Kotou Fakaovi Ki Te ʼAtua
ʼE Lotomahino Ia Ki Totatou Mamahi
“KO TE lotomahino ʼe ko taku logoʼi tou mamahi ʼi toku loto.” Ko te fakaʼuhiga ʼaia e te misionea kua matuʼa ʼe Fakamoʼoni kiā Sehova ia te kalitātē ʼaē ko te lotomahino. Ko Sehova ʼAtua ʼe ko te faʼifaʼitaki tāfito ʼo te lotomahino. ʼE ina logoʼi ia te mamahi ʼo tana hahaʼi. He koʼē ʼe feala ke tou tui papau ʼo ʼuhiga mo te faʼahi ʼaia? Ko te lotomahino ʼa Sehova ʼe ʼiloga kātoa ʼi te ʼu palalau pea mo te ʼu gāue ʼa Sesu ʼi tana ʼi te kele. (Soane 5:19) Tou vakaʼi ia te faʼifaʼitaki ʼo te ʼaluʼaga ʼaē ʼe talanoa kiai ia Soane 11:33-35.
ʼI te temi ʼaē neʼe mate fakapunamaʼuli ai ia te kaumeʼa ʼo Sesu ʼaē ko Lasalo, neʼe ʼalu ia Sesu ki te kolo ʼo Lasalo. ʼE mahino ia, neʼe lotomamahi ʼaupitō ia te ʼu tokolua ʼo Lasalo, ʼaē ko Malia pea mo Maleta. Neʼe ʼofa ʼaupitō ia Sesu ki te fāmili ʼaia. (Soane 11:5) Koteā ʼaē kā ina fai anai? ʼE ʼui fēnei ʼi te fakamatala: “Ko Sesu ʼi tana sio ki [te] tagi [ʼa Malia] pea mo te fetāgihi ʼa te kau Sutea ʼaē neʼe kaugā ʼomai mo ia, neʼe hoi ʼi te laumālie pea neʼe hoha ia; pea ʼui māʼana: ‘Neʼe kotou tuku ia ia kifea?’ Neʼe ʼui maʼa nātou kiā te ia: ‘ ʼAliki, haʼu pea ke ke sio.’ Neʼe tagi ai Sesu.” (Soane 11:33-35) Koteā te tupuʼaga ʼo te tagi ʼa Sesu? ʼE moʼoni ia, neʼe kua mate ia tona kaumeʼa ko Lasalo, kae neʼe ʼiloʼi e Sesu ʼe ina ʼamanaki fakatuʼuake ia ia. (Soane 11:41-44) Koteā te tahi meʼa ʼaē neʼe malave ki te loto ʼo Sesu?
Kotou toe vakaʼi age ia te ʼu palalau ʼaē ʼe tuʼu ki ʼoluga age. Kotou tokagaʼi ʼi te sio ʼa Sesu kiā Malia pea mo nātou ʼaē neʼe kaugā ʼomai mo ia ʼe natou fetāgihi, neʼe “hoi” pea “neʼe hoha ia.” Ko te ʼu kupu ʼaia ʼe fakaʼaogaʼi ʼi henī moʼo fakahā ia he ʼu meʼa ʼe kita logoʼi mālohi.a Neʼe malave ʼaupitō iā Sesu ia te meʼa ʼaē neʼe sio kiai. Ko te tuputupu ʼo te mālohi ʼo te ʼu meʼa ʼaē neʼe ina logoʼi neʼe hā ʼi te fonu ʼo tona ʼu loʼimata. ʼE mahino mai, neʼe malave ki te loto ʼo Sesu ia te mamahi ʼa ʼihi. Pe neʼe mole koa lā kotou kamata tagi koteʼuhi ʼe ʼi ai te tahi ʼe kotou tokaga ki ai neʼe tagi?—Loma 12:15.
ʼE tokoni mai ia te lotomahino ʼa Sesu kiā tātou ke tou akoʼi ia te ʼu kalitātē pea mo te ʼu faʼahiga fai ʼo tana Tamai, ia Sehova. Tou manatuʼi neʼe fakahā lelei e Sesu ia te ʼu kalitātē ʼo tana Tamai koia neʼe ina lava ʼui ai: “Ko ʼaē kua sio kiā te au kua toe sio foki ki te Tamai.” (Soane 14:9) Koia ʼi te temi ʼaē “neʼe tagi ai Sesu,” ʼe feala ke tou tui papau neʼe logoʼi e Sehova ia te ʼu mamahi ʼo tana kau ʼatolasio. ʼI tona fakahagatonu, ko ʼihi kau faitohi Tohi-Tapu neʼe natou fakamoʼoni ki te faʼahi ʼaia. (Isaia 63:9; Sakalia 2:8) ʼI ʼAtua agaʼofa leva ko Sehova!
ʼE tou fia fakaovi ki te hahaʼi ʼaē ʼe natou fakahā te lotomahino. ʼI te temi ʼaē ʼe tou lotovaivai pea tou lotomamahi ai, ʼe tou fakaovi ki hotatou kaumeʼa ʼe feala ke mahino ki totatou ʼaluʼaga pea mo ina vaevae totatou mamahi. ʼI toe lelei lahi age hatatou fakaovi kiā Sehova, he ʼAtua manavaʼofa ʼaē ʼe ina logoʼi totatou ʼu mamahi pea mo lotomahino ki te tupuʼaga ʼo tatatou ʼu tagi!—Pesalemo 56:8.
[Nota]
a Ko te kupu Fakakeleka ʼaē neʼe fakaliliu ʼaki te kupu “neʼe tagi” ʼe tau fakaʼuhiga ki “he tagi fakalogologo,” kae ko te kupu ʼaē neʼe fakaʼaogaʼi moʼo fakahā ia te fetāgihi ʼa Malia pea mo ʼihi atu ʼaē ʼe lagi fakaʼuhiga “ki he tagi leʼolahi, peʼe tagilāulau.”