Tou Fai Ni Tonu ʼe Lelei Ke Tou Puipui Ai Totatou Tofiʼa

1, 2. (1) Kotea ʼae neʼe tupu ai takotou foaki tokotou maʼuli ki te ʼAtua? (2) Kotea te ʼu fehuʼi ʼe tou tali anai ki ai ʼi te alatike ʼaeni ʼo ʼuhiga mo totatou tofiʼa ʼae mai ia Sehova?

KO TE toko lau ʼi miliona hahaʼi neʼe natou fai te tonu lelei ʼae ke natou tauhi kia Sehova ʼAtua pea mo faʼifaʼitakiʼi ia Sesu Kilisito. (Mat. 16:24; 1 Pet. 2:21) Ko te foaki ʼo totatou maʼuli ki te ʼAtua, ʼe ko he tonu maʼuhiga ia neʼe tou fai. Neʼe mole tou fai te tonu ʼaia hili pe tatatou kua mahino ki he ʼu kiʼi vaega Tohi-Tapu. Kaʼe neʼe tou ako fakalelei ia te Tohi-Tapu pea mo malohi ai tatatou tui ki te tofiʼa ʼae ʼe fakapapau mai e Sehova. ʼE ina foaki anai te tofiʼa ʼaia kia natou fuli ʼae ʼe hoko atu tanatou ako ke natou iloʼi ia ia mo Sesu Kilisito.—Soa. 17:3; Loma 12:2.

² Kapau ʼe tou loto ke hoko atu tatatou felogoʼi lelei mo Sehova, pea ʼe tonu ke tou haga fai ni tonu ʼe lelei, ʼe fakafiafia ai tona loto. ʼI te alatike ʼaeni, ʼe tou tali anai ki te ʼu fehuʼi maʼuhiga ʼaeni: Kotea totatou tofiʼa? ʼE tonu ke maʼuhiga feafeaʼi kia tatou? Kotea ʼae ʼe tonu ke tou fai ke tou maʼu totatou tofiʼa? Kotea ʼae ka tokoni mai ke tou fai ni tonu ʼe lelei?

KOTEA TOTATOU TOFIʼA?

3. (1) Kotea te tofiʼa ʼae ka maʼu e te kau fakanofo? (2) Kotea te tofiʼa ʼae ka maʼu e te tahi ʼu ovi?

³ Ko te tokosiʼi pe ʼi te kau Kilisitiano ʼe natou maʼu anai te tofiʼa ʼae ko te maʼuli tuputupua ʼi selo. ʼE natou maʼu anai te pilivilesio makehe ʼae ke natou kauga hau mo Kilisito ʼi tona Puleʼaga. (1 Pet. 1:3, 4) Ko natou ʼae ka natou maʼu te tofiʼa ʼaia neʼe natou “tupu foou.” (Soa. 3:1-3) Kaʼe ʼe feafeaʼi ʼo ʼuhiga mo te toko lau ʼi miliona “tahi ʼu ovi” ʼa Sesu, ʼae ʼe natou lagolago ki te kau fakanofo moʼo fakamafola te logo lelei ʼo te Puleʼaga ʼa te ʼAtua? (Soa. 10:16, MN) Ko te tahi ʼu ovi ʼe natou maʼu anai te faʼahi ʼae neʼe mole maʼu e Atama mo Eva, ʼae ko te maʼuli heʼe gata ʼi te palatiso ʼi te kele, ʼe mole toe ʼi ai te mamahi, te mate, pea mo te putu. (Apk. 21:1-4) ʼI te pou fakamamahi, neʼe fakapapau e Sesu ki te tahi tagata, ʼe ina maʼu anai te tofiʼa ʼaia. Neʼe ui fenei e Sesu: “ ʼE au tala moʼoni atu kia te koe ʼi te ʼaho nei, ʼe ke ʼi te Palatiso anai mo au.”—Luka 23:43, MN.

4. Kotea te ʼu tapuakina ʼae kua tou maʼu?

⁴ Kaʼe ʼe toe kau ki totatou tofiʼa he ʼu tapuakina kua tou maʼu ʼi te temi nei. ʼI tatatou tui ki “te totogi e mau ia Sesu-Kilisito,” kua tokalelei totatou loto pea mo tou felogoʼi lelei mo te ʼAtua. (Loma 3:23-25) Kua tou mahino lelei ki te ʼu fakapapau ʼae ʼe tuʼu ʼi te Tohi-Tapu ʼo ʼuhiga mo te ka haʼu. ʼE tou fiafia ʼaupito ʼi tatatou sio ki te feʼofaʼaki ʼo ʼotatou tehina mo tuagaʼane ʼi te malamanei katoa. Pea ko tatou ko te ʼu Fakamoʼoni ʼa Sehova. ʼE ko he toe pilivilesio lahi! Koia, ʼe tou maʼu ni tupuʼaga lelei ke tou loto fakafetaʼi ai ʼo ʼuhiga mo totatou tofiʼa.

5. Kotea ʼae ʼe faiga e Satana ke ina fai ki te hahaʼi ʼa te ʼAtua? Kotea ʼae ka tokoni mai ke mole tou to ki te ʼu hele ʼa Satana?

⁵ Ke tou taupau totatou tofiʼa ʼaia, ʼe tonu ke tou tokakaga ke mole tou to ki te ʼu hele ʼa Satana. ʼE faiga tuʼumaʼu pe e Satana ke ina fakaneke te hahaʼi ʼa te ʼAtua ke natou fai ni tonu ʼe kovi, ke puli ai tonatou tofiʼa. (Num. 25:1-3, 9) ʼE iloʼi e Satana kua vave pe tona fakaʼauha, koia ʼe faiga malohi ai ke ina fakaneke tatou ke tou fai he aga ʼe kovi. (Lau ia Apokalipisi 12:12, 17.) Kapau ʼe tou fia “tuu o fehagai ki te u puleaki kaka a te tiapolo,” pea ʼe tonu ke maʼuhiga tuʼumaʼu kia tatou totatou tofiʼa. (Efe. 6:11) ʼE feala hatatou taʼofi he ʼu ako maʼuhiga mai te manatu ʼae neʼe maʼu e Esau, te foha ʼo Isaake ʼo ʼuhiga mo tona tofiʼa.

ʼAUA NAʼA TOU HAGE KO ESAU

6, 7. Neʼe ko ai ia Esau? Neʼe kotea te tofiʼa neʼe feala ke ina maʼu?

⁶ Kua hili ki ai teitei taʼu ʼe 4 000, neʼe fanauʼi e Lepeka te mahagā, ko Esau mo Sakopo. Neʼe kehekehe te mahagā ʼaia. “Nee poto leva ia Esau i te kapu manu, ko he tagata taka uta ia ia,” kaʼe ko Sakopo neʼe “ko he tagata [“neʼe mole hana laka hala,” MN], ae nee nofo mau i te u falela.” (Sen. 25:27) Neʼe ui ko Sakopo neʼe mole hana laka hala he neʼe agatonu ia pea neʼe mole ina fai he aga ʼe kovi.

⁷ ʼI te taʼu 15 ʼa Esau mo Sakopo, neʼe mate tanā kui tagata ko Apalahamo. Kaʼe neʼe manatuʼi pe e Sehova tana fakapapau ʼae kia Apalahamo. Ki muli age, neʼe toe fakahoko e Sehova tana fakapapau ʼaia kia Isaake. Neʼe ui e te ʼAtua ʼe tapuakina anai te ʼatu puleʼaga fuli ʼo te kele ʼaki te “hakoga” ʼo Apalahamo. (Lau ia Senesi 26:3-5.) Neʼe fakaha ai e te ʼAtua ʼe hifo anai mai ia Apalahamo he tahi ka liliu anai ko te Mesia, peʼe ko te “hakoga” agatonu ʼae ʼe talanoa ki ai ia Senesi 3:15. Mai tona aluʼaga ʼae neʼe ko Esau te foha lahi ʼo Isaake, neʼe tonu ke toe fakahoko kia ia te fakapapau ʼae neʼe fai e te ʼAtua kia Apalahamo. Koia, neʼe tonu ke hifo te Mesia mai te hakoga ʼo Esau. Neʼe ko he toe tofiʼa fakatalakitupua ʼaia maʼa Esau! Kaʼe neʼe maʼuhiga koa kia ia?

8, 9. (1) Kotea te tonu neʼe fai e Esau ʼo ʼuhiga mo tona tofiʼa? (2) Hili ʼaia ni taʼu, kotea ʼae neʼe mahino kia Esau ʼo ʼuhiga mo te tonu ʼaia neʼe ina fai? Pea kotea ʼae neʼe ina logoʼi?

⁸ ʼI te tahi ʼaho, neʼe haʼu Esau mai te gaueʼaga, pea neʼe sio ia “nee fai . . . e Sakopo he supa.” Neʼe ui fenei age e Esau: “E au kole atu kia koe ke ke foaki [fakavilivili] mai kia au he pa lenitili mai te supa aia ke au kai, koteuhi kua au vaivai osi.” Neʼe ui fenei e Sakopo: “Ke ke fakatau mai kia au i te aho nei [“tou tofiʼa ʼo te ʼuluaki tupu,” MN].” Kotea ʼae neʼe filifili e Esau? Neʼe ina ui ʼe mole hona ʼaoga kia ia tona tofiʼa ʼo te ʼuluaki tupu, ʼo ina filifili ai te pa lenitili. Neʼe fia iloʼi papau e Sakopo peʼe fakatau moʼoni age e Esau tona tofiʼa ʼo te ʼuluaki tupu, koia neʼe ina kole age ke ina fai he fakapapau. Neʼe ui fenei e Sakopo: “Fakapapau mai kia au i te aho nei.” Neʼe fakatau ai e Esau tona tofiʼa ʼo te ʼuluaki tupu, kaʼe neʼe mole ina toʼo he temi moʼo fakakaukau ki ai. Hili ʼaia, “pea nee foaki leva e Sakopo kia Esau he pane mo he pa lenitili. Nee kai leva ia ia mo inu, pea nee tuu ake leva ia ia o alu.” Neʼe fakaha ai e Esau tana fehiʼa ki tona tofiʼa ʼo te ʼuluaki tupu pea neʼe mole maʼuhiga kia ia.—Sen. 25:29-34.

⁹ Hili ʼaia ni taʼu, neʼe logoʼi e Isaake kua vave mate pe, pea neʼe fai e Lepeka te ʼu fakatuʼutuʼu ke maʼu e Sakopo te tofiʼa ʼo te ʼuluaki tupu ʼae neʼe fakatau age e Esau. ʼI te mahino ʼa Esau neʼe kovi te tonu ʼae neʼe ina fai ke ina fakatau te tofiʼa ʼo te ʼuluaki tupu, neʼe ina kole mamahi fenei kia Isaake: “Tapuaki mai foki kia au, siaku tamai! . . . Pe e mole ke nofo mo he tahi age tapuaki kia au?” ʼI te ui age e Isaake kia Esau ʼe mole feala ke ina toe fetogi te tapuakina ʼae kua ina ʼosi foaki kia Sakopo, neʼe tagi leva ia Esau ʼi te lahi ʼo tona mamahi.—Sen. 27:30-38.

10. Neʼe kotea te manatu ʼa Sehova ʼo ʼuhiga mo Esau pea mo Sakopo, pea kotea tona tupuʼaga?

¹⁰ Kotea ʼae ʼe ha mai ʼi te aga ʼa Esau? Neʼe ina fakaha neʼe maʼuhiga age kia ia ʼona holi fakasino ʼi te ʼu tapuakina ʼae neʼe fakapapau e Sehova ka ina maʼu anai mai tona tofiʼa ʼaia. Neʼe mole maʼuhiga kia Esau tona tofiʼa ʼo te ʼuluaki tupu pea neʼe mole ʼofa moʼoni ia ʼi te ʼAtua. Pea neʼe mole ina fakakaukauʼi te ʼu fua ʼo tana aga ki tona hakoga. Kaʼe neʼe mole feia ia Sakopo. Neʼe maʼuhiga moʼoni kia ia tona tofiʼa pea neʼe ina fai ni tonu ʼe lelei moʼo puipui te tofiʼa ʼaia. Ohage la, neʼe lotolelei Sakopo ke mulimuli ki te tokoni ʼae neʼe fai age e ʼana matuʼā ʼo ʼuhiga mo tana filifili hona ʼohoana. (Sen. 27:46–28:3) Neʼe mole faigafua kia ia. Kaʼe neʼe tapuakina e Sehova tana fakalogo, he neʼe hifo te Mesia mai te hakoga ʼo Sakopo. Neʼe kotea te manatu ʼa te ʼAtua ʼo ʼuhiga mo Esau pea mo Sakopo? Neʼe ui fenei e Sehova: “Nee au ofa kia Sakopo, pea nee au mau he fehia kia Esau.”—Mala. 1:2, 3.

11. (1) He ko ʼe ʼe ʼaoga kia tatou kau Kilisitiano te aga ʼa Esau? (2) ʼI tana fakamatala te aga ʼa Esau, he ko ʼe neʼe toe palalau Paulo ki te feʼauʼaki?

¹¹ ʼE ʼi ai koa hona ʼaoga kia tatou te aga ʼa Esau? Neʼe fakatokaga e te apositolo ko Paulo ki te kau Kilisitiano ke ʼaua “naa i ai he tahi e feauaki, pee ko he tahi e fakakelekele o hage ko Esau, ae nee ina totogi he pa meakai e tahi aki [“tona tofiʼa ʼo te ʼuluaki tupu,” MN].” (Hep. 12:16) ʼE toe ʼaoga kia tatou te fakatokaga ʼaia. ʼE tonu ke maʼuhiga tuʼumaʼu kia tatou te ʼu meʼa taputapu, ke tou tekeʼi ai te fakahala pea mo puipui totatou tofiʼa. ʼI tana fakamatala te aga ʼa Esau, he ko ʼe neʼe toe palalau Paulo ki te feʼauʼaki? Koteʼuhi, kapau ʼe tou hage ko Esau ʼo mole tou lolomi ʼotatou holi fakasino, pea ʼe faigafua anai hatatou fai he agahala, ohage ko te feʼauʼaki, ʼo puli ai totatou tofiʼa.

KOTOU TEUTEUʼI TOKOTOU LOTO ʼI TE TEMI NEI

12. (1) ʼE faiga feafeaʼi e Satana ke ina fakahalaʼi tatou takitokotahi? (2) Ko te ʼu faʼifaʼitaki Fakatohi-tapu fea ʼe lava tokoni mai moka tou fia fai he aga ʼe kovi?

¹² ʼI tatatou kaugana kia Sehova, ʼe tou faiga ke mole tou to ʼi ni aluʼaga ʼe feala ke tou fai ai he aga heʼe ʼaoga. Pea kapau ʼe fakahalaʼi tatou e he tahi, ʼe tou faikole kia Sehova ʼAtua ke tokoni mai ke mole tou to ki te fakahala ʼaia. (Mat. 6:13) ʼE tou gaue malohi ke tou nonofo agatonu ʼi te malama agakovi ʼaeni, kaʼe ʼe faiga tuʼumaʼu pe e Satana ke ina fakavaivaiʼi ʼatatou felogoʼi mo Sehova. (Efe. 6:12) Ko Satana te ʼatua ʼo te tuʼu agakovi ʼaeni, pea ʼe ina iloʼi te fakaʼaogaʼi ʼo te ʼu fakahala ke fakahoko ai e te hahaʼi ʼonatou holi kovi. (1 Ko. 10:8, 13) ʼE ina lolotoga fai te faʼahi ʼaia kia tatou takitokotahi. ʼE feafeaʼi mo kapau ʼe kotou fia fai he aga heʼe ʼaoga moʼo fakafimalie ʼokotou holi? Kotea ka kotou filifili anai? ʼE kotou hage anai koa ko Esau, ʼae neʼe to fakavilivili ki te fakahala? Peʼe kotou tekeʼi anai koa te fakahala ʼaia ʼo kotou hola mamaʼo mai ai, ohage ko tona fai e Sosefo, te foha ʼo Sakopo, ʼi tona fakahalaʼi e te ʼohoana ʼo Potifale?—Lau ia Senesi 39:10-12.

13. (1) Ia ʼaho nei, ʼe fakaha feafeaʼi e te tokolahi ʼe natou hage ko Sosefo, kaʼe ʼe fakaha feafeaʼi e ʼihi ʼe natou hage ko Esau? (2) Kotea ʼae ʼe tonu ke tou fai ke mole tou hage ai ko Esau?

¹³ Tokolahi ʼi ʼotatou tehina mo tuagaʼane ʼe fakahalaʼi natou, pea ʼe tonu ai ke natou filifili pe natou hage ko Esau peʼe ko Sosefo. Tokolahi neʼe natou aga fakapotopoto, ʼo natou fakafiafia te loto ʼo Sehova. (Taag. 27:11) Kaʼe ʼe filifili e ʼihi ke natou hage ko Esau pea neʼe mole natou puipui tonatou tofiʼa. ʼE tokolahi natou ʼe fakatonutonuʼi peʼe fakamavae ʼi te taʼu fuli ʼuhi he neʼe natou fai he aga heʼe ʼaoga. Koia, ʼe maʼuhiga ʼaupito ke tou teuteuʼi totatou loto ʼi te temi nei, ke tou malohi ai moʼo tekeʼi te ʼu fakahala fuli pe. (Pes. 78:8) ʼE tou vakaʼi anai faʼahi ʼe lua ʼe feala ke tou malolohi ai moʼo tekeʼi te fakahala pea mo fai ni tonu ʼe lelei ki muli age.

TOU FAKAKAUKAU PEA MO TOU MALOLOHI

14. Kotea te ʼu fehuʼi ka tokoni mai anai ke tou fehiʼa ki te meʼa ʼae ʼe kovi kaʼe tou ʼofa ki te meʼa ʼae ʼe lelei?

¹⁴ Ko te ʼuluaki faʼahi ʼe feala ke tou fai ko te fakakaukau ki te ʼu fua ʼo tatatou aga. Kapau ʼe lahi totatou ʼofa ia Sehova, pea ʼe maʼuhiga ʼaupito anai kia tatou totatou tofiʼa. Ka tou ʼofa ʼi he tahi, ʼe mole tou fakalotomamahi anai ia ia, kaʼe ʼe tou faiga anai ke fiafia. Koia, ʼe tou toʼo anai he temi ke tou fakakaukau ki te ʼu fua ʼo tatatou aga, te lotomamahi ka tou logoʼi anai ʼo feia mo ʼihi atu mo kapau ʼe tou agahala. ʼE feala ke tou fai te ʼu fehuʼi ʼaeni: “Kapau ʼe au manatu pe au kia au totonu, pea kotea anai tona fua ki ʼaku felogoʼi ʼae mo Sehova? ʼE feafeaʼi anai toku famili mo kapau ʼe au agahala? ʼE feafeaʼi anai ʼoku tehina mo tuagaʼane ʼo te kokelekasio? ʼE tukia anai koa ʼihi ʼuhi ko taku aga?” (Loma 14:13) ʼE feala ke tou fai mo te ʼu fehuʼi ʼaeni: “Kotea koa tona ʼaoga kia au haku fakafiafia ʼi he kiʼi temi ʼo fai he aga heʼe ʼaoga, kaʼe ʼe au loto mamahi anai ki muli age? ʼE au fia hage koa ko Esau, ʼae neʼe tagi ʼi te lahi ʼo tona loto mamahi ʼi tana mahino ʼae ki te ʼu fua ʼo tana agahala?” (Hep. 12:17) Kapau ʼe tou fakakaukauʼi lelei te ʼu fehuʼi ʼaia, pea ʼe tou fehiʼa anai ki te meʼa ʼae ʼe kovi kaʼe tou ʼofa ki te meʼa ʼae ʼe lelei. (Loma 12:9) Kapau ʼe tou ʼofa moʼoni ia Sehova, pea ʼe tou faiga malohi anai ke tou puipui totatou tofiʼa.—Pes. 73:28.

15. Kotea ʼae ka tokoni mai ke tou malolohi moʼo tekeʼi te fakahala pea mo puipui ʼatatou felogoʼi ʼae mo te ʼAtua?

¹⁵ Lua, ʼe tonu ke tou malolohi ke feala ai hatatou tekeʼi te fakahala. Neʼe fai e Sehova maʼa tatou he ʼu fakatuʼutuʼu ke tou malohi ai moʼo tekeʼi te ʼu fakahala ʼo te malama pea mo puipui ʼatatou felogoʼi ʼae mo ia. Ohage la, ʼe ina fakaha mai pe feafeaʼi hatatou maʼu ni fua lelei mai te ako ʼo te Tohi-Tapu, mo te ʼu fono, mo te faifakamafola, pea mo te faikole. (1 Ko. 15:58) ʼI te temi fuli pe ʼae ʼe tou avahi ai totatou loto kia Sehova ʼi te faikole pea ʼi te temi fuli pe ʼae ʼe tou faiga lahi ai ʼi te faifakamafola, ʼe tou liliu ai ʼo malolohi moʼo tekeʼi te ʼu fakahala. (Lau ia 1 Timoteo 6:12, 19.) ʼE tonu ke tou faiga fakamalotoloto ʼo fai hoholo te ʼu faʼahi ʼaia mo kapau ʼe tou fia malolohi moʼo tekeʼi te ʼu fakahala. (Kal. 6:7) ʼE fakaha lelei te faʼahi ʼaia ʼi te kapite lua ʼo Taaga Lea.

“[HAGA] KUMI TE POTO”

16, 17. Kotea ʼae ka tokoni mai ke tou fai ni tonu ʼe lelei?

¹⁶ ʼE fakalotomalohiʼi tatou ʼi te kapite 2 ʼo Taaga Lea ke tou gaue kinakina moʼo maʼu te poto mo te fealagia fakakaukau. Ko te ʼu kalitate ʼaia neʼe foaki mai e Sehova ke feala hatatou filifili te meʼa ʼae ʼe lelei peʼe ko ʼae ʼe kovi, pea ke tou lolomi ʼotatou holi kaʼe ke mole tou fai he aga heʼe ʼaoga moʼo fakafimalie te ʼu holi ʼaia. Kaʼe ʼe fakalogo te faʼahi ʼaia ki tatatou lotolelei ke tou gaue kinakina. ʼE fakamahino fenei ʼi te Tohi-Tapu: “Oi toku foha, kapau e ke taofi aku palalau, pea kapau e ke taupau aku pelesepeto ia koe, kapau e ke ako tou taliga ke tokaga ki te poto, pea kapau e ke peluki tou loto ki te atamai; io, kapau e ke kole te poto, pea kapau e kalaga tou leo ki te atamai, kapau e ke kumi te poto o hage ko te paaga, kapau e ke tuli ia ia o hage ko he koloa fakafufu, pea e ke mahino anai ki te mataku [kia Sehova], pea e ke mau anai te iloilo o te Atua. Koteuhi e foaki e [Sehova] te poto; e hau mai tona gutu te iloilo mo te atamai.”—Ko matou ʼae neʼe matou fakailoga keheʼi; Taag. 2:1-6.

¹⁷ Kapau ʼe tou fai te ʼu faʼahi ʼae ʼe tuʼu ʼi te ʼu vaega ʼaia, pea ʼe feala anai hatatou fai ni tonu ʼe lelei. ʼE tou lava tekeʼi te fakahala mo kapau ʼe tou tuku te ʼu folafola ʼa Sehova ke ina fetogi totatou ʼuhiga ʼo loto, mo kapau ʼe tou haga kole te takitaki ʼa te ʼAtua, pea mo kapau ʼe tou haga kumi ke tou iloʼi lelei te ʼAtua ohage ko hatatou kumi he ʼu koloa neʼe fufu.

18. Kotea ʼae ka kotou haga fai anai, pea kotea tona tupuʼaga?

¹⁸ ʼE foaki e Sehova te ʼatamai, te mahino, te fakasiosio tonu, mo te poto kia natou ʼae ʼe faiga ke natou maʼu te ʼu kalitate ʼaia. Kapau ʼe tou haga kumi te ʼu kalitate ʼaia pea mo fakaʼaogaʼi, pea ʼe lelei age anai ʼatatou felogoʼi mo Sehova ʼAtua. Pea ko ʼatatou felogoʼi lelei ʼaia mo Sehova ʼe ina puipui anai tatou moka fakahalaʼi tatou. Kapau ʼe tou nofo ovi kia Sehova mo manavasiʼi kia te ia, ʼe tou faiga malohi anai ke ʼaua naʼa tou agahala. (Pes. 25:14; Sakp. 4:8) Ko tatatou fakakaumeʼa mo Sehova pea mo te poto ʼae ʼe ina foaki mai, ʼe tokoni mai ke tou fai ni tonu ʼe lelei moʼo fakafiafia tona loto pea mo puipui ai totatou tofiʼa.