He Koʼē Ko Ia ʼAē ʼe Fakalogo Ki Te ʼu Faikole ʼe Ina Fakagafua Te ʼu Mamahi?

TATAU aipē peʼe faikole ʼihi, kae ʼe faigataʼa tanatou tui ʼe ʼi ai moʼoni he ʼAtua. Koteā te tupuʼaga ʼo tanatou lotolotolua ʼaia? ʼE lagi tupu ko tanatou sisio ki te lahi ʼo te ʼu mamahi ʼi te mālamanei. Neʼe kua kotou feʼekeʼaki koa pe koʼē ʼe fakagafua e te ʼAtua te mamahi?

Neʼe fakatupu moʼoni koa e te ʼAtua he hahaʼi heʼe haohaoa ke natou maʼuli mamahi, ohagē ko tatatou sio kiai ʼi te temi nei? ʼE faigataʼa anai hatatou fakaʼapaʼapa ki he ʼAtua neʼe ina loto ke maʼuli mamahi te hahaʼi. Kae tou vakaʼi ia te faʼifaʼitaki ʼaenī: Kapau ʼe kotou sio ki he motokā foʼou pea kotou tokagaʼi he faʼahi ʼo te motokā kua maumau, ʼe kotou ʼui anai koa neʼe fēia pē tona faʼu e te sōsiete faʼu motokā? Kailoa ia. ʼE kotou manatu anai neʼe “lelei” tona faʼu e te sōsiete, kae neʼe lagi maumauʼi e he tahi peʼe ko he meʼa.

ʼO toe fēia pē, kapau ʼe tou mamata ki te fakaofoofo ʼo te fakatokatoka pea mo te matalelei ʼo te nātulā pea tou tokagaʼi leva te maveuveu pea mo te aga fakakākā ʼaē ʼe fua kovi ki te mālamanei, koteā anai tatatou manatu? ʼE akoʼi mai ʼi te Tohi-Tapu, ko te ʼAtua neʼe ina fakatupu haohaoa ia te ʼuluaki taumātuʼa kae neʼe ko tanā hala mokā neʼe nā liliu ʼo heʼe haohaoa. (Tetelonome 32:4, 5) Kae ko te meʼa fakatupu fiafia he neʼe fakapapau e te ʼAtua ke ina fakatokatoka ia te faʼahi ʼaia, ko tona fakaʼuhiga ke toe liliu te hahaʼi talagafua ʼo haohaoa. Kae he koʼē ʼe fakatalitali fualoa fēia?

He Koʼē Neʼe Ina Tuku He Temi Loaloaga?

ʼE tou ʼiloʼi anai tona tupuʼaga mokā tou mahino pe ko ai ʼaē ʼe tonu ke pule ki te mālamanei. Neʼe mole he temi neʼe fakatuʼutuʼu ai e Sehova ke pule te tagata. Neʼe ko ia ʼaē neʼe tonu ke Pule. ʼE ʼui fēnei ʼi te Tohi-Tapu: “E mole ko te tagata ae e ina taki ona lakaaga moka haele.” (Selemia 10:23) Meʼa fakaʼofaʼofa foki, he neʼe filifili e te ʼuluaki taumātuʼa ke nā agatuʼu ki te ʼAtua, tonā Pule. ʼAki tanā maumauʼi te lao, neʼe nā liliu ai ʼo agahala. (1 Soane 3:4) Koia neʼe nā pulihi ai tonā ʼuhiga haohaoa pea neʼe nā maʼuli mamahi ai ʼo fēia mo tonā hōloga.

Neʼe tuku e Sehova ke pule te tagata lolotoga te ʼu taʼu e lauʼi afe, pea ʼe hā ʼi te ʼu meʼa ʼaē neʼe hoko ʼi te temi ʼaia, ʼe mole feala ki te tagata ke ina takitaki te mālamanei. ʼE hā lelei ai ʼe fakatupu e te ʼu puleʼaga fakatagata fuli te mamahi. ʼE mole heʼeki he puleʼaga kua ina pulihi te tau, te fai fakapō, te heʼe faitotonu peʼe ko te mahaki.

ʼE Pulihi Feafeaʼi Anai e Te ʼAtua Ia Te Mamahi?

ʼE fakapapau ʼi te Tohi-Tapu kua vave pē anai te fakatuʼu e te ʼAtua ia he mālama foʼou mo faitotonu. (2 Petelo 3:13) Ko te hahaʼi ʼaē kā māʼuʼuli anai ʼi ai ʼe ko nātou pē ʼaē ʼe natou filifili ʼaki tonatou loto faʼitaliha ke natou ʼoʼofa ki te hahaʼi pea mo te ʼAtua.—Tetelonome 30:15, 16, 19, 20.

ʼE toe ʼui ʼi te Tohi-Tapu, ʼi “te aho o te fakamaau” ʼaē kua vave hoko mai, ʼe pulihi anai e te ʼAtua te ʼu mamahi pea mo nātou ʼaē ʼe tupu mai ai te mamahi. (2 Petelo 3:7) Hili ʼaia pea ko Sesu Kilisito, te Pule ʼaē neʼe hinoʼi e te ʼAtua, ʼe pule anai ki te hahaʼi fakalogo. (Taniela 7:13, 14) Koteā ʼaē kā fakahoko anai e te pule ʼa Sesu? ʼE ʼui fēnei ʼi te Tohi-Tapu: “E mau e te kau masiva te fenua, pea e natou fiafia lahi i te tokalelei.”—Pesalemo 37:11.

Ko Sesu, ʼaē ko te Hau ʼi selō, ʼe ina pulihi anai te ʼu mamahi, ʼo kau ai mo te mahaki, mo te vaivai matuʼa, pea mo te mate, ʼaē neʼe tupu ʼi te temi ʼaē neʼe agatuʼu ai te tagata kiā Sehova, “te matapuna o te mauli.” (Pesalemo 36:10) ʼE fakamālōlō anai e Sesu ia nātou fuli ʼaē ʼe natou fakalogo ki tana takitaki ʼofa. ʼI tona ʼuhiga pule, ʼe ina fakahoko anai te ʼu fakapapau ʼaenī:

◼ “E mole ui e he tahi: e au mahaki.”—Esaia 33:24.

◼ “[Ko te ʼAtua] e ina holoholoi anai te u loimata fuli mai onatou mata, pea e mole toe mau anai te mate: e mole toe mau anai he tagi, mo he lauga, mo he mamahi, koteuhi kua puli leva te u uluaki mea.”—Apokalipisi 21:4.

ʼE mole fakalotofīmālie koa lā hatatou ʼiloʼi kua vave fakahoko e te ʼAtua tana fakapapau ʼaē ke ina pulihi te ʼu mamahi? ʼO fakatalitali ki te temi ʼaia, ʼe mole tonu ke tou lotolotolua peʼe fakalogo koa te ʼAtua ki ʼatatou faikole ʼuhi pē heʼe ina fakagafua te ʼu mamahi.

ʼE feala pē ki te ʼAtua ke fakalogo ki ʼakotou faikole, māʼia mokā kotou fakahā age tokotou lotomamahi. Pea ʼe fakaʼamu lahi ia ke sio atu ʼe kotou maʼuli fiafia heʼe mole kei kotou lotolotolua anai pea mo lotomamahi.