“Ko Te Laumālie ʼe Ina Sivisivi . . . Te ʼu Meʼa Loloto ʼa Te ʼAtua”

“Ko te laumālie ʼe ina sivisivi ia meʼa fuli, māʼiapē lā mo te ʼu meʼa loloto ʼa te ʼAtua.”—1 KO. 2:10.

1. Koteā te gāue ʼe fai e te laumālie māʼoniʼoni ʼe fakamaʼuhigaʼi e Paulo iā 1 Kolonito 2:10, pea koteā te ʼu fehuʼi ʼe lagaʼi ai?

ʼE TOU fakafetaʼi lahi ʼi te ʼu gāue ʼaē ʼe fai e te laumālie māʼoniʼoni ʼo Sehova! ʼE talanoa ʼi te Tohi-Tapu ki te laumālie māʼoniʼoni ohagē ko he tokoni, ko he meʼa ʼofa, ko he fakamoʼoni, pea ko he tahi ʼe kolekole maʼa tātou. (Soa. 14:16; Gāue 2:38; Loma 8:16, 26, 27) Neʼe fakahā lelei e te ʼapositolo ko Paulo te tahi gāue maʼuhiga ʼe fai e te laumālie māʼoniʼoni: “Ko te laumālie ʼe ina sivisivi ia meʼa fuli, māʼiapē lā mo te ʼu meʼa loloto ʼa te ʼAtua.” (1 Ko. 2:10) ʼIo, ʼe fakaʼaogaʼi e Sehova tona laumālie māʼoniʼoni moʼo fakahā te ʼu moʼoni fakalaumālie ʼe loloto. Kanapau lā neʼe mole tou maʼu te tokoni ʼaia, ʼe feafeaʼi anai hatatou mahino ki te ʼu fakatuʼutuʼu ʼa Sehova? (Lau ia 1 Kolonito 2:9-12.) Kae ʼe lahi te ʼu fehuʼi ʼe lagaʼi ai: ʼE sivisivi feafeaʼi e ‘te laumālie te ʼu meʼa loloto ʼa te ʼAtua’? Ko ai ʼi te ʼuluaki sēkulō ʼo totatou temi ʼaē neʼe fakaʼaogaʼi e Sehova moʼo fakahā te ʼu meʼa ʼaia? ʼE sivisivi feafeaʼi e te laumālie te ʼu meʼa loloto ʼaia iā ʼaho nei pea ʼaki ia ai?

2. Koteā te ʼu faʼahiga gāue e lua kā fai anai e te laumālie?

² Neʼe fakahā e Sesu te ʼu faʼahiga gāue e lua kā fai anai e te laumālie. ʼI muʼa pē ʼo tana mate, neʼe ina ʼui fēnei ki tana ʼu ʼapositolo: “Ko te tokoni, te laumālie māʼoniʼoni, ʼaē kā fekauʼi mai anai e te Tamai ʼi toku huafa, ʼe ko ia ʼaia ʼaē kā ina akoʼi anai kiā koutou te ʼu meʼa fuli ʼaia, pea mo ina fakamanatuʼi atu anai ia meʼa fuli ʼaē neʼe au tala atu kiā koutou.” (Soa. 14:26) Koia ko te laumālie māʼoniʼoni ʼe gāue anai ohagē ko he tagata faiako pea mo ina fakamanatuʼi ia meʼa fuli pē. ʼI tona ʼuhiga tagata faiako, ʼe tokoni anai ki te kau Kilisitiano ke natou mahino ki te ʼu meʼa ʼaē neʼe mole natou ʼuluaki mahino kiai. ʼI tona fakamanatuʼi age ia meʼa fuli pē, ʼe tokoni anai kiā nātou ke natou manatuʼi pea mo maʼuliʼi fakalelei te ʼu akonaki ʼaē kua fakamahino age kiā nātou.

ʼI Te ʼUluaki Sēkulō

3. Koteā te ʼu palalau neʼe fai e Sesu ʼe fakahā ai ko “te ʼu meʼa loloto ʼa te ʼAtua” ʼe fakahā māmālie anai?

³ Ko Sesu totonu neʼe ina akoʼi ki tana ʼu tisipulo te ʼu tuʼuga moʼoni neʼe foʼou kiā nātou. Kae neʼe kei toe lahi age te ʼu akonaki ke natou ako. Neʼe ʼui fēnei age e Sesu ki tana kau ʼapositolo: “ ʼE kei lahi te ʼu meʼa ke au tala atu kiā koutou, ka ʼe mole feala ke kotou ʼamo ʼi te temi nei. Kae kā haʼu anai ia ia ʼaia, te laumālie ʼo te moʼoni, pea ʼe ina takitaki anai koutou ʼi te moʼoni kātoa.” (Soa. 16:12, 13) Koia neʼe fakahā age e Sesu ʼaki te laumālie māʼoniʼoni, ʼe fakahā māmālie age anai kiā nātou ia te ʼu moʼoni fakalaumālie ʼe loloto.

4. ʼI te ʼaho ʼo te Penikositē taʼu 33 ʼo totatou temi, neʼe feafeaʼi te gāue ʼa te laumālie māʼoniʼoni ohagē ko he tagata faiako pea mo ina fakamanatuʼi te ʼu folafola neʼe tohi ʼi te temi muʼa?

⁴ ʼI te ʼaho ʼo te Penikositē taʼu 33 ʼo totatou temi, neʼe hifo “te laumālie ʼo te moʼoni,” pea neʼe mafola ki te ʼu fuga ʼulu ʼo te toko 120 Kilisitiano ʼaē neʼe fakatahitahi ʼi Selusalemi. Neʼe sio te hahaʼi pea mo natou logo ki te hoko ʼo te faʼahi ʼaia. (Gāue 1:4, 5, 15; 2:1-4) Neʼe palalau te ʼu tisipulo ki te ʼu lea kehekehe “ ʼo ʼuhiga mo te ʼu meʼa taulekaleka ʼa te ʼAtua.” (Gāue 2:5-11) Neʼe kua tonu leva ʼi te temi ʼaia ke fakahā he ʼu meʼa foʼou. Neʼe fakakikite e te polofetā ko Soele ia te hifo ʼaia ʼa te laumālie māʼoniʼoni ki te hahaʼi. (Soe. 2:28-32) Neʼe mamata te hahaʼi ʼi te temi ʼaia ki tona fakahoko ʼi hona ʼaluʼaga neʼe mole natou ʼamanaki kiai, pea ko te ʼapositolo ko Petelo ʼaē neʼe ina fakamatala te meʼa ʼaia. (Lau ia Gāue 2:14-18.) Koia ko te laumālie māʼoniʼoni neʼe gāue ohagē ko he tagata faiako, ke mahino kiā Petelo ko te meʼa ʼaē neʼe hoko ki te ʼu tisipulo, neʼe ko te fakahoko ʼo te lea fakapolofetā ʼāfea ʼaia. Neʼe toe gāue te laumālie ʼo ina fakamanatuʼi age kiā Petelo te ʼu folafola neʼe tohi ʼi te temi muʼa, he neʼe mole gata pē tana talanoa ʼaē kiā Soele kae neʼe toe talanoa ki te ʼu pesalemo e lua neʼe tohi e Tavite. (Pes. 16:8-11; 110:1; Gāue 2:25-28, 34, 35) Ko te ʼu meʼa ʼaē neʼe mamata kiai ia nātou fuli ʼaē neʼe māʼopoʼopo pea mo logo kiai, neʼe ko he ʼu meʼa loloto moʼoni ʼa te ʼAtua.

5, 6. (a) ʼI te kua ʼosi ʼo te Penikositē taʼu 33 ʼo totatou temi, koteā te ʼu fehuʼi maʼuhiga ʼo ʼuhiga mo te fuakava foʼou neʼe tonu ke maʼu hona ʼu tali? (b) Ko ai koa ʼaē neʼe ina vakaʼi te ʼu fehuʼi ʼaia, pea neʼe feafeaʼi te fai ʼo te ʼu tonu?

⁵ Neʼe lahi te ʼu puani neʼe kei ʼaoga ke fakamahino ki te kau Kilisitiano ʼo te ʼuluaki sēkulō. Ohagē lā, neʼe ʼi ai te ʼu fehuʼi ʼo ʼuhiga mo te fuakava foʼou ʼaē neʼe hoko ʼi te ʼaho ʼaia ʼo te Penikositē. Neʼe fakatuʼakoi koa te fuakava foʼou ki te kau Sutea pea mo te kau poloselite Sutea? Neʼe feala koa ke fakahū ki te fuakava ʼaia ia te kau Senitile pea ke fakanofo nātou ʼaki te laumālie māʼoniʼoni? (Gāue 10:45) Neʼe tonu koa ke silikosisioʼi muʼa ia te hahaʼi tagata Senitile pea ke natou fakalogo ki te Lao ʼa Moisese? (Gāue 15:1, 5) Neʼe ko he ʼu fehuʼi maʼuhiga ʼaupitō ʼaia, koia neʼe ʼaoga ai ke maʼu te laumālie ʼo Sehova moʼo sivisivi te ʼu meʼa loloto ʼaia. Kae ko ai anai koa ʼaē kā fakaʼaogaʼi e te laumālie moʼo fakamahino te ʼu puani ʼaia?

⁶ Neʼe ko te ʼu tehina takitaki ʼaē kā fakaʼaogaʼi anai e te laumālie moʼo tali ki te ʼu fehuʼi ʼaia neʼe lagaʼi. Neʼe kau ia Petelo, mo Paulo pea mo Palenapasi ʼi te fono ʼaia ʼa te kolesi pule pea neʼe natou fakamatala pe neʼe feafeaʼi te tokaga ʼa Sehova ki te kau Senitile ʼaē neʼe mole heʼeki silikosisioʼi. (Gāue 15:7-12) ʼI te ʼosi vakaʼi ʼo te faʼahi ʼaia ʼaki te ʼu manatu ʼaē ʼe tuʼu ʼi te ʼu Tohi Fakahepeleo pea ʼaki te tokoni ʼa te laumālie māʼoniʼoni, neʼe fai ai leva te tonu e te kolesi pule. Pea neʼe natou fakahā leva te tonu ʼaia ʼi te ʼu tohi neʼe natou fai ki te ʼu kōkelekāsio.—Lau ia Gāue 15:25-30; 16:4, 5; Efe. 3:5, 6.

7. Neʼe fakahā feafeaʼi ia te ʼu moʼoni loloto?

⁷ Neʼe lahi te ʼu fihifihia fēia neʼe fakatokatoka ʼaki te ʼu tohi ʼaē neʼe fai ʼaki te takitaki ʼa te ʼAtua, ohagē lā ko te ʼu tohi ʼa Soane, ʼa Petelo, ʼa Sake pea mo Paulo. Kae ʼi te kua ʼosi tohi kātoa ia te ʼu Tohi Fakakilisitiano, neʼe fakagata leva te ʼu fai fakakikite pea mo te fakahā fakamilakulo age ʼo te ʼatamai mālama. (1 Ko. 13:8) ʼE hoko atu anai koa te gāue ʼa te laumālie ohagē ko he tagata faiako pea mo ina fakamanatuʼi age ki te ʼu tisipulo te ʼu moʼoni? ʼE hoko atu anai koa te tokoni ʼa te laumālie ki te kau Kilisitiano moʼo sivisivi te ʼu meʼa loloto ʼa te ʼAtua? Neʼe fakahā e te lea fakapolofetā ʼe hoko atu pē anai.

Lolotoga Te Temi Fakaʼosi

8, 9. Ko ai koa ʼaē kā “gigila” ʼi te lolotoga ʼo te temi fakaʼosi ʼaki te fakasiosio poto fakalaumālie?

⁸ ʼO ʼuhiga mo te temi fakaʼosi, neʼe fakakikite fēnei e te ʼāselo: “Ko te kau fakasiosio poto, ʼe natou gigila anai ohagē ko te mālamagia ʼo te lagi; pea ko nātou ʼaē ʼe natou ʼaumai te tokolahi ki te faitotonu, ʼe natou gigila anai ohagē ko te ʼu fetuʼu ʼo aʼu ki he ʼu temi ʼe mole ʼiloʼi hona gataʼaga, ʼeī ʼo talu ai. . . . Pea ko te ʼatamai mālama moʼoni ʼe mahu anai.” (Tan. 12:3, 4) Ko ai anai te kau fakasiosio poto, pea ko ai koa ʼaē kā gigila? Neʼe fakahā e Sesu te puani ʼi tana lea fakatā ʼo ʼuhiga mo te vao kovi pea mo te fulumeto. ʼO ʼuhiga mo “te fakaʼosi ʼo te tuʼu ʼo he ʼu faʼahiga meʼa” neʼe ina ʼui fēnei: “ ʼI te temi ʼaia, ʼe gigila anai te kau agatonu ohagē ko te gigila ʼo te laʼā, ʼi te puleʼaga ʼo tanatou Tamai.” (Mat. 13:39, 43) ʼI tana fakamahino, neʼe ʼui e Sesu ko “te kau agatonu” ʼe ko “te ʼu foha ʼo te puleʼaga,” te kau Kilisitiano fakanofo.—Mat. 13:38.

⁹ ʼE “gigila” fuli anai koa te kau Kilisitiano fakanofo? ʼE feala pē ke tou tali ʼeī, heʼe kau fuli anai te kau Kilisitiano ki te fai fakamafola, ki te fai ʼo he ʼu tisipulo, pea ki te felagalagaʼaki fakatautēhina ʼi te ʼu fono. ʼE tuku anai e te kau fakanofo he faʼifaʼitaki. (Sakl. 8:23) Kae ʼe mole gata aipē, neʼe tonu foki ke toe fakahā te ʼu meʼa loloto ʼi te temi fakaʼosi. Ko te lea fakapolofetā ʼa Taniela neʼe “fakamaʼu” ʼo aʼu ki te temi fakaʼosi ʼaia. (Tan. 12:9) ʼE sivisivi feafeaʼi anai e te laumālie te ʼu meʼa loloto ʼaia, pea ko ai anai kā ina fai te faʼahi ʼaia?

10. (a) Ko ai ʼaē ʼe fakaʼaogaʼi e te laumālie moʼo fakahā kiai ia te ʼu moʼoni loloto lolotoga te ʼu ʼaho fakamuli? (b) Fakamahino pe neʼe fakamahino feafeaʼi te ʼu moʼoni ʼo ʼuhiga mo te fale lotu lahi fakalaumālie ʼo Sehova.

¹⁰ ʼI te temi ʼaē ʼe fakamahino ai he manatu fakalaumālie ʼi totatou temi, ʼe tokoni te laumālie māʼoniʼoni ki te kau takitaki ʼo “te tagata kaugana agatonu mo poto” ʼi te pilo gāue ʼo te fale lahi fakamālamanei ke natou vakavakaʼi te ʼu moʼoni loloto ʼaē neʼe mole heʼeki fakamahino. (Mat. 24:45; 1 Ko. 2:13) Ko te Kolesi Pule ʼe ina vakavakaʼi te ʼu puani ʼaē ke fetogi. (Gāue 15:6) Ko te ʼu puani ʼaē ʼe natou ako, ʼe natou tā maʼa tātou fuli. (Mat. 10:27) ʼAki te temi, ʼe lagi ʼaoga ke fai he tahi ʼu fakamahino, pea ʼe toe fai fakahagatonu ia te faʼahi ʼaia.—Vakaʼi te fakamatala ʼaē ʼe ʼātakai “Te Fakamahino ʼAē Neʼe Fai e Te Laumālie ʼo ʼUhiga Mo Te Fale Lotu Fakalaumālie.”

Ke Kotou Maʼu Te ʼu Lelei ʼo Te Gāue ʼa Te Laumālie ʼi Te Temi Nei

11. ʼE feafeaʼi he lava maʼu e te kau Kilisitiano fuli ia te tokoni ʼa te laumālie māʼoniʼoni moʼo fakahā ia te ʼu meʼa loloto ʼa te ʼAtua?

¹¹ ʼE maʼu e te kau Kilisitiano agatonu fuli te ʼu lelei ʼo te gāue ʼa te laumālie māʼoniʼoni ʼaē ko te fakahā ʼo te ʼu meʼa loloto ʼa te ʼAtua. Ohagē ko te kau Kilisitiano ʼo te ʼuluaki sēkulō, iā ʼaho nei ʼe tou ako pea ki muli age ʼe tou manatuʼi pea mo maʼuliʼi te ʼu meʼa ʼaia neʼe tokoni mai e te laumālie māʼoniʼoni ke tou mahino kiai. (Luka 12:11, 12) ʼE mole ʼaoga ke tou fai he ʼu ako lalahi ke feala ai hatatou mahino ki te ʼu moʼoni loloto fakalaumālie ʼaē neʼe tā ʼi te ʼu tohi. (Gāue 4:13) ʼE lava feafeaʼi hatatou hikihiki ia tatatou mahino ʼaē ki te ʼu meʼa loloto ʼa te ʼAtua? Tou vakaʼi age muʼa he ʼu tokoni.

12. Ko te temi fea ʼaē ʼe tonu ai ke tou kole te laumālie māʼoniʼoni?

¹² Tou kole te laumālie māʼoniʼoni. Kā tou ʼamanaki ako he tohi, ʼe tonu muʼa ke tou kole te tokoni ʼa te laumālie māʼoniʼoni ke ina takitaki tātou. ʼE moʼoni te faʼahi ʼaia tatau aipē peʼe tou tokotahi peʼe nounou te temi ʼaē kā tou fakaʼaogaʼi ki te ako. Ko te ʼu taʼi faikole agavaivai ʼaia, ʼe mahino ia ʼe fakafiafia ai te loto ʼo tatatou Tamai ʼe ʼi selō. Ohagē ko tona ʼui e Sesu, ʼe foaki lahi mai anai e Sehova ia tona laumālie māʼoniʼoni mokā tou kole fakamālotoloto age.—Luka 11:13.

13, 14. Ko tatatou teuteuʼi ia te ʼu fono ʼe tokoni feafeaʼi mai ke tou mahino ki te ʼu meʼa loloto ʼa te ʼAtua?

¹³ Tou teuteuʼi te ʼu fono. ʼE tou maʼu te “meʼa kai ʼi tona temi totonu” mai te kalasi ʼo te tagata kaugana. ʼE fai e te “tagata kaugana” tona ʼu maʼua ʼaki tana foaki te ʼu tokoni ʼaē ʼe fakatafito ki te Tohi-Tapu pea mo teuteuʼi te ʼu polokalama ki te fai ʼo te ʼu ako pea mo te ʼu fono. ʼE ʼi ai te ʼu tupuʼaga tāfito ke kole ai ki “te fāmili kātoa ʼo te ʼu tehina” ke natou vakavakaʼi he faʼahiga manatu. (1 Pet. 2:17; Kol. 4:16; Suta 3) ʼE tou kaugā gāue fakatahi mo te laumālie māʼoniʼoni mokā tou faiga fakamālotoloto ke tou muliʼi te ʼu tokoni ʼaē ʼe ina foaki mai.—Fakh. 2:29.

¹⁴ Kā tou teuteuʼi te ʼu fono Fakakilisitiano, ʼe lelei ke tou toʼo te ʼu vaega Fakatohi-tapu takitahi ʼaē ʼe tuʼu ai pea mo tou faigaʼi ke tou fakakaukauʼi peʼe ʼalutahi feafeaʼi mo te ʼu manatu ʼaē ʼe tou ako. Ko te taʼi fai ʼaia, ʼe fakatuputupu māmālie ai anai tatatou mahino ʼaē ki te Tohi-Tapu. (Gāue 17:11, 12) Ko tatatou kumi mo lau te ʼu vaega, ʼe tāʼofi maʼu anai ʼi totatou ʼatamai ke feala ki te laumālie māʼoniʼoni ki ʼamuli ke ina toe fakamanatuʼi mai. Tahi ʼaē, kapau ʼe tou lau te vaega ʼi te Tohi-Tapu, ʼe tou sio ki te faʼahi ʼaē ʼe tuʼu ai, pea ʼe tokoni mai anai ke tou maʼu te vaega mokā ʼe ʼaoga ke tou toe toʼo.

15. He koʼē ʼe tonu ke tou ʼiloʼi ia te ʼu manatu fakamuli ʼi te ʼu tohi ʼaē neʼe tā, pea ʼe tou lava fakahoko feafeaʼi te faʼahi ʼaia?

¹⁵ Tou ʼiloʼi te ʼu manatu fakamuli ʼi te ʼu nusipepa, ʼo tou lau fuli. Ko ʼihi tohi ʼe mole tou fakaʼaogaʼi ki tatatou ʼu fono, kae neʼe tā ke fua lelei kiā tātou. Māʼiapē lā mo te ʼu nusipepa ʼaē ʼe tou tufa ki te hahaʼi neʼe teuteuʼi e te tagata kaugana agatonu mo poto te ʼu ʼalatike ʼo ina manatuʼi tātou. ʼI te mālama maveuveu ʼaenī, ʼi ʼihi temi ʼe tonu ke tou fakatalitali ki he tahi peʼe ki he meʼa. Kapau ʼi te ʼu taʼi lakaga ʼaia, ʼe tou toʼo he tohi neʼe mole heʼeki tou lau pe neʼe tou lau fakakoga pē, ʼe lagi feala ke tou fakaʼaogaʼi te ʼu faigamālie ʼaia moʼona lau. Ko ʼihi ke natou ʼiloʼi te ʼu manatu fakamuli ʼi te ʼu tohi, ʼe natou fakalogo te ʼu ʼalatike ʼaē neʼe puke mokā natou haʼele peʼe mokā natou taki motokā. Neʼe lahi te ʼu kumi ʼaē neʼe fai ki te ʼu ʼalatike, kae ke lava lau e he kau lautohi, pea ko te ʼu tohi fuli ʼaia ʼe fakaloloto ai tatatou loto fakafetaʼi ki te ʼu meʼa fakalaumālie.—Hap. 2:2.

16. Koteā te fua lelei ʼaē ʼe tou maʼu mokā tou tohi pea mo fai he ʼu kumi ki te ʼu fehuʼi ʼaē ʼe malaga ʼi totatou ʼatamai?

¹⁶ Tou metitāsio. Kā kotou lau te Tohi-Tapu peʼe ko te ʼu tohi fakatohi-tapu, kotou toʼo he temi ke kotou metitāsioʼi ai te ʼu manatu ʼaia. Kapau ʼe kotou muliʼi fakalelei te fehoahoaʼaki ʼa te ʼu manatu, ʼe feala ke hake ʼi tokotou ʼatamai ia he ʼu fehuʼi. ʼE lagi lelei ke kotou tohi te ʼu fehuʼi ʼaia pea mo fai he ʼu kumi ki muli age. ʼI te agamāhani ʼe tou fakaloloto tatatou ako mokā neʼe ʼi ai he puani ʼe tou fia mahino lelei kiai. Ko te ʼatamai mālama ʼaia ʼe tou maʼu, ʼe liliu anai ko he koloa ʼe tou lava fakaʼaogaʼi mokā ʼe ʼaoga kiā tātou.—Mat. 13:52.

17. Koteā takotou polokalama ako fakafāmili peʼe ko takotou ako tokotahi?

¹⁷ Tou tuku he temi ki te tauhi fakafāmili. Neʼe fakalotomālohiʼi e te Kolesi Pule ia tātou fuli ke tou fakaʼaogaʼi he afiafi peʼe ko he tahi atu temi ʼi te vāhaʼa fuli ki te ako takitokotahi peʼe ki te ako fakafāmili. ʼAki te kua fetogi ʼo tatatou polokalama fono, kua tou maʼu ai ia te fealagia ʼaē ke tou fakahoko te tokoni ʼaia. Koteā ʼaē ʼe kotou vakaʼi ʼi te ʼu afiafi ʼaē ʼe kotou fai te Tauhi Fakafāmili? Ko ʼihi ʼe natou lau te Tohi-Tapu, ʼe natou fai he ʼu kumi ʼo ʼuhiga mo he ʼu fehuʼi neʼe natou fai ʼi tanatou lau he ʼu vaega pea natou tohi fakanounou he ʼu kiʼi nota ʼi tanatou Tohi-Tapu. ʼE lahi te ʼu fāmili ʼe natou toʼo he temi moʼo vakaʼi fakafāmili ia te ʼu puani ʼi te ako ʼaē neʼe natou fai ke natou maʼuliʼi fakatahi. Ko ʼihi pule fāmili ʼe natou filifili te tohi ʼaē ʼe ʼaoga ki te ʼaluʼaga ʼo te fāmili peʼe ʼalutahi mo he ʼu manatu peʼe ko he ʼu fehuʼi neʼe lagaʼi e te fāmili ke natou vakaʼi fakatahi. ʼAki te temi, ʼe lagi ʼe ʼi ai anai he tahi ʼu puani ke kotou vakaʼi fakatahi.a

18. He koʼē ʼe tonu ke tou fia ako te ʼu moʼoni loloto ʼo te Folafola ʼa te ʼAtua?

¹⁸ Neʼe ʼui e Sesu ʼe gāue anai te laumālie ohagē ko he tagata tokoni. Koia ʼaē ʼe tonu ai ke tou fia ako te ʼu moʼoni loloto ʼo te Folafola ʼa te ʼAtua. ʼE kau te ʼu moʼoni ʼaia ki te “ ʼatamai mālama [maʼuhiga] ʼo ʼuhiga mo te ʼAtua” pea neʼe fakaafe tātou ke tou kumi te ʼu moʼoni ʼaia. (Lau ia Tāʼaga Lea 2:1-5.) ʼE fakahā tāfito mai e te ʼu moʼoni ʼaia ia “te ʼu meʼa ʼaē neʼe teuteuʼi e te ʼAtua maʼa nātou ʼaē ʼe ʼoʼofa kiā te ia.” Kapau ʼe tou faiga mālohi ke tou ako lahi age te Folafola ʼa Sehova, ʼe tokoni mai anai te laumālie māʼoniʼoni, heʼe “ko te laumālie ʼe ina sivisivi ia meʼa fuli, māʼiapē lā mo te ʼu meʼa loloto ʼa te ʼAtua.”—1 Ko. 2:9, 10.

[Nota]

ʼE Kotou Tali Feafeaʼi Anai?

• Koteā te ʼu faʼahiga gāue e lua ʼaē ʼe tokoni mai ai te laumālie ke tou sivisivi “te ʼu meʼa loloto ʼa te ʼAtua”?

• Ko ai ʼi te ʼuluaki sēkulō ʼaē neʼe fakaʼaogaʼi e te laumālie māʼoniʼoni moʼo fakahā te ʼu moʼoni loloto?

• ʼE feafeaʼi te gāue ʼaē ʼe fai e te laumālie māʼoniʼoni moʼo fakamahino te ʼu moʼoni ʼi totatou temi?

• Koteā ʼaē ʼe kotou lava fai ke kotou maʼu ai te ʼu lelei ʼo te gāue ʼa te laumālie?

[Talanoa ʼo te pasina 30]

Te Fakamahino ʼAē Neʼe Fai e Te Laumālie ʼo ʼUhiga Mo Te Fale Lotu Fakalaumālie

ʼI “te ʼu meʼa loloto ʼa te ʼAtua” ʼaē neʼe fakahā ʼi te ʼuluaki sēkulō, neʼe kau ai te tapenakulo pea ki muli age neʼe fakatātā e te ʼu fale lotu ia te ʼu moʼoni fakalaumālie ʼe lahi age. Neʼe fakahigoaʼi e Paulo ia te moʼoni ʼaia ko “te fale fehikitaki moʼoni, ʼaē neʼe fakatuʼu e Sehova, kae mole ko te tagata.” (Hep. 8:2) Neʼe ko te fale lotu lahi fakalaumālie ʼaia, ko he fakatuʼutuʼu moʼo fakaovi ki te ʼAtua pea neʼe fakafealagia ʼaki te sākilifisio pea mo te gāue fakapelepitelō ʼa Sesu Kilisito.

Ko “te fale fehikitaki moʼoni” neʼe kamata ʼi te taʼu 29 ʼo totatou temi, ʼi te temi ʼaē neʼe papitemaʼi ai Sesu pea neʼe tali ia ia e Sehova ko he sākilifisio haohaoa. (Hep. 10:5-10) ʼI tana kua mate pea mo fakatuʼuake, neʼe hū Sesu ki te Potu Taputapu ʼAupitō ʼo te fale lotu fakalaumālie pea neʼe ina fakahā te maʼuhiga ʼo tona sākilifisio “iā muʼa ʼo te ʼAtua.”—Hep. 9:11, 12, 24.

Tahi ʼaē, neʼe tohi e te ʼapositolo ko Paulo ʼo ʼuhiga mo te kau Kilisitiano fakanofo ʼe natou “malaga ake ke liliu ko he fale lotu taputapu maʼa Sehova.” (Efe. 2:20-22) Neʼe tonu koa ke tatau ia te fale lotu ʼaia mo “te fale fehikitaki moʼoni” ʼaē neʼe talanoa ki muli age ʼi tana tohi ʼaē ki te kau Hepeleo? Lolotoga te ʼu taʼu, neʼe manatu te ʼu kaugana ʼa Sehova neʼe ko tona fakamahino ʼaia. Neʼe hagē neʼe teuteuʼi te kau Kilisitiano fakanofo ʼi te kele ke natou liliu ko he “ ʼu maka” ʼi te fale lotu ʼo Sehova ʼaē ʼi selō.—1 Pet. 2:5.

Kae ʼi te taʼu 1971, ko te ʼu tehina takitaki ʼo te kalasi ʼo te tagata kaugana neʼe natou kamata mahino ko te fale lotu ʼaē neʼe talanoa kiai Paulo ki te kau Efesi, neʼe mole feala ke tatau mo te fale lotu lahi fakalaumālie ʼo Sehova. Kapau ko “te fale fehikitaki moʼoni” neʼe faʼufaʼu e te kau Kilisitiano fakanofo ʼaē neʼe kua fakatuʼuake, neʼe hoki fakatuʼu ia ʼi tanatou kua fakatuʼuake, ʼaē neʼe kamata lolotoga “te ʼi henī ʼa te ʼAliki.” (1 Tes. 4:15-17) Kae ʼi tana talanoa ki te tapenakulo, neʼe tohi fēnei e Paulo: “Ko te fale fehikitaki ʼaia ʼe ko he fakatātā ki te temi ʼaē kua fakakatofa ʼaē kua tuʼu nei.”—Hep. 9:9.

Ko te vakavakaʼi fakalelei te ʼu vaega ʼaia pea mo ʼihi atu vaega fakatohi-tapu, ʼe hā lelei ai ko te fale lotu fakalaumālie ʼe mole lolotoga laga ia pea ko te kau Kilisitiano fakanofo ʼe mole ko te “ ʼu maka” ʼaē neʼe teuteuʼi ʼi te kele moʼo fakahū ki te fale lotu ʼaia. Kailoa ia, ʼe lolotoga gāue te kau Kilisitiano fakanofo ʼi te malaʼe pea ʼi te Potu Taputapu ʼo te fale lotu fakalaumālie, ʼe natou momoli ki te ʼAtua ʼi te ʼaho fuli “he sākilifisio fakavikiviki.”—Hep. 13:15.

[Paki ʼo te pasina 31]

ʼE feafeaʼi hatatou hikihiki tatatou mahino ki “te ʼu meʼa loloto ʼa te ʼAtua”?