, neʼe fakahā e Sehova tana fakatuʼutuʼu kiā Atama mo Eva. Neʼe tonu ke nā fānaunau pea mo nā fakafonu ia te kele, ʼo nā puleʼi, pea ke fakalogo ia meʼa fuli kiā nāua. (Senesi 1:28) Kana neʼe fakaʼauha lā e Sehova ia Atama mo Eva, ʼe ʼalunoa anai ia tana fakatuʼutuʼu ʼaē neʼe ina fakahā age kiā nāua ʼo ʼuhiga mo te tagata. Neʼe mole feala ʼi he temi ki te faitotonu ʼa Sehova ke ina fai he meʼa fēia, heʼe ko tana fakatuʼutuʼu ʼe fakahoko tuʼumaʼu.—Isaia 55:10, 11.
15, 16. Kā fakahā mai e te hahaʼi he “ ʼu puleʼaki” ki te fakafifihi ʼaē neʼe malaga ʼi Eteni, ʼe tou lava tokoni feafeaʼi age kiā nātou?
15 Neʼe feala ʼapē koa ke ʼi ai he tahi ʼi te ʼatulaulau ke ina fakatokatoka te fakafeagai ʼaki he poto ʼe lahi age iā Sehova? Ko ʼihi ʼe lagi natou fakahā anai hanatou “ ʼu puleʼaki” moʼo fakatokatoka ia te fakafeagai ʼaē neʼe fai ʼi Eteni. Kae ʼi tanatou fai ia te faʼahi ʼaia, ʼe hagē pē ʼe natou ʼui ʼe lelei age tanatou puleʼaki moʼo fakatokatoka te fihifihia ʼaia? ʼE lagi mole natou fai ʼaki he ʼu manatu ʼe kovi, kae ʼe mole natou ʼiloʼi ia Sehova pea mo tona poto fakatupu manavasiʼi. ʼI tana faitohi ki te ʼu Kilisitiano ʼi Loma, neʼe loloto ia te mahino ʼa Paulo ki te poto ʼo te ʼAtua, ohagē lā ko te “meʼa fakalilo taputapu” ʼo ʼuhiga mo te fakatuʼutuʼu ʼa Sehova ʼaē ke ina fakaʼaogaʼi te Puleʼaga Faka Mesianike moʼo foaki ia te totogi ʼo te mālamanei agatonu pea moʼo faka tapuhā Tona huafa māʼoniʼoni. Neʼe malave feafeaʼi kiā Paulo ia te poto ʼo te ʼAtua ʼaē neʼe ina fai ia te fakatuʼutuʼu ʼaia? Neʼe fakaʼosi e te ʼapositolo ia tana tohi ʼaki te ʼu palalau ʼaenī: “Ke foaki ki te ʼAtua, ʼaē ʼe poto tokotahi pē, ia te kolōlia ʼaki ia Sesu Kilisito, ʼo talu ai. Ameni.”—Loma 11:25; 16:25-27.
16 Neʼe mahino kiā Paulo ʼe ko Sehova ʼaē ʼe “poto tokotahi pē”—te māʼoluga ʼo te poto ʼi te ʼatulaulau. Peʼe ko te tagata agahala fea ʼaē ʼe ina lava ʼui ʼe lelei age hana fakatokatoka he fihifihia—tāfito lā te fakafifihi ʼa Satana ʼo ʼuhiga mo te lakatonu ʼo te pule faʼitaliha ʼa te ʼAtua? Koia ʼe tonu ai ke tou tokoni ki te hahaʼi ke natou maʼu ia te manavasiʼi ʼaē ʼe tou maʼu ki te ʼAtua ʼaē ʼe “poto.” (Sopo 9:4) Kapau ʼe tou mahino lelei ki te poto ʼo Sehova, pea ʼe lahi age anai tatatou falala kātoa, ʼe lelei age pē ia tana faʼahiga fakatokatoka ʼaē ʼo te fihifihia.—Tāʼaga Lea 3:5, 6.
Tou Fakafetaʼi Ki Te Kalitātē Maʼuhiga ʼAupitō ʼo Sehova
17. ʼE tokoni feafeaʼi kiā nātou ʼaē ʼe natou tuʼaniaʼi ia te fakagafua ʼaē e te ʼAtua ia te mamahi mo kapau ʼe natou mahino lahi age ki te ʼofa ʼo Sehova?
17 “Ko te ʼAtua ʼe ʼofa.” (1 Soane 4:8) ʼAki te ʼu palalau maʼuhiga ʼaia, ʼe fakahā ʼi te Tohi-Tapu ia te kalitātē maʼuhiga ʼaupitō ʼo Sehova, pea mo lahi age ʼi tona ʼu kalitātē fuli pea mo fakaloto fīmālie ʼaupitō kiā nātou ʼaē ʼe natou tuʼaniaʼi te tuputupu ʼo te agakovi. Neʼe fakahā e Sehova ia te ʼofa ʼi te ʼu faʼahi fuli ʼo tana fakatokatoka ia te agahala ʼaē ʼe ina maumauʼi te ʼu meʼa ʼaē neʼe ina fakatupu. ʼAki tona ʼofa, neʼe foaki e Sehova ia te ʼamanaki ki te hōloga agahala ʼo Atama mo Eva. (Senesi 3:15) Neʼe fakagafua e te ʼAtua ki te hōloga ʼaia ke natou fakaovi age kiā te ia ʼi te faikole, pea mo faka fealagia ai kiā nātou ke natou maʼu ia tona ʼofa. ʼAki pē tona ʼofa, neʼe foaki e te ʼAtua ia te totogi moʼo tofa ia te ala ki te fakamolemole kātoa ʼo te ʼu agahala pea mo toe foaki ia te maʼuli haohaoa pea mo heʼegata. (Soane 3:16) ʼAki pē tona ʼofa, neʼe mole ina fakaʼauha te mālamanei, kae neʼe ina tuku age ia te faigamālie ke natou fakafeagai kiā Satana pea mo natou fakalogo kiā Sehova ko honatou Pule Faʼitaliha.—2 Petelo 3:9.
18. Koteā te mahino ʼaē ʼe tou fiafia ai, pea koteā ʼaē kā tou vakaʼi anai ʼi te ʼalatike kā hoa mai?
18 ʼI te temi ʼaē neʼe palalau ai te pasitea ki te nofoʼaki ʼaē neʼe fakatahitahi moʼo fakamanatu ia te ʼaho ʼaē neʼe fai ai te agamālohi, neʼe ina ʼui fēnei: “ ʼE mole tou ʼiloʼi te tupuʼaga ʼo te fakagafua e te ʼAtua ia te agakovi pea mo te mamahi.” ʼI meʼa fakaʼofaʼofa! ʼE mole tou fiafia koa lā ʼi tatatou mahino ʼaē ki te fakagafua e te ʼAtua ʼo te mamahi? (Teutalonome 29:29) Pea ʼi tatatou ʼiloʼi ʼaē ko Sehova ʼe poto, mo faitotonu, pea mo ʼofa, ʼe tou ʼiloʼi kua vave pē anai ia tana fakagata te ʼu mamahi fuli. ʼEī, neʼe ina fakapapau mai ʼe ina fai anai. (Fakahā 21:3, 4) Kae ʼe ʼi ai koa he falalaʼaga kiā nātou fuli ʼaē kua mamate lolotoga ni ʼu sēkulō? Ko te faʼahiga fakatokatoka ʼo te fihifihia ʼaē neʼe fai e Sehova ʼi Eteni, ʼe maʼu ai koa he ʼamanaki kiā nātou ʼaia kua mamate? ʼEī. ʼAki tona ʼofa, neʼe ina toe foaki kiā nātou ia te fakatuʼuake. ʼE tou vakaʼi anai ia te faʼahi ʼaia ʼi te ʼalatike ʼaē kā hoa mai.
ʼE Kotou Tali Feafeaʼi Anai?
• Koteā ʼaē ʼe tou lava ʼui age ki he tahi ʼe ina fehuʼi mai pe koʼē ʼe fakagafua e te ʼAtua ia te mamahi?
• ʼE hā feafeaʼi ia te māʼoniʼoni pea mo te faitotonu ʼa Sehova ʼi tana faʼahiga fakatokatoka ia te ʼu agatuʼu ʼi Eteni?
• He koʼē ʼe tonu ke tou tokoni ki te hahaʼi ke lahi age tanatou mahino ki te ʼofa ʼo Sehova?
[Paki ʼo te pasina 14]
Ko te ʼu tagata agatonu ko Tavite pea mo Hapakuke, neʼe nā fai ia te ʼu fehuʼi fakamālotoloto ki te ʼAtua