Koteā Ia Te Manatu ʼa Sesu ʼo ʼUhiga Mo Te Politike?

NEʼE fakamatala e te ʼu tagata faitohi Evaselio ia te ʼu ʼaluʼaga ʼo te minisitelio ʼa Sesu ʼaē neʼe felāveʼi ai mo te kau fai politike. Ohagē lā, ʼi te hili pē ʼo te papitema ʼa Sesu ʼi tona taʼu 30, neʼe fia foaki age e te Tiapolo kiā te ia ia te pule ʼo te mālamanei. Ki muli age ʼi tana minisitelio, neʼe fia fakanofo e te hahaʼi ia ia ko he hau. Pea ʼi te tahi ʼaluʼaga, neʼe toe faigaʼi e te hahaʼi ke liliu ko he tahi ʼe fakafeagai. ʼI te ʼu ʼaluʼaga ʼaia, koteā ʼaē neʼe fai e Sesu? Koia tou vakaʼi te ʼu faʼahi ʼaia.

Ko he pule ʼo te mālamanei. ʼE ʼui ʼi te ʼu Evaselio neʼe fia foaki e te Tiapolo kiā Sesu ia te takitaki ʼo te ʼu “puleaga fuli o te malamanei.” Kotou fakakaukauʼi age muʼa te lelei neʼe feala ke fakahoko e Sesu ʼo ʼuhiga mo te ʼu mamahi ʼo te mālamanei mo kanapaulā neʼe ina maʼu ia te pule ʼaia moʼo takitaki ia te mālamanei. ʼE lava feafeaʼi ki he tagata ʼe ina fia fakatokatoka ia te ʼu fihifihia ʼo te mālamanei hana fakafisi ki te taʼi faigamālie ʼaia? Kae neʼe fakafisi ia Sesu kiai. (Mateo 4:8-11) Logolā neʼe fakahā e Sesu ia tona ʼofa mamahi ʼaē ki te hahaʼi, kae ʼe mahino ia neʼe ʼi ai te tupuʼaga tāfito ʼo tana fakafisi kiā Satana.

Ko he hau. Tokolahi te hahaʼi ʼi te temi ʼo Sesu, neʼe mole kei hanatou ʼamanaki ʼo ʼuhiga mo he hau ʼe ina fakatokatoka anai ia te ʼu fihifihia fakaekonomika pea mo fakapolitike. ʼI tanatou sisio ki te ʼu fealagia ʼaē neʼe maʼu e Sesu, neʼe natou faigaʼi leva ke kau ki te politike. Neʼe koteā te tali ʼa Sesu? ʼE ʼui fēnei e te tagata fai Evaselio ko Soane: “I te iloi e Sesu, ka natou omai anai o too ia ke fakanofo ke hau, nee toe alu leva ia toko tahi ki te mouga.” (Soane 6:10-15) Koia neʼe fakafisi ia Sesu ki te tuʼulaga hau ʼaia.

Ko he tagata fakafeagai. Kotou fakatokagaʼi ia te meʼa ʼaē neʼe hoko ʼi te ʼu ʼaho ʼi muʼa ʼo tona mate. Neʼe fakaovi age kiā Sesu ia te ʼu tisipulo ʼa te kau Faliseo ʼaē neʼe fakaʼamu ki he puleʼaga faʼitaliha mai te Puleʼaga Loma, pea mo te kau Helote ʼaē neʼe kau ki te faʼahi fakapolitike neʼe lagolago ki te puleʼaga Loma. Neʼe natou fakamālohiʼi ia ia ke ina filifili ia he faʼahi fakapolitike. Neʼe natou fehuʼi age peʼe tonu koa ke totogi e te kau Sutea ia te tukuhau ki Loma.

Neʼe fakamatala fēnei e Maleko ia te tali ʼa Sesu: “Kotea e kotou ahiahii ai au? Kotou aumai age he foi tenalio, ke au sio ki ai. Nee natou avage leva he foi tenalio; pea nee fehui leva ia Sesu kia natou: Ko te paaki mo te fakailoga o ai ae e tuu i ai? Nee natou tali leva: O Sesale. Pea nee ina ui leva kia natou: Kotou liufaki kia Sesale te mea a Sesale, pea kotou liufaki ki te Atua te mea a te Atua.” (Maleko 12:13-17) ʼO ʼuhiga mo te tali ʼaia ʼa Sesu, neʼe ʼui ʼi te tohi Le mystère de Jésus: “Neʼe fia fakamahino [e Sesu] ki te kau Iselaele ʼaē kua fakapotopoto ʼe mole ko ia ko he Mēsia neʼe haʼu ʼo tau. . . . Pea mo fakahā lelei ia te tuʼakoi ʼo te ʼu meʼa ʼa Sesale pea mo ʼaē ʼa te ʼAtua.”

ʼE mole fakaʼuhiga leva, ʼe mole tokagaʼi e Kilisito ia te ʼu fihifihia ohagē ko te maʼuli masiva, mo te aga fakakākā, pea mo te heʼe faitotonu. ʼI tona fakahagatonu, ʼe fakahā ʼi te Tohi-Tapu neʼe malave ʼaupitō kiā te ia ia te fakaʼofaʼofa ʼa te hahaʼi. (Maleko 6:33, 34) Logopē lā tona lotomamahi pea mo te faigaʼi mālohi e ʼihi ke kau ki ni ʼaluʼaga fakatupu maveuveu, kae neʼe mole fakatuʼutuʼu e Sesu ke ina foimo fai he puleʼaki moʼo pulihi ia te ʼu ʼaluʼaga heʼe faitotonu ʼaia.

ʼE mahino mai kiā tātou, ʼaki te ʼu faʼifaʼitaki ʼaenī, neʼe mole kau ia Sesu ki te ʼu meʼa fakapolitike. Kae ʼe feafeaʼi ki te kau Kilisitiano iā ʼaho nei? Koteā ʼaē ʼe tonu ke natou fai?