Te ʼu Koloa ʼAē ʼe Haʼu Mai Te ʼAtua

KAPAU ʼe kotou agatonu ki te ʼAtua, ʼe ina tapuakinaʼi anai koa koutou ʼaki ni ʼu koloa? ʼE feala pē, kae lagi mole ko te ʼu koloa ʼaē ʼe kotou fakaʼamu kiai. Tou toʼo ia te faʼifaʼitaki ʼa Malia ia te faʼē ʼa Sesu. Neʼe ʼasi age ia te ʼāselo ko Kapeliele ki ai pea mo ina ʼui age neʼe “ ʼofainaʼi ʼaupitō” ia e te ʼAtua pea ʼe ina fuafatuʼi anai ia te ʼAlo ʼo te ʼAtua. (Luka 1:28, 30-32) Kae neʼe mole maʼu koloa ia. ʼI te temi ʼaē neʼe fai ai e Malia he sākilifisio ʼi tana ʼosi fānauʼi ʼaē ia Sesu, neʼe ina toʼo ia “[te] taluaʼi kulukulu peʼe ko he taluaʼi lupe kei mui,” ʼaē ʼi te agamāhani neʼe fai ia te taʼi mōlaga ʼaia kiā Sehova e te hahaʼi ʼaē neʼe māsisiva.—Luka 2:24; Levitike 12:8.

ʼE fakaʼuhiga koa, ʼi te masiva ʼaē ʼa Malia neʼe mole tapuakinaʼi ia e te ʼAtua? Kailoa ia, ʼi tana ʼalu ʼaē ki tona kāiga ko Elisapeta, “neʼe fonu ia Elisapeta ʼi te laumālie māʼoniʼoni, pea neʼe kalaga mālohi ʼo ʼui māʼana: ‘ ʼE ke manūʼia koe [Malia] ʼi te fafine fuapē, pea ʼe manūʼia te fua ʼo tou ʼalo!’ ” (Luka 1:41, 42) Neʼe maʼu e Malia ia te toe pilivilēsio lahi ʼaē ke liliu ko te faʼē fakakelekele ʼo te ʼAlo ʼofaina ʼo te ʼAtua.

Mo Sesu pē foki neʼe mole ko he tagata maʼu koloa. Neʼe masiva ʼi tana tupu tagata ake pea neʼe pusiaki ʼi te fāmili masiva, pea neʼe masiva ia ʼi tona maʼuli kātoa ʼaē ʼi te kele. ʼI te tahi ʼaho, neʼe ina ʼui fēnei ki te tagata neʼe fia liliu ko hana tisipulo: “ ʼE maʼu te ʼu tafu ʼo te ʼu lenato pea mo te ʼu fātaʼi ʼo te ʼu manulele ʼo te lagi, kae mole he potu ʼo te Foha ʼo te tagata ke ʼuluga ai tona ʼulu.” (Luka 9:57, 58) Kae ko te meʼa ʼaē neʼe fai e Sesu Kilisito ʼi tana haʼu ki te kele, neʼe feala ai ki tana ʼu tisipulo ke natou maʼu honatou ʼu tuʼuga koloa. Neʼe tohi fēnei e te ʼapositolo ko Paulo: “Neʼe liliu ia ʼo masiva maʼa koutou, koteʼuhi ke kotou liliu ʼo koloaʼia ʼaki tona masiva.” (2 Kolonito 8:9) Ko te ʼu faʼahiga koloa feafeaʼi ʼaē neʼe foaki e Sesu ki tana ʼu tisipulo? Pea ʼe feafeaʼi ia te ʼu faʼahiga koloa ʼaē ʼe tou maʼu iā ʼaho nei?

Ko Te ʼu Faʼahiga Koloa Feafeaʼi?

ʼI te agamāhani, ʼe fakatupu kovi ki te tui ia te maʼu koloa, heʼe feala ki he tahi ʼe maʼu koloa ke falala pē ia ki tana falā kae mole falala ia ki te ʼAtua. Neʼe ʼui fēnei e Sesu: “ ʼE faigataʼa anai kiā nātou ʼaē ʼe maʼu paʼaga tanatou hū ki te puleʼaga ʼo te ʼAtua!” (Maleko 10:23) ʼO mahino mai ai kiā tātou, ko te ʼu lelei ʼaē neʼe foaki age e Sesu ki tana ʼu tisipulo neʼe mole ko he ʼu koloa fakamālama.

ʼI tona fakahagatonu, tokolahi ia te kau Kilisitiano ʼi te ʼuluaki sēkulō neʼe natou māsisiva. ʼI te temi ʼaē neʼe kole falā age ia te tagata ketu talu mai tana tupu kiā Petelo, neʼe ina tali fēnei age ia: “Ko te falā pea mo te ʼaulo, ʼe mole au maʼu, kae ko te meʼa ʼaē ʼe au maʼu, ʼe au foaki atu: ʼI te huafa ʼo Sesu Kilisito ʼo Nasaleti, haʼele!”—Gāue 3:6.

ʼE toe hā foki ʼi te ʼu palalau ʼa te tisipulo ko Sake, neʼe kaugamālie ʼi te kōkelekāsio Fakakilisitiano ia te hahaʼi māsisiva. Neʼe ina tohi fēnei: “Kotou fagono mai, ʼoku tehina ʼofaina. ʼE ko te ʼAtua koa lā ʼaē neʼe ina fili ia nātou ʼe māsisiva ʼi te mālamanei ke natou liliu ʼo koloaʼia ʼi te tui pea mo maʼu tofiʼa ʼi te puleʼaga ʼaē neʼe ina fakapapau kiā nātou ʼaē ʼe ʼofa ai?” (Sake 2:5) Tahi ʼaē, neʼe toe ʼui e te ʼapositolo ko Paulo, ʼe mole lahi “he kau popoto ʼi te kakano” peʼe “ko he kau mālohi” peʼe “ko he ʼu hahaʼi ʼaliki,” neʼe pāui ke natou kau ki te kōkelekāsio Fakakilisitiano.—1 Kolonito 1:26.

Kapau lā neʼe mole ko he ʼu koloa fakamālama ʼaē neʼe foaki e Sesu ki tana ʼu tisipulo, ʼe ko te ʼu faʼahiga koloa feafeaʼi ʼaē neʼe ina foaki age kiā nātou? ʼI te tohi neʼe fai e Sesu ki te kōkelekāsio ʼo Simenia, neʼe ina ʼui fēnei: “ ʼE au ʼiloʼi tou mamahi pea mo tou masiva—kae ʼe ke koloaʼia.” (Fakahā 2:8, 9) Ko te kau Kilisitiano ʼo Simenia logolā tonatou māsisiva, kae neʼe natou maʼu ia te ʼu lelei ʼe maʼuhiga age ʼi te falā peʼe ko te ʼaulo. Neʼe natou maʼu koloa, ʼuhi ko tanatou tui pea mo tanatou agatonu ʼaē ki te ʼAtua. Ko te tui ʼe maʼuhiga heʼe “mole ko he meʼa ʼe maʼu e te hahaʼi fuli.” (2 Tesalonika 3:2) Ko nātou ʼaē ʼe mole natou maʼu ia te tui, ʼe natou māsisiva moʼoni kiā mata ʼo te ʼAtua.—Fakahā 3:17, 18.

Te ʼu Koloa ʼAē ʼe Tou Maʼu Mai Te Tui

Kae ko te ʼu ʼaluʼaga fea ʼaē ʼe maʼuhiga ai ia te tui? Ko nātou ʼaē ʼe tui ki te ʼAtua, ʼe natou maʼu “te ʼu koloa ʼo tana agaʼofa, ʼo tana faʼa kātaki pea mo tana kātaki fualoa.” (Loma 2:4) ʼE natou toe maʼu “te fakamolemole ʼo [tanatou] ʼu hala” ʼuhi ko tanatou tui ʼaē ki te sākilifisio faitotogi ʼo Sesu. (Efesi 1:7) Tahi ʼaē, ʼe natou maʼu ia te faʼahiga poto ʼaē ʼe foaki e “te folafola ʼa Kilisito” kiā nātou ʼaē ʼe natou maʼu ia te tui. (Kolose 3:16) Kā natou faikole ki te ʼAtua ʼaki te tui, “ko te tokalelei ʼo te Atua ʼaē ʼe māʼoluga age ʼi te manatu fuli,” ʼe ina puipui ʼonatou loto pea mo ʼanatou manatu, ʼo natou maʼu ai ia te maʼuli fakafeaʼuga pea mo te fiafia.—Filipe 4:7.

ʼO mole gata pē ʼi te ʼu lelei fuli ʼaia, ko nātou ʼaē ʼe tui ki te ʼAtua ʼaki tona ʼAlo ko Sesu Kilisito, ʼe natou maʼu mo te ʼamanaki taulekaleka ʼo te maʼuli heʼegata. ʼE tou ʼiloʼi lelei ia te ʼu palalau ʼaenī ʼa Sesu Kilisito: “Ko te ʼAtua, ʼi tona ʼofa lahi ki te mālamanei, neʼe ina foaki mai tona ʼAlo ʼulu tokotahi, koteʼuhi ko ʼaē ʼe tui kiā te ia, ke ʼaua naʼa fakaʼauha kae ke ina maʼu ia te maʼuli heʼegata.” (Soane 3:16) ʼE fakalotomālohi ia te ʼamanaki taulekaleka ʼaia mokā maʼu e he tahi ia te ʼatamai mālama totonu ʼo ʼuhiga mo te Tamai pea mo te ʼAlo, he neʼe toe ʼui fēnei e Sesu: “Ko te fakaʼuhiga ʼaenī ʼo te maʼuli heʼegata, ke natou ako ke natou ʼiloʼi ia koe, te ʼAtua moʼoni e tahi, pea mo ia ʼaē neʼe ke fekauʼi mai, ia Sesu Kilisito.”—Soane 17:3.

Mai tona ʼaluʼaga ʼaē ko te ʼu tapuakina ʼa te ʼAtua ʼe ko he ʼu tapuakina fakalaumālie, ʼe toe ʼi ai mo tona ʼu fua lelei ki totatou loto pea mo totatou sino. Tou toʼo te faʼifaʼitaki ʼo Dalídio ʼi Pelesile. ʼI muʼa ʼo tana maʼu ia te ʼatamai mālama totonu ʼo ʼuhiga mo te fakatuʼutuʼu ʼa te ʼAtua, neʼe ʼinu kava lahi. Ko he faʼahi neʼe fakatupu kovi ki tona maʼuli fakafāmili. ʼO mole gata aipē, neʼe mole lelei mo tona maʼuli fakapaʼaga. Pea neʼe ina kamata ako leva ia te Tohi-Tapu mo te kau Fakamoʼoni ʼa Sehova pea neʼe hoko kiā ia, ia te toe fetogi lahi.

ʼAki te ʼu meʼa ʼaē neʼe ina ako ʼi te Tohi-Tapu, neʼe feala ai leva ke ina fetogi ia tana ʼu agamāhani kovi. ʼI te vave ʼo tana tuputupu fakalaumālie neʼe ina ʼui fēnei: “Neʼe au māhani ʼi te ʼalu haʼele ʼi te ʼu fale kava, ʼi te temi nei kua au fai fakamafola ʼi te ʼu ʼapi.” Kua liliu ko te minisi temi kātoa ʼo te Folafola ʼa te ʼAtua. ʼAki te taʼi fetogi ʼaia, neʼe fetogi ʼo lelei ia tona maʼuli fakasino pea mo tona maʼuli fakapaʼaga. Neʼe ʼui fēnei e Dalídio: “Ko te falā ʼaē neʼe au fakaʼaogaʼi ki taku ʼinu kava, kua au fakaʼaogaʼi ʼi te temi nei moʼo tokoni kiā nātou ʼaē ʼe ʼaoga kiai peʼe mo totogi he ʼu meʼa ʼe ʼaoga kiā au.” Neʼe ina toe maʼu mo tona ʼu tuʼuga kaumeʼa moʼoni ʼi tana fakatahi mo nātou ʼaē ʼe manatu tahi mo ia ʼi te faʼahi fakalaumālie. ʼI te temi nei kua maʼu e Dalídio ia te tokalelei ʼo te ʼatamai pea mo te maʼuli fakafeʼauga ʼe laka age iā meʼa fuli neʼe feala ke ina fakaʼamu kiai, ʼi muʼa ʼo tana ʼiloʼi ia te ʼAtua.

Tou vakaʼi age muʼa ia Renato, ko te tahi faʼifaʼitaki ʼaia neʼe koloaʼia ia tona maʼuli ʼi tana fakatuputupu ʼo tana tui kiā Sehova ʼAtua. Kā kotou sisio ki tana fiafia, mo tana mata katakata ʼi te temi nei, ʼe faigataʼa hatatou fakakaukau neʼe gaohi koviʼi ia ia. ʼI tana kei meamea, neʼe liʼakina ia ia e tana faʼē. Neʼe tuku ia ia ʼi te kato ʼi lalo ʼo te lā, pea neʼe toka ʼuʼuli mo lavelavea tona sino, pea neʼe kei pipiki pē ia te ʼuho ʼo tona pito ia ia. Neʼe fakalaka ia te ʼu fafine e toko lua pea neʼe nā sio ki te kato ʼi lalo ʼo te lā ʼe gauegaue. ʼI te kamata, neʼe nā manatu ko he ʼuhiʼi pusi ʼaē ʼe tuku ʼi te kato. Kae ʼi tanā sisio atu leva ʼaē neʼe ko te toe kei meamea, neʼe nā foimo toʼo ake ʼo ʼave ki te lōpitali ke faitoʼo ai.

Ko te tahi ʼi te ʼu fafine ʼaia neʼe ko te Fakamoʼoni ʼa Sehova, pea neʼe ina fakahā age ki te tahi Fakamoʼoni ko Rita, ia te meʼa ʼaē neʼe hoko ki te kiʼi toe. Neʼe tuʼa lahi ia te faifanau mate ʼa Rita, pea neʼe ko tana kiʼi toe fafine pē e tahi. Neʼe fia fai ʼaupitō ia ki hana kiʼi tamasiʼi tagata, koia neʼe ina fakatuʼutuʼu ai leva ke ina vaheʼi ia Renato.

Talu mai ia te kei veliveli ʼa Renato, neʼe fakahā age pē e Rita, ʼe mole ko ia ia tana faʼē moʼoni. Kae ʼaki te ʼofa neʼe ina pusiaki ia ia, pea mo faiga aipē ʼo akoʼi age ki ai ia te ʼu pelesepeto fakalaumālie. ʼI tana lahilahi ake, neʼe ina kamata leleiʼia ia te ʼu akonaki Fakatohi-tapu. Neʼe toe tuputupu aipē mo tana loto fakafetaʼi ʼaē ki te ʼaluʼaga fakaofoofo ʼo tona haofaki. ʼE fia tagi pē ia ʼi te temi fuli ʼaē ʼe ina lau ai ia te ʼu palalau ʼaenī ʼa te tagata fai pesalemo ko Tavite: “ ʼI te temi ʼaē ko taku tamai pea mo taku faʼē ʼe nā līaki anai au, ʼe tali anai au e Sehova.”—Pesalemo 27:10.

Moʼo fakahā ia tana loto fakafetaʼi kiā meʼa fuli ʼaē neʼe fai e Sehova maʼa ia, neʼe papitema ia Renato ʼi te taʼu 2002 pea ʼi te taʼu ʼaē neʼe hoa mai kiai, neʼe minisi temi kātoa. ʼE mole heʼeki ina ʼiloʼi pe ko ai tana ʼu mātuʼa moʼoni, pea ʼe lagi mole ina ʼiloʼi anai ʼi he ʼaho. Kae ʼe logoʼi e Renato ko te tahi meʼa ʼofa maʼuhiga ʼaē neʼe ina maʼu, ʼe ko tana ʼiloʼi ia Sehova pea mo tui ki ai, ʼe ko tana Tamai ʼofa pea ʼe tokaga kiā te ia.

ʼE mahalo ʼe kotou fia fakaovi ki te ʼAtua pea mo maʼu ia he felōgoi ʼofa pea mo ia, ʼaē ko he faʼahi ʼe ina lava fakakoloaʼia moʼoni tokotou maʼuli. Kiā koutou fuli, ʼaē ʼe maʼu koloa peʼe masiva, ʼe kotou maʼu ia te faigamālie ʼaē ke kotou felōgoi mo Sehova ʼAtua pea mo tona ʼAlo ko Sesu Kilisito. ʼE mole feala ki te felōgoi ʼaia ke kotou maʼu mai ai he ʼu koloa fakamālama, kae ʼe kotou maʼu ai anai he ʼatamai tokalelei pea mo he maʼuli fakafeʼauga, ʼaē ʼe mole feala hakotou maʼu ʼaki te falā fuli ʼo te mālamanei. ʼIo, ʼe moʼoni ia te ʼu palalau ʼaē iā Tāʼaga Lea 10:22: “Ko te tapuakina ʼa Sehova–koʼenā te meʼa ʼaē ʼe ina fakakoloaʼia, pea ʼe mole maʼu ai he mamahi.”

ʼE tokaga ʼaupitō ia Sehova ʼAtua ki te hahaʼi ʼaē ʼe ʼomai kiā te ia: “Ke fēia age lā ʼe ke tokagaʼi moʼoni taku ʼu fakatotonu. Ko tou tokalelei ʼe liliu anai ohagē ko he vaitafe, pea ko tau faitotonu ʼe liliu anai ohagē ko te ʼu peau ʼo te tai.” (Isaia 48:18) Pea ʼe ina fakapapau ko nātou ʼaē ʼe ʼomai kiā te ia ʼaki he loto pea mo he aga ʼe lelei, ʼe lahi anai tona fakapale: “Ko te ikuʼaga ʼo te agavaivai pea mo te manavasiʼi kiā Sehova, ʼe ko te ʼu koloa, mo te kolōlia, pea mo te maʼuli.”—Tāʼaga Lea 22:4.

[Fakamatala ʼo te pasina 6]

Ko te tui ki te ʼAtua ʼe ʼiku ki te tokalelei, mo te maʼuli fakafeʼauga, pea mo te fiafia

[Paki ʼo te pasina 5]

Ko te fāmili ʼo Sesu ʼaē ʼi te kele neʼe tapuakinaʼi ʼaupitō e te ʼAtua, logolā tonatou masiva ʼi te faʼahi fakakoloa