Ke Malohi Takolua Nofo ʼOhoana ʼAki Takolua Faipalalau Lelei

1. Kotea te ʼu fua lelei moka faipalalau he taumatuʼa?

NEʼE ui fenei e te tehina ʼi Kanata: “ ʼE mole au fia nofo au mo he tahi age ʼi toku ʼohoana.” Neʼe hoko atu ʼo ina ui ʼe lahi age tona fiafia moka nofo mo tona ʼohoana ʼi te ʼu temi fakafiafia pea mo faigafua age te katakiʼi ʼo te ʼu temi faigataʼa. Neʼe tohi fenei e te tagata ʼohoana ʼi ʼOsitalalia: “ ʼI te ʼu taʼu ʼaeni ʼe 11 ʼo tamā ʼohoana, neʼe mole fakalaka he ʼaho kaʼe mole au palalau ai mo toku ʼohoana.” Neʼe ina ui, ʼi tanā faipalalau ʼaia, neʼe nā liliu ai ʼo fefalalaʼaki katoa pea mo malohi tanā nofo ʼohoana. Neʼe tohi e te tuagaʼane ʼi te fenua ʼo Costa Rica, ʼe fiafia tonā maʼuli fakataumatuʼa ʼuhi he nā faipalalau. Neʼe ina ui fenei: “ ʼE lelei age ai ʼamā felogoʼi mo Sehova, ʼe ma hao mai te ʼu fakahala, ʼe ma logotahi, pea ʼe tuputupu mo tomā feʼofaʼaki.”

2. He ko ʼe ʼe feala ke faigataʼa ki he taumatuʼa hanā faipalalau lelei?

² ʼE kolua faipalalau koa ʼi tokolua maʼuli fakataumatuʼa? ʼE moʼoni, ʼe feala anai ʼi ʼihi temi ke faigataʼa hakolua faipalalau. ʼE kolua heʼe haohaoa tokolua, pea ʼe mole tatau ʼokolua ʼuluagaaga. (Loma 3:23) ʼE lagi kehekehe ʼakolua aga ʼi fenua pe neʼe mole tatau tokolua pusiaki. Koia ʼe lagi mole tatau ai takolua faʼahiga faipalalau. Koia ko John M. Gottman mo Nan Silver, te ʼu tagata faitokoni ʼo ʼuhiga mo te nofo fakataumatuʼa, ʼe nā ui ʼe tonu ke gaue kinakina he taumatuʼa moka ʼe nā loto ke nā faipalalau lelei pea ke tologa tanā nofo ʼohoana.

3. Kotea ʼae neʼe tokoni ki ʼihi taumatuʼa ke malohi tuʼumaʼu tonatou nofo ʼohoana?

³ ʼE moʼoni, ʼe tonu anai ke gaue kinakina he tagata mo he fafine ke malohi tonā maʼuli fakataumatuʼa, kaʼe ʼe nā fiafia moʼoni ai anai. (Ekl. 9:9) Kotou manatuʼi ia te taumatuʼa ko Isaake mo Lepeka, ʼae neʼe feʼofaniʼaki. (Sen. 24:67) ʼE fakaha ʼi te Tohi-Tapu neʼe malohi tuʼumaʼu pe tanā feʼofaʼaki hili te temi loaloaga. Ia ʼaho nei, ʼe lahi te ʼu taumatuʼa ʼe kei malohi pe tonatou maʼuli fakataumatuʼa. Kotea ʼae neʼe tokoni kia natou? Neʼe natou ako ke natou fefakahaʼaki fakahagatonu ʼanatou manatu mo te ʼu meʼa ʼe natou logoʼi, kaʼe ʼaki te agalelei. Pea ʼe natou maʼu te fakasiosio tonu, mo te ʼofa, mo te fakaʼapaʼapa, pea mo te agavaivai. Tou vakaʼi pe tokoni feafeaʼi te ʼu agaaga ʼaia ki he taumatuʼa ke nā faipalalau lelei.

KOLUA MAʼU TE FAKASIOSIO TONU

4, 5. ʼE tokoni feafeaʼi te fakasiosio tonu ki he taumatuʼa ke nā femahinoʼaki? Kotou tuku mai he ʼu faʼifaʼitaki.

⁴ ʼE ui fenei ia Taaga Lea 16:20, MN: “Ko ia ʼae ʼe fakasiosio tonu ʼi he meʼa, ʼe ina maʼu anai te lelei.” ʼE tou maʼu ʼi te Folafola ʼa te ʼAtua te fakasiosio tonu mo te poto ʼae ʼe ʼaoga ke fiafia ai tatatou nofo ʼohoana. (Lau ia Taaga Lea 24:3.) Ohage la, ʼe ui ia Senesi 2:18, ko te ʼAtua neʼe ina fakatupu te fafine ko he fakakatoa ʼo te tagata. Ko tona fakaʼuhiga ʼe kehekehe te tagata mo te fafine, pea ʼe feala ai hanā fefakakatoaʼaki. Koia la ʼae ʼe mole tatau ai te ʼu meʼa ʼae ʼe palalau ki ai te fafine mo te tagata. Tokolahi te hahaʼi fafine ʼe natou fia fakaha te ʼu meʼa ʼae ʼe natou logoʼi, mo palalau ʼo ʼuhiga mo te hahaʼi, mo ʼanatou felogoʼi mo ʼihi. ʼE natou toe logoʼi ʼe ʼofainaʼi natou mo kapau ʼe natou faipalalau mo tonatou ʼohoana ʼi te ʼofa mo te fakahagatonu. ʼI te tahi age faʼahi, ʼe mole lagi fia fakaha e te hahaʼi tagata te ʼu meʼa ʼae ʼe natou logoʼi, kaʼe ʼe natou fia palalau ki te ʼu gaue, mo te ʼu fihifihia pea mo te ʼu puleʼaki. Pea ʼe natou loto foki ke fakaʼapaʼapaʼi natou.

⁵ Neʼe ui fenei e te tuagaʼane ʼi Pilitania: “ ʼE loto e toku ʼohoana ke ina foimo fakatokatoka te ʼu fihifihia, kaʼe ʼe mole fagono mai ia.” Neʼe ina ui ʼe fakatupu ita te faʼahi ʼaia, heʼe ʼamusia age ia ke fagono age tona ʼohoana pea mo mahino ki te ʼu meʼa ʼe ina logoʼi. Neʼe tohi fenei e te tagata ʼohoana: “ ʼI te kamata mai ʼo tomā maʼuli, neʼe au faiga pe au ke au foimo fakatokatoka he faigataʼaia neʼe tau mo toku ʼohoana.” Kaʼe neʼe mahino leva kia ia neʼe loto e tona ʼohoana ke fagono age ki ai. (Taag. 18:13; Sakp. 1:19) Ko te tagata ʼohoana ʼae ʼe fakasiosio tonu, ʼe ina iloʼi te ʼu meʼa ʼae ʼe logoʼi e tona ʼohoana pea mo mulimuli ki ai ke iloʼi e tona ʼohoana ʼe ʼofa ia ia. ʼE ina fakaha lelei ki tona ʼohoana ʼe maʼuhiga kia ia ʼana manatu mo te ʼu meʼa ʼae ʼe ina logoʼi. (1 Pet. 3:7) Pea ko te fafine ʼohoana ʼae ʼe fakasiosio tonu, ʼe faiga ke mahino ki te manatu ʼo tona ʼohoana. Ka mulimuli te tagata mo te fafine ʼohoana ki te ʼu tokoni ʼa te ʼAtua, ʼe nā fiafia anai pea ʼe feala ke nā felagolagoʼaki moʼo maʼu he ʼu puleʼaki fakapotopoto.

6, 7. (1) ʼE tokoni feafeaʼi ia Ekelesiasi 3:7 ke maʼu e he taumatuʼa te fakasiosio tonu? (2) ʼE fakaha feafeaʼi e te fafine ʼohoana te fakasiosio tonu moka palalau ki tona ʼohoana? Kotea ʼae ʼe faiga anai ke fai e te tagata ʼohoana?

⁶ ʼE tonu foki ke toe mahino ki te taumatuʼa ʼe ʼi ai “he temi ke fakalologo ai, pea mo he temi ke palalau ai.” (Ekl. 3:1, 7) Neʼe tohi e te tuagaʼane kua taʼu hogofulu tana kua ʼohoana, kua ina iloʼi ʼi te temi nei te ʼu lakaga ʼae ke palalau ai ki tona ʼohoana. Kapau ʼe sio ʼe hoha tona ʼohoana ʼuhi ko tana gaue pe ko he tahi age ʼu maʼua, pea ʼe fakatalitali ki te temi ʼae ʼe lelei age moʼo palalau ki ai. Pea ʼe lelei ai tanā faipalalau. Ka ʼaveʼave lelei e te fafine ʼohoana ʼana palalau pea mo ina fai ʼi tona lakaga totonu, pea ʼe fiafia anai tona ʼohoana ʼi te fagono kia ia.—Lau ia Taaga Lea 25:11.

⁷ Ko he tehina kua ʼohoana ʼe fagono moka palalau age tona ʼohoana, pea ʼe ina toe fakaha foki mo ia te ʼu meʼa ʼae ʼe ina logoʼi. Ko te tagata ʼafeā kua ʼohoana talu mai taʼu ʼe 27, neʼe ina ui fenei: “Neʼe faigataʼa ʼaupito kia au haku fakaha ki toku ʼohoana te ʼu meʼa ʼae ʼi toku loto.” Ko te tehina kua taʼu 24 tana kua ʼohoana, neʼe ina ui, ʼi te agamahani ʼe mole fia palalau ia ki te ʼu fihifihia. He neʼe manatu ia, kapau ʼe mole palalau ki ai pea ʼe puli tokotahi pe anai ia. Kaʼe ʼe ina hoko atu fenei: “Neʼe au mahino ai leva, neʼe mole ko he vaivaiʼaga ia te fakaha ʼo te ʼu meʼa ʼae ʼe au logoʼi. Moka faigataʼa kia au haku fakamahino he meʼa, ʼe au faikole ke au maʼu te ʼu kupu totonu pea mo tona faʼahiga ʼaveʼave. ʼOsi ʼaia, ʼe au manavā fakalelei, pea ʼe au kamata palalau ai leva.” ʼE maʼuhiga ke filifili e te taumatuʼa te temi ʼae ʼe lelei moʼo faipalalau ai, lagi moka nā vakaʼi tokolua te vaega ʼo te ʼaho peʼe nā lau te Tohi-Tapu.

8. Kotea ʼae ka tokoni ki he taumatuʼa ke nā loto moʼoni ʼo gaueʼi ke lelei age tanā faipalalau?

⁸ ʼE feala ke faigataʼa ki he taumatuʼa hanā fetogi tanā faʼahiga faipalalau. ʼE tonu ke nā kole te laumalie maʼoniʼoni ʼa te ʼAtua pea ke nā loto moʼoni ke nā gaueʼi ke lelei age tanā faipalalau. ʼE nā loto anai ki ai mo kapau ʼe nā ʼoʼofa ia Sehova, mo fia fakafiafia tona loto, pea mo taputapu kia naua te nofo ʼohoana. Ko te tuagaʼane kua ʼohoana talu mai taʼu ʼe 26, neʼe ina tohi fenei: “ ʼE maʼuhiga kia au mo toku ʼohoana te manatu ʼa Sehova ʼo ʼuhiga mo te ʼohoana, koia ʼe mole ma manatu ai ke ma mavete ʼi he ʼaho. ʼE tokoni mai te manatu ʼaia ke ma faiga ʼaupito ʼo fakatokatoka te ʼu fihifihia ʼaki tamā faipalalau ki ai.” Ko he taumatuʼa ʼe agatonu feia ki te ʼAtua, ʼe nā fakafiafia anai tona loto pea ʼe ina tapuakina anai naua.—Pes. 127:1.

KE TUPUTUPU TOKOLUA FEʼOFAʼAKI

9, 10. Kotea ʼae ʼe feala ke fai e he taumatuʼa ke tuputupu ai tanā feʼofaʼaki?

⁹ Ko te ʼofa ʼe maʼuhiga ʼaupito ʼi te nofo ʼohoana. ʼE ui ʼi te Tohi-Tapu ko te ʼofa ʼe “ko he noʼo haohaoa ia ki te logotahi.” (Kol. 3:14, MN) ʼAki te temi ʼe tuputupu te ʼofa moʼoni ʼa he taumatuʼa moka nā fakalaka ʼi te ʼu temi lelei mo te ʼu temi faigataʼa. ʼE nā liliu ʼo kaumeʼa lelei mo nā fiafia ʼi tanā fakatahi. Pea ʼe toe malohi mo tanā nofo ʼohoana, mole ʼuhi he nā fai he ʼu toe meʼa lalahi, ohage ko tona ha ʼi te ʼu ʼata peʼe ko te televisio. Kaʼe ʼe nā fai te ʼu kiʼi meʼa liliki, ohage la ʼe nā faʼufua, pe fai he ʼu palalau fakavikiviki, foaki he tokoni, pe ko he malimali, pe fehuʼi age pe neʼe feafeaʼi tana gaue. Ko te ʼu kiʼi meʼa liliki ʼaia ʼe ʼaoga ʼaupito ʼi te nofo fakataumatuʼa. Ko te taumatuʼa fiafia kua nā ʼohoana talu mai taʼu ʼe 19, ʼe nā ui ʼe nā fetelefoniʼaki peʼe fefaitohiʼaki tuʼumaʼu ʼi te telefoni toʼotoʼo moʼo iloʼi pe nā feafeaʼi.

¹⁰ Ka feʼofaʼaki he taumatuʼa, pea ʼe nā faiga ke hoko atu pe tanā feiloʼiʼaki. (Filp. 2:4) Kapau ʼe nā feiloʼiʼaki lelei age, pea ʼe tuputupu ʼo malohi age tanā feʼofaʼaki, logola ʼonā vaivaiʼaga. Ko he nofo ʼohoana fiafia ʼe liliu ʼo malohi age ʼaki te temi. Koia, kapau kua kotou ʼohoana, kotou fai te ʼu fehuʼi ʼaeni: “ ʼE au iloʼi lelei koa toku ʼohoana? ʼE au mahino koa ki te ʼu meʼa ʼae ʼe ina logoʼi pea mo ʼana manatu? ʼE au manatuʼi koa ʼi ʼihi temi te ʼu kalitate ʼae neʼe tupu ai taku manako ʼi toku ʼohoana?”

KE KOLUA FEFAKAʼAPAʼAPAʼAKI

11. He ko ʼe ʼe maʼuhiga ʼaupito ke fefakaʼapaʼapaʼaki he taumatuʼa? Kotou tuku mai he faʼifaʼitaki ʼi te Tohi-Tapu.

¹¹ Ko te taumatuʼa ʼae ʼe fiafia ʼe mole nā haohaoa. ʼE feala pe ʼi ʼihi temi ke mole nā manatu tahi. Ko Apalahamo mo Sala neʼe mole nā manatu tahi tuʼumaʼu. (Sen. 21:9-11) Kaʼe neʼe mole liliu ʼo vaivai tanā felogoʼi fakataumatuʼa. Kotea tona tupuʼaga? He neʼe nā fefakaʼapaʼapaʼaki. Neʼe ha te faʼahi ʼaia ʼi te faʼahiga palalau ʼa Apalahamo kia Sala. (Sen. 12:11, 13) Pea ko Sala neʼe fakalogo kia Apalahamo ʼo ina fakahigoa ia ia ʼi tona loto: “Toku aliki.” (Sen. 18:12) Kaʼe ko te taumatuʼa ʼae ʼe fepalalaukoviʼaki, ʼe nā fakaha ai ʼe mole nā fefakaʼapaʼapaʼaki. (Taag. 12:18) Pea kapau ʼe mole nā fefakaʼapaʼapaʼaki, pea ʼe feala ke tuʼutamaki tonā maʼuli fakataumatuʼa.—Lau ia Sakopo 3:7-10, 17, 18.

12. ʼI te kamata ʼo te maʼuli ʼa he taumatuʼa, he ko ʼe ʼe tonu ke nā faiga tafitō ʼo agalelei mo fakaʼapaʼapa moka nā palalau?

¹² ʼI te kamata ʼo te maʼuli ʼa he taumatuʼa, ʼe tonu ke nā faiga tafitō ʼo agalelei mo fakaʼapaʼapa moka nā palalau. ʼE faigafua age anai kia naua hanā faipalalau fakahagatonu. Neʼe ui e te tagata ʼohoana, ʼi te kamata ʼo tonā maʼuli, neʼe mole nā femahinoʼaki ki te ʼu meʼa ʼae neʼe nā logoʼi, mo ʼanā agamahani, pea mo te ʼu meʼa ʼae neʼe ʼaoga kia naua. Neʼe nā feʼitaʼaki ai ʼi ʼihi temi. Kaʼe neʼe feala pe hanā felogoʼi lelei he neʼe mole nā tuʼu ai pea mo nā gaohi meʼa fakakata. ʼE ina ui ʼe toe maʼuhiga foki te agavaivai, te kataki fualoa, pea mo te falala ʼae kia Sehova. ʼE ko he tokoni lelei ʼaia kia tatou fuli!

KOLUA FAKAHA TE AGAVAIVAI MOʼONI

13. He ko ʼe ʼe maʼuhiga ʼaupito te agavaivai ke fiafia ai te taumatuʼa?

¹³ ʼE lava faipalalau he taumatuʼa ʼi te agalelei mo te tokalelei, mo kapau ʼe nā “fakamalalo” peʼe nā agavaivai. (1 Pet. 3:8) Ko te tehina kua ʼohoana talu mai taʼu ʼe 11 neʼe ina ui ʼe feala ke fakatokatoka e he taumatuʼa ʼonā fihifihia moka ʼe nā agavaivai, heʼe faigafua ai tanā fai fakalelei. Ko te tagata ʼafeā ʼe fiafia ʼi tana nofo ʼohoana talu mai taʼu ʼe 20, neʼe ina ui fenei: “ ʼI ʼihi temi ʼe maʼuhiga age te ui ʼae fakalelei mai ʼi te ui ʼae ʼe au manako ia koe.” Neʼe ina ui neʼe tokoni lahi te faikole kia ia mo tona ʼohoana ke nā agavaivai. Neʼe hoko atu fenei: “Ka ma fakaovi tokolua kia Sehova, ʼe ma manatuʼi ai tomā ʼuhiga heʼe haohaoa pea mo te ʼofa makehe ʼa te ʼAtua.” Neʼe tokoni ai kia naua ke nā mahino ki tonā ʼuhiga moʼoni pea mo tonā fihifihia.

14. Kotea ʼae ʼe feala ke hoko moka fiameʼalahi te tagata peʼe ko te fafine ʼohoana?

¹⁴ Kaʼe ka fiameʼalahi te tagata peʼe ko te fafine ʼohoana, pea ʼe faigataʼa anai hanā faipalalau pea mo fakatokatoka ʼonā fihifihia. Ko he tahi ʼe fiameʼalahi ʼe mole lotomalohi ia ʼi te alu ʼo fai fakalelei. Kaʼe ʼe kumi takuʼaki ia ki te ʼu meʼa ʼae neʼe ina fai, peʼe ina tukugakoviʼi he tahi age kaʼe ʼe mole ina ui ko tana ia hala. Ka ita he tahi ʼe fiameʼalahi, pea ʼe mole ina kumi te tokalelei. ʼE fefeka ʼana palalau peʼe mole toe gu. (Ekl. 7:9) ʼE feala ke mavete he taumatuʼa moka ʼe nā fiameʼalahi. ʼE lelei ke tou manatuʼi “e tau te Atua kia natou ae e fiamealahi, kae e ina foaki tona kalasia kia natou ae e fakamalalo.”—Sakp. 4:6.

15. ʼE lava tokoni feafeaʼi ia Efeso 4:26, 27 ki he taumatuʼa moka nā fetokakoviʼaki?

¹⁵ Ka fetokakoviʼaki te taumatuʼa, ʼe tonu ke nā foimo fakatokatoka, kaʼe mole nā maʼu te fiameʼalahi. Neʼe ui fenei e Paulo ki te kau Kilisitiano: “Ke aua naa to te laa i oluga o tokotou ita, koteuhi ke aua naa kotou tuku he uluaga ki te tiapolo.” (Efe. 4:26, 27) Kotea ʼae ka hoko mo kapau ʼe mole mulimuli he taumatuʼa ki te tokoni ʼaia mai te Folafola ʼa te ʼAtua? Neʼe ui fenei e te tuagaʼane: “ ʼI te ʼu po ʼaia neʼe mole au mamoe!” ʼE lelei age ke foimo fakatokatoka te fihifihia ʼi te tokalelei. ʼE mahino ia ʼe tonu anai ke malū ifo te taumatuʼa ʼi he kiʼi temi pea hoki feala leva hanā palalau ki te faʼahi ʼaia. Pea ʼe tonu anai ke nā kole kia Sehova ke tokoni age ke nā agavaivai. ʼE feala ai anai ke nā tokakaga tafitō ʼo fakatokatoka te fihifihia, kaʼe mole nā fakamuʼamuʼa tonā kiʼi foʼi loto.—Lau ia Kolose 3:12, 13.

16. ʼE tokoni feafeaʼi te agavaivai ke maʼuhiga ki he tahi te ʼu kalitate mo te ʼu fealagia ʼo tona ʼohoana?

¹⁶ Ko he tahi ʼe agavaivai, ʼe maʼuhiga kia ia te ʼu kalitate mo te ʼu fealagia ʼo tona ʼohoana. Ohage la, ʼe lagi poto te fafine ʼohoana ʼi he aluʼaga, ʼo ina fakaʼaogaʼi moʼo tokoni ki tonā famili. ʼE mole faiga anai e te tagata ʼohoana agavaivai ke poto age ia ʼi tona ʼohoana, kaʼe ʼe ina fakalotomalohiʼi anai ia ke hoko atu tana fakaʼaogaʼi tona poto ʼaia. ʼE ina fakaha ai ʼe ʼofa pea ʼe maʼuhiga tona ʼohoana kia ia. (Taag. 31:10, 28; Efe. 5:28, 29) Pea ko te fafine ʼohoana agavaivai ʼe mole laupisi anai kia ia totonu peʼe ina valokiʼi tona ʼohoana heʼe mole poto ohage ko ia. Kua nā liliu “ko he kakano e tahi,” koia ka fiameʼalahi feia he tahi, pea ʼe ko naua tokolua ʼae ʼe mamahi.—Mat. 19:4, 5.

17. Kotea ʼae ʼe feala ke tokoni ke fiafia te ʼu taumatuʼa pea ke fakakololia ai ia Sehova?

¹⁷ ʼE mahino ia ʼe kolua fakaʼamu ke hage tokolua maʼuli fakataumatuʼa ko ʼae ʼo Apalahamo mo Sala, peʼe ko Isaake mo Lepeka. ʼE kolua loto ke kolua fiafia, ke tologa tokolua ʼohoana, pea ke fakakololia ai ia Sehova. Kapau koia, pea ke tatau takolua manatu mo te ʼAtua ʼo ʼuhiga mo te ʼohoana. Kolua maʼu te fakasiosio tonu ʼae ʼe maʼu ʼi tana Folafola. Ke maʼuhiga kia koe te ʼu kalitate ʼo tou ʼohoana, pea ke tuputupu ai tokolua feʼofaʼaki. (Ktk. 8:6) Kolua faiga lahi ke kolua fakaha te agavaivai. Ke ke fakaʼapaʼapa ki tou ʼohoana. Kapau ʼe kolua fai te ʼu faʼahi ʼaia, ʼe kolua fiafia anai pea toe fiafia mo takolua Tamai ʼi selo. (Taag. 27:11) Neʼe ui fenei e te tehina kua ʼohoana talu mai taʼu ʼe 27: “ ʼE mole au fia mavete mo toku ʼohoana ʼi he temi. ʼE malohi tuʼumaʼu pe tamā felogoʼi fakataumatuʼa ʼi te ʼaho fuli. Koteʼuhi heʼe ma ʼoʼofa ia Sehova pea ʼe ma faipalalau tuʼumaʼu.” ʼE feala ke toe malohi feia mo tokolua maʼuli fakataumatuʼa!