Kua Vave Pē Te Fakagata ʼo Te ʼu Aga ʼAē ʼe Kovi!

NEʼE foaki mai e te ʼAtua tana Folafola, pea ʼe fakamahino ai te ʼu tupuʼaga ʼo te fai e te hahaʼi te ʼu aga ʼaē ʼe kovi. Neʼe ina foaki mai ia te loto faʼitaliha pea mo te fealagia ʼaē ke tou loto lolomi, ke feala ai hatatou filifili ke mole tou fai te ʼu aga ʼaē ʼe kovi. (Teutalonome 30:15, 16, 19) ʼAki te ʼu fealagia ʼaia, kua feala ai ke tou mahino peʼe koteā te ʼu faʼahiga aga ʼaē ʼe ina taki tātou ki te kovi pea mo tou fai he ʼu puleʼaki ʼe ʼaoga moʼo fetogi. ʼI tatatou fakamamaʼo ʼaē mai te fai ʼo te ʼu aga ʼaē ʼe kovi, ʼe tou fiafia ai anai ʼo fēia mo te hahaʼi ʼi totatou ʼu tafaʼaki.—Pesalemo 1:1.

Logolā hatatou faiga takitokotahi ke tou teteke te fai ʼo te ʼu aga ʼaē ʼe kovi, kae ʼe hoko atu pē te maʼuli mamahi ʼa te mālamanei ʼuhi ko te ʼu agakovi ʼaē ʼe fai e te tagata. ʼE fakatokagaʼi fēnei mai ʼi te Tohi-Tapu: “Ke ke ʼiloʼi te meʼa ʼaenī: ʼi te ʼu ʼaho fakamuli ʼe ʼi ai anai te ʼu temi maʼuhiga ʼaupitō pea mo faigataʼa.” Moʼo fakahā ia te ʼu faʼahi ʼaē ʼe tupu ai te “faigataʼa” ʼo te ʼu ʼaho ʼaia, ʼe hoko atu fēnei ia te fakamatala: “Ko te hahaʼi ʼe kaumeʼa pē anai mo nātou totonu, kaumeʼa mo te paʼaga, fiatuʼu, fialahi, fasituʼu ki te ʼAtua, talagataʼa ki te ʼu mātuʼa, maʼuli galo, heʼe agatonu, heʼeʼofa, logogataʼa, fasituʼu, heʼe fakatātāʼofi, fekai, mole manako ki te meʼa ʼaē ʼe lelei, kākā, fiatuʼu, fonu ʼi te fialahi, kaumeʼa mo te ʼu fakafiafia kae mole kaumeʼa mo te ʼAtua, ʼe hagē ʼe natou pipiki ki te ʼAtua, kae ʼe natou lītuʼa ki tona mālohi; pea mai ia nātou ʼaia ke ke maliu kehe mai ai.”—2 Timoteo 3:1-5.

Neʼe lagi kotou tokagaʼi te kupuʼi palalau ʼaē ko “te ʼu ʼaho fakamuli” ʼi te lea fakapolofetā ʼi te vaega ʼaē ʼe tuʼu ʼi ʼoluga. Koteā tona fakaʼuhiga kiā koutou? Ohagē pē ko te mahino ʼa te hahaʼi fuli, ko te kupuʼi palalau “te ʼu ʼaho fakamuli,” ʼe fakaʼuhiga ʼe ʼi ai te meʼa kā ʼamanaki fakagata. Koteā ʼapē? Kotou vakaʼi age muʼa te fakapapau ʼaenī a te ʼAtua ʼe maʼu ʼi tana Folafola.

ʼE pulihi kātoa anai te hahaʼi agakovi.

“ ʼE kei toe he kiʼi temi siʼi pē, pea pulihi anai te tagata agakovi; pea ʼe mahino papau ia ʼe ke vakavakaʼi anai te potu ʼaē ʼe nofo ai, kae ʼe kua puli anai ia. Kae ko te kau agavaivai ʼe natou maʼu anai te kele, pea ʼe natou fiafia moʼoni anai ʼi te mahu ʼo te tokalelei.”—PESALEMO 37:10, 11.

“ ʼE haofaki e Sehova ia nātou fuli ʼaē ʼe ʼoʼofa kiā te ia, kae ʼe ina fakaʼauha anai te kau agakovi fuli.”—PESALEMO 145:20.

ʼE mole toe maʼuli mamahi anai he tahi.

“[ʼE] ina haofaki anai te tagata masiva ʼaē ʼe pāui ke tokoni age ki ai, ʼo toe fēia mo ia ʼaē ʼe lotomamahi pea mo ia ʼaē ʼe mole he tahi ke tokoni age ki ai. ʼE ina totogi anai te ʼu nefesi ʼo nātou ʼaē ʼe maʼuli mamahi pea mo ʼaē ʼe gaohi koviʼi.”—PESALEMO 72:12, 14.

“Ko te ʼu meʼa ʼaē neʼe fakatupu ʼe toe fakaʼāteaina anai nātou mai te pōpula ki te meʼa ʼaē ʼe popo pea ʼe natou maʼu anai te ʼāteaina fakakolōlia ʼo te fānau ʼa te ʼAtua.”—LOMA 8:21.

ʼE maʼu kātoa anai e te hahaʼi te ʼu meʼa fakasino ʼaē ʼe ʼaoga kiā nātou.

“ ʼE natou tahi heka anai ʼi tona lalo fuʼu vite pea mo tona lalo fuʼu fiku, pea ʼe mole ʼi ai anai he tahi ʼe ina fakamatakuʼi ia nātou.”—MIKEA 4:4.

“ ʼE mahino papau ia, ʼe natou laga anai ni ʼu fale pea ʼe natou nofoʼi anai; pea ʼe mahino papau ia ʼe natou tō anai he ʼu fuʼu vite pea mo natou kai anai tonatou ʼu fua. ʼE mole natou laga anai ke nofoʼi e he tahi kehe; pea ʼe mole natou tō anai ke kai e he tahi kehe. Heʼe hagē anai te ʼu ʼaho ʼo taku hahaʼi ko te ʼu ʼaho ʼo he fuʼu ʼakau; pea ko taku hahaʼi ʼaē neʼe au fili, ʼe natou fakaʼaogaʼi kātoa anai te gāue ʼo tonatou ʼu nima.”—ISAIA 65:21, 22.

ʼE maʼu anai te faitotonu.

“ ʼE mole ʼapē fai anai koa ia e te ʼAtua te fakamāu ʼaē ʼe totonu ki tana hahaʼi ʼaē kua fili, ʼaē ʼe kalaga ake kiā te ia ʼi te ʼaho mo te pō . . . ? ʼE au tala atu kiā koutou: ʼE ina fai anai he fakamāu ʼe totonu kiā nātou ʼi te moʼi temi pē ʼaia.”—LUKE 18:7, 8.

“Ko Sehova ʼe manako ki te faitotonu, pea ʼe mole ina liʼaki anai tana hahaʼi agatonu. ʼO aʼu ki he ʼu temi ʼe mole ʼiloʼi hona gataʼaga, ʼe puipui anai nātou.”—PESALEMO 37:28.

Ko te tahi manatu pē kiā kita ʼe fetogi anai e te agatonu.

“ ʼE ko te faitotonu ʼaē kā ako moʼoni anai e te ʼu hahaʼi ʼo te kele maʼuli.”—ISAIA 26:9.

“Ohagē ko tana fakapapau mai, ʼe tou talitali ki te ʼu lagi foʼou pea mo te kele foʼou ʼaē ʼe tonu ke nofo ai te faitotonu.”—2 PETELO 3:13.

ʼE Lolotoga Fetogi Ia Te Hahaʼi —ʼO Kamata Atu ʼi Te Temi Nei

ʼE mahino ia, ko tātou fuli ʼe tou fiafia anai ʼi te ʼu taʼi fakapapau ʼaia. Kae ʼe feafeaʼi hatatou ʼiloʼi papau ʼe hoko moʼoni anai? ʼI tona fakahagatonu, kua ʼi ai te fakamoʼoni ʼi te temi nei ʼe hoko anai te ʼu fakapapau ʼa te ʼAtua. Koteā te fakamoʼoni ʼaia? Ko te kua fua lelei ki te toko lauʼi miliona hahaʼi ʼi te temi nei ʼi te kele kātoa, ʼi tanatou lītuʼa ki tonatou ʼuluagaaga ʼaē ʼe hā ʼi tanatou manatu pē ʼaē kiā nātou totonu, mo tanatou ʼu aga heʼeʼaoga peʼe agamālohi, pea kua natou ako ke natou liliu ko he ʼu hahaʼi ʼe aga fakahagatonu, mo tokalelei pea mo agalelei. Iā ʼaho nei, ko te kau Fakamoʼoni ʼa Sehova ʼaē kua lau kua nātou toko fitu miliona tupu, ʼe natou faʼufaʼu he fale tautēhina ʼi te mālamanei kātoa, kua natou lītuʼa ki te ʼu fakapalatahi ʼo ʼuhiga mo te lanu, mo te fenua, mo te politike pea mo te ʼu meʼa fakaekonomika, ʼaē neʼe tupu ai te toe fehiʼa lahi, mo te agamālohi, mo te ligitoto ʼi te maʼuli kātoa ʼo te tagata.a Ko te ʼu taʼi fetogi ʼaia ʼe lolotoga hoko nei, ʼe ko he fakamoʼoni ʼaia ʼe tou lava tui papau ai ʼe hoko moʼoni anai te ʼu fakapapau ʼa te ʼAtua ʼi te mālamanei kātoa.

Koteā ʼaē ʼe tupu ai ia te ʼu fetogi ʼaia? ʼE maʼu tona tali ʼi te tahi fakapapau Fakatohi-tapu, ʼe fakamatala e te polofetā ko Isaia. Neʼe ina tohi fēnei:

“Ko te lupo ʼe nofo fakatemi anai mo te ʼakeno tagata, pea ko te leopa ʼe takoto fakatahi anai mo te ʼuhiʼi tao, pea ko te ʼuhiʼi pipi, pea mo te laione mui, pea mo te manu ʼaē neʼe fafaga lelei, ʼe natou fakatahi fuli anai; pea ʼe takitaki anai nātou e te kiʼi tamasiʼi tagata. . . . Pea māʼia mo te laione ʼe ina kai anai te mouku ohagē ko te vītulo. Ko te kiʼi tamasiʼi ʼaē ʼe kei fafaga e tana faʼē, ʼe gaoʼi anai ʼi te nofoʼaga ʼo te gata kafo kona, ko te kiʼi tamasiʼi ʼaē kua vavae, ʼe ina ʼai moʼoni anai tona nima kiai. ʼE mole fai anai he meʼa ʼe kovi pea ʼe mole fakatupu anai he maumau ʼi toku moʼuga māʼoniʼoni kātoa, heʼe fonu moʼoni anai te kele ʼi te ʼatamai mālama ʼo ʼuhiga mo Sehova ohagē ko te ʼuʼufi ʼo te tai e te ʼu vai.”—Isaia 11:6-9.

ʼE fakakikite pē koa e te lea fakapolofetā ʼaenī ia he temi ʼe maʼuli tokalelei ai anai ia te faga manu mo te tagata? Kailoa ia, ʼe laka age tona fakaʼuhiga. Kotou tokagaʼi ʼe fakahā ʼi te koga fakaʼosi ʼo te vaega ia te tupuʼaga ʼo te fetogi ʼaia: “[ʼE] fonu moʼoni anai te kele ʼi te ʼatamai mālama ʼo ʼuhiga mo Sehova.” Ko te ʼatamai mālama ʼo ʼuhiga mo te ʼAtua, ʼe ina fetogi koa ia te aga ʼa te manu? Kailoa ia, kae ko te aga ʼaē ʼa te hahaʼi kā ina lava fetogi! ʼE fakakikite ʼi te lea fakapolofetā ʼaia ko nātou ʼaē neʼe lagi hagē ia tanatou aga ko he ʼu manu, ʼe natou tuku keheʼi anai te ʼu aga ʼaia kae natou fakatuputupu he ʼuluagaaga ohagē ko Kilisito, ʼuhi ko tanatou ako pea mo maʼuliʼi te meʼa ʼaē ʼe akoʼi mai ʼi te Tohi-Tapu.

Tou tokagaʼi ia te meʼa ʼaē neʼe hoko kiā Pedro.b ʼI tana manatu, neʼe lagolago ia ki te fakatuʼu ʼo te faitotonu ʼi tana hū ʼaē ki te kautahi ʼo te kūtuga fai fakapō. ʼI tana kua ʼosi akoako te ʼu agaaga ʼo te maʼuli ʼaia, neʼe fakatotonu age leva ke ʼalu ʼo fakapaʼulu ia te fale polisi. ʼI tana lolotoga teuteu ki te faʼahi ʼaia, neʼe puke ia ia e te kau polisi. Neʼe pilisoniʼi ia Pedro iā māhina e 18, pea neʼe ina hoko atu pē ʼi te fale pilisoni tana aga fakafeagai ʼaē ki te puleʼaga. Lolotoga te temi ʼaia, neʼe fai ia te ako Tohi-Tapu ʼa te ʼohoana ʼo Pedro mo te kau Fakamoʼoni ʼa Sehova. ʼI tana mavae ʼaē mai te fale pilisoni, neʼe toe fai mo te ako Tohi-Tapu ʼa Pedro, pea ko te ʼu meʼa ʼaē neʼe ina ako ʼo ʼuhiga mo Sehova ʼAtua neʼe ina uga ia ia ke ina fai he ʼu fetogi lahi ʼi tona maʼuli pea mo tana faʼahiga manatu ʼaē ki te maʼuli. ʼE ʼui fēnei e Pedro: “ ʼE au fakamālo kiā Sehova ʼi taku mole heʼeki fakapōgi he tahi lolotoga te ʼu taʼu ʼaia neʼe au maʼuli ai ko te tagata fai fakapō (terroriste). ʼE au fakaʼaogaʼi nei ia te heletā ʼo te laumālie ʼo te ʼAtua, ia te Tohi-Tapu, moʼo fakahā ki te hahaʼi ia te logo ʼo te tokalelei moʼoni pea mo te faitotonu moʼoni—te logo lelei ʼo ʼuhiga mo te Puleʼaga ʼo te ʼAtua.” Neʼe ʼalu ia Pedro ki te fale polisi ʼaē neʼe teuteu ke ina fakapaʼulu, ʼo fakahā kiā nātou ia te logo ʼo ʼuhiga mo te tokalelei pea mo he mālama ʼe mole toe ʼi ai anai te agamālohi.

Ko te lava fetogi ʼaē e te Folafola ʼa te ʼAtua ia te hahaʼi, ʼe ina uga ai tātou fuli ke tou tui papau ʼe hoko moʼoni anai ia te fakapapau ʼaē ʼa te ʼAtua ke ina fakagata ia te ʼu aga kovi fuli. ʼE mahino ia, ko te hahaʼi ʼe mole natou fai hoholo anai te ʼu aga ʼaē ʼe kovi, heʼe natou liliu anai ko ni hahaʼi ʼe agalelei. Kua vave pulihi pē e Sehova ia te tupuʼaga ʼaē ʼo te hoko ʼo te ʼu aga ʼaē ʼe kovi, ia Satana te Tēvolo, ia ia tāfito ʼaē ʼe ina fakanekeneke ia te ʼu gāue ʼo te mālamanei. ʼE ʼui fēnei ʼi te Tohi-Tapu: “Ko te mālamanei kātoa ʼe takoto ia ʼi te mālohi ʼo te agakovi.” (1 Soane 5:19) Kae kua vave pē tona pulihi. ʼE pulihi atu ai mo nātou ʼaē ʼe fakafifihi ʼo mole natou fia lītuʼa ki ʼanatou aga ʼaē ʼe kovi. ʼE fakaofoofo anai ia te maʼuli ʼi te ʼu taʼi temi ʼaia!

Koteā ʼaē ʼe tonu ke kita fai ke kita tui papau ai ʼe hoko moʼoni mai anai ia te kā haʼu ʼaia? Kotou manatuʼi, ʼe ko “te ʼatamai mālama ʼo ʼuhiga mo Sehova” ʼaē ʼe ina fetogi te maʼuli ʼo te hahaʼi iā ʼaho nei, pea ko ia ʼaē kā ina fetogi te mālamanei ʼi te kā haʼu kua ovi mai. ʼI takotou maʼu ia te ʼatamai mālama totonu ʼo ʼuhiga mo te Tohi-Tapu pea mo kotou maʼuliʼi ohagē ko tona fai e Pedro, ʼe feala ai hakotou sio fakatomuʼa ki he mālama ‘ ʼe nofo ai anai ia te faitotonu.’ (2 Petelo 3:13) Koia, ʼe matou uga ai koutou ke kotou fakaʼaogaʼi nei ia te faigamālie ʼaē ʼe kei kotou maʼu ʼaē ke kotou ako ia te mālama ʼo ʼuhiga mo te ʼAtua pea mo Sesu Kilisito, ke feala ai hakotou maʼu te maʼuli heʼegata.—Soane 17:3.

[ʼU nota]

[Fakamatala ʼo te pasina 9]

ʼE feala ai hakotou sio fakatomuʼa ki he mālama ‘ ʼe nofo ai anai ia te faitotonu.’—2 PETELO 3:13