Te ʼu Meʼa ʼAē Neʼe Akoʼi e Sesu ʼo ʼUhiga Mo Te ʼAtua

“ ʼE mole ʼi ai he tahi ʼe ina ʼiloʼi pe ko ai ia te Tamai, gata pē ki te ʼAlo, pea mo ia ʼaē ʼe lotolelei te ʼAlo ke ina fakahā age ki ai.”—LUKA 10:22.

ʼI TANA maʼuli ʼi selō ʼi muʼa ʼo tana tupu tagata, neʼe fualoa ʼaupitō te felōgoi ʼa te ʼAlo ʼuluaki tupu ʼo te ʼAtua pea mo tana Tamai. (Kolose 1:15) Koia neʼe ʼiloʼi ai e te ʼAlo ia te ʼu manatu, mo te ʼu aga pea mo te ʼu meʼa neʼe logoʼi e tana Tamai. Ki muli age, ʼi te haʼu ʼa te ʼAlo ʼaia ki te kele, ʼi tona ʼuhiga tagata ko Sesu, neʼe loto ʼaupitō ke ina akoʼi ki te hahaʼi te moʼoni ʼo ʼuhiga mo tana Tamai. ʼE lahi te ʼu meʼa ʼe feala ke tou ako ʼo ʼuhiga mo te ʼAtua ʼaki tatatou fakalogo ki te ʼu palalau ʼaē neʼe fai e te ʼAlo ʼaia.

Te huafa ʼo te ʼAtua Ko te huafa ʼo te ʼAtua, ʼaē ko Sehova, neʼe maʼuhiga ʼaupitō kiā Sesu. Ko te ʼAlo ʼofaina ʼaia neʼe loto ke ʼiloʼi e te hahaʼi ia te huafa ʼo tana Tamai pea mo natou fakaʼaogaʼi. Ko te huafa ʼo Sesu ʼe ko tona fakaʼuhiga “Ko Sehova ʼe Ina Haofaki.” ʼI te pō ʼi muʼa ʼo tana mate, neʼe feala ke ʼui fēnei e Sesu ʼi tana faikole kiā Sehova: “Neʼe au fakaʼilo . . . tou huafa.” (Soane 17:26) ʼE mole ko he meʼa fakapunamaʼuli ia te fakaʼaogaʼi e Sesu ia te huafa ʼo te ʼAtua pea mo tana fakaʼilo ki te hahaʼi. ʼE feafeaʼi anai kiā nātou ʼaē neʼe fakalogo kiā Sesu hanatou mahino ki te moʼoni ʼo ʼuhiga mo Sehova, mokā ʼe mole natou ʼiloʼi pē lā ia Tona huafa pea mo tona fakaʼuhiga?a

Te ʼofa lahi ʼo te ʼAtua ʼI te tahi lakaga, neʼe ʼui fēnei e Sesu ʼi tana faikole ki tana Tamai: “Tamai, . . . neʼe ke ʼofa kiā te au ʼi muʼa ʼo te fakatupu ʼo te mālamanei.” (Soane 17:24) ʼI tana sio ʼaē ki te ʼofa ʼo te ʼAtua ʼi tana ʼi selō, ko Sesu ʼi te temi ʼaē neʼe maʼuli ai ʼi te kele, neʼe ina kumi ke ina fakahā ia te tuʼuga agaaga matalelei ʼo te ʼofa ʼaia.

Neʼe fakahā e Sesu ko Sehova ʼe ʼofa ki te hahaʼi fuli pē. Neʼe ʼui fēnei e Sesu: “Ko te ʼAtua, ʼi tona ʼofa lahi ki te mālamanei, neʼe ina foaki mai tona ʼAlo ʼulu tokotahi, koteʼuhi ko ʼaē ʼe tui kiā te ia, ke ʼaua naʼa fakaʼauha kae ke ina maʼu ia te maʼuli heʼegata.” (Soane 3:16) Ko te kupu Fakakeleka ʼaē neʼe fakaliliu ʼaki te kupu “mālamanei” ʼe mole fakaʼuhiga ki “te kele.” ʼI tana fakaʼaogaʼi ʼi henī, ʼe fakaʼuhiga ki te hahaʼi ʼo te mālamanei kātoa. ʼI te lahi ʼaupitō ʼo te ʼofa ʼo te ʼAtua ki te hahaʼi fuli pē, neʼe ina foaki ai ia tona ʼAlo ʼaē neʼe ʼofa mamahi ai. Neʼe feala ai ke ʼāteaina ia te hahaʼi agatonu mai te pōpula ki te agahala pea mo te mate pea mo natou ʼamanaki ki te maʼuli heʼegata. ʼE mole tou lava fakafuafua lelei ia te loloto ʼo te taʼi ʼofa lahi ʼaia.—Loma 8:38, 39.

Neʼe tala e Sesu ia he moʼoni ʼe feala ke tou lotofīmālie lahi ai: ʼE ʼofa lahi Sehova ki tana kau ʼatolasio takitokotahi. Neʼe akoʼi e Sesu ko Sehova ʼe hagē ko he tagata tauhi ovi, pea ʼi tana faga ovi, ʼe ina ʼiloʼi pea mo fakamaʼuhigaʼi tana ʼu ovi takitokotahi. (Mateo 18:12-14) Neʼe ʼui e Sesu ʼe mole he pasele e tahi ʼe feala ke tō ki te kele kae mole ʼiloʼi e Sehova. Neʼe hoko atu fēnei e Sesu: “[Ko] te ʼu fuluʼi ʼulu fuli ʼo tokotou ʼulu kua ʼosi kātoa ʼi te lau.” (Mateo 10:29-31) Kapau ʼe feala kiā Sehova ke ina tokagaʼi te puli ʼa he pasele e tahi ʼi he fātaʼi, pea ʼe feafeaʼi age lā tana sio pea mo tokaga ki tana kau ʼatolasio takitokotahi? Kapau ʼe feala kiā Sehova ke ina ʼiloʼi ia te lahi ʼo tatatou ʼu lauʼulu, ʼe ʼi ai koa he faʼahi ʼo totatou maʼuli ʼe feala ke puli kiā ia, ʼi te ʼu meʼa ʼaē ʼe ʼaoga kiā tātou, mo tatatou ʼu faigataʼaʼia, pea mo tatatou ʼu tuʼania?

ʼE ko te Tamai ʼaē ʼe ʼi selō Ohagē ko tatatou ʼui ʼi te ʼuluaki ʼalatike, ko Sesu ʼe ko te ʼAlo ʼulu tokotahi ʼo te ʼAtua. Koia ʼe mole tou punamaʼuli ai ki te fakaʼaogaʼi ʼo tuʼa lahi e te ʼAlo ʼofaina ʼaia ia te kupu “Tamai,” ʼi te ʼu temi ʼaē neʼe pāui ai kiā Sehova peʼe ʼi tana talanoa kiā te Ia. ʼI tona fakahagatonu, ko te ʼu ʼuluaki palalau ʼa Sesu ʼaē ʼe tohi ʼi te ʼu Evaselio, ʼe ko te ʼu palalau neʼe ina fai ʼi te fale lotu ʼi tana taʼu 12, pea neʼe ina ʼui fēnei ʼo ʼuhiga mo Sehova: “taku Tamai.” (Luka 2:49) Ko te kupu “Tamai” ʼe hā teitei tuʼa 190 ʼi te ʼu Evaselio. Neʼe ina fakaʼaogaʼi he ʼu palalau kehekehe moʼo palalau ʼo ʼuhiga mo Sehova, ʼo ina ʼui “takotou Tamai,” “tamatou Tamai,” pea “taku Tamai.” (Mateo 5:16; 6:9; 7:21) ʼI tana fakaʼaogaʼi lahi ia te kupu ʼaia, neʼe fakahā ai e Sesu ʼe feala ki he ʼu hahaʼi agahala ke natou maʼu he felōgoi ʼofa mo Sehova pea mo falala kiā te ia.

ʼE manavaʼofa pea mo loto fakamolemole Neʼe ʼiloʼi e Sesu ʼe ʼaoga ki te hahaʼi agahala ia te manavaʼofa lahi ʼa Sehova. ʼI tana lea fakatā ʼo te foha maumau koloa, neʼe fakatatau e Sesu ia Sehova ki he tamai manavaʼofa, mo loto fakamolemole, ʼe ina tali ia te toe liliu mai ʼo tona foha neʼe fakahemala. (Luka 15:11-32) Koia, ʼe fakapapau mai ai e Sesu ko Sehova ʼe ina sivi peʼe fetogi te loto ʼo he tagata agahala, ke ina maʼu ai he fealagia moʼo fakahā age tona manavaʼofa. ʼE loto moʼoni e Sehova ke ina fakamolemole ki he tagata agahala kua fakahemala. Neʼe fakamahino fēnei e Sesu: “ ʼE au tala atu kiā koutou, ʼe lahi anai te fiafia ʼi selō ʼi he fakahemala ʼa he tokotahi ʼe agahala, ʼi he kau agatonu e toko hivagofulu-mā-hiva ʼe mole ʼaoga ke natou fakahemala.” (Luka 15:7) ʼE mahino ia ʼe tou fia fakaovi fuli ki he ʼAtua manavaʼofa fēia!

ʼE fagono ki te ʼu faikole ʼI tana ʼi selō ʼi muʼa ʼo tana hifo mai ki te kele, neʼe sio mata ai Sesu ko Sehova ʼe “fagono ki te faikole” pea mo fiafia ʼi te ʼu faikole ʼo tana kau ʼatolasio agatonu. (Pesalemo 65:2) Koia, ʼi tana minisitelio, neʼe akoʼi e Sesu ki te hahaʼi pe feafeaʼi te faikole pea koteā te ʼu meʼa ʼaē ʼe tonu ke natou kole. Neʼe ina fai ia te tokoni ʼaenī: “ ʼAua naʼa kotou lau ʼo liuliuga ʼakotou ʼu palalau.” Neʼe ina fakalotomālohiʼi te hahaʼi ke natou faikole ke ‘fai te finegalo ʼo te ʼAtua ʼi te kele ohagē ko selō.’ ʼE feala ke tou toe faikole ʼo ʼuhiga mo tatatou meʼa kai ʼi te ʼaho fuli, pea ke fakamolemole tatatou ʼu agahala, pea ke ʼaua naʼa tou tō ki te fakahala. (Mateo 6:5-13) Neʼe akoʼi e Sesu ko Sehova, ohagē ko he tamai, ʼe fagono ki te ʼu faikole ʼo Tana ʼu kaugana, pea mo ina tali ki tanatou ʼu kolekole fakamālotoloto ʼaē ʼe natou fai ʼi te tui.—Mateo 7:7-11.

ʼE hā lelei mai ai, neʼe faiga e Sesu ke ina akoʼi ia te moʼoni ʼo ʼuhiga mo Sehova pea mo te ʼulugaaga ʼo te ʼAtua. Kae neʼe ʼi ai te tahi meʼa ʼo ʼuhiga mo Sehova ʼaē neʼe loto ʼaupitō e Sesu ke ina tala ki te hahaʼi, ʼe ko te fakatuʼutuʼu ʼaē kā fakaʼaogaʼi anai e Sehova, ke tupu ai he ʼu fetogi ʼi te mālamanei kātoa pea ke fakahoko Tona finegalo ʼo ʼuhiga mo te kele pea mo te tagata. ʼI tona fakahagatonu, ko te fakatuʼutuʼu ʼaia neʼe ko te logo tāfito ʼaē neʼe fakamafola e Sesu.

[Nota]