Neʼe Maʼuhiga ʼAupitō Kiā Sopo Ia Te Huafa ʼo Sehova
“Ke hoko atu ia te tapuakiʼi ʼo te huafa ʼo Sehova.”—SOPO 1:21.
1. Ko ai ʼaē neʼe lagi ina tohi ia te tohi ʼo Sopo, pea neʼe tohi ʼi te temi fea?
NEʼE ko te taʼu 40 ʼo Moisese ʼi te temi ʼaē neʼe hola ai mai Esipito ke mole matehi ia ia e Falaone pea neʼe ʼalu ki Matiane. (Gāue 7:23) ʼI tana nofo ʼi te fenua ʼaia, neʼe lagi logo ki te ʼu fihifihia neʼe tau mo Sopo, ʼaē neʼe nofo ʼi Usa ʼaē ʼe tuʼu ovi age pē ki Matiane. ʼI te ʼu taʼu ki muli age, ʼi te nofo ovi ʼa Moisese pea mo te puleʼaga ʼo Iselaele ki Usa ʼi te fakaʼosi ʼo tonatou fagona ʼi te toafa, neʼe lagi logo ia Moisese ki te ʼu meʼa ʼaē neʼe hoko ʼi te ʼu taʼu fakaʼosi ʼo te maʼuli ʼo Sopo. ʼI te talatisio ʼa te kau Sutea, ʼe ʼui neʼe tohi e Moisese ia te tohi ʼo Sopo mole faʼa fualoa ʼi te kua ʼosi mate ʼa Sopo.
2. Ko te ʼu faʼahi fea ʼe fakalotomālohiʼi ai e te tohi ʼo Sopo ia te ʼu kaugana ʼa Sehova ʼo te temi nei?
2 Ko te tohi ʼo Sopo ʼe ina fakalotomālohiʼi ia te tui ʼa te ʼu kaugana ʼa te ʼAtua ʼo te temi nei. ʼI te ʼu faʼahi fea? ʼAki te hisitolia ʼaia, ʼe tou mahino ai ki te ʼu meʼa maʼuhiga neʼe hoko ʼi te lagi pea mo fakatokagaʼi mai ia te fehuʼi maʼuhiga ʼaē neʼe lagaʼi ʼo ʼuhiga mo te pule faʼitaliha ʼa te ʼAtua. ʼAki te hisitolia ʼo Sopo, ʼe tou toe mahino lahi ai ki te fakaʼuhiga ʼo tatatou taupau ia tatatou agatonu pea mo tokoni mai ke tou mahino, pe koʼē ʼi ʼihi temi ʼe fakagafua e Sehova ke fakamamahiʼi ia tana ʼu kaugana. Tahi ʼaē, ko te tohi ʼo Sopo ʼe ina fakahā lelei mai, ʼe ko Satana te Tēvolo ia te Fili lahi ʼo Sehova pea mo te mālamanei. Ko te tohi ʼaia ʼe ina toe fakahā mai, ʼe feala ki ni hahaʼi heʼe haohaoa ohagē ko Sopo ke natou nonofo agatonu kiā Sehova logolā ia te ʼu fihifihia lahi ʼaē ʼe tau mo nātou. Tou vakaʼi age muʼa ia te ʼu meʼa ʼaē neʼe hoko ʼe talanoa kiai te tohi ʼo Sopo.
Te ʼAhiʼahiʼi ʼo Sopo e Satana
3. Koteā ʼaē ʼe tou ʼiloʼi ʼo ʼuhiga mo Sopo, pea he koʼē neʼe fakatagaʼi tāfito ia ia e Satana?
3 Ko Sopo neʼe ko te tagata maʼu koloa pea mo maʼuhiga ʼaupitō, ko he pāteliaka ʼe ina takitaki lelei ia tona fāmili. ʼE mahino mai, neʼe ko he tagata fai tokoni neʼe fakaʼapaʼapaʼi ʼaupitō pea neʼe tokoni ki te hahaʼi māsisiva. Kae ko te faʼahi ʼaē neʼe maʼuhiga tāfito, ko Sopo neʼe manavasiʼi ia ki te ʼAtua. ʼE ʼui ko Sopo neʼe ko he tagata “agatonu pea mo faitotonu, ʼe manavasiʼi ki te ʼAtua pea mo fakamamaʼo mai te kovi.” Pea ko Satana te Tēvolo neʼe ina fakatagaʼi ia Sopo tupu tāfito ko tana pipiki ʼaē ki te ʼAtua kae neʼe mole ʼuhi ko tona ʼu koloa pea mo tona maʼuhiga.—Sopo 1:1; 29:7-16; 31:1.
4. Koteā ia te agatonu?
4 ʼI te kamataʼaga ʼo te hisitolia ʼo te tohi ʼo Sopo, ʼe talanoa ki te fakatahi neʼe hoko ʼi te lagi pea neʼe māʼopoʼopo kiai ia te ʼu ʼāselo iā muʼa ʼo Sehova. Neʼe kau ai mo Satana, pea neʼe ina tukugākoviʼi ai Sopo. (Lau ia Sopo 1:6-11.) Logolā neʼe ko te ʼu koloa ʼo Sopo ʼaē neʼe talanoa kiai Satana, kae ko te faʼahi ʼaē neʼe ina fia fakafifihi tāfito ʼe ko te agatonu ʼa Sopo. Ko te kupu “agatonu” ʼe fakaʼuhiga ki he tahi ʼe totonu, ʼe mole ina fai he meʼa ʼe kovi pea mo faitotonu. ʼI te Tohi-Tapu, ʼe fakaʼuhiga ia te agatonu ʼa te tagata ki he tauhi ʼaki he loto kātoa kiā Sehova.
5. Koteā ʼaē neʼe lau e Satana ʼo ʼuhiga mo Sopo?
5 Neʼe lau e Satana ko te tauhi ʼa Sopo ki te ʼAtua ʼe mālualoi ia, kae ʼe mole agatonu ia. Neʼe lau e Satana ʼe agatonu pē Sopo ʼuhi heʼe ko te ʼAtua ʼe ina fakapale tuʼumaʼu pē ia ia pea mo puipui ia ia. Moʼo tali ki te ʼu tukugākovi ʼa Satana, neʼe fakagafua age leva e Sehova ke ina ʼohofi ia te tagata agatonu ʼaia. Koia, ʼi te ʼaho pē e tahi, neʼe fakahā age kiā Sopo te kaihaʼa pea mo te matematehi ʼo tana faga manu, ʼo fēia mo tana ʼu tagata kaugana, pea mo te kua mate ʼo tana ʼu fānau e toko hogofulu. (Sopo 1:13-19) Ko te ʼohofi ʼa Satana neʼe ina maumauʼi ai koa ia te agatonu ʼa Sopo? Ko te hisitolia fakatohi-tapu ʼe ina fakahā mai ia te aga ʼa Sopo ʼi te temi ʼaē neʼe puli fuli ai tona ʼu koloa: “Ko Sehova totonu neʼe ina foaki pea ko Sehova totonu pē ʼaē neʼe ina toe toʼo. Ke hoko atu te tapuakiʼi ʼo te huafa ʼo Sehova.”—Sopo 1:21.
6. (a) Koteā ʼaē neʼe hoko ʼi te lolotoga ʼo te tahi fakatahi ʼi te lagi? (b) Ko ai ʼaē neʼe manatu ki ai Satana ʼi te temi ʼaē neʼe ina fakafihiʼi ai ia te agatonu ʼa Sopo kiā Sehova?
6 Ki muli age, neʼe fai ia te tahi fakatahi ʼi te lagi. Neʼe toe tukugākoviʼi aipē e Satana ia Sopo, ʼo ʼui māʼana: “Ko te kili maʼa te kili, pea ko meʼa fuli ʼaē ʼe maʼu e he tagata, ʼe ina foaki anai ia moʼo haofaki ia tona maʼuli. Moʼo fetogi, fakalelei muʼa, kae ke faoʼi atu tou nima ki ai, pea ke fā ki tona hui pea mo tona kakano, pea ke sio ai leva peʼe mole laukovi atu anai kiā te koe.” Kotou fakatokagaʼi neʼe mole ko Sopo pē ʼaē neʼe fia tukugākoviʼi e Satana. ʼI tana ʼui ʼaē: “Ko meʼa fuli ʼaē ʼe maʼu e he tagata, ʼe ina foaki anai ia moʼo haofaki ia tona maʼuli,” neʼe mole fakafifihi pē e te Tēvolo ia te agatonu ʼa Sopo, kae ʼe toe kau aipē foki mo ‘nātou’ fuli ʼaē ʼe tauhi kiā Sehova. Ki muli age, neʼe fakagafua e te ʼAtua kiā Satana ke ina fakamamahiʼi ia Sopo ʼaki te mahaki fakamataku. (Sopo 2:1-8) Kae neʼe mole gata aipē ia te ʼu fihifihia ʼaē neʼe hoko kiā Sopo.
Te Ako ʼe Tou Lava Tāʼofi Mai Te Aga ʼa Sopo
7. Ko te ʼu faʼahi fea ʼaē neʼe fakamamahiʼi ai Sopo e tona ʼohoana pea mo tona ʼu kaumeʼa?
7 ʼI te kamata ʼo te ʼu mamahi ʼo Sopo, neʼe lotomamahi mo tona ʼohoana ohagē pē ko ia. Neʼe lagi lotomamahi ʼaupitō ʼi te mamate ʼo tana fānau pea mo te puli ʼo tona ʼu koloa. Neʼe lagi lotomamahi ʼi tana sio ki te mahaki fakamataku ʼaē neʼe tau mo tona ʼohoana. Neʼe kalaga fēnei ia kiā Sopo: “ ʼE kei ke taupau maʼu pē koa tau agatonu? Laukovi lā ki te ʼAtua pea ke mate!” ʼOsi ʼaia pea ʼomai ia te ʼu tagata e toko tolu: ko Elifasi, Pilitate pea mo Sofale, lagi moʼo fakafīmālieʼi ia Sopo. Kae neʼe natou fakaʼaogaʼi ia te ʼu manatu hala pea neʼe natou liliu ai “ko te ʼu tagata fakalotofīmālie aga fakakinakina.” Ohagē lā neʼe ʼui e Pilitate, ko te ʼu fānau ʼa Sopo neʼe natou agahala pea neʼe tuha mo nātou ia te tautea ʼaē neʼe hoko kiā nātou. Neʼe ʼui e Elifasi, ko te ʼu mamahi ʼo Sopo neʼe ko hona fakatūʼā ki hana ʼu agahala neʼe ina fai ki muʼa atu. Neʼe ina toe fakatupu lotolotolua ʼo ʼuhiga mo te maʼuhiga moʼoni ʼaē kiā mata ʼo te ʼAtua, ʼo nātou ʼaē ʼe nonofo agatonu! (Sopo 2:9, 11; 4:8; 8:4; 16:2; 22:2, 3) ʼI te ʼu temi faigataʼa ʼaupitō ʼaia, neʼe nofo agatonu aipē ia Sopo. ʼIo, neʼe lakahala ʼi tana ‘ ʼui ʼaē ʼe faitotonu age ia tona nefesi ʼi te ʼAtua.’ (Sopo 32:2) Kae ʼi te ʼu ʼaluʼaga fuli pē neʼe nofo agatonu aipē ia.
8. Koteā ia te faʼifaʼitaki lelei neʼe tuku mai e Eliu kiā nātou ʼaē ʼe fai tokoni iā ʼaho nei?
8 Ki muli age, ʼe talanoa ʼo ʼuhiga mo Eliu, ʼaē neʼe haʼu mo ia ʼo ʼaʼahi ia Sopo. Neʼe fakalogo muʼa ia Eliu ki te ʼu palalau ʼaē neʼe fai e Sopo pea mo tona ʼu kaumeʼa e toko tolu. Logolā tana tūpulaga age ʼi te ʼu tagata matuʼa ʼaia e toko fā, kae neʼe fakahā e Eliu ʼi te temi ʼaia neʼe poto age ia, iā nātou. Neʼe lea fakaʼapaʼapa ia kiā Sopo, ʼo ina toʼo tona higoa. Neʼe vikiʼi e Eliu ia Sopo ʼo ʼuhiga mo tana maʼuli agatonu. Kae neʼe ina toe ʼui foki, ko Sopo neʼe tokaga fau ia ke fakamoʼoni ia tana agatonu. Koia neʼe fakahā lelei age e Eliu kiā Sopo, ko te tauhi agatonu ʼaē ki te ʼAtua ʼe ʼi ai tuʼumaʼu pē tona fua lelei. (Lau ia Sopo 36:1, 11.) ʼE ko he faʼifaʼitaki lelei kiā nātou ʼaē ʼe ʼaoga ke fai tokoni iā ʼaho nei! Neʼe loto faʼa kātaki ia Eliu, mo fakalogo lelei, mo fai he ʼu fakavikiviki ʼi te temi ʼaē neʼe ʼaoga ai, pea mo foaki ia te ʼu tokoni fakalotomālohi.—Sopo 32:6; 33:32.
9. Neʼe tokoni feafeaʼi ia Sehova kiā Sopo?
9 Ki muli age, ʼi te temi leva ʼaē neʼe palalau age Sehova kiā Sopo, neʼe ina maʼu ia te toe manavasiʼi lahi! ʼE ʼui fēnei ʼi te fakamatala: “Pea tali age ia Sehova kiā Sopo ʼi te lolotoga ʼo te ʼafā.” ʼAki he ʼu fehuʼi, neʼe tokoni ia Sehova mo te agalelei kiā Sopo ke ina fakatonutonuʼi tana ʼu manatu. Neʼe tali lelei e Sopo ia tona fakatonutonuʼi, ʼo ʼui māʼana: “Kua au liliu ʼo noa . . . ʼe au fakahemala ʼi te efu pea mo te lefulefu.” ʼI te ʼosi palalau ʼa Sehova kiā Sopo, neʼe Ina fakatonutonuʼi leva ia tona ʼu kaumeʼa e toko tolu, koteʼuhi neʼe mole natou palalau ʼo ʼuhiga mo te “meʼa ʼaē ʼe moʼoni.” Neʼe tonu ke hūfakiʼi e Sopo ia nātou. ʼOsi ʼaia, ko “Sehova totonu neʼe ina toe fakaʼāteaina Sopo mai tona maʼuli pōpula ʼi te temi ʼaē neʼe ina faikole ai maʼa tona ʼu kaumeʼa, pea neʼe toe liufaki e Sehova ia meʼa fuli ʼa Sopo, ʼo liuga lua.”—Sopo 38:1; 40:4; 42:6-10.
ʼE Feafeaʼi Ia Te Loloto ʼo Totatou ʼOfa ʼAē Kiā Sehova?
10. He koʼē neʼe mole meʼa noaʼi e Sehova ia Satana pea neʼe mole ina fakaʼauha ia ia?
10 Ko Sehova ʼe ko te Tupuʼaga ʼo te ʼatulaulau, te Tuʼi ʼo meʼa fuli neʼe fakatupu. He koʼē neʼe mole meʼa noaʼi e te ʼAtua ia te tukugākovi ʼa te Tēvolo? Koteʼuhi neʼe ʼiloʼi e te ʼAtua kapau ʼe ina meʼa noaʼi ia te ʼu lau ʼa Satana peʼe kapau ʼe ina fakaʼauha ia ia, ʼe mole ina fakatokatoka anai ia te fehuʼi ʼaē neʼe lagaʼi. Neʼe lau e te Tēvolo, ko Sopo ia te kaugana agatonu ʼa Sehova, ʼe mole nofo agatonu anai ia mo kapau ʼe toʼo ia tona ʼu koloa fuli. Neʼe nofo agatonu aipē ia Sopo ʼi tona ʼahiʼahiʼi ʼaia. Neʼe ʼui leva e Satana, ko te tagata ʼe lītuʼa anai ki te ʼAtua mo kapau ʼe fakamamahiʼi tona kakano. Neʼe mamahi ia Sopo, kae neʼe nofo agatonu aipē. Koia, neʼe hā lelei ai leva ia te loi ʼaē ʼa Satana ʼo ʼuhiga mo te tagata agatonu ʼaia logolā tana mole haohaoa. ʼE feafeaʼi ki te kau ʼatolasio ʼa te ʼAtua?
11. Koteā ia te tali lelei neʼe fai e Sesu ki te ʼu tukugākovi ʼa Satana?
11 ʼI tona fakahagatonu, ko te ʼu kaugana fuli ʼa te ʼAtua ʼaē ʼe nonofo agatonu logolā ia te ʼu fihifihia ʼaē ʼe fai e Satana, ʼe natou fakahā ʼi te ʼu lakaga ʼaia ʼe loi ia te ʼu tukugākovi ʼaē neʼe fai e te fili heʼe manavaʼofa ʼaia. Neʼe haʼu Sesu ki te kele pea neʼe ina fakahā fakalelei ia te loi ʼaē ʼa Satana. Ko Sesu neʼe ko te tagata haohaoa ohagē pē ko tatatou ʼuluaki tamai ko Atama. Ko te nofo agatonu ʼa Sesu ʼo aʼu ki te mate neʼe ina fakahā ai ko Satana ʼe gutuloi pea ʼe toe loi mo tana ʼu tukugākovi.—Fakh. 12:10.
12. Ko te fealagia fea pea mo te maʼua fea ʼaē ʼe maʼu e te ʼu kaugana fuli ʼa Sehova?
12 Kae ʼe kei ʼahiʼahiʼi aipē e Satana ia te kau ʼatolasio ʼa Sehova. Ko tātou fuli, ʼe tou maʼu ia te fealagia pea mo te maʼua ʼaē ke tou fakahā ʼaki tatatou nofo agatonu, ʼe tou tauhi kiā Sehova heʼe tou ʼoʼofa kiā te ia, kae mole tou fai fakamālualoi. Koteā tatatou manatu ʼo ʼuhiga mo te maʼua ʼaia? ʼE ko he pilivilēsio ʼaia hatatou nonofo agatonu kiā Sehova. ʼE toe fakalotomālohi kiā tātou ia tatatou ʼiloʼi ʼaē ko Sehova ʼe ina foaki mai ia te mālohi ke tou faʼa kātaki ohagē ko Sopo, pea ʼe mole Ina tuku anai ke fakalaka te ʼu fihifihia ʼi te ʼu meʼa ʼaē ʼe tou lava tali.—1 Ko. 10:13.
Ko Satana ʼe Ko He Fili Lahi Pea Mo He ʼApositā
13. Koteā ia te ʼu fakamatala ʼe tou maʼu ʼi te tohi ʼo Sopo ʼo ʼuhiga mo Satana?
13 ʼE tou maʼu ʼi te Koga Tohi-Tapu Fakahepeleo ia te ʼu fakamatala ʼo ʼuhiga mo te gāue fakaufiufi ʼaē ʼe fai e Satana, ʼi tana fakafeagai kiā Sehova pea mo taki ia te mālamanei ke mamaʼo mai te ʼAtua. ʼE lahi age ia te ʼu fakamatala ʼaē ʼe tou maʼu ʼi te Koga Tohi-Tapu Fakakeleka, ʼo ʼuhiga mo te fakafeagai ʼaē ʼa Satana kiā Sehova, pea ʼi te tohi ʼo Fakahā, ʼe talanoa ai ki te kua vave pē ia te fakatonuhia ʼo te pule faʼitaliha ʼa Sehova pea mo te fakaʼauha fakaʼosi ʼo Satana. ʼAki te tohi ʼo Sopo, ʼe tou toe mahino ai ki te talagataʼa ʼaē ʼa Satana. ʼI te ʼu temi ʼaē neʼe kau ai Satana ki te ʼu fakatahi ʼi te lagi, neʼe mole ʼalu ia ki ai ʼaki te fakatuʼutuʼu ʼaē ke ina fakavikiviki ia Sehova. Ko te Tēvolo neʼe aga fakakākā ia pea mo fai fakakaukau kovi. ʼI tana kua ʼosi tukugākoviʼi ia Sopo pea mo fakagafua age ke ina ʼahiʼahiʼi ia Sopo, “neʼe mavae ai leva Satana mai iā Sehova.”—Sopo 1:12; 2:7.
14. Koteā ʼaē neʼe fai e Satana kiā Sopo?
14 Koia, ʼi te tohi ʼo Sopo ʼe fakahā ko Satana ʼe ko he fili agakovi ʼo te mālamanei. ʼI te fakatahi ʼi te lagi ʼaē ʼe talanoa kiai ia Sopo 1:6 pea mo ʼaē iā Sopo 2:1, neʼe fakalaka te temi kae mole ʼiloʼi tona loaloaga, pea lolotoga te temi ʼaia neʼe ʼahiʼahiʼi fakamataku ia Sopo. ʼAki te agatonu ʼa Sopo, neʼe feala ai kiā Sehova ke ina ʼui fēnei kiā Satana: “[Ko Sopo] ʼe ina taupau maʼu ia tana agatonu, logolā tau haga ʼaē ʼo uga ia au ke au tauteaʼi kae mole ʼi ai hana hala.” Kae neʼe mole tali e Satana ke ʼui neʼe loi ia tana ʼu tukugākovi ʼaē ʼo ʼuhiga mo Sopo. Neʼe faiga ai leva ke toe fai kiā Sopo he tahi age ʼahiʼahi fakamataku. Koia neʼe ʼahiʼahiʼi ai e te Tēvolo ia Sopo ʼi te temi ʼaē neʼe koloaʼia ai pea mo te temi ʼaē neʼe kua maʼuli fakaʼofaʼofa ai. ʼE hā mai, ʼe mole manavaʼofa ia Satana ki ʼaē ʼe masiva peʼe kiā nātou ʼaē ʼe tau mo he malaʼia. ʼE fehiʼa ia ki te hahaʼi ʼaē ʼe nonofo agatonu. (Sopo 2:3-5) Kae ʼaki te agatonu ʼa Sopo neʼe ina fakahā ai, ko Satana ʼe gutuloi.
15. Ko te ʼu faʼahi fea ʼaē ʼe tatau ai ia te kau ʼapositā ʼo te temi nei pea mo Satana?
15 Ko Satana neʼe ko ia te ʼuluaki meʼa maʼuli fakatupu ʼaē neʼe liliu ko te ʼapositā. Ohagē ko te ʼu agaaga ʼo te Tēvolo, ʼe toe fēia mo te kau ʼapositā ʼo te temi nei. ʼE lagi ko tanatou faʼahiga manatu ʼe kona heʼe natou fatufatuʼi ia te ʼu hahaʼi ʼaē ʼi te ʼu kōkelekāsio, te ʼu tagata ʼāfea, peʼe ko te Kolesi Pule. Ko ʼihi ʼapositā ʼe natou fakafeagai ki te fakaʼaogaʼi ʼaē ʼo te huafa taputapu ʼo Sehova. ʼE mole natou fia ako ke natou ʼiloʼi ia Sehova peʼe mole natou fia kaugana kiā te ia. Ohagē ko tanatou tamai ko Satana, ʼe faiga tāfito e te kau ʼapositā ke natou maumauʼi ia te nofo agatonu ʼa te hahaʼi. (Soa. 8:44) Koia ʼaē ʼe mole fia felōgoi ʼosi ia te ʼu kaugana ʼa Sehova pea mo nātou!—2 Soa. 10, 11.
Neʼe Maʼuhiga ʼAupitō Kiā Sopo Ia Te Huafa ʼo Sehova
16. Neʼe feafeaʼi ia te aga ʼa Sopo ʼo ʼuhiga mo Sehova?
16 Neʼe fakaʼaogaʼi e Sopo ia te huafa ʼo Sehova pea neʼe ina vikiʼi. Logolā tona lotomamahi ʼi te logo ʼaē kua mate tana ʼu fānau, kae neʼe mole fai e Sopo ia he palalau ʼe kovi ki te ʼAtua. Logolā neʼe manatu hala ia Sopo, ko tona ʼu malaʼia neʼe fakatupu e te ʼAtua, kae neʼe maʼuhiga aipē kiā ia te huafa ʼo Sehova. Ki muli age, ʼi tana tahi lea fakatuketuke, neʼe ʼui fēnei e Sopo: “Koʼenī: ko te manavasiʼi ʼaē kiā Sehova—ko te poto ʼaia, pea ko te maliu kehe mai te kovi ʼe ko te mahino ʼaia.”—Sopo 28:28.
17. Koteā ʼaē neʼe tokoni kiā Sopo ke nofo agatonu?
17 Koteā ʼaē neʼe tokoni kiā Sopo ke nofo agatonu? ʼE hā mai, ʼi muʼa ʼo te hoko mai ʼo te ʼu malaʼia ʼaē kiā ia, neʼe kua felōgoi lelei ia mo Sehova. Logolā tana mole ʼiloʼi te fakafifihi ʼaē neʼe fai e Satana kiā Sehova, kae neʼe ina fakatotonu ʼi tona loto ke nofo agatonu. Neʼe ina ʼui fēnei: “ ʼO aʼu ki toku mate, ʼe mole au tuku anai taku agatonu!” (Sopo 27:5) Neʼe fakamālohiʼi feafeaʼi e Sopo ia tana ʼu felōgoi ʼaia mo te ʼAtua? ʼE mahino ia, neʼe ina taupau lelei te ʼu meʼa neʼe logo kiai ʼo ʼuhiga mo te felōgoi ʼa te ʼAtua mo Apalahamo, mo Isaake, pea mo Sakopo, tona ʼu kāiga kua mamaʼo. Pea ʼaki tana mamata ki te ʼu meʼa ʼaē neʼe fakatupu, neʼe feala ai kiā Sopo ke mahino ki te ʼu tuʼuga kalitātē ʼo Sehova.—Lau ia Sopo 12:7-9, 13, 16.
18. (a) Neʼe fakahā feafeaʼi e Sopo ia tana pipiki agatonu ʼaē kiā Sehova? (b) Ko te ʼu faʼahi fea ʼaē ʼe tou faʼifaʼitakiʼi ai ia te ʼu kalitātē ʼo Sopo?
18 Ko te ʼu meʼa ʼaē neʼe mahino kiai Sopo neʼe fakatupu ai ʼi tona loto ia tana fia fakafiafiaʼi te loto ʼo Sehova. Mai tona ʼaluʼaga ʼaē, neʼe feala pē ki tona fāmili ke agahala ki te ʼAtua, pe neʼe “leakovi kiā te ia ʼi tonatou loto,” koia neʼe ina momoli tuʼumaʼu ai ia te ʼu sākilifisio. (Sopo 1:5) Māʼiapē lā mo te temi ʼaē neʼe kovi ʼaupitō ai ia tona ʼahiʼahiʼi, kae neʼe palalau lelei tuʼumaʼu aipē ia Sopo ʼo ʼuhiga mo Sehova. (Sopo 10:12) ʼE ko he faʼifaʼitaki lelei! ʼE tonu mo tātou ke tou maʼu tuʼumaʼu ia he ʼatamai mālama totonu ʼo ʼuhiga mo Sehova pea mo tana ʼu fakatuʼutuʼu. ʼE tonu ke tou maʼu he ʼu agamāhani fakalaumālie ʼe lelei, ohagē lā ko te ako ʼo te Tohi-Tapu, tou kau ki te ʼu fono, mo tou faikole, pea mo tou kau ki te fakamafola ʼo te logo lelei. Tahi ʼaē, ke tou fai ia meʼa fuli ʼe tou lavaʼi moʼo fagonogono ia te huafa ʼo Sehova. Pea ohagē ko te leleiʼia ʼaē e Sehova ia te agatonu ʼa Sopo, ʼe toe fiafia anai mo tona loto ʼuhi ko te agatonu ʼa te ʼu kaugana ʼa te ʼAtua ʼaē iā ʼaho nei. ʼE tou vakaʼi anai ia te faʼahi ʼaia ʼi te ʼalatike kā hoa mai.
ʼE Kei Kotou Manatuʼi Koa?
• He koʼē neʼe tokagaʼi tāfito ia Sopo e Satana te Tēvolo?
• Ko te ʼu ʼahiʼahi fea ʼaē neʼe kātakiʼi e Sopo, pea neʼe feafeaʼi tana aga kiai?
• Koteā ʼaē kā tokoni anai kiā tātou ke tou nofo agatonu, ohagē ko tona fai e Sopo?
• Koteā te ako ʼe tou maʼu ʼo ʼuhiga mo Satana mai te tohi ʼo Sopo?
[Paki ʼo te pasina 10]
Ko te hisitolia ʼo Sopo ʼe ina fakatokaga tātou ki te fehuʼi maʼuhiga ʼo ʼuhiga mo te pule faʼitaliha ʼa te ʼAtua ki te ʼatulaulau
[Paki ʼo te pasina 12]
Ko te ʼu ʼaluʼaga fea ʼaē ʼe feala ke ʼahiʼahiʼi ai takotou tui?